| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
সিক্খাসাজীৰপদভাজনীযৰণ্ণনা
Sikkhāsājīvapadabhājanīyavaṇṇanā
সিক্খিতব্বাতি আসেৰিতব্বা। উত্তমন্তি ৰিসিট্ঠং। অধিসীলাদীসু ৰিজ্জমানেসু সীলাদীহিপি ভৰিতব্বং। যথা হি ওমকতরপ্পমাণং ছত্তং ৰা ধজং ৰা উপাদায অতিরেকপ্পমাণং ‘‘অতিছত্তং অতিধজো’’তি ৰুচ্চতি, এৰমিহাপি ‘‘অনুক্কট্ঠসীলং উপাদায অধিসীলেন ভৰিতব্বং, তথা অনুক্কট্ঠং চিত্তং পঞ্ঞঞ্চ উপাদায অধিচিত্তেন অধিপঞ্ঞায চ ভৰিতব্ব’’ন্তি মনসি কত্ৰা সীলাদিং সরূপতো ৰিভাৰেতুকামো ‘‘কতমং পনেত্থ সীল’’ন্তিআদিমাহ। অট্ঠঙ্গসীলং দসঙ্গসীলেস্ৰেৰ অন্তোগধত্তা ৰিসুং অগ্গহেত্ৰা ‘‘পঞ্চঙ্গদসঙ্গসীল’’ন্তি এত্তকমেৰ ৰুত্তং। পাতিমোক্খসংৰরসীলন্তি চারিত্তৰারিত্তৰসেন দুৰিধং ৰিনযপিটকপরিযাপন্নং সিক্খাপদসীলং। তঞ্হি যো নং পাতি রক্খতি, তং মোক্খেতি মোচেতি আপাযিকাদীহি দুক্খেহীতি পাতিমোক্খন্তি ৰুচ্চতি। সংৰরণং সংৰরো , কাযৰাচাহি অৰীতিক্কমো। পাতিমোক্খমেৰ সংৰরো পাতিমোক্খসংৰরো। সো এৰ সীলনট্ঠেন সীলন্তি পাতিমোক্খসংৰরসীলং।
Sikkhitabbāti āsevitabbā. Uttamanti visiṭṭhaṃ. Adhisīlādīsu vijjamānesu sīlādīhipi bhavitabbaṃ. Yathā hi omakatarappamāṇaṃ chattaṃ vā dhajaṃ vā upādāya atirekappamāṇaṃ ‘‘atichattaṃ atidhajo’’ti vuccati, evamihāpi ‘‘anukkaṭṭhasīlaṃ upādāya adhisīlena bhavitabbaṃ, tathā anukkaṭṭhaṃ cittaṃ paññañca upādāya adhicittena adhipaññāya ca bhavitabba’’nti manasi katvā sīlādiṃ sarūpato vibhāvetukāmo ‘‘katamaṃ panettha sīla’’ntiādimāha. Aṭṭhaṅgasīlaṃ dasaṅgasīlesveva antogadhattā visuṃ aggahetvā ‘‘pañcaṅgadasaṅgasīla’’nti ettakameva vuttaṃ. Pātimokkhasaṃvarasīlanti cārittavārittavasena duvidhaṃ vinayapiṭakapariyāpannaṃ sikkhāpadasīlaṃ. Tañhi yo naṃ pāti rakkhati, taṃ mokkheti moceti āpāyikādīhi dukkhehīti pātimokkhanti vuccati. Saṃvaraṇaṃ saṃvaro , kāyavācāhi avītikkamo. Pātimokkhameva saṃvaro pātimokkhasaṃvaro. So eva sīlanaṭṭhena sīlanti pātimokkhasaṃvarasīlaṃ.
অপরো নযো (উদা॰ অট্ঠ॰ ৩১; ইতিৰু॰ অট্ঠ॰ ৯৭) – কিলেসানং বলৰভাৰতো পাপকিরিযায সুকরভাৰতো পুঞ্ঞকিরিযায চ দুক্করভাৰতো বহুক্খত্তুং অপাযেসু পতনসীলোতি পাতী, পুথুজ্জনো। অনিচ্চতায ৰা ভৰাভৰাদীসু কম্মৰেগক্খিত্তো ঘটিযন্তং ৰিয অনৰট্ঠানেন পরিব্ভমনতো গমনসীলোতি পাতী, মরণৰসেন ৰা তম্হি তম্হি সত্তনিকাযে অত্তভাৰস্স পতনসীলোতি পাতী, সত্তসন্তানো, চিত্তমেৰ ৰা। তং পাতিনং সংসারদুক্খতো মোক্খেতীতি পাতিমোক্খং। চিত্তস্স হি ৰিমোক্খেন সত্তো ৰিমুত্তোতি ৰুচ্চতি। ৰুত্তঞ্হি ‘‘চিত্তৰোদানা ৰিসুজ্ঝন্তী’’তি (সং॰ নি॰ ৩.১০০), ‘‘অনুপাদায আসৰেহি চিত্তং ৰিমুত্ত’’ন্তি (মহাৰ॰ ২৮) চ।
Aparo nayo (udā. aṭṭha. 31; itivu. aṭṭha. 97) – kilesānaṃ balavabhāvato pāpakiriyāya sukarabhāvato puññakiriyāya ca dukkarabhāvato bahukkhattuṃ apāyesu patanasīloti pātī, puthujjano. Aniccatāya vā bhavābhavādīsu kammavegakkhitto ghaṭiyantaṃ viya anavaṭṭhānena paribbhamanato gamanasīloti pātī, maraṇavasena vā tamhi tamhi sattanikāye attabhāvassa patanasīloti pātī, sattasantāno, cittameva vā. Taṃ pātinaṃ saṃsāradukkhato mokkhetīti pātimokkhaṃ. Cittassa hi vimokkhena satto vimuttoti vuccati. Vuttañhi ‘‘cittavodānā visujjhantī’’ti (saṃ. ni. 3.100), ‘‘anupādāya āsavehi cittaṃ vimutta’’nti (mahāva. 28) ca.
