| Library / Tipiṭaka / ཏིཔིཊཀ • Tipiṭaka / པཊིསམྦྷིདཱམགྒཔཱལི༹ • Paṭisambhidāmaggapāḷi |
༢. སཱིལམཡཉཱཎནིདྡེསོ
2. Sīlamayañāṇaniddeso
༣༧. ཀཐཾ སུཏྭཱན སཾཝརེ པཉྙཱ སཱིལམཡེ ཉཱཎཾ? པཉྩ སཱིལཱནི – པརིཡནྟཔཱརིསུདྡྷིསཱིལཾ, ཨཔརིཡནྟཔཱརིསུདྡྷིསཱིལཾ, པརིཔུཎྞཔཱརིསུདྡྷིསཱིལཾ, ཨཔརཱམཊྛཔཱརིསུདྡྷིསཱིལཾ, པཊིཔྤསྶདྡྷིཔཱརིསུདྡྷིསཱིལནྟི།
37. Kathaṃ sutvāna saṃvare paññā sīlamaye ñāṇaṃ? Pañca sīlāni – pariyantapārisuddhisīlaṃ, apariyantapārisuddhisīlaṃ, paripuṇṇapārisuddhisīlaṃ, aparāmaṭṭhapārisuddhisīlaṃ, paṭippassaddhipārisuddhisīlanti.
ཏཏྠ ཀཏམཾ པརིཡནྟཔཱརིསུདྡྷིསཱིལཾ? ཨནུཔསམྤནྣཱནཾ པརིཡནྟསིཀྑཱཔདཱནཾ – ཨིདཾ པརིཡནྟཔཱརིསུདྡྷིསཱིལཾ། ཀཏམཾ ཨཔརིཡནྟཔཱརིསུདྡྷིསཱིལཾ? ཨུཔསམྤནྣཱནཾ ཨཔརིཡནྟསིཀྑཱཔདཱནཾ – ཨིདཾ ཨཔརིཡནྟཔཱརིསུདྡྷིསཱིལཾ། ཀཏམཾ པརིཔུཎྞཔཱརིསུདྡྷིསཱིལཾ? པུཐུཛྫནཀལྱཱཎཀཱནཾ ཀུསལདྷམྨེ ཡུཏྟཱནཾ སེཀྑཔརིཡནྟེ 1 པརིཔཱུརཀཱརཱིནཾ ཀཱཡེ ཙ ཛཱིཝིཏེ ཙ ཨནཔེཀྑཱནཾ པརིཙྩཏྟཛཱིཝིཏཱནཾ – ཨིདཾ པརིཔུཎྞཔཱརིསུདྡྷིསཱིལཾ། ཀཏམཾ ཨཔརཱམཊྛཔཱརིསུདྡྷིསཱིལཾ? སཏྟནྣཾ སེཀྑཱནཾ – ཨིདཾ ཨཔརཱམཊྛཔཱརིསུདྡྷིསཱིལཾ། ཀཏམཾ པཊིཔྤསྶདྡྷིཔཱརིསུདྡྷིསཱིལཾ? ཏཐཱགཏསཱཝཀཱནཾ ཁཱིཎཱསཝཱནཾ པཙྩེཀབུདྡྷཱནཾ ཏཐཱགཏཱནཾ ཨརཧནྟཱནཾ སམྨཱསམྦུདྡྷཱནཾ – ཨིདཾ པཊིཔྤསྶདྡྷིཔཱརིསུདྡྷིསཱིལཾ།
Tattha katamaṃ pariyantapārisuddhisīlaṃ? Anupasampannānaṃ pariyantasikkhāpadānaṃ – idaṃ pariyantapārisuddhisīlaṃ. Katamaṃ apariyantapārisuddhisīlaṃ? Upasampannānaṃ apariyantasikkhāpadānaṃ – idaṃ apariyantapārisuddhisīlaṃ. Katamaṃ paripuṇṇapārisuddhisīlaṃ? Puthujjanakalyāṇakānaṃ kusaladhamme yuttānaṃ sekkhapariyante 2 paripūrakārīnaṃ kāye ca jīvite ca anapekkhānaṃ pariccattajīvitānaṃ – idaṃ paripuṇṇapārisuddhisīlaṃ. Katamaṃ aparāmaṭṭhapārisuddhisīlaṃ? Sattannaṃ sekkhānaṃ – idaṃ aparāmaṭṭhapārisuddhisīlaṃ. Katamaṃ paṭippassaddhipārisuddhisīlaṃ? Tathāgatasāvakānaṃ khīṇāsavānaṃ paccekabuddhānaṃ tathāgatānaṃ arahantānaṃ sammāsambuddhānaṃ – idaṃ paṭippassaddhipārisuddhisīlaṃ.
༣༨. ཨཏྠི སཱིལཾ པརིཡནྟཾ, ཨཏྠི སཱིལཾ ཨཔརིཡནྟཾ། ཏཏྠ ཀཏམཾ ཏཾ སཱིལཾ པརིཡནྟཾ? ཨཏྠི སཱིལཾ ལཱབྷཔརིཡནྟཾ, ཨཏྠི སཱིལཾ ཡསཔརིཡནྟཾ, ཨཏྠི སཱིལཾ ཉཱཏིཔརིཡནྟཾ, ཨཏྠི སཱིལཾ ཨངྒཔརིཡནྟཾ, ཨཏྠི སཱིལཾ ཛཱིཝིཏཔརིཡནྟཾ།
38. Atthi sīlaṃ pariyantaṃ, atthi sīlaṃ apariyantaṃ. Tattha katamaṃ taṃ sīlaṃ pariyantaṃ? Atthi sīlaṃ lābhapariyantaṃ, atthi sīlaṃ yasapariyantaṃ, atthi sīlaṃ ñātipariyantaṃ, atthi sīlaṃ aṅgapariyantaṃ, atthi sīlaṃ jīvitapariyantaṃ.
