| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
সিক্খাপদদণ্ডকম্মৰত্থুকথাৰণ্ণনা
Sikkhāpadadaṇḍakammavatthukathāvaṇṇanā
১০৬. অনুজানামি, ভিক্খৰে, সামণেরানং দস সিক্খাপদানীতিআদীসু সিক্খিতব্বানি পদানি সিক্খাপদানি, সিক্খাকোট্ঠাসাতি অত্থো। সিক্খায ৰা পদানি সিক্খাপদানি, অধিসীলঅধিচিত্তঅধিপঞ্ঞাসিক্খায অধিগমুপাযাতি অত্থো। অত্থতো পন কামাৰচরকুসলচিত্তসম্পযুত্তা ৰিরতিযো, তংসম্পযুত্তধম্মা পনেত্থ তগ্গহণেনেৰ গহেতব্বা। সরসেনেৰ পতনসভাৰস্স অন্তরা এৰ অতিপাতনং অতিপাতো, সণিকং পতিতুং অদত্ৰা সীঘং পাতনন্তি অত্থো। অতিক্কম্ম ৰা সত্থাদীহি অভিভৰিত্ৰা পাতনং অতিপাতো, পাণস্স অতিপাতো পাণাতিপাতো, পাণৰধো পাণঘাতোতি ৰুত্তং হোতি। পাণোতি চেত্থ ৰোহারতো সত্তো, পরমত্থতো জীৰিতিন্দ্রিযং। তস্মিং পন পাণে পাণসঞ্ঞিনো জীৰিতিন্দ্রিযুপচ্ছেদকউপক্কমসমুট্ঠাপিকা কাযৰচীদ্ৰারানং অঞ্ঞতরপ্পৰত্তা ৰধকচেতনা পাণাতিপাতো, ততো পাণাতিপাতা।
106.Anujānāmi, bhikkhave, sāmaṇerānaṃ dasa sikkhāpadānītiādīsu sikkhitabbāni padāni sikkhāpadāni, sikkhākoṭṭhāsāti attho. Sikkhāya vā padāni sikkhāpadāni, adhisīlaadhicittaadhipaññāsikkhāya adhigamupāyāti attho. Atthato pana kāmāvacarakusalacittasampayuttā viratiyo, taṃsampayuttadhammā panettha taggahaṇeneva gahetabbā. Saraseneva patanasabhāvassa antarā eva atipātanaṃ atipāto, saṇikaṃ patituṃ adatvā sīghaṃ pātananti attho. Atikkamma vā satthādīhi abhibhavitvā pātanaṃ atipāto, pāṇassa atipāto pāṇātipāto, pāṇavadho pāṇaghātoti vuttaṃ hoti. Pāṇoti cettha vohārato satto, paramatthato jīvitindriyaṃ. Tasmiṃ pana pāṇe pāṇasaññino jīvitindriyupacchedakaupakkamasamuṭṭhāpikā kāyavacīdvārānaṃ aññatarappavattā vadhakacetanā pāṇātipāto, tato pāṇātipātā.
ৰেরমণীতি ৰেরহেতুতায ৰেরসঞ্ঞিতং পাণাতিপাতাদিপাপধম্মং মণতি, ‘‘মযি ইধ ঠিতায কথমাগচ্ছসী’’তি ৰা তজ্জেন্তী ৰিয নীহরতীতি ৰেরমণী। ৰিরমতি এতাযাতি ৰা ৰিরমণীতি ৰত্তব্বে নিরুত্তিনযেন ‘‘ৰেরমণী’’তি ৰুত্তং। অত্থতো পন ৰেরমণীতি কামাৰচরকুসলচিত্তসম্পযুত্তা ৰিরতিযো। সা ‘‘পাণাতিপাতাদিং ৰিরমন্তস্স যা তস্মিং সমযে পাণাতিপাতা আরতি ৰিরতি পটিৰিরতি ৰেরমণী অকিরিযা অকরণং অনজ্ঝাপত্তি ৰেলানতিক্কমো সেতুঘাতো’’তি এৰমাদিনা নযেন ৰিভঙ্গে (ৰিভ॰ ৭০৪) ৰুত্তা। কামঞ্চেসা ৰেরমণী নাম লোকুত্তরাপি অত্থি, ইধ পন সমাদানৰসপ্পৰত্তা ৰিরতি অধিপ্পেতাতি লোকুত্তরায ৰিরতিযা সমাদানৰসেন পৰত্তিঅসম্ভৰতো কামাৰচরকুসলচিত্তসম্পযুত্তা ৰিরতিযো গহেতব্বা।
Veramaṇīti verahetutāya verasaññitaṃ pāṇātipātādipāpadhammaṃ maṇati, ‘‘mayi idha ṭhitāya kathamāgacchasī’’ti vā tajjentī viya nīharatīti veramaṇī. Viramati etāyāti vā viramaṇīti vattabbe niruttinayena ‘‘veramaṇī’’ti vuttaṃ. Atthato pana veramaṇīti kāmāvacarakusalacittasampayuttā viratiyo. Sā ‘‘pāṇātipātādiṃ viramantassa yā tasmiṃ samaye pāṇātipātā ārati virati paṭivirati veramaṇī akiriyā akaraṇaṃ anajjhāpatti velānatikkamo setughāto’’ti evamādinā nayena vibhaṅge (vibha. 704) vuttā. Kāmañcesā veramaṇī nāma lokuttarāpi atthi, idha pana samādānavasappavattā virati adhippetāti lokuttarāya viratiyā samādānavasena pavattiasambhavato kāmāvacarakusalacittasampayuttā viratiyo gahetabbā.
