| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༩. སཱིལལཀྑཎཔཉྷོ
9. Sīlalakkhaṇapañho
༩. རཱཛཱ ཨཱཧ ‘‘བྷནྟེ ནཱགསེན, ཡཾ པནེཏཾ བྲཱུསི ‘ཨཉྙེཧི ཙ ཀུསལེཧི དྷམྨེཧཱི’ཏི, ཀཏམེ ཏེ ཀུསལཱ དྷམྨཱ’’ཏི? ‘‘སཱིལཾ, མཧཱརཱཛ, སདྡྷཱ ཝཱིརིཡཾ སཏི སམཱདྷི, ཨིམེ ཏེ ཀུསལཱ དྷམྨཱ’’ཏི། ‘‘ཀིཾལཀྑཎཾ, བྷནྟེ, སཱིལ’’ནྟི? ‘‘པཏིཊྛཱནལཀྑཎཾ, མཧཱརཱཛ, སཱིལཾ སབྦེསཾ ཀུསལཱནཾ དྷམྨཱནཾ, ཨིནྡྲིཡབལབོཛ྄ཛྷངྒམགྒངྒསཏིཔཊྛཱནསམྨཔྤདྷཱནཨིདྡྷིཔཱདཛྷཱནཝིམོཀྑས- མཱདྷིསམཱཔཏྟཱིནཾ སཱིལཾ པཏིཊྛཾ, སཱིལེ པཏིཊྛིཏོ ཁོ, མཧཱརཱཛ, ཡོགཱཝཙརོ སཱིལཾ ནིསྶཱཡ སཱིལེ པཏིཊྛཱཡ པཉྩིནྡྲིཡཱནི བྷཱཝེཏི སདྡྷིནྡྲིཡཾ ཝཱིརིཡིནྡྲིཡཾ སཏིནྡྲིཡཾ སམཱདྷིནྡྲིཡཾ པཉྙིནྡྲིཡནྟི, སབྦེ ཀུསལཱ དྷམྨཱ ན པརིཧཱཡནྟཱི’’ཏི། ‘‘ཨོཔམྨཾ ཀརོཧཱི’’ཏི། ‘‘ཡཐཱ, མཧཱརཱཛ , ཡེ ཀེཙི བཱིཛགཱམབྷཱུཏགཱམཱ ཝུཌྜྷིཾ ཝིརཱུལ༹ྷིཾ ཝེཔུལླཾ ཨཱཔཛྫནྟི, སབྦེ ཏེ པཐཝིཾ ནིསྶཱཡ པཐཝིཡཾ པཏིཊྛཱཡ ཝུཌྜྷིཾ ཝིརཱུལ༹ྷིཾ ཝེཔུལླཾ ཨཱཔཛྫནྟི། ཨེཝམེཝ ཁོ, མཧཱརཱཛ, ཡོགཱཝཙརོ སཱིལཾ ནིསྶཱཡ སཱིལེ པཏིཊྛཱཡ པཉྩིནྡྲིཡཱནི བྷཱཝེཏི སདྡྷིནྡྲིཡཾ ཝཱིརིཡིནྡྲིཡཾ སཏིནྡྲིཡཾ སམཱདྷིནྡྲིཡཾ པཉྙིནྡྲིཡ’’ནྟི།
9. Rājā āha ‘‘bhante nāgasena, yaṃ panetaṃ brūsi ‘aññehi ca kusalehi dhammehī’ti, katame te kusalā dhammā’’ti? ‘‘Sīlaṃ, mahārāja, saddhā vīriyaṃ sati samādhi, ime te kusalā dhammā’’ti. ‘‘Kiṃlakkhaṇaṃ, bhante, sīla’’nti? ‘‘Patiṭṭhānalakkhaṇaṃ, mahārāja, sīlaṃ sabbesaṃ kusalānaṃ dhammānaṃ, indriyabalabojjhaṅgamaggaṅgasatipaṭṭhānasammappadhānaiddhipādajhānavimokkhasa- mādhisamāpattīnaṃ sīlaṃ patiṭṭhaṃ, sīle patiṭṭhito kho, mahārāja, yogāvacaro sīlaṃ nissāya sīle patiṭṭhāya pañcindriyāni bhāveti saddhindriyaṃ vīriyindriyaṃ satindriyaṃ samādhindriyaṃ paññindriyanti, sabbe kusalā dhammā na parihāyantī’’ti. ‘‘Opammaṃ karohī’’ti. ‘‘Yathā, mahārāja , ye keci bījagāmabhūtagāmā vuḍḍhiṃ virūḷhiṃ vepullaṃ āpajjanti, sabbe te pathaviṃ nissāya pathaviyaṃ patiṭṭhāya vuḍḍhiṃ virūḷhiṃ vepullaṃ āpajjanti. Evameva kho, mahārāja, yogāvacaro sīlaṃ nissāya sīle patiṭṭhāya pañcindriyāni bhāveti saddhindriyaṃ vīriyindriyaṃ satindriyaṃ samādhindriyaṃ paññindriya’’nti.
‘‘བྷིཡྻོ ཨོཔམྨཾ ཀརོཧཱི’’ཏི། ‘‘ཡཐཱ, མཧཱརཱཛ, ཡེ ཀེཙི བལཀརཎཱིཡཱ ཀམྨནྟཱ ཀཡིརནྟི, སབྦེ ཏེ པཐཝིཾ ནིསྶཱཡ པཐཝིཡཾ པཏིཊྛཱཡ ཀཡིརནྟི། ཨེཝམེཝ ཁོ, མཧཱརཱཛ, ཡོགཱཝཙརོ སཱིལཾ ནིསྶཱཡ སཱིལེ པཏིཊྛཱཡ པཉྩིནྡྲིཡཱནི བྷཱཝེཏི སདྡྷིནྡྲིཡཾ ཝཱིརིཡིནྡྲིཡཾ སཏིནྡྲིཡཾ སམཱདྷིནྡྲིཡཾ པཉྙིནྡྲིཡ’’ནྟི །
‘‘Bhiyyo opammaṃ karohī’’ti. ‘‘Yathā, mahārāja, ye keci balakaraṇīyā kammantā kayiranti, sabbe te pathaviṃ nissāya pathaviyaṃ patiṭṭhāya kayiranti. Evameva kho, mahārāja, yogāvacaro sīlaṃ nissāya sīle patiṭṭhāya pañcindriyāni bhāveti saddhindriyaṃ vīriyindriyaṃ satindriyaṃ samādhindriyaṃ paññindriya’’nti .
‘‘བྷིཡྻོ ཨོཔམྨཾ ཀརོཧཱི’’ཏི། ‘‘ཡཐཱ, མཧཱརཱཛ, ནགརཝཌྜྷཀཱི ནགརཾ མཱཔེཏུཀཱམོ པཋམཾ ནགརཊྛཱནཾ སོདྷཱཔེཏྭཱ ཁཱཎུཀཎྚཀཾ ཨཔཀཌྜྷཱཔེཏྭཱ བྷཱུམིཾ སམཾ ཀཱརཱཔེཏྭཱ ཏཏོ ཨཔརབྷཱགེ ཝཱིཐིཙཏུཀྐསིངྒྷཱཊཀཱདིཔརིཙྪེདེན ཝིབྷཛིཏྭཱ ནགརཾ མཱཔེཏི། ཨེཝམེཝ ཁོ, མཧཱརཱཛ, ཡོགཱཝཙརོ སཱིལཾ ནིསྶཱཡ སཱིལེ པཏིཊྛཱཡ པཉྩིནྡྲིཡཱནི བྷཱཝེཏི སདྡྷིནྡྲིཡཾ ཝཱིརིཡིནྡྲིཡཾ སཏིནྡྲིཡཾ སམཱདྷིནྡྲིཡཾ པཉྙིནྡྲིཡ’’ནྟི།
‘‘Bhiyyo opammaṃ karohī’’ti. ‘‘Yathā, mahārāja, nagaravaḍḍhakī nagaraṃ māpetukāmo paṭhamaṃ nagaraṭṭhānaṃ sodhāpetvā khāṇukaṇṭakaṃ apakaḍḍhāpetvā bhūmiṃ samaṃ kārāpetvā tato aparabhāge vīthicatukkasiṅghāṭakādiparicchedena vibhajitvā nagaraṃ māpeti. Evameva kho, mahārāja, yogāvacaro sīlaṃ nissāya sīle patiṭṭhāya pañcindriyāni bhāveti saddhindriyaṃ vīriyindriyaṃ satindriyaṃ samādhindriyaṃ paññindriya’’nti.
