| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
ஸிக்கா²பச்சக்கா²னகதா²வண்ணனா
Sikkhāpaccakkhānakathāvaṇṇanā
எத்த² யாமீதி அமுகஸ்மிங் தித்தா²யதனே, க⁴ராதி³ம்ஹி வா. பா⁴வவிகப்பாகாரேனாதி ‘‘அஹங் அஸ்ஸ’’ந்தி ஆக³தத்தா யங் யங் ப⁴விதுகாமோ, தஸ்ஸ தஸ்ஸ பா⁴வஸ்ஸ விகப்பாகாரேன, பி⁴க்கு²பா⁴வதோ அஞ்ஞபா⁴வவிகப்பாகாரேனாதி அதி⁴ப்பாயோ.
Etthayāmīti amukasmiṃ titthāyatane, gharādimhi vā. Bhāvavikappākārenāti ‘‘ahaṃ assa’’nti āgatattā yaṃ yaṃ bhavitukāmo, tassa tassa bhāvassa vikappākārena, bhikkhubhāvato aññabhāvavikappākārenāti adhippāyo.
46. ஹந்தா³தி வசஸாயேவ. கி³ஹிபா⁴வங் பத்த²யமானோதிஆதி³பதே³ஹி சித்தனியமங் த³ஸ்ஸேதி. ஏகேனேவ சித்தேன ஸிக்கா²பச்சக்கா²னங் ஹோதி, ந தத³பா⁴வேனாதி.
46.Handāti vacasāyeva. Gihibhāvaṃ patthayamānotiādipadehi cittaniyamaṃ dasseti. Ekeneva cittena sikkhāpaccakkhānaṃ hoti, na tadabhāvenāti.
51. பு³த்³த⁴ங் த⁴ம்மந்திஆதி³பதே³ஹி கெ²த்தனியமங் த³ஸ்ஸேதி. தத்த² ஆதி³தோ சுத்³த³ஸஹி பதே³ஹி ஸபா⁴வபரிச்சாகோ³, பச்சி²மேஹி அட்ட²ஹி பா⁴வந்தராதா³னஞ்ச த³ஸ்ஸிதங் ஹோதி. பச்சக்கா²மி தா⁴ரேஹீதி ஏதேஹி காலனியமங் த³ஸ்ஸேதி. வத³தீதி இமினா பதே³ன பயோக³னியமங் த³ஸ்ஸேதி. விஞ்ஞாபேதீதி இமினா விஜானநனியமங் த³ஸ்ஸேதி. உம்மத்தகோ ஸிக்க²ங் பச்சக்கா²தி, உம்மத்தகஸ்ஸ ஸந்திகே ஸிக்க²ங் பச்சக்கா²தீதிஆதீ³ஹி புக்³க³லனியமங் த³ஸ்ஸேதி. அரியகேன மிலக்க²ஸ்ஸ ஸந்திகே ஸிக்க²ங் பச்சக்கா²தீதிஆதீ³ஹி பன புக்³க³லாதி³னியமேபி ஸதி விஜானநனியமாஸம்ப⁴வங் த³ஸ்ஸேதி. தத்த² ‘‘யாய மிலக்க²பா⁴ஸாய காலனியமோ நத்தி², தாயபி பா⁴ஸாய காலனியமத்த²தீ³பனே ஸதி ஸிக்கா²பச்சக்கா²னங் ருஹதீதி நோ மதீ’’தி ஆசரியோ. த³வாயாதிஆதீ³ஹி கெ²த்தாதி³னியமே ஸதிபி சித்தனியமாபா⁴வேன ந ருஹதீதி த³ஸ்ஸேதி. ஸாவேதுகாமோ ந ஸாவேதீதி சித்தனியமேபி ஸதி பயோக³னியமாபா⁴வேன ந ருஹதீதி த³ஸ்ஸேதி. அவிஞ்ஞுஸ்ஸஸாவேதி, விஞ்ஞுஸ்ஸ ந ஸாவேதீதி சித்தகெ²த்தகாலபயோக³புக்³க³லவிஜானநனியமேபி ஸதி யங் புக்³க³லங் உத்³தி³ஸ்ஸ ஸாவேதி, தஸ்ஸேவ ஸவனே ந ருஹதி, ந அஞ்ஞஸ்ஸாதி த³ஸ்ஸனத்த²ங் வுத்தங், தேன வுத்தங் அட்ட²கதா²யங் ‘‘யதி³ அயமேவ ஜானாதூதி ஏகங் நியமெத்வா ஆரோசேதி, தஞ்சே ஸோ ஏவ ஜானாதி, பச்சக்கா²தா ஹோதி ஸிக்கா². அத² ஸோ ந ஜானாதி…பே॰… அப்பச்சக்கா²தா ஹோதி ஸிக்கா²’’தி. ஸப்³ப³ஸோ வா பன ந ஸாவேதி, அப்பச்சக்கா² ஹோதி ஸிக்கா²தி சித்தாதி³னியமேனேவ ஸிக்கா² பச்சக்கா²தா