অথ ৰা অৰিজ্জাদিনা হেতুনা সংসারে পততি গচ্ছতি পৰত্ততীতি পাতি। ‘‘অৰিজ্জানীৰরণানং সত্তানং তণ্হাসংযোজনানং সন্ধাৰতং সংসরত’’ন্তি (সং॰ নি॰ ২.১২৪) হি ৰুত্তং। তস্স পাতিনো সত্তস্স তণ্হাদিসংকিলেসত্তযতো মোক্খো এতেনাতি পাতিমোক্খো। ‘‘কণ্ঠেকাল়ো’’তিআদীনং ৰিযস্স সমাসসিদ্ধি ৰেদিতব্বা।
Atha vā avijjādinā hetunā saṃsāre patati gacchati pavattatīti pāti. ‘‘Avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarata’’nti (saṃ. ni. 2.124) hi vuttaṃ. Tassa pātino sattassa taṇhādisaṃkilesattayato mokkho etenāti pātimokkho. ‘‘Kaṇṭhekāḷo’’tiādīnaṃ viyassa samāsasiddhi veditabbā.
অথ ৰা পাতেতি ৰিনিপাতেতি দুক্খেহীতি পাতি, চিত্তং। ৰুত্তঞ্হি ‘‘চিত্তেন নীযতি লোকো, চিত্তেন পরিকস্সতী’’তি (সং॰ নি॰ ১.৬২)। তস্স পাতিনো মোক্খো এতেনাতি পাতিমোক্খো। পততি ৰা এতেন অপাযদুক্খে সংসারদুক্খে চাতি পাতি, তণ্হাসংকিলেসো। ৰুত্তঞ্হি ‘‘তণ্হা জনেতি পুরিসং (সং॰ নি॰ ১.৫৫-৫৭), তণ্হাদুতিযো পুরিসো’’তি (অ॰ নি॰ ৪.৯; ইতিৰু॰ ১৫, ১০৫) চ আদি। ততো পাতিতো মোক্খোতি পাতিমোক্খো।
Atha vā pāteti vinipāteti dukkhehīti pāti, cittaṃ. Vuttañhi ‘‘cittena nīyati loko, cittena parikassatī’’ti (saṃ. ni. 1.62). Tassa pātino mokkho etenāti pātimokkho. Patati vā etena apāyadukkhe saṃsāradukkhe cāti pāti, taṇhāsaṃkileso. Vuttañhi ‘‘taṇhā janeti purisaṃ (saṃ. ni. 1.55-57), taṇhādutiyo puriso’’ti (a. ni. 4.9; itivu. 15, 105) ca ādi. Tato pātito mokkhoti pātimokkho.
অথ ৰা পততি এত্থাতি পাতি, ছ অজ্ঝত্তিকবাহিরানি আযতনানি। ৰুত্তঞ্হি ‘‘ছসু লোকো সমুপ্পন্নো, ছসু কুব্বতি সন্থৰ’’ন্তি (সং॰ নি॰ ১.৭০; সু॰ নি॰ ১৭১)। ততো ছঅজ্ঝত্তিকবাহিরাযতনসঙ্খাততো পাতিতো মোক্খোতি পাতিমোক্খো।
Atha vā patati etthāti pāti, cha ajjhattikabāhirāni āyatanāni. Vuttañhi ‘‘chasu loko samuppanno, chasu kubbati santhava’’nti (saṃ. ni. 1.70; su. ni. 171). Tato chaajjhattikabāhirāyatanasaṅkhātato pātito mokkhoti pātimokkho.
অথ ৰা পাতো ৰিনিপাতো অস্স অত্থীতি পাতী, সংসারো। ততো মোক্খোতি পাতিমোক্খো।
Atha vā pāto vinipāto assa atthīti pātī, saṃsāro. Tato mokkhoti pātimokkho.
অথ ৰা সব্বলোকাধিপতিভাৰতো ধম্মিস্সরো ভগৰা পতীতি ৰুচ্চতি, মুচ্চতি এতেনাতি মোক্খো, পতিনো মোক্খো তেন পঞ্ঞত্তত্তাতি পতিমোক্খো, পতিমোক্খো এৰ পাতিমোক্খো। সব্বগুণানং ৰা মূলভাৰতো উত্তমট্ঠেন পতি চ সো যথাৰুত্তেন অত্থেন মোক্খো চাতি পতিমোক্খো, পতিমোক্খো এৰ পাতিমোক্খো। তথা হি ৰুত্তং ‘‘পাতিমোক্খন্তি মুখমেতং পমুখমেত’’ন্তি (মহাৰ॰ ১৩৫) ৰিত্থারো।
Atha vā sabbalokādhipatibhāvato dhammissaro bhagavā patīti vuccati, muccati etenāti mokkho, patino mokkho tena paññattattāti patimokkho, patimokkho eva pātimokkho. Sabbaguṇānaṃ vā mūlabhāvato uttamaṭṭhena pati ca so yathāvuttena atthena mokkho cāti patimokkho, patimokkho eva pātimokkho. Tathā hi vuttaṃ ‘‘pātimokkhanti mukhametaṃ pamukhameta’’nti (mahāva. 135) vitthāro.
