| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
9. ஸீலலக்க²ணபஞ்ஹோ
9. Sīlalakkhaṇapañho
9. ராஜா ஆஹ ‘‘ப⁴ந்தே நாக³ஸேன, யங் பனேதங் ப்³ரூஸி ‘அஞ்ஞேஹி ச குஸலேஹி த⁴ம்மேஹீ’தி, கதமே தே குஸலா த⁴ம்மா’’தி? ‘‘ஸீலங், மஹாராஜ, ஸத்³தா⁴ வீரியங் ஸதி ஸமாதி⁴, இமே தே குஸலா த⁴ம்மா’’தி. ‘‘கிங்லக்க²ணங், ப⁴ந்தே, ஸீல’’ந்தி? ‘‘பதிட்டா²னலக்க²ணங், மஹாராஜ, ஸீலங் ஸப்³பே³ஸங் குஸலானங் த⁴ம்மானங், இந்த்³ரியப³லபொ³ஜ்ஜ²ங்க³மக்³க³ங்க³ஸதிபட்டா²னஸம்மப்பதா⁴னஇத்³தி⁴பாத³ஜா²னவிமொக்க²ஸ- மாதி⁴ஸமாபத்தீனங் ஸீலங் பதிட்ட²ங், ஸீலே பதிட்டி²தோ கோ², மஹாராஜ, யோகா³வசரோ ஸீலங் நிஸ்ஸாய ஸீலே பதிட்டா²ய பஞ்சிந்த்³ரியானி பா⁴வேதி ஸத்³தி⁴ந்த்³ரியங் வீரியிந்த்³ரியங் ஸதிந்த்³ரியங் ஸமாதி⁴ந்த்³ரியங் பஞ்ஞிந்த்³ரியந்தி, ஸப்³பே³ குஸலா த⁴ம்மா ந பரிஹாயந்தீ’’தி. ‘‘ஓபம்மங் கரோஹீ’’தி. ‘‘யதா², மஹாராஜ , யே கேசி பீ³ஜகா³மபூ⁴தகா³மா வுட்³டி⁴ங் விரூள்ஹிங் வேபுல்லங் ஆபஜ்ஜந்தி, ஸப்³பே³ தே பத²விங் நிஸ்ஸாய பத²வியங் பதிட்டா²ய வுட்³டி⁴ங் விரூள்ஹிங் வேபுல்லங் ஆபஜ்ஜந்தி. ஏவமேவ கோ², மஹாராஜ, யோகா³வசரோ ஸீலங் நிஸ்ஸாய ஸீலே பதிட்டா²ய பஞ்சிந்த்³ரியானி பா⁴வேதி ஸத்³தி⁴ந்த்³ரியங் வீரியிந்த்³ரியங் ஸதிந்த்³ரியங் ஸமாதி⁴ந்த்³ரியங் பஞ்ஞிந்த்³ரிய’’ந்தி.
9. Rājā āha ‘‘bhante nāgasena, yaṃ panetaṃ brūsi ‘aññehi ca kusalehi dhammehī’ti, katame te kusalā dhammā’’ti? ‘‘Sīlaṃ, mahārāja, saddhā vīriyaṃ sati samādhi, ime te kusalā dhammā’’ti. ‘‘Kiṃlakkhaṇaṃ, bhante, sīla’’nti? ‘‘Patiṭṭhānalakkhaṇaṃ, mahārāja, sīlaṃ sabbesaṃ kusalānaṃ dhammānaṃ, indriyabalabojjhaṅgamaggaṅgasatipaṭṭhānasammappadhānaiddhipādajhānavimokkhasa- mādhisamāpattīnaṃ sīlaṃ patiṭṭhaṃ, sīle patiṭṭhito kho, mahārāja, yogāvacaro sīlaṃ nissāya sīle patiṭṭhāya pañcindriyāni bhāveti saddhindriyaṃ vīriyindriyaṃ satindriyaṃ samādhindriyaṃ paññindriyanti, sabbe kusalā dhammā na parihāyantī’’ti. ‘‘Opammaṃ karohī’’ti. ‘‘Yathā, mahārāja , ye keci bījagāmabhūtagāmā vuḍḍhiṃ virūḷhiṃ vepullaṃ āpajjanti, sabbe te pathaviṃ nissāya pathaviyaṃ patiṭṭhāya vuḍḍhiṃ virūḷhiṃ vepullaṃ āpajjanti. Evameva kho, mahārāja, yogāvacaro sīlaṃ nissāya sīle patiṭṭhāya pañcindriyāni bhāveti saddhindriyaṃ vīriyindriyaṃ satindriyaṃ samādhindriyaṃ paññindriya’’nti.
‘‘பி⁴ய்யோ ஓபம்மங் கரோஹீ’’தி. ‘‘யதா², மஹாராஜ, யே கேசி ப³லகரணீயா கம்மந்தா கயிரந்தி, ஸப்³பே³ தே பத²விங் நிஸ்ஸாய பத²வியங் பதிட்டா²ய கயிரந்தி. ஏவமேவ கோ², மஹாராஜ, யோகா³வசரோ ஸீலங் நிஸ்ஸாய ஸீலே பதிட்டா²ய பஞ்சிந்த்³ரியானி பா⁴வேதி ஸத்³தி⁴ந்த்³ரியங் வீரியிந்த்³ரியங் ஸதிந்த்³ரியங் ஸமாதி⁴ந்த்³ரியங் பஞ்ஞிந்த்³ரிய’’ந்தி .
‘‘Bhiyyo opammaṃ karohī’’ti. ‘‘Yathā, mahārāja, ye keci balakaraṇīyā kammantā kayiranti, sabbe te pathaviṃ nissāya pathaviyaṃ patiṭṭhāya kayiranti. Evameva kho, mahārāja, yogāvacaro sīlaṃ nissāya sīle patiṭṭhāya pañcindriyāni bhāveti saddhindriyaṃ vīriyindriyaṃ satindriyaṃ samādhindriyaṃ paññindriya’’nti .
‘‘பி⁴ய்யோ ஓபம்மங் கரோஹீ’’தி. ‘‘யதா², மஹாராஜ, நக³ரவட்³ட⁴கீ நக³ரங் மாபேதுகாமோ பட²மங் நக³ரட்டா²னங் ஸோதா⁴பெத்வா கா²ணுகண்டகங் அபகட்³டா⁴பெத்வா பூ⁴மிங் ஸமங் காராபெத்வா ததோ அபரபா⁴கே³ வீதி²சதுக்கஸிங்கா⁴டகாதி³பரிச்சே²தே³ன விப⁴ஜித்வா நக³ரங் மாபேதி. ஏவமேவ கோ², மஹாராஜ, யோகா³வசரோ ஸீலங் நிஸ்ஸாய ஸீலே பதிட்டா²ய பஞ்சிந்த்³ரியானி பா⁴வேதி ஸத்³தி⁴ந்த்³ரியங் வீரியிந்த்³ரியங் ஸதிந்த்³ரியங் ஸமாதி⁴ந்த்³ரியங் பஞ்ஞிந்த்³ரிய’’ந்தி.
‘‘Bhiyyo opammaṃ karohī’’ti. ‘‘Yathā, mahārāja, nagaravaḍḍhakī nagaraṃ māpetukāmo paṭhamaṃ nagaraṭṭhānaṃ sodhāpetvā khāṇukaṇṭakaṃ apakaḍḍhāpetvā bhūmiṃ samaṃ kārāpetvā tato aparabhāge vīthicatukkasiṅghāṭakādiparicchedena vibhajitvā nagaraṃ māpeti. Evameva kho, mahārāja, yogāvacaro sīlaṃ nissāya sīle patiṭṭhāya pañcindriyāni bhāveti saddhindriyaṃ vīriyindriyaṃ satindriyaṃ samādhindriyaṃ paññindriya’’nti.
‘‘பி⁴ய்யோ ஓபம்மங் கரோஹீ’’தி. ‘‘யதா², மஹாராஜ, லங்க⁴கோ ஸிப்பங் த³ஸ்ஸேதுகாமோ பத²விங் க²ணாபெத்வா ஸக்க²ரகத²லங் அபகட்³டா⁴பெத்வா பூ⁴மிங் ஸமங் காராபெத்வா முது³காய பூ⁴மியா ஸிப்பங் த³ஸ்ஸேதி. ஏவமேவ கோ², மஹாராஜ, யோகா³வசரோ ஸீலங் நிஸ்ஸாய ஸீலே பதிட்டா²ய பஞ்சிந்த்³ரியானி பா⁴வேதி ஸத்³தி⁴ந்த்³ரியங் வீரியிந்த்³ரியங் ஸதிந்த்³ரியங் ஸமாதி⁴ந்த்³ரியங் பஞ்ஞிந்த்³ரியந்தி. பா⁴ஸிதம்பேதங், மஹாராஜ, ப⁴க³வதா –
‘‘Bhiyyo opammaṃ karohī’’ti. ‘‘Yathā, mahārāja, laṅghako sippaṃ dassetukāmo pathaviṃ khaṇāpetvā sakkharakathalaṃ apakaḍḍhāpetvā bhūmiṃ samaṃ kārāpetvā mudukāya bhūmiyā sippaṃ dasseti. Evameva kho, mahārāja, yogāvacaro sīlaṃ nissāya sīle patiṭṭhāya pañcindriyāni bhāveti saddhindriyaṃ vīriyindriyaṃ satindriyaṃ samādhindriyaṃ paññindriyanti. Bhāsitampetaṃ, mahārāja, bhagavatā –
‘‘‘ஸீலே பதிட்டா²ய நரோ ஸபஞ்ஞோ, சித்தங் பஞ்ஞஞ்ச பா⁴வயங்;
‘‘‘Sīle patiṭṭhāya naro sapañño, cittaṃ paññañca bhāvayaṃ;
‘‘‘அயங் பதிட்டா² த⁴ரணீவ பாணினங், இத³ஞ்ச மூலங் குஸலாபி⁴வுட்³டி⁴யா;
‘‘‘Ayaṃ patiṭṭhā dharaṇīva pāṇinaṃ, idañca mūlaṃ kusalābhivuḍḍhiyā;
முக²ஞ்சித³ங் ஸப்³ப³ஜினானுஸாஸனே, யோ ஸீலக்க²ந்தோ⁴ வரபாதிமொக்கி²யோ’’’தி.
Mukhañcidaṃ sabbajinānusāsane, yo sīlakkhandho varapātimokkhiyo’’’ti.
‘‘கல்லோஸி, ப⁴ந்தே நாக³ஸேனா’’தி.
‘‘Kallosi, bhante nāgasenā’’ti.
ஸீலலக்க²ணபஞ்ஹோ நவமோ.
Sīlalakkhaṇapañho navamo.
Footnotes:
