| Library / Tipiṭaka / តិបិដក • Tipiṭaka / ឥតិវុត្តកបាឡិ • Itivuttakapāḷi |
៥. សីលសម្បន្នសុត្តំ
5. Sīlasampannasuttaṃ
១០៤. វុត្តញ្ហេតំ ភគវតា, វុត្តមរហតាតិ មេ សុតំ –
104. Vuttañhetaṃ bhagavatā, vuttamarahatāti me sutaṃ –
‘‘យេ តេ, ភិក្ខវេ, ភិក្ខូ សីលសម្បន្នា សមាធិសម្បន្នា បញ្ញាសម្បន្នា វិមុត្តិសម្បន្នា វិមុត្តិញាណទស្សនសម្បន្នា ឱវាទកា វិញ្ញាបកា សន្ទស្សកា សមាទបកា សមុត្តេជកា សម្បហំសកា អលំសមក្ខាតារោ សទ្ធម្មស្ស ទស្សនម្បហំ, ភិក្ខវេ, តេសំ ភិក្ខូនំ ពហូបការំ វទាមិ; សវនម្បហំ, ភិក្ខវេ, តេសំ ភិក្ខូនំ ពហូបការំ វទាមិ; ឧបសង្កមនម្បហំ, ភិក្ខវេ, តេសំ ភិក្ខូនំ ពហូបការំ វទាមិ; បយិរុបាសនម្បហំ, ភិក្ខវេ, តេសំ ភិក្ខូនំ ពហូបការំ វទាមិ; អនុស្សរណម្បហំ, ភិក្ខវេ, តេសំ ភិក្ខូនំ ពហូបការំ វទាមិ; អនុបព្ពជ្ជម្បហំ 1, ភិក្ខវេ, តេសំ ភិក្ខូនំ ពហូបការំ វទាមិ។ តំ កិស្ស ហេតុ? តថារូបេ, ភិក្ខវេ, ភិក្ខូ សេវតោ ភជតោ បយិរុបាសតោ អបរិបូរោបិ សីលក្ខន្ធោ ភាវនាបារិបូរិំ គច្ឆតិ, អបរិបូរោបិ សមាធិក្ខន្ធោ ភាវនាបារិបូរិំ គច្ឆតិ, អបរិបូរោបិ បញ្ញាក្ខន្ធោ ភាវនាបារិបូរិំ គច្ឆតិ, អបរិបូរោបិ វិមុត្តិក្ខន្ធោ ភាវនាបារិបូរិំ គច្ឆតិ, អបរិបូរោបិ វិមុត្តិញាណទស្សនក្ខន្ធោ ភាវនាបារិបូរិំ គច្ឆតិ។ ឯវរូបា ច តេ, ភិក្ខវេ, ភិក្ខូ សត្ថារោតិបិ វុច្ចន្តិ, សត្ថវាហាតិបិ វុច្ចន្តិ, រណញ្ជហាតិបិ វុច្ចន្តិ, តមោនុទាតិបិ វុច្ចន្តិ, អាលោកករាតិបិ វុច្ចន្តិ, ឱភាសករាតិបិ វុច្ចន្តិ, បជ្ជោតករាតិបិ វុច្ចន្តិ, ឧក្កាធារាតិបិ វុច្ចន្តិ, បភង្ករាតិបិ វុច្ចន្តិ, អរិយាតិបិ វុច្ចន្តិ, ចក្ខុមន្តោតិបិ វុច្ចន្តី’’តិ។ ឯតមត្ថំ ភគវា អវោច។ តត្ថេតំ ឥតិ វុច្ចតិ –
‘‘Ye te, bhikkhave, bhikkhū sīlasampannā samādhisampannā paññāsampannā vimuttisampannā vimuttiñāṇadassanasampannā ovādakā viññāpakā sandassakā samādapakā samuttejakā sampahaṃsakā alaṃsamakkhātāro saddhammassa dassanampahaṃ, bhikkhave, tesaṃ bhikkhūnaṃ bahūpakāraṃ vadāmi; savanampahaṃ, bhikkhave, tesaṃ bhikkhūnaṃ bahūpakāraṃ vadāmi; upasaṅkamanampahaṃ, bhikkhave, tesaṃ bhikkhūnaṃ bahūpakāraṃ vadāmi; payirupāsanampahaṃ, bhikkhave, tesaṃ bhikkhūnaṃ bahūpakāraṃ vadāmi; anussaraṇampahaṃ, bhikkhave, tesaṃ bhikkhūnaṃ bahūpakāraṃ vadāmi; anupabbajjampahaṃ 2, bhikkhave, tesaṃ bhikkhūnaṃ bahūpakāraṃ vadāmi. Taṃ kissa hetu? Tathārūpe, bhikkhave, bhikkhū sevato bhajato payirupāsato aparipūropi sīlakkhandho bhāvanāpāripūriṃ gacchati, aparipūropi samādhikkhandho bhāvanāpāripūriṃ gacchati, aparipūropi paññākkhandho bhāvanāpāripūriṃ gacchati, aparipūropi vimuttikkhandho bhāvanāpāripūriṃ gacchati, aparipūropi vimuttiñāṇadassanakkhandho bhāvanāpāripūriṃ gacchati. Evarūpā ca te, bhikkhave, bhikkhū satthārotipi vuccanti, satthavāhātipi vuccanti, raṇañjahātipi vuccanti, tamonudātipi vuccanti, ālokakarātipi vuccanti, obhāsakarātipi vuccanti, pajjotakarātipi vuccanti, ukkādhārātipi vuccanti, pabhaṅkarātipi vuccanti, ariyātipi vuccanti, cakkhumantotipi vuccantī’’ti. Etamatthaṃ bhagavā avoca. Tatthetaṃ iti vuccati –
យទិទំ ភាវិតត្តានំ, អរិយានំ ធម្មជីវិនំ។
Yadidaṃ bhāvitattānaṃ, ariyānaṃ dhammajīvinaṃ.
‘‘តេ ជោតយន្តិ សទ្ធម្មំ, ភាសយន្តិ បភង្ករា;
‘‘Te jotayanti saddhammaṃ, bhāsayanti pabhaṅkarā;
អាលោកករណា ធីរា, ចក្ខុមន្តោ រណញ្ជហា។
Ālokakaraṇā dhīrā, cakkhumanto raṇañjahā.
‘‘យេសំ វេ សាសនំ សុត្វា, សម្មទញ្ញាយ បណ្ឌិតា;
‘‘Yesaṃ ve sāsanaṃ sutvā, sammadaññāya paṇḍitā;
ជាតិក្ខយមភិញ្ញាយ , នាគច្ឆន្តិ បុនព្ភវ’’ន្តិ។
Jātikkhayamabhiññāya , nāgacchanti punabbhava’’nti.
អយម្បិ អត្ថោ វុត្តោ ភគវតា, ឥតិ មេ សុតន្តិ។ បញ្ចមំ។
Ayampi attho vutto bhagavatā, iti me sutanti. Pañcamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ឥតិវុត្តក-អដ្ឋកថា • Itivuttaka-aṭṭhakathā / ៥. សីលសម្បន្នសុត្តវណ្ណនា • 5. Sīlasampannasuttavaṇṇanā
