Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā

    2. ஸீலமயஞாணனித்³தே³ஸவண்ணனா

    2. Sīlamayañāṇaniddesavaṇṇanā

    37. ஸீலமயஞாணனித்³தே³ஸே பஞ்சாதி க³ணனபரிச்சே²தோ³. ஸீலானீதி பரிச்சி²ன்னத⁴ம்மனித³ஸ்ஸனங். பரியந்தபாரிஸுத்³தி⁴ஸீலந்திஆதி³ பஞ்சன்னங் ஸரூபதோ த³ஸ்ஸனங். பரியந்தபாரிஸுத்³தீ⁴திஆதீ³ஸு யதா² நீலவண்ணயோக³தோ வத்த²ம்பி நீலமஸ்ஸ அத்தீ²தி நீலந்தி வுச்சதி, ஏவங் க³ணனவஸேன பரியந்தோ பரிச்சே²தோ³ அஸ்ஸா அத்தீ²தி பரியந்தா, உபஸம்பன்னஸீலே பத்தோ அனுபஸம்பன்னஸீலஸ்ஸ அவஸானஸப்³பா⁴வதோ வா பரியந்தோ அவஸானங் அஸ்ஸா அத்தீ²தி பரியந்தா. ஸபரியந்தாதி வா வத்தப்³பே³ ஸகாரலோபோ கதோதி வேதி³தப்³போ³ ‘‘த³கங் த³காஸயா பவிஸந்தீ’’தி (ஸங்॰ நி॰ 3.78; அ॰ நி॰ 4.33) எத்த² உகாரலோபோ விய. பரிஸுத்³த⁴பா⁴வோ பாரிஸுத்³தி⁴, பரியந்தா ச ஸா பாரிஸுத்³தி⁴ சாதி பரியந்தபாரிஸுத்³தி⁴, பரியந்தபாரிஸுத்³தி⁴ஸங்கா²தங் ஸீலங் பரியந்தபாரிஸுத்³தி⁴ஸீலங். வுத்தபடிபக்கே²ன ந பரியந்தாதி அபரியந்தா, நத்தி² ஏதிஸ்ஸா பரியந்தோதிபி அபரியந்தா, வுத்³தோ⁴ ஏதிஸ்ஸா பரியந்தோதிபி அபரியந்தா. ஸமாதா³னதோ பபு⁴தி அக²ண்டி³தத்தா க²ண்டி³தாபி கதபடிகம்மத்தா சித்துப்பாத³மத்தகேனாபி மலேன விரஹிதத்தா ச பரிஸுத்³த⁴ஜாதிமணி விய ஸுத⁴ந்தஸுபரிகம்மகதஸுவண்ணங் விய ச பரிஸுத்³த⁴த்தா அரியமக்³க³ஸ்ஸ பத³ட்டா²னபூ⁴தா அனூனட்டே²ன பரிபூண்ணா. தி³ட்டி²யா பஹீனத்தா தி³ட்டி²பராமாஸேன அக்³க³ஹிதத்தா அபராமட்டா².அயங் தே ஸீலே தோ³ஸோதி கேனசி சோத³கேன பராமஸிதுங் அஸக்குணெய்யத்தா வா அபராமட்டா². அரஹத்தப²லக்க²ணே ஸப்³ப³த³ரத²படிப்பஸ்ஸத்³தி⁴யா படிப்பஸ்ஸத்³தி⁴. அனுபஸம்பன்னானந்தி அனவஸேஸஸமாதா³னவஸேன ஸீலஸம்பதா³ய பு⁴ஸங் ஸம்பன்னாதி உபஸம்பன்னா, ந உபஸம்பன்னா அனுபஸம்பன்னா. தேஸங் அனுபஸம்பன்னானங்.

    37. Sīlamayañāṇaniddese pañcāti gaṇanaparicchedo. Sīlānīti paricchinnadhammanidassanaṃ. Pariyantapārisuddhisīlantiādi pañcannaṃ sarūpato dassanaṃ. Pariyantapārisuddhītiādīsu yathā nīlavaṇṇayogato vatthampi nīlamassa atthīti nīlanti vuccati, evaṃ gaṇanavasena pariyanto paricchedo assā atthīti pariyantā, upasampannasīle patto anupasampannasīlassa avasānasabbhāvato vā pariyanto avasānaṃ assā atthīti pariyantā. Sapariyantāti vā vattabbe sakāralopo katoti veditabbo ‘‘dakaṃ dakāsayā pavisantī’’ti (saṃ. ni. 3.78; a. ni. 4.33) ettha ukāralopo viya. Parisuddhabhāvo pārisuddhi, pariyantā ca sā pārisuddhi cāti pariyantapārisuddhi, pariyantapārisuddhisaṅkhātaṃ sīlaṃ pariyantapārisuddhisīlaṃ. Vuttapaṭipakkhena na pariyantāti apariyantā, natthi etissā pariyantotipi apariyantā, vuddho etissā pariyantotipi apariyantā. Samādānato pabhuti akhaṇḍitattā khaṇḍitāpi katapaṭikammattā cittuppādamattakenāpi malena virahitattā ca parisuddhajātimaṇi viya sudhantasuparikammakatasuvaṇṇaṃ viya ca parisuddhattā ariyamaggassa padaṭṭhānabhūtā anūnaṭṭhena paripūṇṇā. Diṭṭhiyā pahīnattā diṭṭhiparāmāsena aggahitattā aparāmaṭṭhā.Ayaṃ te sīle dosoti kenaci codakena parāmasituṃ asakkuṇeyyattā vā aparāmaṭṭhā. Arahattaphalakkhaṇe sabbadarathapaṭippassaddhiyā paṭippassaddhi. Anupasampannānanti anavasesasamādānavasena sīlasampadāya bhusaṃ sampannāti upasampannā, na upasampannā anupasampannā. Tesaṃ anupasampannānaṃ.

    பரியந்தஸிக்கா²பதா³னந்தி எத்த² ஸிக்கி²தப்³ப³ட்டே²ன ஸிக்கா², கொட்டா²ஸட்டே²ன பதா³னி, ஸிக்கி²தப்³ப³கொட்டா²ஸானீதி அத்தோ². அபிச ஸீலே பதிட்டி²தேன உபரிபத்தப்³ப³த்தா ஸப்³பே³ குஸலா த⁴ம்மா ஸிக்கா², ஸீலானி தாஸங் ஸிக்கா²னங் பதிட்ட²ட்டே²ன பதா³னீதி ஸிக்கா²னங் பத³த்தா ஸிக்கா²பதா³னி , பரியந்தானி ஸிக்கா²பதா³னி ஏதேஸந்தி பரியந்தஸிக்கா²பதா³. தேஸங் பரியந்தஸிக்கா²பதா³னங். எத்த² ச த்³வே பரியந்தா ஸிக்கா²பத³பரியந்தோ ச காலபரியந்தோ ச. கதமோ ஸிக்கா²பத³பரியந்தோ? உபாஸகோபாஸிகானங் யதா²ஸமாதா³னவஸேன ஏகங் வா த்³வே வா தீணி வா சத்தாரி வா பஞ்ச வா அட்ட² வா த³ஸ வா ஸிக்கா²பதா³னி ஹொந்தி, ஸிக்க²மானஸாமணேரஸாமணேரீனங் த³ஸ ஸிக்கா²பதா³னி. அயங் ஸிக்கா²பத³பரியந்தோ. கதமோ காலபரியந்தோ? உபாஸகோபாஸிகா தா³னங் த³த³மானா பரிவேஸனபரியந்தங் ஸீலங் ஸமாதி³யந்தி, விஹாரக³தா விஹாரபரியந்தங் ஸீலங் ஸமாதி³யந்தி, ஏகங் வா த்³வே வா தயோ வா பி⁴ய்யோ வா ரத்திந்தி³வானி பரிச்சே²த³ங் கத்வா ஸீலங் ஸமாதி³யந்தி. அயங் காலபரியந்தோ. இமேஸு த்³வீஸு பரியந்தேஸு ஸிக்கா²பத³ங் பரியந்தங் கத்வா ஸமாதி³ன்னங் ஸீலங் வீதிக்கமனேன வா மரணேன வா படிப்பஸ்ஸம்ப⁴தி, காலங் பரியந்தங் கத்வா ஸமாதி³ன்னங் தங்தங்காலாதிக்கமேன படிப்பஸ்ஸம்ப⁴தி.

    Pariyantasikkhāpadānanti ettha sikkhitabbaṭṭhena sikkhā, koṭṭhāsaṭṭhena padāni, sikkhitabbakoṭṭhāsānīti attho. Apica sīle patiṭṭhitena uparipattabbattā sabbe kusalā dhammā sikkhā, sīlāni tāsaṃ sikkhānaṃ patiṭṭhaṭṭhena padānīti sikkhānaṃ padattā sikkhāpadāni , pariyantāni sikkhāpadāni etesanti pariyantasikkhāpadā. Tesaṃ pariyantasikkhāpadānaṃ. Ettha ca dve pariyantā sikkhāpadapariyanto ca kālapariyanto ca. Katamo sikkhāpadapariyanto? Upāsakopāsikānaṃ yathāsamādānavasena ekaṃ vā dve vā tīṇi vā cattāri vā pañca vā aṭṭha vā dasa vā sikkhāpadāni honti, sikkhamānasāmaṇerasāmaṇerīnaṃ dasa sikkhāpadāni. Ayaṃ sikkhāpadapariyanto. Katamo kālapariyanto? Upāsakopāsikā dānaṃ dadamānā parivesanapariyantaṃ sīlaṃ samādiyanti, vihāragatā vihārapariyantaṃ sīlaṃ samādiyanti, ekaṃ vā dve vā tayo vā bhiyyo vā rattindivāni paricchedaṃ katvā sīlaṃ samādiyanti. Ayaṃ kālapariyanto. Imesu dvīsu pariyantesu sikkhāpadaṃ pariyantaṃ katvā samādinnaṃ sīlaṃ vītikkamanena vā maraṇena vā paṭippassambhati, kālaṃ pariyantaṃ katvā samādinnaṃ taṃtaṃkālātikkamena paṭippassambhati.

    அபரியந்தஸிக்கா²பதா³னந்தி –

    Apariyantasikkhāpadānanti –

    ‘‘நவ கோடிஸஹஸ்ஸானி, அஸீதி ஸதகோடியோ;

    ‘‘Nava koṭisahassāni, asīti satakoṭiyo;

    பஞ்ஞாஸ ஸதஸஹஸ்ஸானி, ச²த்திங்ஸ ச புனாபரே.

    Paññāsa satasahassāni, chattiṃsa ca punāpare.

    ‘‘ஏதே ஸங்வரவினயா, ஸம்பு³த்³தே⁴ன பகாஸிதா;

    ‘‘Ete saṃvaravinayā, sambuddhena pakāsitā;

    பெய்யாலமுகே²ன நித்³தி³ட்டா², ஸிக்கா² வினயஸங்வரே’’தி. –

    Peyyālamukhena niddiṭṭhā, sikkhā vinayasaṃvare’’ti. –

    ஏவங் க³ணனவஸேன பரியந்தானம்பி ஸிக்கா²பதா³னங் அனவஸேஸஸமாதா³னபா⁴வவஸேன லாப⁴யஸஞாதிஅங்க³ஜீவிதஹேது அதி³ட்ட²பரியந்தபா⁴வவஸேன உபரி ரக்கி²தப்³ப³ஸீலபரிச்சே²தா³பா⁴வவஸேன ச நத்தி² ஏதேஸங் பரியந்தோதி அபரியந்தானி. அபரியந்தானி ஸிக்கா²பதா³னி ஏதேஸந்தி அபரியந்தஸிக்கா²பதா³. தேஸங் அபரியந்தஸிக்கா²பதா³னங், வுத்³த⁴பரியந்தஸிக்கா²பதா³னந்தி வா அத்தோ².

    Evaṃ gaṇanavasena pariyantānampi sikkhāpadānaṃ anavasesasamādānabhāvavasena lābhayasañātiaṅgajīvitahetu adiṭṭhapariyantabhāvavasena upari rakkhitabbasīlaparicchedābhāvavasena ca natthi etesaṃ pariyantoti apariyantāni. Apariyantāni sikkhāpadāni etesanti apariyantasikkhāpadā. Tesaṃ apariyantasikkhāpadānaṃ, vuddhapariyantasikkhāpadānanti vā attho.

    புது²ஜ்ஜனகல்யாணகானந்திஆதீ³ஸு –

    Puthujjanakalyāṇakānantiādīsu –

    ‘‘புதூ²னங் ஜனநாதீ³ஹி, காரணேஹி புது²ஜ்ஜனோ;

    ‘‘Puthūnaṃ jananādīhi, kāraṇehi puthujjano;

    புது²ஜ்ஜனந்தோக³த⁴த்தா, புது²வாயங் ஜனோ இதி’’. –

    Puthujjanantogadhattā, puthuvāyaṃ jano iti’’. –

    வுத்தபுது²ஜ்ஜனலக்க²ணானதிக்கமேபி –

    Vuttaputhujjanalakkhaṇānatikkamepi –

    ‘‘து³வே புது²ஜ்ஜனா வுத்தா, பு³த்³தே⁴னாதி³ச்சப³ந்து⁴னா;

    ‘‘Duve puthujjanā vuttā, buddhenādiccabandhunā;

    அந்தோ⁴ புது²ஜ்ஜனோ ஏகோ, கல்யாணேகோ புது²ஜ்ஜனோ’’தி. –

    Andho puthujjano eko, kalyāṇeko puthujjano’’ti. –

    வுத்தபுது²ஜ்ஜனத்³வயே கல்யாணத⁴ம்மஸமாக³மேன அந்த⁴புது²ஜ்ஜனபா⁴வங் அதிக்கம்ம கல்யாணபுது²ஜ்ஜனபா⁴வே டி²தானங் புது²ஜ்ஜனகல்யாணகானங் கல்யாணபுது²ஜ்ஜனானந்தி வுத்தங் ஹோதி. புது²ஜ்ஜனேஸு வா கல்யாணகானங் புது²ஜ்ஜனகல்யாணகானங்.

    Vuttaputhujjanadvaye kalyāṇadhammasamāgamena andhaputhujjanabhāvaṃ atikkamma kalyāṇaputhujjanabhāve ṭhitānaṃ puthujjanakalyāṇakānaṃ kalyāṇaputhujjanānanti vuttaṃ hoti. Puthujjanesu vā kalyāṇakānaṃ puthujjanakalyāṇakānaṃ.

    குஸலத⁴ம்மே யுத்தானந்தி எத்த² குஸலஸத்³தோ³ தாவ ஆரொக்³யானவஜ்ஜசே²கஸுக²விபாகேஸு தி³ஸ்ஸதி. அயஞ்ஹி ‘‘கச்சி நு போ⁴தோ குஸலங், கச்சி போ⁴தோ அனாமய’’ந்திஆதீ³ஸு (ஜா॰ 1.15.146; 2.20.129) ஆரொக்³யே தி³ஸ்ஸதி. ‘‘கதமோ பன, ப⁴ந்தே, காயஸமாசாரோ குஸலோ? யோ கோ², மஹாராஜ, காயஸமாசாரோ அனவஜ்ஜோ’’தி (ம॰ நி॰ 2.361) ச ‘‘புன சபரங், ப⁴ந்தே, ஏததா³னுத்தரியங் யதா² ப⁴க³வா த⁴ம்மங் தே³ஸேதி குஸலேஸு த⁴ம்மேஸூ’’தி ச (தீ³॰ நி॰ 3.145) ஏவமாதீ³ஸு அனவஜ்ஜே. ‘‘குஸலோ த்வங் ரத²ஸ்ஸ அங்க³பச்சங்கா³னங் (ம॰ நி॰ 2.87), குஸலா நச்சகீ³தஸ்ஸ ஸிக்கி²தா சாதுரித்தி²யோ’’திஆதீ³ஸு (ஜா॰ 2.22.94) சே²கே. ‘‘குஸலானங், பி⁴க்க²வே, த⁴ம்மானங் ஸமாதா³னஹேது (தீ³॰ நி॰ 3.80). குஸலஸ்ஸ கம்மஸ்ஸ கதத்தா உபசிதத்தா’’திஆதீ³ஸு (த⁴॰ ஸ॰ 431) ஸுக²விபாகே. ஸ்வாயமித⁴ ஆரொக்³யேபி அனவஜ்ஜேபி ஸுக²விபாகேபி வட்டதி.

    Kusaladhamme yuttānanti ettha kusalasaddo tāva ārogyānavajjachekasukhavipākesu dissati. Ayañhi ‘‘kacci nu bhoto kusalaṃ, kacci bhoto anāmaya’’ntiādīsu (jā. 1.15.146; 2.20.129) ārogye dissati. ‘‘Katamo pana, bhante, kāyasamācāro kusalo? Yo kho, mahārāja, kāyasamācāro anavajjo’’ti (ma. ni. 2.361) ca ‘‘puna caparaṃ, bhante, etadānuttariyaṃ yathā bhagavā dhammaṃ deseti kusalesu dhammesū’’ti ca (dī. ni. 3.145) evamādīsu anavajje. ‘‘Kusalo tvaṃ rathassa aṅgapaccaṅgānaṃ (ma. ni. 2.87), kusalā naccagītassa sikkhitā cāturitthiyo’’tiādīsu (jā. 2.22.94) cheke. ‘‘Kusalānaṃ, bhikkhave, dhammānaṃ samādānahetu (dī. ni. 3.80). Kusalassa kammassa katattā upacitattā’’tiādīsu (dha. sa. 431) sukhavipāke. Svāyamidha ārogyepi anavajjepi sukhavipākepi vaṭṭati.

    வசனத்தோ² பனெத்த² குச்சி²தே பாபகே த⁴ம்மே ஸலயந்தி சலயந்தி கம்பெந்தி வித்³த⁴ங்ஸெந்தீதி குஸலா. குச்சி²தேன வா ஆகாரேன ஸயந்தி பவத்தந்தீதி குஸா, தே குஸே லுனந்தி சி²ந்த³ந்தீதி குஸலா. குச்சி²தானங் வா ஸானதோ தனுகரணதோ குஸங் ஞாணங். தேன குஸேன லாதப்³பா³ க³ஹேதப்³பா³ பவத்தேதப்³பா³தி குஸலா, யதா² வா குஸா உப⁴யபா⁴க³க³தங் ஹத்த²ப்பதே³ஸங் லுனந்தி, ஏவமிமேபி உப்பன்னானுப்பன்னபா⁴வேன உப⁴யபா⁴க³க³தங் ஸங்கிலேஸபக்க²ங் லுனந்தி, தஸ்மா குஸா விய லுனந்தீதி குஸலா. அபிச ஆரொக்³யட்டே²ன அனவஜ்ஜட்டே²ன கோஸல்லஸம்பூ⁴தட்டே²ன வா குஸலா. இத⁴ பன யஸ்மா விபஸ்ஸனாகுஸலமேவ அதி⁴ப்பேதங், தஸ்மா ஸேஸே விஹாய தஸ்ஸேவ த³ஸ்ஸனத்த²ங் ‘‘குஸலத⁴ம்மே’’தி ஏகவசனங் கதந்தி வேதி³தப்³ப³ங். விபஸ்ஸனாகுஸலத⁴ம்மே ஸாதச்சகிரியதாய ஸக்கச்சகாரிதாய ச யுத்தானந்தி அத்தோ².

    Vacanattho panettha kucchite pāpake dhamme salayanti calayanti kampenti viddhaṃsentīti kusalā. Kucchitena vā ākārena sayanti pavattantīti kusā, te kuse lunanti chindantīti kusalā. Kucchitānaṃ vā sānato tanukaraṇato kusaṃ ñāṇaṃ. Tena kusena lātabbā gahetabbā pavattetabbāti kusalā, yathā vā kusā ubhayabhāgagataṃ hatthappadesaṃ lunanti, evamimepi uppannānuppannabhāvena ubhayabhāgagataṃ saṃkilesapakkhaṃ lunanti, tasmā kusā viya lunantīti kusalā. Apica ārogyaṭṭhena anavajjaṭṭhena kosallasambhūtaṭṭhena vā kusalā. Idha pana yasmā vipassanākusalameva adhippetaṃ, tasmā sese vihāya tasseva dassanatthaṃ ‘‘kusaladhamme’’ti ekavacanaṃ katanti veditabbaṃ. Vipassanākusaladhamme sātaccakiriyatāya sakkaccakāritāya ca yuttānanti attho.

    ஸெக்க²பரியந்தே பரிபூரகாரீனந்தி எத்த² தீஸு ஸிக்கா²ஸு ஜாதாதிபி ஸெக்கா², ஸத்தன்னங் ஸெக்கா²னங் ஏதேதிபி ஸெக்கா², ஸயமேவ ஸிக்க²ந்தீதிபி ஸெக்கா² . ஸோதாபத்திமக்³க³ப²லஸகதா³கா³மிமக்³க³ப²லஅனாகா³மிமக்³க³ப²லஅரஹத்தமக்³க³த⁴ம்மா . தே ஸெக்கா² த⁴ம்மா பரியந்தே அவஸானே ஏதஸ்ஸ, தே வா ஸெக்கா² த⁴ம்மா பரியந்தோ பரிச்சே²தோ³ ஏதஸ்ஸாதி ஸெக்க²பரியந்தோ. தஸ்மிங் ஸெக்க²பரியந்தே த⁴ம்மேதி ஸம்ப³ந்தோ⁴. பரிபூரங் பரிபுண்ணதங் கரொந்தீதி பரிபூரகாரினோ, பரிபூரகாரோ பரிபூரகிரியா ஏதேஸங் அத்தீ²தி வா பரிபூரகாரினோ. தேஸங் ஸோதாபத்திமக்³க³ஸ்ஸ புப்³ப³பா⁴க³பூ⁴தே ஸெக்க²பரியந்தே படிபதா³த⁴ம்மே விபஸ்ஸனாபாரிபூரியா பரிபூரகாரீனங். காயே ச ஜீவிதே ச அனபெக்கா²னந்தி எத்த² காயேதி ஸரீரே. ஸரீரஞ்ஹி அஸுசிஸஞ்சயதோ குச்சி²தானஞ்ச கேஸாதீ³னங் சக்கு²ரோகா³தீ³னஞ்ச ரோக³ஸதானங் ஆயபூ⁴தத்தா காயோதி வுச்சதி. ஜீவிதேதி ஜீவிதிந்த்³ரியே. தஞ்ஹி ஜீவந்தி தேனாதி ஜீவிதந்தி வுச்சதி. நத்தி² ஏதேஸங் அபெக்கா²தி அனபெக்கா², நிஸ்ஸினேஹாதி அத்தோ². தேஸங் தஸ்மிங் காயே ச ஜீவிதே ச அனபெக்கா²னங்.

    Sekkhapariyante paripūrakārīnanti ettha tīsu sikkhāsu jātātipi sekkhā, sattannaṃ sekkhānaṃ etetipi sekkhā, sayameva sikkhantītipi sekkhā . Sotāpattimaggaphalasakadāgāmimaggaphalaanāgāmimaggaphalaarahattamaggadhammā . Te sekkhā dhammā pariyante avasāne etassa, te vā sekkhā dhammā pariyanto paricchedo etassāti sekkhapariyanto. Tasmiṃ sekkhapariyante dhammeti sambandho. Paripūraṃ paripuṇṇataṃ karontīti paripūrakārino, paripūrakāro paripūrakiriyā etesaṃ atthīti vā paripūrakārino. Tesaṃ sotāpattimaggassa pubbabhāgabhūte sekkhapariyante paṭipadādhamme vipassanāpāripūriyā paripūrakārīnaṃ. Kāye ca jīvite ca anapekkhānanti ettha kāyeti sarīre. Sarīrañhi asucisañcayato kucchitānañca kesādīnaṃ cakkhurogādīnañca rogasatānaṃ āyabhūtattā kāyoti vuccati. Jīviteti jīvitindriye. Tañhi jīvanti tenāti jīvitanti vuccati. Natthi etesaṃ apekkhāti anapekkhā, nissinehāti attho. Tesaṃ tasmiṃ kāye ca jīvite ca anapekkhānaṃ.

    இதா³னி தேஸங் தேஸு அனபெக்க²த்தஸ்ஸ காரணங் த³ஸ்ஸெந்தோ பரிச்சத்தஜீவிதானந்தி ஆஹ. ப⁴க³வதோ ஆசரியஸ்ஸ வா ஸகஜீவிதபரிச்சாகே³னேவ ஹி தே கிலமமானேபி காயே வினஸ்ஸமானேபி ஜீவிதே அனபெக்கா² ஹொந்தீதி. ஸத்தன்னங் ஸெக்கா²னந்தி ஸிக்க²ந்தீதி ஸெக்கா²தி லத்³த⁴னாமானங் ஸோதாபத்திமக்³க³ட்டா²தீ³னங் ஸத்தன்னங் அரியபுக்³க³லானங். ததா²க³தஸாவகானந்தி ததா²க³தஸ்ஸ ஸாவகானங். அட்ட²பி ஹி அரியபுக்³க³லா ஸவனந்தே அரியாய ஜாதியா ஜாதத்தா ப⁴க³வதோ தே³ஸனங் அனுஸிட்டி²ங் அவேச்சப்பஸாத³யோகே³ன ஸக்கச்சங் ஸுணந்தீதி ஸாவகா. தேஸுபி அரஹத்தப²லட்டே²யேவ விஸேஸெத்வா த³ஸ்ஸெந்தோ கீ²ணாஸவானந்தி ஆஹ, அரஹத்தமக்³க³ஞாணேன பரிக்கீ²ணஸப்³பா³ஸவானந்தி அத்தோ². பச்சேகபு³த்³தா⁴னந்தி தங் தங் காரணங் படிச்ச ஏகோவ அனாசரியகோ சதுஸச்சங் பு³ஜ்ஜி²தவாதி பச்சேகபு³த்³தோ⁴. தாதி³ஸானங் பச்சேகபு³த்³தா⁴னங்.

    Idāni tesaṃ tesu anapekkhattassa kāraṇaṃ dassento pariccattajīvitānanti āha. Bhagavato ācariyassa vā sakajīvitapariccāgeneva hi te kilamamānepi kāye vinassamānepi jīvite anapekkhā hontīti. Sattannaṃ sekkhānanti sikkhantīti sekkhāti laddhanāmānaṃ sotāpattimaggaṭṭhādīnaṃ sattannaṃ ariyapuggalānaṃ. Tathāgatasāvakānanti tathāgatassa sāvakānaṃ. Aṭṭhapi hi ariyapuggalā savanante ariyāya jātiyā jātattā bhagavato desanaṃ anusiṭṭhiṃ aveccappasādayogena sakkaccaṃ suṇantīti sāvakā. Tesupi arahattaphalaṭṭheyeva visesetvā dassento khīṇāsavānanti āha, arahattamaggañāṇena parikkhīṇasabbāsavānanti attho. Paccekabuddhānanti taṃ taṃ kāraṇaṃ paṭicca ekova anācariyako catusaccaṃ bujjhitavāti paccekabuddho. Tādisānaṃ paccekabuddhānaṃ.

    ததா²க³தானந்தி எத்த² அட்ட²ஹி காரணேஹி ப⁴க³வா ததா²க³தோ – ததா² ஆக³தோதி ததா²க³தோ, ததா² க³தோதி ததா²க³தோ, தத²லக்க²ணங் ஆக³தோதி ததா²க³தோ, தத²த⁴ம்மே யாதா²வதோ அபி⁴ஸம்பு³த்³தோ⁴தி ததா²க³தோ, தத²த³ஸ்ஸிதாய ததா²க³தோ, தத²வாதி³தாய ததா²க³தோ, ததா² காரிதாய ததா²க³தோ, அபி⁴ப⁴வனட்டே²ன ததா²க³தோ.

    Tathāgatānanti ettha aṭṭhahi kāraṇehi bhagavā tathāgato – tathā āgatoti tathāgato, tathā gatoti tathāgato, tathalakkhaṇaṃ āgatoti tathāgato, tathadhamme yāthāvato abhisambuddhoti tathāgato, tathadassitāya tathāgato, tathavāditāya tathāgato, tathā kāritāya tathāgato, abhibhavanaṭṭhena tathāgato.

    கத²ங் ப⁴க³வா ததா² ஆக³தோதி ததா²க³தோ? யதா² ஸப்³ப³லோகஹிதாய உஸ்ஸுக்கமாபன்னா புரிமகா ஸம்மாஸம்பு³த்³தா⁴ ஆக³தா. கிங் வுத்தங் ஹோதி? யேனாபி⁴னீஹாரேன புரிமகா ப⁴க³வந்தோ ஆக³தா, தேனேவ அம்ஹாகம்பி ப⁴க³வா ஆக³தோ. அத² வா யதா² புரிமகா ப⁴க³வந்தோ தா³னஸீலனெக்க²ம்மபஞ்ஞாவீரியக²ந்திஸச்சாதி⁴ட்டா²னமெத்துபெக்கா²ஸங்கா²தா த³ஸ பாரமியோ, த³ஸ உபபாரமியோ, த³ஸ பரமத்த²பாரமியோதி ஸமதிங்ஸ பாரமியோ பூரெத்வா அங்க³பரிச்சாக³ங் நயனத⁴னரஜ்ஜபுத்ததா³ரபரிச்சாக³ந்தி இமே பஞ்ச மஹாபரிச்சாகே³ பரிச்சஜித்வா, புப்³ப³யோக³புப்³ப³சரியத⁴ம்மக்கா²னஞாதத்த²சரியாத³யோ பூரெத்வா பு³த்³தி⁴சரியாய கோடிங் பத்வா ஆக³தா, ததா² அம்ஹாகம்பி ப⁴க³வா ஆக³தோ. யதா² ச புரிமகா ப⁴க³வந்தோ சத்தாரோ ஸதிபட்டா²னே சத்தாரோ ஸம்மப்பதா⁴னே சத்தாரோ இத்³தி⁴பாதே³ பஞ்சிந்த்³ரியானி பஞ்ச ப³லானி ஸத்த பொ³ஜ்ஜ²ங்கே³ அரியங் அட்ட²ங்கி³கங் மக்³க³ங் பா⁴வெத்வா ப்³ரூஹெத்வா ஆக³தா, ததா² அம்ஹாகம்பி ப⁴க³வா ஆக³தோதி ததா²க³தோ.

    Kathaṃ bhagavā tathā āgatoti tathāgato? Yathā sabbalokahitāya ussukkamāpannā purimakā sammāsambuddhā āgatā. Kiṃ vuttaṃ hoti? Yenābhinīhārena purimakā bhagavanto āgatā, teneva amhākampi bhagavā āgato. Atha vā yathā purimakā bhagavanto dānasīlanekkhammapaññāvīriyakhantisaccādhiṭṭhānamettupekkhāsaṅkhātā dasa pāramiyo, dasa upapāramiyo, dasa paramatthapāramiyoti samatiṃsa pāramiyo pūretvā aṅgapariccāgaṃ nayanadhanarajjaputtadārapariccāganti ime pañca mahāpariccāge pariccajitvā, pubbayogapubbacariyadhammakkhānañātatthacariyādayo pūretvā buddhicariyāya koṭiṃ patvā āgatā, tathā amhākampi bhagavā āgato. Yathā ca purimakā bhagavanto cattāro satipaṭṭhāne cattāro sammappadhāne cattāro iddhipāde pañcindriyāni pañca balāni satta bojjhaṅge ariyaṃ aṭṭhaṅgikaṃ maggaṃ bhāvetvā brūhetvā āgatā, tathā amhākampi bhagavā āgatoti tathāgato.

    ‘‘யதே²வ தீ³பங்கரபு³த்³த⁴ஆத³யோ, ஸப்³ப³ஞ்ஞுபா⁴வங் முனயோ இதா⁴க³தா;

    ‘‘Yatheva dīpaṅkarabuddhaādayo, sabbaññubhāvaṃ munayo idhāgatā;

    ததா² அயங் ஸக்யமுனீபி ஆக³தோ, ததா²க³தோ வுச்சதி தேன சக்கு²மா’’தி.

    Tathā ayaṃ sakyamunīpi āgato, tathāgato vuccati tena cakkhumā’’ti.

    கத²ங் ததா² க³தோதி ததா²க³தோ? யதா² ஸம்பதிஜாதா புரிமகா ப⁴க³வந்தோ க³தா. கத²ஞ்ச தே க³தா? தே ஹி ஸம்பதிஜாதா ஸமேஹி பாதே³ஹி பத²வியங் பதிட்டா²ய உத்தரேனமுகா² ஸத்தபத³வீதிஹாரேன க³தா. யதா²ஹ ‘‘ஸம்பதிஜாதோ, ஆனந்த³, போ³தி⁴ஸத்தோ ஸமேஹி பாதே³ஹி பத²வியங் பதிட்ட²ஹித்வா உத்தராபி⁴முகோ² ஸத்தபத³வீதிஹாரேன க³ச்ச²தி ஸேதம்ஹி ச²த்தே அனுதா⁴ரயமானே, ஸப்³பா³ ச தி³ஸா அனுவிலோகேதி, ஆஸபி⁴ஞ்ச வாசங் பா⁴ஸதி ‘அக்³கோ³ஹமஸ்மி லோகஸ்ஸ, ஜெட்டோ²ஹமஸ்மி லோகஸ்ஸ, ஸெட்டோ²ஹமஸ்மி லோகஸ்ஸ, அயமந்திமா ஜாதி, நத்தி² தா³னி புனப்³ப⁴வோ’’’தி (ம॰ நி॰ 3.207; தீ³॰ நி॰ 2.31). தஞ்சஸ்ஸ க³மனங் தத²ங் அஹோஸி அவிதத²ங் அனேகேஸங் விஸேஸாதி⁴க³மானங் புப்³ப³னிமித்தபா⁴வேன. யஞ்ஹி ஸோ ஸம்பதிஜாதோ ஸமேஹி பாதே³ஹி பதிட்ட²ஹி, இத³மஸ்ஸ சதுரித்³தி⁴பாத³படிலாப⁴ஸ்ஸ புப்³ப³னிமித்தங், உத்தரமுக²பா⁴வோ பனஸ்ஸ ஸப்³ப³லோகுத்தரபா⁴வஸ்ஸ புப்³ப³னிமித்தங், ஸத்தபத³வீதிஹாரோ ஸத்தபொ³ஜ்ஜ²ங்க³ரதனபடிலாப⁴ஸ்ஸ புப்³ப³னிமித்தங், ‘‘ஸுவண்ணத³ண்டா³ வீதிபதந்தி சாமரா’’தி (ஸு॰ நி॰ 693) எத்த² வுத்தசாமருக்கே²போ பன ஸப்³ப³தித்தி²யனிம்மத²னஸ்ஸ புப்³ப³னிமித்தங், ஸேதச்ச²த்ததா⁴ரணங் அரஹத்தப²லவிமுத்திவரவிமலஸேதச்ச²த்தபடிலாப⁴ஸ்ஸ புப்³ப³னிமித்தங், ஸப்³பா³தி³ஸானுவிலோகனங் ஸப்³ப³ஞ்ஞுதானாவரணஞாணபடிலாப⁴ஸ்ஸ புப்³ப³னிமித்தங், ஆஸபி⁴வாசாபா⁴ஸனங் பன அப்படிவத்தியவரத⁴ம்மசக்கப்பவத்தனஸ்ஸ புப்³ப³னிமித்தங். ததா²யங் ப⁴க³வாபி க³தோ. தஞ்சஸ்ஸ க³மனங் தத²ங் அஹோஸி அவிதத²ங் தேஸங்யேவ விஸேஸாதி⁴க³மானங் புப்³ப³னிமித்தபா⁴வேன. தேனாஹு போராணா –

    Kathaṃ tathā gatoti tathāgato? Yathā sampatijātā purimakā bhagavanto gatā. Kathañca te gatā? Te hi sampatijātā samehi pādehi pathaviyaṃ patiṭṭhāya uttarenamukhā sattapadavītihārena gatā. Yathāha ‘‘sampatijāto, ānanda, bodhisatto samehi pādehi pathaviyaṃ patiṭṭhahitvā uttarābhimukho sattapadavītihārena gacchati setamhi chatte anudhārayamāne, sabbā ca disā anuviloketi, āsabhiñca vācaṃ bhāsati ‘aggohamasmi lokassa, jeṭṭhohamasmi lokassa, seṭṭhohamasmi lokassa, ayamantimā jāti, natthi dāni punabbhavo’’’ti (ma. ni. 3.207; dī. ni. 2.31). Tañcassa gamanaṃ tathaṃ ahosi avitathaṃ anekesaṃ visesādhigamānaṃ pubbanimittabhāvena. Yañhi so sampatijāto samehi pādehi patiṭṭhahi, idamassa caturiddhipādapaṭilābhassa pubbanimittaṃ, uttaramukhabhāvo panassa sabbalokuttarabhāvassa pubbanimittaṃ, sattapadavītihāro sattabojjhaṅgaratanapaṭilābhassa pubbanimittaṃ, ‘‘suvaṇṇadaṇḍā vītipatanti cāmarā’’ti (su. ni. 693) ettha vuttacāmarukkhepo pana sabbatitthiyanimmathanassa pubbanimittaṃ, setacchattadhāraṇaṃ arahattaphalavimuttivaravimalasetacchattapaṭilābhassa pubbanimittaṃ, sabbādisānuvilokanaṃ sabbaññutānāvaraṇañāṇapaṭilābhassa pubbanimittaṃ, āsabhivācābhāsanaṃ pana appaṭivattiyavaradhammacakkappavattanassa pubbanimittaṃ. Tathāyaṃ bhagavāpi gato. Tañcassa gamanaṃ tathaṃ ahosi avitathaṃ tesaṃyeva visesādhigamānaṃ pubbanimittabhāvena. Tenāhu porāṇā –

    ‘‘முஹுத்தஜாதோவ க³வங்பதீ யதா², ஸமேஹி பாதே³ஹி பு²ஸீ வஸுந்த⁴ரங்;

    ‘‘Muhuttajātova gavaṃpatī yathā, samehi pādehi phusī vasundharaṃ;

    ஸோ விக்கமீ ஸத்த பதா³னி கோ³தமோ, ஸேதஞ்ச ச²த்தங் அனுதா⁴ரயுங் மரூ.

    So vikkamī satta padāni gotamo, setañca chattaṃ anudhārayuṃ marū.

    ‘‘க³ந்த்வான ஸோ ஸத்த பதா³னி கோ³தமோ, தி³ஸா விலோகேஸி ஸமா ஸமந்ததோ;

    ‘‘Gantvāna so satta padāni gotamo, disā vilokesi samā samantato;

    அட்ட²ங்கு³பேதங் கி³ரமப்³பு⁴தீ³ரயி, ஸீஹோ யதா² பப்³ப³தமுத்³த⁴னிட்டி²தோ’’தி.

    Aṭṭhaṅgupetaṃ giramabbhudīrayi, sīho yathā pabbatamuddhaniṭṭhito’’ti.

    ஏவங் ததா² க³தோதி ததா²க³தோ.

    Evaṃ tathā gatoti tathāgato.

    அத² வா யதா² புரிமகா ப⁴க³வந்தோ, அயம்பி ப⁴க³வா ததே²வ நெக்க²ம்மேன காமச்ச²ந்த³ங்…பே॰… பட²மஜ்ஜா²னேன நீவரணே…பே॰… அனிச்சானுபஸ்ஸனாய நிச்சஸஞ்ஞங்…பே॰… அரஹத்தமக்³கே³ன ஸப்³ப³கிலேஸே பஹாய க³தோ. ஏவம்பி ததா² க³தோதி ததா²க³தோ.

    Atha vā yathā purimakā bhagavanto, ayampi bhagavā tatheva nekkhammena kāmacchandaṃ…pe… paṭhamajjhānena nīvaraṇe…pe… aniccānupassanāya niccasaññaṃ…pe… arahattamaggena sabbakilese pahāya gato. Evampi tathā gatoti tathāgato.

    கத²ங் தத²லக்க²ணங் ஆக³தோதி ததா²க³தோ? பத²வீதா⁴துயா கக்க²ளத்தலக்க²ணங் தத²ங் அவிதத²ங், ஆபோதா⁴துயா பக்³க⁴ரணலக்க²ணங், தேஜோதா⁴துயா உண்ஹத்தலக்க²ணங், வாயோதா⁴துயா வித்த²ம்ப⁴னலக்க²ணங், ஆகாஸதா⁴துயா அஸம்பு²ட்ட²லக்க²ணங், விஞ்ஞாணதா⁴துயா விஜானநலக்க²ணங்.

    Kathaṃ tathalakkhaṇaṃ āgatoti tathāgato? Pathavīdhātuyā kakkhaḷattalakkhaṇaṃ tathaṃ avitathaṃ, āpodhātuyā paggharaṇalakkhaṇaṃ, tejodhātuyā uṇhattalakkhaṇaṃ, vāyodhātuyā vitthambhanalakkhaṇaṃ, ākāsadhātuyā asamphuṭṭhalakkhaṇaṃ, viññāṇadhātuyā vijānanalakkhaṇaṃ.

    ரூபஸ்ஸ ருப்பனலக்க²ணங், வேத³னாய வேத³யிதலக்க²ணங், ஸஞ்ஞாய ஸஞ்ஜானநலக்க²ணங், ஸங்கா²ரானங் அபி⁴ஸங்க²ரணலக்க²ணங், விஞ்ஞாணஸ்ஸ விஜானநலக்க²ணங்.

    Rūpassa ruppanalakkhaṇaṃ, vedanāya vedayitalakkhaṇaṃ, saññāya sañjānanalakkhaṇaṃ, saṅkhārānaṃ abhisaṅkharaṇalakkhaṇaṃ, viññāṇassa vijānanalakkhaṇaṃ.

    விதக்கஸ்ஸ அபி⁴னிரோபனலக்க²ணங், விசாரஸ்ஸ அனுமஜ்ஜனலக்க²ணங், பீதியா ப²ரணலக்க²ணங், ஸுக²ஸ்ஸ ஸாதலக்க²ணங், சித்தேகக்³க³தாய அவிக்கே²பலக்க²ணங், ப²ஸ்ஸஸ்ஸ பு²ஸனலக்க²ணங்.

    Vitakkassa abhiniropanalakkhaṇaṃ, vicārassa anumajjanalakkhaṇaṃ, pītiyā pharaṇalakkhaṇaṃ, sukhassa sātalakkhaṇaṃ, cittekaggatāya avikkhepalakkhaṇaṃ, phassassa phusanalakkhaṇaṃ.

    ஸத்³தி⁴ந்த்³ரியஸ்ஸ அதி⁴மொக்க²லக்க²ணங், வீரியிந்த்³ரியஸ்ஸ பக்³க³ஹலக்க²ணங், ஸதிந்த்³ரியஸ்ஸ உபட்டா²னலக்க²ணங், ஸமாதி⁴ந்த்³ரியஸ்ஸ அவிக்கே²பலக்க²ணங், பஞ்ஞிந்த்³ரியஸ்ஸ பஜானநலக்க²ணங்.

    Saddhindriyassa adhimokkhalakkhaṇaṃ, vīriyindriyassa paggahalakkhaṇaṃ, satindriyassa upaṭṭhānalakkhaṇaṃ, samādhindriyassa avikkhepalakkhaṇaṃ, paññindriyassa pajānanalakkhaṇaṃ.

    ஸத்³தா⁴ப³லஸ்ஸ அஸ்ஸத்³தி⁴யே அகம்பியலக்க²ணங், வீரியப³லஸ்ஸ கோஸஜ்ஜே, ஸதிப³லஸ்ஸ முட்ட²ஸ்ஸச்சே, ஸமாதி⁴ப³லஸ்ஸ உத்³த⁴ச்சே, பஞ்ஞாப³லஸ்ஸ அவிஜ்ஜாய அகம்பியலக்க²ணங்.

    Saddhābalassa assaddhiye akampiyalakkhaṇaṃ, vīriyabalassa kosajje, satibalassa muṭṭhassacce, samādhibalassa uddhacce, paññābalassa avijjāya akampiyalakkhaṇaṃ.

    ஸதிஸம்பொ³ஜ்ஜ²ங்க³ஸ்ஸ உபட்டா²னலக்க²ணங், த⁴ம்மவிசயஸம்பொ³ஜ்ஜ²ங்க³ஸ்ஸ பவிசயலக்க²ணங், வீரியஸம்பொ³ஜ்ஜ²ங்க³ஸ்ஸ பக்³க³ஹலக்க²ணங், பீதிஸம்பொ³ஜ்ஜ²ங்க³ஸ்ஸ ப²ரணலக்க²ணங், பஸ்ஸத்³தி⁴ஸம்பொ³ஜ்ஜ²ங்க³ஸ்ஸ உபஸமலக்க²ணங், ஸமாதி⁴ஸம்பொ³ஜ்ஜ²ங்க³ஸ்ஸ அவிக்கே²பலக்க²ணங், உபெக்கா²ஸம்பொ³ஜ்ஜ²ங்க³ஸ்ஸ படிஸங்கா²னலக்க²ணங்.

    Satisambojjhaṅgassa upaṭṭhānalakkhaṇaṃ, dhammavicayasambojjhaṅgassa pavicayalakkhaṇaṃ, vīriyasambojjhaṅgassa paggahalakkhaṇaṃ, pītisambojjhaṅgassa pharaṇalakkhaṇaṃ, passaddhisambojjhaṅgassa upasamalakkhaṇaṃ, samādhisambojjhaṅgassa avikkhepalakkhaṇaṃ, upekkhāsambojjhaṅgassa paṭisaṅkhānalakkhaṇaṃ.

    ஸம்மாதி³ட்டி²யா த³ஸ்ஸனலக்க²ணங், ஸம்மாஸங்கப்பஸ்ஸ அபி⁴னிரோபனலக்க²ணங், ஸம்மாவாசாய பரிக்³க³ஹலக்க²ணங், ஸம்மாகம்மந்தஸ்ஸ ஸமுட்டா²னலக்க²ணங், ஸம்மாஆஜீவஸ்ஸ வோதா³னலக்க²ணங், ஸம்மாவாயாமஸ்ஸ பக்³க³ஹலக்க²ணங், ஸம்மாஸதியா உபட்டா²னலக்க²ணங், ஸம்மாஸமாதி⁴ஸ்ஸ அவிக்கே²பலக்க²ணங்.

    Sammādiṭṭhiyā dassanalakkhaṇaṃ, sammāsaṅkappassa abhiniropanalakkhaṇaṃ, sammāvācāya pariggahalakkhaṇaṃ, sammākammantassa samuṭṭhānalakkhaṇaṃ, sammāājīvassa vodānalakkhaṇaṃ, sammāvāyāmassa paggahalakkhaṇaṃ, sammāsatiyā upaṭṭhānalakkhaṇaṃ, sammāsamādhissa avikkhepalakkhaṇaṃ.

    அவிஜ்ஜாய அஞ்ஞாணலக்க²ணங், ஸங்கா²ரானங் சேதனாலக்க²ணங், விஞ்ஞாணஸ்ஸ விஜானநலக்க²ணங், நாமஸ்ஸ நமனலக்க²ணங், ரூபஸ்ஸ ருப்பனலக்க²ணங், ஸளாயதனஸ்ஸ ஆயதனலக்க²ணங், ப²ஸ்ஸஸ்ஸ பு²ஸனலக்க²ணங், வேத³னாய வேத³யிதலக்க²ணங், தண்ஹாய ஹேதுலக்க²ணங், உபாதா³னஸ்ஸ க³ஹணலக்க²ணங், ப⁴வஸ்ஸ ஆயூஹனலக்க²ணங், ஜாதியா நிப்³ப³த்திலக்க²ணங், ஜராய ஜீரணலக்க²ணங், மரணஸ்ஸ சுதிலக்க²ணங்.

    Avijjāya aññāṇalakkhaṇaṃ, saṅkhārānaṃ cetanālakkhaṇaṃ, viññāṇassa vijānanalakkhaṇaṃ, nāmassa namanalakkhaṇaṃ, rūpassa ruppanalakkhaṇaṃ, saḷāyatanassa āyatanalakkhaṇaṃ, phassassa phusanalakkhaṇaṃ, vedanāya vedayitalakkhaṇaṃ, taṇhāya hetulakkhaṇaṃ, upādānassa gahaṇalakkhaṇaṃ, bhavassa āyūhanalakkhaṇaṃ, jātiyā nibbattilakkhaṇaṃ, jarāya jīraṇalakkhaṇaṃ, maraṇassa cutilakkhaṇaṃ.

    தா⁴தூனங் ஸுஞ்ஞதாலக்க²ணங், ஆயதனானங் ஆயதனலக்க²ணங், ஸதிபட்டா²னானங் உபட்டா²னலக்க²ணங், ஸம்மப்பதா⁴னானங் பத³ஹனலக்க²ணங், இத்³தி⁴பாதா³னங் இஜ்ஜ²னலக்க²ணங், இந்த்³ரியானங் அதி⁴பதிலக்க²ணங், ப³லானங் அகம்பியலக்க²ணங், பொ³ஜ்ஜ²ங்கா³னங் நிய்யானலக்க²ணங், மக்³க³ஸ்ஸ ஹேதுலக்க²ணங்.

    Dhātūnaṃ suññatālakkhaṇaṃ, āyatanānaṃ āyatanalakkhaṇaṃ, satipaṭṭhānānaṃ upaṭṭhānalakkhaṇaṃ, sammappadhānānaṃ padahanalakkhaṇaṃ, iddhipādānaṃ ijjhanalakkhaṇaṃ, indriyānaṃ adhipatilakkhaṇaṃ, balānaṃ akampiyalakkhaṇaṃ, bojjhaṅgānaṃ niyyānalakkhaṇaṃ, maggassa hetulakkhaṇaṃ.

    ஸச்சானங் தத²லக்க²ணங், ஸமத²ஸ்ஸ அவிக்கே²பலக்க²ணங், விபஸ்ஸனாய அனுபஸ்ஸனாலக்க²ணங், ஸமத²விபஸ்ஸனானங் ஏகரஸலக்க²ணங், யுக³னத்³தா⁴னங் அனதிவத்தனலக்க²ணங்.

    Saccānaṃ tathalakkhaṇaṃ, samathassa avikkhepalakkhaṇaṃ, vipassanāya anupassanālakkhaṇaṃ, samathavipassanānaṃ ekarasalakkhaṇaṃ, yuganaddhānaṃ anativattanalakkhaṇaṃ.

    ஸீலவிஸுத்³தி⁴யா ஸங்வரலக்க²ணங், சித்தவிஸுத்³தி⁴யா அவிக்கே²பலக்க²ணங், தி³ட்டி²விஸுத்³தி⁴யா த³ஸ்ஸனலக்க²ணங்.

    Sīlavisuddhiyā saṃvaralakkhaṇaṃ, cittavisuddhiyā avikkhepalakkhaṇaṃ, diṭṭhivisuddhiyā dassanalakkhaṇaṃ.

    க²யே ஞாணஸ்ஸ ஸமுச்சே²த³லக்க²ணங், அனுப்பாதே³ ஞாணஸ்ஸ பஸ்ஸத்³தி⁴லக்க²ணங்.

    Khaye ñāṇassa samucchedalakkhaṇaṃ, anuppāde ñāṇassa passaddhilakkhaṇaṃ.

    ச²ந்த³ஸ்ஸ மூலலக்க²ணங், மனஸிகாரஸ்ஸ ஸமுட்டா²னலக்க²ணங், ப²ஸ்ஸஸ்ஸ ஸமோதா⁴னலக்க²ணங், வேத³னாய ஸமோஸரணலக்க²ணங், ஸமாதி⁴ஸ்ஸ பமுக²லக்க²ணங், ஸதியா ஆதி⁴பதெய்யலக்க²ணங், பஞ்ஞாய ததுத்தரிலக்க²ணங், விமுத்தியா ஸாரலக்க²ணங், அமதோக³த⁴ஸ்ஸ நிப்³பா³னஸ்ஸ பரியோஸானலக்க²ணங் தத²ங் அவிதத²ங். ஏதங் தத²லக்க²ணங் ஞாணக³தியா ஆக³தோ அவிரஜ்ஜி²த்வா பத்தோ அனுப்பத்தோதி ததா²க³தோ. ஏவங் தத²லக்க²ணங் ஆக³தோதி ததா²க³தோ.

    Chandassa mūlalakkhaṇaṃ, manasikārassa samuṭṭhānalakkhaṇaṃ, phassassa samodhānalakkhaṇaṃ, vedanāya samosaraṇalakkhaṇaṃ, samādhissa pamukhalakkhaṇaṃ, satiyā ādhipateyyalakkhaṇaṃ, paññāya tatuttarilakkhaṇaṃ, vimuttiyā sāralakkhaṇaṃ, amatogadhassa nibbānassa pariyosānalakkhaṇaṃ tathaṃ avitathaṃ. Etaṃ tathalakkhaṇaṃ ñāṇagatiyā āgato avirajjhitvā patto anuppattoti tathāgato. Evaṃ tathalakkhaṇaṃ āgatoti tathāgato.

    கத²ங் தத²த⁴ம்மே யாதா²வதோ அபி⁴ஸம்பு³த்³தோ⁴தி ததா²க³தோ? தத²த⁴ம்மா நாம சத்தாரி அரியஸச்சானி. யதா²ஹ – ‘‘சத்தாரிமானி, பி⁴க்க²வே, ததா²னி அவிததா²னி அனஞ்ஞதா²னி. கதமானி சத்தாரி? ‘இத³ங் து³க்க²’ந்தி, பி⁴க்க²வே, தத²மேதங் அவிதத²மேதங் அனஞ்ஞத²மேத’’ந்தி (ஸங்॰ நி॰ 5.1090) வித்தா²ரோ. தானி ச ப⁴க³வா அபி⁴ஸம்பு³த்³தோ⁴தி ததா²னங் அபி⁴ஸம்பு³த்³த⁴த்தா ததா²க³தோதி வுச்சதி. அபி⁴ஸம்போ³த⁴த்தோ² ஹி எத்த² க³தஸத்³தோ³.

    Kathaṃ tathadhamme yāthāvato abhisambuddhoti tathāgato? Tathadhammā nāma cattāri ariyasaccāni. Yathāha – ‘‘cattārimāni, bhikkhave, tathāni avitathāni anaññathāni. Katamāni cattāri? ‘Idaṃ dukkha’nti, bhikkhave, tathametaṃ avitathametaṃ anaññathameta’’nti (saṃ. ni. 5.1090) vitthāro. Tāni ca bhagavā abhisambuddhoti tathānaṃ abhisambuddhattā tathāgatoti vuccati. Abhisambodhattho hi ettha gatasaddo.

    அபிச ஜராமரணஸ்ஸ ஜாதிபச்சயஸம்பூ⁴தஸமுதா³க³தட்டோ² ததோ² அவிததோ² அனஞ்ஞதோ²…பே॰… ஸங்கா²ரானங் அவிஜ்ஜாபச்சயஸம்பூ⁴தஸமுதா³க³தட்டோ² ததோ² அவிததோ² அனஞ்ஞதோ². ததா² அவிஜ்ஜாய ஸங்கா²ரானங் பச்சயட்டோ² ததோ² அவிததோ² அனஞ்ஞதோ²…பே॰… ஜாதியா ஜராமரணஸ்ஸ பச்சயட்டோ² ததோ² அவிததோ² அனஞ்ஞதோ². தங் ஸப்³ப³ங் ப⁴க³வா அபி⁴ஸம்பு³த்³தோ⁴. தஸ்மாபி ததா²னங் அபி⁴ஸம்பு³த்³த⁴த்தா ததா²க³தோ. ஏவங் தத²த⁴ம்மே யாதா²வதோ அபி⁴ஸம்பு³த்³தோ⁴தி ததா²க³தோ.

    Apica jarāmaraṇassa jātipaccayasambhūtasamudāgataṭṭho tatho avitatho anaññatho…pe… saṅkhārānaṃ avijjāpaccayasambhūtasamudāgataṭṭho tatho avitatho anaññatho. Tathā avijjāya saṅkhārānaṃ paccayaṭṭho tatho avitatho anaññatho…pe… jātiyā jarāmaraṇassa paccayaṭṭho tatho avitatho anaññatho. Taṃ sabbaṃ bhagavā abhisambuddho. Tasmāpi tathānaṃ abhisambuddhattā tathāgato. Evaṃ tathadhamme yāthāvato abhisambuddhoti tathāgato.

    கத²ங் தத²த³ஸ்ஸிதாய ததா²க³தோ? ப⁴க³வா யங் ஸதே³வகே லோகே…பே॰… ஸதே³வமனுஸ்ஸாய அபரிமாணாஸு லோகதா⁴தூஸு அபரிமாணானங் ஸத்தானங் சக்கு²த்³வாரே ஆபாத²ங் ஆக³ச்ச²ந்தங் ரூபாரம்மணங் நாம அத்தி², தங் ஸப்³பா³காரேன ஜானாதி பஸ்ஸதி. ஏவங் ஜானதா பஸ்ஸதா ச தேன தங் இட்டா²னிட்டா²தி³வஸேன வா தி³ட்ட²ஸுதமுதவிஞ்ஞாதேஸு லப்³ப⁴மானகபத³வஸேன வா ‘‘கதமங் தங் ரூபங் ரூபாயதனங்? யங் ரூபங் சதுன்னங் மஹாபூ⁴தானங் உபாதா³ய வண்ணனிபா⁴ ஸனித³ஸ்ஸனங் ஸப்படிக⁴ங் நீலங் பீதக’’ந்திஆதி³னா (த⁴॰ ஸ॰ 616) நயேன அனேகேஹி நாமேஹி தேரஸஹி வாரேஹி த்³விபஞ்ஞாஸாய நயேஹி விப⁴ஜ்ஜமானங் தத²மேவ ஹோதி, விதத²ங் நத்தி² . ஏஸ நயோ ஸோதத்³வாராதீ³ஸுபி ஆபாத²மாக³ச்ச²ந்தேஸு ஸத்³தா³தீ³ஸு. வுத்தம்பி சேதங் ப⁴க³வதா ‘‘யங், பி⁴க்க²வே, ஸதே³வகஸ்ஸ லோகஸ்ஸ…பே॰… ஸதே³வமனுஸ்ஸாய தி³ட்ட²ங் ஸுதங் முதங் விஞ்ஞாதங் பத்தங் பரியேஸிதங் அனுவிசரிதங் மனஸா, தமஹங் ஜானாமி, தமஹங் அப்³ப⁴ஞ்ஞாஸிங், தங் ததா²க³தஸ்ஸ விதி³தங், தங் ததா²க³தோ ந உபட்டா²ஸீ’’தி (அ॰ நி॰ 4.24). ஏவங் தத²த³ஸ்ஸிதாய ததா²க³தோ. தத்த² தத²த³ஸ்ஸீஅத்தே² ததா²க³தோதி பத³ஸம்ப⁴வோ வேதி³தப்³போ³.

    Kathaṃ tathadassitāya tathāgato? Bhagavā yaṃ sadevake loke…pe… sadevamanussāya aparimāṇāsu lokadhātūsu aparimāṇānaṃ sattānaṃ cakkhudvāre āpāthaṃ āgacchantaṃ rūpārammaṇaṃ nāma atthi, taṃ sabbākārena jānāti passati. Evaṃ jānatā passatā ca tena taṃ iṭṭhāniṭṭhādivasena vā diṭṭhasutamutaviññātesu labbhamānakapadavasena vā ‘‘katamaṃ taṃ rūpaṃ rūpāyatanaṃ? Yaṃ rūpaṃ catunnaṃ mahābhūtānaṃ upādāya vaṇṇanibhā sanidassanaṃ sappaṭighaṃ nīlaṃ pītaka’’ntiādinā (dha. sa. 616) nayena anekehi nāmehi terasahi vārehi dvipaññāsāya nayehi vibhajjamānaṃ tathameva hoti, vitathaṃ natthi . Esa nayo sotadvārādīsupi āpāthamāgacchantesu saddādīsu. Vuttampi cetaṃ bhagavatā ‘‘yaṃ, bhikkhave, sadevakassa lokassa…pe… sadevamanussāya diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā, tamahaṃ jānāmi, tamahaṃ abbhaññāsiṃ, taṃ tathāgatassa viditaṃ, taṃ tathāgato na upaṭṭhāsī’’ti (a. ni. 4.24). Evaṃ tathadassitāya tathāgato. Tattha tathadassīatthe tathāgatoti padasambhavo veditabbo.

    கத²ங் தத²வாதி³தாய ததா²க³தோ? யங் ரத்திங் ப⁴க³வா போ³தி⁴மண்டே³ அபராஜிதபல்லங்கே நிஸின்னோ சதுன்னங் மாரானங் மத்த²கங் மத்³தி³த்வா அனுத்தரங் ஸம்மாஸம்போ³தி⁴ங் அபி⁴ஸம்பு³த்³தோ⁴, யஞ்ச ரத்திங் யமகஸாலானமந்தரே அனுபாதி³ஸேஸாய நிப்³பா³னதா⁴துயா பரினிப்³பா³யி, எத்த²ந்தரே பஞ்சசத்தாலீஸவஸ்ஸபரிமாணே காலே பட²மபோ³தி⁴யாபி மஜ்ஜி²மபோ³தி⁴யாபி பச்சி²மபோ³தி⁴யாபி யங் ப⁴க³வதா பா⁴ஸிதங் ஸுத்தங் கெ³ய்யங்…பே॰… வேத³ல்லங், தங் ஸப்³ப³ங் அத்த²தோ ச ப்³யஞ்ஜனதோ ச அனவஜ்ஜங் அனுபவஜ்ஜங் அனூனமனதி⁴கங் ஸப்³பா³காரபரிபுண்ணங் ராக³மத³னிம்மத³னங் தோ³ஸமோஹமத³னிம்மத³னங், நத்தி² தத்த² வாலக்³க³மத்தம்பி பக்க²லிதங், ஸப்³ப³ங் தங் ஏகமுத்³தி³காய லஞ்சி²தங் விய, ஏகனாளிகாய மிதங் விய, ஏகதுலாய துலிதங் விய, ச தத²மேவ ஹோதி. யதா²ஹ ‘‘யஞ்ச, சுந்த³, ரத்திங் ததா²க³தோ அனுத்தரங் ஸம்மாஸம்போ³தி⁴ங் அபி⁴ஸம்பு³ஜ்ஜ²தி, யஞ்ச ரத்திங் அனுபாதி³ஸேஸாய நிப்³பா³னதா⁴துயா பரினிப்³பா³யதி, யங் ஏதஸ்மிங் அந்தரே பா⁴ஸதி லபதி நித்³தி³ஸதி, ஸப்³ப³ங் தங் தத²மேவ ஹோதி, நோ அஞ்ஞதா². தஸ்மா ‘ததா²க³தோ’தி வுச்சதீ’’தி (தீ³॰ நி॰ 3.188). க³த³அத்தோ² ஹி எத்த² க³தஸத்³தோ³. ஏவங் தத²வாதி³தாய ததா²க³தோ.

    Kathaṃ tathavāditāya tathāgato? Yaṃ rattiṃ bhagavā bodhimaṇḍe aparājitapallaṅke nisinno catunnaṃ mārānaṃ matthakaṃ madditvā anuttaraṃ sammāsambodhiṃ abhisambuddho, yañca rattiṃ yamakasālānamantare anupādisesāya nibbānadhātuyā parinibbāyi, etthantare pañcacattālīsavassaparimāṇe kāle paṭhamabodhiyāpi majjhimabodhiyāpi pacchimabodhiyāpi yaṃ bhagavatā bhāsitaṃ suttaṃ geyyaṃ…pe… vedallaṃ, taṃ sabbaṃ atthato ca byañjanato ca anavajjaṃ anupavajjaṃ anūnamanadhikaṃ sabbākāraparipuṇṇaṃ rāgamadanimmadanaṃ dosamohamadanimmadanaṃ, natthi tattha vālaggamattampi pakkhalitaṃ, sabbaṃ taṃ ekamuddikāya lañchitaṃ viya, ekanāḷikāya mitaṃ viya, ekatulāya tulitaṃ viya, ca tathameva hoti. Yathāha ‘‘yañca, cunda, rattiṃ tathāgato anuttaraṃ sammāsambodhiṃ abhisambujjhati, yañca rattiṃ anupādisesāya nibbānadhātuyā parinibbāyati, yaṃ etasmiṃ antare bhāsati lapati niddisati, sabbaṃ taṃ tathameva hoti, no aññathā. Tasmā ‘tathāgato’ti vuccatī’’ti (dī. ni. 3.188). Gadaattho hi ettha gatasaddo. Evaṃ tathavāditāya tathāgato.

    அபிச ஆக³த³னங் ஆக³தோ³, வசனந்தி அத்தோ². ததோ² அவிபரீதோ ஆக³தோ³ அஸ்ஸாதி த³காரஸ்ஸ தகாரங் கத்வா ததா²க³தோதி ஏவமேதஸ்மிங் அத்தே² பத³ஸித்³தி⁴ வேதி³தப்³பா³.

    Apica āgadanaṃ āgado, vacananti attho. Tatho aviparīto āgado assāti dakārassa takāraṃ katvā tathāgatoti evametasmiṃ atthe padasiddhi veditabbā.

    கத²ங் ததா²காரிதாய ததா²க³தோ? ப⁴க³வதோ ஹி வாசாய காயோ அனுலோமேதி, காயஸ்ஸாபி வாசா, தஸ்மா யதா²வாதீ³ ததா²காரீ யதா²காரீ ததா²வாதீ³ ச ஹோதி. ஏவங்பூ⁴தஸ்ஸ சஸ்ஸ யதா² வாசா, காயோபி ததா² க³தோ பவத்தோதி அத்தோ². யதா² ச காயோ, வாசாபி ததா² க³தா பவத்தாதி ததா²க³தோ. தேனேவாஹ – ‘‘யதா²வாதீ³, பி⁴க்க²வே, ததா²க³தோ ததா²காரீ, யதா²காரீ ததா²வாதீ³. இதி யதா²வாதீ³ ததா²காரீ, யதா²காரீ ததா²வாதீ³. தஸ்மா ‘ததா²க³தோ’தி வுச்சதீ’’தி. ஏவங் ததா²காரிதாய ததா²க³தோ.

    Kathaṃ tathākāritāya tathāgato? Bhagavato hi vācāya kāyo anulometi, kāyassāpi vācā, tasmā yathāvādī tathākārī yathākārī tathāvādī ca hoti. Evaṃbhūtassa cassa yathā vācā, kāyopi tathā gato pavattoti attho. Yathā ca kāyo, vācāpi tathā gatā pavattāti tathāgato. Tenevāha – ‘‘yathāvādī, bhikkhave, tathāgato tathākārī, yathākārī tathāvādī. Iti yathāvādī tathākārī, yathākārī tathāvādī. Tasmā ‘tathāgato’ti vuccatī’’ti. Evaṃ tathākāritāya tathāgato.

    கத²ங் அபி⁴ப⁴வனட்டே²ன ததா²க³தோ? உபரி ப⁴வக்³க³ங் ஹெட்டா² அவீசிங் பரியந்தங் கத்வா திரியங் அபரிமாணாஸு லோகதா⁴தூஸு ஸப்³ப³ஸத்தே அபி⁴ப⁴வதி ஸீலேன ஸமாதி⁴னா பஞ்ஞாய விமுத்தியா விமுத்திஞாணத³ஸ்ஸனேன, ந தஸ்ஸ துலா வா பமாணங் வா அத்தி², அதுலோ அப்பமெய்யோ அனுத்தரோ ராஜாதி⁴ராஜா தே³வானங் அதிதே³வோ ஸக்கானங் அதிஸக்கோ ப்³ரஹ்மானங் அதிப்³ரஹ்மா. தேனாஹ – ‘‘ஸதே³வகே, பி⁴க்க²வே, லோகே…பே॰… ஸதே³வமனுஸ்ஸாய ததா²க³தோ அபி⁴பூ⁴ அனபி⁴பூ⁴தோ அஞ்ஞத³த்து² த³ஸோ வஸவத்தீ. தஸ்மா ‘ததா²க³தோ’தி வுச்சதீ’’தி (அ॰ நி॰ 4.23).

    Kathaṃ abhibhavanaṭṭhena tathāgato? Upari bhavaggaṃ heṭṭhā avīciṃ pariyantaṃ katvā tiriyaṃ aparimāṇāsu lokadhātūsu sabbasatte abhibhavati sīlena samādhinā paññāya vimuttiyā vimuttiñāṇadassanena, na tassa tulā vā pamāṇaṃ vā atthi, atulo appameyyo anuttaro rājādhirājā devānaṃ atidevo sakkānaṃ atisakko brahmānaṃ atibrahmā. Tenāha – ‘‘sadevake, bhikkhave, loke…pe… sadevamanussāya tathāgato abhibhū anabhibhūto aññadatthu daso vasavattī. Tasmā ‘tathāgato’ti vuccatī’’ti (a. ni. 4.23).

    தத்தே²வங் பத³ஸித்³தி⁴ வேதி³தப்³பா³ – அக³தோ³ விய அக³தோ³. கோ பனேஸ? தே³ஸனாவிலாஸோ சேவ புஞ்ஞுஸ்ஸயோ ச. தேன ஹேஸ மஹானுபா⁴வோ பி⁴ஸக்கோ தி³ப்³பா³க³தே³ன ஸப்பே விய ஸப்³ப³பரப்பவாதி³னோ ஸதே³வகஞ்ச லோகங் அபி⁴ப⁴வதி. இதி ஸப்³ப³லோகாபி⁴ப⁴வனே ததோ² அவிபரீதோ தே³ஸனாவிலாஸமயோ சேவ புஞ்ஞமயோ ச அக³தோ³ அஸ்ஸாதி த³காரஸ்ஸ தகாரங் கத்வா ததா²க³தோதி வேதி³தப்³போ³. ஏவங் அபி⁴ப⁴வனட்டே²ன ததா²க³தோ.

    Tatthevaṃ padasiddhi veditabbā – agado viya agado. Ko panesa? Desanāvilāso ceva puññussayo ca. Tena hesa mahānubhāvo bhisakko dibbāgadena sappe viya sabbaparappavādino sadevakañca lokaṃ abhibhavati. Iti sabbalokābhibhavane tatho aviparīto desanāvilāsamayo ceva puññamayo ca agado assāti dakārassa takāraṃ katvā tathāgatoti veditabbo. Evaṃ abhibhavanaṭṭhena tathāgato.

    அபிச ததா²ய க³தோதிபி ததா²க³தோ, தத²ங் க³தோதிபி ததா²க³தோதி. க³தோதி அவக³தோ அதீதோ பத்தோ படிபன்னோதி அத்தோ² . தத்த² ஸகலங் லோகங் தீரணபரிஞ்ஞாய ததா²ய க³தோ அவக³தோதி ததா²க³தோ, லோகஸமுத³யங் பஹானபரிஞ்ஞாய ததா²ய க³தோ அதீதோதி ததா²க³தோ, லோகனிரோத⁴ங் ஸச்சி²கிரியாய ததா²ய க³தோ பத்தோதி ததா²க³தோ, லோகனிரோத⁴கா³மினிபடிபத³ங் தத²ங் க³தோ படிபன்னோதி ததா²க³தோ. தேன யங் வுத்தங் ப⁴க³வதா – ‘‘லோகோ, பி⁴க்க²வே, ததா²க³தேன அபி⁴ஸம்பு³த்³தோ⁴, லோகஸ்மா ததா²க³தோ விஸங்யுத்தோ. லோகஸமுத³யோ, பி⁴க்க²வே, ததா²க³தேன அபி⁴ஸம்பு³த்³தோ⁴, லோகஸமுத³யோ ததா²க³தஸ்ஸ பஹீனோ. லோகனிரோதோ⁴, பி⁴க்க²வே , ததா²க³தேன அபி⁴ஸம்பு³த்³தோ⁴ லோகனிரோதோ⁴ ததா²க³தஸ்ஸ ஸச்சி²கதோ. லோகனிரோத⁴கா³மினீ படிபதா³, பி⁴க்க²வே, ததா²க³தேன அபி⁴ஸம்பு³த்³தா⁴, லோகனிரோத⁴கா³மினீபடிபதா³ ததா²க³தஸ்ஸ பா⁴விதா. யங், பி⁴க்க²வே, ஸதே³வகஸ்ஸ லோகஸ்ஸ…பே॰… அனுவிசரிதங் மனஸா, ஸப்³ப³ங் தங் ததா²க³தேன அபி⁴ஸம்பு³த்³த⁴ங். தஸ்மா ‘ததா²க³தோ’தி வுச்சதீ’’தி (அ॰ நி॰ 4.23). தஸ்ஸ ஏவம்பி அத்தோ² வேதி³தப்³போ³. இத³ம்பி ச ததா²க³தஸ்ஸ ததா²க³தபா⁴வதீ³பனே முக²மத்தமேவ. ஸப்³பா³காரேன பன ததா²க³தோவ ததா²க³தஸ்ஸ ததா²க³தபா⁴வங் வண்ணெய்ய. யஸ்மா பன ஸப்³ப³பு³த்³தா⁴ ததா²க³தகு³ணேனாபி ஸமஸமா, தஸ்மா ஸப்³பே³ஸங் வஸேன ததா²க³தானந்தி ஆஹ.