ཀཏམཾ ཏཾ སཱིལཾ ལཱབྷཔརིཡནྟཾ? ཨིདྷེཀཙྩོ ལཱབྷཧེཏུ ལཱབྷཔཙྩཡཱ ལཱབྷཀཱརཎཱ ཡཐཱསམཱདིནྣཾ 3 སིཀྑཱཔདཾ ཝཱིཏིཀྐམཏི – ཨིདཾ ཏཾ སཱིལཾ ལཱབྷཔརིཡནྟཾ། ཀཏམཾ ཏཾ སཱིལཾ ཡསཔརིཡནྟཾ? ཨིདྷེཀཙྩོ ཡསཧེཏུ ཡསཔཙྩཡཱ ཡསཀཱརཎཱ ཡཐཱསམཱདིནྣཾ སིཀྑཱཔདཾ ཝཱིཏིཀྐམཏི – ཨིདཾ ཏཾ སཱིལཾ ཡསཔརིཡནྟཾ། ཀཏམཾ ཏཾ སཱིལཾ ཉཱཏིཔརིཡནྟཾ? ཨིདྷེཀཙྩོ ཉཱཏིཧེཏུ ཉཱཏིཔཙྩཡཱ ཉཱཏིཀཱརཎཱ ཡཐཱསམཱདིནྣཾ སིཀྑཱཔདཾ ཝཱིཏིཀྐམཏི – ཨིདཾ ཏཾ སཱིལཾ ཉཱཏིཔརིཡནྟཾ། ཀཏམཾ ཏཾ སཱིལཾ ཨངྒཔརིཡནྟཾ? ཨིདྷེཀཙྩོ ཨངྒཧེཏུ ཨངྒཔཙྩཡཱ ཨངྒཀཱརཎཱ ཡཐཱསམཱདིནྣཾ སིཀྑཱཔདཾ ཝཱིཏིཀྐམཏི – ཨིདཾ ཏཾ སཱིལཾ ཨངྒཔརིཡནྟཾ། ཀཏམཾ ཏཾ སཱིལཾ ཛཱིཝིཏཔརིཡནྟཾ? ཨིདྷེཀཙྩོ ཛཱིཝིཏཧེཏུ ཛཱིཝིཏཔཙྩཡཱ ཛཱིཝིཏཀཱརཎཱ ཡཐཱསམཱདིནྣཾ སིཀྑཱཔདཾ ཝཱིཏིཀྐམཏི – ཨིདཾ ཏཾ སཱིལཾ ཛཱིཝིཏཔརིཡནྟཾ། ཨེཝརཱུཔཱནི སཱིལཱནི ཁཎྜཱནི ཚིདྡཱནི སབལཱནི ཀམྨཱསཱནི ན བྷུཛིསྶཱནི ན ཝིཉྙུཔྤསཏྠཱནི 4 པརཱམཊྛཱནི ཨསམཱདྷིསཾཝཏྟནིཀཱནི 5 ན ཨཝིཔྤཊིསཱརཝཏྠུཀཱནི ན པཱམོཛྫཝཏྠུཀཱནི ན པཱིཏིཝཏྠུཀཱནི ན པསྶདྡྷིཝཏྠུཀཱནི ན སུཁཝཏྠུཀཱནི ན སམཱདྷིཝཏྠུཀཱནི ན ཡཐཱབྷཱུཏཉཱཎདསྶནཝཏྠུཀཱནི ན ཨེཀནྟནིབྦིདཱཡ ན ཝིརཱགཱཡ ན ནིརོདྷཱཡ ན ཨུཔསམཱཡ ན ཨབྷིཉྙཱཡ ན སམྦོདྷཱཡ ན ནིབྦཱནཱཡ སཾཝཏྟནྟི – ཨིདཾ ཏཾ སཱིལཾ པརིཡནྟཾ།
Katamaṃ taṃ sīlaṃ lābhapariyantaṃ? Idhekacco lābhahetu lābhapaccayā lābhakāraṇā yathāsamādinnaṃ 6 sikkhāpadaṃ vītikkamati – idaṃ taṃ sīlaṃ lābhapariyantaṃ. Katamaṃ taṃ sīlaṃ yasapariyantaṃ? Idhekacco yasahetu yasapaccayā yasakāraṇā yathāsamādinnaṃ sikkhāpadaṃ vītikkamati – idaṃ taṃ sīlaṃ yasapariyantaṃ. Katamaṃ taṃ sīlaṃ ñātipariyantaṃ? Idhekacco ñātihetu ñātipaccayā ñātikāraṇā yathāsamādinnaṃ sikkhāpadaṃ vītikkamati – idaṃ taṃ sīlaṃ ñātipariyantaṃ. Katamaṃ taṃ sīlaṃ aṅgapariyantaṃ? Idhekacco aṅgahetu aṅgapaccayā aṅgakāraṇā yathāsamādinnaṃ sikkhāpadaṃ vītikkamati – idaṃ taṃ sīlaṃ aṅgapariyantaṃ. Katamaṃ taṃ sīlaṃ jīvitapariyantaṃ? Idhekacco jīvitahetu jīvitapaccayā jīvitakāraṇā yathāsamādinnaṃ sikkhāpadaṃ vītikkamati – idaṃ taṃ sīlaṃ jīvitapariyantaṃ. Evarūpāni sīlāni khaṇḍāni chiddāni sabalāni kammāsāni na bhujissāni na viññuppasatthāni 7 parāmaṭṭhāni asamādhisaṃvattanikāni 8 na avippaṭisāravatthukāni na pāmojjavatthukāni na pītivatthukāni na passaddhivatthukāni na sukhavatthukāni na samādhivatthukāni na yathābhūtañāṇadassanavatthukāni na ekantanibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattanti – idaṃ taṃ sīlaṃ pariyantaṃ.
ཀཏམཾ ཏཾ སཱིལཾ ཨཔརིཡནྟཾ? ཨཏྠི སཱིལཾ ན ལཱབྷཔརིཡནྟཾ , ཨཏྠི སཱིལཾ ན ཡསཔརིཡནྟཾ, ཨཏྠི སཱིལཾ ན ཉཱཏིཔརིཡནྟཾ, ཨཏྠི སཱིལཾ ན ཨངྒཔརིཡནྟཾ, ཨཏྠི སཱིལཾ ན ཛཱིཝིཏཔརིཡནྟཾ།
Katamaṃ taṃ sīlaṃ apariyantaṃ? Atthi sīlaṃ na lābhapariyantaṃ , atthi sīlaṃ na yasapariyantaṃ, atthi sīlaṃ na ñātipariyantaṃ, atthi sīlaṃ na aṅgapariyantaṃ, atthi sīlaṃ na jīvitapariyantaṃ.
ཀཏམཾ ཏཾ སཱིལཾ ན ལཱབྷཔརིཡནྟཾ? ཨིདྷེཀཙྩོ ལཱབྷཧེཏུ ལཱབྷཔཙྩཡཱ ལཱབྷཀཱརཎཱ ཡཐཱསམཱདིནྣཾ སིཀྑཱཔདཾ ཝཱིཏིཀྐམཱཡ ཙིཏྟམྤི ན ཨུཔྤཱདེཏི, ཀིཾ སོ ཝཱིཏིཀྐམིསྶཏི! ཨིདཾ ཏཾ སཱིལཾ ན ལཱབྷཔརིཡནྟཾ། ཀཏམཾ ཏཾ སཱིལཾ ན ཡསཔརིཡནྟཾ? ཨིདྷེཀཙྩོ ཡསཧེཏུ ཡསཔཙྩཡཱ ཡསཀཱརཎཱ ཡཐཱསམཱདིནྣཾ སིཀྑཱཔདཾ ཝཱིཏིཀྐམཱཡ ཙིཏྟམྤི ན ཨུཔྤཱདེཏི , ཀིཾ སོ ཝཱིཏིཀྐམིསྶཏི! ཨིདཾ ཏཾ སཱིལཾ ན ཡསཔརིཡནྟཾ། ཀཏམཾ ཏཾ སཱིལཾ ན ཉཱཏིཔརིཡནྟཾ? ཨིདྷེཀཙྩོ ཉཱཏིཧེཏུ ཉཱཏིཔཙྩཡཱ ཉཱཏིཀཱརཎཱ ཡཐཱསམཱདིནྣཾ སིཀྑཱཔདཾ ཝཱིཏིཀྐམཱཡ ཙིཏྟམྤི ན ཨུཔྤཱདེཏི, ཀིཾ སོ ཝཱིཏིཀྐམིསྶཏི! ཨིདཾ ཏཾ སཱིལཾ ན ཉཱཏིཔརིཡནྟཾ། ཀཏམཾ ཏཾ སཱིལཾ ན ཨངྒཔརིཡནྟཾ? ཨིདྷེཀཙྩོ ཨངྒཧེཏུ ཨངྒཔཙྩཡཱ ཨངྒཀཱརཎཱ ཡཐཱསམཱདིནྣཾ སིཀྑཱཔདཾ ཝཱིཏིཀྐམཱཡ ཙིཏྟམྤི ན ཨུཔྤཱདེཏི, ཀིཾ སོ ཝཱིཏིཀྐམིསྶཏི! ཨིདཾ ཏཾ སཱིལཾ ན ཨངྒཔརིཡནྟཾ། ཀཏམཾ ཏཾ སཱིལཾ ན ཛཱིཝིཏཔརིཡནྟཾ? ཨིདྷེཀཙྩོ ཛཱིཝིཏཧེཏུ ཛཱིཝིཏཔཙྩཡཱ ཛཱིཝིཏཀཱརཎཱ ཡཐཱསམཱདིནྣཾ སིཀྑཱཔདཾ ཝཱིཏིཀྐམཱཡ ཙིཏྟམྤི ན ཨུཔྤཱདེཏི, ཀིཾ སོ ཝཱིཏིཀྐམིསྶཏི! ཨིདཾ ཏཾ སཱིལཾ ན ཛཱིཝིཏཔརིཡནྟཾ། ཨེཝརཱུཔཱནི སཱིལཱནི ཨཁཎྜཱནི ཨཙྪིདྡཱནི ཨསབལཱནི ཨཀམྨཱསཱནི བྷུཛིསྶཱནི ཝིཉྙུཔྤསཏྠཱནི ཨཔརཱམཊྛཱནི སམཱདྷིསཾཝཏྟནིཀཱནི ཨཝིཔྤཊིསཱརཝཏྠུཀཱནི པཱམོཛྫཝཏྠུཀཱནི པཱིཏིཝཏྠུཀཱནི པསྶདྡྷིཝཏྠུཀཱནི སུཁཝཏྠུཀཱནི སམཱདྷིཝཏྠུཀཱནི ཡཐཱབྷཱུཏཉཱཎདསྶནཝཏྠུཀཱནི ཨེཀནྟནིབྦིདཱཡ ཝིརཱགཱཡ ནིརོདྷཱཡ ཨུཔསམཱཡ ཨབྷིཉྙཱཡ སམྦོདྷཱཡ ནིབྦཱནཱཡ སཾཝཏྟནྟི – ཨིདཾ ཏཾ སཱིལཾ ཨཔརིཡནྟཾ།
Katamaṃ taṃ sīlaṃ na lābhapariyantaṃ? Idhekacco lābhahetu lābhapaccayā lābhakāraṇā yathāsamādinnaṃ sikkhāpadaṃ vītikkamāya cittampi na uppādeti, kiṃ so vītikkamissati! Idaṃ taṃ sīlaṃ na lābhapariyantaṃ. Katamaṃ taṃ sīlaṃ na yasapariyantaṃ? Idhekacco yasahetu yasapaccayā yasakāraṇā yathāsamādinnaṃ sikkhāpadaṃ vītikkamāya cittampi na uppādeti , kiṃ so vītikkamissati! Idaṃ taṃ sīlaṃ na yasapariyantaṃ. Katamaṃ taṃ sīlaṃ na ñātipariyantaṃ? Idhekacco ñātihetu ñātipaccayā ñātikāraṇā yathāsamādinnaṃ sikkhāpadaṃ vītikkamāya cittampi na uppādeti, kiṃ so vītikkamissati! Idaṃ taṃ sīlaṃ na ñātipariyantaṃ. Katamaṃ taṃ sīlaṃ na aṅgapariyantaṃ? Idhekacco aṅgahetu aṅgapaccayā aṅgakāraṇā yathāsamādinnaṃ sikkhāpadaṃ vītikkamāya cittampi na uppādeti, kiṃ so vītikkamissati! Idaṃ taṃ sīlaṃ na aṅgapariyantaṃ. Katamaṃ taṃ sīlaṃ na jīvitapariyantaṃ? Idhekacco jīvitahetu jīvitapaccayā jīvitakāraṇā yathāsamādinnaṃ sikkhāpadaṃ vītikkamāya cittampi na uppādeti, kiṃ so vītikkamissati! Idaṃ taṃ sīlaṃ na jīvitapariyantaṃ. Evarūpāni sīlāni akhaṇḍāni acchiddāni asabalāni akammāsāni bhujissāni viññuppasatthāni aparāmaṭṭhāni samādhisaṃvattanikāni avippaṭisāravatthukāni pāmojjavatthukāni pītivatthukāni passaddhivatthukāni sukhavatthukāni samādhivatthukāni yathābhūtañāṇadassanavatthukāni ekantanibbidāya virāgāya nirodhāya upasamāya abhiññāya sambodhāya nibbānāya saṃvattanti – idaṃ taṃ sīlaṃ apariyantaṃ.
༣༩. ཀིཾ སཱིལཾ? ཀཏི སཱིལཱནི? ཀིཾ སམུཊྛཱནཾ སཱིལཾ? ཀཏི དྷམྨསམོདྷཱནཾ སཱིལཾ?
