| Library / Tipiṭaka / திபிடக • Tipiṭaka / விப⁴ங்க³-மூலடீகா • Vibhaṅga-mūlaṭīkā |
14. ஸிக்கா²பத³விப⁴ங்கோ³
14. Sikkhāpadavibhaṅgo
1. அபி⁴த⁴ம்மபா⁴ஜனீயவண்ணனா
1. Abhidhammabhājanīyavaṇṇanā
703. பதிட்டா²னட்டே²னாதி ஸம்பயோக³வஸேன உபனிஸ்ஸயவஸேன ச ஓகாஸபா⁴வேன. பிட்ட²பூவஓத³னகிண்ணனானாஸம்பா⁴ரே பக்கி²பித்வா மத்³தி³த்வா கதா ஸுரா நாம. மது⁴காதி³புப்ப²பனஸாதி³ப²லஉச்சு²முத்³தி³காதி³னானாஸம்பா⁴ரானங் ரஸா சிரபரிவாஸிதா மேரயங் நாம, ஆஸவோதி அத்தோ².
703. Patiṭṭhānaṭṭhenāti sampayogavasena upanissayavasena ca okāsabhāvena. Piṭṭhapūvaodanakiṇṇanānāsambhāre pakkhipitvā madditvā katā surā nāma. Madhukādipupphapanasādiphalaucchumuddikādinānāsambhārānaṃ rasā ciraparivāsitā merayaṃ nāma, āsavoti attho.
704. தங்ஸம்பயுத்தத்தாதி விரதிஸம்பயுத்தத்தா, விரதிசேதனாஸம்பயுத்தத்தா வா.
704. Taṃsampayuttattāti viratisampayuttattā, viraticetanāsampayuttattā vā.
கம்மபதா² ஏவாதி அஸப்³ப³ஸாதா⁴ரணேஸு ஜா²னாதி³கொட்டா²ஸேஸு கம்மபத²கொட்டா²ஸிகா ஏவாதி அத்தோ². ஸுராபானம்பி ‘‘ஸுராபானங், பி⁴க்க²வே, ஆஸேவிதங்…பே॰… நிரயஸங்வத்தனிக’’ந்தி (அ॰ நி॰ 8.40) விஸுங் கம்மபத²பா⁴வேன ஆக³தந்தி வத³ந்தி. ஏவங் ஸதி ஏகாத³ஸ கம்மபதா² ஸியுங், தஸ்மாஸ்ஸ யதா²வுத்தெஸ்வேவ கம்மபதே²ஸு உபகாரகத்தஸபா⁴க³த்தவஸேன அனுபவேஸோ த³ட்ட²ப்³போ³.
Kammapathā evāti asabbasādhāraṇesu jhānādikoṭṭhāsesu kammapathakoṭṭhāsikā evāti attho. Surāpānampi ‘‘surāpānaṃ, bhikkhave, āsevitaṃ…pe… nirayasaṃvattanika’’nti (a. ni. 8.40) visuṃ kammapathabhāvena āgatanti vadanti. Evaṃ sati ekādasa kammapathā siyuṃ, tasmāssa yathāvuttesveva kammapathesu upakārakattasabhāgattavasena anupaveso daṭṭhabbo.
ஸத்தஇத்தி²புரிஸாரம்மணதா ததா²க³ஹிதஸங்கா²ராரம்மணதாய த³ட்ட²ப்³பா³. ‘‘பஞ்ச ஸிக்கா²பதா³ பரித்தாரம்மணா’’தி ஹி வுத்தங். ‘‘ஸப்³பா³பி ஹி ஏதா வீதிக்கமிதப்³ப³வத்து²ங் ஆரம்மணங் கத்வா வேரசேதனாஹி ஏவ விரமந்தீ’’தி (விப⁴॰ அட்ட²॰ 704) ச வக்க²தீதி.
Sattaitthipurisārammaṇatā tathāgahitasaṅkhārārammaṇatāya daṭṭhabbā. ‘‘Pañca sikkhāpadā parittārammaṇā’’ti hi vuttaṃ. ‘‘Sabbāpi hi etā vītikkamitabbavatthuṃ ārammaṇaṃ katvā veracetanāhi eva viramantī’’ti (vibha. aṭṭha. 704) ca vakkhatīti.
கோ³ரூபஸீலகோ பகதிப⁴த்³தோ³. காகணிகமத்தஸ்ஸ அத்தா²யாதிஆதி³ லோப⁴வஸேன முஸாகத²னே வுத்தங். தோ³ஸவஸேன முஸாகத²னே ச நிட்ட²ப்பத்தோ ஸங்க⁴பே⁴தோ³ க³ஹிதோ. தோ³ஸவஸேன பரஸ்ஸ ப்³யஸனத்தா²ய முஸாகத²னே பன தஸ்ஸ தஸ்ஸ கு³ணவஸேன அப்பஸாவஜ்ஜமஹாஸாவஜ்ஜதா யோஜேதப்³பா³, மந்தா³தி⁴மத்தப்³யஸனிச்சா²வஸேன ச. நிஸ்ஸக்³கி³யதா²வரவிஜ்ஜாமயித்³தி⁴மயா ஸாஹத்தி²காணத்திகெஸ்வேவ பவிஸந்தீதி த்³வே ஏவ க³ஹிதா.