    Apica tathāya gatotipi tathāgato, tathaṃ gatotipi tathāgatoti. Gatoti avagato atīto patto paṭipannoti attho . Tattha sakalaṃ lokaṃ tīraṇapariññāya tathāya gato avagatoti tathāgato, lokasamudayaṃ pahānapariññāya tathāya gato atītoti tathāgato, lokanirodhaṃ sacchikiriyāya tathāya gato pattoti tathāgato, lokanirodhagāminipaṭipadaṃ tathaṃ gato paṭipannoti tathāgato. Tena yaṃ vuttaṃ bhagavatā – ‘‘loko, bhikkhave, tathāgatena abhisambuddho, lokasmā tathāgato visaṃyutto. Lokasamudayo, bhikkhave, tathāgatena abhisambuddho, lokasamudayo tathāgatassa pahīno. Lokanirodho, bhikkhave , tathāgatena abhisambuddho lokanirodho tathāgatassa sacchikato. Lokanirodhagāminī paṭipadā, bhikkhave, tathāgatena abhisambuddhā, lokanirodhagāminīpaṭipadā tathāgatassa bhāvitā. Yaṃ, bhikkhave, sadevakassa lokassa…pe… anuvicaritaṃ manasā, sabbaṃ taṃ tathāgatena abhisambuddhaṃ. Tasmā ‘tathāgato’ti vuccatī’’ti (a. ni. 4.23). Tassa evampi attho veditabbo. Idampi ca tathāgatassa tathāgatabhāvadīpane mukhamattameva. Sabbākārena pana tathāgatova tathāgatassa tathāgatabhāvaṃ vaṇṇeyya. Yasmā pana sabbabuddhā tathāgataguṇenāpi samasamā, tasmā sabbesaṃ vasena tathāgatānanti āha.

    அரஹந்தானந்தி கிலேஸேஹி ஆரகத்தா, அரீனங் அரானஞ்ச ஹதத்தா, பச்சயாதீ³னங் அரஹத்தா, பாபகரணே ரஹாபா⁴வா ததா²க³தோ அரஹங். ஆரகா ஹி ஸோ ஸப்³ப³கிலேஸேஹி ஸுவிதூ³ரவிதூ³ரே டி²தோ மக்³கே³ன ஸவாஸனானங் கிலேஸானங் பஹீனத்தாதி அரஹங்.

    Arahantānanti kilesehi ārakattā, arīnaṃ arānañca hatattā, paccayādīnaṃ arahattā, pāpakaraṇe rahābhāvā tathāgato arahaṃ. Ārakā hi so sabbakilesehi suvidūravidūre ṭhito maggena savāsanānaṃ kilesānaṃ pahīnattāti arahaṃ.

    ஸோ ததோ ஆரகா நாம, யஸ்ஸ யேனாஸமங்கி³தா;

    So tato ārakā nāma, yassa yenāsamaṅgitā;

    அஸமங்கீ³ ச தோ³ஸேஹி, நாதோ² தேனாரஹங் மதோ.

    Asamaṅgī ca dosehi, nātho tenārahaṃ mato.

    தே சானேன கிலேஸாரயோ மக்³கே³ன ஹதாதி அரீனங் ஹதத்தாபி அரஹங்.

    Te cānena kilesārayo maggena hatāti arīnaṃ hatattāpi arahaṃ.

    யஸ்மா ராகா³தி³ஸங்கா²தா, ஸப்³பே³பி அரயோ ஹதா;

    Yasmā rāgādisaṅkhātā, sabbepi arayo hatā;

    பஞ்ஞாஸத்தே²ன நாதே²ன, தஸ்மாபி அரஹங் மதோ.

    Paññāsatthena nāthena, tasmāpi arahaṃ mato.

    யஞ்சேதங் அவிஜ்ஜாப⁴வதண்ஹாமயனாபி⁴புஞ்ஞாதி³அபி⁴ஸங்கா²ரானங் ஜராமரணனேமி ஆஸவஸமுத³யமயேன அக்கே²ன விஜ்ஜி²த்வா திப⁴வரதே² ஸமாயோஜிதங் அனாதி³காலப்பவத்தங் ஸங்ஸாரசக்கங், தஸ்ஸானேன போ³தி⁴மண்டே³ வீரியபாதே³ஹி ஸீலபத²வியங் பதிட்டா²ய ஸத்³தா⁴ஹத்தே²ன கம்மக்க²யகரங் ஞாணப²ரஸுங் க³ஹெத்வா ஸப்³பே³ அரா ஹதாதி அரானங் ஹதத்தாபி அரஹங்.

    Yañcetaṃ avijjābhavataṇhāmayanābhipuññādiabhisaṅkhārānaṃ jarāmaraṇanemi āsavasamudayamayena akkhena vijjhitvā tibhavarathe samāyojitaṃ anādikālappavattaṃ saṃsāracakkaṃ, tassānena bodhimaṇḍe vīriyapādehi sīlapathaviyaṃ patiṭṭhāya saddhāhatthena kammakkhayakaraṃ ñāṇapharasuṃ gahetvā sabbe arā hatāti arānaṃ hatattāpi arahaṃ.

    அரா ஸங்ஸாரசக்கஸ்ஸ, ஹதா ஞாணாஸினா யதோ;

    Arā saṃsāracakkassa, hatā ñāṇāsinā yato;

    லோகனாதே²ன தேனேஸ, அரஹந்தி பவுச்சதி.

    Lokanāthena tenesa, arahanti pavuccati.

    அக்³க³த³க்கி²ணெய்யத்தா ச சீவராதி³பச்சயே அரஹதி பூஜாவிஸேஸஞ்ச. தேனேவ ச உப்பன்னே ததா²க³தே யே கேசி மஹேஸக்கா² தே³வமனுஸ்ஸா, ந தே அஞ்ஞத்த² பூஜங் கரொந்தி. ததா² ஹி ப்³ரஹ்மா ஸஹம்பதி ஸினேருமத்தேன ரதனதா³மேன ததா²க³தங் பூஜேஸி, யதா²ப³லஞ்ச அஞ்ஞே தே³வா மனுஸ்ஸா ச பி³ம்பி³ஸாரகோஸலராஜாத³யோ. பரினிப்³பு³தம்பி ச ப⁴க³வந்தங் உத்³தி³ஸ்ஸ ச²ன்னவுதிகோடித⁴னங் விஸ்ஸஜ்ஜெத்வா அஸோகமஹாராஜா ஸகலஜம்பு³தீ³பே சதுராஸீதி விஹாரஸஹஸ்ஸானி பதிட்டா²பேஸி, கோ பன வாதோ³ அஞ்ஞேஸங் பூஜாவிஸேஸானந்தி பச்சயாதீ³னங் அரஹத்தாபி அரஹங்.

    Aggadakkhiṇeyyattā ca cīvarādipaccaye arahati pūjāvisesañca. Teneva ca uppanne tathāgate ye keci mahesakkhā devamanussā, na te aññattha pūjaṃ karonti. Tathā hi brahmā sahampati sinerumattena ratanadāmena tathāgataṃ pūjesi, yathābalañca aññe devā manussā ca bimbisārakosalarājādayo. Parinibbutampi ca bhagavantaṃ uddissa channavutikoṭidhanaṃ vissajjetvā asokamahārājā sakalajambudīpe caturāsīti vihārasahassāni patiṭṭhāpesi, ko pana vādo aññesaṃ pūjāvisesānanti paccayādīnaṃ arahattāpi arahaṃ.

    பூஜாவிஸேஸங் ஸஹ பச்சயேஹி, யஸ்மா அயங் அரஹதி லோகனாதோ²;

    Pūjāvisesaṃ saha paccayehi, yasmā ayaṃ arahati lokanātho;

    அத்தா²னுரூபங் அரஹந்தி லோகே, தஸ்மா ஜினோ அரஹதி நாமமேதங்.

    Atthānurūpaṃ arahanti loke, tasmā jino arahati nāmametaṃ.

    யதா² ச லோகே யே கேசி பண்டி³தமானினோ பா³லா அஸிலோகப⁴யேன ரஹோ பாபங் கரொந்தி, ஏவமேஸ ந கதா³சி கரோதீதி பாபகரணே ரஹாபா⁴வதோபி அரஹங்.

    Yathā ca loke ye keci paṇḍitamānino bālā asilokabhayena raho pāpaṃ karonti, evamesa na kadāci karotīti pāpakaraṇe rahābhāvatopi arahaṃ.

    யஸ்மா நத்தி² ரஹோ நாம, பாபகம்மேஸு தாதி³னோ;

    Yasmā natthi raho nāma, pāpakammesu tādino;

    ரஹாபா⁴வேன தேனேஸ, அரஹங் இதி விஸ்ஸுதோ.

    Rahābhāvena tenesa, arahaṃ iti vissuto.

    ஏவங் ஸப்³ப³தா²பி –

    Evaṃ sabbathāpi –

    ஆரகத்தா ஹதத்தா ச, கிலேஸாரீன ஸோ முனி;

    Ārakattā hatattā ca, kilesārīna so muni;

    ஹதஸங்ஸாரசக்காரோ, பச்சயாதீ³ன சாரஹோ;

    Hatasaṃsāracakkāro, paccayādīna cāraho;

    ந ரஹோ கரோதி பாபானி, அரஹங் தேன வுச்சதீதி.

    Na raho karoti pāpāni, arahaṃ tena vuccatīti.

    யஸ்மா பன ஸப்³ப³பு³த்³தா⁴ அரஹத்தகு³ணேனாபி ஸமஸமா, தஸ்மா ஸப்³பே³ஸங் வஸேன ‘‘அரஹந்தான’’ந்தி ஆஹ.

    Yasmā pana sabbabuddhā arahattaguṇenāpi samasamā, tasmā sabbesaṃ vasena ‘‘arahantāna’’nti āha.

    ஸம்மாஸம்பு³த்³தா⁴னந்தி ஸம்மா ஸாமஞ்ச ஸப்³ப³த⁴ம்மானங் பு³த்³த⁴த்தா ஸம்மாஸம்பு³த்³தோ⁴. ததா² ஹேஸ ஸப்³ப³த⁴ம்மே ஸம்மா ஸம்பு³த்³தோ⁴, அபி⁴ஞ்ஞெய்யே த⁴ம்மே அபி⁴ஞ்ஞெய்யதோ பு³த்³தோ⁴, பரிஞ்ஞெய்யே த⁴ம்மே பரிஞ்ஞெய்யதோ, பஹாதப்³பே³ த⁴ம்மே பஹாதப்³ப³தோ, ஸச்சி²காதப்³பே³ த⁴ம்மே ஸச்சி²காதப்³ப³தோ, பா⁴வேதப்³பே³ த⁴ம்மே பா⁴வேதப்³ப³தோ. தேனேவாஹ –

    Sammāsambuddhānanti sammā sāmañca sabbadhammānaṃ buddhattā sammāsambuddho. Tathā hesa sabbadhamme sammā sambuddho, abhiññeyye dhamme abhiññeyyato buddho, pariññeyye dhamme pariññeyyato, pahātabbe dhamme pahātabbato, sacchikātabbe dhamme sacchikātabbato, bhāvetabbe dhamme bhāvetabbato. Tenevāha –

    ‘‘அபி⁴ஞ்ஞெய்யங் அபி⁴ஞ்ஞாதங், பா⁴வேதப்³ப³ஞ்ச பா⁴விதங்;

    ‘‘Abhiññeyyaṃ abhiññātaṃ, bhāvetabbañca bhāvitaṃ;

    பஹாதப்³ப³ங் பஹீனங் மே, தஸ்மா பு³த்³தொ⁴ஸ்மி ப்³ராஹ்மணா’’தி. (ம॰ நி॰ 2.399; ஸு॰ நி॰ 563);

    Pahātabbaṃ pahīnaṃ me, tasmā buddhosmi brāhmaṇā’’ti. (ma. ni. 2.399; su. ni. 563);

    அத² வா சக்கு² து³க்க²ஸச்சங், தஸ்ஸ மூலகாரணபா⁴வேன ஸமுட்டா²பிகா புரிமதண்ஹா ஸமுத³யஸச்சங், உபி⁴ன்னங் அப்பவத்தி நிரோத⁴ஸச்சங், நிரோத⁴ப்பஜானநா படிபதா³ மக்³க³ஸச்சந்தி ஏவங் ஏகேகபது³த்³தா⁴ரேனாபி ஸப்³ப³த⁴ம்மே ஸம்மா ஸாமஞ்ச பு³த்³தோ⁴. ஏஸ நயோ ஸோதகா⁴னஜிவ்ஹாகாயமனேஸு. ஏதேனேவ நயேன ரூபாதீ³னி ச² ஆயதனானி, சக்கு²விஞ்ஞாணாத³யோ ச² விஞ்ஞாணகாயா, சக்கு²ஸம்ப²ஸ்ஸாத³யோ ச² ப²ஸ்ஸா, சக்கு²ஸம்ப²ஸ்ஸஜாத³யோ ச² வேத³னா, ரூபஸஞ்ஞாத³யோ ச² ஸஞ்ஞா, ரூபஸஞ்சேதனாத³யோ ச² சேதனா, ரூபதண்ஹாத³யோ ச² தண்ஹாகாயா, ரூபவிதக்காத³யோ ச² விதக்கா, ரூபவிசாராத³யோ ச² விசாரா, ரூபக்க²ந்தா⁴த³யோ பஞ்சக்க²ந்தா⁴, த³ஸ கஸிணானி, த³ஸ அனுஸ்ஸதியோ, உத்³து⁴மாதகஸஞ்ஞாதி³வஸேன த³ஸ ஸஞ்ஞா, கேஸாத³யோ த்³வத்திங்ஸாகாரா, த்³வாத³ஸாயதனானி, அட்டா²ரஸ தா⁴துயோ, காமப⁴வாத³யோ நவ ப⁴வா, பட²மாதீ³னி சத்தாரி ஜா²னானி, மெத்தாபா⁴வனாத³யோ சதஸ்ஸோ அப்பமஞ்ஞா, சதஸ்ஸோ அரூபஸமாபத்தியோ, படிலோமதோ ஜராமரணாதீ³னி, அனுலோமதோ அவிஜ்ஜாதீ³னி படிச்சஸமுப்பாத³ங்கா³னி ச யோஜேதப்³பா³னி. தத்ராயங் ஏகபத³யோஜனா – ஜராமரணங் து³க்க²ஸச்சங், ஜாதி ஸமுத³யஸச்சங், உபி⁴ன்னங் நிஸ்ஸரணங் நிரோத⁴ஸச்சங், நிரோத⁴ப்பஜானநா படிபதா³ மக்³க³ஸச்சந்தி ஏவங் ஏகேகபது³த்³தா⁴ரேன ஸப்³ப³த⁴ம்மே ஸம்மா ஸாமஞ்ச பு³த்³தோ⁴ அனுபு³த்³தோ⁴ படிவித்³தோ⁴. யங் வா பன கிஞ்சி அத்தி² நெய்யங் நாம, ஸப்³ப³ஸ்ஸ ஸம்மா ஸம்பு³த்³த⁴த்தா விமொக்க²ந்திகஞாணவஸேன ஸம்மாஸம்பு³த்³தோ⁴. தஸ்ஸ பன விபா⁴கோ³ உபரி ஆவி ப⁴விஸ்ஸதீதி. யஸ்மா பன ஸப்³ப³பு³த்³தா⁴ ஸம்மாஸம்பு³த்³த⁴கு³ணேனாபி ஸமஸமா, தஸ்மா ஸப்³பே³ஸங் வஸேன ‘‘ஸம்மாஸம்பு³த்³தா⁴ன’’ந்தி ஆஹ.

    Atha vā cakkhu dukkhasaccaṃ, tassa mūlakāraṇabhāvena samuṭṭhāpikā purimataṇhā samudayasaccaṃ, ubhinnaṃ appavatti nirodhasaccaṃ, nirodhappajānanā paṭipadā maggasaccanti evaṃ ekekapaduddhārenāpi sabbadhamme sammā sāmañca buddho. Esa nayo sotaghānajivhākāyamanesu. Eteneva nayena rūpādīni cha āyatanāni, cakkhuviññāṇādayo cha viññāṇakāyā, cakkhusamphassādayo cha phassā, cakkhusamphassajādayo cha vedanā, rūpasaññādayo cha saññā, rūpasañcetanādayo cha cetanā, rūpataṇhādayo cha taṇhākāyā, rūpavitakkādayo cha vitakkā, rūpavicārādayo cha vicārā, rūpakkhandhādayo pañcakkhandhā, dasa kasiṇāni, dasa anussatiyo, uddhumātakasaññādivasena dasa saññā, kesādayo dvattiṃsākārā, dvādasāyatanāni, aṭṭhārasa dhātuyo, kāmabhavādayo nava bhavā, paṭhamādīni cattāri jhānāni, mettābhāvanādayo catasso appamaññā, catasso arūpasamāpattiyo, paṭilomato jarāmaraṇādīni, anulomato avijjādīni paṭiccasamuppādaṅgāni ca yojetabbāni. Tatrāyaṃ ekapadayojanā – jarāmaraṇaṃ dukkhasaccaṃ, jāti samudayasaccaṃ, ubhinnaṃ nissaraṇaṃ nirodhasaccaṃ, nirodhappajānanā paṭipadā maggasaccanti evaṃ ekekapaduddhārena sabbadhamme sammā sāmañca buddho anubuddho paṭividdho. Yaṃ vā pana kiñci atthi neyyaṃ nāma, sabbassa sammā sambuddhattā vimokkhantikañāṇavasena sammāsambuddho. Tassa pana vibhāgo upari āvi bhavissatīti. Yasmā pana sabbabuddhā sammāsambuddhaguṇenāpi samasamā, tasmā sabbesaṃ vasena ‘‘sammāsambuddhāna’’nti āha.

    38. இதா³னி பரியந்தபாரிஸுத்³தி⁴அபரியந்தபாரிஸுத்³தி⁴ஸீலத்³வயே ஏகேகமேவ ஸீலங் பஞ்சதா⁴ பி⁴ந்தி³த்வா த³ஸ்ஸேதுங் அத்தி² ஸீலங் பரியந்தங், அத்தி² ஸீலங் அபரியந்தந்திஆதி³மாஹ. இதரேஸு பன தீஸு ஸீலேஸு ததா²விதோ⁴ பே⁴தோ³ நத்தீ²தி. தத்த² லாப⁴பரியந்தந்தி லாபே⁴ன பரியந்தோ பே⁴தோ³ ஏதஸ்ஸாதி லாப⁴பரியந்தங். ஏவங் ஸேஸானிபி. யஸோதி பனெத்த² பரிவாரோ. இதா⁴தி இமஸ்மிங் லோகே. ஏகச்சோதி ஏகோ. லாப⁴ஹேதூதி லாபோ⁴யேவ ஹேது லாப⁴ஹேது, தஸ்மா லாப⁴ஹேதுதோதி வுத்தங் ஹோதி. ஹெத்வத்தே² நிஸ்ஸக்கவசனங். ‘‘லாப⁴பச்சயா லாப⁴காரணா’’தி தஸ்ஸேவ வேவசனங். ஹேதுமேவ ஹி படிச்ச ஏதங் ப²லமேதீதி பச்சயோதி ச, ப²லுப்பத்திங் காரயதீதி காரணந்தி ச வுச்சதி.

    38. Idāni pariyantapārisuddhiapariyantapārisuddhisīladvaye ekekameva sīlaṃ pañcadhā bhinditvā dassetuṃ atthi sīlaṃ pariyantaṃ, atthi sīlaṃ apariyantantiādimāha. Itaresu pana tīsu sīlesu tathāvidho bhedo natthīti. Tattha lābhapariyantanti lābhena pariyanto bhedo etassāti lābhapariyantaṃ. Evaṃ sesānipi. Yasoti panettha parivāro. Idhāti imasmiṃ loke. Ekaccoti eko. Lābhahetūti lābhoyeva hetu lābhahetu, tasmā lābhahetutoti vuttaṃ hoti. Hetvatthe nissakkavacanaṃ. ‘‘Lābhapaccayā lābhakāraṇā’’ti tasseva vevacanaṃ. Hetumeva hi paṭicca etaṃ phalametīti paccayoti ca, phaluppattiṃ kārayatīti kāraṇanti ca vuccati.

    யதா²ஸமாதி³ன்னந்தி யங் யங் ஸமாதி³ன்னங் க³ஹிதங். வீதிக்கமதீதி அஜ்ஜா²சரதி. ஏவரூபானீதி ஏவங்ஸபா⁴வானி, வுத்தப்பகாரானீதி அதி⁴ப்பாயோ. ஸீலானீதி க³ஹட்ட²ஸீலானி வா ஹொந்து பப்³ப³ஜிதஸீலானி வா, யேஸங் ஆதி³ம்ஹி வா அந்தே வா ஏகங் பி⁴ன்னங், தானி பரியந்தே சி²ன்னஸாடகோ விய க²ண்டா³னி. யேஸங் வேமஜ்ஜே² ஏகங் பி⁴ன்னங், தானி மஜ்ஜே² வினிவித்³த⁴ஸாடகோ விய சி²த்³தா³னி. யேஸங் படிபாடியா த்³வே வா தீணி வா பி⁴ன்னானி, தானி பிட்டி²யா வா குச்சி²யா வா உட்டி²தேன தீ³க⁴வட்டாதி³ஸண்டா²னேன விஸபா⁴க³வண்ணேன காளரத்தாதீ³னங் அஞ்ஞதரஸரீரவண்ணா கா³வீ விய ஸப³லானி. யேஸங் அந்தரந்தரா ஏகேகானி பி⁴ன்னானி, தானி அந்தரந்தரா விஸபா⁴க³வண்ணபி³ந்து³விசித்ரா கா³வீ விய கம்மாஸானி. அவிஸேஸேன வா ஸப்³பா³னிபி ஸத்தவிதே⁴ன மேது²னஸங்யோகே³ன கோதூ⁴பனாஹாதீ³ஹி ச பாபத⁴ம்மேஹி உபஹதத்தா க²ண்டா³னி சி²த்³தா³னி ஸப³லானி கம்மாஸானீதி. தானியேவ தண்ஹாதா³ஸப்³யதோ மோசெத்வா பு⁴ஜிஸ்ஸபா⁴வாகரணேன ந பு⁴ஜிஸ்ஸானி. பு³த்³தா⁴தீ³ஹி விஞ்ஞூஹி ந பஸத்த²த்தா ந விஞ்ஞுப்பஸத்தா²னி. தண்ஹாதி³ட்டீ²ஹி பராமட்ட²த்தா, கேனசி வா ‘‘அயங் தே ஸீலேஸு தோ³ஸோ’’தி பராமட்டு²ங் ஸக்குணெய்யதாய பராமட்டா²னி. உபசாரஸமாதி⁴ங் அப்பனாஸமாதி⁴ங் வா, அத² வா மக்³க³ஸமாதி⁴ங் ப²லஸமாதி⁴ங் வா ந ஸங்வத்தயந்தீதி அஸமாதி⁴ஸங்வத்தனிகானி. ந ஸமாதி⁴ஸங்வத்தனிகானீதிபி பாடோ².

    Yathāsamādinnanti yaṃ yaṃ samādinnaṃ gahitaṃ. Vītikkamatīti ajjhācarati. Evarūpānīti evaṃsabhāvāni, vuttappakārānīti adhippāyo. Sīlānīti gahaṭṭhasīlāni vā hontu pabbajitasīlāni vā, yesaṃ ādimhi vā ante vā ekaṃ bhinnaṃ, tāni pariyante chinnasāṭako viya khaṇḍāni. Yesaṃ vemajjhe ekaṃ bhinnaṃ, tāni majjhe vinividdhasāṭako viya chiddāni. Yesaṃ paṭipāṭiyā dve vā tīṇi vā bhinnāni, tāni piṭṭhiyā vā kucchiyā vā uṭṭhitena dīghavaṭṭādisaṇṭhānena visabhāgavaṇṇena kāḷarattādīnaṃ aññatarasarīravaṇṇā gāvī viya sabalāni. Yesaṃ antarantarā ekekāni bhinnāni, tāni antarantarā visabhāgavaṇṇabinduvicitrā gāvī viya kammāsāni. Avisesena vā sabbānipi sattavidhena methunasaṃyogena kodhūpanāhādīhi ca pāpadhammehi upahatattā khaṇḍāni chiddāni sabalāni kammāsānīti. Tāniyeva taṇhādāsabyato mocetvā bhujissabhāvākaraṇena na bhujissāni. Buddhādīhi viññūhi na pasatthattā na viññuppasatthāni. Taṇhādiṭṭhīhi parāmaṭṭhattā, kenaci vā ‘‘ayaṃ te sīlesu doso’’ti parāmaṭṭhuṃ sakkuṇeyyatāya parāmaṭṭhāni. Upacārasamādhiṃ appanāsamādhiṃ vā, atha vā maggasamādhiṃ phalasamādhiṃ vā na saṃvattayantīti asamādhisaṃvattanikāni. Na samādhisaṃvattanikānītipi pāṭho.

