| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
сигкаабажжагкаанавибхан̇г̇аван̣н̣анаа
Sikkhāpaccakkhānavibhaṅgavaṇṇanā
‘‘аббажжагкааяа аббажжагкаад̇ааяаа’’д̇и убхаяат̇ааби баато д̇ийсуби г̇ан̣тибад̣̇зсу вуд̇д̇о. д̣̇уб̣б̣аляз аавигад̇збийд̇и ‘‘яам̣нуунаахам̣ б̣уд̣̇д̇хам̣ бажжагкзяяа’’нд̇иаад̣̇инаа д̣̇уб̣б̣алабхаавз багаасид̇зби. сигкааяа бана бажжагкаад̇ааяаад̇и ‘‘б̣уд̣̇д̇хам̣ бажжагкаамий’’д̇иаад̣̇инаа сигкааяа бажжагкаад̇ааяа. яасмаа д̣̇ирад̇д̇аважанз г̇ахид̇з д̇зна буримабажчимабад̣̇аани сам̣силидтаани хонд̇и, на д̇асмим̣ аг̇г̇ахид̇з, д̇асмаа д̣̇ирад̇д̇аважанзна б̣яан̃ж̇анасилидтад̇аамад̇д̇амзва баяож̇ананд̇и ааха ‘‘б̣яан̃ж̇анасилидтад̇ааяаа’’д̇и. мукаарул̣хад̇ааяаад̇и яасмаа зваруубам̣ важанам̣ логасса мукамаарул̣хам̣, д̇асмаад̇и ад̇т̇о.
‘‘Appaccakkhāya appaccakkhātāyā’’ti ubhayathāpi pāṭho tīsupi gaṇṭhipadesu vutto. Dubbalye āvikatepīti ‘‘yaṃnūnāhaṃ buddhaṃ paccakkheyya’’ntiādinā dubbalabhāve pakāsitepi. Sikkhāya pana paccakkhātāyāti ‘‘buddhaṃ paccakkhāmī’’tiādinā sikkhāya paccakkhātāya. Yasmā dirattavacane gahite tena purimapacchimapadāni saṃsiliṭṭhāni honti, na tasmiṃ aggahite, tasmā dirattavacanena byañjanasiliṭṭhatāmattameva payojananti āha ‘‘byañjanasiliṭṭhatāyā’’ti. Mukhāruḷhatāyāti yasmā evarūpaṃ vacanaṃ lokassa mukhamāruḷhaṃ, tasmāti attho.
б̣яан̃ж̇анам̣ самбаад̣̇зд̇ийд̇и д̇асса висум̣ ад̇т̇аабхаавад̇о вуд̇д̇амзвад̇т̇ам̣ ан̃н̃абад̣̇зна д̣̇ийбзнд̇о б̣яан̃ж̇анам̣ самбаад̣̇зд̇и. вуд̇д̇амзвад̇т̇ам̣ гааран̣зна вибхаавзнд̇о ааха ‘‘бариваарагабад̣̇авирахид̇ан̃хий’’д̇иаад̣̇и. ад̇т̇ад̣̇ийбагам̣ бад̣̇ам̣ ад̇т̇абад̣̇ам̣.
Byañjanaṃsampādetīti tassa visuṃ atthābhāvato vuttamevatthaṃ aññapadena dīpento byañjanaṃ sampādeti. Vuttamevatthaṃ kāraṇena vibhāvento āha ‘‘parivārakapadavirahitañhī’’tiādi. Atthadīpakaṃ padaṃ atthapadaṃ.
сигкаабажжагкаанассаад̇и ‘‘б̣уд̣̇д̇хам̣ бажжагкаамий’’д̇иаад̣̇исигкаабажжагкаанаважанасса. ‘‘б̣уд̣̇д̇хам̣ бажжагкаамий’’д̇иаад̣̇ийсу ‘‘звам̣ ко, бхигкавз, д̣̇уб̣б̣аляаавигамман̃жзва ход̇и сигкаа жа бажжагкаад̇аа’’д̇и вуд̇д̇ад̇д̇аа убхаяамби ход̇ийд̇и ааха – ‘‘згажжам̣ д̣̇уб̣б̣аляаавигаммам̣ ад̇т̇о ход̇ий’’д̇и. гин̃жааби ‘‘б̣уд̣̇д̇хам̣ бажжагкаамий’’д̇иаад̣̇исигкаабажжагкаанаважанасса д̣̇уб̣б̣аляаавигаммабад̣̇ад̇т̇о на ход̇и, д̇ат̇ааби ‘‘б̣уд̣̇д̇хам̣ бажжагкаамий’’д̇и вуд̇д̇з сигкаабарибууран̣з д̣̇уб̣б̣аляаавибхаавассаби г̇амяамаанад̇д̇аа ‘‘сигкаабажжагкаанасса згажжам̣ д̣̇уб̣б̣аляаавигаммам̣ ад̇т̇о ход̇ий’’д̇и вуд̇д̇ам̣. нам̣ санд̇хааяаад̇и нам̣ ад̇т̇абхууд̇ам̣ д̣̇уб̣б̣аляаавигаммам̣ санд̇хааяа.
Sikkhāpaccakkhānassāti ‘‘buddhaṃ paccakkhāmī’’tiādisikkhāpaccakkhānavacanassa. ‘‘Buddhaṃ paccakkhāmī’’tiādīsu ‘‘evaṃ kho, bhikkhave, dubbalyāvikammañceva hoti sikkhā ca paccakkhātā’’ti vuttattā ubhayampi hotīti āha – ‘‘ekaccaṃ dubbalyāvikammaṃ attho hotī’’ti. Kiñcāpi ‘‘buddhaṃ paccakkhāmī’’tiādisikkhāpaccakkhānavacanassa dubbalyāvikammapadattho na hoti, tathāpi ‘‘buddhaṃ paccakkhāmī’’ti vutte sikkhāparipūraṇe dubbalyāvibhāvassapi gamyamānattā ‘‘sikkhāpaccakkhānassa ekaccaṃ dubbalyāvikammaṃ attho hotī’’ti vuttaṃ. Naṃ sandhāyāti naṃ atthabhūtaṃ dubbalyāvikammaṃ sandhāya.
висзсаависзсанд̇и зд̇т̇а язна д̣̇уб̣б̣аляаавигаммамзва ход̇и, на сигкаабажжагкаанам̣, д̇ад̇т̇а сигкаабажжагкаанад̣̇уб̣б̣аляаавигаммаанам̣ ад̇т̇и висзсо. язна бана сигкаабажжагкаанан̃жзва д̣̇уб̣б̣аляаавигамман̃жа ход̇и, д̇ад̇т̇а нзвад̇т̇и висзсод̇и взд̣̇ид̇аб̣б̣ам̣. гатагижчаж̇ийванзд̇и д̇хаад̇уусу батид̇ад̇д̇аа вуд̇д̇ам̣ ‘‘гижчаж̇ийвигаббад̇д̇о’’д̇и. угган̣танам̣ угган̣таа, гижчаж̇ийвигаа, д̇ам̣ ид̇о бад̇д̇од̇и угган̣тид̇о. ид̇од̇и ид̇о таанад̇о, ид̇о вихаарад̇о ваа. зд̇т̇аад̇и г̇анд̇умижчид̇ам̣ бад̣̇зсам̣ вад̣̇ад̇и. анабхирад̇ияаа бийл̣ид̇о вигкид̇д̇ажид̇д̇о худ̇ваа сийсам̣ угкибид̇ваа уд̣̇д̇хам̣муко ид̇о жид̇о жа ологзнд̇о аахин̣д̣ад̇ийд̇и ааха ‘‘уд̣̇д̇хам̣ ган̣там̣ гад̇ваа вихарамаано’’д̇и.
Visesāvisesanti ettha yena dubbalyāvikammameva hoti, na sikkhāpaccakkhānaṃ, tattha sikkhāpaccakkhānadubbalyāvikammānaṃ atthi viseso. Yena pana sikkhāpaccakkhānañceva dubbalyāvikammañca hoti, tattha nevatthi visesoti veditabbaṃ. Kaṭhakicchajīvaneti dhātūsu paṭhitattā vuttaṃ ‘‘kicchajīvikappatto’’ti. Ukkaṇṭhanaṃ ukkaṇṭhā, kicchajīvikā, taṃ ito pattoti ukkaṇṭhito. Itoti ito ṭhānato, ito vihārato vā. Etthāti gantumicchitaṃ padesaṃ vadati. Anabhiratiyā pīḷito vikkhittacitto hutvā sīsaṃ ukkhipitvā uddhaṃmukho ito cito ca olokento āhiṇḍatīti āha ‘‘uddhaṃ kaṇṭhaṃ katvā viharamāno’’ti.
аддийяамаанод̇и зд̇т̇а аддамива ад̇д̇аанамаажарад̇и аддийяад̇ийд̇и аддийяасад̣̇д̣̇асса анд̇ог̇ад̇хаубамаанабхууд̇агаммад̇д̇аа убамзяяабхууд̇зна ад̇д̇анаава сагаммагад̇д̇ам̣, на бхигкубхаавзнаад̇и ааха ‘‘бхигкубхааванд̇и бхигкубхаавзнаа’’д̇и. на хи со бхигкубхаавам̣ аддамива аажарад̇и, гин̃жарахи ад̇д̇аанам̣ д̇асмаа бхигкубхаавзна гаран̣абхууд̇зна ад̇д̇аанам̣ аддийяамаанод̇и звамзд̇т̇а ад̇т̇о д̣̇адтаб̣б̣од̇и ааха ‘‘гаран̣ад̇т̇з убаяог̇аважана’’нд̇и. ган̣тз аасад̇д̇зна аддийязяяаад̇и зд̇т̇а бана гаран̣ад̇т̇зязва гаран̣аважананд̇и ааха – ‘‘яат̇аалагкан̣ам̣ гаран̣аважанзнзва вуд̇д̇а’’нд̇и. гад̇д̇уад̇т̇з ваа убаяог̇аважанам̣ д̣̇адтаб̣б̣анд̇и ааха – ‘‘д̇зна ваа бхигкубхаавзнаа’’д̇иаад̣̇и, д̇зна гад̇д̇убхууд̇зна бхигкубхаавзнаад̇и ад̇т̇о. имасмим̣ банад̇т̇з аддам̣ гарод̇ийд̇и аддийяад̇ийд̇и аддийяа-сад̣̇д̣̇ам̣ нибпаад̣̇зд̇ваа д̇ад̇о гаммани маана-сад̣̇д̣̇з гад̇з ‘‘аддийяамаано’’д̇и бад̣̇асид̣̇д̇хи взд̣̇ид̇аб̣б̣аа. д̇знзвааха – ‘‘аддо гарияамаано бийл̣ияамаано’’д̇и. ж̇иг̇ужчамаанод̇и иминаа бана самб̣анд̇хз гарияамаанз бхигкубхааванд̇и убаяог̇ад̇т̇з зва убаяог̇аважананд̇и ааха – ‘‘асужим̣ вияа д̇ам̣ ж̇иг̇ужчанд̇о’’д̇и, д̇ам̣ бхигкубхаавам̣ ж̇иг̇ужчанд̇од̇и ад̇т̇о. сажааханд̇и сажз ахам̣.
Aṭṭīyamānoti ettha aṭṭamiva attānamācarati aṭṭīyatīti aṭṭīyasaddassa antogadhaupamānabhūtakammattā upameyyabhūtena attanāva sakammakattaṃ, na bhikkhubhāvenāti āha ‘‘bhikkhubhāvanti bhikkhubhāvenā’’ti. Na hi so bhikkhubhāvaṃ aṭṭamiva ācarati, kiñcarahi attānaṃ tasmā bhikkhubhāvena karaṇabhūtena attānaṃ aṭṭīyamānoti evamettha attho daṭṭhabboti āha ‘‘karaṇatthe upayogavacana’’nti. Kaṇṭhe āsattena aṭṭīyeyyāti ettha pana karaṇattheyeva karaṇavacananti āha – ‘‘yathālakkhaṇaṃ karaṇavacaneneva vutta’’nti. Kattuatthe vā upayogavacanaṃ daṭṭhabbanti āha – ‘‘tena vā bhikkhubhāvenā’’tiādi, tena kattubhūtena bhikkhubhāvenāti attho. Imasmiṃ panatthe aṭṭaṃ karotīti aṭṭīyatīti aṭṭīya-saddaṃ nipphādetvā tato kammani māna-sadde kate ‘‘aṭṭīyamāno’’ti padasiddhi veditabbā. Tenevāha – ‘‘aṭṭo kariyamāno pīḷiyamāno’’ti. Jigucchamānoti iminā pana sambandhe kariyamāne bhikkhubhāvanti upayogatthe eva upayogavacananti āha – ‘‘asuciṃ viya taṃ jigucchanto’’ti, taṃ bhikkhubhāvaṃ jigucchantoti attho. Sacāhanti sace ahaṃ.
бажжагкаанаагаарзна вуд̇д̇аанийд̇и ‘‘бажжагкзяяам̣ бажжагкзяяа’’нд̇и вуд̇д̇ад̇д̇аа бажжагкаанаагаарасамб̣анд̇хзна вуд̇д̇аани. бхаававигаббаагаарзнаад̇и ‘‘ассам̣ асса’’нд̇и ааг̇ад̇ад̇д̇аа яам̣ яам̣ бхавид̇угаамо, д̇асса д̇асса бхаавасса вигаббаагаарзна, бхигкубхаавад̇о ан̃н̃абхаававигаббаагаарзнаад̇и ад̇хиббааяо.
Paccakkhānākārena vuttānīti ‘‘paccakkheyyaṃ paccakkheyya’’nti vuttattā paccakkhānākārasambandhena vuttāni. Bhāvavikappākārenāti ‘‘assaṃ assa’’nti āgatattā yaṃ yaṃ bhavitukāmo, tassa tassa bhāvassa vikappākārena, bhikkhubhāvato aññabhāvavikappākārenāti adhippāyo.
50. на уссахаамийд̇и ад̇д̇ано д̇ад̇т̇а д̇ад̇т̇а уссахаабхаавам̣ д̣̇ассзд̇и. на висахаамийд̇и згабхад̇д̇аад̣̇ийнам̣ асаяхабхаавам̣ д̣̇ассзд̇и. на рамаамийд̇и ‘‘баб̣б̣аж̇ж̇аамуулагам̣ над̇т̇и мз сука’’нд̇и д̣̇ассзд̇и. наабхирамаамийд̇и баб̣б̣аж̇ж̇ааяа ад̇д̇ано санд̇осаабхаавам̣ д̣̇ассзд̇и.
50.Na ussahāmīti attano tattha tattha ussahābhāvaṃ dasseti. Na visahāmīti ekabhattādīnaṃ asayhabhāvaṃ dasseti. Na ramāmīti ‘‘pabbajjāmūlakaṃ natthi me sukha’’nti dasseti. Nābhiramāmīti pabbajjāya attano santosābhāvaṃ dasseti.
