| Library / Tipiṭaka / তিপিটক • Tipiṭaka / ৰিভঙ্গ-মূলটীকা • Vibhaṅga-mūlaṭīkā |
১৪. সিক্খাপদৰিভঙ্গো
14. Sikkhāpadavibhaṅgo
১. অভিধম্মভাজনীযৰণ্ণনা
1. Abhidhammabhājanīyavaṇṇanā
৭০৩. পতিট্ঠানট্ঠেনাতি সম্পযোগৰসেন উপনিস্সযৰসেন চ ওকাসভাৰেন। পিট্ঠপূৰওদনকিণ্ণনানাসম্ভারে পক্খিপিত্ৰা মদ্দিত্ৰা কতা সুরা নাম। মধুকাদিপুপ্ফপনসাদিফলউচ্ছুমুদ্দিকাদিনানাসম্ভারানং রসা চিরপরিৰাসিতা মেরযং নাম, আসৰোতি অত্থো।
703. Patiṭṭhānaṭṭhenāti sampayogavasena upanissayavasena ca okāsabhāvena. Piṭṭhapūvaodanakiṇṇanānāsambhāre pakkhipitvā madditvā katā surā nāma. Madhukādipupphapanasādiphalaucchumuddikādinānāsambhārānaṃ rasā ciraparivāsitā merayaṃ nāma, āsavoti attho.
৭০৪. তংসম্পযুত্তত্তাতি ৰিরতিসম্পযুত্তত্তা, ৰিরতিচেতনাসম্পযুত্তত্তা ৰা।
704. Taṃsampayuttattāti viratisampayuttattā, viraticetanāsampayuttattā vā.
কম্মপথা এৰাতি অসব্বসাধারণেসু ঝানাদিকোট্ঠাসেসু কম্মপথকোট্ঠাসিকা এৰাতি অত্থো। সুরাপানম্পি ‘‘সুরাপানং, ভিক্খৰে, আসেৰিতং…পে॰… নিরযসংৰত্তনিক’’ন্তি (অ॰ নি॰ ৮.৪০) ৰিসুং কম্মপথভাৰেন আগতন্তি ৰদন্তি। এৰং সতি একাদস কম্মপথা সিযুং, তস্মাস্স যথাৰুত্তেস্ৰেৰ কম্মপথেসু উপকারকত্তসভাগত্তৰসেন অনুপৰেসো দট্ঠব্বো।
Kammapathā evāti asabbasādhāraṇesu jhānādikoṭṭhāsesu kammapathakoṭṭhāsikā evāti attho. Surāpānampi ‘‘surāpānaṃ, bhikkhave, āsevitaṃ…pe… nirayasaṃvattanika’’nti (a. ni. 8.40) visuṃ kammapathabhāvena āgatanti vadanti. Evaṃ sati ekādasa kammapathā siyuṃ, tasmāssa yathāvuttesveva kammapathesu upakārakattasabhāgattavasena anupaveso daṭṭhabbo.
সত্তইত্থিপুরিসারম্মণতা তথাগহিতসঙ্খারারম্মণতায দট্ঠব্বা। ‘‘পঞ্চ সিক্খাপদা পরিত্তারম্মণা’’তি হি ৰুত্তং। ‘‘সব্বাপি হি এতা ৰীতিক্কমিতব্বৰত্থুং আরম্মণং কত্ৰা ৰেরচেতনাহি এৰ ৰিরমন্তী’’তি (ৰিভ॰ অট্ঠ॰ ৭০৪) চ ৰক্খতীতি।
Sattaitthipurisārammaṇatā tathāgahitasaṅkhārārammaṇatāya daṭṭhabbā. ‘‘Pañca sikkhāpadā parittārammaṇā’’ti hi vuttaṃ. ‘‘Sabbāpi hi etā vītikkamitabbavatthuṃ ārammaṇaṃ katvā veracetanāhi eva viramantī’’ti (vibha. aṭṭha. 704) ca vakkhatīti.
গোরূপসীলকো পকতিভদ্দো। কাকণিকমত্তস্স অত্থাযাতিআদি লোভৰসেন মুসাকথনে ৰুত্তং। দোসৰসেন মুসাকথনে চ নিট্ঠপ্পত্তো সঙ্ঘভেদো গহিতো। দোসৰসেন পরস্স ব্যসনত্থায মুসাকথনে পন তস্স তস্স গুণৰসেন অপ্পসাৰজ্জমহাসাৰজ্জতা যোজেতব্বা, মন্দাধিমত্তব্যসনিচ্ছাৰসেন চ। নিস্সগ্গিযথাৰরৰিজ্জামযিদ্ধিমযা সাহত্থিকাণত্তিকেস্ৰেৰ পৰিসন্তীতি দ্ৰে এৰ গহিতা।
Gorūpasīlako pakatibhaddo. Kākaṇikamattassa atthāyātiādi lobhavasena musākathane vuttaṃ. Dosavasena musākathane ca niṭṭhappatto saṅghabhedo gahito. Dosavasena parassa byasanatthāya musākathane pana tassa tassa guṇavasena appasāvajjamahāsāvajjatā yojetabbā, mandādhimattabyasanicchāvasena ca. Nissaggiyathāvaravijjāmayiddhimayā sāhatthikāṇattikesveva pavisantīti dve eva gahitā.
