| Library / Tipiṭaka / তিপিটক • Tipiṭaka / ৰিভঙ্গ-অনুটীকা • Vibhaṅga-anuṭīkā |
১৪. সিক্খাপদৰিভঙ্গো
14. Sikkhāpadavibhaṅgo
১. অভিধম্মভাজনীযৰণ্ণনা
1. Abhidhammabhājanīyavaṇṇanā
৭০৩. সিক্খাসঙ্খাতানং কুসলধম্মানং পঞ্চ সীলঙ্গানি নিস্সযভাৰেন ৰা পতিট্ঠা সিযুং, উপনিস্সযভাৰেন ৰাতি তদুভযং দস্সেন্তো আহ ‘‘সম্পযোগৰসেন, উপনিস্সযৰসেন চ ওকাসভাৰেনা’’তি।
703. Sikkhāsaṅkhātānaṃ kusaladhammānaṃ pañca sīlaṅgāni nissayabhāvena vā patiṭṭhā siyuṃ, upanissayabhāvena vāti tadubhayaṃ dassento āha ‘‘sampayogavasena, upanissayavasena ca okāsabhāvenā’’ti.
৭০৪. ‘‘কম্মপথা এৰা’’তি নিযমস্স কতত্তা ৰুত্তং ‘‘অসব্বসাধারণেসূ’’তি। ন হি সক্কা ইন্দ্রিযাদিসাধারণকোট্ঠাসৰসেন নিযমং কাতুং। কম্মপথকোট্ঠাসিকা এৰ, ন ঝানাদিকোট্ঠাসিকা। কম্মপথভাৰেন আগতন্তি ৰদন্তি, দুগ্গতিযা, তত্থ উপ্পজ্জনদুক্খস্স চ পৰত্তিউপাযভাৰতোতি অধিপ্পাযো। অস্স সুরাপানস্স। উপকারকত্তং সব্বেসং। সভাগত্তং মিচ্ছাচারস্স।
704. ‘‘Kammapathā evā’’ti niyamassa katattā vuttaṃ ‘‘asabbasādhāraṇesū’’ti. Na hi sakkā indriyādisādhāraṇakoṭṭhāsavasena niyamaṃ kātuṃ. Kammapathakoṭṭhāsikā eva, na jhānādikoṭṭhāsikā. Kammapathabhāvena āgatanti vadanti, duggatiyā, tattha uppajjanadukkhassa ca pavattiupāyabhāvatoti adhippāyo. Assa surāpānassa. Upakārakattaṃ sabbesaṃ. Sabhāgattaṃ micchācārassa.
তথাগহিতসঙ্খারারম্মণতাযাতি ‘‘সত্তং অৰহরামি, সত্তে ৰিপ্পটিপজ্জামী’’তিআদিনা সত্তাকারেন গহিতসঙ্খারারম্মণতায, ন পন সত্তপঞ্ঞত্তিআরম্মণতাযাতি অধিপ্পাযো। ‘‘পঞ্চ সিক্খাপদা’’তিআদিনা তমেৰত্থং ৰিৰরতি।
Tathāgahitasaṅkhārārammaṇatāyāti ‘‘sattaṃ avaharāmi, satte vippaṭipajjāmī’’tiādinā sattākārena gahitasaṅkhārārammaṇatāya, na pana sattapaññattiārammaṇatāyāti adhippāyo. ‘‘Pañca sikkhāpadā’’tiādinā tamevatthaṃ vivarati.
তস্স তস্সাতি যস্স যস্স ব্যসনত্থায। সযং ৰা উসুআদিং খিপতি, ওপাতখণনাদিং করোতি, তাদিসং মন্তং পরিজপ্পতি, কম্মজইদ্ধিং ৰল়ঞ্জেতি, অঞ্ঞেন ৰা তং সব্বং কারেতীতি আহ ‘‘নিস্সগ্গিয…পে॰… দ্ৰে এৰ গহিতা’’তি।
Tassa tassāti yassa yassa byasanatthāya. Sayaṃ vā usuādiṃ khipati, opātakhaṇanādiṃ karoti, tādisaṃ mantaṃ parijappati, kammajaiddhiṃ vaḷañjeti, aññena vā taṃ sabbaṃ kāretīti āha ‘‘nissaggiya…pe… dve eva gahitā’’ti.
যদিপি কোট্ঠাসৰারে ৰিরতি সরূপেন নাগতা ‘‘যেৰাপনা’’ত্ৰেৰ ৰুত্তা, ভজাপিযমানা পন মগ্গভাৰংযেৰ ভজতীতি আহ ‘‘ৰিরতিসীলং পন মগ্গকোট্ঠাসিক’’ন্তি। সেসসীলানন্তি সেসঅৰীতিক্কন্তসীলানং।
Yadipi koṭṭhāsavāre virati sarūpena nāgatā ‘‘yevāpanā’’tveva vuttā, bhajāpiyamānā pana maggabhāvaṃyeva bhajatīti āha ‘‘viratisīlaṃ pana maggakoṭṭhāsika’’nti. Sesasīlānanti sesaavītikkantasīlānaṃ.