ид̣̇аани сигкаабажжагкаанаваарз тад̇ваа аяам̣ винижчаяо взд̣̇ид̇аб̣б̣о – д̇ад̇т̇а ‘‘сааман̃н̃аа жавид̇угаамо’’д̇иаад̣̇ийхи бад̣̇зхи жид̇д̇анияамам̣ д̣̇ассзд̇и. ‘‘б̣уд̣̇д̇хам̣ д̇хамма’’нд̇иаад̣̇ийхи бад̣̇зхи кзд̇д̇анияамам̣ д̣̇ассзд̇и. яат̇аа хи логз сассаанам̣ руханадтаанам̣ ‘‘кзд̇д̇а’’нд̇и вужжад̇и, звамид̣̇амби сигкаабажжагкаанасса руханадтаанад̇д̇аа ‘‘кзд̇д̇а’’нд̇и вужжад̇и. ‘‘бажжагкаами д̇хаарзхий’’д̇и зд̇зна гааланияамам̣ д̣̇ассзд̇и. ‘‘вад̣̇ад̇ий’’д̇и иминаа баяог̇анияамам̣ д̣̇ассзд̇и. ‘‘алам̣ мз б̣уд̣̇д̇хзна, гинну мз б̣уд̣̇д̇хзна, на мамад̇т̇о б̣уд̣̇д̇хзна, сумуд̇д̇аахам̣ б̣уд̣̇д̇хзнаа’’д̇иаад̣̇ийхи анаамадтагаалавасзнаби бажжагкаанам̣ ход̇ийд̇и д̣̇ассзд̇и. ‘‘вин̃н̃аабзд̇ий’’д̇и иминаа виж̇аанананияамам̣ д̣̇ассзд̇и. ‘‘уммад̇д̇аго сигкам̣ бажжагкаад̇и, уммад̇д̇агасса санд̇игз сигкам̣ бажжагкаад̇ий’’д̇иаад̣̇ийхи буг̇г̇аланияамам̣ д̣̇ассзд̇и. ‘‘арияагзна милагкасса санд̇игз сигкам̣ бажжагкаад̇и, со жа наббадивиж̇аанаад̇и, аббажжагкаад̇аа ход̇и сигкаа’’д̇иаад̣̇ийхи буг̇г̇алаад̣̇инияамз сад̇иби виж̇аанананияамаасамбхавам̣ д̣̇ассзд̇и . ‘‘д̣̇авааяа сигкам̣ бажжагкаад̇и, аббажжагкаад̇аа ход̇и сигкаа’’д̇иаад̣̇ийхи кзд̇д̇аад̣̇инияамз сад̇иби жид̇д̇анияамаабхаавзна на рухад̇ийд̇и д̣̇ассзд̇и. ‘‘саавзд̇угаамо на саавзд̇и, абажжагкаад̇аа ход̇и сигкаа’’д̇и иминаа жид̇д̇анияамзби сад̇и баяог̇анияамаабхаавзна на рухад̇ийд̇и д̣̇ассзд̇и. ‘‘авин̃н̃усса саавзд̇и, вин̃н̃усса на саавзд̇ий’’д̇и зд̇зхи жид̇д̇акзд̇д̇агаалабаяог̇абуг̇г̇алавиж̇аанананияамзби сад̇и яам̣ буг̇г̇алам̣ уд̣̇д̣̇исса саавзд̇и, д̇ассзва саванзна рухад̇и, на ан̃н̃ассаад̇и д̣̇ассзд̇и. ‘‘саб̣б̣асо ваа бана на саавзд̇и, аббажжагкаад̇аа ход̇и сигкаа’’д̇и ид̣̇ам̣ бана жид̇д̇аад̣̇инияамзнзва сигкаа бажжагкаад̇аа ход̇и, на ан̃н̃ат̇аад̇и д̣̇ассанад̇т̇ам̣ вуд̇д̇ам̣. д̇асмаа жид̇д̇акзд̇д̇агаалабаяог̇абуг̇г̇алавиж̇аанананияамавасзна сигкааяа бажжагкаанам̣ н̃ад̇ваа д̇ад̣̇абхаавзна аббажжагкаанам̣ взд̣̇ид̇аб̣б̣ам̣.
Idāni sikkhāpaccakkhānavāre ṭhatvā ayaṃ vinicchayo veditabbo – tattha ‘‘sāmaññā cavitukāmo’’tiādīhi padehi cittaniyamaṃ dasseti. ‘‘Buddhaṃ dhamma’’ntiādīhi padehi khettaniyamaṃ dasseti. Yathā hi loke sassānaṃ ruhanaṭṭhānaṃ ‘‘khetta’’nti vuccati, evamidampi sikkhāpaccakkhānassa ruhanaṭṭhānattā ‘‘khetta’’nti vuccati. ‘‘Paccakkhāmi dhārehī’’ti etena kālaniyamaṃ dasseti. ‘‘Vadatī’’ti iminā payoganiyamaṃ dasseti. ‘‘Alaṃ me buddhena, kinnu me buddhena, na mamattho buddhena, sumuttāhaṃ buddhenā’’tiādīhi anāmaṭṭhakālavasenapi paccakkhānaṃ hotīti dasseti. ‘‘Viññāpetī’’ti iminā vijānananiyamaṃ dasseti. ‘‘Ummattako sikkhaṃ paccakkhāti, ummattakassa santike sikkhaṃ paccakkhātī’’tiādīhi puggalaniyamaṃ dasseti. ‘‘Ariyakena milakkhassa santike sikkhaṃ paccakkhāti, so ca nappaṭivijānāti, appaccakkhātā hoti sikkhā’’tiādīhi puggalādiniyame satipi vijānananiyamāsambhavaṃ dasseti . ‘‘Davāya sikkhaṃ paccakkhāti, appaccakkhātā hoti sikkhā’’tiādīhi khettādiniyame satipi cittaniyamābhāvena na ruhatīti dasseti. ‘‘Sāvetukāmo na sāveti, apaccakkhātā hoti sikkhā’’ti iminā cittaniyamepi sati payoganiyamābhāvena na ruhatīti dasseti. ‘‘Aviññussa sāveti, viññussa na sāvetī’’ti etehi cittakhettakālapayogapuggalavijānananiyamepi sati yaṃ puggalaṃ uddissa sāveti, tasseva savanena ruhati, na aññassāti dasseti. ‘‘Sabbaso vā pana na sāveti, appaccakkhātā hoti sikkhā’’ti idaṃ pana cittādiniyameneva sikkhā paccakkhātā hoti, na aññathāti dassanatthaṃ vuttaṃ. Tasmā cittakhettakālapayogapuggalavijānananiyamavasena sikkhāya paccakkhānaṃ ñatvā tadabhāvena appaccakkhānaṃ veditabbaṃ.
гат̇ам̣? убасамбаннабхаавад̇о жавид̇угаамад̇аажид̇д̇знзва хи сигкаабажжагкаанам̣ ход̇и, на д̣̇аваа ваа раваа ваа бхан̣анд̇асса. звам̣ жид̇д̇авасзна сигкаабажжагкаанам̣ ход̇и, на д̇ад̣̇абхаавзна.
Kathaṃ? Upasampannabhāvato cavitukāmatācitteneva hi sikkhāpaccakkhānaṃ hoti, na davā vā ravā vā bhaṇantassa. Evaṃ cittavasena sikkhāpaccakkhānaṃ hoti, na tadabhāvena.
д̇ат̇аа ‘‘б̣уд̣̇д̇хам̣ бажжагкаами, д̇хаммам̣ бажжагкаами, сан̇гхам̣ бажжагкаами, сигкам̣, винаяам̣, баад̇имогкам̣, уд̣̇д̣̇зсам̣, убаж̇жхааяам̣, аажарияам̣, сад̣̇д̇хивихааригам̣, анд̇зваасигам̣, самаанубаж̇жхааяагам̣, самаанаажарияагам̣, саб̣рахмажаарим̣ бажжагкаамий’’д̇и звам̣ вуд̇д̇аанам̣ б̣уд̣̇д̇хаад̣̇ийнам̣ жад̇уд̣̇д̣̇асаннам̣, ‘‘г̇ихийд̇и мам̣ д̇хаарзхи, убаасаго, аараамиго, сааман̣зро, д̇ид̇т̇ияо, д̇ид̇т̇ияасааваго, ассаман̣о, асагяабуд̇д̇ияод̇и мам̣ д̇хаарзхий’’д̇и звам̣ вуд̇д̇аанам̣ г̇ихиаад̣̇ийнам̣ адтаннан̃жаад̇и имзсам̣ д̣̇ваавийсад̇ияаа кзд̇д̇абад̣̇аанам̣ яасса гассажи савзважанасса васзна д̇зсу жа яам̣гин̃жи вад̇д̇угаамасса яам̣гин̃жи вад̣̇ад̇оби сигкаабажжагкаанам̣ ход̇и, на ругкаад̣̇ийнам̣ ан̃н̃ад̇арасса наамам̣ г̇ахзд̇ваа сигкам̣ бажжагканд̇асса. звам̣ кзд̇д̇авасзна сигкаабажжагкаанам̣ ход̇и, на д̇ад̣̇абхаавзна.
Tathā ‘‘buddhaṃ paccakkhāmi, dhammaṃ paccakkhāmi, saṅghaṃ paccakkhāmi, sikkhaṃ, vinayaṃ, pātimokkhaṃ, uddesaṃ, upajjhāyaṃ, ācariyaṃ, saddhivihārikaṃ, antevāsikaṃ, samānupajjhāyakaṃ, samānācariyakaṃ, sabrahmacāriṃ paccakkhāmī’’ti evaṃ vuttānaṃ buddhādīnaṃ catuddasannaṃ, ‘‘gihīti maṃ dhārehi, upāsako, ārāmiko, sāmaṇero, titthiyo, titthiyasāvako, assamaṇo, asakyaputtiyoti maṃ dhārehī’’ti evaṃ vuttānaṃ gihiādīnaṃ aṭṭhannañcāti imesaṃ dvāvīsatiyā khettapadānaṃ yassa kassaci savevacanassa vasena tesu ca yaṃkiñci vattukāmassa yaṃkiñci vadatopi sikkhāpaccakkhānaṃ hoti, na rukkhādīnaṃ aññatarassa nāmaṃ gahetvā sikkhaṃ paccakkhantassa. Evaṃ khettavasena sikkhāpaccakkhānaṃ hoti, na tadabhāvena.
д̇ад̇т̇а яад̣̇зд̇ам̣ ‘‘бажжагкаамий’’д̇и жа ‘‘мам̣ д̇хаарзхий’’д̇и жа вуд̇д̇ам̣ вад̇д̇амаанагаалаважанам̣, яаани жа ‘‘алам̣ мз б̣уд̣̇д̇хзна, гинну мз б̣уд̣̇д̇хзна, на мамад̇т̇о б̣уд̣̇д̇хзна, сумуд̇д̇аахам̣ б̣уд̣̇д̇хзнаа’’д̇иаад̣̇инаа наязна аакяаад̇авасзна гаалам̣ анаамасид̇ваа буримзхи жуд̣̇д̣̇асахи бад̣̇зхи сад̣̇д̇хим̣ яож̇зд̇ваа вуд̇д̇аани ‘‘алам̣ мз’’д̇иаад̣̇ийни жад̇д̇аари бад̣̇аани, д̇зсам̣язва жа савзважанаанам̣ васзна бажжагкаанам̣ ход̇и, на ‘‘бажжагкааси’’нд̇и ваа ‘‘бажжагкисса’’нд̇и ваа ‘‘мам̣ д̇хаарзсий’’д̇и ваа ‘‘д̇хаарзссасий’’д̇и ваа ‘‘яануунаахам̣ бажжагкзяяа’’нд̇и ваад̇иаад̣̇ийни ад̇ийд̇аанааг̇ад̇абаригаббаважанаани бхан̣анд̇асса. звам̣ вад̇д̇амаанагаалавасзна жзва анаамадтагаалавасзна жа бажжагкаанам̣ ход̇и, на д̇ад̣̇абхаавзна.
Tattha yadetaṃ ‘‘paccakkhāmī’’ti ca ‘‘maṃ dhārehī’’ti ca vuttaṃ vattamānakālavacanaṃ, yāni ca ‘‘alaṃ me buddhena, kinnu me buddhena, na mamattho buddhena, sumuttāhaṃ buddhenā’’tiādinā nayena ākhyātavasena kālaṃ anāmasitvā purimehi cuddasahi padehi saddhiṃ yojetvā vuttāni ‘‘alaṃ me’’tiādīni cattāri padāni, tesaṃyeva ca savevacanānaṃ vasena paccakkhānaṃ hoti, na ‘‘paccakkhāsi’’nti vā ‘‘paccakkhissa’’nti vā ‘‘maṃ dhāresī’’ti vā ‘‘dhāressasī’’ti vā ‘‘yanūnāhaṃ paccakkheyya’’nti vātiādīni atītānāgataparikappavacanāni bhaṇantassa. Evaṃ vattamānakālavasena ceva anāmaṭṭhakālavasena ca paccakkhānaṃ hoti, na tadabhāvena.
баяог̇о бана д̣̇увид̇хо гааяиго ваажасиго. д̇ад̇т̇а ‘‘б̣уд̣̇д̇хам̣ бажжагкаамий’’д̇иаад̣̇инаа наязна яааяа гааяажи бхаасааяа важийбхзд̣̇ам̣ гад̇ваа ваажасигабаяог̇знзва бажжагкаанам̣ ход̇и, на агкараликанам̣ ваа хад̇т̇амуд̣̇д̣̇аад̣̇ид̣̇ассанам̣ ваа гааяабаяог̇ам̣ гаронд̇асса. звам̣ ваажасигабаяог̇знзва бажжагкаанам̣ ход̇и, на д̇ад̣̇абхаавзна.
Payogo pana duvidho kāyiko vācasiko. Tattha ‘‘buddhaṃ paccakkhāmī’’tiādinā nayena yāya kāyaci bhāsāya vacībhedaṃ katvā vācasikapayogeneva paccakkhānaṃ hoti, na akkharalikhanaṃ vā hatthamuddādidassanaṃ vā kāyapayogaṃ karontassa. Evaṃ vācasikapayogeneva paccakkhānaṃ hoti, na tadabhāvena.
буг̇г̇ало бана д̣̇увид̇хо яо жа бажжагкаад̇и, яасса жа бажжагкаад̇и. д̇ад̇т̇а яо бажжагкаад̇и, со сажз уммад̇д̇агакид̇д̇ажид̇д̇авзд̣̇анааддаанам̣ ан̃н̃ад̇аро на ход̇и. яасса бана бажжагкаад̇и, со сажз мануссаж̇аад̇иго ход̇и, на жа уммад̇д̇агаад̣̇ийнам̣ ан̃н̃ад̇аро, саммукийбхууд̇о жа сигкаабажжагкаанам̣ ход̇и. на хи асаммукийбхууд̇асса д̣̇ууд̇зна ваа бан̣н̣зна ваа аарожанам̣ рухад̇и. звам̣ яат̇аавуд̇д̇абуг̇г̇алавасзна бажжагкаанам̣ ход̇и, на д̇ад̣̇абхаавзна.
Puggalo pana duvidho yo ca paccakkhāti, yassa ca paccakkhāti. Tattha yo paccakkhāti, so sace ummattakakhittacittavedanāṭṭānaṃ aññataro na hoti. Yassa pana paccakkhāti, so sace manussajātiko hoti, na ca ummattakādīnaṃ aññataro, sammukhībhūto ca sikkhāpaccakkhānaṃ hoti. Na hi asammukhībhūtassa dūtena vā paṇṇena vā ārocanaṃ ruhati. Evaṃ yathāvuttapuggalavasena paccakkhānaṃ hoti, na tadabhāvena.
виж̇аананамби нияамид̇аанияамид̇авасзна д̣̇увид̇хам̣. д̇ад̇т̇а яасса язсам̣ ваа нияамзд̇ваа ‘‘имасса имзсам̣ ваа аарожзмий’’д̇и вад̣̇ад̇и, сажз д̇з яат̇аа багад̇ияаа логз мануссаа важанам̣ суд̇ваа ааваж̇ж̇анасамаяз ж̇аананд̇и, звам̣ д̇асса важанаананд̇арамзва д̇асса ‘‘аяам̣ угган̣тид̇о’’д̇и ваа ‘‘г̇ихибхаавам̣ бад̇т̇аяад̇ий’’д̇и ваа язна гзнажи аагаарзна сигкаабажжагкаанабхаавам̣ ж̇аананд̇и, бажжагкаад̇аа ход̇и сигкаа. ат̇а абарабхааг̇з ‘‘гим̣ иминаа вуд̇д̇а’’нд̇и жинд̇зд̇ваа ж̇аананд̇и, ан̃н̃з ваа ж̇аананд̇и, аббажжагкаад̇аава ход̇и сигкаа. анияамзд̇ваа аарожзнд̇асса бана сажз вуд̇д̇анаязна яо гожи мануссаж̇аад̇иго важанад̇т̇ам̣ ж̇аанаад̇и, бажжагкаад̇аава ход̇и сигкаа. звам̣ виж̇аананавасзна бажжагкаанам̣ ход̇и, на д̇ад̣̇абхаавзна. ид̇и имзсам̣ вуд̇д̇аббагаараанам̣ жид̇д̇аад̣̇ийнам̣ васзнзва сигкаабажжагкаанам̣ ход̇и, на ан̃н̃ат̇аад̇и д̣̇адтаб̣б̣ам̣.