ஹோதி, ந அஞ்ஞதா²தி த³ஸ்ஸனத்த²ங் வுத்தங். எத்தாவதா ‘‘ஸிக்கா²…பே॰… து³ப்³ப³ல்யங் அனாவிகத்வா’’தி பத³ஸ்ஸ பத³பா⁴ஜனங் தீஹி ஆகாரேஹி த³ஸ்ஸிதங் ஹோதி. தத்த² த்³வே அமிஸ்ஸா, பச்சி²மோ ஏகோ மிஸ்ஸோதி வேதி³தப்³போ³. தேனேவ வசீபே⁴தே³னாதி தத³த்த²தீ³பனமத்தங் வசனங் ஸுத்வாவ தேனேவ வசீபே⁴தே³ன ஜானாபேதீதி அத்தோ². சித்தஸம்பயுத்தந்தி பச்சக்கா²துகாமதாசித்தஸம்பயுத்தங். ஸமயஞ்ஞூ நாம தத³தி⁴ப்பாயஜானநமத்தேன ஹோதி.
51.Buddhaṃ dhammantiādipadehi khettaniyamaṃ dasseti. Tattha ādito cuddasahi padehi sabhāvapariccāgo, pacchimehi aṭṭhahi bhāvantarādānañca dassitaṃ hoti. Paccakkhāmi dhārehīti etehi kālaniyamaṃ dasseti. Vadatīti iminā padena payoganiyamaṃ dasseti. Viññāpetīti iminā vijānananiyamaṃ dasseti. Ummattako sikkhaṃ paccakkhāti, ummattakassa santike sikkhaṃ paccakkhātītiādīhi puggalaniyamaṃ dasseti. Ariyakena milakkhassa santike sikkhaṃ paccakkhātītiādīhi pana puggalādiniyamepi sati vijānananiyamāsambhavaṃ dasseti. Tattha ‘‘yāya milakkhabhāsāya kālaniyamo natthi, tāyapi bhāsāya kālaniyamatthadīpane sati sikkhāpaccakkhānaṃ ruhatīti no matī’’ti ācariyo. Davāyātiādīhi khettādiniyame satipi cittaniyamābhāvena na ruhatīti dasseti. Sāvetukāmo na sāvetīti cittaniyamepi sati payoganiyamābhāvena na ruhatīti dasseti. Aviññussasāveti, viññussa na sāvetīti cittakhettakālapayogapuggalavijānananiyamepi sati yaṃ puggalaṃ uddissa sāveti, tasseva savane na ruhati, na aññassāti dassanatthaṃ vuttaṃ, tena vuttaṃ aṭṭhakathāyaṃ ‘‘yadi ayameva jānātūti ekaṃ niyametvā āroceti, tañce so eva jānāti, paccakkhātā hoti sikkhā. Atha so na jānāti…pe… appaccakkhātā hoti sikkhā’’ti. Sabbaso vā pana na sāveti, appaccakkhā hoti sikkhāti cittādiniyameneva sikkhā paccakkhātā hoti, na aññathāti dassanatthaṃ vuttaṃ. Ettāvatā ‘‘sikkhā…pe… dubbalyaṃ anāvikatvā’’ti padassa padabhājanaṃ tīhi ākārehi dassitaṃ hoti. Tattha dve amissā, pacchimo eko missoti veditabbo. Teneva vacībhedenāti tadatthadīpanamattaṃ vacanaṃ sutvāva teneva vacībhedena jānāpetīti attho. Cittasampayuttanti paccakkhātukāmatācittasampayuttaṃ. Samayaññū nāma tadadhippāyajānanamattena hoti.