অদিন্নাদানা ৰেরমণীতিআদীসু অদিন্নস্স আদানং অদিন্নাদানং, পরস্সহরণং, থেয্যং চোরিকাতি ৰুত্তং হোতি। তত্থ অদিন্নন্তি পরপরিগ্গহিতং। যত্থ পরো যথাকামকারিতং আপজ্জন্তো অদণ্ডারহো অনুপৰজ্জো চ হোতি, তস্মিং পন পরপরিগ্গহিতে পরপরিগ্গহিতসঅঞনো তদাদাযকউপক্কমসমুট্ঠাপিকা থেয্যচেতনা অদিন্নাদানং।
Adinnādānā veramaṇītiādīsu adinnassa ādānaṃ adinnādānaṃ, parassaharaṇaṃ, theyyaṃ corikāti vuttaṃ hoti. Tattha adinnanti parapariggahitaṃ. Yattha paro yathākāmakāritaṃ āpajjanto adaṇḍāraho anupavajjo ca hoti, tasmiṃ pana parapariggahite parapariggahitasaañano tadādāyakaupakkamasamuṭṭhāpikā theyyacetanā adinnādānaṃ.
অব্রহ্মচরিযং নাম অসেট্ঠচরিযং দ্ৰযংদ্ৰযসমাপত্তি। সা হি ‘‘অপ্পস্সাদা কামা বহুদুক্খা বহুপাযাসা, আদীনৰো এত্থ ভিয্যো’’তিআদিনা (ম॰ নি॰ ১.১৭৭; ২.৪২) হীল়িতত্তা অসেট্ঠা অপ্পসত্থা চরিযাতি ৰা অসেট্ঠানং নিহীনানং ইত্থিপুরিসানং চরিযাতি ৰা অসেট্ঠচরিযং, অসেট্ঠচরিযত্তা অব্রহ্মচরিযন্তি চ ৰুচ্চতি , অত্থতো পন অসদ্ধম্মসেৰনাধিপ্পাযেন কাযদ্ৰারপ্পৰত্তা মগ্গেনমগ্গপ্পটিপত্তিসমুট্ঠাপিকা চেতনা অব্রহ্মচরিযং।
Abrahmacariyaṃ nāma aseṭṭhacariyaṃ dvayaṃdvayasamāpatti. Sā hi ‘‘appassādā kāmā bahudukkhā bahupāyāsā, ādīnavo ettha bhiyyo’’tiādinā (ma. ni. 1.177; 2.42) hīḷitattā aseṭṭhā appasatthā cariyāti vā aseṭṭhānaṃ nihīnānaṃ itthipurisānaṃ cariyāti vā aseṭṭhacariyaṃ, aseṭṭhacariyattā abrahmacariyanti ca vuccati , atthato pana asaddhammasevanādhippāyena kāyadvārappavattā maggenamaggappaṭipattisamuṭṭhāpikā cetanā abrahmacariyaṃ.
মুসাতি অভূতং অতচ্ছং ৰত্থু, ৰাদোতি তস্স ভূততো তচ্ছতো ৰিঞ্ঞাপনং। লক্খণতো পন অতথং ৰত্থুং তথতো পরং ৰিঞ্ঞাপেতুকামস্স তথাৰিঞ্ঞত্তিসমুট্ঠাপিকা চেতনা মুসাৰাদো মুসা ৰদীযতি ৰুচ্চতি এতাযাতি কত্ৰা।
Musāti abhūtaṃ atacchaṃ vatthu, vādoti tassa bhūtato tacchato viññāpanaṃ. Lakkhaṇato pana atathaṃ vatthuṃ tathato paraṃ viññāpetukāmassa tathāviññattisamuṭṭhāpikā cetanā musāvādo musā vadīyati vuccati etāyāti katvā.
সুরামেরযমজ্জপ্পমাদট্ঠানাতি এত্থ সুরাতি পূৰসুরা পিট্ঠসুরা ওদনসুরা কিণ্ণপক্খিত্তা সম্ভারসংযুত্তাতি পঞ্চ সুরা। মেরযন্তি পুপ্ফাসৰো ফলাসৰো মধ্ৰাসৰো গুল়াসৰো সম্ভারসংযুত্তোতি পঞ্চ আসৰা। তত্থ পূৰে ভাজনে পক্খিপিত্ৰা তজ্জং উদকং দত্ৰা মদ্দিত্ৰা কতা পূৰসুরা। এৰং সেসসুরাপি। কিণ্ণাতি পন তস্সা সুরায বীজং ৰুচ্চতি, যে সুরামোদকাতি ৰুচ্চন্তি, তে পক্খিপিত্ৰা কতা কিণ্ণপক্খিত্তা। হরীতকীসাসপাদিনানাসম্ভারেহি সংযোজিতা সম্ভারসংযুত্তা। মধুকতালনাল়িকেরাদিপুপ্ফরসো চিরপরিৰাসিতো পুপ্ফাসৰো। পনসাদিফলরসো ফলাসৰো। মুদ্দিকারসো মধ্ৰাসৰো। উচ্ছুরসো গুল়াসৰো। হরীতকআমলককটুকভণ্ডাদিনানাসম্ভারানং রসো চিরপরিৰাসিতো সম্ভারসংযুত্তো। তং সব্বম্পি মদকরণৰসেন মজ্জং পিৰন্তং মদযতীতি কত্ৰা। পমাদট্ঠানন্তি পমাদকারণং। যায চেতনায তং মজ্জং পিৰন্তি, তস্সা এতং অধিৰচনং। সুরামেরযমজ্জে পমাদট্ঠানং সুরামেরযমজ্জপ্পমাদট্ঠানং, তস্মা সুরামেরযমজ্জপ্পমাদট্ঠানা।
Surāmerayamajjappamādaṭṭhānāti ettha surāti pūvasurā piṭṭhasurā odanasurā kiṇṇapakkhittā sambhārasaṃyuttāti pañca surā. Merayanti pupphāsavo phalāsavo madhvāsavo guḷāsavo sambhārasaṃyuttoti pañca āsavā. Tattha pūve bhājane pakkhipitvā tajjaṃ udakaṃ datvā madditvā katā pūvasurā. Evaṃ sesasurāpi. Kiṇṇāti pana tassā surāya bījaṃ vuccati, ye surāmodakāti vuccanti, te pakkhipitvā katā kiṇṇapakkhittā. Harītakīsāsapādinānāsambhārehi saṃyojitā sambhārasaṃyuttā. Madhukatālanāḷikerādipuppharaso ciraparivāsito pupphāsavo. Panasādiphalaraso phalāsavo. Muddikāraso madhvāsavo. Ucchuraso guḷāsavo. Harītakaāmalakakaṭukabhaṇḍādinānāsambhārānaṃ raso ciraparivāsito sambhārasaṃyutto. Taṃ sabbampi madakaraṇavasena majjaṃ pivantaṃ madayatīti katvā. Pamādaṭṭhānanti pamādakāraṇaṃ. Yāya cetanāya taṃ majjaṃ pivanti, tassā etaṃ adhivacanaṃ. Surāmerayamajje pamādaṭṭhānaṃ surāmerayamajjappamādaṭṭhānaṃ, tasmā surāmerayamajjappamādaṭṭhānā.
ৰিকালভোজনাতি অরুণুগ্গমনতো পট্ঠায যাৰ মজ্ঝন্হিকা। অযং বুদ্ধাদীনং অরিযানং আচিণ্ণসমাচিণ্ণো ভোজনস্স কালো নাম, তদঞ্ঞো ৰিকালো। ভুঞ্জিতব্বট্ঠেন ভোজনং, যাগুভত্তাদি সব্বং যাৰকালিকৰত্থু। যথা চ ‘‘রত্তূপরতো’’তি (দী॰ ১.১০, ১৯৪; ম॰ নি॰ ১.২৯৩; ৩.১৪) এত্থ রত্তিযা ভোজনং রত্তীতি উত্তরপদলোপেন ৰুচ্চতি, এৰমেত্থ ভোজনজ্ঝোহরণং ভোজনন্তি। ৰিকালে ভোজনং ৰিকালভোজনং, ততো ৰিকালভোজনা, ৰিকালে যাৰকালিকৰত্থুস্স অজ্ঝোহরণাতি অত্থো। অথ ৰা ন এত্থ কম্মসাধনো ভুঞ্জিতব্বত্থৰাচকো ভোজনসদ্দো, অথ খো ভাৰসাধনো অজ্ঝোহরণত্থৰাচকো গহেতব্বো , তস্মা ৰিকালে ভোজনং অজ্ঝোহরণং ৰিকালভোজনং। কস্স পন অজ্ঝোহরণন্তি? যামকালিকাদীনং অনুঞ্ঞাতত্তা ৰিকালভোজন-সদ্দস্স ৰা যাৰকালিকজ্ঝোহরণে নিরুল়্হত্তা যাৰকালিকস্সাতি ৰিঞ্ঞাযতি, অত্থতো পন কাযদ্ৰারপ্পৰত্তা ৰিকালে যাৰকালিকজ্ঝোহরণচেতনা ‘‘ৰিকালভোজন’’ন্তি ৰেদিতব্বা।
