| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៨. សីលព្ពតសុត្តវណ្ណនា
8. Sīlabbatasuttavaṇṇanā
៧៩. អដ្ឋមេ សីលព្ពតន្តិ សីលញ្ចេវ វតញ្ច។ ជីវិតន្តិ ទុក្ករការិកានុយោគោ។ ព្រហ្មចរិយន្តិ ព្រហ្មចរិយវាសោ។ ឧបដ្ឋានសារន្តិ ឧបដ្ឋានេន សារំ , ‘‘ឥទំ វរំ ឥទំ និដ្ឋា’’តិ ឯវំ ឧបដ្ឋិតន្តិ អត្ថោ។ សផលន្តិ សឧទ្រយំ សវឌ្ឍិកំ ហោតីតិ បុច្ឆតិ។ ន ខ្វេត្ថ, ភន្តេ, ឯកំសេនាតិ, ភន្តេ, ន ខោ ឯត្ថ ឯកំសេន ព្យាកាតព្ពន្តិ អត្ថោ។ ឧបដ្ឋានសារំ សេវតោតិ ឥទំ សារំ វរំ និដ្ឋាតិ ឯវំ ឧបដ្ឋិតំ សេវមានស្ស។ អផលន្តិ ឥដ្ឋផលេន អផលំ។ ឯត្តាវតា កម្មវាទិកិរិយវាទីនំ បព្ពជ្ជំ ឋបេត្វា សេសោ សព្ពោបិ ពាហិរកសមយោ គហិតោ ហោតិ។ សផលន្តិ ឥដ្ឋផលេន សផលំ សឧទ្រយំ។ ឯត្តាវតា ឥមំ សាសនំ អាទិំ កត្វា សព្ពាបិ កម្មវាទិកិរិយវាទីនំ បព្ពជ្ជា គហិតា។ ន ច បនស្ស សុលភរូបោ សមសមោ បញ្ញាយាតិ ឯវំ សេក្ខភូមិយំ ឋត្វា បញ្ហំ កថេន្តោ អស្ស អានន្ទស្ស បញ្ញាយ សមសមោ ន សុលភោតិ ទស្សេតិ។ ឥមស្មិំ សុត្តេ សេក្ខភូមិ នាម កថិតាតិ។
79. Aṭṭhame sīlabbatanti sīlañceva vatañca. Jīvitanti dukkarakārikānuyogo. Brahmacariyanti brahmacariyavāso. Upaṭṭhānasāranti upaṭṭhānena sāraṃ , ‘‘idaṃ varaṃ idaṃ niṭṭhā’’ti evaṃ upaṭṭhitanti attho. Saphalanti saudrayaṃ savaḍḍhikaṃ hotīti pucchati. Na khvettha, bhante, ekaṃsenāti, bhante, na kho ettha ekaṃsena byākātabbanti attho. Upaṭṭhānasāraṃ sevatoti idaṃ sāraṃ varaṃ niṭṭhāti evaṃ upaṭṭhitaṃ sevamānassa. Aphalanti iṭṭhaphalena aphalaṃ. Ettāvatā kammavādikiriyavādīnaṃ pabbajjaṃ ṭhapetvā seso sabbopi bāhirakasamayo gahito hoti. Saphalanti iṭṭhaphalena saphalaṃ saudrayaṃ. Ettāvatā imaṃ sāsanaṃ ādiṃ katvā sabbāpi kammavādikiriyavādīnaṃ pabbajjā gahitā. Na ca panassa sulabharūpo samasamo paññāyāti evaṃ sekkhabhūmiyaṃ ṭhatvā pañhaṃ kathento assa ānandassa paññāya samasamo na sulabhoti dasseti. Imasmiṃ sutte sekkhabhūmi nāma kathitāti.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៨. សីលព្ពតសុត្តំ • 8. Sīlabbatasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៨. សីលព្ពតសុត្តវណ្ណនា • 8. Sīlabbatasuttavaṇṇanā
