| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၈. သီလဗ္ဗတသုတ္တဝဏ္ဏနာ
8. Sīlabbatasuttavaṇṇanā
၇၉. အဋ္ဌမေ သီလဗ္ဗတန္တိ သီလဉ္စေဝ ဝတဉ္စ။ ဇီဝိတန္တိ ဒုက္ကရကာရိကာနုယောဂော။ ဗ္ရဟ္မစရိယန္တိ ဗ္ရဟ္မစရိယဝာသော။ ဥပဋ္ဌာနသာရန္တိ ဥပဋ္ဌာနေန သာရံ , ‘‘ဣဒံ ဝရံ ဣဒံ နိဋ္ဌာ’’တိ ဧဝံ ဥပဋ္ဌိတန္တိ အတ္ထော။ သဖလန္တိ သဥဒ္ရယံ သဝဍ္ဎိကံ ဟောတီတိ ပုစ္ဆတိ။ န ခ္ဝေတ္ထ, ဘန္တေ, ဧကံသေနာတိ, ဘန္တေ, န ခော ဧတ္ထ ဧကံသေန ဗ္ယာကာတဗ္ဗန္တိ အတ္ထော။ ဥပဋ္ဌာနသာရံ သေဝတောတိ ဣဒံ သာရံ ဝရံ နိဋ္ဌာတိ ဧဝံ ဥပဋ္ဌိတံ သေဝမာနသ္သ။ အဖလန္တိ ဣဋ္ဌဖလေန အဖလံ။ ဧတ္တာဝတာ ကမ္မဝာဒိကိရိယဝာဒီနံ ပဗ္ဗဇ္ဇံ ဌပေတ္ဝာ သေသော သဗ္ဗောပိ ဗာဟိရကသမယော ဂဟိတော ဟောတိ။ သဖလန္တိ ဣဋ္ဌဖလေန သဖလံ သဥဒ္ရယံ။ ဧတ္တာဝတာ ဣမံ သာသနံ အာဒိံ ကတ္ဝာ သဗ္ဗာပိ ကမ္မဝာဒိကိရိယဝာဒီနံ ပဗ္ဗဇ္ဇာ ဂဟိတာ။ န စ ပနသ္သ သုလဘရူပော သမသမော ပညာယာတိ ဧဝံ သေက္ခဘူမိယံ ဌတ္ဝာ ပဉ္ဟံ ကထေန္တော အသ္သ အာနန္ဒသ္သ ပညာယ သမသမော န သုလဘောတိ ဒသ္သေတိ။ ဣမသ္မိံ သုတ္တေ သေက္ခဘူမိ နာမ ကထိတာတိ။
79. Aṭṭhame sīlabbatanti sīlañceva vatañca. Jīvitanti dukkarakārikānuyogo. Brahmacariyanti brahmacariyavāso. Upaṭṭhānasāranti upaṭṭhānena sāraṃ , ‘‘idaṃ varaṃ idaṃ niṭṭhā’’ti evaṃ upaṭṭhitanti attho. Saphalanti saudrayaṃ savaḍḍhikaṃ hotīti pucchati. Na khvettha, bhante, ekaṃsenāti, bhante, na kho ettha ekaṃsena byākātabbanti attho. Upaṭṭhānasāraṃ sevatoti idaṃ sāraṃ varaṃ niṭṭhāti evaṃ upaṭṭhitaṃ sevamānassa. Aphalanti iṭṭhaphalena aphalaṃ. Ettāvatā kammavādikiriyavādīnaṃ pabbajjaṃ ṭhapetvā seso sabbopi bāhirakasamayo gahito hoti. Saphalanti iṭṭhaphalena saphalaṃ saudrayaṃ. Ettāvatā imaṃ sāsanaṃ ādiṃ katvā sabbāpi kammavādikiriyavādīnaṃ pabbajjā gahitā. Na ca panassa sulabharūpo samasamo paññāyāti evaṃ sekkhabhūmiyaṃ ṭhatvā pañhaṃ kathento assa ānandassa paññāya samasamo na sulabhoti dasseti. Imasmiṃ sutte sekkhabhūmi nāma kathitāti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၈. သီလဗ္ဗတသုတ္တံ • 8. Sīlabbatasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၈. သီလဗ္ဗတသုတ္တဝဏ္ဏနာ • 8. Sīlabbatasuttavaṇṇanā