39. Kiṃ sīlaṃ? Kati sīlāni? Kiṃ samuṭṭhānaṃ sīlaṃ? Kati dhammasamodhānaṃ sīlaṃ?
ཀིཾ སཱིལནྟི ཙེཏནཱ སཱིལཾ, ཙེཏསིཀཾ སཱིལཾ, སཾཝརོ སཱིལཾ, ཨཝཱིཏིཀྐམོ སཱིལཾ། ཀཏི སཱིལཱནཱིཏི ཏཱིཎི སཱིལཱནི – ཀུསལསཱིལཾ, ཨཀུསལསཱིལཾ, ཨབྱཱཀཏསཱིལཾ།ཀིཾ སམུཊྛཱནཾ སཱིལནྟི ཀུསལཙིཏྟསམུཊྛཱནཾ ཀུསལསཱིལཾ , ཨཀུསལཙིཏྟསམུཊྛཱནཾ ཨཀུསལསཱིལཾ, ཨབྱཱཀཏཙིཏྟསམུཊྛཱནཾ ཨབྱཱཀཏསཱིལཾ། ཀཏི དྷམྨསམོདྷཱནཾ སཱིལནྟི སཾཝརསམོདྷཱནཾ སཱིལཾ, ཨཝཱིཏིཀྐམསམོདྷཱནཾ སཱིལཾ, ཏཐཱབྷཱཝེ ཛཱཏཙེཏནཱསམོདྷཱནཾ སཱིལཾ།
Kiṃ sīlanti cetanā sīlaṃ, cetasikaṃ sīlaṃ, saṃvaro sīlaṃ, avītikkamo sīlaṃ. Kati sīlānīti tīṇi sīlāni – kusalasīlaṃ, akusalasīlaṃ, abyākatasīlaṃ.Kiṃ samuṭṭhānaṃ sīlanti kusalacittasamuṭṭhānaṃ kusalasīlaṃ , akusalacittasamuṭṭhānaṃ akusalasīlaṃ, abyākatacittasamuṭṭhānaṃ abyākatasīlaṃ. Kati dhammasamodhānaṃ sīlanti saṃvarasamodhānaṃ sīlaṃ, avītikkamasamodhānaṃ sīlaṃ, tathābhāve jātacetanāsamodhānaṃ sīlaṃ.
༤༠. པཱཎཱཏིཔཱཏཾ སཾཝརཊྛེན སཱིལཾ, ཨཝཱིཏིཀྐམཊྛེན སཱིལཾ། ཨདིནྣཱདཱནཾ སཾཝརཊྛེན སཱིལཾ, ཨཝཱིཏིཀྐམཊྛེན སཱིལཾ། ཀཱམེསུམིཙྪཱཙཱརཾ སཾཝརཊྛེན སཱིལཾ, ཨཝཱིཏིཀྐམཊྛེན སཱིལཾ། མུསཱཝཱདཾ སཾཝརཊྛེན སཱིལཾ, ཨཝཱིཏིཀྐམཊྛེན སཱིལཾ། པིསུཎཾ ཝཱཙཾ 9 སཾཝརཊྛེན སཱིལཾ, ཨཝཱིཏིཀྐམཊྛེན སཱིལཾ། ཕརུསཾ ཝཱཙཾ 10 སཾཝརཊྛེན སཱིལཾ, ཨཝཱིཏིཀྐམཊྛེན སཱིལཾ། སམྥཔྤལཱཔཾ སཾཝརཊྛེན སཱིལཾ, ཨཝཱིཏིཀྐམཊྛེན སཱིལཾ ། ཨབྷིཛ྄ཛྷཾ སཾཝརཊྛེན སཱིལཾ, ཨཝཱིཏིཀྐམཊྛེན སཱིལཾ། བྱཱཔཱདཾ སཾཝརཊྛེན སཱིལཾ, ཨཝཱིཏིཀྐམཊྛེན སཱིལཾ། མིཙྪཱདིཊྛིཾ སཾཝརཊྛེན སཱིལཾ, ཨཝཱིཏིཀྐམཊྛེན སཱིལཾ།
40. Pāṇātipātaṃ saṃvaraṭṭhena sīlaṃ, avītikkamaṭṭhena sīlaṃ. Adinnādānaṃ saṃvaraṭṭhena sīlaṃ, avītikkamaṭṭhena sīlaṃ. Kāmesumicchācāraṃ saṃvaraṭṭhena sīlaṃ, avītikkamaṭṭhena sīlaṃ. Musāvādaṃ saṃvaraṭṭhena sīlaṃ, avītikkamaṭṭhena sīlaṃ. Pisuṇaṃ vācaṃ 11 saṃvaraṭṭhena sīlaṃ, avītikkamaṭṭhena sīlaṃ. Pharusaṃ vācaṃ 12 saṃvaraṭṭhena sīlaṃ, avītikkamaṭṭhena sīlaṃ. Samphappalāpaṃ saṃvaraṭṭhena sīlaṃ, avītikkamaṭṭhena sīlaṃ . Abhijjhaṃ saṃvaraṭṭhena sīlaṃ, avītikkamaṭṭhena sīlaṃ. Byāpādaṃ saṃvaraṭṭhena sīlaṃ, avītikkamaṭṭhena sīlaṃ. Micchādiṭṭhiṃ saṃvaraṭṭhena sīlaṃ, avītikkamaṭṭhena sīlaṃ.
༤༡. ནེཀྑམྨེན ཀཱམཙྪནྡཾ སཾཝརཊྛེན སཱིལཾ, ཨཝཱིཏིཀྐམཊྛེན སཱིལཾ། ཨབྱཱཔཱདེན བྱཱཔཱདཾ སཾཝརཊྛེན སཱིལཾ, ཨཝཱིཏིཀྐམཊྛེན སཱིལཾ། ཨཱལོཀསཉྙཱཡ ཐིནམིདྡྷཾ…པེ॰… ཨཝིཀྑེཔཊྛེན ཨུདྡྷཙྩཾ… དྷམྨཝཝཏྠཱནེན ཝིཙིཀིཙྪཾ… ཉཱཎེན ཨཝིཛྫཾ… པཱམོཛྫེན ཨརཏིཾ…།
41. Nekkhammena kāmacchandaṃ saṃvaraṭṭhena sīlaṃ, avītikkamaṭṭhena sīlaṃ. Abyāpādena byāpādaṃ saṃvaraṭṭhena sīlaṃ, avītikkamaṭṭhena sīlaṃ. Ālokasaññāya thinamiddhaṃ…pe… avikkhepaṭṭhena uddhaccaṃ… dhammavavatthānena vicikicchaṃ… ñāṇena avijjaṃ… pāmojjena aratiṃ….
པཋམེན ཛྷཱནེན 13 ནཱིཝརཎེ…པེ॰… དུཏིཡེན ཛྷཱནེན ཝིཏཀྐཝིཙཱརེ… ཏཏིཡེན ཛྷཱནེན པཱིཏིཾ… ཙཏུཏྠེན ཛྷཱནེན སུཁདུཀྑཾ… ཨཱཀཱསཱནཉྩཱཡཏནསམཱཔཏྟིཡཱ རཱུཔསཉྙཾ པཊིགྷསཉྙཾ ནཱནཏྟསཉྙཾ… ཝིཉྙཱཎཉྩཱཡཏནསམཱཔཏྟིཡཱ ཨཱཀཱསཱནཉྩཱཡཏནསཉྙཾ… ཨཱཀིཉྩཉྙཱཡཏནསམཱཔཏྟིཡཱ ཝིཉྙཱཎཉྩཱཡཏནསཉྙཾ… ནེཝསཉྙཱནཱསཉྙཱཡཏནསམཱཔཏྟིཡཱ ཨཱཀིཉྩཉྙཱཡཏནསཉྙཾ།
Paṭhamena jhānena 14 nīvaraṇe…pe… dutiyena jhānena vitakkavicāre… tatiyena jhānena pītiṃ… catutthena jhānena sukhadukkhaṃ… ākāsānañcāyatanasamāpattiyā rūpasaññaṃ paṭighasaññaṃ nānattasaññaṃ… viññāṇañcāyatanasamāpattiyā ākāsānañcāyatanasaññaṃ… ākiñcaññāyatanasamāpattiyā viññāṇañcāyatanasaññaṃ… nevasaññānāsaññāyatanasamāpattiyā ākiñcaññāyatanasaññaṃ.
ཨནིཙྩཱནུཔསྶནཱཡ ནིཙྩསཉྙཾ…པེ॰… དུཀྑཱནུཔསྶནཱཡ སུཁསཉྙཾ… ཨནཏྟཱ ཨནུཔསྶནཱཡ ཨཏྟསཉྙཾ… ནིབྦིདཱནུཔསྶནཱཡ ནནྡིཾ… ཝིརཱགཱནུཔསྶནཱཡ རཱགཾ… ནིརོདྷཱ ཨནུཔསྶནཱཡ སམུདཡཾ… པཊིནིསྶགྒཱནུཔསྶནཱཡ ཨཱདཱནཾ… ཁཡཱནུཔསྶནཱཡ གྷནསཉྙཾ… ཝཡཱནུཔསྶནཱཡ ཨཱཡཱུཧནཾ.. ཝིཔརིཎཱམཱནུཔསྶནཱཡ དྷུཝསཉྙཾ… ཨནིམིཏྟཱནུཔསྶནཱཡ ནིམིཏྟཾ…. ཨཔྤཎིཧིཏཱནུཔསྶནཱཡ པཎིདྷིཾ… སུཉྙཏཱནུཔསྶནཱཡ ཨབྷིནིཝེསཾ… ཨདྷིཔཉྙཱདྷམྨཝིཔསྶནཱཡ སཱརཱདཱནཱབྷིནིཝེསཾ… ཡཐཱབྷཱུཏཉཱཎདསྶནེན སམྨོཧཱབྷིནིཝེསཾ… ཨཱདཱིནཝཱནུཔསྶནཱཡ ཨཱལཡཱབྷིནིཝེསཾ… པཊིསངྑཱནུཔསྶནཱཡ ཨཔྤཊིསངྑཾ… ཝིཝཊྚནཱནུཔསྶནཱཡ སཉྙོགཱབྷིནིཝེསཾ…།
Aniccānupassanāya niccasaññaṃ…pe… dukkhānupassanāya sukhasaññaṃ… anattā anupassanāya attasaññaṃ… nibbidānupassanāya nandiṃ… virāgānupassanāya rāgaṃ… nirodhā anupassanāya samudayaṃ… paṭinissaggānupassanāya ādānaṃ… khayānupassanāya ghanasaññaṃ… vayānupassanāya āyūhanaṃ.. vipariṇāmānupassanāya dhuvasaññaṃ… animittānupassanāya nimittaṃ…. appaṇihitānupassanāya paṇidhiṃ… suññatānupassanāya abhinivesaṃ… adhipaññādhammavipassanāya sārādānābhinivesaṃ… yathābhūtañāṇadassanena sammohābhinivesaṃ… ādīnavānupassanāya ālayābhinivesaṃ… paṭisaṅkhānupassanāya appaṭisaṅkhaṃ… vivaṭṭanānupassanāya saññogābhinivesaṃ….
སོཏཱཔཏྟིམགྒེན དིཊྛེཀཊྛེ ཀིལེསེ…པེ॰… སཀདཱགཱམིམགྒེན ཨོལཱ༹རིཀེ ཀིལེསེ… ཨནཱགཱམིམགྒེན ཨཎུསཧགཏེ ཀིལེསེ… ཨརཧཏྟམགྒེན སབྦཀིལེསེ སཾཝརཊྛེན སཱིལཾ, ཨཝཱིཏིཀྐམཊྛེན སཱིལཾ།
Sotāpattimaggena diṭṭhekaṭṭhe kilese…pe… sakadāgāmimaggena oḷārike kilese… anāgāmimaggena aṇusahagate kilese… arahattamaggena sabbakilese saṃvaraṭṭhena sīlaṃ, avītikkamaṭṭhena sīlaṃ.