    கேசி பன ‘‘க²ண்டா³னீதி குஸலானங் த⁴ம்மானங் அப்பதிட்டா²பூ⁴தத்தா, சி²த்³தா³னீதிபி ஏவங். ஸப³லானீதி விவண்ணகரணத்தா, கம்மாஸானீதிபி ஏவங். ந பு⁴ஜிஸ்ஸானீதி தண்ஹாதா³ஸப்³யங் க³தத்தா. ந விஞ்ஞுப்பஸத்தா²னீதி குஸலேஹி க³ரஹிதத்தா. பராமட்டா²னீதி தண்ஹாய க³ஹிதத்தா. அஸமாதி⁴ஸங்வத்தனிகானீதி விப்படிஸாரவத்து²பூ⁴தத்தா’’தி ஏவமத்த²ங் வண்ணயந்தி.

    Keci pana ‘‘khaṇḍānīti kusalānaṃ dhammānaṃ appatiṭṭhābhūtattā, chiddānītipi evaṃ. Sabalānīti vivaṇṇakaraṇattā, kammāsānītipi evaṃ. Na bhujissānīti taṇhādāsabyaṃ gatattā. Na viññuppasatthānīti kusalehi garahitattā. Parāmaṭṭhānīti taṇhāya gahitattā. Asamādhisaṃvattanikānīti vippaṭisāravatthubhūtattā’’ti evamatthaṃ vaṇṇayanti.

    ந அவிப்படிஸாரவத்து²கானீதி விப்படிஸாராவஹத்தா அவிப்படிஸாரஸ்ஸ பதிட்டா² ந ஹொந்தீதி அத்தோ². ந பாமோஜ்ஜவத்து²கானீதி அவிப்படிஸாரஜாய து³ப்³ப³லபீதியா ந வத்து²பூ⁴தானி தஸ்ஸா அனாவஹத்தா . ஏவங் ஸேஸேஸுபி யோஜனா காதப்³பா³. ந பீதிவத்து²கானீதி து³ப்³ப³லபீதிஜாய ப³லவபீதியா ந வத்து²பூ⁴தானி. ந பஸ்ஸத்³தி⁴வத்து²கானீதி ப³லவபீதிஜாய காயசித்தபஸ்ஸத்³தி⁴யா ந வத்து²பூ⁴தானி. ந ஸுக²வத்து²கானீதி பஸ்ஸத்³தி⁴ஜஸ்ஸ காயிகசேதஸிகஸுக²ஸ்ஸ ந வத்து²பூ⁴தானி. ந ஸமாதி⁴வத்து²கானீதி ஸுக²ஜஸ்ஸ ஸமாதி⁴ஸ்ஸ ந வத்து²பூ⁴தானி. ந யதா²பூ⁴தஞாணத³ஸ்ஸனவத்து²கானீதி ஸமாதி⁴பத³ட்டா²னஸ்ஸ யதா²பூ⁴தஞாணத³ஸ்ஸனஸ்ஸ ந வத்து²பூ⁴தானி.

    Na avippaṭisāravatthukānīti vippaṭisārāvahattā avippaṭisārassa patiṭṭhā na hontīti attho. Na pāmojjavatthukānīti avippaṭisārajāya dubbalapītiyā na vatthubhūtāni tassā anāvahattā . Evaṃ sesesupi yojanā kātabbā. Na pītivatthukānīti dubbalapītijāya balavapītiyā na vatthubhūtāni. Na passaddhivatthukānīti balavapītijāya kāyacittapassaddhiyā na vatthubhūtāni. Na sukhavatthukānīti passaddhijassa kāyikacetasikasukhassa na vatthubhūtāni. Na samādhivatthukānīti sukhajassa samādhissa na vatthubhūtāni. Na yathābhūtañāṇadassanavatthukānīti samādhipadaṭṭhānassa yathābhūtañāṇadassanassa na vatthubhūtāni.

    ந ஏகந்தனிப்³பி³தா³யாதிஆதீ³ஸு ந-காரமேவ ஆஹரித்வா ‘‘ந விராகா³யா’’திஆதி³னா நயேன ஸேஸபதே³ஹிபி யோஜேதப்³ப³ங். ந விராகா³யாதிஆதீ³ஸு ஸனகாரோ வா பாடோ². தத்த² ஏகந்தனிப்³பி³தா³யாதி ஏகந்தேன வட்டே நிப்³பி³ந்த³னத்தா²ய ந ஸங்வத்தந்தீதி ஸம்ப³ந்தோ⁴. ஏவங் ஸேஸேஸுபி யோஜேதப்³ப³ங். விராகா³யாதி வட்டே விரஜ்ஜனத்தா²ய. நிரோதா⁴யாதி வட்டஸ்ஸ நிரோத⁴னத்தா²ய. உபஸமாயாதி நிரோதி⁴தஸ்ஸ புன அனுப்பத்திவஸேன வட்டஸ்ஸ உபஸமனத்தா²ய. அபி⁴ஞ்ஞாயாதி வட்டஸ்ஸ அபி⁴ஜானநத்தா²ய. ஸம்போ³தா⁴யாதி கிலேஸனித்³தா³விக³மேன வட்டதோ பபு³ஜ்ஜ²னத்தா²ய. நிப்³பா³னாயாதி அமதனிப்³பா³னத்தா²ய.

    Na ekantanibbidāyātiādīsu na-kārameva āharitvā ‘‘na virāgāyā’’tiādinā nayena sesapadehipi yojetabbaṃ. Na virāgāyātiādīsu sanakāro vā pāṭho. Tattha ekantanibbidāyāti ekantena vaṭṭe nibbindanatthāya na saṃvattantīti sambandho. Evaṃ sesesupi yojetabbaṃ. Virāgāyāti vaṭṭe virajjanatthāya. Nirodhāyāti vaṭṭassa nirodhanatthāya. Upasamāyāti nirodhitassa puna anuppattivasena vaṭṭassa upasamanatthāya. Abhiññāyāti vaṭṭassa abhijānanatthāya. Sambodhāyāti kilesaniddāvigamena vaṭṭato pabujjhanatthāya. Nibbānāyāti amatanibbānatthāya.

    யதா²ஸமாதி³ன்னங் ஸிக்கா²பத³ங் வீதிக்கமாயாதி யதா²ஸமாதி³ன்னஸ்ஸ ஸிக்கா²பத³ஸ்ஸ வீதிக்கமனத்தா²ய. விப⁴த்திவிபல்லாஸவஸேன பனெத்த² உபயோக³வசனங் கதங். சித்தம்பி ந உப்பாதே³தீதி சித்துப்பாத³ஸுத்³தி⁴யா ஸீலஸ்ஸ அதிவிஸுத்³த⁴பா⁴வத³ஸ்ஸனத்த²ங் வுத்தங், ந பன சித்துப்பாத³மத்தேன ஸீலங் பி⁴ஜ்ஜதி. கிங் ஸோ வீதிக்கமிஸ்ஸதீதி கிமத்த²ங் வீதிக்கமங் கரிஸ்ஸதி, நேவ வீதிக்கமங் கரிஸ்ஸதீதி அத்தோ². அக²ண்டா³னீதிஆதீ³னி ஹெட்டா² வுத்தபடிபக்க²னயேன வேதி³தப்³பா³னி. ந க²ண்டா³னீதிபி பாடோ². ‘‘ஏகந்தனிப்³பி³தா³யா’’திஆதீ³ஸு ஏகந்தேன வட்டே நிப்³பி³ந்த³னத்தா²யாதிஆதி³னா நயேன யோஜேதப்³ப³ங் . எத்த² பன நிப்³பி³தா³யாதி விபஸ்ஸனா. விராகா³யாதி மக்³கோ³. நிரோதா⁴ய உபஸமாயாதி நிப்³பா³னங். அபி⁴ஞ்ஞாய ஸம்போ³தா⁴யாதி மக்³கோ³. நிப்³பா³னாயாதி நிப்³பா³னமேவ. ஏகஸ்மிங் டா²னே விபஸ்ஸனா, த்³வீஸு மக்³கோ³, தீஸு நிப்³பா³னங் வுத்தந்தி ஏவங் அவத்தா²னகதா² வேதி³தப்³பா³. பரியாயேன பன ஸப்³பா³னிபேதானி மக்³க³வேவசனானிபி நிப்³பா³னவேவசனானிபி ஹொந்தியேவ.

    Yathāsamādinnaṃ sikkhāpadaṃ vītikkamāyāti yathāsamādinnassa sikkhāpadassa vītikkamanatthāya. Vibhattivipallāsavasena panettha upayogavacanaṃ kataṃ. Cittampi na uppādetīti cittuppādasuddhiyā sīlassa ativisuddhabhāvadassanatthaṃ vuttaṃ, na pana cittuppādamattena sīlaṃ bhijjati. Kiṃ so vītikkamissatīti kimatthaṃ vītikkamaṃ karissati, neva vītikkamaṃ karissatīti attho. Akhaṇḍānītiādīni heṭṭhā vuttapaṭipakkhanayena veditabbāni. Na khaṇḍānītipi pāṭho. ‘‘Ekantanibbidāyā’’tiādīsu ekantena vaṭṭe nibbindanatthāyātiādinā nayena yojetabbaṃ . Ettha pana nibbidāyāti vipassanā. Virāgāyāti maggo. Nirodhāya upasamāyāti nibbānaṃ. Abhiññāya sambodhāyāti maggo. Nibbānāyāti nibbānameva. Ekasmiṃ ṭhāne vipassanā, dvīsu maggo, tīsu nibbānaṃ vuttanti evaṃ avatthānakathā veditabbā. Pariyāyena pana sabbānipetāni maggavevacanānipi nibbānavevacanānipi hontiyeva.

    39. இதா³னி பரியந்தாபரியந்தவஸேன விஜ்ஜமானபபே⁴த³ங் த³ஸ்ஸெத்வா புன த⁴ம்மவஸேன ஜாதிவஸேன பச்சயவஸேன ஸம்பயுத்தவஸேன ஸீலஸ்ஸ பபே⁴த³ங் த³ஸ்ஸேதுங் கிங் ஸீலந்திஆதி³மாஹ. தத்த² ஸமுட்டா²தி ஏதேனாதி ஸமுட்டா²னங். பச்சயஸ்ஸேதங் நாமங். கிங் ஸமுட்டா²னமஸ்ஸாதி கிங்ஸமுட்டா²னங். கதினங் த⁴ம்மானங் ஸமோதா⁴னங் ஸமவாயோ அஸ்ஸாதி கதித⁴ம்மஸமோதா⁴னங்.

    39. Idāni pariyantāpariyantavasena vijjamānapabhedaṃ dassetvā puna dhammavasena jātivasena paccayavasena sampayuttavasena sīlassa pabhedaṃ dassetuṃ kiṃ sīlantiādimāha. Tattha samuṭṭhāti etenāti samuṭṭhānaṃ. Paccayassetaṃ nāmaṃ. Kiṃ samuṭṭhānamassāti kiṃsamuṭṭhānaṃ. Katinaṃ dhammānaṃ samodhānaṃ samavāyo assāti katidhammasamodhānaṃ.

    சேதனா ஸீலந்தி பாணாதிபாதாதீ³ஹி விரமந்தஸ்ஸ, வத்தபடிபத்திங் வா பூரெந்தஸ்ஸ சேதனா. சேதஸிகங் ஸீலந்தி பாணாதிபாதாதீ³ஹி விரமந்தஸ்ஸ விரதி. அபிச சேதனா ஸீலங் நாம பாணாதிபாதாதீ³னி பஜஹந்தஸ்ஸ ஸத்தகம்மபத²சேதனா . சேதஸிகங் ஸீலங் நாம ‘‘அபி⁴ஜ்ஜ²ங் லோகே பஹாய விக³தாபி⁴ஜ்ஜே²ன சேதஸா விஹரதீ’’திஆதி³னா (தீ³॰ நி॰ 1.217) நயேன வுத்தா அனபி⁴ஜ்ஜா²அப்³யாபாத³ஸம்மாதி³ட்டி²த⁴ம்மா. ஸங்வரோ ஸீலந்தி எத்த² பஞ்சவிதோ⁴ ஸங்வரோ வேதி³தப்³போ³ – பாதிமொக்க²ஸங்வரோ, ஸதிஸங்வரோ, ஞாணஸங்வரோ, க²ந்திஸங்வரோ, வீரியஸங்வரோதி. தத்த² ‘‘இமினா பாதிமொக்க²ஸங்வரேன உபேதோ ஹோதி ஸமுபேதோ’’தி (விப⁴॰ 511) அயங் பாதிமொக்க²ஸங்வரோ. ‘‘ரக்க²தி சக்கு²ந்த்³ரியங், சக்கு²ந்த்³ரியே ஸங்வரங் ஆபஜ்ஜதீ’’தி (தீ³॰ நி॰ 1.213; ம॰ நி॰ 1.295; ஸங்॰ நி॰ 4.239; அ॰ நி॰ 3.16) அயங் ஸதிஸங்வரோ.

    Cetanāsīlanti pāṇātipātādīhi viramantassa, vattapaṭipattiṃ vā pūrentassa cetanā. Cetasikaṃ sīlanti pāṇātipātādīhi viramantassa virati. Apica cetanā sīlaṃ nāma pāṇātipātādīni pajahantassa sattakammapathacetanā . Cetasikaṃ sīlaṃ nāma ‘‘abhijjhaṃ loke pahāya vigatābhijjhena cetasā viharatī’’tiādinā (dī. ni. 1.217) nayena vuttā anabhijjhāabyāpādasammādiṭṭhidhammā. Saṃvaro sīlanti ettha pañcavidho saṃvaro veditabbo – pātimokkhasaṃvaro, satisaṃvaro, ñāṇasaṃvaro, khantisaṃvaro, vīriyasaṃvaroti. Tattha ‘‘iminā pātimokkhasaṃvarena upeto hoti samupeto’’ti (vibha. 511) ayaṃ pātimokkhasaṃvaro. ‘‘Rakkhati cakkhundriyaṃ, cakkhundriye saṃvaraṃ āpajjatī’’ti (dī. ni. 1.213; ma. ni. 1.295; saṃ. ni. 4.239; a. ni. 3.16) ayaṃ satisaṃvaro.

    ‘‘யானி ஸோதானி லோகஸ்மிங், (அஜிதாதி ப⁴க³வா;)

    ‘‘Yāni sotāni lokasmiṃ, (ajitāti bhagavā;)

    ஸதி தேஸங் நிவாரணங்;

    Sati tesaṃ nivāraṇaṃ;

    ஸோதானங் ஸங்வரங் ப்³ரூமி, பஞ்ஞாயேதே பிதீ⁴யரே’’தி. (ஸு॰ நி॰ 1041) –

    Sotānaṃ saṃvaraṃ brūmi, paññāyete pidhīyare’’ti. (su. ni. 1041) –

    அயங் ஞாணஸங்வரோ. பச்சயபடிஸேவனம்பி எத்தே²வ ஸமோதா⁴னங் க³ச்ச²தி. யோ பனாயங் ‘‘க²மோ ஹோதி ஸீதஸ்ஸ உண்ஹஸ்ஸா’’திஆதி³னா (ம॰ நி॰ 1.24; அ॰ நி॰ 4.114; 6.58) நயேன ஆக³தோ, அயங் க²ந்திஸங்வரோ நாம. யோ சாயங் ‘‘உப்பன்னங் காமவிதக்கங் நாதி⁴வாஸேதீ’’திஆதி³னா (ம॰ நி॰ 1.26; அ॰ நி॰ 4.114; 6.58) நயேன ஆக³தோ, அயங் வீரியஸங்வரோ நாம. ஆஜீவபாரிஸுத்³தி⁴பி எத்தே²வ ஸமோதா⁴னங் க³ச்ச²தி. இதி அயங் பஞ்சவிதோ⁴பி ஸங்வரோ, யா ச பாபபீ⁴ருகானங் குலபுத்தானங் ஸம்பத்தவத்து²தோ விரதி, ஸப்³ப³மேதங் ஸங்வரஸீலந்தி வேதி³தப்³ப³ங். அவீதிக்கமோ ஸீலந்தி ஸமாதி³ன்னஸீலஸ்ஸ காயிகவாசஸிகோ அவீதிக்கமோ. இத³ங் தாவ கிங் ஸீலந்தி பஞ்ஹஸ்ஸ விஸ்ஸஜ்ஜனங்.

    Ayaṃ ñāṇasaṃvaro. Paccayapaṭisevanampi ettheva samodhānaṃ gacchati. Yo panāyaṃ ‘‘khamo hoti sītassa uṇhassā’’tiādinā (ma. ni. 1.24; a. ni. 4.114; 6.58) nayena āgato, ayaṃ khantisaṃvaro nāma. Yo cāyaṃ ‘‘uppannaṃ kāmavitakkaṃ nādhivāsetī’’tiādinā (ma. ni. 1.26; a. ni. 4.114; 6.58) nayena āgato, ayaṃ vīriyasaṃvaro nāma. Ājīvapārisuddhipi ettheva samodhānaṃ gacchati. Iti ayaṃ pañcavidhopi saṃvaro, yā ca pāpabhīrukānaṃ kulaputtānaṃ sampattavatthuto virati, sabbametaṃ saṃvarasīlanti veditabbaṃ. Avītikkamo sīlanti samādinnasīlassa kāyikavācasiko avītikkamo. Idaṃ tāva kiṃ sīlanti pañhassa vissajjanaṃ.

    கதி ஸீலானீதி பஞ்ஹஸ்ஸ விஸ்ஸஜ்ஜனே குஸலஸீலங் அகுஸலஸீலங் அப்³யாகதஸீலந்தி எத்த² யஸ்மா லோகே தேஸங் தேஸங் ஸத்தானங் பகதி ஸீலந்தி வுச்சதி, யங் ஸந்தா⁴ய ‘‘அயங் ஸுக²ஸீலோ, அயங் து³க்க²ஸீலோ, அயங் கலஹஸீலோ, அயங் மண்ட³னஸீலோ’’தி ப⁴ணந்தி. தஸ்மா தேன பரியாயேன அத்து²த்³தா⁴ரவஸேன அகுஸலஸீலமபி ஸீலந்தி வுத்தங். தங் பன ‘‘ஸுத்வான ஸங்வரே பஞ்ஞா’’தி (படி॰ ம॰ 1.37) வசனதோ இதா⁴தி⁴ப்பேதஸீலங் ந ஹோதீதி.

    Kati sīlānīti pañhassa vissajjane kusalasīlaṃ akusalasīlaṃ abyākatasīlanti ettha yasmā loke tesaṃ tesaṃ sattānaṃ pakati sīlanti vuccati, yaṃ sandhāya ‘‘ayaṃ sukhasīlo, ayaṃ dukkhasīlo, ayaṃ kalahasīlo, ayaṃ maṇḍanasīlo’’ti bhaṇanti. Tasmā tena pariyāyena atthuddhāravasena akusalasīlamapi sīlanti vuttaṃ. Taṃ pana ‘‘sutvāna saṃvare paññā’’ti (paṭi. ma. 1.37) vacanato idhādhippetasīlaṃ na hotīti.

    யஸ்மா பன சேதனாதி³பே⁴த³ஸ்ஸ ஸீலஸ்ஸ ஸம்பயுத்தசித்தங் ஸமுட்டா²னங், தஸ்மா குஸலசித்தஸமுட்டா²னங் குஸலஸீலந்திஆதி³மாஹ.

    Yasmā pana cetanādibhedassa sīlassa sampayuttacittaṃ samuṭṭhānaṃ, tasmā kusalacittasamuṭṭhānaṃ kusalasīlantiādimāha.

    ஸங்வரஸமோதா⁴னங் ஸீலந்தி ஸங்வரஸம்பயுத்தக²ந்தா⁴. தே ஹி ஸங்வரேன ஸமாக³தா மிஸ்ஸீபூ⁴தாதி ஸங்வரஸமோதா⁴னந்தி வுத்தா. ஏவங் அவீதிக்கமஸமோதா⁴னங் ஸீலம்பி வேதி³தப்³ப³ங். ததா²பா⁴வே ஜாதசேதனா ஸமோதா⁴னங் ஸீலந்தி ஸங்வரபா⁴வே அவீதிக்கமபா⁴வே ஜாதசேதனாஸம்பயுத்தா க²ந்தா⁴. யஸ்மா ச தீஸுபி சேதேஸு தங்ஸம்பயுத்தா த⁴ம்மா அதி⁴ப்பேதா, தஸ்மா சேதனாஸமோதா⁴னேன சேதஸிகானம்பி ஸங்க³ஹிதத்தா சேதஸிகஸமோதா⁴னஸீலங் விஸுங் ந நித்³தி³ட்ட²ந்தி வேதி³தப்³ப³ங். ஹெட்டா² சேதனாத³யோ த⁴ம்மா ‘‘ஸீல’’ந்தி வுத்தா. ந கேவலங் தே ஏவ ஸீலங், தங்ஸம்பயுத்தா த⁴ம்மாபி ஸீலமேவாதி த³ஸ்ஸனத்த²ங் அயங் திகோ வுத்தோதி வேதி³தப்³போ³.

    Saṃvarasamodhānaṃ sīlanti saṃvarasampayuttakhandhā. Te hi saṃvarena samāgatā missībhūtāti saṃvarasamodhānanti vuttā. Evaṃ avītikkamasamodhānaṃ sīlampi veditabbaṃ. Tathābhāve jātacetanā samodhānaṃ sīlanti saṃvarabhāve avītikkamabhāve jātacetanāsampayuttā khandhā. Yasmā ca tīsupi cetesu taṃsampayuttā dhammā adhippetā, tasmā cetanāsamodhānena cetasikānampi saṅgahitattā cetasikasamodhānasīlaṃ visuṃ na niddiṭṭhanti veditabbaṃ. Heṭṭhā cetanādayo dhammā ‘‘sīla’’nti vuttā. Na kevalaṃ te eva sīlaṃ, taṃsampayuttā dhammāpi sīlamevāti dassanatthaṃ ayaṃ tiko vuttoti veditabbo.

    40. இதா³னி யஸ்மா சேதனாசேதஸிகா ஸங்வராவீதிக்கமாயேவ ஹொந்தி ந விஸுங், தஸ்மா ஸங்வராவீதிக்கமேயேவ யாவ அரஹத்தமக்³கா³ ஸாதா⁴ரணக்கமேன யோஜெந்தோ பாணாதிபாதங் ஸங்வரட்டே²ன ஸீலங், அவீதிக்கமட்டே²ன ஸீலந்திஆதி³மாஹ. பாணாதிபாதா வேரமணிஆத³யோ ஹி யஸ்மா அத்தனோ அத்தனோ பச்சனீகங் ஸங்வரந்தி, தங் ந வீதிக்கமந்தி ச, தஸ்மா ஸங்வரணதோ அவீதிக்கமனதோ ச ஸங்வரட்டே²ன ஸீலங் அவீதிக்கமட்டே²ன ஸீலங் நாம ஹோதி. தத்த² பாணாதிபாதங் ஸங்வரட்டே²னாதி பாணாதிபாதஸ்ஸ பித³ஹனட்டே²ன ஸீலங். கிங் தங்? பாணாதிபாதா வேரமணீ. ஸா ச தங் ஸங்வரந்தீயேவ தங் ந வீதிக்கமதீதி அவீதிக்கமட்டே²ன ஸீலங். ஏவமேவ அதி³ன்னாதா³னா வேரமணிஆத³யோ அனபி⁴ஜ்ஜா²அப்³யாபாத³ஸம்மாதி³ட்டி²யோ யோஜேதப்³பா³.

    40. Idāni yasmā cetanācetasikā saṃvarāvītikkamāyeva honti na visuṃ, tasmā saṃvarāvītikkameyeva yāva arahattamaggā sādhāraṇakkamena yojento pāṇātipātaṃ saṃvaraṭṭhena sīlaṃ, avītikkamaṭṭhena sīlantiādimāha. Pāṇātipātā veramaṇiādayo hi yasmā attano attano paccanīkaṃ saṃvaranti, taṃ na vītikkamanti ca, tasmā saṃvaraṇato avītikkamanato ca saṃvaraṭṭhena sīlaṃ avītikkamaṭṭhena sīlaṃ nāma hoti. Tattha pāṇātipātaṃ saṃvaraṭṭhenāti pāṇātipātassa pidahanaṭṭhena sīlaṃ. Kiṃ taṃ? Pāṇātipātā veramaṇī. Sā ca taṃ saṃvarantīyeva taṃ na vītikkamatīti avītikkamaṭṭhena sīlaṃ. Evameva adinnādānā veramaṇiādayo anabhijjhāabyāpādasammādiṭṭhiyo yojetabbā.