অথ ৰা প-ইতি পকারে, অতীতি অচ্চন্তত্থে নিপাতো, তস্মা পকারেহি অচ্চন্তং মোক্খেতীতি পাতিমোক্খো। ইদঞ্হি সীলং সযং তদঙ্গৰসেন সমাধিসহিতং পঞ্ঞাসহিতঞ্চ ৰিক্খম্ভনৰসেন সমুচ্ছেদৰসেন চ অচ্চন্তং মোক্খেতি মোচেতীতি পাতিমোক্খো।
Atha vā pa-iti pakāre, atīti accantatthe nipāto, tasmā pakārehi accantaṃ mokkhetīti pātimokkho. Idañhi sīlaṃ sayaṃ tadaṅgavasena samādhisahitaṃ paññāsahitañca vikkhambhanavasena samucchedavasena ca accantaṃ mokkheti mocetīti pātimokkho.
পতি পতি মোক্খোতি ৰা পতিমোক্খো, তম্হা তম্হা ৰীতিক্কমদোসতো পচ্চেকং মোক্খেতীতি অত্থো, পতিমোক্খো এৰ পাতিমোক্খো। মোক্খো ৰা নিব্বানং, তস্স মোক্খস্স পটিবিম্বভূতোতি পতিমোক্খো। সীলসংৰরো হি সূরিযস্স অরুণুগ্গমনং ৰিয নিব্বানস্স উদযভূতো তপ্পটিভাগো চ যথারহং কিলেসনিব্বাপনতো, পতিমোক্খোযেৰ পাতিমোক্খো। পতিৰত্ততি মোক্খাভিমুখন্তি ৰা পতিমোক্খং, পতিমোক্খমেৰ পাতিমোক্খন্তি এৰং তাৰেত্থ পাতিমোক্খসদ্দস্স অত্থো ৰেদিতব্বো।
Pati pati mokkhoti vā patimokkho, tamhā tamhā vītikkamadosato paccekaṃ mokkhetīti attho, patimokkho eva pātimokkho. Mokkho vā nibbānaṃ, tassa mokkhassa paṭibimbabhūtoti patimokkho. Sīlasaṃvaro hi sūriyassa aruṇuggamanaṃ viya nibbānassa udayabhūto tappaṭibhāgo ca yathārahaṃ kilesanibbāpanato, patimokkhoyeva pātimokkho. Pativattati mokkhābhimukhanti vā patimokkhaṃ, patimokkhameva pātimokkhanti evaṃ tāvettha pātimokkhasaddassa attho veditabbo.
সংৰরতি পিদহতি এতেনাতি সংৰরো, পাতিমোক্খমেৰ সংৰরো পাতিমোক্খসংৰরো। সো এৰ সীলং পাতিমোক্খসংৰরসীলং, অত্থতো পন ততো ততো ৰীতিক্কমিতব্বতো ৰিরতিযো চেৰ চেতনা চ।
Saṃvarati pidahati etenāti saṃvaro, pātimokkhameva saṃvaro pātimokkhasaṃvaro. So eva sīlaṃ pātimokkhasaṃvarasīlaṃ, atthato pana tato tato vītikkamitabbato viratiyo ceva cetanā ca.
অধিসীলন্তি ৰুচ্চতীতি অনৰসেসতো কাযিকৰাচসিকসংৰরভাৰতো চ মগ্গসীলস্স পদট্ঠানভাৰতো চ পাতিমোক্খসংৰরসীলং অধিকং ৰিসিট্ঠং সীলং অধিসীলন্তি ৰুচ্চতি। পজ্জোতানন্তি আলোকানং। ননু চ পচ্চেকবুদ্ধাপি ধম্মতাৰসেন পাতিমোক্খসংৰরসীলেন সমন্নাগতাৰ হোন্তি, এৰং সতি কস্মা ‘‘বুদ্ধুপ্পাদেযেৰ পৰত্ততি, ন ৰিনা বুদ্ধুপ্পাদা’’তি নিযমেত্ৰা ৰুত্তন্তি আহ – ‘‘ন হি তং পঞ্ঞত্তিং উদ্ধরিত্ৰা’’তিআদি। কিঞ্চাপি পচ্চেকবুদ্ধা পাতিমোক্খসংৰরসম্পন্নাগতা হোন্তি, ন পন তেসং ৰসেন ৰিত্থারিতং হুত্ৰা পৰত্ততীতি অধিপ্পাযো। ‘‘ইমস্মিং ৰত্থুস্মিং ইমস্মিং ৰীতিক্কমে ইদং নাম হোতী’’তি পঞ্ঞপনং অঞ্ঞেসং অৰিসযো, বুদ্ধানংযেৰ এস ৰিসযো, বুদ্ধানং বলন্তি আহ – ‘‘বুদ্ধাযেৰ পনা’’তিআদি। লোকিযসীলস্স অধিসীলভাৰো পরিযাযেনাতি নিপ্পরিযাযমেৰ তং দস্সেতুং ‘‘পাতিমোক্খসংৰরতোপি চ মগ্গফলসম্পযুত্তমেৰ সীলং অধিসীল’’ন্তি ৰুত্তং। ন হি তং সমাপন্নো ভিক্খূতি গহট্ঠেসু সোতাপন্নানং সদারৰীতিক্কমসম্ভৰতো ৰুত্তং। তথা হি তে সপুত্তদারা অগারং অজ্ঝাৰসন্তি।