Vijānanampi niyamitāniyamitavasena duvidhaṃ. Tattha yassa yesaṃ vā niyametvā ‘‘imassa imesaṃ vā ārocemī’’ti vadati, sace te yathā pakatiyā loke manussā vacanaṃ sutvā āvajjanasamaye jānanti, evaṃ tassa vacanānantarameva tassa ‘‘ayaṃ ukkaṇṭhito’’ti vā ‘‘gihibhāvaṃ patthayatī’’ti vā yena kenaci ākārena sikkhāpaccakkhānabhāvaṃ jānanti, paccakkhātā hoti sikkhā. Atha aparabhāge ‘‘kiṃ iminā vutta’’nti cintetvā jānanti, aññe vā jānanti, appaccakkhātāva hoti sikkhā. Aniyametvā ārocentassa pana sace vuttanayena yo koci manussajātiko vacanatthaṃ jānāti, paccakkhātāva hoti sikkhā. Evaṃ vijānanavasena paccakkhānaṃ hoti, na tadabhāvena. Iti imesaṃ vuttappakārānaṃ cittādīnaṃ vaseneva sikkhāpaccakkhānaṃ hoti, na aññathāti daṭṭhabbaṃ.
51. ‘‘вад̣̇ад̇ий’’д̇и важийбхзд̣̇аббаяог̇ам̣ д̣̇ассзд̇ваа д̇ад̣̇ананд̇арам̣ ‘‘вин̃н̃аабзд̇ий’’д̇и вуд̇д̇ад̇д̇аа д̇знзва важийбхзд̣̇зна ад̇хиббааяавин̃н̃аабанам̣ ид̇хаад̇хиббзд̇ам̣, на язна гзнажи убааязнаад̇и ааха ‘‘д̇знзва важийбхзд̣̇знаа’’д̇и. бад̣̇абажжаабхадтам̣ гад̇ваад̇и бад̣̇авибараавуд̇д̇им̣ гад̇ваа. ид̣̇ан̃жа бад̣̇аббаяог̇асса анияамид̇ад̇д̇аа вуд̇д̇ам̣. яат̇аа хи логз ‘‘аахара бад̇д̇ам̣, бад̇д̇ам̣ аахараа’’д̇и анияамид̇зна бад̣̇аббаяог̇зна д̇ад̣̇ад̇т̇авин̃н̃аабанам̣ д̣̇идтам̣, звамид̇хааби ‘‘б̣уд̣̇д̇хам̣ бажжагкаами, бажжагкаами б̣уд̣̇д̇ха’’нд̇и анияамид̇зна бад̣̇аббаяог̇зна д̇ад̣̇ад̇т̇авин̃н̃аабанам̣ ход̇иязваад̇и ад̇хиббааяо. б̣уд̣̇д̇хам̣ бажжагкаамийд̇и ад̇т̇аббад̇хаано аяам̣ нид̣̇д̣̇зсо, на сад̣̇д̣̇аббад̇хаанод̇и ааха ‘‘милагкабхаасаасу ваа ан̃н̃ад̇арабхаасааяа д̇амад̇т̇ам̣ вад̣̇зяяаа’’д̇и. мааг̇ад̇хабхаасад̇о авасидтаа саб̣б̣ааби анд̇хад̣̇амил̣аад̣̇ибхаасаа милагкабхаасаад̇и взд̣̇ид̇аб̣б̣аа. кзд̇д̇абад̣̇зсу згам̣ вад̇д̇угаамо сажзби ан̃н̃ам̣ вад̣̇зяяа, кзд̇д̇абад̣̇анд̇ог̇ад̇хад̇д̇аа бажжагкаад̇аава ход̇и сигкаад̇и д̣̇ассзнд̇о ааха ‘‘б̣уд̣̇д̇хам̣ бажжагкаамийд̇и вад̇д̇угаамо’’д̇иаад̣̇и. яад̣̇иби ‘‘б̣уд̣̇д̇хам̣ бажжагкаамий’’д̇и вад̇д̇ум̣ анижчанд̇о жид̇д̇зна д̇ам̣ бадигкибид̇ваа ан̃н̃ам̣ вад̇д̇угаамо буна вираж̇жхид̇ваа д̇амзва вад̣̇зяяа, д̇ат̇ааби саасанад̇о жавид̇угаамад̇аажид̇д̇з сад̇и кзд̇д̇абад̣̇ассзва вуд̇д̇ад̇д̇аа ан̇г̇абаарибуурисамбхавад̇о ход̇взва сигкаабажжагкаананд̇и взд̣̇ид̇аб̣б̣ам̣. кзд̇д̇амзва од̇ин̣н̣анд̇и сигкаабажжагкаанасса руханадтаанабхууд̇ам̣ кзд̇д̇амзва од̇ин̣н̣ам̣.
51. ‘‘Vadatī’’ti vacībhedappayogaṃ dassetvā tadanantaraṃ ‘‘viññāpetī’’ti vuttattā teneva vacībhedena adhippāyaviññāpanaṃ idhādhippetaṃ, na yena kenaci upāyenāti āha ‘‘teneva vacībhedenā’’ti. Padapaccābhaṭṭhaṃ katvāti padaviparāvuttiṃ katvā. Idañca padappayogassa aniyamitattā vuttaṃ. Yathā hi loke ‘‘āhara pattaṃ, pattaṃ āharā’’ti aniyamitena padappayogena tadatthaviññāpanaṃ diṭṭhaṃ, evamidhāpi ‘‘buddhaṃ paccakkhāmi, paccakkhāmi buddha’’nti aniyamitena padappayogena tadatthaviññāpanaṃ hotiyevāti adhippāyo. Buddhaṃ paccakkhāmīti atthappadhāno ayaṃ niddeso, na saddappadhānoti āha ‘‘milakkhabhāsāsu vā aññatarabhāsāya tamatthaṃ vadeyyā’’ti. Māgadhabhāsato avasiṭṭhā sabbāpi andhadamiḷādibhāsā milakkhabhāsāti veditabbā. Khettapadesu ekaṃ vattukāmo sacepi aññaṃ vadeyya, khettapadantogadhattā paccakkhātāva hoti sikkhāti dassento āha ‘‘buddhaṃ paccakkhāmīti vattukāmo’’tiādi. Yadipi ‘‘buddhaṃ paccakkhāmī’’ti vattuṃ anicchanto cittena taṃ paṭikkhipitvā aññaṃ vattukāmo puna virajjhitvā tameva vadeyya, tathāpi sāsanato cavitukāmatācitte sati khettapadasseva vuttattā aṅgapāripūrisambhavato hotveva sikkhāpaccakkhānanti veditabbaṃ. Khettameva otiṇṇanti sikkhāpaccakkhānassa ruhanaṭṭhānabhūtaṃ khettameva otiṇṇaṃ.
‘‘бажжагкаами д̇хаарзхий’’д̇и вад̇д̇амаанагааласса бад̇хаанабхаавзна вад̇д̇умижчид̇ад̇д̇аа ад̇ийд̇аанааг̇ад̇абаригаббаважанзхи нзвад̇т̇и сигкаабажжагкаананд̇и д̣̇ассзнд̇о ааха ‘‘сажз бана б̣уд̣̇д̇хам̣ бажжагкинд̇и ваа’’д̇иаад̣̇и. вад̣̇ад̇и вин̃н̃аабзд̇ийд̇и зд̇т̇а вад̣̇ад̇ийд̇и иминаа баяог̇асса нияамид̇ад̇д̇аа згасса санд̇игз ад̇д̇ано важийбхзд̣̇аббаяог̇знзва сигкаабажжагкаанам̣ ход̇и, на д̣̇ууд̇асаасанаад̣̇иббаяог̇знаад̇и д̣̇ассзнд̇о ааха ‘‘д̣̇ууд̇ам̣ ваа бахин̣аад̇ий’’д̇иаад̣̇и. д̇ад̇т̇а ‘‘мама сигкаабажжагкаанабхаавам̣ гат̇зхий’’д̇и мукасаасанавасзна ‘‘д̣̇ууд̇ам̣ ваа бахин̣аад̇ий’’д̇и вуд̇д̇ам̣. бан̣н̣з ликид̇ваа бахин̣анавасзна ‘‘саасанам̣ ваа бзсзд̇ий’’д̇и вуд̇д̇ам̣. ругкаад̣̇ийсу агкараани ликид̇ваа д̣̇ассанавасзна ‘‘агкарам̣ ваа чинд̣̇ад̇ий’’д̇и вуд̇д̇ам̣. хад̇т̇амуд̣̇д̣̇ааяа ваа д̇амад̇т̇ам̣ аарожзд̇ийд̇и хад̇т̇зна ад̇хиббааяавин̃н̃аабанам̣ санд̇хааяа вуд̇д̇ам̣. ад̇хиббааяавин̃н̃аабаго хи хад̇т̇авигааро хад̇т̇амуд̣̇д̣̇аа. хад̇т̇а-сад̣̇д̣̇о жзд̇т̇а д̇ад̣̇згад̣̇зсзсу ан̇г̇улийсу д̣̇адтаб̣б̣о ‘‘на саб̣б̣ам̣ хад̇т̇ам̣ мукз багкибиссаамий’’д̇иаад̣̇ийсу (баажи. 618) вияа. д̇асмаа ад̇хиббааяавин̃н̃аабагзна ан̇г̇улисан̇гожаад̣̇инаа хад̇т̇авигаарзна д̇амад̇т̇ам̣ аарожзд̇ийд̇и звамзд̇т̇а ад̇т̇о д̣̇адтаб̣б̣о.
‘‘Paccakkhāmi dhārehī’’ti vattamānakālassa padhānabhāvena vattumicchitattā atītānāgataparikappavacanehi nevatthi sikkhāpaccakkhānanti dassento āha ‘‘sace pana buddhaṃ paccakkhinti vā’’tiādi. Vadati viññāpetīti ettha vadatīti iminā payogassa niyamitattā ekassa santike attano vacībhedappayogeneva sikkhāpaccakkhānaṃ hoti, na dūtasāsanādippayogenāti dassento āha ‘‘dūtaṃ vā pahiṇātī’’tiādi. Tattha ‘‘mama sikkhāpaccakkhānabhāvaṃ kathehī’’ti mukhasāsanavasena ‘‘dūtaṃ vā pahiṇātī’’ti vuttaṃ. Paṇṇe likhitvā pahiṇanavasena ‘‘sāsanaṃ vā pesetī’’ti vuttaṃ. Rukkhādīsu akkharāni likhitvā dassanavasena ‘‘akkharaṃ vā chindatī’’ti vuttaṃ. Hatthamuddāya vā tamatthaṃ ārocetīti hatthena adhippāyaviññāpanaṃ sandhāya vuttaṃ. Adhippāyaviññāpako hi hatthavikāro hatthamuddā. Hattha-saddo cettha tadekadesesu aṅgulīsu daṭṭhabbo ‘‘na sabbaṃ hatthaṃ mukhe pakkhipissāmī’’tiādīsu (pāci. 618) viya. Tasmā adhippāyaviññāpakena aṅgulisaṅkocādinā hatthavikārena tamatthaṃ ārocetīti evamettha attho daṭṭhabbo.
жид̇д̇асамбаяуд̇д̇анд̇и бажжагкаад̇угаамад̇аажид̇д̇асамбаяуд̇д̇ам̣. ид̣̇аани виж̇аананавасзна сигкаабажжагкаанам̣ нияамид̇аанияамид̇авасзна д̣̇вид̇хаа взд̣̇ид̇аб̣б̣анд̇и д̣̇ассзнд̇о ааха – ‘‘яад̣̇и аяамзва ж̇аанаад̇уу’’д̇иаад̣̇и. аяан̃жа вибхааг̇о ‘‘вад̣̇ад̇и вин̃н̃аабзд̇ийд̇и згависаяад̇д̇аа яасса вад̣̇ад̇и, д̇ассзва виж̇аананам̣ ад̇хиббзд̇ам̣, на ан̃н̃ассаа’’д̇и иминаа наязна лад̣̇д̇ход̇и д̣̇адтаб̣б̣ам̣. на хи яасса вад̣̇ад̇и, д̇ад̇о ан̃н̃ам̣ вин̃н̃аабзд̇ийд̇и аяамад̇т̇о самбхавад̇и. соязва ж̇аанаад̇ийд̇и авад̇хааран̣зна д̇асмим̣ авиж̇аананд̇зязва ан̃н̃асса ж̇аананам̣ бадигкибад̇и. д̇знзвааха – ‘‘ат̇а со на ж̇аанаад̇и, ан̃н̃о самийбз тид̇о ж̇аанаад̇и, абажжагкаад̇аа ход̇и сигкаа’’д̇и. д̇асмаа ‘‘аяамзва ж̇аанаад̇уу’’д̇и згам̣ нияамзд̇ваа аарожид̇з яад̣̇иби соби ж̇аанаад̇и ан̃н̃оби, нияамид̇асса бана нияамид̇авасзна виж̇аананасамбхавад̇о сигкаабажжагкаанам̣ ход̇иязваад̇и д̣̇адтаб̣б̣ам̣ ‘‘ан̃н̃о маа ж̇аанаад̇уу’’д̇и анияамид̇ад̇д̇аа. д̣̇виннамби нияамзд̇ваад̇и ид̣̇ам̣ ‘‘д̣̇вз ваа ж̇аананд̇у зго ваа, имзсам̣язва д̣̇виннам̣ аарожзмий’’д̇и звам̣ нияамзд̇ваа аарожанам̣ санд̇хааяа вуд̇д̇ам̣. д̇знзвааха – ‘‘згасмим̣ ж̇аананд̇зби д̣̇вийсу ж̇аананд̇зсубий’’д̇и. д̇асмаа ‘‘д̣̇взязва ж̇аананд̇у, зго маа ж̇аанаад̇уу’’д̇и звам̣ д̣̇виннам̣ нияамзд̇ваа аарожид̇з д̣̇вийсуязва ж̇аананд̇зсу сигкаабажжагкаанам̣ ход̇и, на згасмим̣ ж̇аананд̇зд̇и вад̣̇анд̇и.
Cittasampayuttanti paccakkhātukāmatācittasampayuttaṃ. Idāni vijānanavasena sikkhāpaccakkhānaṃ niyamitāniyamitavasena dvidhā veditabbanti dassento āha – ‘‘yadi ayameva jānātū’’tiādi. Ayañca vibhāgo ‘‘vadati viññāpetīti ekavisayattā yassa vadati, tasseva vijānanaṃ adhippetaṃ, na aññassā’’ti iminā nayena laddhoti daṭṭhabbaṃ. Na hi yassa vadati, tato aññaṃ viññāpetīti ayamattho sambhavati. Soyeva jānātīti avadhāraṇena tasmiṃ avijānanteyeva aññassa jānanaṃ paṭikkhipati. Tenevāha – ‘‘atha so na jānāti, añño samīpe ṭhito jānāti, apaccakkhātā hoti sikkhā’’ti. Tasmā ‘‘ayameva jānātū’’ti ekaṃ niyametvā ārocite yadipi sopi jānāti aññopi, niyamitassa pana niyamitavasena vijānanasambhavato sikkhāpaccakkhānaṃ hotiyevāti daṭṭhabbaṃ ‘‘añño mā jānātū’’ti aniyamitattā. Dvinnampi niyametvāti idaṃ ‘‘dve vā jānantu eko vā, imesaṃyeva dvinnaṃ ārocemī’’ti evaṃ niyametvā ārocanaṃ sandhāya vuttaṃ. Tenevāha – ‘‘ekasmiṃjānantepi dvīsu jānantesupī’’ti. Tasmā ‘‘dveyeva jānantu, eko mā jānātū’’ti evaṃ dvinnaṃ niyametvā ārocite dvīsuyeva jānantesu sikkhāpaccakkhānaṃ hoti, na ekasmiṃ jānanteti vadanti.
сабхааг̇зд̇и виссаасигз. барисан̇гамаанод̇и ‘‘сажз д̇з ж̇аанзяяум̣, мам̣ д̇з ваарзссанд̇ий’’д̇и аасан̇гамаано. самаяан̃н̃ууд̇и саасанаажаарагусало, ид̇ха бана д̇ад̣̇ад̇хиббааяаж̇аананамад̇д̇знаби самаяан̃н̃уу наама ход̇и. д̇знзва ааха – ‘‘угган̣тид̇о аяам̣…бз… саасанад̇о жуд̇од̇и ж̇аанаад̇ий’’д̇и. д̇асмаа ‘‘б̣уд̣̇д̇хам̣ бажжагкаамий’’д̇и имасса ад̇т̇ам̣ н̃ад̇вааби сажз ‘‘аяам̣ бхигкубхаавад̇о жавид̇угаамо, г̇ихий ваа ход̇угаамо’’д̇и на ж̇аанаад̇и, аббажжагкаад̇аава ход̇и сигкаа. сажз бана ‘‘б̣уд̣̇д̇хам̣ бажжагкаамий’’д̇и важанасса ад̇т̇ам̣ аж̇аанид̇вааби ‘‘угган̣тид̇о г̇ихий ход̇угаамо’’д̇и ад̇хиббааяам̣ ж̇аанаад̇и, бажжагкаад̇аава ход̇и сигкаа. ан̃н̃асмим̣ кан̣з сод̇авин̃н̃аан̣авийт̇ияаа сад̣̇д̣̇аг̇г̇ахан̣ам̣, ан̃н̃асмим̣язва жа мановин̃н̃аан̣авийт̇ияаа д̇ад̣̇ад̇т̇авиж̇аанананд̇и ааха – ‘‘д̇ан̇кан̣ан̃н̃зва бана абуб̣б̣ам̣ ажаримам̣ д̣̇уж̇ж̇аана’’нд̇и. на хи згасмим̣язва кан̣з сад̣̇д̣̇асаванам̣ д̇ад̣̇ад̇т̇авиж̇аананан̃жа самбхавад̇и. д̇ат̇аа хи ‘‘гхадо’’д̇и ваа ‘‘бадо’’д̇и ваа гзнажи вуд̇д̇з д̇ад̇т̇а гха-сад̣̇д̣̇ам̣ бажжуббаннам̣ г̇ахзд̇ваа згаа сод̇авин̃н̃аан̣авийт̇и уббаж̇ж̇ид̇ваа нируж̇жхад̇и, д̇ад̣̇ананд̇арам̣ згаа мановин̃н̃аан̣авийт̇и д̇амзва ад̇ийд̇ам̣ г̇ахзд̇ваа уббаж̇ж̇ад̇и. звам̣ д̇зна вуд̇д̇аважанз яад̇д̇агаани агкараани хонд̇и, д̇зсу згамзгам̣ агкарам̣ бажжуббаннамад̇ийд̇ан̃жа г̇ахзд̇ваа сод̇авин̃н̃аан̣авийт̇ияаа мановин̃н̃аан̣авийт̇ияаа жа уббаж̇ж̇ид̇ваа нируд̣̇д̇хааяа авасаанз д̇аани агкараани самбин̣д̣зд̇ваа агкарасамуухам̣ г̇ахзд̇ваа згаа мановин̃н̃аан̣авийт̇и уббаж̇ж̇ид̇ваа нируж̇жхад̇и. д̇ад̣̇ананд̇арам̣ ‘‘аяамагкарасамуухо зд̇асса наама’’нд̇и наамабан̃н̃ад̇д̇иг̇г̇ахан̣авасзна абарааяа мановин̃н̃аан̣авийт̇ияаа уббаж̇ж̇ид̇ваа нируд̣̇д̇хааяа д̇ад̣̇ананд̇арам̣ уббаннааяа мановин̃н̃аан̣авийт̇ияаа ‘‘аяамзд̇асса ад̇т̇о’’д̇и багад̇ияаа д̇ад̣̇ад̇т̇авиж̇аананам̣ самбхавад̇и.
Sabhāgeti vissāsike. Parisaṅkamānoti ‘‘sace te jāneyyuṃ, maṃ te vāressantī’’ti āsaṅkamāno. Samayaññūti sāsanācārakusalo, idha pana tadadhippāyajānanamattenapi samayaññū nāma hoti. Teneva āha – ‘‘ukkaṇṭhito ayaṃ…pe… sāsanato cutoti jānātī’’ti. Tasmā ‘‘buddhaṃ paccakkhāmī’’ti imassa atthaṃ ñatvāpi sace ‘‘ayaṃ bhikkhubhāvato cavitukāmo, gihī vā hotukāmo’’ti na jānāti, appaccakkhātāva hoti sikkhā. Sace pana ‘‘buddhaṃ paccakkhāmī’’ti vacanassa atthaṃ ajānitvāpi ‘‘ukkaṇṭhito gihī hotukāmo’’ti adhippāyaṃ jānāti, paccakkhātāva hoti sikkhā. Aññasmiṃ khaṇe sotaviññāṇavīthiyā saddaggahaṇaṃ, aññasmiṃyeva ca manoviññāṇavīthiyā tadatthavijānananti āha – ‘‘taṅkhaṇaññeva pana apubbaṃ acarimaṃ dujjāna’’nti. Na hi ekasmiṃyeva khaṇe saddasavanaṃ tadatthavijānanañca sambhavati. Tathā hi ‘‘ghaṭo’’ti vā ‘‘paṭo’’ti vā kenaci vutte tattha gha-saddaṃ paccuppannaṃ gahetvā ekā sotaviññāṇavīthi uppajjitvā nirujjhati, tadanantaraṃ ekā manoviññāṇavīthi tameva atītaṃ gahetvā uppajjati. Evaṃ tena vuttavacane yattakāni akkharāni honti, tesu ekamekaṃ akkharaṃ paccuppannamatītañca gahetvā sotaviññāṇavīthiyā manoviññāṇavīthiyā ca uppajjitvā niruddhāya avasāne tāni akkharāni sampiṇḍetvā akkharasamūhaṃ gahetvā ekā manoviññāṇavīthi uppajjitvā nirujjhati. Tadanantaraṃ ‘‘ayamakkharasamūho etassa nāma’’nti nāmapaññattiggahaṇavasena aparāya manoviññāṇavīthiyā uppajjitvā niruddhāya tadanantaraṃ uppannāya manoviññāṇavīthiyā ‘‘ayametassa attho’’ti pakatiyā tadatthavijānanaṃ sambhavati.
ааваж̇ж̇анасамаязнаад̇и бхуммад̇т̇з гаран̣аважанам̣, ад̇т̇аабхог̇асамаязд̇и ад̇т̇о. ид̣̇аани д̇амзва ааваж̇ж̇анасамаяам̣ вибхаавзнд̇о ааха – ‘‘яат̇аа багад̇ияаа…бз… ж̇аананд̇ий’’д̇и. д̇знзва важийбхзд̣̇зна ад̇хиббааяавин̃н̃аабанасса ид̇хаад̇хиббзд̇ад̇д̇аа абарабхааг̇з ‘‘гим̣ иминаа вуд̇д̇а’’нд̇и д̇ам̣ ган̇канд̇асса жирзна ад̇хиббааяавиж̇аананам̣ ан̃н̃знаби гзнажи убааяанд̇арзна самбхавад̇и, на гзвалам̣ важийбхзд̣̇амад̇д̇знаад̇и ааха – ‘‘ат̇а абарабхааг̇з…бз… аббажжагкаад̇аа ход̇и сигкаа’’д̇и. ‘‘г̇ихий бхависсаамий’’д̇и вуд̇д̇з ад̇т̇абхзд̣̇о гаалабхзд̣̇о жа ход̇ийд̇и аббажжагкаад̇аа ход̇и сигкаа. ‘‘д̇хаарзхий’’д̇и хи имасса яо ад̇т̇о гаало жа, на со ‘‘бхависсаамий’’д̇и зд̇асса. ‘‘г̇ихий хомий’’д̇и вуд̇д̇з бана ад̇т̇абхзд̣̇оязва, на гаалабхзд̣̇о ‘‘хомий’’д̇и вад̇д̇амаанагаалассзва вуд̇д̇ад̇д̇аа. ‘‘г̇ихий ж̇аад̇омхи, г̇ихиймхий’’д̇и зд̇т̇ааби ад̇т̇асса жзва гааласса жа бхиннад̇д̇аа аббажжагкаад̇аа ход̇и сигкаа. ‘‘аж̇ж̇а бадтааяаа’’д̇и ид̣̇ам̣ д̇ат̇аа вуд̇д̇зби д̣̇осабхаавад̇о барибун̣н̣ам̣ гад̇ваа вуд̇д̇ам̣. ‘‘д̇хаарзхий’’д̇и ад̇т̇аббад̇хаанад̇д̇аа нид̣̇д̣̇зсасса барияааяаважанзхиби сигкаабажжагкаанам̣ ход̇иязваад̇и д̣̇ассзнд̇о ааха ‘‘ж̇аанаахий’’д̇иаад̣̇и. д̇хаарзхи ж̇аанаахи сан̃ж̇аанаахи манаси гарохийд̇и хи зд̇аани бад̣̇аани ад̇т̇ад̇о гаалад̇о жа абхиннаани.
Āvajjanasamayenāti bhummatthe karaṇavacanaṃ, atthābhogasamayeti attho. Idāni tameva āvajjanasamayaṃ vibhāvento āha – ‘‘yathā pakatiyā…pe… jānantī’’ti. Teneva vacībhedena adhippāyaviññāpanassa idhādhippetattā aparabhāge ‘‘kiṃ iminā vutta’’nti taṃ kaṅkhantassa cirena adhippāyavijānanaṃ aññenapi kenaci upāyantarena sambhavati, na kevalaṃ vacībhedamattenāti āha – ‘‘atha aparabhāge…pe… appaccakkhātā hoti sikkhā’’ti. ‘‘Gihī bhavissāmī’’ti vutte atthabhedo kālabhedo ca hotīti appaccakkhātā hoti sikkhā. ‘‘Dhārehī’’ti hi imassa yo attho kālo ca, na so ‘‘bhavissāmī’’ti etassa. ‘‘Gihī homī’’ti vutte pana atthabhedoyeva, na kālabhedo ‘‘homī’’ti vattamānakālasseva vuttattā. ‘‘Gihī jātomhi, gihīmhī’’ti etthāpi atthassa ceva kālassa ca bhinnattā appaccakkhātā hoti sikkhā. ‘‘Ajja paṭṭhāyā’’ti idaṃ tathā vuttepi dosabhāvato paripuṇṇaṃ katvā vuttaṃ. ‘‘Dhārehī’’ti atthappadhānattā niddesassa pariyāyavacanehipi sikkhāpaccakkhānaṃ hotiyevāti dassento āha ‘‘jānāhī’’tiādi. Dhārehi jānāhi sañjānāhi manasi karohīti hi etāni padāni atthato kālato ca abhinnāni.
52. буримаанзва жуд̣̇д̣̇асаад̇и б̣уд̣̇д̇хаад̣̇исаб̣рахмажаарийбарияанд̇аани. ход̇у бхавад̇ууд̇и ид̣̇амби бадигкзбамад̇д̇амзваад̇и ааха ‘‘ход̇у, барияад̇д̇анд̇и ад̇т̇о’’д̇и.
52.Purimāneva cuddasāti buddhādisabrahmacārīpariyantāni. Hotu bhavatūti idampi paṭikkhepamattamevāti āha ‘‘hotu, pariyattanti attho’’ti.
53. ван̣н̣абадтаананд̇и махаасан̇гхигаанам̣ б̣уд̣̇д̇хаг̇ун̣абарид̣̇ийбагам̣ згам̣ суд̇д̇анд̇и вад̣̇анд̇и. убаалиг̇аат̇аасууд̇и (ма. ни. 2.76) –
53.Vaṇṇapaṭṭhānanti mahāsaṅghikānaṃ buddhaguṇaparidīpakaṃ ekaṃ suttanti vadanti. Upāligāthāsūti (ma. ni. 2.76) –
‘‘д̇хийрасса виг̇ад̇амохасса,
‘‘Dhīrassa vigatamohassa,
бабхиннакийласса виж̇ид̇авиж̇аяасса;
Pabhinnakhīlassa vijitavijayassa;
анийгхасса сусамажид̇д̇асса;
Anīghassa susamacittassa;
вуд̣̇д̇хасийласса саад̇хубан̃н̃асса;
Vuddhasīlassa sādhupaññassa;
взсаманд̇арасса вималасса;
Vesamantarassa vimalassa;
бхаг̇авад̇о д̇асса саавагохамасми.
Bhagavato tassa sāvakohamasmi.
‘‘агат̇ам̣гат̇исса д̇усид̇асса;
‘‘Akathaṃkathissa tusitassa;
ванд̇алогаамисасса муд̣̇ид̇асса;
Vantalokāmisassa muditassa;
гад̇асаман̣асса мануж̇асса;
Katasamaṇassa manujassa;
анд̇имасаарийрасса нарасса;
Antimasārīrassa narassa;
анобамасса вираж̇асса;
Anopamassa virajassa;
бхаг̇авад̇о д̇асса саавагохамасми.
Bhagavato tassa sāvakohamasmi.
‘‘асам̣саяасса гусаласса;
‘‘Asaṃsayassa kusalassa;
взнаяигасса саарат̇иварасса;
Venayikassa sārathivarassa;
ануд̇д̇арасса ружирад̇хаммасса;
Anuttarassa ruciradhammassa;
нигган̇касса бабхаасагасса;
Nikkaṅkhassa pabhāsakassa;
маанажчид̣̇асса вийрасса;
Mānacchidassa vīrassa;
бхаг̇авад̇о д̇асса саавагохамасми.
Bhagavato tassa sāvakohamasmi.
‘‘нисабхасса аббамзяяасса;
‘‘Nisabhassa appameyyassa;
г̇амбхийрасса монаббад̇д̇асса;
Gambhīrassa monappattassa;
кзман̇гарасса взд̣̇асса;
Khemaṅkarassa vedassa;
д̇хаммадтасса сам̣вуд̇ад̇д̇асса;
Dhammaṭṭhassa saṃvutattassa;
сан̇г̇аад̇иг̇асса муд̇д̇асса;
Saṅgātigassa muttassa;
бхаг̇авад̇о д̇асса саавагохамасми.
Bhagavato tassa sāvakohamasmi.
‘‘нааг̇асса банд̇асзнасса;
‘‘Nāgassa pantasenassa;
кийн̣асам̣яож̇анасса муд̇д̇асса;
Khīṇasaṃyojanassa muttassa;
бадиманд̇агасса д̇хонасса;
Paṭimantakassa dhonassa;
баннад̣̇д̇хаж̇асса вийд̇арааг̇асса;
Pannaddhajassa vītarāgassa;
д̣̇анд̇асса ниббабан̃жасса;
Dantassa nippapañcassa;
бхаг̇авад̇о д̇асса саавагохамасми.
Bhagavato tassa sāvakohamasmi.