53. வண்ணபட்டா²னங் பு³த்³த⁴கு³ணதீ³பகங் ஸுத்தங். உபாலிக³ஹபதினா வுத்தா கிர உபாலிகா³தா². பஞ்ஞாணங் ஸஞ்ஞாணந்தி அத்த²தோ ஏகங், தஸ்மா போ³தி⁴பஞ்ஞாணந்தி போ³தி⁴ஸஞ்ஞாணங், போ³தி⁴பீ³ஜந்தி வுத்தங் ஹோதி.
53.Vaṇṇapaṭṭhānaṃ buddhaguṇadīpakaṃ suttaṃ. Upāligahapatinā vuttā kira upāligāthā. Paññāṇaṃ saññāṇanti atthato ekaṃ, tasmā bodhipaññāṇanti bodhisaññāṇaṃ, bodhibījanti vuttaṃ hoti.
த்³வின்னம்பி நியமெத்வாதி எத்த² ‘‘த்³வீஸுபி ஜானந்தேஸு ஏவ பச்சக்கா²மீதி அதி⁴ப்பாயேன வுத்தே தேஸு ஏகோ சே ஜானாதி, ந பச்சக்கா²தா ஹோதீ’’தி அஞ்ஞதரஸ்மிம்பி க³ண்டி²பதே³ வுத்தங், தங் அட்ட²கதா²ய ந ஸமேதி. ‘‘கி³ஹீ ஹோமீ’’தி வா ‘‘கி³ஹிம்ஹீ’’தி வா வுத்தே கிஞ்சாபி வத்தமானவசனங் ஹோதி. ‘‘தா⁴ரேஹீ’’தி அத்தா²பா⁴வா ச ‘‘தா⁴ரேஹீ’’தி வுத்தே ச பரஸ்ஸுபரி க³ச்ச²தி, தஸ்மா ந ஹோதி. ஸந்தி³ட்டி²கங் த⁴ம்மந்தி ஸப்³ப³த்த² த⁴ம்மவசனங் வுத்தங் யங் ஸந்தா⁴ய ‘‘ஸந்தி³ட்டி²க’’ந்தி வத³தி, தங் பகாஸேதுங். அஞ்ஞதா² ‘‘விஜிதவிஜயங் பச்சக்கா²மீ’’தி வுத்தே சக்கவத்திஆதீ³ஸுபி தப்பஸங்க³தோ பு³த்³த⁴ஸத்³தோ³பி அவஸானே வத்தப்³போ³ ப⁴வெய்ய. ஆசரியவேவசனேஸு பன யோ மங் பப்³பா³ஜேஸீதிஆதி³ உபஜ்ஜ²ங் அக்³க³ஹெத்வா, பரங் வா உத்³தி³ஸ்ஸ பப்³ப³ஜிதங் ஸந்தா⁴ய வுத்தந்தி. ஓகல்லகோதி கபணாதி⁴வசனங். மோளிப³த்³தோ⁴தி ஸிகா²ப³த்³தோ⁴, ஓமுக்கமகுடோ வா. சேல்லகோ அதே²ரோ. சேடகோ மஜ்ஜி²மோ. மோளிக³ல்லோ மஹாஸாமணேரோ. மனுஸ்ஸவிக்³க³ஹனாகா³தீ³னங் நாக³ரூபாதீ³னங் வா ஸந்திகே, பா⁴ஸாஜானநகின்னராதீ³னங் வா. ‘‘தே³வதா நாம மஹாபஞ்ஞா’’தி கிர பாடோ². த³வாயாதி ஸஹஸா. ரவாப⁴ஞ்ஞேனாதி க²லிதப⁴ஞ்ஞேன. அக்க²ரஸமயானஞ்ஹி நாபி⁴ஞ்ஞாதாய வா கரணானங் அவிஸத³தாய வா ஹோதி ரவாப⁴ஞ்ஞங். அவிதெ⁴ய்யிந்த்³ரியதாய ‘‘பொத்த²கரூபஸதி³ஸஸ்ஸா’’தி வுத்தங், க³ருமேத⁴ஸ்ஸ மந்த³பஞ்ஞஸ்ஸ. கித்தாவதா பன க³ருமேதோ⁴ ஹோதீதி சே? ஸமயே அகோவித³தாய.
