| Library / Tipiṭaka / තිපිටක • Tipiṭaka / මහාවග්‌ග-අට්‌ඨකථා • Mahāvagga-aṭṭhakathā |
සික්‌ඛාපදදණ්‌ඩකම්‌මවත්‌ථුකථා
Sikkhāpadadaṇḍakammavatthukathā
106. දසසු සික්‌ඛාපදෙසු පුරිමානං පඤ්‌චන්‌නං අතික්‌කමො නාසනවත්‌ථු , පච්‌ඡිමානං අතික්‌කමො දණ්‌ඩකම්‌මවත්‌ථු.
106. Dasasu sikkhāpadesu purimānaṃ pañcannaṃ atikkamo nāsanavatthu , pacchimānaṃ atikkamo daṇḍakammavatthu.
107. අප්‌පතිස්‌සාති භික්‌ඛූ ජෙට්‌ඨකට්‌ඨානෙ ඉස්‌සරියට්‌ඨානෙ න ඨපෙන්‌ති. අසභාගවුත්‌තිකාති සමානජීවිකා න භවන්‌ති, විසභාගජීවිකාති අත්‌ථො. අලාභාය පරිසක්‌කතීති යථා ලාභං න ලභන්‌ති; එවං පරක්‌කමති. අනත්‌ථායාති උපද්‌දවාය. අවාසායාති ‘‘කින්‌ති ඉමස්‌මිං ආවාසෙ න වසෙය්‍යු’’න්‌ති පරක්‌කමති. අක්‌කොසති පරිභාසතීති අක්‌කොසති චෙව භයදස්‌සනෙන ච තජ්‌ජෙති. භෙදෙතීති පෙසුඤ්‌ඤං උපසංහරිත්‌වා භෙදෙති. ආවරණං කාතුන්‌ති ‘‘මා ඉධ පවිසා’’ති නිවාරණං කාතුං. යත්‌ථ වා වසති යත්‌ථ වා පටික්‌කමතීති යත්‌ථ වසති වා පවිසති වා; උභයෙනාපි අත්‌තනො පරිවෙණඤ්‌ච වස්‌සග්‌ගෙන පත්‌තසෙනාසනඤ්‌ච වුත්‌තං.
107.Appatissāti bhikkhū jeṭṭhakaṭṭhāne issariyaṭṭhāne na ṭhapenti. Asabhāgavuttikāti samānajīvikā na bhavanti, visabhāgajīvikāti attho. Alābhāya parisakkatīti yathā lābhaṃ na labhanti; evaṃ parakkamati. Anatthāyāti upaddavāya. Avāsāyāti ‘‘kinti imasmiṃ āvāse na vaseyyu’’nti parakkamati. Akkosati paribhāsatīti akkosati ceva bhayadassanena ca tajjeti. Bhedetīti pesuññaṃ upasaṃharitvā bhedeti. Āvaraṇaṃ kātunti ‘‘mā idha pavisā’’ti nivāraṇaṃ kātuṃ. Yattha vā vasati yattha vā paṭikkamatīti yattha vasati vā pavisati vā; ubhayenāpi attano pariveṇañca vassaggena pattasenāsanañca vuttaṃ.