པཉྩ སཱིལཱནི – པཱཎཱཏིཔཱཏསྶ པཧཱནཾ སཱིལཾ, ཝེརམཎཱི སཱིལཾ, ཙེཏནཱ སཱིལཾ, སཾཝརོ སཱིལཾ, ཨཝཱིཏིཀྐམོ སཱིལཾ། ཨེཝརཱུཔཱནི སཱིལཱནི ཙིཏྟསྶ ཨཝིཔྤཊིསཱརཱཡ སཾཝཏྟནྟི, པཱམོཛྫཱཡ སཾཝཏྟནྟི, པཱིཏིཡཱ སཾཝཏྟནྟི, པསྶདྡྷིཡཱ སཾཝཏྟནྟི, སོམནསྶཱཡ སཾཝཏྟནྟི, ཨཱསེཝནཱཡ སཾཝཏྟནྟི, བྷཱཝནཱཡ སཾཝཏྟནྟི, བཧུལཱིཀམྨཱཡ སཾཝཏྟནྟི, ཨལངྐཱརཱཡ སཾཝཏྟནྟི, པརིཀྑཱརཱཡ སཾཝཏྟནྟི, པརིཝཱརཱཡ སཾཝཏྟནྟི, པཱརིཔཱུརིཡཱ སཾཝཏྟནྟི, ཨེཀནྟནིབྦིདཱཡ ཝིརཱགཱཡ ནིརོདྷཱཡ ཨུཔསམཱཡ ཨབྷིཉྙཱཡ སམྦོདྷཱཡ ནིབྦཱནཱཡ སཾཝཏྟནྟི།
Pañca sīlāni – pāṇātipātassa pahānaṃ sīlaṃ, veramaṇī sīlaṃ, cetanā sīlaṃ, saṃvaro sīlaṃ, avītikkamo sīlaṃ. Evarūpāni sīlāni cittassa avippaṭisārāya saṃvattanti, pāmojjāya saṃvattanti, pītiyā saṃvattanti, passaddhiyā saṃvattanti, somanassāya saṃvattanti, āsevanāya saṃvattanti, bhāvanāya saṃvattanti, bahulīkammāya saṃvattanti, alaṅkārāya saṃvattanti, parikkhārāya saṃvattanti, parivārāya saṃvattanti, pāripūriyā saṃvattanti, ekantanibbidāya virāgāya nirodhāya upasamāya abhiññāya sambodhāya nibbānāya saṃvattanti.
ཨེཝརཱུཔཱནཾ སཱིལཱནཾ སཾཝརཔཱརིསུདྡྷི ཨདྷིསཱིལཾ, སཾཝརཔཱརིསུདྡྷིཡཱ ཋིཏཾ ཙིཏྟཾ ན ཝིཀྑེཔཾ གཙྪཏི, ཨཝིཀྑེཔཔཱརིསུདྡྷི ཨདྷིཙིཏྟཾ སཾཝརཔཱརིསུདྡྷིཾ སམྨཱ པསྶཏི, ཨཝིཀྑེཔཔཱརིསུདྡྷིཾ སམྨཱ པསྶཏི། དསྶནཔཱརིསུདྡྷི ཨདྷིཔཉྙཱ། ཡོ ཏཏྠ སཾཝརཊྛོ, ཨཡཾ ཨདྷིསཱིལསིཀྑཱ ། ཡོ ཏཏྠ ཨཝིཀྑེཔཊྛོ, ཨཡཾ ཨདྷིཙིཏྟསིཀྑཱ། ཡོ ཏཏྠ དསྶནཊྛོ, ཨཡཾ ཨདྷིཔཉྙཱསིཀྑཱ།
Evarūpānaṃ sīlānaṃ saṃvarapārisuddhi adhisīlaṃ, saṃvarapārisuddhiyā ṭhitaṃ cittaṃ na vikkhepaṃ gacchati, avikkhepapārisuddhi adhicittaṃ saṃvarapārisuddhiṃ sammā passati, avikkhepapārisuddhiṃ sammā passati. Dassanapārisuddhi adhipaññā. Yo tattha saṃvaraṭṭho, ayaṃ adhisīlasikkhā . Yo tattha avikkhepaṭṭho, ayaṃ adhicittasikkhā. Yo tattha dassanaṭṭho, ayaṃ adhipaññāsikkhā.
ཨིམཱ ཏིསྶོ སིཀྑཱཡོ ཨཱཝཛྫནྟོ སིཀྑཏི, ཛཱནནྟོ སིཀྑཏི, པསྶནྟོ སིཀྑཏི, པཙྩཝེཀྑནྟོ སིཀྑཏི, ཙིཏྟཾ ཨདྷིཊྛཧནྟོ སིཀྑཏི, སདྡྷཱཡ ཨདྷིམུཙྩནྟོ སིཀྑཏི, ཝཱིརིཡཾ པགྒཎྷནྟོ སིཀྑཏི, སཏིཾ ཨུཔཊྛཔེནྟོ སིཀྑཏི, ཙིཏྟཾ སམཱདཧནྟོ སིཀྑཏི, པཉྙཱཡ པཛཱནནྟོ སིཀྑཏི, ཨབྷིཉྙེཡྻཾ ཨབྷིཛཱནནྟོ སིཀྑཏི, པརིཉྙེཡྻཾ པརིཛཱནནྟོ སིཀྑཏི, པཧཱཏབྦཾ པཛཧནྟོ སིཀྑཏི, སཙྪིཀཱཏབྦཾ སཙྪིཀརོནྟོ སིཀྑཏི, བྷཱཝེཏབྦཾ བྷཱཝེནྟོ སིཀྑཏི།
Imā tisso sikkhāyo āvajjanto sikkhati, jānanto sikkhati, passanto sikkhati, paccavekkhanto sikkhati, cittaṃ adhiṭṭhahanto sikkhati, saddhāya adhimuccanto sikkhati, vīriyaṃ paggaṇhanto sikkhati, satiṃ upaṭṭhapento sikkhati, cittaṃ samādahanto sikkhati, paññāya pajānanto sikkhati, abhiññeyyaṃ abhijānanto sikkhati, pariññeyyaṃ parijānanto sikkhati, pahātabbaṃ pajahanto sikkhati, sacchikātabbaṃ sacchikaronto sikkhati, bhāvetabbaṃ bhāvento sikkhati.
པཉྩ སཱིལཱནི – ཨདིནྣཱདཱནསྶ…པེ॰… ཀཱམེསུམིཙྪཱཙཱརསྶ… མུསཱཝཱདསྶ… པིསུཎཱཡ ཝཱཙཱཡ… ཕརུསཱཡ ཝཱཙཱཡ… སམྥཔྤལཱཔསྶ… ཨབྷིཛ྄ཛྷཱཡ… བྱཱཔཱདསྶ… མིཙྪཱདིཊྛིཡཱ… བྷཱཝེཏབྦཾ བྷཱཝེནྟོ སིཀྑནྟི།
Pañca sīlāni – adinnādānassa…pe… kāmesumicchācārassa… musāvādassa… pisuṇāya vācāya… pharusāya vācāya… samphappalāpassa… abhijjhāya… byāpādassa… micchādiṭṭhiyā… bhāvetabbaṃ bhāvento sikkhanti.
ནེཀྑམྨེན ཀཱམཙྪནྡསྶ…པེ॰… ཨབྱཱཔཱདེན བྱཱཔཱདསྶ… ཨཱལོཀསཉྙཱཡ ཐིནམིདྡྷསྶ… ཨཝིཀྑེཔེན ཨུདྡྷཙྩསྶ… … དྷམྨཝཝཏྠཱནེན ཝིཙིཀིཙྪཱཡ… ཉཱཎེན ཨཝིཛྫཱཡ… པཱམོཛྫེན ཨརཏིཡཱ… བྷཱཝེཏབྦཾ བྷཱཝེནྟོ སིཀྑཏི།
Nekkhammena kāmacchandassa…pe… abyāpādena byāpādassa… ālokasaññāya thinamiddhassa… avikkhepena uddhaccassa… … dhammavavatthānena vicikicchāya… ñāṇena avijjāya… pāmojjena aratiyā… bhāvetabbaṃ bhāvento sikkhati.
