| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৪২. সিক্খাপদদণ্ডকম্মৰত্থুকথা
42. Sikkhāpadadaṇḍakammavatthukathā
১০৬. নাসনৰত্থূতি লিঙ্গনাসনায অধিট্ঠানং, কারণন্তি ৰুত্তং হোতি। পচ্ছিমানং পঞ্চন্নন্তি যোজনা। দণ্ডকম্মৰত্থূতি দণ্ডকম্মস্স কারণং।
106.Nāsanavatthūti liṅganāsanāya adhiṭṭhānaṃ, kāraṇanti vuttaṃ hoti. Pacchimānaṃ pañcannanti yojanā. Daṇḍakammavatthūti daṇḍakammassa kāraṇaṃ.
১০৭. অপ্পতিস্সাতি এত্থ ভিক্খূনং ৰচনস্স পটিমুখং আদরেন অসৰনং ভিক্খূ জেট্ঠকট্ঠানে ন ঠপেন্তি নামাতি দস্সেন্তো আহ ‘‘ভিক্খূ জেট্ঠকট্ঠানে’’তিআদি। ‘‘সমানজীৰিকা’’তি ইমিনা অসভাগৰুত্তিকাতি এত্থ সভাগসদ্দো সমানসদ্দপরিযাযো, ৰুত্তিসদ্দো জীৰিকপরিযাযোতি দস্সেতি। পরিসক্কতীতি এত্থ সক্ক গতিযন্তিধাতুপাঠেসু (সদ্দনীতিধাতুমালাযং ১৬ ল়কারন্তধাতু) ৰুত্তত্তা পরিপুব্বো সক্কসদ্দো গত্যত্থোতি আহ ‘‘পরক্কমতী’’তি। কিন্তীতি কিমেৰ। ইতিসদ্দো হেত্থ এৰসদ্দত্থো, কেন এৰ উপাযেনাতি হি অত্থো। অক্কোসতি চেৰাতি জাতিআদীহি অক্কোসতি চেৰ। ভেদেতীতি ভেদাপেতি। আৰরণং কাতুন্তি এত্থ আৰরণসদ্দো নিৰারণসদ্দৰেৰচনোতি আহ ‘‘নিৰারণং কাতু’’ন্তি। যত্থাতি যস্মিং পরিৰেণে, সেনাসনে ৰা। ৰস্সগ্গেনাতি ৰস্সগণনায। (তস্সাতি পরিৰেণসেনাসনস্স। উপচারেতি আসন্নে)। মুখদ্ৰারিকন্তি মুখসঙ্খাতেন দ্ৰারেন অজ্ঝোহরিতব্বং। ‘‘ৰদতোপী’’তি ইমিনা ৰচীপযোগেন দুক্কটাপত্তিং দস্সেতি, ‘‘নিক্খিপতোপী’’তি ইমিনা কাযপযোগেন। অনাচারস্সাতি দণ্ডকম্মে অনাচারস্স। এত্তকে নাম দণ্ডকম্মেতি এত্তকে নাম উদকাহরাপনাদিসঙ্খাতে দণ্ডকম্মে। ইদন্তি যাগুভত্তাদিং। লচ্ছসীতি লভিস্সসি। ‘‘এত্তকে নাম দণ্ডকম্মে’’তি ৰুত্তৰচনস্স যুত্তিং দস্সেন্তো আহ ‘‘ভগৰতা হী’’তিআদি। দণ্ডকম্মন্তি দণ্ডেন্তি দমেন্তি এতেনাতি দণ্ডো, সোযেৰ কত্তব্বত্তা কম্মন্তি দণ্ডকম্মং আৰরণাদি। অপরাধানুরূপন্তি ৰীতিক্কমস্স অপরাধস্স অনুরূপং। তম্পীতি উদকদারুৰালিকাদিআহরাপণম্পি। তঞ্চ খোতি তঞ্চ করণং। ওরমিস্সতীতি কাযেন ওরমিস্সতি। ৰিরমিস্সতীতি ৰাচায ৰিরমিস্সতি। উণ্হপাসাণে ৰাতিআদীসু ৰাসদ্দেন অঞ্ঞানিপি অত্ততাপনপরিতাপনাদীনি কম্মানি সঙ্গণ্হাতি।
107.Appatissāti ettha bhikkhūnaṃ vacanassa paṭimukhaṃ ādarena asavanaṃ bhikkhū jeṭṭhakaṭṭhāne na ṭhapenti nāmāti dassento āha ‘‘bhikkhū jeṭṭhakaṭṭhāne’’tiādi. ‘‘Samānajīvikā’’ti iminā asabhāgavuttikāti ettha sabhāgasaddo samānasaddapariyāyo, vuttisaddo jīvikapariyāyoti dasseti. Parisakkatīti ettha sakka gatiyantidhātupāṭhesu (saddanītidhātumālāyaṃ 16 ḷakārantadhātu) vuttattā paripubbo sakkasaddo gatyatthoti āha ‘‘parakkamatī’’ti. Kintīti kimeva. Itisaddo hettha evasaddattho, kena eva upāyenāti hi attho. Akkosati cevāti jātiādīhi akkosati ceva. Bhedetīti bhedāpeti. Āvaraṇaṃ kātunti ettha āvaraṇasaddo nivāraṇasaddavevacanoti āha ‘‘nivāraṇaṃ kātu’’nti. Yatthāti yasmiṃ pariveṇe, senāsane vā. Vassaggenāti vassagaṇanāya. (Tassāti pariveṇasenāsanassa. Upacāreti āsanne). Mukhadvārikanti mukhasaṅkhātena dvārena ajjhoharitabbaṃ. ‘‘Vadatopī’’ti iminā vacīpayogena dukkaṭāpattiṃ dasseti, ‘‘nikkhipatopī’’ti iminā kāyapayogena. Anācārassāti daṇḍakamme anācārassa. Ettake nāma daṇḍakammeti ettake nāma udakāharāpanādisaṅkhāte daṇḍakamme. Idanti yāgubhattādiṃ. Lacchasīti labhissasi. ‘‘Ettake nāma daṇḍakamme’’ti vuttavacanassa yuttiṃ dassento āha ‘‘bhagavatā hī’’tiādi. Daṇḍakammanti daṇḍenti damenti etenāti daṇḍo, soyeva kattabbattā kammanti daṇḍakammaṃ āvaraṇādi. Aparādhānurūpanti vītikkamassa aparādhassa anurūpaṃ. Tampīti udakadāruvālikādiāharāpaṇampi. Tañca khoti tañca karaṇaṃ. Oramissatīti kāyena oramissati. Viramissatīti vācāya viramissati. Uṇhapāsāṇe vātiādīsu vāsaddena aññānipi attatāpanaparitāpanādīni kammāni saṅgaṇhāti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
৪২. সিক্খাপদকথা • 42. Sikkhāpadakathā
৪৩. দণ্ডকম্মৰত্থু • 43. Daṇḍakammavatthu
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / সিক্খাপদদণ্ডকম্মৰত্থুকথা • Sikkhāpadadaṇḍakammavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / সিক্খাপদদণ্ডকম্মৰত্থুকথাৰণ্ণনা • Sikkhāpadadaṇḍakammavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / সিক্খাপদদণ্ডকম্মৰত্থুকথাৰণ্ণনা • Sikkhāpadadaṇḍakammavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / সিক্খাপদদণ্ডকম্মৰত্থুকথাৰণ্ণনা • Sikkhāpadadaṇḍakammavatthukathāvaṇṇanā