Adhisīlanti vuccatīti anavasesato kāyikavācasikasaṃvarabhāvato ca maggasīlassa padaṭṭhānabhāvato ca pātimokkhasaṃvarasīlaṃ adhikaṃ visiṭṭhaṃ sīlaṃ adhisīlanti vuccati. Pajjotānanti ālokānaṃ. Nanu ca paccekabuddhāpi dhammatāvasena pātimokkhasaṃvarasīlena samannāgatāva honti, evaṃ sati kasmā ‘‘buddhuppādeyeva pavattati, na vinā buddhuppādā’’ti niyametvā vuttanti āha – ‘‘na hi taṃ paññattiṃ uddharitvā’’tiādi. Kiñcāpi paccekabuddhā pātimokkhasaṃvarasampannāgatā honti, na pana tesaṃ vasena vitthāritaṃ hutvā pavattatīti adhippāyo. ‘‘Imasmiṃ vatthusmiṃ imasmiṃ vītikkame idaṃ nāma hotī’’ti paññapanaṃ aññesaṃ avisayo, buddhānaṃyeva esa visayo, buddhānaṃ balanti āha – ‘‘buddhāyeva panā’’tiādi. Lokiyasīlassa adhisīlabhāvo pariyāyenāti nippariyāyameva taṃ dassetuṃ ‘‘pātimokkhasaṃvaratopi ca maggaphalasampayuttameva sīlaṃ adhisīla’’nti vuttaṃ. Na hi taṃ samāpanno bhikkhūti gahaṭṭhesu sotāpannānaṃ sadāravītikkamasambhavato vuttaṃ. Tathā hi te saputtadārā agāraṃ ajjhāvasanti.
সমাদাপনং সমাদানঞ্চাতি অঞ্ঞেসং সমাদাপনং সযং সমাদানঞ্চ। অধিচিত্তন্তি ৰুচ্চতীতি মগ্গসমাধিস্স অধিট্ঠানভাৰতো অধিচিত্তন্তি ৰুচ্চতি। ন ৰিনা বুদ্ধুপ্পাদাতি কিঞ্চাপি পচ্চেকবুদ্ধানং ৰিপস্সনাপাদকং অট্ঠসমাপত্তিচিত্তং হোতিযেৰ, ন পন তে তত্থ অঞ্ঞে সমাদাপেতুং সক্কোন্তীতি ন তেসং ৰসেন ৰিত্থারিতং হুত্ৰা পৰত্ততীতি অধিপ্পাযো। ৰিপস্সনাপঞ্ঞাযপি অধিপঞ্ঞতাসাধনে ‘‘ন ৰিনা বুদ্ধুপ্পাদা’’তি ৰচনং ইমিনাৰ অধিপ্পাযেন ৰুত্তন্তি ৰেদিতব্বং। লোকিযচিত্তস্স অধিচিত্ততা পরিযাযেনাতি নিপ্পরিযাযমেৰ তং দস্সেতুং ‘‘ততোপি চ মগ্গফলচিত্তমেৰ অধিচিত্ত’’ন্তি আহ। তং পন ইধ অনধিপ্পেতন্তি ইমিনা অট্ঠকথাৰচনেন লোকিযচিত্তস্স ৰসেন অধিচিত্তসিক্খাপি ইধ অধিপ্পেতাতি ৰিঞ্ঞাযতি। ন হি তং সমাপন্নো ভিক্খু মেথুনং ধম্মং পটিসেৰতীতি চ ইমিনা লোকিযঅধিচিত্তং সমাপন্নো মেথুনং ধম্মং পটিসেৰতীতি আপন্নং। অধিপঞ্ঞানিদ্দেসে চ ‘‘ততোপি চ মগ্গফলপঞ্ঞাৰ অধিপঞ্ঞা’’তি ৰত্ৰা ‘‘সা পন ইধ অনধিপ্পেতা। ন হি তং সমাপন্নো ভিক্খু মেথুনং ধম্মং পটিসেৰতী’’তি ৰুত্তত্তা লোকিযপঞ্ঞাৰসেন অধিপঞ্ঞাসিক্খাযপি ইধাধিপ্পেতভাৰো তং সমাপন্নস্স মেথুনধম্মপটিসেৰনঞ্চ অট্ঠকথাযং অনুঞ্ঞাতন্তি ৰিঞ্ঞাযতি। ইদঞ্চ সব্বং ‘‘তত্র যাযং অধিসীলসিক্খা, অযং ইমস্মিং অত্থে অধিপ্পেতা সিক্খা’’তি ইমায পাল়িযা ন সমেতি। অযঞ্হি পাল়ি অধিসীলসিক্খাৰ ইধ অধিপ্পেতা, ন ইতরাতি দীপেতি, তস্মা পাল়িযা অট্ঠকথায চ এৰমধিপ্পাযো ৰেদিতব্বো – লোকিযঅধিচিত্তঅধিপঞ্ঞাসমাপন্নস্স তথারূপপচ্চযং পটিচ্চ ‘‘মেথুনং ধম্মং পটিসেৰিস্সামী’’তি চিত্তে উপ্পন্নে ততো অধিচিত্ততো অধিপঞ্ঞতো চ পরিহানি সম্ভৰতীতি তং দ্ৰযং সমাপন্নেন ন সক্কা মেথুনং ধম্মং পটিসেৰিতুন্তি পাল়িযং অধিসীলসিক্খাৰ ৰুত্তা। অধিসীলসিক্খঞ্হি যাৰ ৰীতিক্কমং ন করোতি, তাৰ সমাপন্নোৰ হোতি। ন হি চিত্তুপ্পাদমত্তেন পাতিমোক্খসংৰরসীলং ভিন্নং নাম হোতীতি। অট্ঠকথাযং পন লোকিযঅধিচিত্ততো অধিপঞ্ঞতো চ পরিহাযিত্ৰাপি ভিক্খুনো মেথুনধম্মপটিসেৰনং কদাচি ভৰেয্যাতি তং দ্ৰযং অপ্পটিক্খিপিত্ৰা মগ্গফলধম্মানং অকুপ্পসভাৰত্তা তং সমাপন্নস্স ভিক্খুনো ততো পরিহাযিত্ৰা মেথুনধম্মপটিসেৰনং নাম ন কদাচি সম্ভৰতীতি লোকুত্তরাধিচিত্তঅধিপঞ্ঞানংযেৰ পটিক্খেপো কতোতি ৰেদিতব্বো।