པཋམེན ཛྷཱནེན ནཱིཝརཎཱནཾ…པེ॰… དུཏིཡེན ཛྷཱནེན ཝིཏཀྐཝིཙཱརཱནཾ… ཏཏིཡེན ཛྷཱནེན པཱིཏིཡཱ… ཙཏུཏྠེན ཛྷཱནེན སུཁདུཀྑཱནཾ… ཨཱཀཱསཱནཉྩཱཡཏནསམཱཔཏྟིཡཱ རཱུཔསཉྙཱཡ པཊིགྷསཉྙཱཡ ནཱནཏྟསཉྙཱཡ… ཝིཉྙཱཎཉྩཱཡཏནསམཱཔཏྟིཡཱ ཨཱཀཱསཱནཉྩཱཡཏནསཉྙཱཡ… ཨཱཀིཉྩཉྙཱཡཏནསམཱཔཏྟིཡཱ ཝིཉྙཱཎཉྩཱཡཏནསཉྙཱཡ… ནེཝསཉྙཱནཱསཉྙཱཡཏནསམཱཔཏྟིཡཱ ཨཱཀིཉྩཉྙཱཡཏནསཉྙཱཡ… བྷཱཝེཏབྦཾ བྷཱཝེནྟོ སིཀྑཏི།
Paṭhamena jhānena nīvaraṇānaṃ…pe… dutiyena jhānena vitakkavicārānaṃ… tatiyena jhānena pītiyā… catutthena jhānena sukhadukkhānaṃ… ākāsānañcāyatanasamāpattiyā rūpasaññāya paṭighasaññāya nānattasaññāya… viññāṇañcāyatanasamāpattiyā ākāsānañcāyatanasaññāya… ākiñcaññāyatanasamāpattiyā viññāṇañcāyatanasaññāya… nevasaññānāsaññāyatanasamāpattiyā ākiñcaññāyatanasaññāya… bhāvetabbaṃ bhāvento sikkhati.
ཨནིཙྩཱནུཔསྶནཱཡ ནིཙྩསཉྙཱཡ…པེ॰… དུཀྑཱནུཔསྶནཱཡ སུཁསཉྙཱཡ… ཨནཏྟཱནུཔསྶནཱཡ ཨཏྟསཉྙཱཡ… ནིབྦིདཱནུཔསྶནཱཡ ནནྡིཡཱ… ཝིརཱགཱནུཔསྶནཱཡ རཱགསྶ… ནིརོདྷཱནུཔསྶནཱཡ སམུདཡསྶ… པཊིནིསྶགྒཱནུཔསྶནཱཡ ཨཱདཱནསྶ… ཁཡཱནུཔསྶནཱཡ གྷནསཉྙཱཡ… ཝཡཱནུཔསྶནཱཡ ཨཱཡཱུཧནསྶ… ཝིཔརིཎཱམཱནུཔསྶནཱཡ དྷུཝསཉྙཱཡ… ཨནིམིཏྟཱནུཔསྶནཱཡ ནིམིཏྟསྶ… ཨཔྤཎིཧིཏཱནུཔསྶནཱཡ པཎིདྷིཡཱ… སུཉྙཏཱནུཔསྶནཱཡ ཨབྷིནིཝེསསྶ… ཨདྷིཔཉྙཱདྷམྨཝིཔསྶནཱཡ སཱརཱགཱབྷིནིཝེསསྶ… ཡཐཱབྷཱུཏཉཱཎདསྶནེན སམྨོཧཱབྷིནིཝེསསྶ… ཨཱདཱིནཝཱནུཔསྶནཱཡ ཨཱལཡཱབྷིནིཝེསསྶ… པཊིསངྑཱནུཔསྶནཱཡ ཨཔྤཊིསངྑཱཡ… ཝིཝཊྚནཱནུཔསྶནཱཡ སཉྙོགཱབྷིནིཝེསསྶ བྷཱཝེཏབྦཾ བྷཱཝེནྟོ སིཀྑཏི།
Aniccānupassanāya niccasaññāya…pe… dukkhānupassanāya sukhasaññāya… anattānupassanāya attasaññāya… nibbidānupassanāya nandiyā… virāgānupassanāya rāgassa… nirodhānupassanāya samudayassa… paṭinissaggānupassanāya ādānassa… khayānupassanāya ghanasaññāya… vayānupassanāya āyūhanassa… vipariṇāmānupassanāya dhuvasaññāya… animittānupassanāya nimittassa… appaṇihitānupassanāya paṇidhiyā… suññatānupassanāya abhinivesassa… adhipaññādhammavipassanāya sārāgābhinivesassa… yathābhūtañāṇadassanena sammohābhinivesassa… ādīnavānupassanāya ālayābhinivesassa… paṭisaṅkhānupassanāya appaṭisaṅkhāya… vivaṭṭanānupassanāya saññogābhinivesassa bhāvetabbaṃ bhāvento sikkhati.
