| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
সিক্খাপদদণ্ডকম্মৰত্থুকথাৰণ্ণনা
Sikkhāpadadaṇḍakammavatthukathāvaṇṇanā
১০৬. সামণেরসিক্খাপদাদীসু পাল়িযং সিক্খাপদানীতি সিক্খাকোট্ঠাসা। অধিসীলসিক্খানং ৰা অধিগমূপাযা। পাণোতি পরমত্থতো জীৰিতিন্দ্রিযং। তস্স অতিপাতনং পবন্ধৰসেন পৰত্তিতুং অদত্ৰা সত্থাদীহি অতিক্কম্ম অভিভৰিত্ৰা পাতনং পাণাতিপাতো। পাণৰধোতি অত্থো। সো পন অত্থতো পাণে পাণসঞ্ঞিনো জীৰিতিন্দ্রিযুপচ্ছেদকউপক্কমসমুট্ঠাপিকা ৰধকচেতনাৰ। তস্মা পাণাতিপাতা ৰেরমণি, ৰেরহেতুতায ৰেরসঙ্খাতং পাণাতিপাতাদিপাপধম্মং মণতি নীহরতীতি ৰিরতি ‘‘ৰেরমণী’’তি ৰুচ্চতি, ৰিরমতি এতাযাতি ৰা ‘‘ৰিরমণী’’তি ৰত্তব্বে নিরুত্তিনযেন ‘‘ৰেরমণী’’তি সমাদানৰিরতি ৰুত্তা। এস নযো সেসেসুপি।
106. Sāmaṇerasikkhāpadādīsu pāḷiyaṃ sikkhāpadānīti sikkhākoṭṭhāsā. Adhisīlasikkhānaṃ vā adhigamūpāyā. Pāṇoti paramatthato jīvitindriyaṃ. Tassa atipātanaṃ pabandhavasena pavattituṃ adatvā satthādīhi atikkamma abhibhavitvā pātanaṃ pāṇātipāto. Pāṇavadhoti attho. So pana atthato pāṇe pāṇasaññino jīvitindriyupacchedakaupakkamasamuṭṭhāpikā vadhakacetanāva. Tasmā pāṇātipātā veramaṇi, verahetutāya verasaṅkhātaṃ pāṇātipātādipāpadhammaṃ maṇati nīharatīti virati ‘‘veramaṇī’’ti vuccati, viramati etāyāti vā ‘‘viramaṇī’’ti vattabbe niruttinayena ‘‘veramaṇī’’ti samādānavirati vuttā. Esa nayo sesesupi.
অদিন্নস্স আদানং অদিন্নাদানং, থেয্যচেতনাৰ। অব্রহ্মচরিযন্তি অসেট্ঠচরিযং, মগ্গেন মগ্গপটিপত্তিসমুট্ঠাপিকা মেথুনচেতনা। মুসাতি অভূতৰত্থু, তস্স ৰাদো অভূততং ঞত্ৰাৰ ভূততো ৰিঞ্ঞাপনচেতনা মুসাৰাদো। পিট্ঠপূৰাদিনিব্বত্তসুরা চেৰ পুপ্ফাসৰাদিভেদং মেরযঞ্চ সুরামেরযং। তদেৰ মদনীযট্ঠেন মজ্জঞ্চেৰ পমাদকারণট্ঠেন পমাদট্ঠানঞ্চ, তং যায চেতনায পিৰতি, তস্স এতং অধিৰচনং।
Adinnassa ādānaṃ adinnādānaṃ, theyyacetanāva. Abrahmacariyanti aseṭṭhacariyaṃ, maggena maggapaṭipattisamuṭṭhāpikā methunacetanā. Musāti abhūtavatthu, tassa vādo abhūtataṃ ñatvāva bhūtato viññāpanacetanā musāvādo. Piṭṭhapūvādinibbattasurā ceva pupphāsavādibhedaṃ merayañca surāmerayaṃ. Tadeva madanīyaṭṭhena majjañceva pamādakāraṇaṭṭhena pamādaṭṭhānañca, taṃ yāya cetanāya pivati, tassa etaṃ adhivacanaṃ.