Samādāpanaṃsamādānañcāti aññesaṃ samādāpanaṃ sayaṃ samādānañca. Adhicittanti vuccatīti maggasamādhissa adhiṭṭhānabhāvato adhicittanti vuccati. Na vinā buddhuppādāti kiñcāpi paccekabuddhānaṃ vipassanāpādakaṃ aṭṭhasamāpatticittaṃ hotiyeva, na pana te tattha aññe samādāpetuṃ sakkontīti na tesaṃ vasena vitthāritaṃ hutvā pavattatīti adhippāyo. Vipassanāpaññāyapi adhipaññatāsādhane ‘‘na vinā buddhuppādā’’ti vacanaṃ imināva adhippāyena vuttanti veditabbaṃ. Lokiyacittassa adhicittatā pariyāyenāti nippariyāyameva taṃ dassetuṃ ‘‘tatopi ca maggaphalacittameva adhicitta’’nti āha. Taṃ pana idha anadhippetanti iminā aṭṭhakathāvacanena lokiyacittassa vasena adhicittasikkhāpi idha adhippetāti viññāyati. Na hi taṃ samāpanno bhikkhu methunaṃ dhammaṃ paṭisevatīti ca iminā lokiyaadhicittaṃ samāpanno methunaṃ dhammaṃ paṭisevatīti āpannaṃ. Adhipaññāniddese ca ‘‘tatopi ca maggaphalapaññāva adhipaññā’’ti vatvā ‘‘sā pana idha anadhippetā. Na hi taṃ samāpanno bhikkhu methunaṃ dhammaṃ paṭisevatī’’ti vuttattā lokiyapaññāvasena adhipaññāsikkhāyapi idhādhippetabhāvo taṃ samāpannassa methunadhammapaṭisevanañca aṭṭhakathāyaṃ anuññātanti viññāyati. Idañca sabbaṃ ‘‘tatra yāyaṃ adhisīlasikkhā, ayaṃ imasmiṃ atthe adhippetā sikkhā’’ti imāya pāḷiyā na sameti. Ayañhi pāḷi adhisīlasikkhāva idha adhippetā, na itarāti dīpeti, tasmā pāḷiyā aṭṭhakathāya ca evamadhippāyo veditabbo – lokiyaadhicittaadhipaññāsamāpannassa tathārūpapaccayaṃ paṭicca ‘‘methunaṃ dhammaṃ paṭisevissāmī’’ti citte uppanne tato adhicittato adhipaññato ca parihāni sambhavatīti taṃ dvayaṃ samāpannena na sakkā methunaṃ dhammaṃ paṭisevitunti pāḷiyaṃ adhisīlasikkhāva vuttā. Adhisīlasikkhañhi yāva vītikkamaṃ na karoti, tāva samāpannova hoti. Na hi cittuppādamattena pātimokkhasaṃvarasīlaṃ bhinnaṃ nāma hotīti. Aṭṭhakathāyaṃ pana lokiyaadhicittato adhipaññato ca parihāyitvāpi bhikkhuno methunadhammapaṭisevanaṃ kadāci bhaveyyāti taṃ dvayaṃ appaṭikkhipitvā maggaphaladhammānaṃ akuppasabhāvattā taṃ samāpannassa bhikkhuno tato parihāyitvā methunadhammapaṭisevanaṃ nāma na kadāci sambhavatīti lokuttarādhicittaadhipaññānaṃyeva paṭikkhepo katoti veditabbo.