Vikālabhojanāti aruṇuggamanato paṭṭhāya yāva majjhanhikā. Ayaṃ buddhādīnaṃ ariyānaṃ āciṇṇasamāciṇṇo bhojanassa kālo nāma, tadañño vikālo. Bhuñjitabbaṭṭhena bhojanaṃ, yāgubhattādi sabbaṃ yāvakālikavatthu. Yathā ca ‘‘rattūparato’’ti (dī. 1.10, 194; ma. ni. 1.293; 3.14) ettha rattiyā bhojanaṃ rattīti uttarapadalopena vuccati, evamettha bhojanajjhoharaṇaṃ bhojananti. Vikāle bhojanaṃ vikālabhojanaṃ, tato vikālabhojanā, vikāle yāvakālikavatthussa ajjhoharaṇāti attho. Atha vā na ettha kammasādhano bhuñjitabbatthavācako bhojanasaddo, atha kho bhāvasādhano ajjhoharaṇatthavācako gahetabbo , tasmā vikāle bhojanaṃ ajjhoharaṇaṃ vikālabhojanaṃ. Kassa pana ajjhoharaṇanti? Yāmakālikādīnaṃ anuññātattā vikālabhojana-saddassa vā yāvakālikajjhoharaṇe niruḷhattā yāvakālikassāti viññāyati, atthato pana kāyadvārappavattā vikāle yāvakālikajjhoharaṇacetanā ‘‘vikālabhojana’’nti veditabbā.
নচ্চগীতৰাদিতৰিসূকদস্সনাতি এত্থ সাসনস্স অননুলোমত্তা ৰিসূকং পটাণীভূতং দস্সনন্তি ৰিসূকদস্সনং। নচ্চাদীনঞ্হি দস্সনং সছন্দরাগপ্পৰত্তিতো সঙ্খেপতো ‘‘সব্বপাপস্স অকরণ’’ন্তিআদিনযপ্পৰত্তং (দী॰ নি॰ ২.৯০; ধ॰ প॰ ১৮৩) ভগৰতো সাসনং ন অনুলোমেতি। নচ্চঞ্চ গীতঞ্চ ৰাদিতঞ্চ ৰিসূকদস্সনঞ্চ নচ্চগীতৰাদিতৰিসূকদস্সনং। অত্তনা পযোজিযমানং পরেহি পযোজাপিযমানঞ্চেত্থ নচ্চং নচ্চভাৰসামঞ্ঞতো পাল়িযং একেনেৰ নচ্চ-সদ্দেন গহিতং, তথা গীতৰাদিত-সদ্দেহি গাযনগাযাপনৰাদনৰাদাপনানি, তস্মা অত্তনা নচ্চননচ্চাপনাদিৰসেন নচ্চা চ গীতা চ ৰাদিতা চ অন্তমসো মযূরনচ্চাদিৰসেনপি পৰত্তানং নচ্চাদীনং ৰিসূকভূতা দস্সনা চ ৰেরমণীতি এৰমেত্থ অত্থো দট্ঠব্বো। নচ্চাদীনি অত্তনা পযোজেতুং ৰা পরেহি পযোজাপেতুং ৰা পযুত্তানি পস্সিতুং ৰা নেৰ ভিক্খূনং ন ভিক্খুনীনং ৰট্টতি। দস্সনেন চেত্থ সৰনম্পি সঙ্গহিতং ৰিরূপেকসেসনযেন। যথা সকং ৰিসযআলোচনসভাৰতায ৰা পঞ্চন্নং ৰিঞ্ঞাণানং সৰনকিরিযাযপি দস্সনসঙ্খেপসম্ভৰতো ‘‘দস্সনা’’ ইচ্চেৰ ৰুত্তং। তেনেৰ ৰুত্তং ‘‘পঞ্চহি ৰিঞ্ঞাণেহি ন কঞ্চি ধম্মং পটিৰিজানাতি অঞ্ঞত্র অভিনিপাতমত্তা’’তি। দস্সনকম্যতায উপসঙ্কমিত্ৰা পস্সতো এৰ চেত্থ ৰীতিক্কমো হোতি, ঠিতনিসিন্নসযনোকাসে পন আগতং গচ্ছন্তস্স ৰা আপাথগতং পস্সতো সিযা সংকিলেসো, ন ৰীতিক্কমো।
Naccagītavāditavisūkadassanāti ettha sāsanassa ananulomattā visūkaṃ paṭāṇībhūtaṃ dassananti visūkadassanaṃ. Naccādīnañhi dassanaṃ sachandarāgappavattito saṅkhepato ‘‘sabbapāpassa akaraṇa’’ntiādinayappavattaṃ (dī. ni. 2.90; dha. pa. 183) bhagavato sāsanaṃ na anulometi. Naccañca gītañca vāditañca visūkadassanañca naccagītavāditavisūkadassanaṃ. Attanā payojiyamānaṃ parehi payojāpiyamānañcettha naccaṃ naccabhāvasāmaññato pāḷiyaṃ ekeneva nacca-saddena gahitaṃ, tathā gītavādita-saddehi gāyanagāyāpanavādanavādāpanāni, tasmā attanā naccananaccāpanādivasena naccā ca gītā ca vāditā ca antamaso mayūranaccādivasenapi pavattānaṃ naccādīnaṃ visūkabhūtā dassanā ca veramaṇīti evamettha attho daṭṭhabbo. Naccādīni attanā payojetuṃ vā parehi payojāpetuṃ vā payuttāni passituṃ vā neva bhikkhūnaṃ na bhikkhunīnaṃ vaṭṭati. Dassanena cettha savanampi saṅgahitaṃ virūpekasesanayena. Yathā sakaṃ visayaālocanasabhāvatāya vā pañcannaṃ viññāṇānaṃ savanakiriyāyapi dassanasaṅkhepasambhavato ‘‘dassanā’’ icceva vuttaṃ. Teneva vuttaṃ ‘‘pañcahi viññāṇehi na kañci dhammaṃ paṭivijānāti aññatra abhinipātamattā’’ti. Dassanakamyatāya upasaṅkamitvā passato eva cettha vītikkamo hoti, ṭhitanisinnasayanokāse pana āgataṃ gacchantassa vā āpāthagataṃ passato siyā saṃkileso, na vītikkamo.
মালাগন্ধৰিলেপনধারণমণ্ডনৰিভূসনট্ঠানাতি এত্থ মালাতি যং কিঞ্চি পুপ্ফং। কিঞ্চাপি হি মালা-সদ্দো লোকে বদ্ধমালৰাচকো, সাসনে পন রুল়্হিযা পুপ্ফেসুপি ৰুত্তো, তস্মা যং কিঞ্চি পুপ্ফং বদ্ধমবদ্ধং ৰা, তং সব্বং ‘‘মালা’’তি দট্ঠব্বং। গন্ধন্তি ৰাসচুণ্ণধূমাদিকং ৰিলেপনতো অঞ্ঞং যং কিঞ্চি গন্ধজাতং। ৰিলেপনন্তি ৰিলেপনত্থং পিসিত্ৰা পটিযত্তং যং কিঞ্চি ছৰিরাগকরণং। পিল়ন্ধনং ধারণং, ঊনট্ঠানপূরণং মণ্ডনং, গন্ধৰসেন ছৰিরাগৰসেন চ সাদিযনং ৰিভূসনং। তেনেৰ দীঘনিকাযট্ঠকথাযং (দী॰ নি॰ অট্ঠ॰ ১.১০) মজ্ঝিমনিকাযট্ঠকথাযঞ্চ (ম॰ নি॰ অট্ঠ॰ ১.২৯৩) ‘‘পিল়ন্ধন্তো ধারেতি নাম, ঊনট্ঠানং পূরেন্তো মণ্ডেতি নাম, গন্ধৰসেন ছৰিরাগৰসেন চ সাদিযন্তো ৰিভূসেতি নামা’’তি ৰুত্তং। পরমত্থজোতিকাযং পন খুদ্দকট্ঠকথাযং (খু॰ পা॰ অট্ঠ॰ ২.পচ্ছিমপঞ্চসিক্খাপদৰণ্ণনা) ‘‘মালাদীসু ধারণাদীনি যথাসঙ্খ্যং যোজেতব্বানী’’তি এত্তকমেৰ ৰুত্তং। ঠানং ৰুচ্চতি কারণং, তস্মা যায দুস্সীল্যচেতনায তানি মালাধারণাদীনি মহাজনো করোতি, সা ধারণমণ্ডনৰিভূসনট্ঠানং।
Mālāgandhavilepanadhāraṇamaṇḍanavibhūsanaṭṭhānāti ettha mālāti yaṃ kiñci pupphaṃ. Kiñcāpi hi mālā-saddo loke baddhamālavācako, sāsane pana ruḷhiyā pupphesupi vutto, tasmā yaṃ kiñci pupphaṃ baddhamabaddhaṃ vā, taṃ sabbaṃ ‘‘mālā’’ti daṭṭhabbaṃ. Gandhanti vāsacuṇṇadhūmādikaṃ vilepanato aññaṃ yaṃ kiñci gandhajātaṃ. Vilepananti vilepanatthaṃ pisitvā paṭiyattaṃ yaṃ kiñci chavirāgakaraṇaṃ. Piḷandhanaṃ dhāraṇaṃ, ūnaṭṭhānapūraṇaṃ maṇḍanaṃ, gandhavasena chavirāgavasena ca sādiyanaṃ vibhūsanaṃ. Teneva dīghanikāyaṭṭhakathāyaṃ (dī. ni. aṭṭha. 1.10) majjhimanikāyaṭṭhakathāyañca (ma. ni. aṭṭha. 1.293) ‘‘piḷandhanto dhāreti nāma, ūnaṭṭhānaṃ pūrento maṇḍeti nāma, gandhavasena chavirāgavasena ca sādiyanto vibhūseti nāmā’’ti vuttaṃ. Paramatthajotikāyaṃ pana khuddakaṭṭhakathāyaṃ (khu. pā. aṭṭha. 2.pacchimapañcasikkhāpadavaṇṇanā) ‘‘mālādīsu dhāraṇādīni yathāsaṅkhyaṃ yojetabbānī’’ti ettakameva vuttaṃ. Ṭhānaṃ vuccati kāraṇaṃ, tasmā yāya dussīlyacetanāya tāni mālādhāraṇādīni mahājano karoti, sā dhāraṇamaṇḍanavibhūsanaṭṭhānaṃ.