অরুণুগ্গমনতো পট্ঠায যাৰ মজ্ঝন্হিকা অযং অরিযানং ভোজনস্স কালো নাম, তদঞ্ঞো ৰিকালো। ভুঞ্জিতব্বট্ঠেন ভোজনন্তি ইধ সব্বং যাৰকালিকং ৰুচ্চতি, তস্স অজ্ঝোহরণং ইধ উত্তরপদলোপেন ‘‘ভোজন’’ন্তি অধিপ্পেতং। ৰিকালে ভোজনং অজ্ঝোহরণং ৰিকালভোজনং, ৰিকালে ৰা যাৰকালিকস্স ভোজনং অজ্ঝোহরণং ৰিকালভোজনন্তিপি অত্থো গহেতব্বো, অত্থতো ৰিকালে যাৰকালিকঅজ্ঝোহরণচেতনাৰ।
Aruṇuggamanato paṭṭhāya yāva majjhanhikā ayaṃ ariyānaṃ bhojanassa kālo nāma, tadañño vikālo. Bhuñjitabbaṭṭhena bhojananti idha sabbaṃ yāvakālikaṃ vuccati, tassa ajjhoharaṇaṃ idha uttarapadalopena ‘‘bhojana’’nti adhippetaṃ. Vikāle bhojanaṃ ajjhoharaṇaṃ vikālabhojanaṃ, vikāle vā yāvakālikassa bhojanaṃ ajjhoharaṇaṃ vikālabhojanantipi attho gahetabbo, atthato vikāle yāvakālikaajjhoharaṇacetanāva.
সাসনস্স অননুলোমত্তা ৰিসূকং পটাণীভূতং দস্সনং ৰিসূকদস্সনং, নচ্চগীতাদিদস্সনসৰনানঞ্চেৰ ৰট্টকযুদ্ধজূতকীল়াদিসব্বকীল়ানঞ্চ নামং। দস্সনন্তি চেত্থ পঞ্চন্নম্পি ৰিঞ্ঞাণানং যথাসকং ৰিসযস্স আলোচনসভাৰতায দস্সন-সদ্দেন সঙ্গহেতব্বত্তা সৰনম্পি সঙ্গহিতং। নচ্চগীতৰাদিত-সদ্দেহি চেত্থ অত্তনো নচ্চনগাযনাদীনিপি সঙ্গহিতানীতি দট্ঠব্বং।
Sāsanassa ananulomattā visūkaṃ paṭāṇībhūtaṃ dassanaṃ visūkadassanaṃ, naccagītādidassanasavanānañceva vaṭṭakayuddhajūtakīḷādisabbakīḷānañca nāmaṃ. Dassananti cettha pañcannampi viññāṇānaṃ yathāsakaṃ visayassa ālocanasabhāvatāya dassana-saddena saṅgahetabbattā savanampi saṅgahitaṃ. Naccagītavādita-saddehi cettha attano naccanagāyanādīnipi saṅgahitānīti daṭṭhabbaṃ.
মালাতি বদ্ধমবদ্ধং ৰা অন্তমসো সুত্তাদিমযম্পি অলঙ্কারত্থায পিল়ন্ধিযমানং ‘‘মালা’’ত্ৰেৰ ৰুচ্চতি। গন্ধন্তি ৰাসচুণ্ণাদিৰিলেপনতো অঞ্ঞং যং কিঞ্চি গন্ধজাতং। ৰিলেপনন্তি পিসিত্ৰা গহিতং ছৰিরাগকরণঞ্চেৰ গন্ধজাতঞ্চ। ধারণং নাম পিল়ন্ধনং। মণ্ডনং নাম ঊনট্ঠানপূরণং। গন্ধৰসেন, ছৰিরাগৰসেন চ সাদিযনং ৰিভূসনং নাম। মালাদীসু ৰা ধারণাদীনি যথাক্কমং যোজেতব্বানি। তেসং ধারণাদীনং ঠানং কারণং ৰীতিক্কমচেতনা।
Mālāti baddhamabaddhaṃ vā antamaso suttādimayampi alaṅkāratthāya piḷandhiyamānaṃ ‘‘mālā’’tveva vuccati. Gandhanti vāsacuṇṇādivilepanato aññaṃ yaṃ kiñci gandhajātaṃ. Vilepananti pisitvā gahitaṃ chavirāgakaraṇañceva gandhajātañca. Dhāraṇaṃ nāma piḷandhanaṃ. Maṇḍanaṃ nāma ūnaṭṭhānapūraṇaṃ. Gandhavasena, chavirāgavasena ca sādiyanaṃ vibhūsanaṃ nāma. Mālādīsu vā dhāraṇādīni yathākkamaṃ yojetabbāni. Tesaṃ dhāraṇādīnaṃ ṭhānaṃ kāraṇaṃ vītikkamacetanā.