অত্থি দিন্নং অত্থি যিট্ঠন্তিআদিনযপ্পৰত্তন্তি ইমিনা –
Atthi dinnaṃ atthi yiṭṭhantiādinayappavattanti iminā –
‘‘তত্থ কতমং কম্মস্সকতঞ্ঞাণং? ‘অত্থি দিন্নং, অত্থি যিট্ঠং, অত্থি হুতং, অত্থি সুকতদুক্কটানং কম্মানং ফলং ৰিপাকো, অত্থি অযং লোকো, অত্থি পরো লোকো, অত্থি মাতা, অত্থি পিতা, অত্থি সত্তা ওপপাতিকা, অত্থি লোকে সমণব্রাহ্মণা সম্মগ্গতা সম্মা পটিপন্না, যে ইমঞ্চ লোকং পরঞ্চ লোকং সযং অভিঞ্ঞা সচ্ছিকত্ৰা পৰেদেন্তী’তি যা এৰরূপা পঞ্ঞা পজাননা…পে॰… অমোহো ধম্মৰিচযো সম্মাদিট্ঠি, ইদং ৰুচ্চতি কম্মস্সকতঞ্ঞাণং। ঠপেত্ৰা সচ্চানুলোমিকং ঞাণং সব্বাপি সাসৰা কুসলা পঞ্ঞা কম্মস্সকতঞ্ঞাণ’’ন্তি (ৰিভ॰ ৭৯৩) –
‘‘Tattha katamaṃ kammassakataññāṇaṃ? ‘Atthi dinnaṃ, atthi yiṭṭhaṃ, atthi hutaṃ, atthi sukatadukkaṭānaṃ kammānaṃ phalaṃ vipāko, atthi ayaṃ loko, atthi paro loko, atthi mātā, atthi pitā, atthi sattā opapātikā, atthi loke samaṇabrāhmaṇā sammaggatā sammā paṭipannā, ye imañca lokaṃ parañca lokaṃ sayaṃ abhiññā sacchikatvā pavedentī’ti yā evarūpā paññā pajānanā…pe… amoho dhammavicayo sammādiṭṭhi, idaṃ vuccati kammassakataññāṇaṃ. Ṭhapetvā saccānulomikaṃ ñāṇaṃ sabbāpi sāsavā kusalā paññā kammassakataññāṇa’’nti (vibha. 793) –
ইমং ৰিভঙ্গপাল়িং সঙ্গণ্হাতি।
Imaṃ vibhaṅgapāḷiṃ saṅgaṇhāti.
তত্থ (ৰিভ॰ অট্ঠ॰ ৭৯৩) অত্থি দিন্নন্তিআদীসু দিন্নপচ্চযা ফলং অত্থীতি ইমিনা উপাযেন অত্থো ৰেদিতব্বো। দিন্নন্তি চ দেয্যধম্মসীসেন দানং ৰুত্তং। যিট্ঠন্তি মহাযাগো, সব্বসাধারণং মহাদানন্তি অত্থো। হুতন্তি পহোনকসক্কারো অধিপ্পেতো। অত্থি মাতা, অত্থি পিতাতি মাতাপিতূসু সম্মাপটিপত্তিমিচ্ছাপটিপত্তিআদীনং ফলসম্ভৰো ৰুত্তো। ইদং ৰুচ্চতীতি যং ঞাণং ‘‘ইদং কম্মং সকং, ইদং নো সক’’ন্তি জানাতি, ইদং কম্মস্সকতঞ্ঞাণং নাম ৰুচ্চতীতি অত্থো। তত্থ তিৰিধং কাযদুচ্চরিতং চতুব্বিধং ৰচীদুচ্চরিতং তিৰিধং মনোদুচ্চরিতন্তি ইদং ন সককম্মং নাম, তীসু দ্ৰারেসু দসৰিধম্পি সুচরিতং সককম্মং নাম। অত্তনো ৰাপি হোতু পরস্স ৰা, সব্বম্পি অকুসলং ন সককম্মং নাম। কস্মা? অত্থভঞ্জনতো অনত্থজননতো চ। অত্তনো ৰা হোতু পরস্স ৰা, সব্বম্পি কুসলং সককম্মং নাম। কস্মা? অনত্থভঞ্জনতো অত্থজননতো চ। এৰং জাননসমত্থে ইমস্মিং কম্মস্সকতঞ্ঞাণে ঠত্ৰা বহুং দানং দত্ৰা সীলং পূরেত্ৰা উপোসথং সমাদিযিত্ৰা সুখেন সুখং সম্পত্তিযা সম্পত্তিং অনুভৰিত্ৰা নিব্বানং পত্তানং সত্তানং গণনপরিচ্ছেদো নত্থি। ঠপেত্ৰা সচ্চানুলোমিকং ঞাণন্তি মগ্গসচ্চস্স পরমত্থসচ্চস্স চ অনুলোমনতো সচ্চানুলোমিকন্তি লদ্ধনামং ৰিপস্সনাঞাণং ঠপেত্ৰা অৰসেসা সব্বাপি সাসৰা কুসলা পঞ্ঞা কম্মস্সকতঞ্ঞাণমেৰাতি অত্থো।
Tattha (vibha. aṭṭha. 793) atthi dinnantiādīsu dinnapaccayā phalaṃ atthīti iminā upāyena attho veditabbo. Dinnanti ca deyyadhammasīsena dānaṃ vuttaṃ. Yiṭṭhanti mahāyāgo, sabbasādhāraṇaṃ mahādānanti attho. Hutanti pahonakasakkāro adhippeto. Atthi mātā, atthi pitāti mātāpitūsu sammāpaṭipattimicchāpaṭipattiādīnaṃ phalasambhavo vutto. Idaṃ vuccatīti yaṃ ñāṇaṃ ‘‘idaṃ kammaṃ sakaṃ, idaṃ no saka’’nti jānāti, idaṃ kammassakataññāṇaṃ nāma vuccatīti attho. Tattha tividhaṃ kāyaduccaritaṃ catubbidhaṃ vacīduccaritaṃ tividhaṃ manoduccaritanti idaṃ na sakakammaṃ nāma, tīsu dvāresu dasavidhampi sucaritaṃ sakakammaṃ nāma. Attano vāpi hotu parassa vā, sabbampi akusalaṃ na sakakammaṃ nāma. Kasmā? Atthabhañjanato anatthajananato ca. Attano vā hotu parassa vā, sabbampi kusalaṃ sakakammaṃ nāma. Kasmā? Anatthabhañjanato atthajananato ca. Evaṃ jānanasamatthe imasmiṃ kammassakataññāṇe ṭhatvā bahuṃ dānaṃ datvā sīlaṃ pūretvā uposathaṃ samādiyitvā sukhena sukhaṃ sampattiyā sampattiṃ anubhavitvā nibbānaṃ pattānaṃ sattānaṃ gaṇanaparicchedo natthi. Ṭhapetvā saccānulomikaṃ ñāṇanti maggasaccassa paramatthasaccassa ca anulomanato saccānulomikanti laddhanāmaṃ vipassanāñāṇaṃ ṭhapetvā avasesā sabbāpi sāsavā kusalā paññā kammassakataññāṇamevāti attho.