මුඛද්‌වාරිකං ආහාරං ආවරණං කරොන්‌තීති ‘‘අජ්‌ජ මා ඛාද, මා භුඤ්‌ජා’’ති එවං නිවාරෙන්‌ති. න භික්‌ඛවෙ මුඛද්‌වාරිකො ආහාරො ආවරණං කාතබ්‌බොති එත්‌ථ ‘‘මා ඛාද, මා භුඤ්‌ජා’’ති වදතොපි ‘‘ආහාරං නිවාරෙස්‌සාමී’’ති පත්‌තචීවරං අන්‌තො නික්‌ඛිපතොපි සබ්‌බපයොගෙසු දුක්‌කටං. අනාචාරස්‌ස පන දුබ්‌බචසාමණෙරස්‌ස දණ්‌ඩකම්‌මං කත්‌වා යාගුං වා භත්‌තං වා පත්‌තචීවරං වා දස්‌සෙත්‌වා ‘‘එත්‌තකෙ නාම දණ්‌ඩකම්‌මෙ ආහටෙ ඉදං ලච්‌ඡසී’’ති වත්‌තුං වට්‌ටති. භගවතා හි ආවරණමෙව දණ්‌ඩකම්‌මං වුත්‌තං. ධම්‌මසඞ්‌ගාහකත්‌ථෙරෙහි පන අපරාධානුරූපං උදකදාරුවාලිකාදීනං ආහරාපනම්‌පි කාතබ්‌බන්‌ති වුත්‌තං, තස්‌මා තම්‌පි කාතබ්‌බං. තඤ්‌ච ඛො ‘‘ඔරමිස්‌සති විරමිස්‌සතී’’ති අනුකම්‌පාය, න ‘‘නස්‌සිස්‌සති විබ්‌භමිස්‌සතී’’තිආදිනයප්‌පවත්‌තෙන පාපජ්‌ඣාසයෙන ‘‘දණ්‌ඩකම්‌මං කරොමී’’ති ච උණ්‌හපාසාණෙ වා නිපජ්‌ජාපෙතුං පාසාණිට්‌ඨකාදීනි වා සීසෙ නික්‌ඛිපාපෙතුං උදකං වා පවෙසෙතුං න වට්‌ටති.
Mukhadvārikaṃ āhāraṃ āvaraṇaṃ karontīti ‘‘ajja mā khāda, mā bhuñjā’’ti evaṃ nivārenti. Na bhikkhave mukhadvāriko āhāro āvaraṇaṃ kātabboti ettha ‘‘mā khāda, mā bhuñjā’’ti vadatopi ‘‘āhāraṃ nivāressāmī’’ti pattacīvaraṃ anto nikkhipatopi sabbapayogesu dukkaṭaṃ. Anācārassa pana dubbacasāmaṇerassa daṇḍakammaṃ katvā yāguṃ vā bhattaṃ vā pattacīvaraṃ vā dassetvā ‘‘ettake nāma daṇḍakamme āhaṭe idaṃ lacchasī’’ti vattuṃ vaṭṭati. Bhagavatā hi āvaraṇameva daṇḍakammaṃ vuttaṃ. Dhammasaṅgāhakattherehi pana aparādhānurūpaṃ udakadāruvālikādīnaṃ āharāpanampi kātabbanti vuttaṃ, tasmā tampi kātabbaṃ. Tañca kho ‘‘oramissati viramissatī’’ti anukampāya, na ‘‘nassissati vibbhamissatī’’tiādinayappavattena pāpajjhāsayena ‘‘daṇḍakammaṃ karomī’’ti ca uṇhapāsāṇe vā nipajjāpetuṃ pāsāṇiṭṭhakādīni vā sīse nikkhipāpetuṃ udakaṃ vā pavesetuṃ na vaṭṭati.
සික්‌ඛාපදදණ්‌ඩකම්‌මවත්‌ථුකථා නිට්‌ඨිතා.
Sikkhāpadadaṇḍakammavatthukathā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවග්‌ගපාළි • Mahāvaggapāḷi
42. සික්‌ඛාපදකථා • 42. Sikkhāpadakathā
43. දණ්‌ඩකම්‌මවත්‌ථු • 43. Daṇḍakammavatthu
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / සික්‌ඛාපදදණ්‌ඩකම්‌මවත්‌ථුකථාවණ්‌ණනා • Sikkhāpadadaṇḍakammavatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / සික්‌ඛාපදදණ්‌ඩකම්‌මවත්‌ථුකථාවණ්‌ණනා • Sikkhāpadadaṇḍakammavatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / සික්‌ඛාපදදණ්‌ඩකම්‌මවත්‌ථුකථාවණ්‌ණනා • Sikkhāpadadaṇḍakammavatthukathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 42. සික්‌ඛාපදදණ්‌ඩකම්‌මවත්‌ථුකථා • 42. Sikkhāpadadaṇḍakammavatthukathā
