| Library / Tipiṭaka / ཏིཔིཊཀ • Tipiṭaka / མཧཱཝགྒ-ཨཊྛཀཐཱ • Mahāvagga-aṭṭhakathā |
སིཀྑཱཔདདཎྜཀམྨཝཏྠུཀཐཱ
Sikkhāpadadaṇḍakammavatthukathā
༡༠༦. དསསུ སིཀྑཱཔདེསུ པུརིམཱནཾ པཉྩནྣཾ ཨཏིཀྐམོ ནཱསནཝཏྠུ , པཙྪིམཱནཾ ཨཏིཀྐམོ དཎྜཀམྨཝཏྠུ།
106. Dasasu sikkhāpadesu purimānaṃ pañcannaṃ atikkamo nāsanavatthu , pacchimānaṃ atikkamo daṇḍakammavatthu.
༡༠༧. ཨཔྤཏིསྶཱཏི བྷིཀྑཱུ ཛེཊྛཀཊྛཱནེ ཨིསྶརིཡཊྛཱནེ ན ཋཔེནྟི། ཨསབྷཱགཝུཏྟིཀཱཏི སམཱནཛཱིཝིཀཱ ན བྷཝནྟི, ཝིསབྷཱགཛཱིཝིཀཱཏི ཨཏྠོ། ཨལཱབྷཱཡ པརིསཀྐཏཱིཏི ཡཐཱ ལཱབྷཾ ན ལབྷནྟི; ཨེཝཾ པརཀྐམཏི། ཨནཏྠཱཡཱཏི ཨུཔདྡཝཱཡ། ཨཝཱསཱཡཱཏི ‘‘ཀིནྟི ཨིམསྨིཾ ཨཱཝཱསེ ན ཝསེཡྻུ’’ནྟི པརཀྐམཏི། ཨཀྐོསཏི པརིབྷཱསཏཱིཏི ཨཀྐོསཏི ཙེཝ བྷཡདསྶནེན ཙ ཏཛྫེཏི། བྷེདེཏཱིཏི པེསུཉྙཾ ཨུཔསཾཧརིཏྭཱ བྷེདེཏི། ཨཱཝརཎཾ ཀཱཏུནྟི ‘‘མཱ ཨིདྷ པཝིསཱ’’ཏི ནིཝཱརཎཾ ཀཱཏུཾ། ཡཏྠ ཝཱ ཝསཏི ཡཏྠ ཝཱ པཊིཀྐམཏཱིཏི ཡཏྠ ཝསཏི ཝཱ པཝིསཏི ཝཱ; ཨུབྷཡེནཱཔི ཨཏྟནོ པརིཝེཎཉྩ ཝསྶགྒེན པཏྟསེནཱསནཉྩ ཝུཏྟཾ།
107.Appatissāti bhikkhū jeṭṭhakaṭṭhāne issariyaṭṭhāne na ṭhapenti. Asabhāgavuttikāti samānajīvikā na bhavanti, visabhāgajīvikāti attho. Alābhāya parisakkatīti yathā lābhaṃ na labhanti; evaṃ parakkamati. Anatthāyāti upaddavāya. Avāsāyāti ‘‘kinti imasmiṃ āvāse na vaseyyu’’nti parakkamati. Akkosati paribhāsatīti akkosati ceva bhayadassanena ca tajjeti. Bhedetīti pesuññaṃ upasaṃharitvā bhedeti. Āvaraṇaṃ kātunti ‘‘mā idha pavisā’’ti nivāraṇaṃ kātuṃ. Yattha vā vasati yattha vā paṭikkamatīti yattha vasati vā pavisati vā; ubhayenāpi attano pariveṇañca vassaggena pattasenāsanañca vuttaṃ.