তিলক্খণাকারপরিচ্ছেদকন্তি অনিচ্চাদিলক্খণত্তযস্স হুত্ৰা অভাৰাদিআকারপঅচ্ছিন্দনকং। অধিপঞ্ঞাতি ৰুচ্চতীতি মগ্গপঞ্ঞায অধিট্ঠানভাৰতো ৰিপস্সনাঞাণং অধিপঞ্ঞাতি ৰুচ্চতি।
Tilakkhaṇākāraparicchedakanti aniccādilakkhaṇattayassa hutvā abhāvādiākārapaacchindanakaṃ. Adhipaññāti vuccatīti maggapaññāya adhiṭṭhānabhāvato vipassanāñāṇaṃ adhipaññāti vuccati.
‘‘কল্যাণকারী কল্যাণং, পাপকারী চ পাপকং।
‘‘Kalyāṇakārī kalyāṇaṃ, pāpakārī ca pāpakaṃ;
অনুভোতি দ্ৰযমেতং, অনুবন্ধতি কারক’’ন্তি॥ (সং॰ নি॰ ১.২৫৬)।
Anubhoti dvayametaṃ, anubandhati kāraka’’nti. (saṃ. ni. 1.256);
এৰং অতীতে অনাগতে চ ৰট্টমূলকদুক্খসল্লক্খণৰসেন সংৰেগৰত্থুতায ৰিমুত্তিআকঙ্খায পচ্চযভূতা কম্মস্সকতপঞ্ঞা অধিপঞ্ঞাতিপি ৰদন্তি। লোকিযপঞ্ঞায অধিপঞ্ঞাভাৰো পরিযাযেনাতি নিপ্পরিযাযমেৰ তং দস্সেতুং ‘‘ততোপি চ মগ্গফলপঞ্ঞাৰ অধিপঞ্ঞা’’তি ৰুত্তং।
Evaṃ atīte anāgate ca vaṭṭamūlakadukkhasallakkhaṇavasena saṃvegavatthutāya vimuttiākaṅkhāya paccayabhūtā kammassakatapaññā adhipaññātipi vadanti. Lokiyapaññāya adhipaññābhāvo pariyāyenāti nippariyāyameva taṃ dassetuṃ ‘‘tatopi ca maggaphalapaññāva adhipaññā’’ti vuttaṃ.
সহ আজীৰন্তি এত্থাতি সাজীৰোতি সব্বসিক্খাপদং ৰুত্তন্তি আহ – ‘‘সব্বম্পি…পে॰… তস্মা সাজীৰন্তি ৰুচ্চতী’’তি। তত্থ সিক্খাপদন্তি ‘‘নামকাযো পদকাযো নিরুত্তিকাযো ব্যঞ্জনকাযো’’তি ৰুত্তং ভগৰতো ৰচনসঙ্খাতং সিক্খাপদং। সভাগৰুত্তিনোতি সমানৰুত্তিকা, সদিসপ্পৰত্তিকাতি অত্থো। তস্মিং সিক্খতীতি এত্থ আধেয্যাপেক্খত্তা অধিকরণস্স কিমাধেয্যমপেক্খিত্ৰা ‘‘তস্মি’’ন্তি অধিকরণং নিদ্দিট্ঠন্তি আহ – ‘‘তং সিক্খাপদং চিত্তস্স অধিকরণং কত্ৰা’’তি, তং সাজীৰসঙ্খাতং সিক্খাপদং ‘‘যথাসিক্খাপদং নু খো সিক্খামি, ন সিক্খামী’’তি এৰং পৰত্তিৰসেন সিক্খাপদৰিসযত্তা তদাধেয্যভূতস্স চিত্তস্স অধিকরণং কত্ৰাতি অত্থো। ননু চ ‘‘সিক্খাসাজীৰসমাপন্নো’’তি ইমস্স পদভাজনং করোন্তেন ‘‘যং সিক্খং সাজীৰঞ্চ সমাপন্নো, তদুভযং দস্সেত্ৰা তেসু সিক্খতি, তেন ৰুচ্চতি সিক্খাসাজীৰসমাপন্নো’’তি ৰত্তব্বং সিযা, এৰমৰত্ৰা ‘‘তস্মিং সিক্খতি, তেন ৰুচ্চতি সাজীৰসমাপন্নো’’তি এত্তকমেৰ কস্মা ৰুত্তন্তি অন্তোলীনচোদনং সন্ধাযাহ ‘‘ন কেৰলঞ্চাযমেতস্মি’’ন্তিআদি।
Saha ājīvanti etthāti sājīvoti sabbasikkhāpadaṃ vuttanti āha – ‘‘sabbampi…pe… tasmā sājīvanti vuccatī’’ti. Tattha sikkhāpadanti ‘‘nāmakāyo padakāyo niruttikāyo byañjanakāyo’’ti vuttaṃ bhagavato vacanasaṅkhātaṃ sikkhāpadaṃ. Sabhāgavuttinoti samānavuttikā, sadisappavattikāti attho. Tasmiṃ sikkhatīti ettha ādheyyāpekkhattā adhikaraṇassa kimādheyyamapekkhitvā ‘‘tasmi’’nti adhikaraṇaṃ niddiṭṭhanti āha – ‘‘taṃ sikkhāpadaṃ cittassa adhikaraṇaṃ katvā’’ti, taṃ sājīvasaṅkhātaṃ sikkhāpadaṃ ‘‘yathāsikkhāpadaṃ nu kho sikkhāmi, na sikkhāmī’’ti evaṃ pavattivasena sikkhāpadavisayattā tadādheyyabhūtassa cittassa adhikaraṇaṃ katvāti attho. Nanu ca ‘‘sikkhāsājīvasamāpanno’’ti imassa padabhājanaṃ karontena ‘‘yaṃ sikkhaṃ sājīvañca samāpanno, tadubhayaṃ dassetvā tesu sikkhati, tena vuccati sikkhāsājīvasamāpanno’’ti vattabbaṃ siyā, evamavatvā ‘‘tasmiṃ sikkhati, tena vuccati sājīvasamāpanno’’ti ettakameva kasmā vuttanti antolīnacodanaṃ sandhāyāha ‘‘na kevalañcāyametasmi’’ntiādi.
তস্সা চ সিক্খাযাতি তস্সা অধিসীলসঙ্খাতায সিক্খায। সিক্খং পরিপূরেন্তোতি
Tassā ca sikkhāyāti tassā adhisīlasaṅkhātāya sikkhāya. Sikkhaṃ paripūrentoti
সীলসংৰরং পরিপূরেন্তো, ৰারিত্তসীলৰসেন ৰিরতিসম্পযুত্তং চেতনং চারিত্তসীলৰসেন ৰিরতিৰিপ্পযুত্তং চেতনঞ্চ অত্তনি পৰত্তেন্তোতি অত্থো। তস্মিঞ্চ সিক্খাপদে অৰীতিক্কমন্তো সিক্খতীতি ‘‘নামকাযো পদকাযো নিরুত্তিকাযো ব্যঞ্জনকাযো’’তি এৰং ৰুত্তং ভগৰতো ৰচনসঙ্খাতং সিক্খাপদং অৰীতিক্কমন্তো হুত্ৰা তস্মিং যথাৰুত্তসিক্খাপদে সিক্খতীতি অত্থো। সীলসংৰরপূরণং সাজীৰানতিক্কমনঞ্চাতি ইদমেৰ চ দ্ৰযং ইধ সিক্খনং নামাতি অধিপ্পাযো। তত্থ সাজীৰানতিক্কমো সিক্খাপারিপূরিযা পচ্চযো। সাজীৰানতিক্কমতো হি যাৰ মগ্গা সিক্খাপারিপূরী হোতি। অপিচেত্থ ‘‘সিক্খং পরিপূরেন্তো সিক্খতী’’তি ইমিনা ৰিরতিচেতনাসঙ্খাতস্স সীলসংৰরস্স ৰিসেসতো সন্তানে পৰত্তনকালোৰ গহিতো, ‘‘অৰীতিক্কমন্তো সিক্খতী’’তি ইমিনা পন অপ্পৰত্তনকালোপি। সিক্খঞ্হি পরিপূরণৰসেন অত্তনি পৰত্তেন্তোপি নিদ্দাদিৰসেন অপ্পৰত্তেন্তোপি ৰীতিক্কমাভাৰা ‘‘অৰীতিক্কমন্তো সিক্খতী’’তি ৰুচ্চতীতি।
Sīlasaṃvaraṃ paripūrento, vārittasīlavasena viratisampayuttaṃ cetanaṃ cārittasīlavasena virativippayuttaṃ cetanañca attani pavattentoti attho. Tasmiñca sikkhāpade avītikkamanto sikkhatīti ‘‘nāmakāyo padakāyo niruttikāyo byañjanakāyo’’ti evaṃ vuttaṃ bhagavato vacanasaṅkhātaṃ sikkhāpadaṃ avītikkamanto hutvā tasmiṃ yathāvuttasikkhāpade sikkhatīti attho. Sīlasaṃvarapūraṇaṃ sājīvānatikkamanañcāti idameva ca dvayaṃ idha sikkhanaṃ nāmāti adhippāyo. Tattha sājīvānatikkamo sikkhāpāripūriyā paccayo. Sājīvānatikkamato hi yāva maggā sikkhāpāripūrī hoti. Apicettha ‘‘sikkhaṃ paripūrento sikkhatī’’ti iminā viraticetanāsaṅkhātassa sīlasaṃvarassa visesato santāne pavattanakālova gahito, ‘‘avītikkamanto sikkhatī’’ti iminā pana appavattanakālopi. Sikkhañhi paripūraṇavasena attani pavattentopi niddādivasena appavattentopi vītikkamābhāvā ‘‘avītikkamanto sikkhatī’’ti vuccatīti.
সিক্খাসাজীৰপদভাজনীযৰণ্ণনা নিট্ঠিতা।
Sikkhāsājīvapadabhājanīyavaṇṇanā niṭṭhitā.