སོཏཱཔཏྟིམགྒེན དིཊྛེཀཊྛཱནཾ ཀིལེསཱནཾ…པེ॰… སཀདཱགཱམིམགྒེན ཨོལཱ༹རིཀཱནཾ ཀིལེསཱནཾ… ཨནཱགཱམིམགྒེན ཨནུསཧགཏཱནཾ ཀིལེསཱནཾ… ཨརཧཏྟམགྒེན སབྦཀིལེསཱནཾ པཧཱནཾ སཱིལཾ, ཝེརམཎཱི སཱིལཾ, ཙེཏནཱ སཱིལཾ, སཾཝརོ སཱིལཾ, ཨཝཱིཏིཀྐམོ སཱིལཾ། ཨེཝརཱུཔཱནི སཱིལཱནི ཙིཏྟསྶ ཨཝིཔྤཊིསཱརཱཡ སཾཝཏྟནྟི, པཱམོཛྫཱཡ སཾཝཏྟནྟི, པཱིཏིཡཱ སཾཝཏྟནྟི, པསྶདྡྷིཡཱ སཾཝཏྟནྟི, སོམནསྶཱཡ སཾཝཏྟནྟི, ཨཱསེཝནཱཡ སཾཝཏྟནྟི, བྷཱཝནཱཡ སཾཝཏྟནྟི, བཧུལཱིཀམྨཱཡ སཾཝཏྟནྟི, ཨལངྐཱརཱཡ སཾཝཏྟནྟི, པརིཀྑཱརཱཡ སཾཝཏྟནྟི, པརིཝཱརཱཡ སཾཝཏྟནྟི, པཱརིཔཱུརིཡཱ སཾཝཏྟནྟི, ཨེཀནྟནིབྦིདཱཡ ཝིརཱགཱཡ ནིརོདྷཱཡ ཨུཔསམཱཡ ཨབྷིཉྙཱཡ སམྦོདྷཱཡ ནིབྦཱནཱཡ སཾཝཏྟནྟི།
Sotāpattimaggena diṭṭhekaṭṭhānaṃ kilesānaṃ…pe… sakadāgāmimaggena oḷārikānaṃ kilesānaṃ… anāgāmimaggena anusahagatānaṃ kilesānaṃ… arahattamaggena sabbakilesānaṃ pahānaṃ sīlaṃ, veramaṇī sīlaṃ, cetanā sīlaṃ, saṃvaro sīlaṃ, avītikkamo sīlaṃ. Evarūpāni sīlāni cittassa avippaṭisārāya saṃvattanti, pāmojjāya saṃvattanti, pītiyā saṃvattanti, passaddhiyā saṃvattanti, somanassāya saṃvattanti, āsevanāya saṃvattanti, bhāvanāya saṃvattanti, bahulīkammāya saṃvattanti, alaṅkārāya saṃvattanti, parikkhārāya saṃvattanti, parivārāya saṃvattanti, pāripūriyā saṃvattanti, ekantanibbidāya virāgāya nirodhāya upasamāya abhiññāya sambodhāya nibbānāya saṃvattanti.
༤༢. ཨེཝརཱུཔཱནཾ སཱིལཱནཾ སཾཝརཔཱརིསུདྡྷི ཨདྷིསཱིལཾ། སཾཝརཔཱརིསུདྡྷིཡཱ ཋིཏཾ ཙིཏྟཾ ཨཝིཀྑེཔཾ གཙྪཏི, ཨཝིཀྑེཔཔཱརིསུདྡྷི ཨདྷིཙིཏྟཾ། སཾཝརཔཱརིསུདྡྷིཾ སམྨཱ པསྶཏི, ཨཝིཀྑེཔཔཱརིསུདྡྷིཾ སམྨཱ པསྶཏི། དསྶནཔཱརིསུདྡྷི ཨདྷིཔཉྙཱ། ཡོ ཏཏྠ སཾཝརཊྛོ, ཨཡཾ ཨདྷིསཱིལསིཀྑཱ། ཡོ ཏཏྠ ཨཝིཀྑེཔཊྛོ, ཨཡཾ ཨདྷིཙིཏྟསིཀྑཱ། ཡོ ཏཏྠ དསྶནཊྛོ, ཨཡཾ ཨདྷིཔཉྙཱསིཀྑཱ། ཨིམཱ ཏིསྶོ སིཀྑཱཡོ ཨཱཝཛྫནྟོ སིཀྑཏི, ཛཱནནྟོ སིཀྑཏི, པསྶནྟོ སིཀྑཏི, པཙྩཝེཀྑནྟོ སིཀྑཏི, ཙིཏྟཾ ཨདྷིཊྛཧནྟོ སིཀྑཏི, སདྡྷཱཡ ཨདྷིམུཙྩནྟོ སིཀྑཏི, ཝཱིརིཡཾ པགྒཎྷནྟོ སིཀྑཏི, སཏིཾ ཨུཔཊྛཔེནྟོ སིཀྑཏི, ཙིཏྟཾ སམཱདཧནྟོ སིཀྑཏི, པཉྙཱཡ པཛཱནནྟོ སིཀྑཏི, ཨབྷིཉྙེཡྻཾ ཨབྷིཛཱནནྟོ སིཀྑཏི, པརིཉྙེཡྻཾ པརིཛཱནནྟོ སིཀྑཏི པཧཱཏབྦཾ པཛཧནྟོ སིཀྑཏི, སཙྪིཀཱཏབྦཾ སཙྪིཀརོནྟོ སིཀྑཏི, བྷཱཝེཏབྦཾ བྷཱཝེནྟོ སིཀྑཏི། ཏཾ ཉཱཏཊྛེན ཉཱཎཾ པཛཱནནཊྛེན པཉྙཱ། ཏེན ཝུཙྩཏི – ‘‘སུཏྭཱན སཾཝརེ པཉྙཱ སཱིལམཡེ ཉཱཎཾ’’།
42. Evarūpānaṃ sīlānaṃ saṃvarapārisuddhi adhisīlaṃ. Saṃvarapārisuddhiyā ṭhitaṃ cittaṃ avikkhepaṃ gacchati, avikkhepapārisuddhi adhicittaṃ. Saṃvarapārisuddhiṃ sammā passati, avikkhepapārisuddhiṃ sammā passati. Dassanapārisuddhi adhipaññā. Yo tattha saṃvaraṭṭho, ayaṃ adhisīlasikkhā. Yo tattha avikkhepaṭṭho, ayaṃ adhicittasikkhā. Yo tattha dassanaṭṭho, ayaṃ adhipaññāsikkhā. Imā tisso sikkhāyo āvajjanto sikkhati, jānanto sikkhati, passanto sikkhati, paccavekkhanto sikkhati, cittaṃ adhiṭṭhahanto sikkhati, saddhāya adhimuccanto sikkhati, vīriyaṃ paggaṇhanto sikkhati, satiṃ upaṭṭhapento sikkhati, cittaṃ samādahanto sikkhati, paññāya pajānanto sikkhati, abhiññeyyaṃ abhijānanto sikkhati, pariññeyyaṃ parijānanto sikkhati pahātabbaṃ pajahanto sikkhati, sacchikātabbaṃ sacchikaronto sikkhati, bhāvetabbaṃ bhāvento sikkhati. Taṃ ñātaṭṭhena ñāṇaṃ pajānanaṭṭhena paññā. Tena vuccati – ‘‘sutvāna saṃvare paññā sīlamaye ñāṇaṃ’’.
སཱིལམཡཉཱཎནིདྡེསོ དུཏིཡོ།
Sīlamayañāṇaniddeso dutiyo.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / པཊིསམྦྷིདཱམགྒ-ཨཊྛཀཐཱ • Paṭisambhidāmagga-aṭṭhakathā / ༢. སཱིལམཡཉཱཎནིདྡེསཝཎྞནཱ • 2. Sīlamayañāṇaniddesavaṇṇanā