পঞ্চপি কম্মপথা এৰাতি চেতনাসঙ্খাতং পরিযাযসীলং সন্ধায ৰুত্তং, ৰিরতিসীলং পন মগ্গকোট্ঠাসিকন্তি। তেসং পনাতি সেসসীলানং।
Pañcapi kammapathā evāti cetanāsaṅkhātaṃ pariyāyasīlaṃ sandhāya vuttaṃ, viratisīlaṃ pana maggakoṭṭhāsikanti. Tesaṃ panāti sesasīlānaṃ.
৭১২. ‘‘কোট্ঠাসভাৰেনা’’তি ৰুত্তং, ‘‘পতিট্ঠানভাৰেনা’’তি পন ৰত্তব্বং। এত্থ পন সিক্খাপদৰারে পহীনপঞ্চাভব্বট্ঠানস্স অরহতো ৰিরমিতব্বৰেরস্স সব্বথা অভাৰা কিরিযেসু ৰিরতিযো ন সন্তীতি ন উদ্ধটা, সেক্খানং পন পহীনপঞ্চৰেরত্তেপি তংসভাগতায ৰেরভূতানং অকুসলানং ৰেরনিদানানং লোভাদীনঞ্চ সব্ভাৰা ৰিরতীনং উপ্পত্তি ন ন ভৰিস্সতি। অকুসলসমুট্ঠিতানি চ কাযকম্মাদীনি তেসং কাযদুচ্চরিতাদীনি ৰেরানেৰ, তেহি চ তেসং ৰিরতিযো হোন্তেৰ, যতো নফলভূতস্সপি উপরিমগ্গত্তযস্স অট্ঠঙ্গিকতা হোতি। সিক্খাৰারে চ অভাৰেতব্বতায ফলধম্মাপি ন সিক্খিতব্বা, নাপি সিক্খিতসিক্খস্স উপ্পজ্জমানা কিরিযধম্মাতি ন কেচি অব্যাকতা সিক্খাতি উদ্ধটা।
712. ‘‘Koṭṭhāsabhāvenā’’ti vuttaṃ, ‘‘patiṭṭhānabhāvenā’’ti pana vattabbaṃ. Ettha pana sikkhāpadavāre pahīnapañcābhabbaṭṭhānassa arahato viramitabbaverassa sabbathā abhāvā kiriyesu viratiyo na santīti na uddhaṭā, sekkhānaṃ pana pahīnapañcaverattepi taṃsabhāgatāya verabhūtānaṃ akusalānaṃ veranidānānaṃ lobhādīnañca sabbhāvā viratīnaṃ uppatti na na bhavissati. Akusalasamuṭṭhitāni ca kāyakammādīni tesaṃ kāyaduccaritādīni verāneva, tehi ca tesaṃ viratiyo honteva, yato naphalabhūtassapi uparimaggattayassa aṭṭhaṅgikatā hoti. Sikkhāvāre ca abhāvetabbatāya phaladhammāpi na sikkhitabbā, nāpi sikkhitasikkhassa uppajjamānā kiriyadhammāti na keci abyākatā sikkhāti uddhaṭā.
অভিধম্মভাজনীযৰণ্ণনা নিট্ঠিতা।
Abhidhammabhājanīyavaṇṇanā niṭṭhitā.
২. পঞ্হপুচ্ছকৰণ্ণনা
2. Pañhapucchakavaṇṇanā
৭১৪. সম্পত্তৰিরতিৰসেনাতি সম্পত্তে পচ্চুপ্পন্নে আরম্মণে যথাৰিরমিতব্বতো ৰিরতিৰসেনাতি অত্থো।
714. Sampattavirativasenāti sampatte paccuppanne ārammaṇe yathāviramitabbato virativasenāti attho.
পঞ্হপুচ্ছকৰণ্ণনা নিট্ঠিতা।
Pañhapucchakavaṇṇanā niṭṭhitā.
সিক্খাপদৰিভঙ্গৰণ্ণনা নিট্ঠিতা।
Sikkhāpadavibhaṅgavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ৰিভঙ্গপাল়ি • Vibhaṅgapāḷi / ১৪. সিক্খাপদৰিভঙ্গো • 14. Sikkhāpadavibhaṅgo
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / সম্মোহৰিনোদনী-অট্ঠকথা • Sammohavinodanī-aṭṭhakathā
১. অভিধম্মভাজনীযৰণ্ণনা • 1. Abhidhammabhājanīyavaṇṇanā
৩. পঞ্হাপুচ্ছকৰণ্ণনা • 3. Pañhāpucchakavaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-অনুটীকা • Vibhaṅga-anuṭīkā / ১৪. সিক্খাপদৰিভঙ্গো • 14. Sikkhāpadavibhaṅgo