‘‘བྷིཡྻོ ཨོཔམྨཾ ཀརོཧཱི’’ཏི། ‘‘ཡཐཱ, མཧཱརཱཛ, ལངྒྷཀོ སིཔྤཾ དསྶེཏུཀཱམོ པཐཝིཾ ཁཎཱཔེཏྭཱ སཀྑརཀཐལཾ ཨཔཀཌྜྷཱཔེཏྭཱ བྷཱུམིཾ སམཾ ཀཱརཱཔེཏྭཱ མུདུཀཱཡ བྷཱུམིཡཱ སིཔྤཾ དསྶེཏི། ཨེཝམེཝ ཁོ, མཧཱརཱཛ, ཡོགཱཝཙརོ སཱིལཾ ནིསྶཱཡ སཱིལེ པཏིཊྛཱཡ པཉྩིནྡྲིཡཱནི བྷཱཝེཏི སདྡྷིནྡྲིཡཾ ཝཱིརིཡིནྡྲིཡཾ སཏིནྡྲིཡཾ སམཱདྷིནྡྲིཡཾ པཉྙིནྡྲིཡནྟི། བྷཱསིཏམྤེཏཾ, མཧཱརཱཛ, བྷགཝཏཱ –
‘‘Bhiyyo opammaṃ karohī’’ti. ‘‘Yathā, mahārāja, laṅghako sippaṃ dassetukāmo pathaviṃ khaṇāpetvā sakkharakathalaṃ apakaḍḍhāpetvā bhūmiṃ samaṃ kārāpetvā mudukāya bhūmiyā sippaṃ dasseti. Evameva kho, mahārāja, yogāvacaro sīlaṃ nissāya sīle patiṭṭhāya pañcindriyāni bhāveti saddhindriyaṃ vīriyindriyaṃ satindriyaṃ samādhindriyaṃ paññindriyanti. Bhāsitampetaṃ, mahārāja, bhagavatā –
‘‘‘སཱིལེ པཏིཊྛཱཡ ནརོ སཔཉྙོ, ཙིཏྟཾ པཉྙཉྩ བྷཱཝཡཾ།
‘‘‘Sīle patiṭṭhāya naro sapañño, cittaṃ paññañca bhāvayaṃ;
‘‘‘ཨཡཾ པཏིཊྛཱ དྷརཎཱིཝ པཱཎིནཾ, ཨིདཉྩ མཱུལཾ ཀུསལཱབྷིཝུཌྜྷིཡཱ།
‘‘‘Ayaṃ patiṭṭhā dharaṇīva pāṇinaṃ, idañca mūlaṃ kusalābhivuḍḍhiyā;
མུཁཉྩིདཾ སབྦཛིནཱནུསཱསནེ, ཡོ སཱིལཀྑནྡྷོ ཝརཔཱཏིམོཀྑིཡོ’’’ཏི༎
Mukhañcidaṃ sabbajinānusāsane, yo sīlakkhandho varapātimokkhiyo’’’ti.
‘‘ཀལློསི, བྷནྟེ ནཱགསེནཱ’’ཏི།
‘‘Kallosi, bhante nāgasenā’’ti.
སཱིལལཀྑཎཔཉྷོ ནཝམོ།
Sīlalakkhaṇapañho navamo.
Footnotes:
