| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
ஸிக்கா²பத³த³ண்ட³கம்மவத்து²கதா²
Sikkhāpadadaṇḍakammavatthukathā
106. த³ஸஸு ஸிக்கா²பதே³ஸு புரிமானங் பஞ்சன்னங் அதிக்கமோ நாஸனவத்து² , பச்சி²மானங் அதிக்கமோ த³ண்ட³கம்மவத்து².
106. Dasasu sikkhāpadesu purimānaṃ pañcannaṃ atikkamo nāsanavatthu , pacchimānaṃ atikkamo daṇḍakammavatthu.
107. அப்பதிஸ்ஸாதி பி⁴க்கூ² ஜெட்ட²கட்டா²னே இஸ்ஸரியட்டா²னே ந ட²பெந்தி. அஸபா⁴க³வுத்திகாதி ஸமானஜீவிகா ந ப⁴வந்தி, விஸபா⁴க³ஜீவிகாதி அத்தோ². அலாபா⁴ய பரிஸக்கதீதி யதா² லாப⁴ங் ந லப⁴ந்தி; ஏவங் பரக்கமதி. அனத்தா²யாதி உபத்³த³வாய. அவாஸாயாதி ‘‘கிந்தி இமஸ்மிங் ஆவாஸே ந வஸெய்யு’’ந்தி பரக்கமதி. அக்கோஸதி பரிபா⁴ஸதீதி அக்கோஸதி சேவ ப⁴யத³ஸ்ஸனேன ச தஜ்ஜேதி. பே⁴தே³தீதி பேஸுஞ்ஞங் உபஸங்ஹரித்வா பே⁴தே³தி. ஆவரணங் காதுந்தி ‘‘மா இத⁴ பவிஸா’’தி நிவாரணங் காதுங். யத்த² வா வஸதி யத்த² வா படிக்கமதீதி யத்த² வஸதி வா பவிஸதி வா; உப⁴யேனாபி அத்தனோ பரிவேணஞ்ச வஸ்ஸக்³கே³ன பத்தஸேனாஸனஞ்ச வுத்தங்.
107.Appatissāti bhikkhū jeṭṭhakaṭṭhāne issariyaṭṭhāne na ṭhapenti. Asabhāgavuttikāti samānajīvikā na bhavanti, visabhāgajīvikāti attho. Alābhāya parisakkatīti yathā lābhaṃ na labhanti; evaṃ parakkamati. Anatthāyāti upaddavāya. Avāsāyāti ‘‘kinti imasmiṃ āvāse na vaseyyu’’nti parakkamati. Akkosati paribhāsatīti akkosati ceva bhayadassanena ca tajjeti. Bhedetīti pesuññaṃ upasaṃharitvā bhedeti. Āvaraṇaṃ kātunti ‘‘mā idha pavisā’’ti nivāraṇaṃ kātuṃ. Yattha vā vasati yattha vā paṭikkamatīti yattha vasati vā pavisati vā; ubhayenāpi attano pariveṇañca vassaggena pattasenāsanañca vuttaṃ.
முக²த்³வாரிகங் ஆஹாரங் ஆவரணங் கரொந்தீதி ‘‘அஜ்ஜ மா கா²த³, மா பு⁴ஞ்ஜா’’தி ஏவங் நிவாரெந்தி. ந பி⁴க்க²வே முக²த்³வாரிகோ ஆஹாரோ ஆவரணங் காதப்³போ³தி எத்த² ‘‘மா கா²த³, மா பு⁴ஞ்ஜா’’தி வத³தோபி ‘‘ஆஹாரங் நிவாரெஸ்ஸாமீ’’தி பத்தசீவரங் அந்தோ நிக்கி²பதோபி ஸப்³ப³பயோகே³ஸு து³க்கடங். அனாசாரஸ்ஸ பன து³ப்³ப³சஸாமணேரஸ்ஸ த³ண்ட³கம்மங் கத்வா யாகு³ங் வா ப⁴த்தங் வா பத்தசீவரங் வா த³ஸ்ஸெத்வா ‘‘எத்தகே நாம த³ண்ட³கம்மே ஆஹடே இத³ங் லச்ச²ஸீ’’தி வத்துங் வட்டதி. ப⁴க³வதா ஹி ஆவரணமேவ த³ண்ட³கம்மங் வுத்தங். த⁴ம்மஸங்கா³ஹகத்தே²ரேஹி பன அபராதா⁴னுரூபங் உத³கதா³ருவாலிகாதீ³னங் ஆஹராபனம்பி காதப்³ப³ந்தி வுத்தங், தஸ்மா தம்பி காதப்³ப³ங். தஞ்ச கோ² ‘‘ஓரமிஸ்ஸதி விரமிஸ்ஸதீ’’தி அனுகம்பாய, ந ‘‘நஸ்ஸிஸ்ஸதி விப்³ப⁴மிஸ்ஸதீ’’திஆதி³னயப்பவத்தேன பாபஜ்ஜா²ஸயேன ‘‘த³ண்ட³கம்மங் கரோமீ’’தி ச உண்ஹபாஸாணே வா நிபஜ்ஜாபேதுங் பாஸாணிட்ட²காதீ³னி வா ஸீஸே நிக்கி²பாபேதுங் உத³கங் வா பவேஸேதுங் ந வட்டதி.
Mukhadvārikaṃ āhāraṃ āvaraṇaṃ karontīti ‘‘ajja mā khāda, mā bhuñjā’’ti evaṃ nivārenti. Na bhikkhave mukhadvāriko āhāro āvaraṇaṃ kātabboti ettha ‘‘mā khāda, mā bhuñjā’’ti vadatopi ‘‘āhāraṃ nivāressāmī’’ti pattacīvaraṃ anto nikkhipatopi sabbapayogesu dukkaṭaṃ. Anācārassa pana dubbacasāmaṇerassa daṇḍakammaṃ katvā yāguṃ vā bhattaṃ vā pattacīvaraṃ vā dassetvā ‘‘ettake nāma daṇḍakamme āhaṭe idaṃ lacchasī’’ti vattuṃ vaṭṭati. Bhagavatā hi āvaraṇameva daṇḍakammaṃ vuttaṃ. Dhammasaṅgāhakattherehi pana aparādhānurūpaṃ udakadāruvālikādīnaṃ āharāpanampi kātabbanti vuttaṃ, tasmā tampi kātabbaṃ. Tañca kho ‘‘oramissati viramissatī’’ti anukampāya, na ‘‘nassissati vibbhamissatī’’tiādinayappavattena pāpajjhāsayena ‘‘daṇḍakammaṃ karomī’’ti ca uṇhapāsāṇe vā nipajjāpetuṃ pāsāṇiṭṭhakādīni vā sīse nikkhipāpetuṃ udakaṃ vā pavesetuṃ na vaṭṭati.
ஸிக்கா²பத³த³ண்ட³கம்மவத்து²கதா² நிட்டி²தா.
Sikkhāpadadaṇḍakammavatthukathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
42. ஸிக்கா²பத³கதா² • 42. Sikkhāpadakathā
43. த³ண்ட³கம்மவத்து² • 43. Daṇḍakammavatthu
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸிக்கா²பத³த³ண்ட³கம்மவத்து²கதா²வண்ணனா • Sikkhāpadadaṇḍakammavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸிக்கா²பத³த³ண்ட³கம்மவத்து²கதா²வண்ணனா • Sikkhāpadadaṇḍakammavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸிக்கா²பத³த³ண்ட³கம்மவத்து²கதா²வண்ணனா • Sikkhāpadadaṇḍakammavatthukathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 42. ஸிக்கா²பத³த³ண்ட³கம்மவத்து²கதா² • 42. Sikkhāpadadaṇḍakammavatthukathā