མུཁདྭཱརིཀཾ ཨཱཧཱརཾ ཨཱཝརཎཾ ཀརོནྟཱིཏི ‘‘ཨཛྫ མཱ ཁཱད, མཱ བྷུཉྫཱ’’ཏི ཨེཝཾ ནིཝཱརེནྟི། ན བྷིཀྑཝེ མུཁདྭཱརིཀོ ཨཱཧཱརོ ཨཱཝརཎཾ ཀཱཏབྦོཏི ཨེཏྠ ‘‘མཱ ཁཱད, མཱ བྷུཉྫཱ’’ཏི ཝདཏོཔི ‘‘ཨཱཧཱརཾ ནིཝཱརེསྶཱམཱི’’ཏི པཏྟཙཱིཝརཾ ཨནྟོ ནིཀྑིཔཏོཔི སབྦཔཡོགེསུ དུཀྐཊཾ། ཨནཱཙཱརསྶ པན དུབྦཙསཱམཎེརསྶ དཎྜཀམྨཾ ཀཏྭཱ ཡཱགུཾ ཝཱ བྷཏྟཾ ཝཱ པཏྟཙཱིཝརཾ ཝཱ དསྶེཏྭཱ ‘‘ཨེཏྟཀེ ནཱམ དཎྜཀམྨེ ཨཱཧཊེ ཨིདཾ ལཙྪསཱི’’ཏི ཝཏྟུཾ ཝཊྚཏི། བྷགཝཏཱ ཧི ཨཱཝརཎམེཝ དཎྜཀམྨཾ ཝུཏྟཾ། དྷམྨསངྒཱཧཀཏྠེརེཧི པན ཨཔརཱདྷཱནུརཱུཔཾ ཨུདཀདཱརུཝཱལིཀཱདཱིནཾ ཨཱཧརཱཔནམྤི ཀཱཏབྦནྟི ཝུཏྟཾ, ཏསྨཱ ཏམྤི ཀཱཏབྦཾ། ཏཉྩ ཁོ ‘‘ཨོརམིསྶཏི ཝིརམིསྶཏཱི’’ཏི ཨནུཀམྤཱཡ, ན ‘‘ནསྶིསྶཏི ཝིབྦྷམིསྶཏཱི’’ཏིཨཱདིནཡཔྤཝཏྟེན པཱཔཛ྄ཛྷཱསཡེན ‘‘དཎྜཀམྨཾ ཀརོམཱི’’ཏི ཙ ཨུཎྷཔཱསཱཎེ ཝཱ ནིཔཛྫཱཔེཏུཾ པཱསཱཎིཊྛཀཱདཱིནི ཝཱ སཱིསེ ནིཀྑིཔཱཔེཏུཾ ཨུདཀཾ ཝཱ པཝེསེཏུཾ ན ཝཊྚཏི།
Mukhadvārikaṃ āhāraṃ āvaraṇaṃ karontīti ‘‘ajja mā khāda, mā bhuñjā’’ti evaṃ nivārenti. Na bhikkhave mukhadvāriko āhāro āvaraṇaṃ kātabboti ettha ‘‘mā khāda, mā bhuñjā’’ti vadatopi ‘‘āhāraṃ nivāressāmī’’ti pattacīvaraṃ anto nikkhipatopi sabbapayogesu dukkaṭaṃ. Anācārassa pana dubbacasāmaṇerassa daṇḍakammaṃ katvā yāguṃ vā bhattaṃ vā pattacīvaraṃ vā dassetvā ‘‘ettake nāma daṇḍakamme āhaṭe idaṃ lacchasī’’ti vattuṃ vaṭṭati. Bhagavatā hi āvaraṇameva daṇḍakammaṃ vuttaṃ. Dhammasaṅgāhakattherehi pana aparādhānurūpaṃ udakadāruvālikādīnaṃ āharāpanampi kātabbanti vuttaṃ, tasmā tampi kātabbaṃ. Tañca kho ‘‘oramissati viramissatī’’ti anukampāya, na ‘‘nassissati vibbhamissatī’’tiādinayappavattena pāpajjhāsayena ‘‘daṇḍakammaṃ karomī’’ti ca uṇhapāsāṇe vā nipajjāpetuṃ pāsāṇiṭṭhakādīni vā sīse nikkhipāpetuṃ udakaṃ vā pavesetuṃ na vaṭṭati.
སིཀྑཱཔདདཎྜཀམྨཝཏྠུཀཐཱ ནིཊྛིཏཱ།
Sikkhāpadadaṇḍakammavatthukathā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝགྒཔཱལི༹ • Mahāvaggapāḷi
༤༢. སིཀྑཱཔདཀཐཱ • 42. Sikkhāpadakathā
༤༣. དཎྜཀམྨཝཏྠུ • 43. Daṇḍakammavatthu
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā / སིཀྑཱཔདདཎྜཀམྨཝཏྠུཀཐཱཝཎྞནཱ • Sikkhāpadadaṇḍakammavatthukathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā / སིཀྑཱཔདདཎྜཀམྨཝཏྠུཀཐཱཝཎྞནཱ • Sikkhāpadadaṇḍakammavatthukathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / སིཀྑཱཔདདཎྜཀམྨཝཏྠུཀཐཱཝཎྞནཱ • Sikkhāpadadaṇḍakammavatthukathāvaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi / ༤༢. སིཀྑཱཔདདཎྜཀམྨཝཏྠུཀཐཱ • 42. Sikkhāpadadaṇḍakammavatthukathā