Dvinnampi niyametvāti ettha ‘‘dvīsupi jānantesu eva paccakkhāmīti adhippāyena vutte tesu eko ce jānāti, na paccakkhātā hotī’’ti aññatarasmimpi gaṇṭhipade vuttaṃ, taṃ aṭṭhakathāya na sameti. ‘‘Gihī homī’’ti vā ‘‘gihimhī’’ti vā vutte kiñcāpi vattamānavacanaṃ hoti. ‘‘Dhārehī’’ti atthābhāvā ca ‘‘dhārehī’’ti vutte ca parassupari gacchati, tasmā na hoti. Sandiṭṭhikaṃ dhammanti sabbattha dhammavacanaṃ vuttaṃ yaṃ sandhāya ‘‘sandiṭṭhika’’nti vadati, taṃ pakāsetuṃ. Aññathā ‘‘vijitavijayaṃ paccakkhāmī’’ti vutte cakkavattiādīsupi tappasaṅgato buddhasaddopi avasāne vattabbo bhaveyya. Ācariyavevacanesu pana yo maṃ pabbājesītiādi upajjhaṃ aggahetvā, paraṃ vā uddissa pabbajitaṃ sandhāya vuttanti. Okallakoti kapaṇādhivacanaṃ. Moḷibaddhoti sikhābaddho, omukkamakuṭo vā. Cellako athero. Ceṭako majjhimo. Moḷigallo mahāsāmaṇero. Manussaviggahanāgādīnaṃ nāgarūpādīnaṃ vā santike, bhāsājānanakinnarādīnaṃ vā. ‘‘Devatā nāma mahāpaññā’’ti kira pāṭho. Davāyāti sahasā. Ravābhaññenāti khalitabhaññena. Akkharasamayānañhi nābhiññātāya vā karaṇānaṃ avisadatāya vā hoti ravābhaññaṃ. Avidheyyindriyatāya ‘‘potthakarūpasadisassā’’ti vuttaṃ, garumedhassa mandapaññassa. Kittāvatā pana garumedho hotīti ce? Samaye akovidatāya.
ஸிக்கா²பச்சக்கா²னகதா²வண்ணனா நிட்டி²தா.
Sikkhāpaccakkhānakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. பட²மபாராஜிகங் • 1. Paṭhamapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 1. பட²மபாராஜிகங் • 1. Paṭhamapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸிக்கா²பச்சக்கா²னவிப⁴ங்க³வண்ணனா • Sikkhāpaccakkhānavibhaṅgavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / பச்சக்கா²னவிப⁴ங்க³வண்ணனா • Paccakkhānavibhaṅgavaṇṇanā