উচ্চাসযনমহাসযনাতি এত্থ উচ্চাতি উচ্চ-সদ্দেন সমানত্থং একং সদ্দন্তরং। সেতি এত্থাতি সযনং, উচ্চাসযনঞ্চ মহাসযনঞ্চ উচ্চাসযনমহাসযনং। উচ্চাসযনং ৰুচ্চতি পমাণাতিক্কন্তং মঞ্চাদি। মহাসযনং অকপ্পিযত্থরণেহি অত্থতং আসন্দাদি। আসনঞ্চেত্থ সযনেনেৰ সঙ্গহিতন্তি দট্ঠব্বং। যস্মা পন আধারে পটিক্খিত্তে তদাধারা কিরিযা পটিক্খিত্তাৰ হোতি, তস্মা ‘‘উচ্চাসযনমহাসযনা’’ ইচ্চেৰ ৰুত্তং, অত্থতো পন তদুপভোগভূতনিসজ্জানিপজ্জনেহি ৰিরতি দস্সিতাতি দট্ঠব্বা। অথ ৰা উচ্চাসযনমহাসযনসযনাতি এতস্মিং অত্থে একসেসনযেন অযং নিদ্দেসো কতো যথা ‘‘নামরূপপচ্চযা সল়াযতন’’ন্তি, আসনকিরিযাপুব্বকত্তা সযনকিরিযায সযনগ্গহণেনেৰ আসনম্পি গহিতন্তি ৰেদিতব্বং।
Uccāsayanamahāsayanāti ettha uccāti ucca-saddena samānatthaṃ ekaṃ saddantaraṃ. Seti etthāti sayanaṃ, uccāsayanañca mahāsayanañca uccāsayanamahāsayanaṃ. Uccāsayanaṃ vuccati pamāṇātikkantaṃ mañcādi. Mahāsayanaṃ akappiyattharaṇehi atthataṃ āsandādi. Āsanañcettha sayaneneva saṅgahitanti daṭṭhabbaṃ. Yasmā pana ādhāre paṭikkhitte tadādhārā kiriyā paṭikkhittāva hoti, tasmā ‘‘uccāsayanamahāsayanā’’ icceva vuttaṃ, atthato pana tadupabhogabhūtanisajjānipajjanehi virati dassitāti daṭṭhabbā. Atha vā uccāsayanamahāsayanasayanāti etasmiṃ atthe ekasesanayena ayaṃ niddeso kato yathā ‘‘nāmarūpapaccayā saḷāyatana’’nti, āsanakiriyāpubbakattā sayanakiriyāya sayanaggahaṇeneva āsanampi gahitanti veditabbaṃ.
