| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৫. সীলসম্পন্নসুত্তং
5. Sīlasampannasuttaṃ
১০৪. ৰুত্তঞ্হেতং ভগৰতা, ৰুত্তমরহতাতি মে সুতং –
104. Vuttañhetaṃ bhagavatā, vuttamarahatāti me sutaṃ –
‘‘যে তে, ভিক্খৰে, ভিক্খূ সীলসম্পন্না সমাধিসম্পন্না পঞ্ঞাসম্পন্না ৰিমুত্তিসম্পন্না ৰিমুত্তিঞাণদস্সনসম্পন্না ওৰাদকা ৰিঞ্ঞাপকা সন্দস্সকা সমাদপকা সমুত্তেজকা সম্পহংসকা অলংসমক্খাতারো সদ্ধম্মস্স দস্সনম্পহং, ভিক্খৰে, তেসং ভিক্খূনং বহূপকারং ৰদামি; সৰনম্পহং, ভিক্খৰে, তেসং ভিক্খূনং বহূপকারং ৰদামি; উপসঙ্কমনম্পহং, ভিক্খৰে, তেসং ভিক্খূনং বহূপকারং ৰদামি; পযিরুপাসনম্পহং, ভিক্খৰে, তেসং ভিক্খূনং বহূপকারং ৰদামি; অনুস্সরণম্পহং, ভিক্খৰে, তেসং ভিক্খূনং বহূপকারং ৰদামি; অনুপব্বজ্জম্পহং 1, ভিক্খৰে, তেসং ভিক্খূনং বহূপকারং ৰদামি। তং কিস্স হেতু? তথারূপে, ভিক্খৰে, ভিক্খূ সেৰতো ভজতো পযিরুপাসতো অপরিপূরোপি সীলক্খন্ধো ভাৰনাপারিপূরিং গচ্ছতি, অপরিপূরোপি সমাধিক্খন্ধো ভাৰনাপারিপূরিং গচ্ছতি, অপরিপূরোপি পঞ্ঞাক্খন্ধো ভাৰনাপারিপূরিং গচ্ছতি, অপরিপূরোপি ৰিমুত্তিক্খন্ধো ভাৰনাপারিপূরিং গচ্ছতি, অপরিপূরোপি ৰিমুত্তিঞাণদস্সনক্খন্ধো ভাৰনাপারিপূরিং গচ্ছতি। এৰরূপা চ তে, ভিক্খৰে, ভিক্খূ সত্থারোতিপি ৰুচ্চন্তি, সত্থৰাহাতিপি ৰুচ্চন্তি, রণঞ্জহাতিপি ৰুচ্চন্তি, তমোনুদাতিপি ৰুচ্চন্তি, আলোককরাতিপি ৰুচ্চন্তি, ওভাসকরাতিপি ৰুচ্চন্তি, পজ্জোতকরাতিপি ৰুচ্চন্তি, উক্কাধারাতিপি ৰুচ্চন্তি, পভঙ্করাতিপি ৰুচ্চন্তি, অরিযাতিপি ৰুচ্চন্তি, চক্খুমন্তোতিপি ৰুচ্চন্তী’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Ye te, bhikkhave, bhikkhū sīlasampannā samādhisampannā paññāsampannā vimuttisampannā vimuttiñāṇadassanasampannā ovādakā viññāpakā sandassakā samādapakā samuttejakā sampahaṃsakā alaṃsamakkhātāro saddhammassa dassanampahaṃ, bhikkhave, tesaṃ bhikkhūnaṃ bahūpakāraṃ vadāmi; savanampahaṃ, bhikkhave, tesaṃ bhikkhūnaṃ bahūpakāraṃ vadāmi; upasaṅkamanampahaṃ, bhikkhave, tesaṃ bhikkhūnaṃ bahūpakāraṃ vadāmi; payirupāsanampahaṃ, bhikkhave, tesaṃ bhikkhūnaṃ bahūpakāraṃ vadāmi; anussaraṇampahaṃ, bhikkhave, tesaṃ bhikkhūnaṃ bahūpakāraṃ vadāmi; anupabbajjampahaṃ 2, bhikkhave, tesaṃ bhikkhūnaṃ bahūpakāraṃ vadāmi. Taṃ kissa hetu? Tathārūpe, bhikkhave, bhikkhū sevato bhajato payirupāsato aparipūropi sīlakkhandho bhāvanāpāripūriṃ gacchati, aparipūropi samādhikkhandho bhāvanāpāripūriṃ gacchati, aparipūropi paññākkhandho bhāvanāpāripūriṃ gacchati, aparipūropi vimuttikkhandho bhāvanāpāripūriṃ gacchati, aparipūropi vimuttiñāṇadassanakkhandho bhāvanāpāripūriṃ gacchati. Evarūpā ca te, bhikkhave, bhikkhū satthārotipi vuccanti, satthavāhātipi vuccanti, raṇañjahātipi vuccanti, tamonudātipi vuccanti, ālokakarātipi vuccanti, obhāsakarātipi vuccanti, pajjotakarātipi vuccanti, ukkādhārātipi vuccanti, pabhaṅkarātipi vuccanti, ariyātipi vuccanti, cakkhumantotipi vuccantī’’ti. Etamatthaṃ bhagavā avoca. Tatthetaṃ iti vuccati –
যদিদং ভাৰিতত্তানং, অরিযানং ধম্মজীৰিনং॥
Yadidaṃ bhāvitattānaṃ, ariyānaṃ dhammajīvinaṃ.
‘‘তে জোতযন্তি সদ্ধম্মং, ভাসযন্তি পভঙ্করা।
‘‘Te jotayanti saddhammaṃ, bhāsayanti pabhaṅkarā;
আলোককরণা ধীরা, চক্খুমন্তো রণঞ্জহা॥
Ālokakaraṇā dhīrā, cakkhumanto raṇañjahā.
‘‘যেসং ৰে সাসনং সুত্ৰা, সম্মদঞ্ঞায পণ্ডিতা।
‘‘Yesaṃ ve sāsanaṃ sutvā, sammadaññāya paṇḍitā;
জাতিক্খযমভিঞ্ঞায , নাগচ্ছন্তি পুনব্ভৰ’’ন্তি॥
Jātikkhayamabhiññāya , nāgacchanti punabbhava’’nti.
অযম্পি অত্থো ৰুত্তো ভগৰতা, ইতি মে সুতন্তি। পঞ্চমং।
Ayampi attho vutto bhagavatā, iti me sutanti. Pañcamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৫. সীলসম্পন্নসুত্তৰণ্ণনা • 5. Sīlasampannasuttavaṇṇanā
