| Library / Tipiṭaka / ติปิฎก • Tipiṭaka / องฺคุตฺตรนิกาย • Aṅguttaranikāya |
๕. สิกฺขาสุตฺตํ
5. Sikkhāsuttaṃ
๕. ‘‘โย หิ โกจิ, ภิกฺขเว, ภิกฺขุ วา ภิกฺขุนี วา สิกฺขํ ปจฺจกฺขาย หีนายาวตฺตติ, ตสฺส ทิเฎฺฐว 1 ธเมฺม ปญฺจ สหธมฺมิกา วาทานุปาตา 2 คารยฺหา ฐานา อาคจฺฉนฺติฯ กตเม ปญฺจ? สทฺธาปิ นาม เต นาโหสิ กุสเลสุ ธเมฺมสุ, หิรีปิ นาม เต นาโหสิ กุสเลสุ ธเมฺมสุ, โอตฺตปฺปมฺปิ นาม เต นาโหสิ กุสเลสุ ธเมฺมสุ, วีริยมฺปิ นาม เต นาโหสิ กุสเลสุ ธเมฺมสุ, ปญฺญาปิ นาม เต นาโหสิ กุสเลสุ ธเมฺมสุฯ โย หิ โกจิ, ภิกฺขเว, ภิกฺขุ วา ภิกฺขุนี วา สิกฺขํ ปจฺจกฺขาย หีนายาวตฺตติ, ตสฺส ทิเฎฺฐว ธเมฺม อิเม ปญฺจ สหธมฺมิกา วาทานุปาตา คารยฺหา ฐานา อาคจฺฉนฺติฯ
5. ‘‘Yo hi koci, bhikkhave, bhikkhu vā bhikkhunī vā sikkhaṃ paccakkhāya hīnāyāvattati, tassa diṭṭheva 3 dhamme pañca sahadhammikā vādānupātā 4 gārayhā ṭhānā āgacchanti. Katame pañca? Saddhāpi nāma te nāhosi kusalesu dhammesu, hirīpi nāma te nāhosi kusalesu dhammesu, ottappampi nāma te nāhosi kusalesu dhammesu, vīriyampi nāma te nāhosi kusalesu dhammesu, paññāpi nāma te nāhosi kusalesu dhammesu. Yo hi koci, bhikkhave, bhikkhu vā bhikkhunī vā sikkhaṃ paccakkhāya hīnāyāvattati, tassa diṭṭheva dhamme ime pañca sahadhammikā vādānupātā gārayhā ṭhānā āgacchanti.
‘‘โย หิ โกจิ, ภิกฺขเว, ภิกฺขุ วา ภิกฺขุนี วา สหาปิ ทุเกฺขน สหาปิ โทมนเสฺสน อสฺสุมุโข 5 รุทมาโน ปริปุณฺณํ ปริสุทฺธํ พฺรหฺมจริยํ จรติ, ตสฺส ทิเฎฺฐว ธเมฺม ปญฺจ สหธมฺมิกา ปาสํสา ฐานา 6 อาคจฺฉนฺติฯ กตเม ปญฺจ? สทฺธาปิ นาม เต อโหสิ กุสเลสุ ธเมฺมสุ, หิรีปิ นาม เต อโหสิ กุสเลสุ ธเมฺมสุ, โอตฺตปฺปมฺปิ นาม เต อโหสิ กุสเลสุ ธเมฺมสุ, วีริยมฺปิ นาม เต อโหสิ กุสเลสุ ธเมฺมสุ, ปญฺญาปิ นาม เต อโหสิ กุสเลสุ ธเมฺมสุฯ โย หิ โกจิ, ภิกฺขเว, ภิกฺขุ วา ภิกฺขุนี วา สหาปิ ทุเกฺขน สหาปิ โทมนเสฺสน อสฺสุมุโข รุทมาโน ปริปุณฺณํ ปริสุทฺธํ พฺรหฺมจริยํ จรติ, ตสฺส ทิเฎฺฐว ธเมฺม อิเม ปญฺจ สหธมฺมิกา ปาสํสา ฐานา อาคจฺฉนฺตี’’ติฯ ปญฺจมํฯ
‘‘Yo hi koci, bhikkhave, bhikkhu vā bhikkhunī vā sahāpi dukkhena sahāpi domanassena assumukho 7 rudamāno paripuṇṇaṃ parisuddhaṃ brahmacariyaṃ carati, tassa diṭṭheva dhamme pañca sahadhammikā pāsaṃsā ṭhānā 8 āgacchanti. Katame pañca? Saddhāpi nāma te ahosi kusalesu dhammesu, hirīpi nāma te ahosi kusalesu dhammesu, ottappampi nāma te ahosi kusalesu dhammesu, vīriyampi nāma te ahosi kusalesu dhammesu, paññāpi nāma te ahosi kusalesu dhammesu. Yo hi koci, bhikkhave, bhikkhu vā bhikkhunī vā sahāpi dukkhena sahāpi domanassena assumukho rudamāno paripuṇṇaṃ parisuddhaṃ brahmacariyaṃ carati, tassa diṭṭheva dhamme ime pañca sahadhammikā pāsaṃsā ṭhānā āgacchantī’’ti. Pañcamaṃ.
Footnotes:
Related texts:
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๖. มหาสุปินสุตฺตวณฺณนา • 6. Mahāsupinasuttavaṇṇanā