জাতরূপরজতপটিগ্গহণাতি এত্থ জাতরূপন্তি সুৰণ্ণং। রজতন্তি কহাপণো লোহমাসকো জতুমাসকো দারুমাসকোতি যে ৰোহারং গচ্ছন্তি, তস্স উভযস্সপি পটিগ্গহণং জাতরূপরজতপটিগ্গহণং। তিৰিধঞ্চেত্থ পটিগ্গহণং কাযেন ৰাচায মনসাতি। তত্থ কাযেন পটিগ্গহণং উগ্গণ্হনং, ৰাচায পটিগ্গহণং উগ্গহাপনং, মনসা পটিগ্গহণং সাদিযনং। তিৰিধম্পি পটিগ্গহণং সামঞ্ঞনিদ্দেসেন একসেসনযেন ৰা গহেত্ৰা ‘‘পটিগ্গহণা’’তি ৰুত্তং, তস্মা নেৰ উগ্গহেতুং ন উগ্গহাপেতুং ন উপনিক্খিত্তং ৰা সাদিতুং ৰট্টতি। ইমানি পন দস সিক্খাপদানি গহট্ঠানম্পি সাধারণানি। ৰুত্তঞ্হেতং ৰিসুদ্ধিমগ্গে (ৰিসুদ্ধি॰ ১৩) ‘‘উপাসকউপাসিকানং নিচ্চসীলৰসেন পঞ্চ সিক্খাপদানি, সতি ৰা উস্সাহে দস, উপোসথঙ্গৰসেন অট্ঠাতি ইদং গহট্ঠসীল’’ন্তি। এত্থ হি দসাতি সামণেরেহি রক্খিতব্বসীলমাহ ঘটিকারাদীনং ৰিয। পরমত্থজোতিকাযং পন খুদ্দকট্ঠকথাযং (খু॰ পা॰ অট্ঠ॰ ২.সাধারণৰিসেসৰৰত্থান) ‘‘আদিতো দ্ৰে চতুত্থপঞ্চমানি উপাসকানং সামণেরানঞ্চ সাধারণানি নিচ্চসীলৰসেন, উপোসথসীলৰসেন পন উপাসকানং সত্তমট্ঠমং চেকং অঙ্গং কত্ৰা সব্বপচ্ছিমৰজ্জানি সব্বানিপি সামণেরেহি সাধারণানি, পচ্ছিমং পন সামণেরানমেৰ ৰিসেসভূত’’ন্তি ৰুত্তং, তং ‘‘সতি ৰা উস্সাহে দসা’’তি ইমিনা ন সমেতি। নাসনৰত্থূতি লিঙ্গনাসনায ৰত্থু, অধিট্ঠানং কারণন্তি ৰুত্তং হোতি।
Jātarūparajatapaṭiggahaṇāti ettha jātarūpanti suvaṇṇaṃ. Rajatanti kahāpaṇo lohamāsako jatumāsako dārumāsakoti ye vohāraṃ gacchanti, tassa ubhayassapi paṭiggahaṇaṃ jātarūparajatapaṭiggahaṇaṃ. Tividhañcettha paṭiggahaṇaṃ kāyena vācāya manasāti. Tattha kāyena paṭiggahaṇaṃ uggaṇhanaṃ, vācāya paṭiggahaṇaṃ uggahāpanaṃ, manasā paṭiggahaṇaṃ sādiyanaṃ. Tividhampi paṭiggahaṇaṃ sāmaññaniddesena ekasesanayena vā gahetvā ‘‘paṭiggahaṇā’’ti vuttaṃ, tasmā neva uggahetuṃ na uggahāpetuṃ na upanikkhittaṃ vā sādituṃ vaṭṭati. Imāni pana dasa sikkhāpadāni gahaṭṭhānampi sādhāraṇāni. Vuttañhetaṃ visuddhimagge (visuddhi. 13) ‘‘upāsakaupāsikānaṃ niccasīlavasena pañca sikkhāpadāni, sati vā ussāhe dasa, uposathaṅgavasena aṭṭhāti idaṃ gahaṭṭhasīla’’nti. Ettha hi dasāti sāmaṇerehi rakkhitabbasīlamāha ghaṭikārādīnaṃ viya. Paramatthajotikāyaṃ pana khuddakaṭṭhakathāyaṃ (khu. pā. aṭṭha. 2.sādhāraṇavisesavavatthāna) ‘‘ādito dve catutthapañcamāni upāsakānaṃ sāmaṇerānañca sādhāraṇāni niccasīlavasena, uposathasīlavasena pana upāsakānaṃ sattamaṭṭhamaṃ cekaṃ aṅgaṃ katvā sabbapacchimavajjāni sabbānipi sāmaṇerehi sādhāraṇāni, pacchimaṃ pana sāmaṇerānameva visesabhūta’’nti vuttaṃ, taṃ ‘‘sati vā ussāhe dasā’’ti iminā na sameti. Nāsanavatthūti liṅganāsanāya vatthu, adhiṭṭhānaṃ kāraṇanti vuttaṃ hoti.
