| Library / Tipiṭaka / තිපිටක • Tipiṭaka / ඉතිවුත්‌තකපාළි • Itivuttakapāḷi |
5. සීලසම්‌පන්‌නසුත්‌තං
5. Sīlasampannasuttaṃ
104. වුත්‌තඤ්‌හෙතං භගවතා, වුත්‌තමරහතාති මෙ සුතං –
104. Vuttañhetaṃ bhagavatā, vuttamarahatāti me sutaṃ –
‘‘යෙ තෙ, භික්‌ඛවෙ, භික්‌ඛූ සීලසම්‌පන්‌නා සමාධිසම්‌පන්‌නා පඤ්‌ඤාසම්‌පන්‌නා විමුත්‌තිසම්‌පන්‌නා විමුත්‌තිඤාණදස්‌සනසම්‌පන්‌නා ඔවාදකා විඤ්‌ඤාපකා සන්‌දස්‌සකා සමාදපකා සමුත්‌තෙජකා සම්‌පහංසකා අලංසමක්‌ඛාතාරො සද්‌ධම්‌මස්‌ස දස්‌සනම්‌පහං, භික්‌ඛවෙ, තෙසං භික්‌ඛූනං බහූපකාරං වදාමි; සවනම්‌පහං, භික්‌ඛවෙ, තෙසං භික්‌ඛූනං බහූපකාරං වදාමි; උපසඞ්‌කමනම්‌පහං, භික්‌ඛවෙ, තෙසං භික්‌ඛූනං බහූපකාරං වදාමි; පයිරුපාසනම්‌පහං, භික්‌ඛවෙ, තෙසං භික්‌ඛූනං බහූපකාරං වදාමි; අනුස්‌සරණම්‌පහං, භික්‌ඛවෙ, තෙසං භික්‌ඛූනං බහූපකාරං වදාමි; අනුපබ්‌බජ්‌ජම්‌පහං 1, භික්‌ඛවෙ, තෙසං භික්‌ඛූනං බහූපකාරං වදාමි. තං කිස්‌ස හෙතු? තථාරූපෙ, භික්‌ඛවෙ, භික්‌ඛූ සෙවතො භජතො පයිරුපාසතො අපරිපූරොපි සීලක්‌ඛන්‌ධො භාවනාපාරිපූරිං ගච්‌ඡති, අපරිපූරොපි සමාධික්‌ඛන්‌ධො භාවනාපාරිපූරිං ගච්‌ඡති, අපරිපූරොපි පඤ්‌ඤාක්‌ඛන්‌ධො භාවනාපාරිපූරිං ගච්‌ඡති, අපරිපූරොපි විමුත්‌තික්‌ඛන්‌ධො භාවනාපාරිපූරිං ගච්‌ඡති, අපරිපූරොපි විමුත්‌තිඤාණදස්‌සනක්‌ඛන්‌ධො භාවනාපාරිපූරිං ගච්‌ඡති. එවරූපා ච තෙ, භික්‌ඛවෙ, භික්‌ඛූ සත්‌ථාරොතිපි වුච්‌චන්‌ති, සත්‌ථවාහාතිපි වුච්‌චන්‌ති, රණඤ්‌ජහාතිපි වුච්‌චන්‌ති, තමොනුදාතිපි වුච්‌චන්‌ති, ආලොකකරාතිපි වුච්‌චන්‌ති, ඔභාසකරාතිපි වුච්‌චන්‌ති, පජ්‌ජොතකරාතිපි වුච්‌චන්‌ති, උක්‌කාධාරාතිපි වුච්‌චන්‌ති, පභඞ්‌කරාතිපි වුච්‌චන්‌ති, අරියාතිපි වුච්‌චන්‌ති, චක්‌ඛුමන්‌තොතිපි වුච්‌චන්‌තී’’ති. එතමත්‌ථං භගවා අවොච. තත්‌ථෙතං ඉති වුච්‌චති –
‘‘Ye te, bhikkhave, bhikkhū sīlasampannā samādhisampannā paññāsampannā vimuttisampannā vimuttiñāṇadassanasampannā ovādakā viññāpakā sandassakā samādapakā samuttejakā sampahaṃsakā alaṃsamakkhātāro saddhammassa dassanampahaṃ, bhikkhave, tesaṃ bhikkhūnaṃ bahūpakāraṃ vadāmi; savanampahaṃ, bhikkhave, tesaṃ bhikkhūnaṃ bahūpakāraṃ vadāmi; upasaṅkamanampahaṃ, bhikkhave, tesaṃ bhikkhūnaṃ bahūpakāraṃ vadāmi; payirupāsanampahaṃ, bhikkhave, tesaṃ bhikkhūnaṃ bahūpakāraṃ vadāmi; anussaraṇampahaṃ, bhikkhave, tesaṃ bhikkhūnaṃ bahūpakāraṃ vadāmi; anupabbajjampahaṃ 2, bhikkhave, tesaṃ bhikkhūnaṃ bahūpakāraṃ vadāmi. Taṃ kissa hetu? Tathārūpe, bhikkhave, bhikkhū sevato bhajato payirupāsato aparipūropi sīlakkhandho bhāvanāpāripūriṃ gacchati, aparipūropi samādhikkhandho bhāvanāpāripūriṃ gacchati, aparipūropi paññākkhandho bhāvanāpāripūriṃ gacchati, aparipūropi vimuttikkhandho bhāvanāpāripūriṃ gacchati, aparipūropi vimuttiñāṇadassanakkhandho bhāvanāpāripūriṃ gacchati. Evarūpā ca te, bhikkhave, bhikkhū satthārotipi vuccanti, satthavāhātipi vuccanti, raṇañjahātipi vuccanti, tamonudātipi vuccanti, ālokakarātipi vuccanti, obhāsakarātipi vuccanti, pajjotakarātipi vuccanti, ukkādhārātipi vuccanti, pabhaṅkarātipi vuccanti, ariyātipi vuccanti, cakkhumantotipi vuccantī’’ti. Etamatthaṃ bhagavā avoca. Tatthetaṃ iti vuccati –
යදිදං භාවිතත්‌තානං, අරියානං ධම්‌මජීවිනං.
Yadidaṃ bhāvitattānaṃ, ariyānaṃ dhammajīvinaṃ.
‘‘තෙ ජොතයන්‌ති සද්‌ධම්‌මං, භාසයන්‌ති පභඞ්‌කරා;
‘‘Te jotayanti saddhammaṃ, bhāsayanti pabhaṅkarā;
ආලොකකරණා ධීරා, චක්‌ඛුමන්‌තො රණඤ්‌ජහා.
Ālokakaraṇā dhīrā, cakkhumanto raṇañjahā.
‘‘යෙසං වෙ සාසනං සුත්‌වා, සම්‌මදඤ්‌ඤාය පණ්‌ඩිතා;
‘‘Yesaṃ ve sāsanaṃ sutvā, sammadaññāya paṇḍitā;
ජාතික්‌ඛයමභිඤ්‌ඤාය , නාගච්‌ඡන්‌ති පුනබ්‌භව’’න්‌ති.
Jātikkhayamabhiññāya , nāgacchanti punabbhava’’nti.
අයම්‌පි අත්‌ථො වුත්‌තො භගවතා, ඉති මෙ සුතන්‌ති. පඤ්‌චමං.
Ayampi attho vutto bhagavatā, iti me sutanti. Pañcamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / ඉතිවුත්‌තක-අට්‌ඨකථා • Itivuttaka-aṭṭhakathā / 5. සීලසම්‌පන්‌නසුත්‌තවණ්‌ණනා • 5. Sīlasampannasuttavaṇṇanā