‘‘исисад̇д̇амасса агухасса;
‘‘Isisattamassa akuhassa;
д̇звиж̇ж̇асса б̣рахмаббад̇д̇асса;
Tevijjassa brahmappattassa;
нхаад̇агасса бад̣̇агасса;
Nhātakassa padakassa;
бассад̣̇д̇хасса вид̣̇ид̇авзд̣̇асса;
Passaddhassa viditavedassa;
буринд̣̇ад̣̇асса саггасса;
Purindadassa sakkassa;
бхаг̇авад̇о д̇асса саавагохамасми.
Bhagavato tassa sāvakohamasmi.
‘‘арияасса бхаавид̇ад̇д̇асса;
‘‘Ariyassa bhāvitattassa;
бад̇д̇иббад̇д̇асса взяяаагаран̣асса;
Pattippattassa veyyākaraṇassa;
сад̇имад̇о вибассисса;
Satimato vipassissa;
анабхинад̇асса но абанад̇асса;
Anabhinatassa no apanatassa;
анзж̇асса васиббад̇д̇асса;
Anejassa vasippattassa;
бхаг̇авад̇о д̇асса саавагохамасми.
Bhagavato tassa sāvakohamasmi.
‘‘самуг̇г̇ад̇асса жхааяисса;
‘‘Samuggatassa jhāyissa;
анануг̇ад̇анд̇арасса суд̣̇д̇хасса;
Ananugatantarassa suddhassa;
асид̇асса хид̇асса;
Asitassa hitassa;
бавивид̇д̇асса аг̇г̇аббад̇д̇асса;
Pavivittassa aggappattassa;
д̇ин̣н̣асса д̇аараяанд̇асса;
Tiṇṇassa tārayantassa;
бхаг̇авад̇о д̇асса саавагохамасми.
Bhagavato tassa sāvakohamasmi.
‘‘санд̇асса бхуурибан̃н̃асса;
‘‘Santassa bhūripaññassa;
махаабан̃н̃асса вийд̇алобхасса;
Mahāpaññassa vītalobhassa;
д̇ат̇ааг̇ад̇асса суг̇ад̇асса;
Tathāgatassa sugatassa;
аббадибуг̇г̇аласса асамасса;
Appaṭipuggalassa asamassa;
висаарад̣̇асса нибун̣асса;
Visāradassa nipuṇassa;
бхаг̇авад̇о д̇асса саавагохамасми.
Bhagavato tassa sāvakohamasmi.
‘‘д̇ан̣хажчид̣̇асса б̣уд̣̇д̇хасса;
‘‘Taṇhacchidassa buddhassa;
вийд̇ад̇хуумасса анубалид̇д̇асса;
Vītadhūmassa anupalittassa;
аахунзяяасса яагкасса;
Āhuneyyassa yakkhassa;
уд̇д̇амабуг̇г̇аласса ад̇уласса;
Uttamapuggalassa atulassa;
махад̇о яасаг̇г̇аббад̇д̇асса;
Mahato yasaggappattassa;
бхаг̇авад̇о д̇асса саавагохамасмий’’д̇и. –
Bhagavato tassa sāvakohamasmī’’ti. –
звам̣ убаалиг̇ахабад̇инаа вуд̇д̇аасу убаалисуд̇д̇з ааг̇ад̇аг̇аат̇аасу.
Evaṃ upāligahapatinā vuttāsu upālisutte āgatagāthāsu.
яат̇ааруд̇амзваад̇и яат̇аавуд̇д̇амзва, баал̣ияам̣ ааг̇ад̇амзваад̇и ад̇хиббааяо. яасмаа ‘‘саммаасамб̣уд̣̇д̇хам̣ ананд̇аб̣уд̣̇д̇хим̣ аномаб̣уд̣̇д̇хим̣ б̣од̇хибан̃н̃аан̣а’’нд̇и имаани ван̣н̣абадтаанз ааг̇ад̇анаамаани, ‘‘д̇хийра’’нд̇иаад̣̇ийни бана убаалиг̇аат̇аасу ааг̇ад̇анаамаани. д̇ад̇т̇а б̣од̇хи вужжад̇и саб̣б̣ан̃н̃уд̇ан̃н̃аан̣ам̣, д̇ам̣ сан̃ж̇аананахзд̇уд̇д̇аа бан̃н̃аан̣ам̣ зд̇ассаад̇и б̣од̇хибан̃н̃аан̣о, бхаг̇аваа. д̇хияаа бан̃н̃ааяа раад̇и г̇ан̣хаад̇и , сзвад̇ийд̇и ваа д̇хийро. самужчиннасаб̣б̣ажзд̇окийлад̇д̇аа бабхиннакийло. саб̣б̣абут̇уж̇ж̇анз виж̇иним̣су виж̇аяанд̇и виж̇иниссанд̇и жаад̇и виж̇аяаа. гз д̇з? мажжумаарагилзсамаарад̣̇звабуд̇д̇амаараа. д̇з виж̇ид̇аа виж̇аяаа зд̇знаад̇и виж̇ид̇авиж̇аяо, бхаг̇аваа. гилзсамаарамажжумааравиж̇аязнзва банзд̇т̇а абхисан̇каарагканд̇хамаарааби виж̇ид̇аава хонд̇ийд̇и д̣̇адтаб̣б̣ам̣.
Yathārutamevāti yathāvuttameva, pāḷiyaṃ āgatamevāti adhippāyo. Yasmā ‘‘sammāsambuddhaṃ anantabuddhiṃ anomabuddhiṃ bodhipaññāṇa’’nti imāni vaṇṇapaṭṭhāne āgatanāmāni, ‘‘dhīra’’ntiādīni pana upāligāthāsu āgatanāmāni. Tattha bodhi vuccati sabbaññutaññāṇaṃ, taṃ sañjānanahetuttā paññāṇaṃ etassāti bodhipaññāṇo, bhagavā. Dhiyā paññāya rāti gaṇhāti , sevatīti vā dhīro. Samucchinnasabbacetokhīlattā pabhinnakhīlo. Sabbaputhujjane vijiniṃsu vijayanti vijinissanti cāti vijayā. Ke te? Maccumārakilesamāradevaputtamārā. Te vijitā vijayā etenāti vijitavijayo, bhagavā. Kilesamāramaccumāravijayeneva panettha abhisaṅkhārakkhandhamārāpi vijitāva hontīti daṭṭhabbaṃ.
сваагкаад̇анд̇иаад̣̇ийсу (висуд̣̇д̇хи. 1.147) саад̇т̇асаб̣яан̃ж̇анагзвалабарибун̣н̣абарисуд̣̇д̇хаб̣рахмажарияасса багаасанад̇о сваагкаад̇о д̇хаммо, ад̇т̇авибаллаасаабхаавад̇о ваа судту агкаад̇од̇и сваагкаад̇о. яат̇аа хи ан̃н̃ад̇ид̇т̇ияаанам̣ д̇хаммасса ад̇т̇о вибаллаасам̣ аабаж̇ж̇ад̇и ‘‘анд̇арааяигаа’’д̇и вуд̇д̇ад̇хаммаанам̣ анд̇арааяигад̇д̇аабхаавад̇о, ‘‘нияяаанигаа’’д̇и жа вуд̇д̇ад̇хаммаанам̣ нияяаанигад̇д̇аабхаавад̇о, д̇зна д̇з ан̃н̃ад̇ид̇т̇ияаа д̣̇урагкаад̇ад̇хаммааязва хонд̇и, на д̇ат̇аа бхаг̇авад̇о д̇хаммасса ад̇т̇о вибаллаасам̣ аабаж̇ж̇ад̇и ‘‘имз д̇хаммаа анд̇арааяигаа нияяаанигаа’’д̇и звам̣ вуд̇д̇ад̇хаммаанам̣ д̇ат̇аабхааваанад̇иггаманад̇од̇и. звам̣ д̇аава барияад̇д̇ид̇хаммо сваагкаад̇о д̇хаммо.
Svākkhātantiādīsu (visuddhi. 1.147) sātthasabyañjanakevalaparipuṇṇaparisuddhabrahmacariyassa pakāsanato svākkhāto dhammo, atthavipallāsābhāvato vā suṭṭhu akkhātoti svākkhāto. Yathā hi aññatitthiyānaṃ dhammassa attho vipallāsaṃ āpajjati ‘‘antarāyikā’’ti vuttadhammānaṃ antarāyikattābhāvato, ‘‘niyyānikā’’ti ca vuttadhammānaṃ niyyānikattābhāvato, tena te aññatitthiyā durakkhātadhammāyeva honti, na tathā bhagavato dhammassa attho vipallāsaṃ āpajjati ‘‘ime dhammā antarāyikā niyyānikā’’ti evaṃ vuttadhammānaṃ tathābhāvānatikkamanatoti. Evaṃ tāva pariyattidhammo svākkhāto dhammo.
логуд̇д̇арад̇хаммо бана ниб̣б̣аанаануруубааяа бадибад̇д̇ияаа бадибад̣̇аануруубасса жа ниб̣б̣аанасса агкаад̇ад̇д̇аа сваагкаад̇о. яат̇ааха –
Lokuttaradhammo pana nibbānānurūpāya paṭipattiyā paṭipadānurūpassa ca nibbānassa akkhātattā svākkhāto. Yathāha –
‘‘субан̃н̃ад̇д̇аа ко бана д̇зна бхаг̇авад̇аа саавагаанам̣ ниб̣б̣аанаг̇ааминий бадибад̣̇аа сам̣санд̣̇ад̇и ниб̣б̣аанан̃жа бадибад̣̇аа жа. сзяяат̇ааби наама г̇ан̇г̇од̣̇агам̣ яамунод̣̇агзна сам̣санд̣̇ад̇и самзд̇и, звамзва субан̃н̃ад̇д̇аа д̇зна бхаг̇авад̇аа саавагаанам̣ ниб̣б̣аанаг̇ааминий бадибад̣̇аа сам̣санд̣̇ад̇и ниб̣б̣аанан̃жа бадибад̣̇аа жаа’’д̇и (д̣̇ий. ни. 2.296).
‘‘Supaññattā kho pana tena bhagavatā sāvakānaṃ nibbānagāminī paṭipadā saṃsandati nibbānañca paṭipadā ca. Seyyathāpi nāma gaṅgodakaṃ yamunodakena saṃsandati sameti, evameva supaññattā tena bhagavatā sāvakānaṃ nibbānagāminī paṭipadā saṃsandati nibbānañca paṭipadā cā’’ti (dī. ni. 2.296).
арияамаг̇г̇о жзд̇т̇а анд̇ад̣̇ваяам̣ анубаг̇амма маж̇жхимаабадибад̣̇аабхууд̇ова ‘‘маж̇жхимаа бадибад̣̇аа’’д̇и агкаад̇ад̇д̇аа сваагкаад̇о. сааман̃н̃апалаани бадиббассад̣̇д̇хагилзсаанзва ‘‘бадиббассад̣̇д̇хагилзсааний’’д̇и агкаад̇ад̇д̇аа сваагкаад̇аани. ниб̣б̣аанам̣ сассад̇аамад̇ад̇аан̣алзн̣аад̣̇исабхаавамзва сассад̇аад̣̇исабхаававасзна агкаад̇ад̇д̇аа сваагкаад̇анд̇и звам̣ логуд̇д̇арад̇хаммоби сваагкаад̇о.
Ariyamaggo cettha antadvayaṃ anupagamma majjhimāpaṭipadābhūtova ‘‘majjhimā paṭipadā’’ti akkhātattā svākkhāto. Sāmaññaphalāni paṭippassaddhakilesāneva ‘‘paṭippassaddhakilesānī’’ti akkhātattā svākkhātāni. Nibbānaṃ sassatāmatatāṇaleṇādisabhāvameva sassatādisabhāvavasena akkhātattā svākkhātanti evaṃ lokuttaradhammopi svākkhāto.
арияамаг̇г̇о ад̇д̇ано санд̇аанз рааг̇аад̣̇ийнам̣ абхаавам̣ гаронд̇зна арияабуг̇г̇алзна саамам̣ д̣̇адтаб̣б̣о ‘‘арияамаг̇г̇зна мама рааг̇аад̣̇аяо бахийнаа’’д̇и саяам̣ ад̇д̇анаа анан̃н̃анзяязна бассид̇аб̣б̣од̇и санд̣̇идти, санд̣̇идти зва санд̣̇идтиго. абижа нававид̇хо логуд̇д̇арад̇хаммо язна язна ад̇хиг̇ад̇о ход̇и, д̇зна д̇зна арияасаавагзна барасад̣̇д̇хааяа г̇анд̇аб̣б̣ад̇ам̣ хид̇ваа бажжагкан̃аан̣зна саяам̣ д̣̇адтаб̣б̣од̇и санд̣̇идтиго. ат̇а ваа басад̇т̇аа д̣̇идти санд̣̇идти, санд̣̇идтияаа ж̇аяад̇ийд̇и санд̣̇идтиго. д̇ат̇аа хзд̇т̇а арияамаг̇г̇о самбаяуд̇д̇ааяа, арияапалам̣ гааран̣абхууд̇ааяа, ниб̣б̣аанам̣ висаяибхууд̇ааяа санд̣̇идтияаа гилзсз ж̇аяад̇и, д̇асмаа яат̇аа рат̇зна ж̇аяад̇ийд̇и рат̇иго, звам̣ нававид̇хоби логуд̇д̇арад̇хаммо санд̣̇идтияаа ж̇аяад̇ийд̇и санд̣̇идтиго. ат̇а ваа д̣̇идтанд̇и д̣̇ассанам̣ вужжад̇и, д̣̇идтамзва санд̣̇идтам̣, санд̣̇ассананд̇и ад̇т̇о. санд̣̇идтам̣ арахад̇ийд̇и санд̣̇идтиго. логуд̇д̇арад̇хаммо хи бхааванаабхисамаяавасзна сажчигирияаабхисамаяавасзна жа д̣̇иссамааноязва ваддабхаяам̣ нивад̇д̇зд̇и, д̇асмаа яат̇аа вад̇т̇амарахад̇ийд̇и вад̇т̇иго, звам̣ санд̣̇идтам̣ арахад̇ийд̇и санд̣̇идтиго.
Ariyamaggo attano santāne rāgādīnaṃ abhāvaṃ karontena ariyapuggalena sāmaṃ daṭṭhabbo ‘‘ariyamaggena mama rāgādayo pahīnā’’ti sayaṃ attanā anaññaneyyena passitabboti sandiṭṭhi, sandiṭṭhi eva sandiṭṭhiko. Apica navavidho lokuttaradhammo yena yena adhigato hoti, tena tena ariyasāvakena parasaddhāya gantabbataṃ hitvā paccakkhañāṇena sayaṃ daṭṭhabboti sandiṭṭhiko. Atha vā pasatthā diṭṭhi sandiṭṭhi, sandiṭṭhiyā jayatīti sandiṭṭhiko. Tathā hettha ariyamaggo sampayuttāya, ariyaphalaṃ kāraṇabhūtāya, nibbānaṃ visayibhūtāya sandiṭṭhiyā kilese jayati, tasmā yathā rathena jayatīti rathiko, evaṃ navavidhopi lokuttaradhammo sandiṭṭhiyā jayatīti sandiṭṭhiko. Atha vā diṭṭhanti dassanaṃ vuccati, diṭṭhameva sandiṭṭhaṃ, sandassananti attho. Sandiṭṭhaṃ arahatīti sandiṭṭhiko. Lokuttaradhammo hi bhāvanābhisamayavasena sacchikiriyābhisamayavasena ca dissamānoyeva vaṭṭabhayaṃ nivatteti, tasmā yathā vatthamarahatīti vatthiko, evaṃ sandiṭṭhaṃ arahatīti sandiṭṭhiko.