১০৭. কিন্তীতি কেন নু খো উপাযেন। ‘‘অত্তনো পরিৰেণন্তি ইদং পুগ্গলিকং সন্ধায ৰুত্ত’’ন্তি গণ্ঠিপদেসু ৰুত্তং। অযমেত্থ গণ্ঠিপদকারানং অধিপ্পাযো – ‘‘ৰস্সগ্গেন পত্তসেনাসন’’ন্তি ইমিনা তস্স ৰস্সগ্গেন পত্তং সঙ্ঘিকসেনাসনং ৰুত্তং, ‘‘অত্তনো পরিৰেণ’’ন্তি ইমিনাপি তস্সেৰ পুগ্গলিকসেনাসনং ৰুত্তন্তি। অযং পনেত্থ অম্হাকং খন্তি – ‘‘যত্থ ৰা ৰসতী’’তি ইমিনা সঙ্ঘিকং ৰা হোতু পুগ্গলিকং ৰা, তস্স নিবদ্ধৰসনকসেনাসনং ৰুত্তং। ‘‘যত্থ ৰা পটিক্কমতী’’তি ইমিনা পন যং আচরিযস্স উপজ্ঝাযস্স ৰা ৰসনট্ঠানং উপট্ঠানাদিনিমিত্তং নিবদ্ধং পৰিসতি, তং আচরিযুপজ্ঝাযানং ৰসনট্ঠানং ৰুত্তং। তস্মা তদুভযং দস্সেতুং ‘‘উভযেনপি অত্তনো পরিৰেণঞ্চ ৰস্সগ্গেন পত্তসেনাসনঞ্চ ৰুত্ত’’ন্তি আহ। তত্থ অত্তনো পরিৰেণন্তি ইমিনা আচরিযুপজ্ঝাযানং ৰসনট্ঠানং দস্সিতং, ৰস্সগ্গেন পত্তসেনাসনন্তি ইমিনা পন তস্স ৰসনট্ঠানং। তদুভযম্পি সঙ্ঘিকং ৰা হোতু পুগ্গলিকং ৰা, আৰরণং কাতব্বমেৰাতি। মুখদ্ৰারিকন্তি মুখদ্ৰারেন ভুঞ্জিতব্বং। দণ্ডকম্মং কত্ৰাতি দণ্ডকম্মং যোজেত্ৰা। দণ্ডেন্তি ৰিনেন্তি এতেনাতি দণ্ডো, সোযেৰ কাতব্বত্তা কম্মন্তি দণ্ডকম্মং, আৰরণাদি।
107.Kintīti kena nu kho upāyena. ‘‘Attano pariveṇanti idaṃ puggalikaṃ sandhāya vutta’’nti gaṇṭhipadesu vuttaṃ. Ayamettha gaṇṭhipadakārānaṃ adhippāyo – ‘‘vassaggena pattasenāsana’’nti iminā tassa vassaggena pattaṃ saṅghikasenāsanaṃ vuttaṃ, ‘‘attano pariveṇa’’nti imināpi tasseva puggalikasenāsanaṃ vuttanti. Ayaṃ panettha amhākaṃ khanti – ‘‘yattha vā vasatī’’ti iminā saṅghikaṃ vā hotu puggalikaṃ vā, tassa nibaddhavasanakasenāsanaṃ vuttaṃ. ‘‘Yattha vā paṭikkamatī’’ti iminā pana yaṃ ācariyassa upajjhāyassa vā vasanaṭṭhānaṃ upaṭṭhānādinimittaṃ nibaddhaṃ pavisati, taṃ ācariyupajjhāyānaṃ vasanaṭṭhānaṃ vuttaṃ. Tasmā tadubhayaṃ dassetuṃ ‘‘ubhayenapi attano pariveṇañca vassaggena pattasenāsanañca vutta’’nti āha. Tattha attano pariveṇanti iminā ācariyupajjhāyānaṃ vasanaṭṭhānaṃ dassitaṃ, vassaggena pattasenāsananti iminā pana tassa vasanaṭṭhānaṃ. Tadubhayampi saṅghikaṃ vā hotu puggalikaṃ vā, āvaraṇaṃ kātabbamevāti. Mukhadvārikanti mukhadvārena bhuñjitabbaṃ. Daṇḍakammaṃ katvāti daṇḍakammaṃ yojetvā. Daṇḍenti vinenti etenāti daṇḍo, soyeva kātabbattā kammanti daṇḍakammaṃ, āvaraṇādi.
সিক্খাপদদণ্ডকম্মৰত্থুকথাৰণ্ণনা নিট্ঠিতা।
Sikkhāpadadaṇḍakammavatthukathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
৪২. সিক্খাপদকথা • 42. Sikkhāpadakathā
৪৩. দণ্ডকম্মৰত্থু • 43. Daṇḍakammavatthu
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / সিক্খাপদদণ্ডকম্মৰত্থুকথা • Sikkhāpadadaṇḍakammavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / সিক্খাপদদণ্ডকম্মৰত্থুকথাৰণ্ণনা • Sikkhāpadadaṇḍakammavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / সিক্খাপদদণ্ডকম্মৰত্থুকথাৰণ্ণনা • Sikkhāpadadaṇḍakammavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৪২. সিক্খাপদদণ্ডকম্মৰত্থুকথা • 42. Sikkhāpadadaṇḍakammavatthukathā