৭১২. অভব্বট্ঠানাতি পাণাতিপাতাদযো। যথা পাণাতিপাতাদযো ৰেরহেতুতায ৰেরং, এৰং তদঞ্ঞেপি অকুসলাতি ৰুত্তং ‘‘তংসভাগতায ৰেরভূতান’’ন্তি। ৰিরতীনং উপ্পত্তি ন ন ভৰিস্সতি সেক্খানন্তি যোজনা। ‘‘অকুসলসমুট্ঠিতানি চা’’তিআদিনাপি সেক্খানং উভযেন ৰিরতিসব্ভাৰংযেৰ ৰিভাৰেতি। তস্সত্থো – যানি অকুসলসমুট্ঠিতানি কাযকম্মাদীনি, তানি তেসং সেক্খানং কাযদুচ্চরিতাদীনীতি ৰেরানিযেৰ , তেহি ৰেরেহি তেসং সেক্খানং ৰিরতিযো সম্ভৰন্তিযেৰ। যতোতি যস্মা পাণাতিপাতাদিৰিরমিতব্বনিপ্পরিযাযৰেরাভাৰেপি কাযদুচ্চরিতাদিৰেরমত্ততো সেক্খানং ৰিরতিসম্ভৰতো। নফলভূতস্সাপীতি যথা ফলস্স মগ্গপটিবিম্বভূতত্তা মগ্গসদিসং সত্তঅট্ঠঙ্গিকতা সিযা, এৰং অফলভূতস্সাপি সকদাগামিমগ্গাদিকস্স যতো ৰিরতিসম্ভৰতো অট্ঠঙ্গিকতা হোতি, অঞ্ঞথা পঞ্চঙ্গিকো এৰ সিযাতি অধিপ্পাযো।
712. Abhabbaṭṭhānāti pāṇātipātādayo. Yathā pāṇātipātādayo verahetutāya veraṃ, evaṃ tadaññepi akusalāti vuttaṃ ‘‘taṃsabhāgatāya verabhūtāna’’nti. Viratīnaṃ uppatti na na bhavissati sekkhānanti yojanā. ‘‘Akusalasamuṭṭhitāni cā’’tiādināpi sekkhānaṃ ubhayena viratisabbhāvaṃyeva vibhāveti. Tassattho – yāni akusalasamuṭṭhitāni kāyakammādīni, tāni tesaṃ sekkhānaṃ kāyaduccaritādīnīti verāniyeva , tehi verehi tesaṃ sekkhānaṃ viratiyo sambhavantiyeva. Yatoti yasmā pāṇātipātādiviramitabbanippariyāyaverābhāvepi kāyaduccaritādiveramattato sekkhānaṃ viratisambhavato. Naphalabhūtassāpīti yathā phalassa maggapaṭibimbabhūtattā maggasadisaṃ sattaaṭṭhaṅgikatā siyā, evaṃ aphalabhūtassāpi sakadāgāmimaggādikassa yato viratisambhavato aṭṭhaṅgikatā hoti, aññathā pañcaṅgiko eva siyāti adhippāyo.
অভিধম্মভাজনীযৰণ্ণনা নিট্ঠিতা।
Abhidhammabhājanīyavaṇṇanā niṭṭhitā.
২. পঞ্হপুচ্ছকৰণ্ণনা
2. Pañhapucchakavaṇṇanā
৭১৪. যথাৰিরমিতব্বতোতি যো যো পাণাতিপাতাদি ৰিরমিতব্বো, ততো ৰিরতিৰসেন।
714. Yathāviramitabbatoti yo yo pāṇātipātādi viramitabbo, tato virativasena.
পঞ্হপুচ্ছকৰণ্ণনা নিট্ঠিতা।
Pañhapucchakavaṇṇanā niṭṭhitā.
সিক্খাপদৰিভঙ্গৰণ্ণনা নিট্ঠিতা।
Sikkhāpadavibhaṅgavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / ৰিভঙ্গপাল়ি • Vibhaṅgapāḷi / ১৪. সিক্খাপদৰিভঙ্গো • 14. Sikkhāpadavibhaṅgo
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / সম্মোহৰিনোদনী-অট্ঠকথা • Sammohavinodanī-aṭṭhakathā
১. অভিধম্মভাজনীযৰণ্ণনা • 1. Abhidhammabhājanīyavaṇṇanā
৩. পঞ্হাপুচ্ছকৰণ্ণনা • 3. Pañhāpucchakavaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-মূলটীকা • Vibhaṅga-mūlaṭīkā / ১৪. সিক্খাপদৰিভঙ্গো • 14. Sikkhāpadavibhaṅgo