    பாணாதிபாதந்திஆதீ³ஸு பன த³ஸஸு அகுஸலகம்மபதே²ஸு பாணஸ்ஸ அதிபாதோ பாணாதிபாதோ. பாணவதோ⁴ பாணகா⁴தோதி வுத்தங் ஹோதி. பாணோதி செத்த² வோஹாரதோ ஸத்தோ, பரமத்த²தோ ஜீவிதிந்த்³ரியங். தஸ்மிங் பன பாணே பாணஸஞ்ஞினோ ஜீவிதிந்த்³ரியுபச்சே²த³கஉபக்கமஸமுட்டா²பிகா காயவசீத்³வாரானங் அஞ்ஞதரத்³வாரப்பவத்தா வத⁴கசேதனா பாணாதிபாதோ. ஸோ கு³ணவிரஹிதேஸு திரச்சா²னக³தாதீ³ஸு பாணேஸு கு²த்³த³கே பாணே அப்பஸாவஜ்ஜோ, மஹாஸரீரே மஹாஸாவஜ்ஜோ. கஸ்மா? பயோக³மஹந்ததாய. பயோக³ஸமத்தேபி வத்து²மஹந்ததாய. கு³ணவந்தேஸு மனுஸ்ஸாதீ³ஸு அப்பகு³ணே பாணே அப்பஸாவஜ்ஜோ, மஹாகு³ணே மஹாஸாவஜ்ஜோ. ஸரீரகு³ணானங் பன ஸமபா⁴வே ஸதி கிலேஸானங் உபக்கமானஞ்ச முது³தாய அப்பஸாவஜ்ஜோ, திப்³ப³தாய மஹாஸாவஜ்ஜோதி வேதி³தப்³போ³. தஸ்ஸ பஞ்ச ஸம்பா⁴ரா – பாணோ, பாணஸஞ்ஞிதா, வத⁴கசித்தங், உபக்கமோ, தேன மரணந்தி.

    Pāṇātipātantiādīsu pana dasasu akusalakammapathesu pāṇassa atipāto pāṇātipāto. Pāṇavadho pāṇaghātoti vuttaṃ hoti. Pāṇoti cettha vohārato satto, paramatthato jīvitindriyaṃ. Tasmiṃ pana pāṇe pāṇasaññino jīvitindriyupacchedakaupakkamasamuṭṭhāpikā kāyavacīdvārānaṃ aññataradvārappavattā vadhakacetanā pāṇātipāto. So guṇavirahitesu tiracchānagatādīsu pāṇesu khuddake pāṇe appasāvajjo, mahāsarīre mahāsāvajjo. Kasmā? Payogamahantatāya. Payogasamattepi vatthumahantatāya. Guṇavantesu manussādīsu appaguṇe pāṇe appasāvajjo, mahāguṇe mahāsāvajjo. Sarīraguṇānaṃ pana samabhāve sati kilesānaṃ upakkamānañca mudutāya appasāvajjo, tibbatāya mahāsāvajjoti veditabbo. Tassa pañca sambhārā – pāṇo, pāṇasaññitā, vadhakacittaṃ, upakkamo, tena maraṇanti.

    அதி³ன்னஸ்ஸ ஆதா³னங் அதி³ன்னாதா³னங், பரஸங்ஹரணங், தெ²ய்யங், சோரிகாதி வுத்தங் ஹோதி. தத்த² அதி³ன்னந்தி பரபரிக்³க³ஹிதங், யத்த² பரோ யதா²காமகாரிதங் ஆபஜ்ஜந்தோ அத³ண்டா³ரஹோ அனுபவஜ்ஜோ ச ஹோதி, தஸ்மிங் பரபரிக்³க³ஹிதே பரபரிக்³க³ஹிதஸஞ்ஞினோ ததா³தா³யகஉபக்கமஸமுட்டா²பிகா காயவசீத்³வாரானங் அஞ்ஞதரத்³வாரப்பவத்தா தெ²ய்யசேதனா அதி³ன்னாதா³னங். தங் ஹீனே பரஸந்தகே அப்பஸாவஜ்ஜங், பணீதே மஹாஸாவஜ்ஜங். கஸ்மா? வத்து²பணீததாய. வத்து²ஸமத்தே ஸதி கு³ணாதி⁴கானங் ஸந்தகே வத்து²ஸ்மிங் மஹாஸாவஜ்ஜங், தங் தங் கு³ணாதி⁴கங் உபாதா³ய ததோ ததோ ஹீனகு³ணஸ்ஸ ஸந்தகே வத்து²ஸ்மிங் அப்பஸாவஜ்ஜங். தஸ்ஸ பஞ்ச ஸம்பா⁴ரா – பரபரிக்³க³ஹிதங், பரபரிக்³க³ஹிதஸஞ்ஞிதா தெ²ய்யசித்தங், உபக்கமோ, தேன ஹரணந்தி.

    Adinnassa ādānaṃ adinnādānaṃ, parasaṃharaṇaṃ, theyyaṃ, corikāti vuttaṃ hoti. Tattha adinnanti parapariggahitaṃ, yattha paro yathākāmakāritaṃ āpajjanto adaṇḍāraho anupavajjo ca hoti, tasmiṃ parapariggahite parapariggahitasaññino tadādāyakaupakkamasamuṭṭhāpikā kāyavacīdvārānaṃ aññataradvārappavattā theyyacetanā adinnādānaṃ. Taṃ hīne parasantake appasāvajjaṃ, paṇīte mahāsāvajjaṃ. Kasmā? Vatthupaṇītatāya. Vatthusamatte sati guṇādhikānaṃ santake vatthusmiṃ mahāsāvajjaṃ, taṃ taṃ guṇādhikaṃ upādāya tato tato hīnaguṇassa santake vatthusmiṃ appasāvajjaṃ. Tassa pañca sambhārā – parapariggahitaṃ, parapariggahitasaññitā theyyacittaṃ, upakkamo, tena haraṇanti.

    காமேஸூதி மேது²னஸமாசாரேஸு. மிச்சா²சாரோதி ஏகந்தனிந்தி³தோ லாமகாசாரோ. லக்க²ணதோ பன அஸத்³த⁴ம்மாதி⁴ப்பாயேன காயத்³வாரப்பவத்தா அக³மனீயட்டா²னவீதிக்கமசேதனா காமேஸு மிச்சா²சாரோ.

    Kāmesūti methunasamācāresu. Micchācāroti ekantanindito lāmakācāro. Lakkhaṇato pana asaddhammādhippāyena kāyadvārappavattā agamanīyaṭṭhānavītikkamacetanā kāmesu micchācāro.

    தத்த² அக³மனீயட்டா²னங் நாம புரிஸானங் தாவ மாதுரக்கி²தா, பிதுரக்கி²தா, மாதாபிதுரக்கி²தா, பா⁴துரக்கி²தா, ப⁴கி³னிரக்கி²தா, ஞாதிரக்கி²தா, கொ³த்தரக்கி²தா, த⁴ம்மரக்கி²தா, ஸாரக்கா², ஸபரித³ண்டா³தி மாதுரக்கி²தாத³யோ த³ஸ, த⁴னக்கீதா, ச²ந்த³வாஸினீ, போ⁴க³வாஸினீ, படவாஸினீ, ஓத³பத்தகினீ, ஓப⁴தசும்ப³டா, தா³ஸீ ச, ப⁴ரியா ச, கம்மகாரீ ச ப⁴ரியா ச, த⁴ஜாஹடா முஹுத்திகாதி த⁴னக்கீதாத³யோ த³ஸாதி வீஸதி இத்தி²யோ. இத்தீ²ஸு பன த்³வின்னங் ஸாரக்க²ஸபரித³ண்டா³னங் த³ஸன்னஞ்ச த⁴னக்கீதாதீ³னந்தி த்³வாத³ஸன்னங் இத்தீ²னங் அஞ்ஞே புரிஸா, இத³ங் அக³மனீயட்டா²னங் நாம.

    Tattha agamanīyaṭṭhānaṃ nāma purisānaṃ tāva māturakkhitā, piturakkhitā, mātāpiturakkhitā, bhāturakkhitā, bhaginirakkhitā, ñātirakkhitā, gottarakkhitā, dhammarakkhitā, sārakkhā, saparidaṇḍāti māturakkhitādayo dasa, dhanakkītā, chandavāsinī, bhogavāsinī, paṭavāsinī, odapattakinī, obhatacumbaṭā, dāsī ca, bhariyā ca, kammakārī ca bhariyā ca, dhajāhaṭā muhuttikāti dhanakkītādayo dasāti vīsati itthiyo. Itthīsu pana dvinnaṃ sārakkhasaparidaṇḍānaṃ dasannañca dhanakkītādīnanti dvādasannaṃ itthīnaṃ aññe purisā, idaṃ agamanīyaṭṭhānaṃ nāma.

    ஸோ பனேஸ மிச்சா²சாரோ ஸீலாதி³கு³ணரஹிதே அக³மனீயட்டா²னே அப்பஸாவஜ்ஜோ, ஸீலாதி³கு³ணஸம்பன்னே மஹாஸாவஜ்ஜோ. தஸ்ஸ சத்தாரோ ஸம்பா⁴ரா – அக³மனீயவத்து², தஸ்மிங் ஸேவனசித்தங், ஸேவனபயோகோ³, மக்³கே³னமக்³க³படிபத்திஅதி⁴வாஸனந்தி.

    So panesa micchācāro sīlādiguṇarahite agamanīyaṭṭhāne appasāvajjo, sīlādiguṇasampanne mahāsāvajjo. Tassa cattāro sambhārā – agamanīyavatthu, tasmiṃ sevanacittaṃ, sevanapayogo, maggenamaggapaṭipattiadhivāsananti.

    முஸாதி விஸங்வாத³னபுரெக்கா²ரஸ்ஸ அத்த²ப⁴ஞ்ஜகோ வசீபயோகோ³, காயபயோகோ³ வா. விஸங்வாத³னாதி⁴ப்பாயேன பனஸ்ஸ பரவிஸங்வாத³ககாயவசீபயோக³ஸமுட்டா²பிகா சேதனா முஸாவாதோ³. அபரோ நயோ – முஸாதி அபூ⁴தங் அதச்ச²ங் வத்து². வாதோ³தி தஸ்ஸ பூ⁴ததோ தச்ச²தோ விஞ்ஞாபனங். லக்க²ணதோ பன அதத²ங் வத்து²ங் தத²தோ பரங் விஞ்ஞாபேதுகாமஸ்ஸ ததா²விஞ்ஞத்திஸமுட்டா²பிகா சேதனா முஸாவாதோ³. ஸோ யமத்த²ங் ப⁴ஞ்ஜதி, தஸ்ஸ அப்பதாய அப்பஸாவஜ்ஜோ, மஹந்ததாய மஹாஸாவஜ்ஜோ. அபிச க³ஹட்டா²னங் அத்தனோ ஸந்தகங் அதா³துகாமதாய நத்தீ²திஆதி³னயப்பவத்தோ அப்பஸாவஜ்ஜோ, ஸக்கி²னா ஹுத்வா அத்த²ப⁴ஞ்ஜனத்த²ங் வுத்தோ மஹாஸாவஜ்ஜோ. பப்³ப³ஜிதானங் அப்பகம்பி தேலங் வா ஸப்பிங் வா லபி⁴த்வா ஹஸாதி⁴ப்பாயேன ‘‘அஜ்ஜ கா³மே தேலங் நதீ³ மஞ்ஞே ஸந்த³தீ’’தி பூரணகதா²னயேன பவத்தோ அப்பஸாவஜ்ஜோ, அதி³ட்ட²ங்யேவ பன தி³ட்ட²ந்திஆதி³னா நயேன வத³ந்தானங் மஹாஸாவஜ்ஜோ. தஸ்ஸ சத்தாரோ ஸம்பா⁴ரா – அதத²ங் வத்து², விஸங்வாத³னசித்தங், தஜ்ஜோ வாயாமோ, பரஸ்ஸ தத³த்த²விஜானநந்தி.

    Musāti visaṃvādanapurekkhārassa atthabhañjako vacīpayogo, kāyapayogo vā. Visaṃvādanādhippāyena panassa paravisaṃvādakakāyavacīpayogasamuṭṭhāpikā cetanā musāvādo. Aparo nayo – musāti abhūtaṃ atacchaṃ vatthu. Vādoti tassa bhūtato tacchato viññāpanaṃ. Lakkhaṇato pana atathaṃ vatthuṃ tathato paraṃ viññāpetukāmassa tathāviññattisamuṭṭhāpikā cetanā musāvādo. So yamatthaṃ bhañjati, tassa appatāya appasāvajjo, mahantatāya mahāsāvajjo. Apica gahaṭṭhānaṃ attano santakaṃ adātukāmatāya natthītiādinayappavatto appasāvajjo, sakkhinā hutvā atthabhañjanatthaṃ vutto mahāsāvajjo. Pabbajitānaṃ appakampi telaṃ vā sappiṃ vā labhitvā hasādhippāyena ‘‘ajja gāme telaṃ nadī maññe sandatī’’ti pūraṇakathānayena pavatto appasāvajjo, adiṭṭhaṃyeva pana diṭṭhantiādinā nayena vadantānaṃ mahāsāvajjo. Tassa cattāro sambhārā – atathaṃ vatthu, visaṃvādanacittaṃ, tajjo vāyāmo, parassa tadatthavijānananti.

    யாய வாசாய யஸ்ஸ தங் வாசங் பா⁴ஸதி, தஸ்ஸ ஹத³யே அத்தனோ பியபா⁴வங், பரஸ்ஸ ச ஸுஞ்ஞபா⁴வங் கரோதி, ஸா பிஸுணா வாசா. யாய பன அத்தானம்பி பரம்பி ப²ருஸங் கரோதி, யா வாசா ஸயம்பி ப²ருஸா நேவ கண்ணஸுகா² ந ஹத³யஸுகா² வா, அயங் ப²ருஸா வாசா. யேன ஸம்ப²ங் பலபதி நிரத்த²கங், ஸோ ஸம்ப²ப்பலாபோ. தேஸங் மூலபூ⁴தா சேதனாபி பிஸுணாவாசாதி³னாமமேவ லப⁴தி. ஸா ஏவ ச இத⁴ அதி⁴ப்பேதாதி.

    Yāya vācāya yassa taṃ vācaṃ bhāsati, tassa hadaye attano piyabhāvaṃ, parassa ca suññabhāvaṃ karoti, sā pisuṇā vācā. Yāya pana attānampi parampi pharusaṃ karoti, yā vācā sayampi pharusā neva kaṇṇasukhā na hadayasukhā vā, ayaṃ pharusā vācā. Yena samphaṃ palapati niratthakaṃ, so samphappalāpo. Tesaṃ mūlabhūtā cetanāpi pisuṇāvācādināmameva labhati. Sā eva ca idha adhippetāti.

    தத்த² ஸங்கிலிட்ட²சித்தஸ்ஸ பரேஸங் வா பே⁴தா³ய அத்தனோ பியகம்யதாய வா காயவசீபயோக³ஸமுட்டா²பிகா சேதனா பிஸுணா வாசா. ஸா யஸ்ஸ பே⁴த³ங் கரோதி, தஸ்ஸ அப்பகு³ணதாய அப்பஸாவஜ்ஜா, மஹாகு³ணதாய மஹாஸாவஜ்ஜா. தஸ்ஸா சத்தாரோ ஸம்பா⁴ரா – பி⁴ந்தி³தப்³போ³ பரோ, ‘‘இதி இமே நானா ப⁴விஸ்ஸந்தீ’’தி பே⁴த³புரெக்கா²ரதா வா ‘‘இதி அஹங் பியோ ப⁴விஸ்ஸாமி விஸ்ஸாஸிகோ’’தி பியகம்யதா வா, தஜ்ஜோ வாயாமோ, தஸ்ஸ தத³த்த²விஜானநந்தி. பரே பன அபி⁴ன்னே கம்மபத²பே⁴தோ³ நத்தி², பி⁴ன்னேயேவ ஹோதி.

    Tattha saṃkiliṭṭhacittassa paresaṃ vā bhedāya attano piyakamyatāya vā kāyavacīpayogasamuṭṭhāpikā cetanā pisuṇā vācā. Sā yassa bhedaṃ karoti, tassa appaguṇatāya appasāvajjā, mahāguṇatāya mahāsāvajjā. Tassā cattāro sambhārā – bhinditabbo paro, ‘‘iti ime nānā bhavissantī’’ti bhedapurekkhāratā vā ‘‘iti ahaṃ piyo bhavissāmi vissāsiko’’ti piyakamyatā vā, tajjo vāyāmo, tassa tadatthavijānananti. Pare pana abhinne kammapathabhedo natthi, bhinneyeva hoti.

    பரஸ்ஸ மம்மச்சே²த³ககாயவசீபயோக³ஸமுட்டா²பிகா ஏகந்தப²ருஸசேதனா ப²ருஸா வாசா. மம்மச்சே²த³கோபி பன பயோகோ³ சித்தஸண்ஹதாய ப²ருஸா வாசா ந ஹோதி. மாதாபிதரோ ஹி கதா³சி புத்தகே ஏவம்பி வத³ந்தி ‘‘சோரா வோ க²ண்டா³க²ண்டி³கங் கரொந்தூ’’தி. உப்பலபத்தம்பி ச நேஸங் உபரி பதந்தங் ந இச்ச²ந்தி. ஆசரியுபஜ்ஜா²யா ச கதா³சி நிஸ்ஸிதகே ஏவங் வத³ந்தி ‘‘கிங் இமே அஹிரிகா அனொத்தப்பினோ, நித்³த⁴மத² நே’’தி. அத² ச நேஸங் ஆக³மாதி⁴க³மஸம்பத்திங் இச்ச²ந்தி. யதா² ச சித்தஸண்ஹதாய ப²ருஸா வாசா ந ஹோதி, ஏவங் வசனஸண்ஹதாய அப²ருஸா வாசாபி ந ஹோதி. ந ஹி மாராபேதுகாமஸ்ஸ ‘‘இமங் ஸுக²ங் ஸயாபேதா²’’தி வசனங் அப²ருஸா வாசா ஹோதி, சித்தப²ருஸதாய பனேஸா ப²ருஸா வாசாவ. ஸா யங் ஸந்தா⁴ய பவத்திதா, தஸ்ஸ அப்பகு³ணதாய அப்பஸாவஜ்ஜா, மஹாகு³ணதாய மஹாஸாவஜ்ஜா. தஸ்ஸா தயோ ஸம்பா⁴ரா – அக்கோஸிதப்³போ³ பரோ, குபிதசித்தங், அக்கோஸனாதி.

    Parassa mammacchedakakāyavacīpayogasamuṭṭhāpikā ekantapharusacetanā pharusā vācā. Mammacchedakopi pana payogo cittasaṇhatāya pharusā vācā na hoti. Mātāpitaro hi kadāci puttake evampi vadanti ‘‘corā vo khaṇḍākhaṇḍikaṃ karontū’’ti. Uppalapattampi ca nesaṃ upari patantaṃ na icchanti. Ācariyupajjhāyā ca kadāci nissitake evaṃ vadanti ‘‘kiṃ ime ahirikā anottappino, niddhamatha ne’’ti. Atha ca nesaṃ āgamādhigamasampattiṃ icchanti. Yathā ca cittasaṇhatāya pharusā vācā na hoti, evaṃ vacanasaṇhatāya apharusā vācāpi na hoti. Na hi mārāpetukāmassa ‘‘imaṃ sukhaṃ sayāpethā’’ti vacanaṃ apharusā vācā hoti, cittapharusatāya panesā pharusā vācāva. Sā yaṃ sandhāya pavattitā, tassa appaguṇatāya appasāvajjā, mahāguṇatāya mahāsāvajjā. Tassā tayo sambhārā – akkositabbo paro, kupitacittaṃ, akkosanāti.

    அனத்த²விஞ்ஞாபிகா காயவசீபயோக³ஸமுட்டா²பிகா அகுஸலசேதனா ஸம்ப²ப்பலாபோ. ஸோ ஆஸேவனமந்த³தாய அப்பஸாவஜ்ஜோ, ஆஸேவனமஹந்ததாய மஹாஸாவஜ்ஜோ. தஸ்ஸ த்³வே ஸம்பா⁴ரா – பா⁴ரதயுத்³த⁴ஸீதாஹரணாதி³னிரத்த²ககதா²புரெக்கா²ரதா, ததா²ரூபிகதா²கத²னஞ்சாதி. பரே பன தங் கத²ங் அக³ண்ஹந்தே கம்மபத²பே⁴தோ³ நத்தி², பரேன ஸம்ப²ப்பலாபே க³ஹிதேயேவ ஹோதி.

    Anatthaviññāpikā kāyavacīpayogasamuṭṭhāpikā akusalacetanā samphappalāpo. So āsevanamandatāya appasāvajjo, āsevanamahantatāya mahāsāvajjo. Tassa dve sambhārā – bhāratayuddhasītāharaṇādiniratthakakathāpurekkhāratā, tathārūpikathākathanañcāti. Pare pana taṃ kathaṃ agaṇhante kammapathabhedo natthi, parena samphappalāpe gahiteyeva hoti.

    அபி⁴ஜ்ஜா²யதீதி அபி⁴ஜ்ஜா², பரப⁴ண்டா³பி⁴முகீ² ஹுத்வா தன்னின்னதாய பவத்ததீதி அத்தோ². ஸா ‘‘அஹோ வத இத³ங் மமஸ்ஸா’’தி ஏவங் பரப⁴ண்டா³பி⁴ஜ்ஜா²யனலக்க²ணா, அதி³ன்னாதா³னங் விய அப்பஸாவஜ்ஜா மஹாஸாவஜ்ஜா ச. தஸ்ஸ த்³வே ஸம்பா⁴ரா – பரப⁴ண்ட³ங், அத்தனோ பரிணாமனஞ்சாதி. பரப⁴ண்ட³வத்து²கே ஹி லோபே⁴ உப்பன்னேபி ந தாவ கம்மபத²பே⁴தோ³ ஹோதி, யாவ ‘‘அஹோ வத இத³ங் மமஸ்ஸா’’தி அத்தனோ ந பரிணாமேதி.

    Abhijjhāyatīti abhijjhā, parabhaṇḍābhimukhī hutvā tanninnatāya pavattatīti attho. Sā ‘‘aho vata idaṃ mamassā’’ti evaṃ parabhaṇḍābhijjhāyanalakkhaṇā, adinnādānaṃ viya appasāvajjā mahāsāvajjā ca. Tassa dve sambhārā – parabhaṇḍaṃ, attano pariṇāmanañcāti. Parabhaṇḍavatthuke hi lobhe uppannepi na tāva kammapathabhedo hoti, yāva ‘‘aho vata idaṃ mamassā’’ti attano na pariṇāmeti.

    ஹிதஸுக²ங் ப்³யாபாத³யதீதி ப்³யாபாதோ³. ஸோ பரவினாஸாய மனோபதோ³ஸலக்க²ணோ, ப²ருஸா வாசா விய அப்பஸாவஜ்ஜோ மஹாஸாவஜ்ஜோ ச. தஸ்ஸ த்³வே ஸம்பா⁴ரா – பரஸத்தோ ச, தஸ்ஸ ச வினாஸசிந்தாதி. பரஸத்தவத்து²கே ஹி கோதே⁴ உப்பன்னேபி ந தாவ கம்மபத²பே⁴தோ³ ஹோதி, யாவ ‘‘அஹோ வதாயங் உச்சி²ஜ்ஜெய்ய வினஸ்ஸெய்யா’’தி தஸ்ஸ வினாஸங் ந சிந்தேதி.

    Hitasukhaṃ byāpādayatīti byāpādo. So paravināsāya manopadosalakkhaṇo, pharusā vācā viya appasāvajjo mahāsāvajjo ca. Tassa dve sambhārā – parasatto ca, tassa ca vināsacintāti. Parasattavatthuke hi kodhe uppannepi na tāva kammapathabhedo hoti, yāva ‘‘aho vatāyaṃ ucchijjeyya vinasseyyā’’ti tassa vināsaṃ na cinteti.

    யதா²பு⁴ச்சக³ஹணாபா⁴வேன மிச்சா² பஸ்ஸதீதி மிச்சா²தி³ட்டி². ஸா ‘‘நத்தி² தி³ன்ன’’ந்திஆதி³னா நயேன விபரீதத³ஸ்ஸனலக்க²ணா, ஸம்ப²ப்பலாபோ விய அப்பஸாவஜ்ஜா, மஹாஸாவஜ்ஜா ச. அபிச அனியதா அப்பஸாவஜ்ஜா, நியதா மஹாஸாவஜ்ஜா. தஸ்ஸா த்³வே ஸம்பா⁴ரா – வத்து²னோ ச க³ஹிதாகாரவிபரீததா, யதா² ச தங் க³ண்ஹாதி, ததா²பா⁴வேன தஸ்ஸூபட்டா²னந்தி. தத்த² நத்தி²காஹேதுகஅகிரியதி³ட்டீ²ஹி ஏவ கம்மபத²பே⁴தோ³ ஹோதி, ந அஞ்ஞதி³ட்டீ²ஹி.