ад̇д̇ано палад̣̇аанам̣ санд̇хааяа наасса ааг̇амзд̇аб̣б̣о гаало ад̇т̇ийд̇и агаало. яат̇аа хи логияагусаласса убабаж̇ж̇аабараабарияааязд̇иаад̣̇инаа палад̣̇аанам̣ бад̇и ааг̇амзд̇аб̣б̣о гаало ад̇т̇и, на звамзд̇ассаад̇и ад̇т̇о. агаалоязва агаалиго, на бан̃жаахасад̇д̇аахаад̣̇ибхзд̣̇ам̣ гаалам̣ кзбзд̇ваа палам̣ д̣̇зд̇и, ад̇д̇ано бана бавад̇д̇исамананд̇арамзва палад̣̇од̇и вуд̇д̇ам̣ ход̇и. ат̇а ваа ад̇д̇ано палаббад̣̇аанз виббагадто д̣̇ууро гаало бад̇д̇о убанийд̇о ассаад̇и гаалиго, гааланд̇арапалад̣̇ааяий. го со? логияо гусалад̇хаммо. аяам̣ бана самананд̇арапалад̣̇ааяагад̇д̇аа на гаалигод̇и агаалиго. маг̇г̇амзва хи санд̇хааяа ‘‘агаалиго’’д̇и ид̣̇ам̣ вуд̇д̇ам̣.
Attano phaladānaṃ sandhāya nāssa āgametabbo kālo atthīti akālo. Yathā hi lokiyakusalassa upapajjaaparāpariyāyetiādinā phaladānaṃ pati āgametabbo kālo atthi, na evametassāti attho. Akāloyeva akāliko, na pañcāhasattāhādibhedaṃ kālaṃ khepetvā phalaṃ deti, attano pana pavattisamanantarameva phaladoti vuttaṃ hoti. Atha vā attano phalappadāne vippakaṭṭho dūro kālo patto upanīto assāti kāliko, kālantaraphaladāyī. Ko so? Lokiyo kusaladhammo. Ayaṃ pana samanantaraphaladāyakattā na kālikoti akāliko. Maggameva hi sandhāya ‘‘akāliko’’ti idaṃ vuttaṃ.
‘‘зхи басса имам̣ д̇хамма’’нд̇и звам̣ бавад̇д̇ам̣ зхибассавид̇хим̣ арахад̇ийд̇и зхибассиго. гасмаа банзса д̇ам̣ вид̇хим̣ арахад̇ийд̇и? барамад̇т̇ад̇о виж̇ж̇амаанад̇д̇аа барисуд̣̇д̇хад̇д̇аа жа. рид̇д̇амудтияан̃хи хиран̃н̃ам̣ ваа суван̣н̣ам̣ ваа ад̇т̇ийд̇и вад̇вааби ‘‘зхи басса има’’нд̇и на саггаа вад̇д̇ум̣. гасмаа? авиж̇ж̇амаанад̇д̇аа. виж̇ж̇амаанамби жа г̇уут̇ам̣ ваа муд̇д̇ам̣ ваа манун̃н̃абхааваббагаасанзна жид̇д̇асамбахам̣санад̇т̇ам̣ ‘‘зхи басса има’’нд̇и на саггаа вад̇д̇ум̣, абижа ко нам̣ д̇ин̣зхи ваа бан̣н̣зхи ваа бадижчаад̣̇зд̇аб̣б̣амзва ход̇и. гасмаа? абарисуд̣̇д̇хад̇д̇аа. аяам̣ бана нававид̇хоби логуд̇д̇арад̇хаммо сабхаавад̇о жа виж̇ж̇амаано виг̇ад̇авалаахагз жа аагаасз самбун̣н̣ажанд̣̇аман̣д̣алам̣ вияа бан̣д̣угамб̣алз нигкид̇д̇аж̇аад̇иман̣и вияа жа барисуд̣̇д̇хо, д̇асмаа виж̇ж̇амаанад̇д̇аа барисуд̣̇д̇хад̇д̇аа жа зхибассавид̇хим̣ арахад̇ийд̇и зхибассиго.
‘‘Ehi passa imaṃ dhamma’’nti evaṃ pavattaṃ ehipassavidhiṃ arahatīti ehipassiko. Kasmā panesa taṃ vidhiṃ arahatīti? Paramatthato vijjamānattā parisuddhattā ca. Rittamuṭṭhiyañhi hiraññaṃ vā suvaṇṇaṃ vā atthīti vatvāpi ‘‘ehi passa ima’’nti na sakkā vattuṃ. Kasmā? Avijjamānattā. Vijjamānampi ca gūthaṃ vā muttaṃ vā manuññabhāvappakāsanena cittasampahaṃsanatthaṃ ‘‘ehi passa ima’’nti na sakkā vattuṃ, apica kho naṃ tiṇehi vā paṇṇehi vā paṭicchādetabbameva hoti. Kasmā? Aparisuddhattā. Ayaṃ pana navavidhopi lokuttaradhammo sabhāvato ca vijjamāno vigatavalāhake ca ākāse sampuṇṇacandamaṇḍalaṃ viya paṇḍukambale nikkhittajātimaṇi viya ca parisuddho, tasmā vijjamānattā parisuddhattā ca ehipassavidhiṃ arahatīti ehipassiko.
убанзд̇аб̣б̣од̇и обанзяяиго. аяам̣ банзд̇т̇а винижчаяо – убанаяанам̣ убанаяо, аад̣̇ид̇д̇ам̣ жзлам̣ ваа сийсам̣ ваа аж̇жхубзгкид̇вааби бхааванаавасзна ад̇д̇ано жид̇д̇з убанаяанам̣ уббаад̣̇анам̣ арахад̇ийд̇и обанзяяиго. ид̣̇ам̣ сан̇кад̇з логуд̇д̇арад̇хаммз яуж̇ж̇ад̇и, асан̇кад̇о бана ад̇д̇ано жид̇д̇з аарамман̣абхаавзна убанаяанам̣ арахад̇ийд̇и обанзяяиго, сажчигирияаавасзна аллийяанам̣ арахад̇ийд̇и ад̇т̇о . ат̇а ваа ниб̣б̣аанам̣ убанзд̇и арияабуг̇г̇аланд̇и арияамаг̇г̇о убанзяяо, сажчигаад̇аб̣б̣ад̇ам̣ убанзд̇аб̣б̣од̇и паланиб̣б̣аанад̇хаммо убанзяяо, убанзяяо зва обанзяяиго.
Upanetabboti opaneyyiko. Ayaṃ panettha vinicchayo – upanayanaṃ upanayo, ādittaṃ celaṃ vā sīsaṃ vā ajjhupekkhitvāpi bhāvanāvasena attano citte upanayanaṃ uppādanaṃ arahatīti opaneyyiko. Idaṃ saṅkhate lokuttaradhamme yujjati, asaṅkhato pana attano citte ārammaṇabhāvena upanayanaṃ arahatīti opaneyyiko, sacchikiriyāvasena allīyanaṃ arahatīti attho . Atha vā nibbānaṃ upaneti ariyapuggalanti ariyamaggo upaneyyo, sacchikātabbataṃ upanetabboti phalanibbānadhammo upaneyyo, upaneyyo eva opaneyyiko.
саб̣б̣зхи уг̇гхадид̇ан̃н̃ууаад̣̇ийхи вин̃н̃уухи ‘‘бхаавид̇о мз маг̇г̇о, ад̇хиг̇ад̇ам̣ палам̣, сажчигад̇о нирод̇хо’’д̇и ад̇д̇ани ад̇д̇ани взд̣̇ид̇аб̣б̣од̇и бажжад̇д̇ам̣ взд̣̇ид̇аб̣б̣о вин̃н̃уухи. на хи убаж̇жхааязна бхаавид̇зна маг̇г̇зна сад̣̇д̇хивихааригасса гилзсаа бахийяанд̇и, на со д̇асса паласамаабад̇д̇ияаа паасу вихарад̇и, на д̇зна сажчигад̇ам̣ ниб̣б̣аанам̣ сажчигарод̇и, д̇асмаа на зса барасса сийсз аабхаран̣ам̣ вияа д̣̇адтаб̣б̣о, ад̇д̇ано бана жид̇д̇зязва д̣̇адтаб̣б̣о, анубхавид̇аб̣б̣о вин̃н̃уухийд̇и вуд̇д̇ам̣ ход̇и.
Sabbehi ugghaṭitaññūādīhi viññūhi ‘‘bhāvito me maggo, adhigataṃ phalaṃ, sacchikato nirodho’’ti attani attani veditabboti paccattaṃ veditabbo viññūhi. Na hi upajjhāyena bhāvitena maggena saddhivihārikassa kilesā pahīyanti, na so tassa phalasamāpattiyā phāsu viharati, na tena sacchikataṃ nibbānaṃ sacchikaroti, tasmā na esa parassa sīse ābharaṇaṃ viya daṭṭhabbo, attano pana citteyeva daṭṭhabbo, anubhavitabbo viññūhīti vuttaṃ hoti.
асан̇кад̇анд̇и сан̇г̇амма самааг̇амма бажжаяасамод̇хааналагкан̣зна сан̇г̇амзна саннибад̇ид̇ваа ануруубзхи бажжаязхи агад̇ам̣ аниб̣б̣ад̇д̇ид̇анд̇и асан̇кад̇ам̣. над̇т̇и зд̇т̇а мад̇анд̇и амад̇ам̣, зд̇асмим̣ ваа ад̇хиг̇ад̇з над̇т̇и буг̇г̇аласса мад̇ам̣ маран̣анд̇и амад̇ам̣. гин̃жааби зд̇т̇а ‘‘сваагкаад̇ам̣ д̇хаммам̣ бажжагкаамий’’д̇иаад̣̇инаа саб̣б̣ад̇т̇а д̇хамма-сад̣̇д̣̇аббаяог̇о д̣̇ассид̇о, д̇ат̇ааби д̇хамма-сад̣̇д̣̇зна аяож̇зд̇ваа вуд̇д̇з взважанз на бажжагкаанам̣ наама на ход̇ийд̇и ‘‘сваагкаад̇ам̣ бажжагкаамий’’д̇иаад̣̇инаа вуд̇д̇зби сигкаабажжагкаанам̣ ход̇иязваад̇и д̣̇адтаб̣б̣ам̣. ‘‘сваагкаад̇ам̣ д̇хамма’’нд̇иаад̣̇инаа бана д̇хамма-сад̣̇д̣̇аббаяог̇о сваагкаад̇аа-д̣̇исад̣̇д̣̇аанам̣ д̇хамма-висзсанабхаавад̣̇ассанад̇т̇ам̣ гад̇од̇и взд̣̇ид̇аб̣б̣ам̣. згад̇хаммагканд̇хассаби нааманд̇и зд̇т̇а ‘‘батамад̇хаммагканд̇хам̣ д̣̇уд̇ияад̇хаммагканд̇хам̣ бужчаад̇хаммагканд̇хам̣ виссаж̇ж̇анаад̇хаммагканд̇ха’’нд̇иаад̣̇инаа д̇хаммагканд̇ханаамаани взд̣̇ид̇аб̣б̣аани.
Asaṅkhatanti saṅgamma samāgamma paccayasamodhānalakkhaṇena saṅgamena sannipatitvā anurūpehi paccayehi akataṃ anibbattitanti asaṅkhataṃ. Natthi ettha matanti amataṃ, etasmiṃ vā adhigate natthi puggalassa mataṃ maraṇanti amataṃ. Kiñcāpi ettha ‘‘svākkhātaṃ dhammaṃ paccakkhāmī’’tiādinā sabbattha dhamma-saddappayogo dassito, tathāpi dhamma-saddena ayojetvā vutte vevacane na paccakkhānaṃ nāma na hotīti ‘‘svākkhātaṃ paccakkhāmī’’tiādinā vuttepi sikkhāpaccakkhānaṃ hotiyevāti daṭṭhabbaṃ. ‘‘Svākkhātaṃ dhamma’’ntiādinā pana dhamma-saddappayogo svākkhātā-disaddānaṃ dhamma-visesanabhāvadassanatthaṃ katoti veditabbaṃ. Ekadhammakkhandhassapi nāmanti ettha ‘‘paṭhamadhammakkhandhaṃ dutiyadhammakkhandhaṃ pucchādhammakkhandhaṃ vissajjanādhammakkhandha’’ntiādinā dhammakkhandhanāmāni veditabbāni.
суббадибаннанд̇и сваагкаад̇з д̇хаммавинаяз яат̇аанусидтам̣ бадибаннад̇д̇аа суббадибаннам̣. маж̇жхимааяа бадибад̣̇ааяа анд̇ад̣̇ваяам̣ анубаг̇амма бадибаннад̇д̇аа гааяаважийманован̇гагудилаж̇имхад̣̇осаббахаанааяа бадибаннад̇д̇аа жа уж̇уббадибаннам̣. н̃ааяо вужжад̇и ниб̣б̣аанам̣ арияамаг̇г̇аад̣̇ийхи н̃ааяад̇и бадивиж̇жхийяад̇и сажчигарийяад̇ийд̇и гад̇ваа, д̇ад̣̇ад̇т̇ааяа бадибаннад̇д̇аа н̃ааяаббадибаннам̣. яат̇аа бадибаннаа г̇ун̣асамбхааванааяа барзхи гарияамаанам̣ бажжудтаанаад̣̇исаамийжигаммам̣ араханд̇и, д̇ат̇аа бадибаннад̇д̇аа саамийжиббадибаннам̣.
Suppaṭipannanti svākkhāte dhammavinaye yathānusiṭṭhaṃ paṭipannattā suppaṭipannaṃ. Majjhimāya paṭipadāya antadvayaṃ anupagamma paṭipannattā kāyavacīmanovaṅkakuṭilajimhadosappahānāya paṭipannattā ca ujuppaṭipannaṃ. Ñāyo vuccati nibbānaṃ ariyamaggādīhi ñāyati paṭivijjhīyati sacchikarīyatīti katvā, tadatthāya paṭipannattā ñāyappaṭipannaṃ. Yathā paṭipannā guṇasambhāvanāya parehi kariyamānaṃ paccuṭṭhānādisāmīcikammaṃ arahanti, tathā paṭipannattā sāmīcippaṭipannaṃ.
яуг̇ал̣авасзна батамамаг̇г̇адто паладтод̇и ид̣̇амзгам̣ яуг̇ал̣анд̇и звам̣ жад̇д̇аари бурисаяуг̇аани хонд̇и. зд̇т̇а бана ‘‘жад̇убурисаяуг̇ам̣ сан̇гха’’нд̇и вад̇д̇аб̣б̣з ‘‘жад̇д̇аарий’’д̇и вибхад̇д̇илобам̣ агад̇ваа нид̣̇д̣̇зсо гад̇од̇и д̣̇адтаб̣б̣ам̣. жад̇д̇аари бурисаяуг̇аани зд̇т̇аад̇и жад̇убурисаяуг̇од̇и хи сан̇гхо вужжад̇и. адтабурисабуг̇г̇аланд̇и бурисабуг̇г̇алавасзна зго батамамаг̇г̇адто, зго паладтод̇и иминаа наязна адтзва бурисабуг̇г̇алаа хонд̇и. адта бурисабуг̇г̇алаа зд̇т̇аад̇и адтабурисабуг̇г̇ало, сан̇гхо. зд̇т̇а жа бурисод̇и ваа буг̇г̇алод̇и ваа згад̇т̇аанзд̇аани бад̣̇аани, взнзяяавасзна банзд̇ам̣ вуд̇д̇ам̣.
Yugaḷavasena paṭhamamaggaṭṭho phalaṭṭhoti idamekaṃ yugaḷanti evaṃ cattāri purisayugāni honti. Ettha pana ‘‘catupurisayugaṃ saṅgha’’nti vattabbe ‘‘cattārī’’ti vibhattilopaṃ akatvā niddeso katoti daṭṭhabbaṃ. Cattāri purisayugāni etthāti catupurisayugoti hi saṅgho vuccati. Aṭṭhapurisapuggalanti purisapuggalavasena eko paṭhamamaggaṭṭho, eko phalaṭṭhoti iminā nayena aṭṭheva purisapuggalā honti. Aṭṭha purisapuggalā etthāti aṭṭhapurisapuggalo, saṅgho. Ettha ca purisoti vā puggaloti vā ekatthānetāni padāni, veneyyavasena panetaṃ vuttaṃ.
аахунзяяанд̇иаад̣̇ийсу (висуд̣̇д̇хи. 1.156) аанзд̇ваа хунид̇аб̣б̣анд̇и аахунам̣, д̣̇уурад̇оби аанзд̇ваа сийлаванд̇зсу д̣̇аад̇аб̣б̣аанам̣ жад̇уннам̣ бажжаяаанамзд̇ам̣ ад̇хиважанам̣. д̇ам̣ аахунам̣ бадиг̇г̇ахзд̇ум̣ яуд̇д̇о д̇асса махабпалабхаавагаран̣ад̇од̇и аахунзяяо, сан̇гхо. ат̇а ваа д̣̇уурад̇оби ааг̇анд̇ваа саб̣б̣асаабад̇зяяамби зд̇т̇а хунид̇аб̣б̣анд̇и аахаванийяо, саггаад̣̇ийнамби ваа аахаванам̣ арахад̇ийд̇и аахаванийяо. яо жааяам̣ б̣раахман̣аанам̣ аахаванийяо аг̇г̇и, яад̇т̇а худ̇ам̣ махабпаланд̇и д̇зсам̣ лад̣̇д̇хи. сажз худ̇асса махабпалад̇ааяа аахаванийяо, сан̇гхова аахаванийяо. сан̇гхз худ̇ан̃хи махабпалам̣ ход̇и. яат̇ааха –
Āhuneyyantiādīsu (visuddhi. 1.156) ānetvā hunitabbanti āhunaṃ, dūratopi ānetvā sīlavantesu dātabbānaṃ catunnaṃ paccayānametaṃ adhivacanaṃ. Taṃ āhunaṃ paṭiggahetuṃ yutto tassa mahapphalabhāvakaraṇatoti āhuneyyo, saṅgho. Atha vā dūratopi āgantvā sabbasāpateyyampi ettha hunitabbanti āhavanīyo, sakkādīnampi vā āhavanaṃ arahatīti āhavanīyo. Yo cāyaṃ brāhmaṇānaṃ āhavanīyo aggi, yattha hutaṃ mahapphalanti tesaṃ laddhi. Sace hutassa mahapphalatāya āhavanīyo, saṅghova āhavanīyo. Saṅghe hutañhi mahapphalaṃ hoti. Yathāha –
‘‘яо жа вассасад̇ам̣ ж̇анд̇у, аг̇г̇им̣ барижарз ванз;
‘‘Yo ca vassasataṃ jantu, aggiṃ paricare vane;
зган̃жа бхаавид̇ад̇д̇аанам̣, мухуд̇д̇амаби бууж̇аяз;
Ekañca bhāvitattānaṃ, muhuttamapi pūjaye;
сааязва бууж̇анаа сзяяо, яан̃жз вассасад̇ам̣ худ̇а’’нд̇и. (д̇ха. ба. 107);
Sāyeva pūjanā seyyo, yañce vassasataṃ huta’’nti. (dha. pa. 107);
д̇ад̣̇зд̇ам̣ нигааяанд̇арз ‘‘аахаванийяо’’д̇и бад̣̇ам̣ ид̇ха ‘‘аахунзяяо’’д̇и иминаа бад̣̇зна ад̇т̇ад̇о згам̣, б̣яан̃ж̇анад̇о банзд̇т̇а гин̃жимад̇д̇амзва наанам̣.
Tadetaṃ nikāyantare ‘‘āhavanīyo’’ti padaṃ idha ‘‘āhuneyyo’’ti iminā padena atthato ekaṃ, byañjanato panettha kiñcimattameva nānaṃ.
баахунзяяанд̇и зд̇т̇а бана баахунам̣ вужжад̇и д̣̇исаавид̣̇исад̇о ааг̇ад̇аанам̣ бияаманаабаанам̣ н̃аад̇имид̇д̇аанам̣ ад̇т̇ааяа саггаарзна бадияад̇д̇ам̣ ааг̇анд̇угад̣̇аанам̣. д̇амби табзд̇ваа д̇з д̇ат̇ааруубз бияамид̇д̇аад̣̇игз баахунагз сан̇гхассзва д̣̇аад̇ум̣ яуд̇д̇ам̣, сан̇гхова д̇ам̣ бадиг̇г̇ахзд̇ум̣ яуд̇д̇о. сан̇гхасад̣̇исо хи баахунаго над̇т̇и. д̇ат̇аа хзса згаб̣уд̣̇д̇ханд̇арз вийд̇ивад̇д̇зязва д̣̇иссад̇и, аб̣б̣огин̣н̣ан̃жа бияаманаабад̇д̇агарзхи сийлаад̣̇ид̇хаммзхи саманнааг̇ад̇од̇и звам̣ баахунамасса д̣̇аад̇ум̣ яуд̇д̇ам̣, баахунан̃жа бадиг̇г̇ахзд̇ум̣ яуд̇д̇од̇и баахунзяяо.
Pāhuneyyanti ettha pana pāhunaṃ vuccati disāvidisato āgatānaṃ piyamanāpānaṃ ñātimittānaṃ atthāya sakkārena paṭiyattaṃ āgantukadānaṃ. Tampi ṭhapetvā te tathārūpe piyamittādike pāhunake saṅghasseva dātuṃ yuttaṃ, saṅghova taṃ paṭiggahetuṃ yutto. Saṅghasadiso hi pāhunako natthi. Tathā hesa ekabuddhantare vītivatteyeva dissati, abbokiṇṇañca piyamanāpattakarehi sīlādidhammehi samannāgatoti evaṃ pāhunamassa dātuṃ yuttaṃ, pāhunañca paṭiggahetuṃ yuttoti pāhuneyyo.
д̣̇агканд̇и зд̇ааяа сад̇д̇аа яат̇аад̇хиббзд̇аахи самбад̇д̇ийхи вад̣дханд̇ийд̇и д̣̇агкин̣аа, баралогам̣ сад̣̇д̣̇ахид̇ваа д̣̇аад̇аб̣б̣ад̣̇аанам̣. д̇ам̣ д̣̇агкин̣ам̣ арахад̇и, д̣̇агкин̣ааяа ваа хид̇о яасмаа нам̣ махабпалагарад̇ааяа висод̇хзд̇ийд̇и д̣̇агкин̣зяяо. убхо хад̇т̇з сираси бад̇идтаабзд̇ваа саб̣б̣алогзна гарияамаанам̣ ан̃ж̇алигаммам̣ арахад̇ийд̇и ан̃ж̇алигаран̣ийяо. ануд̇д̇арам̣ бун̃н̃агкзд̇д̇анд̇и саб̣б̣алогасса асад̣̇исам̣ бун̃н̃авируханадтаанам̣ . яат̇аа хи ран̃н̃о ваа амажжасса ваа саалийнам̣ ваа яаваанам̣ ваа вируханадтаанам̣ ран̃н̃о саалигкзд̇д̇ам̣ яавагкзд̇д̇анд̇и вужжад̇и, звам̣ сан̇гхо саб̣б̣алогасса бун̃н̃аанам̣ вируханадтаанам̣. сан̇гхам̣ ниссааяа хи логасса наанаббагаарахид̇асукасам̣вад̇д̇анигаани бун̃н̃аани вируханд̇и, д̇асмаа сан̇гхо ануд̇д̇арам̣ бун̃н̃агкзд̇д̇ам̣ логасса. зд̇т̇ааби ‘‘суббадибаннам̣ сан̇гха’’нд̇иаад̣̇инаа саб̣б̣ад̇т̇а сан̇гха-сад̣̇д̣̇аббаяог̇о суббадибаннаа-д̣̇исад̣̇д̣̇аанам̣ сан̇гхависзсанабхаавад̣̇ассанад̇т̇ам̣ гад̇о, д̇асмаа ‘‘суббадибаннам̣ бажжагкаамий’’д̇иаад̣̇инаа вуд̇д̇зби сигкаабажжагкаанам̣ ход̇иязваад̇и д̣̇адтаб̣б̣ам̣.
Dakkhanti etāya sattā yathādhippetāhi sampattīhi vaḍḍhantīti dakkhiṇā, paralokaṃ saddahitvā dātabbadānaṃ. Taṃ dakkhiṇaṃ arahati, dakkhiṇāya vā hito yasmā naṃ mahapphalakaratāya visodhetīti dakkhiṇeyyo. Ubho hatthe sirasi patiṭṭhāpetvā sabbalokena kariyamānaṃ añjalikammaṃ arahatīti añjalikaraṇīyo. Anuttaraṃ puññakkhettanti sabbalokassa asadisaṃ puññaviruhanaṭṭhānaṃ . Yathā hi rañño vā amaccassa vā sālīnaṃ vā yavānaṃ vā viruhanaṭṭhānaṃ rañño sālikkhettaṃ yavakkhettanti vuccati, evaṃ saṅgho sabbalokassa puññānaṃ viruhanaṭṭhānaṃ. Saṅghaṃ nissāya hi lokassa nānappakārahitasukhasaṃvattanikāni puññāni viruhanti, tasmā saṅgho anuttaraṃ puññakkhettaṃ lokassa. Etthāpi ‘‘suppaṭipannaṃ saṅgha’’ntiādinā sabbattha saṅgha-saddappayogo suppaṭipannā-disaddānaṃ saṅghavisesanabhāvadassanatthaṃ kato, tasmā ‘‘suppaṭipannaṃ paccakkhāmī’’tiādinā vuttepi sikkhāpaccakkhānaṃ hotiyevāti daṭṭhabbaṃ.
сигкаавзважанзсу бана сигкаа-сад̣̇д̣̇ам̣ винаа гзвалам̣ бхигку-сад̣̇д̣̇о бхигкуний-сад̣̇д̣̇о жа сигкааяа ад̇хиважанам̣ на ход̇ийд̇и ‘‘бхигкусигкам̣ бхигкунийсигка’’нд̇и вуд̇д̇зязва сийсам̣ зд̇и, ад̇хисийлаад̣̇аяо бана сигкаа зваад̇и ‘‘ад̇хисийлам̣ бажжагкаамий’’д̇иаад̣̇инаа вуд̇д̇зби сийсам̣ зд̇и. батамам̣ баарааж̇иганд̇иаад̣̇инаа сигкаабад̣̇аанам̣язва г̇ахан̣ам̣ взд̣̇ид̇аб̣б̣ам̣, на аабад̇д̇ийнам̣.
Sikkhāvevacanesu pana sikkhā-saddaṃ vinā kevalaṃ bhikkhu-saddo bhikkhunī-saddo ca sikkhāya adhivacanaṃ na hotīti ‘‘bhikkhusikkhaṃ bhikkhunīsikkha’’nti vutteyeva sīsaṃ eti, adhisīlādayo pana sikkhā evāti ‘‘adhisīlaṃ paccakkhāmī’’tiādinā vuttepi sīsaṃ eti. Paṭhamaṃ pārājikantiādinā sikkhāpadānaṃyeva gahaṇaṃ veditabbaṃ, na āpattīnaṃ.
убаж̇жхааяавзважанзсу убаж̇жхааяо худ̇ваа яо баб̣б̣ааж̇зси жзва убасамбаад̣̇зси жа, д̇ам̣ санд̇хааяа ‘‘яо мам̣ баб̣б̣ааж̇зсий’’д̇иаад̣̇и вуд̇д̇ам̣. яасса муулзнаад̇и яасса бад̇хаанабхаавзна гааран̣абхаавзна ваа. яасса муулам̣ бад̇хаанабхааво гааран̣абхааво ваа зд̇иссаад̇и яассамуулигаа, баб̣б̣аж̇ж̇аа убасамбад̣̇аа жа. муула-сад̣̇д̣̇асса саабзгкабхаавзби нижжасаабзгкад̇ааяа г̇амагад̇д̇аа д̇ад̣̇д̇хид̇авуд̇д̇и д̣̇адтаб̣б̣аа.
Upajjhāyavevacanesu upajjhāyo hutvā yo pabbājesi ceva upasampādesi ca, taṃ sandhāya ‘‘yo maṃ pabbājesī’’tiādi vuttaṃ. Yassa mūlenāti yassa padhānabhāvena kāraṇabhāvena vā. Yassa mūlaṃ padhānabhāvo kāraṇabhāvo vā etissāti yassamūlikā, pabbajjā upasampadā ca. Mūla-saddassa sāpekkhabhāvepi niccasāpekkhatāya gamakattā taddhitavutti daṭṭhabbā.
аажарияавзважанзсу бана яо убаж̇жхам̣ ад̣̇ад̇ваа аажарияова худ̇ваа баб̣б̣ааж̇зси, гаммаваажаажарияо худ̇ваа убасамбаад̣̇зси жа, д̇ам̣ санд̇хааяа ‘‘яо мам̣ баб̣б̣ааж̇зси, яо мам̣ анусаавзсий’’д̇и вуд̇д̇ам̣. имзхи д̣̇вийхи важанзхи баб̣б̣аж̇ж̇аажарияо жа убасамбад̣̇аажарияо жа д̣̇ассид̇о. яаахам̣ ниссааяа васаамийд̇и ниссаяаажарияам̣ д̣̇ассзд̇и. яаахам̣ уд̣̇д̣̇исаабзмийд̇иаад̣̇инаа бана д̇хаммаажарияо вуд̇д̇о. д̇ад̇т̇а уд̣̇д̣̇исаабзмийд̇и баатам̣ уд̣̇д̣̇исаабзми. барибужчаамийд̇и уг̇г̇ахид̇абаатасса ад̇т̇ам̣ барибужчаами. сад̣̇д̇хивихааригавзважанаад̣̇ийсу жа вуд̇д̇аанусаарзнзва ад̇т̇о взд̣̇ид̇аб̣б̣о. д̇асса муулзд̇и зд̇т̇а бана д̇асса санд̇игзд̇и ад̇т̇о д̣̇адтаб̣б̣о.
Ācariyavevacanesu pana yo upajjhaṃ adatvā ācariyova hutvā pabbājesi, kammavācācariyo hutvā upasampādesi ca, taṃ sandhāya ‘‘yo maṃ pabbājesi, yo maṃ anusāvesī’’ti vuttaṃ. Imehi dvīhi vacanehi pabbajjācariyo ca upasampadācariyo ca dassito. Yāhaṃ nissāya vasāmīti nissayācariyaṃ dasseti. Yāhaṃ uddisāpemītiādinā pana dhammācariyo vutto. Tattha uddisāpemīti pāṭhaṃ uddisāpemi. Paripucchāmīti uggahitapāṭhassa atthaṃ paripucchāmi. Saddhivihārikavevacanādīsu ca vuttānusāreneva attho veditabbo. Tassa mūleti ettha pana tassa santiketi attho daṭṭhabbo.
огаллагод̇и куббибаасаад̣̇ид̣̇угкабарзд̇аанам̣ кийн̣асукаанам̣ нахаанаад̣̇исарийрабадиж̇аг̇г̇анарахид̇аанам̣ габан̣амануссаанамзд̇ам̣ ад̇хиважанам̣. мол̣иб̣ад̣̇д̇ход̇и сикааб̣ад̣̇д̇хо омуггамагудо ваа. гин̃жааби д̣̇взваажиго убаасаго батамаб̣од̇хияам̣язва самбхавад̇и, д̇ат̇ааби д̇ад̣̇аа лаб̣бхамаананаамам̣ г̇ахзд̇ваа вуд̇д̇зби сигкаабажжагкаанам̣ ход̇иязваад̇и д̣̇ассанад̇т̇ам̣ ‘‘д̣̇взваажиго убаасаго’’д̇и вуд̇д̇ам̣. ‘‘д̣̇взваажиго’’д̇и ид̣̇амзва банзд̇т̇а взважананд̇и д̣̇адтаб̣б̣ам̣, д̇асмаа ‘‘д̣̇взваажигод̇и мам̣ д̇хаарзхий’’д̇и зд̇д̇агзби вуд̇д̇з сийсам̣ зд̇и. звам̣ сзсзсуби.
Okallakoti khuppipāsādidukkhaparetānaṃ khīṇasukhānaṃ nahānādisarīrapaṭijagganarahitānaṃ kapaṇamanussānametaṃ adhivacanaṃ. Moḷibaddhoti sikhābaddho omukkamakuṭo vā. Kiñcāpi dvevāciko upāsako paṭhamabodhiyaṃyeva sambhavati, tathāpi tadā labbhamānanāmaṃ gahetvā vuttepi sikkhāpaccakkhānaṃ hotiyevāti dassanatthaṃ ‘‘dvevāciko upāsako’’ti vuttaṃ. ‘‘Dvevāciko’’ti idameva panettha vevacananti daṭṭhabbaṃ, tasmā ‘‘dvevācikoti maṃ dhārehī’’ti ettakepi vutte sīsaṃ eti. Evaṃ sesesupi.
гумаарагод̇и гумаараавад̇т̇о ад̇ивияа д̣̇ахарасааман̣зро. жзллагод̇и д̇ад̇о маханд̇ад̇аро куд̣̇д̣̇агасааман̣зро. жздагод̇и маж̇жхимо. мол̣иг̇аллод̇и махаасааман̣зро. саман̣уд̣̇д̣̇зсод̇и бана ависзсад̇о сааман̣зраад̇хиважанам̣. ниг̇ан̣тубадтаагод̇иаад̣̇ийниби д̇ид̇т̇ияасаавагавзважанаанийд̇и д̣̇адтаб̣б̣ам̣.
Kumārakoti kumārāvattho ativiya daharasāmaṇero. Cellakoti tato mahantataro khuddakasāmaṇero. Ceṭakoti majjhimo. Moḷigalloti mahāsāmaṇero. Samaṇuddesoti pana avisesato sāmaṇerādhivacanaṃ. Nigaṇṭhupaṭṭhākotiādīnipi titthiyasāvakavevacanānīti daṭṭhabbaṃ.
д̣̇уссийлод̇и ниссийло сийлавирахид̇о. баабад̇хаммод̇и д̣̇уссийлад̇д̇аа зва хийнаж̇жхаасаяад̇ааяа лаамагасабхааво. асужисан̇гассарасамаажаарод̇и абарисуд̣̇д̇хагааяагаммаад̣̇ид̇ааяа асужи худ̇ваа сан̇гааяа сарид̇аб̣б̣асамаажааро. д̣̇уссийло хи гин̃жид̣̇зва асааруббам̣ д̣̇исваа ‘‘ид̣̇ам̣ асугзна гад̇ам̣ бхависсад̇ий’’д̇и барзсам̣ аасан̇ганийяо ход̇и. гзнажид̣̇зва гаран̣ийязна манд̇аяанд̇з бхигкуу д̣̇исваа ‘‘гажжи ну ко имз маяаа гад̇агаммам̣ ж̇аанид̇ваа манд̇знд̇ий’’д̇и ад̇д̇аноязва сан̇гааяа сарид̇аб̣б̣асамаажааро. бадижчаннагамманд̇од̇и лаж̇ж̇ид̇аб̣б̣ад̇ааяа бадижчаад̣̇зд̇аб̣б̣агамманд̇о. ассаман̣од̇и на саман̣о. салаагаг̇г̇ахан̣аад̣̇ийсу ‘‘ахамби саман̣о’’д̇и мижчаабадин̃н̃ааяа саман̣абадин̃н̃о, асздтажаарид̇ааяа аб̣рахмажаарий, убосат̇аад̣̇ийсу ‘‘ахамби б̣рахмажаарий’’д̇и мижчаабадин̃н̃ааяа б̣рахмажаарибадин̃н̃о, бууд̇инаа гаммзна сийлавибад̇д̇ияаа анд̇о анубавидтад̇д̇аа анд̇обууд̇и, чахи д̣̇ваарзхи рааг̇аад̣̇игилзсаануссаванзна д̇инд̇ад̇д̇аа авассуд̇о, сан̃ж̇аад̇арааг̇аад̣̇игажаварад̇д̇аа сийлаванд̇зхи чад̣д̣зд̇аб̣б̣ад̇д̇аа жа гасамб̣уж̇аад̇о. гон̣тод̇и д̣̇уссийлаад̇хиважанамзд̇ам̣.
Dussīloti nissīlo sīlavirahito. Pāpadhammoti dussīlattā eva hīnajjhāsayatāya lāmakasabhāvo. Asucisaṅkassarasamācāroti aparisuddhakāyakammāditāya asuci hutvā saṅkāya saritabbasamācāro. Dussīlo hi kiñcideva asāruppaṃ disvā ‘‘idaṃ asukena kataṃ bhavissatī’’ti paresaṃ āsaṅkanīyo hoti. Kenacideva karaṇīyena mantayante bhikkhū disvā ‘‘kacci nu kho ime mayā katakammaṃ jānitvā mantentī’’ti attanoyeva saṅkāya saritabbasamācāro. Paṭicchannakammantoti lajjitabbatāya paṭicchādetabbakammanto. Assamaṇoti na samaṇo. Salākaggahaṇādīsu ‘‘ahampi samaṇo’’ti micchāpaṭiññāya samaṇapaṭiñño, aseṭṭhacāritāya abrahmacārī, uposathādīsu ‘‘ahampi brahmacārī’’ti micchāpaṭiññāya brahmacāripaṭiñño, pūtinā kammena sīlavipattiyā anto anupaviṭṭhattā antopūti, chahi dvārehi rāgādikilesānussavanena tintattā avassuto, sañjātarāgādikacavarattā sīlavantehi chaḍḍetabbattā ca kasambujāto. Koṇṭhoti dussīlādhivacanametaṃ.
‘‘яаани ваа банан̃н̃ааниби ад̇т̇и б̣уд̣̇д̇хавзважанаани ваа’’д̇иаад̣̇инаа яам̣-сад̣̇д̣̇абараамадтаанам̣ б̣уд̣̇д̇хаад̣̇ивзважанаанам̣язва д̇ам̣-сад̣̇д̣̇зна бараамасанам̣ ход̇ийд̇и ааха – ‘‘д̇зхи аагаарзхи…бз… б̣уд̣̇д̇хаад̣̇ийнам̣ взважанзхий’’д̇и. гат̇ам̣ бана д̇аани аагаараад̣̇исад̣̇д̣̇зхи вохарийяанд̇ийд̇и ааха ‘‘взважанаани хий’’д̇иаад̣̇и. сан̣таанаванд̇аанам̣ б̣уд̣̇д̇хаад̣̇ийнам̣ сан̣таанад̣̇ийбанам̣ д̇аава ход̇у, сан̣таанарахид̇аанам̣ бана д̇хаммасигкаад̣̇ийнам̣ гат̇анд̇и ааха ‘‘сигкаабажжагкаанасан̣таанад̇д̇аа зва ваа’’д̇и. сигкаабажжагкаанаруубаани хи взважанаани ‘‘сигкаабажжагкаанасан̣таанааний’’д̇и вужжанд̇и. звам̣ код̇и зд̇т̇а код̇и авад̇хааран̣ад̇т̇з нибаад̇од̇и ааха ‘‘звамзваа’’д̇и.
‘‘Yāni vā panaññānipi atthi buddhavevacanāni vā’’tiādinā yaṃ-saddaparāmaṭṭhānaṃ buddhādivevacanānaṃyeva taṃ-saddena parāmasanaṃ hotīti āha – ‘‘tehi ākārehi…pe… buddhādīnaṃ vevacanehī’’ti. Kathaṃ pana tāni ākārādisaddehi voharīyantīti āha ‘‘vevacanāni hī’’tiādi. Saṇṭhānavantānaṃ buddhādīnaṃ saṇṭhānadīpanaṃ tāva hotu, saṇṭhānarahitānaṃ pana dhammasikkhādīnaṃ kathanti āha ‘‘sikkhāpaccakkhānasaṇṭhānattā eva vā’’ti. Sikkhāpaccakkhānarūpāni hi vevacanāni ‘‘sikkhāpaccakkhānasaṇṭhānānī’’ti vuccanti. Evaṃ khoti ettha khoti avadhāraṇatthe nipātoti āha ‘‘evamevā’’ti.
54. мужчаабарзд̇од̇и мужчааяа абхибхууд̇о. важанад̇т̇авиж̇аананасамад̇т̇ам̣ д̇иражчаанаг̇ад̇ам̣ д̣̇ассзд̇ум̣ ‘‘нааг̇амаан̣авагассаа’’д̇иаад̣̇и вуд̇д̇ам̣. д̇ихзд̇угабадисанд̇хигаад̇и язбхуяяавасзна вуд̇д̇ам̣. на хи саб̣б̣ааби д̣̇звад̇аа д̇ихзд̇угабадисанд̇хигаава хонд̇и д̣̇вихзд̇угаанамби самбхавад̇о. ад̇икиббам̣ ж̇аананд̇ийд̇и д̣̇звад̇аанам̣ бхаван̇г̇абариваасасса мануссаанам̣ вияа ад̣̇анд̇хабхаавад̇о вуд̇д̇ам̣.
54.Mucchāparetoti mucchāya abhibhūto. Vacanatthavijānanasamatthaṃ tiracchānagataṃ dassetuṃ ‘‘nāgamāṇavakassā’’tiādi vuttaṃ. Tihetukapaṭisandhikāti yebhuyyavasena vuttaṃ. Na hi sabbāpi devatā tihetukapaṭisandhikāva honti dvihetukānampi sambhavato. Atikhippaṃ jānantīti devatānaṃ bhavaṅgaparivāsassa manussānaṃ viya adandhabhāvato vuttaṃ.
сабхааг̇ассаад̇и бурисасса. висабхааг̇ассаад̇и маад̇уг̇аамасса. анарияагод̇и мааг̇ад̇хавохаарад̇о ан̃н̃о. д̣̇аваад̇и сахасаа. раваад̇и вираж̇жхид̇ваа. ан̃н̃ам̣ бхан̣иссаамийд̇и ан̃н̃ам̣ бхан̣анд̇о б̣уд̣̇д̇хам̣ бажжагкаамийд̇и бхан̣ад̇ийд̇и яож̇зд̇аб̣б̣ам̣. агкарасамаяаанабхин̃н̃ад̇ааяа ваа гаран̣асамбад̇д̇ияаа абхаавад̇о ваа гат̇зд̇аб̣б̣ам̣ гат̇зд̇ум̣ асаггонд̇о худ̇ваа ан̃н̃ам̣ гат̇знд̇о раваа бхан̣ад̇и наама. убхаяат̇ааби ан̃н̃ам̣ бхан̣ид̇угаамасса ан̃н̃абхан̣анам̣ самаананд̇и ааха ‘‘буримзна го висзсо’’д̇и.
Sabhāgassāti purisassa. Visabhāgassāti mātugāmassa. Anariyakoti māgadhavohārato añño. Davāti sahasā. Ravāti virajjhitvā. Aññaṃ bhaṇissāmīti aññaṃ bhaṇanto buddhaṃ paccakkhāmīti bhaṇatīti yojetabbaṃ. Akkharasamayānabhiññatāya vā karaṇasampattiyā abhāvato vā kathetabbaṃ kathetuṃ asakkonto hutvā aññaṃ kathento ravā bhaṇati nāma. Ubhayathāpi aññaṃ bhaṇitukāmassa aññabhaṇanaṃ samānanti āha ‘‘purimena ko viseso’’ti.
ваажзд̇ийд̇и баал̣им̣ гат̇знд̇о ан̃н̃ам̣ уг̇г̇ан̣хаабзнд̇о ваа ваажзд̇и. барибужчад̇ийд̇и баал̣ияаа ад̇т̇ам̣ барибужчанд̇о баал̣им̣ барибужчад̇и. уг̇г̇ан̣хаад̇ийд̇и ан̃н̃асса санд̇игз баал̣им̣ уг̇г̇ан̣хаад̇и. саж̇жхааяам̣ гарод̇ийд̇и уг̇г̇ахид̇абаал̣им̣ саж̇жхааяад̇и. ван̣н̣зд̇ийд̇и баал̣ияаа ад̇т̇ам̣ сам̣ван̣н̣знд̇о баал̣им̣ ван̣н̣зд̇и. махаллагасса гин̃жи аж̇аананад̇о авид̣̇ид̇инд̣̇рияад̇ааяа ваа ‘‘бод̇т̇агаруубасад̣̇исассаа’’д̇и вуд̇д̇ам̣, мад̇д̇игааяа гад̇аруубасад̣̇исассаад̇и ад̇т̇о. г̇арумзд̇хассаад̇и аарамман̣зсу лахуббавад̇д̇ияаа абхаавад̇о д̣̇анд̇хаг̇ад̇игад̇ааяа г̇арубан̃н̃асса, манд̣̇абан̃н̃ассаад̇и вуд̇д̇ам̣ ход̇и. саб̣б̣асо ваад̇и иминаа ‘‘ид̣̇ам̣ бад̣̇ам̣ саавзссаами ‘сигкам̣ бажжагкаамий’’’д̇и звам̣ бавад̇д̇ажид̇д̇уббаад̣̇асса абхаавам̣ д̣̇ассзд̇и. яасмаа бана асад̇и зваруубз жид̇д̇уббаад̣̇з гзнажи барияааязна д̇ат̇аавид̇хам̣ важийбхзд̣̇ам̣ гад̇ваа сааванам̣ наама нзва самбхавад̇и, д̇асмаа вуд̇д̇ам̣ ‘‘б̣уд̣̇д̇хам̣ бажжагкаамийд̇иаад̣̇ийсу…бз… важийбхзд̣̇ам̣ гад̇ваа на саавзд̇ий’’д̇и.
Vācetīti pāḷiṃ kathento aññaṃ uggaṇhāpento vā vāceti. Paripucchatīti pāḷiyā atthaṃ paripucchanto pāḷiṃ paripucchati. Uggaṇhātīti aññassa santike pāḷiṃ uggaṇhāti. Sajjhāyaṃ karotīti uggahitapāḷiṃ sajjhāyati. Vaṇṇetīti pāḷiyā atthaṃ saṃvaṇṇento pāḷiṃ vaṇṇeti. Mahallakassa kiñci ajānanato aviditindriyatāya vā ‘‘potthakarūpasadisassā’’ti vuttaṃ, mattikāya katarūpasadisassāti attho. Garumedhassāti ārammaṇesu lahuppavattiyā abhāvato dandhagatikatāya garupaññassa, mandapaññassāti vuttaṃ hoti. Sabbaso vāti iminā ‘‘idaṃ padaṃ sāvessāmi ‘sikkhaṃ paccakkhāmī’’’ti evaṃ pavattacittuppādassa abhāvaṃ dasseti. Yasmā pana asati evarūpe cittuppāde kenaci pariyāyena tathāvidhaṃ vacībhedaṃ katvā sāvanaṃ nāma neva sambhavati, tasmā vuttaṃ ‘‘buddhaṃ paccakkhāmītiādīsu…pe… vacībhedaṃ katvā na sāvetī’’ti.
сигкаабажжагкаанавибхан̇г̇аван̣н̣анаа нидтид̇аа.
Sikkhāpaccakkhānavibhaṅgavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 1. батамабаарааж̇игам̣ • 1. Paṭhamapārājikaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 1. батамабаарааж̇игам̣ • 1. Paṭhamapārājikaṃ
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / сигкаабажжагкаанагат̇ааван̣н̣анаа • Sikkhāpaccakkhānakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / бажжагкаанавибхан̇г̇аван̣н̣анаа • Paccakkhānavibhaṅgavaṇṇanā