Gorūpasīlako pakatibhaddo. Kākaṇikamattassa atthāyātiādi lobhavasena musākathane vuttaṃ. Dosavasena musākathane ca niṭṭhappatto saṅghabhedo gahito. Dosavasena parassa byasanatthāya musākathane pana tassa tassa guṇavasena appasāvajjamahāsāvajjatā yojetabbā, mandādhimattabyasanicchāvasena ca. Nissaggiyathāvaravijjāmayiddhimayā sāhatthikāṇattikesveva pavisantīti dve eva gahitā.
பஞ்சபி கம்மபதா² ஏவாதி சேதனாஸங்கா²தங் பரியாயஸீலங் ஸந்தா⁴ய வுத்தங், விரதிஸீலங் பன மக்³க³கொட்டா²ஸிகந்தி. தேஸங் பனாதி ஸேஸஸீலானங்.
Pañcapi kammapathā evāti cetanāsaṅkhātaṃ pariyāyasīlaṃ sandhāya vuttaṃ, viratisīlaṃ pana maggakoṭṭhāsikanti. Tesaṃ panāti sesasīlānaṃ.
712. ‘‘கொட்டா²ஸபா⁴வேனா’’தி வுத்தங், ‘‘பதிட்டா²னபா⁴வேனா’’தி பன வத்தப்³ப³ங். எத்த² பன ஸிக்கா²பத³வாரே பஹீனபஞ்சாப⁴ப்³ப³ட்டா²னஸ்ஸ அரஹதோ விரமிதப்³ப³வேரஸ்ஸ ஸப்³ப³தா² அபா⁴வா கிரியேஸு விரதியோ ந ஸந்தீதி ந உத்³த⁴டா, ஸெக்கா²னங் பன பஹீனபஞ்சவேரத்தேபி தங்ஸபா⁴க³தாய வேரபூ⁴தானங் அகுஸலானங் வேரனிதா³னானங் லோபா⁴தீ³னஞ்ச ஸப்³பா⁴வா விரதீனங் உப்பத்தி ந ந ப⁴விஸ்ஸதி. அகுஸலஸமுட்டி²தானி ச காயகம்மாதீ³னி தேஸங் காயது³ச்சரிதாதீ³னி வேரானேவ, தேஹி ச தேஸங் விரதியோ ஹொந்தேவ, யதோ நப²லபூ⁴தஸ்ஸபி உபரிமக்³க³த்தயஸ்ஸ அட்ட²ங்கி³கதா ஹோதி. ஸிக்கா²வாரே ச அபா⁴வேதப்³ப³தாய ப²லத⁴ம்மாபி ந ஸிக்கி²தப்³பா³, நாபி ஸிக்கி²தஸிக்க²ஸ்ஸ உப்பஜ்ஜமானா கிரியத⁴ம்மாதி ந கேசி அப்³யாகதா ஸிக்கா²தி உத்³த⁴டா.
712. ‘‘Koṭṭhāsabhāvenā’’ti vuttaṃ, ‘‘patiṭṭhānabhāvenā’’ti pana vattabbaṃ. Ettha pana sikkhāpadavāre pahīnapañcābhabbaṭṭhānassa arahato viramitabbaverassa sabbathā abhāvā kiriyesu viratiyo na santīti na uddhaṭā, sekkhānaṃ pana pahīnapañcaverattepi taṃsabhāgatāya verabhūtānaṃ akusalānaṃ veranidānānaṃ lobhādīnañca sabbhāvā viratīnaṃ uppatti na na bhavissati. Akusalasamuṭṭhitāni ca kāyakammādīni tesaṃ kāyaduccaritādīni verāneva, tehi ca tesaṃ viratiyo honteva, yato naphalabhūtassapi uparimaggattayassa aṭṭhaṅgikatā hoti. Sikkhāvāre ca abhāvetabbatāya phaladhammāpi na sikkhitabbā, nāpi sikkhitasikkhassa uppajjamānā kiriyadhammāti na keci abyākatā sikkhāti uddhaṭā.
அபி⁴த⁴ம்மபா⁴ஜனீயவண்ணனா நிட்டி²தா.
Abhidhammabhājanīyavaṇṇanā niṭṭhitā.
2. பஞ்ஹபுச்ச²கவண்ணனா
2. Pañhapucchakavaṇṇanā
714. ஸம்பத்தவிரதிவஸேனாதி ஸம்பத்தே பச்சுப்பன்னே ஆரம்மணே யதா²விரமிதப்³ப³தோ விரதிவஸேனாதி அத்தோ².
714. Sampattavirativasenāti sampatte paccuppanne ārammaṇe yathāviramitabbato virativasenāti attho.
பஞ்ஹபுச்ச²கவண்ணனா நிட்டி²தா.
Pañhapucchakavaṇṇanā niṭṭhitā.
ஸிக்கா²பத³விப⁴ங்க³வண்ணனா நிட்டி²தா.
Sikkhāpadavibhaṅgavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / விப⁴ங்க³பாளி • Vibhaṅgapāḷi / 14. ஸிக்கா²பத³விப⁴ங்கோ³ • 14. Sikkhāpadavibhaṅgo
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / ஸம்மோஹவினோத³னீ-அட்ட²கதா² • Sammohavinodanī-aṭṭhakathā
1. அபி⁴த⁴ம்மபா⁴ஜனீயவண்ணனா • 1. Abhidhammabhājanīyavaṇṇanā
3. பஞ்ஹாபுச்ச²கவண்ணனா • 3. Pañhāpucchakavaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / விப⁴ங்க³-அனுடீகா • Vibhaṅga-anuṭīkā / 14. ஸிக்கா²பத³விப⁴ங்கோ³ • 14. Sikkhāpadavibhaṅgo
