| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
8. සීලබ්‌බතසුත්‌තං
8. Sīlabbatasuttaṃ
79. අථ ඛො ආයස්‌මා ආනන්‌දො යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නං ඛො ආයස්‌මන්‌තං ආනන්‌දං භගවා එතදවොච – ‘‘සබ්‌බං නු ඛො, ආනන්‌ද, සීලබ්‌බතං ජීවිතං බ්‍රහ්‌මචරියං උපට්‌ඨානසාරං සඵල’’න්‌ති? ‘‘න ඛ්‌වෙත්‌ථ, භන්‌තෙ, එකංසෙනා’’ති. ‘‘තෙන හානන්‌ද, විභජස්‌සූ’’ති.
79. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho āyasmantaṃ ānandaṃ bhagavā etadavoca – ‘‘sabbaṃ nu kho, ānanda, sīlabbataṃ jīvitaṃ brahmacariyaṃ upaṭṭhānasāraṃ saphala’’nti? ‘‘Na khvettha, bhante, ekaṃsenā’’ti. ‘‘Tena hānanda, vibhajassū’’ti.
‘‘යඤ්‌හිස්‌ස 1, භන්‌තෙ, සීලබ්‌බතං ජීවිතං බ්‍රහ්‌මචරියං උපට්‌ඨානසාරං සෙවතො අකුසලා ධම්‌මා අභිවඩ්‌ඪන්‌ති කුසලා ධම්‌මා පරිහායන්‌ති, එවරූපං සීලබ්‌බතං ජීවිතං බ්‍රහ්‌මචරියං උපට්‌ඨානසාරං අඵලං. යඤ්‌ච ඛ්‌වාස්‌ස 2, භන්‌තෙ, සීලබ්‌බතං ජීවිතං බ්‍රහ්‌මචරියං උපට්‌ඨානසාරං සෙවතො අකුසලා ධම්‌මා පරිහායන්‌ති, කුසලා ධම්‌මා අභිවඩ්‌ඪන්‌ති, එවරූපං සීලබ්‌බතං ජීවිතං බ්‍රහ්‌මචරියං උපට්‌ඨානසාරං සඵල’’න්‌ති. ඉදමවොච ආයස්‌මා ආනන්‌දො; සමනුඤ්‌ඤො සත්‌ථා අහොසි.
‘‘Yañhissa 3, bhante, sīlabbataṃ jīvitaṃ brahmacariyaṃ upaṭṭhānasāraṃ sevato akusalā dhammā abhivaḍḍhanti kusalā dhammā parihāyanti, evarūpaṃ sīlabbataṃ jīvitaṃ brahmacariyaṃ upaṭṭhānasāraṃ aphalaṃ. Yañca khvāssa 4, bhante, sīlabbataṃ jīvitaṃ brahmacariyaṃ upaṭṭhānasāraṃ sevato akusalā dhammā parihāyanti, kusalā dhammā abhivaḍḍhanti, evarūpaṃ sīlabbataṃ jīvitaṃ brahmacariyaṃ upaṭṭhānasāraṃ saphala’’nti. Idamavoca āyasmā ānando; samanuñño satthā ahosi.
අථ ඛො ආයස්‌මා ආනන්‌දො ‘‘සමනුඤ්‌ඤො මෙ සත්‌ථා’’ති, උට්‌ඨායාසනා භගවන්‌තං අභිවාදෙත්‌වා පදක්‌ඛිණං කත්‌වා පක්‌කාමි. අථ ඛො භගවා අචිරපක්‌කන්‌තෙ ආයස්‌මන්‌තෙ ආනන්‌දෙ භික්‌ඛූ ආමන්‌තෙසි – ‘‘සෙඛො, භික්‌ඛවෙ, ආනන්‌දො; න ච පනස්‌ස සුලභරූපො සමසමො පඤ්‌ඤායා’’ති. අට්‌ඨමං.
Atha kho āyasmā ānando ‘‘samanuñño me satthā’’ti, uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho bhagavā acirapakkante āyasmante ānande bhikkhū āmantesi – ‘‘sekho, bhikkhave, ānando; na ca panassa sulabharūpo samasamo paññāyā’’ti. Aṭṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 8. සීලබ්‌බතසුත්‌තවණ්‌ණනා • 8. Sīlabbatasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 8. සීලබ්‌බතසුත්‌තවණ්‌ණනා • 8. Sīlabbatasuttavaṇṇanā