    Yathābhuccagahaṇābhāvena micchā passatīti micchādiṭṭhi. Sā ‘‘natthi dinna’’ntiādinā nayena viparītadassanalakkhaṇā, samphappalāpo viya appasāvajjā, mahāsāvajjā ca. Apica aniyatā appasāvajjā, niyatā mahāsāvajjā. Tassā dve sambhārā – vatthuno ca gahitākāraviparītatā, yathā ca taṃ gaṇhāti, tathābhāvena tassūpaṭṭhānanti. Tattha natthikāhetukaakiriyadiṭṭhīhi eva kammapathabhedo hoti, na aññadiṭṭhīhi.

    இமேஸங் பன த³ஸன்னங் அகுஸலகம்மபதா²னங் த⁴ம்மதோ, கொட்டா²ஸதோ, ஆரம்மணதோ, வேத³னாதோ, மூலதோதி பஞ்சஹாகாரேஹி வினிச்ச²யோ வேதி³தப்³போ³.

    Imesaṃ pana dasannaṃ akusalakammapathānaṃ dhammato, koṭṭhāsato, ārammaṇato, vedanāto, mūlatoti pañcahākārehi vinicchayo veditabbo.

    தத்த² த⁴ம்மதோதி ஏதேஸு ஹி ஸத்த படிபாடியா சேதனாத⁴ம்மாவ ஹொந்தி, அபி⁴ஜ்ஜா²த³யோ தயோ சேதனாஸம்பயுத்தா.

    Tattha dhammatoti etesu hi satta paṭipāṭiyā cetanādhammāva honti, abhijjhādayo tayo cetanāsampayuttā.

    கொட்டா²ஸதோதி படிபாடியா ஸத்த, மிச்சா²தி³ட்டி² சாதி இமே அட்ட² கம்மபதா² ஏவ ஹொந்தி, நோ மூலானி. அபி⁴ஜ்ஜா²ப்³யாபாதா³ கம்மபதா² சேவ மூலானி ச. அபி⁴ஜ்ஜா² ஹி மூலங் பத்வா லோபோ⁴ அகுஸலமூலங் ஹோதி, ப்³யாபாதோ³ தோ³ஸோ அகுஸலமூலங்.

    Koṭṭhāsatoti paṭipāṭiyā satta, micchādiṭṭhi cāti ime aṭṭha kammapathā eva honti, no mūlāni. Abhijjhābyāpādā kammapathā ceva mūlāni ca. Abhijjhā hi mūlaṃ patvā lobho akusalamūlaṃ hoti, byāpādo doso akusalamūlaṃ.

    ஆரம்மணதோதி பாணாதிபாதோ ஜீவிதிந்த்³ரியாரம்மணதோ ஸங்கா²ராரம்மணோ. அதி³ன்னாதா³னங் ஸத்தாரம்மணங் வா ஸங்கா²ராரம்மணங் வா. மிச்சா²சாரோ பொ²ட்ட²ப்³ப³வஸேன ஸங்கா²ராரம்மணோ, ஸத்தாரம்மணோதிபி ஏகே. முஸாவாதோ³ ஸத்தாரம்மணோ வா ஸங்கா²ராரம்மணோ வா. ததா² பிஸுணா வாசா. ப²ருஸா வாசா ஸத்தாரம்மணாவ ஸம்ப²ப்பலாபோ தி³ட்ட²ஸுதமுதவிஞ்ஞாதவஸேன ஸத்தாரம்மணோ வா ஸங்கா²ராரம்மணோ வா. ததா² அபி⁴ஜ்ஜா². ப்³யாபாதோ³ ஸத்தாரம்மணோவ. மிச்சா²தி³ட்டி² தேபூ⁴மகத⁴ம்மவஸேன ஸங்கா²ராரம்மணாவ.

    Ārammaṇatoti pāṇātipāto jīvitindriyārammaṇato saṅkhārārammaṇo. Adinnādānaṃ sattārammaṇaṃ vā saṅkhārārammaṇaṃ vā. Micchācāro phoṭṭhabbavasena saṅkhārārammaṇo, sattārammaṇotipi eke. Musāvādo sattārammaṇo vā saṅkhārārammaṇo vā. Tathā pisuṇā vācā. Pharusā vācā sattārammaṇāva samphappalāpo diṭṭhasutamutaviññātavasena sattārammaṇo vā saṅkhārārammaṇo vā. Tathā abhijjhā. Byāpādo sattārammaṇova. Micchādiṭṭhi tebhūmakadhammavasena saṅkhārārammaṇāva.

    வேத³னாதோதி பாணாதிபாதோ து³க்க²வேத³னோ ஹோதி. கிஞ்சாபி ஹி ராஜானோ சோரங் தி³ஸ்வா ஹஸமானாபி ‘‘க³ச்ச²த² ப⁴ணே, மாரேத² ந’’ந்தி வத³ந்தி, ஸன்னிட்டா²பகசேதனா பன நேஸங் து³க்க²ஸம்பயுத்தாவ ஹோதி. அதி³ன்னாதா³னங் திவேத³னங். தஞ்ஹி பரப⁴ண்ட³ங் தி³ஸ்வா ஹட்ட²துட்ட²ஸ்ஸ க³ண்ஹதோ ஸுக²வேத³னங் ஹோதி, பீ⁴ததஸிதஸ்ஸ க³ண்ஹதோ து³க்க²வேத³னங், ததா² விபாகனிஸ்ஸந்த³ப²லானி பச்சவெக்க²ந்தஸ்ஸ. க³ஹணகாலே மஜ்ஜ²த்தபா⁴வே டி²தஸ்ஸ பன க³ண்ஹதோ அது³க்க²மஸுக²வேத³னங் ஹோதி. மிச்சா²சாரோ ஸுக²மஜ்ஜ²த்தவஸேன த்³விவேத³னோ, ஸன்னிட்டா²பகசித்தே பன மஜ்ஜ²த்தவேத³னோ ந ஹோதி. முஸாவாதோ³ அதி³ன்னாதா³னே வுத்தனயேனேவ திவேத³னோ, ததா² பிஸுணா வாசா. ப²ருஸா வாசா து³க்க²வேத³னா. ஸம்ப²ப்பலாபோ திவேத³னோ. பரேஸு ஹி ஸாது⁴காரங் தெ³ந்தேஸு சேலாதீ³னி உக்கி²பந்தேஸு ஹட்ட²துட்ட²ஸ்ஸ ஸீதாஹரணபா⁴ரதயுத்³தா⁴தீ³னி கத²னகாலே ஸோ ஸுக²வேத³னோ ஹோதி, பட²மங் தி³ன்னவேதனேன ஏகேன பச்சா² ஆக³ந்த்வா ‘‘ஆதி³தோ பட்டா²ய கதே²ஹீ’’தி வுத்தே ‘‘நிரவஸேஸங் யதா²னுஸந்தி⁴கங் பகிண்ணககத²ங் கதெ²ஸ்ஸாமி நு கோ², நோ’’தி தோ³மனஸ்ஸிதஸ்ஸ கத²னகாலே து³க்க²வேத³னோ ஹோதி, மஜ்ஜ²த்தஸ்ஸ கத²யதோ அது³க்க²மஸுக²வேத³னோ ஹோதி. அபி⁴ஜ்ஜா² ஸுக²மஜ்ஜ²த்தவஸேன த்³விவேத³னா, ததா² மிச்சா²தி³ட்டி². ப்³யாபாதோ³ து³க்க²வேத³னோ.

    Vedanātoti pāṇātipāto dukkhavedano hoti. Kiñcāpi hi rājāno coraṃ disvā hasamānāpi ‘‘gacchatha bhaṇe, māretha na’’nti vadanti, sanniṭṭhāpakacetanā pana nesaṃ dukkhasampayuttāva hoti. Adinnādānaṃ tivedanaṃ. Tañhi parabhaṇḍaṃ disvā haṭṭhatuṭṭhassa gaṇhato sukhavedanaṃ hoti, bhītatasitassa gaṇhato dukkhavedanaṃ, tathā vipākanissandaphalāni paccavekkhantassa. Gahaṇakāle majjhattabhāve ṭhitassa pana gaṇhato adukkhamasukhavedanaṃ hoti. Micchācāro sukhamajjhattavasena dvivedano, sanniṭṭhāpakacitte pana majjhattavedano na hoti. Musāvādo adinnādāne vuttanayeneva tivedano, tathā pisuṇā vācā. Pharusā vācā dukkhavedanā. Samphappalāpo tivedano. Paresu hi sādhukāraṃ dentesu celādīni ukkhipantesu haṭṭhatuṭṭhassa sītāharaṇabhāratayuddhādīni kathanakāle so sukhavedano hoti, paṭhamaṃ dinnavetanena ekena pacchā āgantvā ‘‘ādito paṭṭhāya kathehī’’ti vutte ‘‘niravasesaṃ yathānusandhikaṃ pakiṇṇakakathaṃ kathessāmi nu kho, no’’ti domanassitassa kathanakāle dukkhavedano hoti, majjhattassa kathayato adukkhamasukhavedano hoti. Abhijjhā sukhamajjhattavasena dvivedanā, tathā micchādiṭṭhi. Byāpādo dukkhavedano.

    மூலதோதி பாணாதிபாதோ தோ³ஸமோஹவஸேன த்³விமூலகோ ஹோதி, அதி³ன்னாதா³னங் தோ³ஸமோஹவஸேன வா லோப⁴மோஹவஸேன வா, மிச்சா²சாரோ லோப⁴மோஹவஸேன, முஸாவாதோ³ தோ³ஸமோஹவஸேன வா லோப⁴மோஹவஸேன வா. ததா² பிஸுணா வாசா ஸம்ப²ப்பலாபோ ச. ப²ருஸா வாசா தோ³ஸமோஹவஸேன, அபி⁴ஜ்ஜா² மோஹவஸேன ஏகமூலா, ததா² ப்³யாபாதோ³. மிச்சா²தி³ட்டி² லோப⁴மோஹவஸேன த்³விமூலாதி.

    Mūlatoti pāṇātipāto dosamohavasena dvimūlako hoti, adinnādānaṃ dosamohavasena vā lobhamohavasena vā, micchācāro lobhamohavasena, musāvādo dosamohavasena vā lobhamohavasena vā. Tathā pisuṇā vācā samphappalāpo ca. Pharusā vācā dosamohavasena, abhijjhā mohavasena ekamūlā, tathā byāpādo. Micchādiṭṭhi lobhamohavasena dvimūlāti.

    அகுஸலகம்மபத²கதா² நிட்டி²தா.

    Akusalakammapathakathā niṭṭhitā.

    பாணாதிபாதாதீ³ஹி பன விரதியோ, அனபி⁴ஜ்ஜா²அப்³யாபாத³ஸம்மாதி³ட்டி²யோ சாதி இமே த³ஸ குஸலகம்மபதா² நாம. பாணாதிபாதாதீ³ஹி ஏதாய விரமந்தி, ஸயங் வா விரமதி, விரமணமத்தமேவ வா ஏதந்தி விரதி. யா பாணாதிபாதாதீ³ஹி விரமந்தஸ்ஸ குஸலசித்தஸம்பயுத்தா விரதி, ஸா பபே⁴த³தோ திவிதா⁴ ஹோதி ஸம்பத்தவிரதி ஸமாதா³னவிரதி ஸமுச்சே²த³விரதீதி. தத்த² அஸமாதி³ன்னஸிக்கா²பதா³னங் அத்தனோ ஜாதிவயபா³ஹுஸச்சாதீ³னி பச்சவெக்கி²த்வா ‘‘அயுத்தங் அம்ஹாகங் ஏவரூபங் பாபங் காது’’ந்தி ஸம்பத்தவத்து²ங் அவீதிக்கமந்தானங் உப்பஜ்ஜமானா விரதி ஸம்பத்தவிரதி நாம. ஸமாதி³ன்னஸிக்கா²பதா³னங் பன ஸிக்கா²பத³ஸமாதா³னே ச ததுத்தரி ச அத்தனோ ஜீவிதம்பி பரிச்சஜித்வா வத்து²ங் அவீதிக்கமந்தானங் உப்பஜ்ஜமானா விரதி ஸமாதா³னவிரதி நாம. அரியமக்³க³ஸம்பயுத்தா பன விரதி ஸமுச்சே²த³விரதி நாம, யஸ்ஸா உப்பத்திதோ பபு⁴தி அரியபுக்³க³லானங் ‘‘பாணங் கா⁴தெஸ்ஸாமா’’திஆதி³சித்தம்பி ந உப்பஜ்ஜதீதி.

    Pāṇātipātādīhi pana viratiyo, anabhijjhāabyāpādasammādiṭṭhiyo cāti ime dasa kusalakammapathā nāma. Pāṇātipātādīhi etāya viramanti, sayaṃ vā viramati, viramaṇamattameva vā etanti virati. Yā pāṇātipātādīhi viramantassa kusalacittasampayuttā virati, sā pabhedato tividhā hoti sampattavirati samādānavirati samucchedaviratīti. Tattha asamādinnasikkhāpadānaṃ attano jātivayabāhusaccādīni paccavekkhitvā ‘‘ayuttaṃ amhākaṃ evarūpaṃ pāpaṃ kātu’’nti sampattavatthuṃ avītikkamantānaṃ uppajjamānā virati sampattavirati nāma. Samādinnasikkhāpadānaṃ pana sikkhāpadasamādāne ca tatuttari ca attano jīvitampi pariccajitvā vatthuṃ avītikkamantānaṃ uppajjamānā virati samādānavirati nāma. Ariyamaggasampayuttā pana virati samucchedavirati nāma, yassā uppattito pabhuti ariyapuggalānaṃ ‘‘pāṇaṃ ghātessāmā’’tiādicittampi na uppajjatīti.

    இதா³னி அகுஸலகம்மபதா²னங் விய இமேஸங் குஸலகம்மபதா²னங் த⁴ம்மதோ, கொட்டா²ஸதோ, ஆரம்மணதோ, வேத³னாதோ, மூலதோதி பஞ்சஹாகாரேஹி வினிச்ச²யோ வேதி³தப்³போ³.

    Idāni akusalakammapathānaṃ viya imesaṃ kusalakammapathānaṃ dhammato, koṭṭhāsato, ārammaṇato, vedanāto, mūlatoti pañcahākārehi vinicchayo veditabbo.

    தத்த² த⁴ம்மதோதி ஏதேஸுபி படிபாடியா ஸத்த சேதனாபி வட்டந்தி விரதியோபி, அந்தே தயோ சேதனாஸம்பயுத்தாவ.

    Tattha dhammatoti etesupi paṭipāṭiyā satta cetanāpi vaṭṭanti viratiyopi, ante tayo cetanāsampayuttāva.

    கொட்டா²ஸதோதி படிபாடியா ஸத்த கம்மபதா² ஏவ, நோ மூலானி, அந்தே தயோ கம்மபதா² சேவ மூலானி ச. அனபி⁴ஜ்ஜா² ஹி மூலங் பத்வா அலோபோ⁴ குஸலமூலங் ஹோதி, அப்³யாபாதோ³ அதோ³ஸோ குஸலமூலங், ஸம்மாதி³ட்டி² அமோஹோ குஸலமூலங்.

    Koṭṭhāsatoti paṭipāṭiyā satta kammapathā eva, no mūlāni, ante tayo kammapathā ceva mūlāni ca. Anabhijjhā hi mūlaṃ patvā alobho kusalamūlaṃ hoti, abyāpādo adoso kusalamūlaṃ, sammādiṭṭhi amoho kusalamūlaṃ.

    ஆரம்மணதோதி பாணாதிபாதாதீ³னங் ஆரம்மணானேவ ஏதேஸங் ஆரம்மணானி. வீதிக்கமிதப்³ப³தோயேவ ஹி வேரமணீ நாம ஹோதி. யதா² பன நிப்³பா³னாரம்மணோ அரியமக்³கோ³ கிலேஸே பஜஹதி, ஏவங் ஜீவிதிந்த்³ரியாதி³ஆரம்மணாபேதே கம்மபதா² பாணாதிபாதாதீ³னி து³ஸ்ஸீல்யானி பஜஹந்தீதி.

    Ārammaṇatoti pāṇātipātādīnaṃ ārammaṇāneva etesaṃ ārammaṇāni. Vītikkamitabbatoyeva hi veramaṇī nāma hoti. Yathā pana nibbānārammaṇo ariyamaggo kilese pajahati, evaṃ jīvitindriyādiārammaṇāpete kammapathā pāṇātipātādīni dussīlyāni pajahantīti.

    வேத³னாதோதி ஸப்³பே³ ஸுக²வேத³னா வா ஹொந்தி மஜ்ஜ²த்தவேத³னா வா. குஸலங் பத்வா ஹி து³க்கா² வேத³னா நாம நத்தி².

    Vedanātoti sabbe sukhavedanā vā honti majjhattavedanā vā. Kusalaṃ patvā hi dukkhā vedanā nāma natthi.

    மூலதோதி படிபாடியா ஸத்த ஞாணஸம்பயுத்தசித்தேன விரமந்தஸ்ஸ அலோப⁴அதோ³ஸஅமோஹவஸேன திமூலா ஹொந்தி. ஞாணவிப்பயுத்தசித்தேன விரமந்தஸ்ஸ அலோபா⁴தோ³ஸவஸேன த்³விமூலா. அனபி⁴ஜ்ஜா² ஞாணஸம்பயுத்தசித்தேன விரமந்தஸ்ஸ அதோ³ஸஅமோஹவஸேன த்³விமூலா. ஞாணவிப்பயுத்தசித்தேன விரமந்தஸ்ஸ அதோ³ஸவஸேன ஏகமூலா. அலோபோ⁴ பன அத்தனாவ அத்தனோ மூலங் ந ஹோதி. அப்³யாபாதே³பி ஏஸேவ நயோ. ஸம்மாதி³ட்டி² அலோபா⁴தோ³ஸவஸேன த்³விமூலாவாதி.

    Mūlatoti paṭipāṭiyā satta ñāṇasampayuttacittena viramantassa alobhaadosaamohavasena timūlā honti. Ñāṇavippayuttacittena viramantassa alobhādosavasena dvimūlā. Anabhijjhā ñāṇasampayuttacittena viramantassa adosaamohavasena dvimūlā. Ñāṇavippayuttacittena viramantassa adosavasena ekamūlā. Alobho pana attanāva attano mūlaṃ na hoti. Abyāpādepi eseva nayo. Sammādiṭṭhi alobhādosavasena dvimūlāvāti.

    குஸலகம்மபத²கதா² நிட்டி²தா.

    Kusalakammapathakathā niṭṭhitā.

    41.

    41.

    ஏவங் த³ஸகுஸலகம்மபத²வஸேன ஸீலங் த³ஸ்ஸெத்வா இதா³னி நெக்க²ம்மாதீ³னங் அரஹத்தமக்³க³பரியோஸானானங் ஸத்ததிங்ஸத⁴ம்மானங் வஸேன த³ஸ்ஸேதுங் நெக்க²ம்மேன காமச்ச²ந்த³ங் ஸங்வரட்டே²ன ஸீலங், அவீதிக்கமட்டே²ன ஸீலந்திஆதி³மாஹ. தத்த² யஸ்மா நெக்க²ம்மேன காமச்ச²ந்த³ங் ஸங்வரதி ந வீதிக்கமதி, தஸ்மா நெக்க²ம்மங் ஸீலந்தி அதி⁴ப்பாயோ. பச்சத்தத்தே² வா கரணவசனங், நெக்க²ம்மந்தி அத்தோ². ஏஸ நயோ ஸேஸேஸு. பாளியங் பன நெக்க²ம்மஅப்³யாபாதே³ த³ஸ்ஸெத்வா ஹெட்டா² வுத்தனயத்தா ஸேஸங் ஸங்கி²பித்வா அந்தே அரஹத்தமக்³கோ³யேவ த³ஸ்ஸிதோ.

    Evaṃ dasakusalakammapathavasena sīlaṃ dassetvā idāni nekkhammādīnaṃ arahattamaggapariyosānānaṃ sattatiṃsadhammānaṃ vasena dassetuṃ nekkhammena kāmacchandaṃ saṃvaraṭṭhena sīlaṃ, avītikkamaṭṭhena sīlantiādimāha. Tattha yasmā nekkhammena kāmacchandaṃ saṃvarati na vītikkamati, tasmā nekkhammaṃ sīlanti adhippāyo. Paccattatthe vā karaṇavacanaṃ, nekkhammanti attho. Esa nayo sesesu. Pāḷiyaṃ pana nekkhammaabyāpāde dassetvā heṭṭhā vuttanayattā sesaṃ saṅkhipitvā ante arahattamaggoyeva dassito.

    ஏவங் ஸங்வரஅவீதிக்கமவஸேன ஸீலங் த³ஸ்ஸெத்வா இதா³னி தேஸங்யேவ த்³வின்னங் பபே⁴த³த³ஸ்ஸனத்த²ங் பஞ்ச ஸீலானி பாணாதிபாதஸ்ஸ பஹானங் ஸீலந்திஆதி³மாஹ. எத்த² ச பாணாதிபாதஸ்ஸ பஹானங் ஸீலங், பாணாதிபாதா வேரமணீ ஸீலங், பாணாதிபாதஸ்ஸ படிபக்க²சேதனா ஸீலங், பாணாதிபாதஸ்ஸ ஸங்வரோ ஸீலங், பாணாதிபாதஸ்ஸ அவீதிக்கமோ ஸீலந்தி யோஜனா காதப்³பா³. பஹானந்தி ச கோசி த⁴ம்மோ நாம நத்தி² அஞ்ஞத்ர வுத்தப்பகாரானங் பாணாதிபாதாதீ³னங் அனுப்பாத³மத்ததோ. யஸ்மா பன தங் தங் பஹானங் தஸ்ஸ தஸ்ஸ குஸலஸ்ஸ த⁴ம்மஸ்ஸ பதிட்டா²னட்டே²ன உபதா⁴ரணங் ஹோதி, விப்பகிண்ணஸபா⁴வாகரணேன ச ஸமோதா⁴னங், தஸ்மா புப்³பே³ வுத்தேனேவ உபதா⁴ரணஸமோதா⁴னஸங்கா²தேன ஸீலனட்டே²ன ஸீலந்தி வுத்தங். இதரே சத்தாரோ த⁴ம்மா ததோ ததோ வேரமணிவஸேன தஸ்ஸ தஸ்ஸ ஸங்வரவஸேன தது³ப⁴யஸம்பயுத்தசேதனாவஸேன தங் தங் அவீதிக்கமந்தஸ்ஸ அவீதிக்கமவஸேன ச சேதஸோ பவத்திஸபா⁴வங் ஸந்தா⁴ய வுத்தா.

    Evaṃ saṃvaraavītikkamavasena sīlaṃ dassetvā idāni tesaṃyeva dvinnaṃ pabhedadassanatthaṃ pañca sīlāni pāṇātipātassa pahānaṃ sīlantiādimāha. Ettha ca pāṇātipātassa pahānaṃ sīlaṃ, pāṇātipātā veramaṇī sīlaṃ, pāṇātipātassa paṭipakkhacetanā sīlaṃ, pāṇātipātassa saṃvaro sīlaṃ, pāṇātipātassa avītikkamo sīlanti yojanā kātabbā. Pahānanti ca koci dhammo nāma natthi aññatra vuttappakārānaṃ pāṇātipātādīnaṃ anuppādamattato. Yasmā pana taṃ taṃ pahānaṃ tassa tassa kusalassa dhammassa patiṭṭhānaṭṭhena upadhāraṇaṃ hoti, vippakiṇṇasabhāvākaraṇena ca samodhānaṃ, tasmā pubbe vutteneva upadhāraṇasamodhānasaṅkhātena sīlanaṭṭhena sīlanti vuttaṃ. Itare cattāro dhammā tato tato veramaṇivasena tassa tassa saṃvaravasena tadubhayasampayuttacetanāvasena taṃ taṃ avītikkamantassa avītikkamavasena ca cetaso pavattisabhāvaṃ sandhāya vuttā.

    அத² வா பஹானம்பி த⁴ம்மதோ அத்தி²யேவ. கத²ங்? பஹீயதே அனேன பாணாதிபாதாதி³படிபக்கோ², பஜஹதி வா தங் படிபக்க²ந்தி பஹானங். கிங் தங்? ஸப்³பே³பி குஸலா க²ந்தா⁴. அஞ்ஞே பன ஆசரியா ‘‘நெக்க²ம்மாதீ³ஸுபி ‘வேரமணீ ஸீல’ந்தி வசனமத்தங் க³ஹெத்வா ஸப்³ப³குஸலேஸுபி நியதயேவாபனகபூ⁴தா விரதி நாம அத்தீ²’’தி வத³ந்தி, ந ததா² இதா⁴தி. ஏவமிமேஹி பஹானாதீ³ஹி பஞ்சஹி பதே³ஹி விஸேஸெத்வா பரியந்தாபரியந்தஸீலத்³வயே அபரியந்தஸீலமேவ வுத்தங். தஸ்மா ஏவ ஹி ஏவரூபானி ஸீலானி சித்தஸ்ஸ அவிப்படிஸாராய ஸங்வத்தந்தி…பே॰… ஸச்சி²காதப்³ப³ங் ஸச்சி²கரொந்தோ ஸிக்க²தீதி வுத்தங்.

    Atha vā pahānampi dhammato atthiyeva. Kathaṃ? Pahīyate anena pāṇātipātādipaṭipakkho, pajahati vā taṃ paṭipakkhanti pahānaṃ. Kiṃ taṃ? Sabbepi kusalā khandhā. Aññe pana ācariyā ‘‘nekkhammādīsupi ‘veramaṇī sīla’nti vacanamattaṃ gahetvā sabbakusalesupi niyatayevāpanakabhūtā virati nāma atthī’’ti vadanti, na tathā idhāti. Evamimehi pahānādīhi pañcahi padehi visesetvā pariyantāpariyantasīladvaye apariyantasīlameva vuttaṃ. Tasmā eva hi evarūpāni sīlāni cittassa avippaṭisārāya saṃvattanti…pe… sacchikātabbaṃ sacchikaronto sikkhatīti vuttaṃ.

    தத்த² அவிப்படிஸாராய ஸங்வத்தந்தீதி ‘‘ஸங்வரோ அவிப்படிஸாரத்தா²யா’’தி (பரி॰ 366) ச ‘‘அவிப்படிஸாரத்தா²னி கோ², ஆனந்த³, குஸலானி ஸீலானி அவிப்படிஸாரானிஸங்ஸானீ’’தி (அ॰ நி॰ 10.1; 11.1) ச வசனதோ அவிப்படிஸாரத்தா²ய ஸங்வத்தந்தி. ‘‘அவிப்படிஸாரோ பாமோஜ்ஜத்தா²யா’’தி (பரி॰ 366) ச ‘‘யோனிஸோ மனஸிகரோதோ பாமோஜ்ஜங் ஜாயதீ’’தி (படி॰ ம॰ 1.74) ச வசனதோ பாமோஜ்ஜாய ஸங்வத்தந்தி. ‘‘பாமோஜ்ஜங் பீதத்தா²யா’’தி (பரி॰ 366) ச ‘‘பமுதி³தஸ்ஸ பீதி ஜாயதீ’’தி (அ॰ நி॰ 5.26; ஸங்॰ நி॰ 5.376; தீ³॰ நி॰ 3.322) ச வசனதோ பீதியா ஸங்வத்தந்தி. ‘‘பீதி பஸ்ஸத்³த⁴த்தா²யா’’தி (பரி॰ 366) ச ‘‘பீதிமனஸ்ஸ காயோ பஸ்ஸம்ப⁴தீ’’தி (அ॰ நி॰ 5.26; ஸங்॰ நி॰ 5.376; தீ³॰ நி॰ 3.322) ச வசனதோ பஸ்ஸத்³தி⁴யா ஸங்வத்தந்தி. ‘‘பஸ்ஸத்³தி⁴ ஸுக²த்தா²யா’’தி (பரி॰ 366) ச ‘‘பஸ்ஸத்³த⁴காயோ ஸுக²ங் வேதே³தீ’’தி (அ॰ நி॰ 5.26; ஸங்॰ நி॰ 5.376; தீ³॰ நி॰ 3.322) ச வசனதோ ஸோமனஸ்ஸாய ஸங்வத்தந்தி. சேதஸிகங் ஸுக²ஞ்ஹி ஸோமனஸ்ஸந்தி வுச்சதி. ஆஸேவனாயாதி பு⁴ஸா ஸேவனா ஆஸேவனா. கஸ்ஸ ஆஸேவனா? அனந்தரங் ஸோமனஸ்ஸவசனேன ஸுக²ஸ்ஸ வுத்தத்தா ஸுக²ங் ஸித்³த⁴ங். ‘‘ஸுகி²னோ சித்தங் ஸமாதி⁴யதீ’’தி (அ॰ நி॰ 5.26; ஸங்॰ நி॰ 5.376; தீ³॰ நி॰ 3.322) ச வசனதோ தேன ஸுகே²ன ஸமாதி⁴ ஸித்³தோ⁴ ஹோதி. ஏவங் ஸித்³த⁴ஸ்ஸ ஸமாதி⁴ஸ்ஸ ஆஸேவனா. தஸ்ஸ ஸமாதி⁴ஸ்ஸ ஆஸேவனாய ஸங்வத்தந்தி, பகு³ணப³லவபா⁴வாய ஸங்வத்தந்தீதி அத்தோ². பா⁴வனாயாதி தஸ்ஸேவ ஸமாதி⁴ஸ்ஸ வுத்³தி⁴யா. ப³ஹுலீகம்மாயாதி தஸ்ஸேவ ஸமாதி⁴ஸ்ஸ புனப்புனங் கிரியாய. அவிப்படிஸாராதி³பவத்தியா மூலகாரணங் ஹுத்வா ஸமாதி⁴ஸ்ஸ ஸத்³தி⁴ந்த்³ரியாதி³அலங்காரஸாத⁴னேன அலங்காராய ஸங்வத்தந்தி. அவிப்படிஸாராதி³கஸ்ஸ ஸமாதி⁴ஸம்பா⁴ரஸ்ஸ ஸாத⁴னேன பரிக்கா²ராய ஸங்வத்தந்தி. ‘‘யே ச கோ² இமே பப்³ப³ஜிதேன ஜீவிதபரிக்கா²ரா ஸமுதா³னேதப்³பா³’’திஆதீ³ஸு (ம॰ நி॰ 1.192) விய ஹி எத்த² ஸம்பா⁴ரத்தோ² பரிக்கா²ரஸத்³தோ³. ‘‘ரதோ² ஸீலபரிக்கா²ரோ, ஜா²னக்கோ² சக்கவீரியோ’’திஆதீ³ஸு (ஸங்॰ நி॰ 3.54) பன அலங்காரத்தோ². ‘‘ஸத்தஹி நக³ரபரிக்கா²ரேஹி ஸுபரிக்க²தங் ஹோதீ’’திஆதீ³ஸு (அ॰ நி॰ 7.67) பரிவாரத்தோ². இத⁴ பன அலங்காரபரிவாரானங் விஸுங் ஆக³தத்தா ஸம்பா⁴ரத்தோ²தி வுத்தங். ஸம்பா⁴ரத்தோ² ச பச்சயத்தோ²தி. மூலகாரணபா⁴வேனேவ ஸமாதி⁴ஸம்பயுத்தப²ஸ்ஸாதி³த⁴ம்மஸம்பத்திஸாத⁴னேன பரிவாராய ஸங்வத்தந்தி. ஸமாதி⁴ஸ்ஸ விபஸ்ஸனாய ச பத³ட்டா²னபா⁴வபாபனேன வஸீபா⁴வபாபனேன ச பரிபுண்ணபா⁴வஸாத⁴னதோ பாரிபூரியா ஸங்வத்தந்தி.

    Tattha avippaṭisārāya saṃvattantīti ‘‘saṃvaro avippaṭisāratthāyā’’ti (pari. 366) ca ‘‘avippaṭisāratthāni kho, ānanda, kusalāni sīlāni avippaṭisārānisaṃsānī’’ti (a. ni. 10.1; 11.1) ca vacanato avippaṭisāratthāya saṃvattanti. ‘‘Avippaṭisāro pāmojjatthāyā’’ti (pari. 366) ca ‘‘yoniso manasikaroto pāmojjaṃ jāyatī’’ti (paṭi. ma. 1.74) ca vacanato pāmojjāya saṃvattanti. ‘‘Pāmojjaṃ pītatthāyā’’ti (pari. 366) ca ‘‘pamuditassa pīti jāyatī’’ti (a. ni. 5.26; saṃ. ni. 5.376; dī. ni. 3.322) ca vacanato pītiyāsaṃvattanti. ‘‘Pīti passaddhatthāyā’’ti (pari. 366) ca ‘‘pītimanassa kāyo passambhatī’’ti (a. ni. 5.26; saṃ. ni. 5.376; dī. ni. 3.322) ca vacanato passaddhiyā saṃvattanti. ‘‘Passaddhi sukhatthāyā’’ti (pari. 366) ca ‘‘passaddhakāyo sukhaṃ vedetī’’ti (a. ni. 5.26; saṃ. ni. 5.376; dī. ni. 3.322) ca vacanato somanassāya saṃvattanti. Cetasikaṃ sukhañhi somanassanti vuccati. Āsevanāyāti bhusā sevanā āsevanā. Kassa āsevanā? Anantaraṃ somanassavacanena sukhassa vuttattā sukhaṃ siddhaṃ. ‘‘Sukhino cittaṃ samādhiyatī’’ti (a. ni. 5.26; saṃ. ni. 5.376; dī. ni. 3.322) ca vacanato tena sukhena samādhi siddho hoti. Evaṃ siddhassa samādhissa āsevanā. Tassa samādhissa āsevanāya saṃvattanti, paguṇabalavabhāvāya saṃvattantīti attho. Bhāvanāyāti tasseva samādhissa vuddhiyā. Bahulīkammāyāti tasseva samādhissa punappunaṃ kiriyāya. Avippaṭisārādipavattiyā mūlakāraṇaṃ hutvā samādhissa saddhindriyādialaṅkārasādhanena alaṅkārāya saṃvattanti. Avippaṭisārādikassa samādhisambhārassa sādhanena parikkhārāya saṃvattanti. ‘‘Ye ca kho ime pabbajitena jīvitaparikkhārā samudānetabbā’’tiādīsu (ma. ni. 1.192) viya hi ettha sambhārattho parikkhārasaddo. ‘‘Ratho sīlaparikkhāro, jhānakkho cakkavīriyo’’tiādīsu (saṃ. ni. 3.54) pana alaṅkārattho. ‘‘Sattahi nagaraparikkhārehi suparikkhataṃ hotī’’tiādīsu (a. ni. 7.67) parivārattho. Idha pana alaṅkāraparivārānaṃ visuṃ āgatattā sambhāratthoti vuttaṃ. Sambhārattho ca paccayatthoti. Mūlakāraṇabhāveneva samādhisampayuttaphassādidhammasampattisādhanena parivārāya saṃvattanti. Samādhissa vipassanāya ca padaṭṭhānabhāvapāpanena vasībhāvapāpanena ca paripuṇṇabhāvasādhanato pāripūriyā saṃvattanti.

    ஏவங் ஸீலூபனிஸ்ஸயேன ஸப்³பா³காரபரிபூரங் ஸமாதி⁴ங் த³ஸ்ஸெத்வா இதா³னி ‘‘ஸமாஹிதே சித்தே யதா²பூ⁴தங் ஜானாதி பஸ்ஸதி, யதா²பூ⁴தங் ஜானங் பஸ்ஸங் நிப்³பி³ந்த³தி, நிப்³பி³ந்த³ங் விரஜ்ஜதி, விராகா³ விமுச்சதீ’’தி (படி॰ ம॰ 1.73; தீ³॰ நி॰ 3.359) வசனதோ ஸீலமூலகானி ஸமாதி⁴பத³ட்டா²னானி யதா²பூ⁴தஞாணத³ஸ்ஸனாதீ³னி த³ஸ்ஸெந்தோ ஏகந்தனிப்³பி³தா³யாதிஆதி³மாஹ. நிப்³பி³தா³ய ஹி த³ஸ்ஸிதாய தஸ்ஸா பத³ட்டா²னபூ⁴தங் யதா²பூ⁴தஞாணத³ஸ்ஸனங் த³ஸ்ஸிதமேவ ஹோதி. தஸ்மிஞ்ஹி அஸித்³தே⁴ நிப்³பி³தா³ ந ஸிஜ்ஜ²தீதி. தானி பன வுத்தத்தா²னேவ. யதா²பூ⁴தஞாணத³ஸ்ஸனங் பனெத்த² ஸப்பச்சயனாமரூபபரிக்³க³ஹோ.

    Evaṃ sīlūpanissayena sabbākāraparipūraṃ samādhiṃ dassetvā idāni ‘‘samāhite citte yathābhūtaṃ jānāti passati, yathābhūtaṃ jānaṃ passaṃ nibbindati, nibbindaṃ virajjati, virāgā vimuccatī’’ti (paṭi. ma. 1.73; dī. ni. 3.359) vacanato sīlamūlakāni samādhipadaṭṭhānāni yathābhūtañāṇadassanādīni dassento ekantanibbidāyātiādimāha. Nibbidāya hi dassitāya tassā padaṭṭhānabhūtaṃ yathābhūtañāṇadassanaṃ dassitameva hoti. Tasmiñhi asiddhe nibbidā na sijjhatīti. Tāni pana vuttatthāneva. Yathābhūtañāṇadassanaṃ panettha sappaccayanāmarūpapariggaho.

    ஏவங் அமதமஹானிப்³பா³னபரியோஸானங் ஸீலப்பயோஜனங் த³ஸ்ஸெத்வா இதா³னி தஸ்ஸ ஸீலஸ்ஸ அதி⁴ஸீலஸிக்கா²பா⁴வங் தம்மூலகா ச அதி⁴சித்தஅதி⁴பஞ்ஞாஸிக்கா² த³ஸ்ஸேதுகாமோ ஏவரூபானங் ஸீலானங் ஸங்வரபாரிஸுத்³தி⁴ அதி⁴ஸீலந்திஆதி³மாஹ. தத்த² ஸங்வரோயேவ பாரிஸுத்³தி⁴ ஸங்வரபாரிஸுத்³தி⁴. ஏவரூபானங் அபரியந்தபூ⁴தானங் விவட்டனிஸ்ஸிதானங் ஸீலானங் ஸங்வரபாரிஸுத்³தி⁴ விவட்டனிஸ்ஸிதத்தா ஸேஸஸீலதோ அதி⁴கங் ஸீலந்தி அதி⁴ஸீலந்தி வுச்சதி. ஸங்வரபாரிஸுத்³தி⁴யா டி²தங் சித்தந்தி ஏதி³ஸாய ஸீலஸங்வரபாரிஸுத்³தி⁴யா பதிட்டி²தங் சித்தங் ஸுட்டு² அவிப்படிஸாராதீ³னங் ஆவஹனதோ ந விக்கே²பங் க³ச்ச²தி, ஸமாதி⁴ஸ்மிங் பதிட்டா²தீதி அத்தோ². அவிக்கே²போயேவ பாரிஸுத்³தி⁴ அவிக்கே²பபாரிஸுத்³தி⁴. ஸோ ஸப்³ப³மலவிரஹிதோ நிப்³பே³த⁴பா⁴கி³யோ ஸமாதி⁴ ஸேஸஸமாதி⁴தோ அதி⁴கத்தா அதி⁴சித்தந்தி வுச்சதி. சித்தஸீஸேன ஹெத்த² ஸமாதி⁴ நித்³தி³ட்டோ². ஸங்வரபாரிஸுத்³தி⁴ங் ஸம்மா பஸ்ஸதீதி பரிஸுத்³த⁴ங் ஸீலஸங்வரங் ஞாதபரிஞ்ஞாவஸேன தீரணபரிஞ்ஞாவஸேன ச ஸம்மா பஸ்ஸதி, ஏவமேவ அவிக்கே²பபாரிஸுத்³தி⁴ஸங்கா²தங் பரிஸுத்³த⁴ங் ஸமாதி⁴ங் ஸம்மா பஸ்ஸதி. ஏவங் பஸ்ஸதோ சஸ்ஸ த³ஸ்ஸனஸங்கா²தா பாரிஸுத்³தி⁴ த³ஸ்ஸனபாரிஸுத்³தி⁴. ஸாயேவ ஸேஸபஞ்ஞாய அதி⁴கத்தா அதி⁴பஞ்ஞாதி வுச்சதி. யோ தத்தா²தி யோ தத்த² ஸங்வரஅவிக்கே²பத³ஸ்ஸனேஸு. ஸங்வரட்டோ²தி ஸங்வரபா⁴வோ. ஏவமேவ அவிக்கே²பட்ட²த³ஸ்ஸனட்டா² ச வேதி³தப்³பா³. அதி⁴ஸீலமேவ ஸிக்கா² அதி⁴ஸீலஸிக்கா². ஏவங் இதராபி வேதி³தப்³பா³.

    Evaṃ amatamahānibbānapariyosānaṃ sīlappayojanaṃ dassetvā idāni tassa sīlassa adhisīlasikkhābhāvaṃ tammūlakā ca adhicittaadhipaññāsikkhā dassetukāmo evarūpānaṃ sīlānaṃ saṃvarapārisuddhi adhisīlantiādimāha. Tattha saṃvaroyeva pārisuddhi saṃvarapārisuddhi. Evarūpānaṃ apariyantabhūtānaṃ vivaṭṭanissitānaṃ sīlānaṃ saṃvarapārisuddhi vivaṭṭanissitattā sesasīlato adhikaṃ sīlanti adhisīlanti vuccati. Saṃvarapārisuddhiyā ṭhitaṃ cittanti edisāya sīlasaṃvarapārisuddhiyā patiṭṭhitaṃ cittaṃ suṭṭhu avippaṭisārādīnaṃ āvahanato na vikkhepaṃ gacchati, samādhismiṃ patiṭṭhātīti attho. Avikkhepoyeva pārisuddhi avikkhepapārisuddhi. So sabbamalavirahito nibbedhabhāgiyo samādhi sesasamādhito adhikattā adhicittanti vuccati. Cittasīsena hettha samādhi niddiṭṭho. Saṃvarapārisuddhiṃ sammā passatīti parisuddhaṃ sīlasaṃvaraṃ ñātapariññāvasena tīraṇapariññāvasena ca sammā passati, evameva avikkhepapārisuddhisaṅkhātaṃ parisuddhaṃ samādhiṃ sammā passati. Evaṃ passato cassa dassanasaṅkhātā pārisuddhi dassanapārisuddhi. Sāyeva sesapaññāya adhikattā adhipaññāti vuccati. Yo tatthāti yo tattha saṃvaraavikkhepadassanesu. Saṃvaraṭṭhoti saṃvarabhāvo. Evameva avikkhepaṭṭhadassanaṭṭhā ca veditabbā. Adhisīlameva sikkhā adhisīlasikkhā. Evaṃ itarāpi veditabbā.

    ஏவங் திஸ்ஸோ ஸிக்கா²யோ த³ஸ்ஸெத்வா இதா³னி தாஸங் பாரிபூரிக்கமங் த³ஸ்ஸேதுங் இமா திஸ்ஸோ ஸிக்கா²யோ ஆவஜ்ஜந்தோ ஸிக்க²தீதிஆதி³மாஹ. தஸ்ஸத்தோ² – பச்சேகங் பரிபூரேதுங் ஆவஜ்ஜந்தோபி ஸிக்க²தி நாம, ஆவஜ்ஜெத்வா ‘‘அயங் நாம ஸிக்கா²’’தி ஜானந்தோபி ஸிக்க²தி நாம, ஜானித்வா புனப்புனங் பஸ்ஸந்தோபி ஸிக்க²தி நாம, பஸ்ஸித்வா யதா²தி³ட்ட²ங் பச்சவெக்க²ந்தோபி ஸிக்க²தி நாம, பச்சவெக்கி²த்வா தத்தே²வ சித்தங் அசலங் கத்வா பதிட்ட²பெந்தோபி ஸிக்க²தி நாம, தங்தங்ஸிக்கா²ஸம்பயுத்தஸத்³தா⁴வீரியஸதிஸமாதி⁴பஞ்ஞாஹி ஸகஸககிச்சங் கரொந்தோபி ஸிக்க²தி நாம, அபி⁴ஞ்ஞெய்யாபி⁴ஜானநாதி³காலேபி தங் தங் கிச்சங் கரொந்தோ திஸ்ஸோபி ஸிக்கா²யோ ஸிக்க²தி நாமாதி . புன பஞ்ச ஸீலானீதிஆதீ³னி வுத்தத்தா²னேவ. அரஹத்தமக்³கே³ன ஸப்³ப³கிலேஸானந்திஆதீ³ஸு பன அரஹந்தானங் ஸுட்டு² விப்படிஸாராதி³அபா⁴வதோ ஆஸேவனாதி³பா⁴வதோ ச தானி பதா³னி யுஜ்ஜந்தேவ. ஏகந்தனிப்³பி³தா³யாதிஆதீ³னி பன ஸதிபட்டா²னஸம்மப்பதா⁴னானி விய மக்³க³க்க²ணேயேவ யோஜேதப்³பா³னி.

    Evaṃ tisso sikkhāyo dassetvā idāni tāsaṃ pāripūrikkamaṃ dassetuṃ imā tisso sikkhāyo āvajjanto sikkhatītiādimāha. Tassattho – paccekaṃ paripūretuṃ āvajjantopi sikkhati nāma, āvajjetvā ‘‘ayaṃ nāma sikkhā’’ti jānantopi sikkhati nāma, jānitvā punappunaṃ passantopi sikkhati nāma, passitvā yathādiṭṭhaṃ paccavekkhantopi sikkhati nāma, paccavekkhitvā tattheva cittaṃ acalaṃ katvā patiṭṭhapentopi sikkhati nāma, taṃtaṃsikkhāsampayuttasaddhāvīriyasatisamādhipaññāhi sakasakakiccaṃ karontopi sikkhati nāma, abhiññeyyābhijānanādikālepi taṃ taṃ kiccaṃ karonto tissopi sikkhāyo sikkhati nāmāti . Puna pañca sīlānītiādīni vuttatthāneva. Arahattamaggena sabbakilesānantiādīsu pana arahantānaṃ suṭṭhu vippaṭisārādiabhāvato āsevanādibhāvato ca tāni padāni yujjanteva. Ekantanibbidāyātiādīni pana satipaṭṭhānasammappadhānāni viya maggakkhaṇeyeva yojetabbāni.

    42.

    42.

    ஸங்வரபாரிஸுத்³தி⁴ங் ஸம்மா பஸ்ஸதி, அவிக்கே²பபாரிஸுத்³தி⁴ங் ஸம்மா பஸ்ஸதீதி இத³ங் பன வசனத்³வயங் ப²லஸமாபத்தத்தா²ய விபஸ்ஸனாவஸேன யோஜேதப்³ப³ங், து³தியவசனங் பன நிரோத⁴ஸமாபத்தத்தா²ய விபஸ்ஸனாவஸேனாபி யுஜ்ஜதி. ஆவஜ்ஜந்தோ ஸிக்க²தீதிஆதீ³ஸு பஞ்சஸு வசனேஸு அரஹதோ ஸிக்கி²தப்³பா³பா⁴வேபி அஸெக்க²ஸீலக்க²ந்தா⁴தி³ஸபா⁴வதோ ‘‘ஸிக்க²தீ’’தி வுத்தந்தி வேதி³தப்³ப³ங். ஸத்³தா⁴ய அதி⁴முச்சந்தோ ஸிக்க²தீதிஆதீ³னி பன மக்³க³க்க²ணஞ்ஞேவ ஸந்தா⁴ய வுத்தானி. அஞ்ஞானிபி உபசாரப்பனாவிபஸ்ஸனாமக்³க³வஸேன வுத்தானி வசனானி யதா²யோக³ங் யோஜேதப்³பா³னீதி.

    Saṃvarapārisuddhiṃ sammā passati, avikkhepapārisuddhiṃ sammā passatīti idaṃ pana vacanadvayaṃ phalasamāpattatthāya vipassanāvasena yojetabbaṃ, dutiyavacanaṃ pana nirodhasamāpattatthāya vipassanāvasenāpi yujjati. Āvajjanto sikkhatītiādīsu pañcasu vacanesu arahato sikkhitabbābhāvepi asekkhasīlakkhandhādisabhāvato ‘‘sikkhatī’’ti vuttanti veditabbaṃ. Saddhāya adhimuccanto sikkhatītiādīni pana maggakkhaṇaññeva sandhāya vuttāni. Aññānipi upacārappanāvipassanāmaggavasena vuttāni vacanāni yathāyogaṃ yojetabbānīti.

    ஸீலமயஞாணனித்³தே³ஸவண்ணனா நிட்டி²தா.

    Sīlamayañāṇaniddesavaṇṇanā niṭṭhitā.




    Next: 3. ஸமாதி⁴பா⁴வனாமயஞாணனித்³தே³ஸவண்ணனா • 3. Samādhibhāvanāmayañāṇaniddesavaṇṇanā




    Related texts:



    திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 2. ஸீலமயஞாணனித்³தே³ஸோ • 2. Sīlamayañāṇaniddeso


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact