| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৮. সীলব্বতসুত্তং
8. Sīlabbatasuttaṃ
৭৯. অথ খো আযস্মা আনন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নং খো আযস্মন্তং আনন্দং ভগৰা এতদৰোচ – ‘‘সব্বং নু খো, আনন্দ, সীলব্বতং জীৰিতং ব্রহ্মচরিযং উপট্ঠানসারং সফল’’ন্তি? ‘‘ন খ্ৰেত্থ, ভন্তে, একংসেনা’’তি। ‘‘তেন হানন্দ, ৰিভজস্সূ’’তি।
79. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ ānandaṃ bhagavā etadavoca – ‘‘sabbaṃ nu kho, ānanda, sīlabbataṃ jīvitaṃ brahmacariyaṃ upaṭṭhānasāraṃ saphala’’nti? ‘‘Na khvettha, bhante, ekaṃsenā’’ti. ‘‘Tena hānanda, vibhajassū’’ti.
‘‘যঞ্হিস্স 1, ভন্তে, সীলব্বতং জীৰিতং ব্রহ্মচরিযং উপট্ঠানসারং সেৰতো অকুসলা ধম্মা অভিৰড্ঢন্তি কুসলা ধম্মা পরিহাযন্তি, এৰরূপং সীলব্বতং জীৰিতং ব্রহ্মচরিযং উপট্ঠানসারং অফলং। যঞ্চ খ্ৰাস্স 2, ভন্তে, সীলব্বতং জীৰিতং ব্রহ্মচরিযং উপট্ঠানসারং সেৰতো অকুসলা ধম্মা পরিহাযন্তি, কুসলা ধম্মা অভিৰড্ঢন্তি, এৰরূপং সীলব্বতং জীৰিতং ব্রহ্মচরিযং উপট্ঠানসারং সফল’’ন্তি। ইদমৰোচ আযস্মা আনন্দো; সমনুঞ্ঞো সত্থা অহোসি।
‘‘Yañhissa 3, bhante, sīlabbataṃ jīvitaṃ brahmacariyaṃ upaṭṭhānasāraṃ sevato akusalā dhammā abhivaḍḍhanti kusalā dhammā parihāyanti, evarūpaṃ sīlabbataṃ jīvitaṃ brahmacariyaṃ upaṭṭhānasāraṃ aphalaṃ. Yañca khvāssa 4, bhante, sīlabbataṃ jīvitaṃ brahmacariyaṃ upaṭṭhānasāraṃ sevato akusalā dhammā parihāyanti, kusalā dhammā abhivaḍḍhanti, evarūpaṃ sīlabbataṃ jīvitaṃ brahmacariyaṃ upaṭṭhānasāraṃ saphala’’nti. Idamavoca āyasmā ānando; samanuñño satthā ahosi.
অথ খো আযস্মা আনন্দো ‘‘সমনুঞ্ঞো মে সত্থা’’তি, উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি। অথ খো ভগৰা অচিরপক্কন্তে আযস্মন্তে আনন্দে ভিক্খূ আমন্তেসি – ‘‘সেখো, ভিক্খৰে, আনন্দো; ন চ পনস্স সুলভরূপো সমসমো পঞ্ঞাযা’’তি। অট্ঠমং।
Atha kho āyasmā ānando ‘‘samanuñño me satthā’’ti, uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho bhagavā acirapakkante āyasmante ānande bhikkhū āmantesi – ‘‘sekho, bhikkhave, ānando; na ca panassa sulabharūpo samasamo paññāyā’’ti. Aṭṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৮. সীলব্বতসুত্তৰণ্ণনা • 8. Sīlabbatasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৮. সীলব্বতসুত্তৰণ্ণনা • 8. Sīlabbatasuttavaṇṇanā