উচ্চাতি উচ্চ-সদ্দেন সমানত্থো নিপাতো, উচ্চাসযনং ৰুচ্চতি পমাণাতিক্কন্তং আসন্দাদি। মহাসযনং অকপ্পিযত্থরণেহি অত্থতং, সলোহিতৰিতানঞ্চ। এতেসু হি আসনং, সযনঞ্চ উচ্চাসযনমহাসযন-সদ্দেহি গহিতানি উত্তরপদলোপেন। জাতরূপরজতপটিগ্গহণাতি এত্থ রজত-সদ্দেন দারুমাসকাদি সব্বং রূপিযং সঙ্গহিতং, মুত্তামণিআদযোপেত্থ ধঞ্ঞখেত্তৰত্থাদযো চ সঙ্গহিতাতি দট্ঠব্বা। পটিগ্গহণ-সদ্দেন পটিগ্গাহাপনসাদিযনানি সঙ্গহিতানি। নাসনৰত্থূতি পারাজিকট্ঠানতায লিঙ্গনাসনায কারণং।
Uccāti ucca-saddena samānattho nipāto, uccāsayanaṃ vuccati pamāṇātikkantaṃ āsandādi. Mahāsayanaṃ akappiyattharaṇehi atthataṃ, salohitavitānañca. Etesu hi āsanaṃ, sayanañca uccāsayanamahāsayana-saddehi gahitāni uttarapadalopena. Jātarūparajatapaṭiggahaṇāti ettha rajata-saddena dārumāsakādi sabbaṃ rūpiyaṃ saṅgahitaṃ, muttāmaṇiādayopettha dhaññakhettavatthādayo ca saṅgahitāti daṭṭhabbā. Paṭiggahaṇa-saddena paṭiggāhāpanasādiyanāni saṅgahitāni. Nāsanavatthūti pārājikaṭṭhānatāya liṅganāsanāya kāraṇaṃ.
১০৭. পাল়িযং সব্বং সঙ্ঘারামং আৰরণং করোন্তীতি সব্বসঙ্ঘারামে পৰেসনিৰারণং করোন্তি। সঙ্ঘারামো আৰরণং কাতব্বোতি সঙ্ঘারামো আৰরণো কাতব্বো, সঙ্ঘারামে ৰা আৰরণং কাতব্বন্তি অত্থো। তেনেৰ ‘‘তত্থ আৰরণং কাতু’’ন্তি ভুম্মৰসেন ৰুত্তং। আহারং আৰরণন্তিআদীসুপি এসেৰ নযো। ‘‘যত্থ ৰা ৰসতী’’তি ইমিনা সামণেরস্স ৰস্সগ্গেন লদ্ধং ৰা সকসন্তকমেৰ ৰা নিবদ্ধৰসনকসেনাসনং ৰুত্তং। যত্থ ৰা পটিক্কমতীতি আচরিযুপজ্ঝাযানং ৰসনট্ঠানং ৰুত্তং। তেনাহ ‘‘অত্তনো’’তিআদি। অত্তনোতি হি সযং, আচরিযস্স, উপজ্ঝাযস্স ৰাতি অত্থো। দণ্ডেন্তি ৰিনেন্তি এতেনাতি দণ্ডো, সো এৰ কত্তব্বত্তা কম্মন্তি দণ্ডকম্মং, আৰরণাদি। উদকং ৰা পৰেসেতুন্তি পোক্খরণীআদিউদকে পৰেসেতুং।
107. Pāḷiyaṃ sabbaṃ saṅghārāmaṃ āvaraṇaṃ karontīti sabbasaṅghārāme pavesanivāraṇaṃ karonti. Saṅghārāmo āvaraṇaṃ kātabboti saṅghārāmo āvaraṇo kātabbo, saṅghārāme vā āvaraṇaṃ kātabbanti attho. Teneva ‘‘tattha āvaraṇaṃ kātu’’nti bhummavasena vuttaṃ. Āhāraṃ āvaraṇantiādīsupi eseva nayo. ‘‘Yattha vā vasatī’’ti iminā sāmaṇerassa vassaggena laddhaṃ vā sakasantakameva vā nibaddhavasanakasenāsanaṃ vuttaṃ. Yattha vā paṭikkamatīti ācariyupajjhāyānaṃ vasanaṭṭhānaṃ vuttaṃ. Tenāha ‘‘attano’’tiādi. Attanoti hi sayaṃ, ācariyassa, upajjhāyassa vāti attho. Daṇḍenti vinenti etenāti daṇḍo, so eva kattabbattā kammanti daṇḍakammaṃ, āvaraṇādi. Udakaṃ vā pavesetunti pokkharaṇīādiudake pavesetuṃ.
সিক্খাপদদণ্ডকম্মৰত্থুকথাৰণ্ণনা নিট্ঠিতা।
Sikkhāpadadaṇḍakammavatthukathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
৪২. সিক্খাপদকথা • 42. Sikkhāpadakathā
৪৩. দণ্ডকম্মৰত্থু • 43. Daṇḍakammavatthu
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / সিক্খাপদদণ্ডকম্মৰত্থুকথা • Sikkhāpadadaṇḍakammavatthukathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / সিক্খাপদদণ্ডকম্মৰত্থুকথাৰণ্ণনা • Sikkhāpadadaṇḍakammavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / সিক্খাপদদণ্ডকম্মৰত্থুকথাৰণ্ণনা • Sikkhāpadadaṇḍakammavatthukathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৪২. সিক্খাপদদণ্ডকম্মৰত্থুকথা • 42. Sikkhāpadadaṇḍakammavatthukathā
