| Library / Tipiṭaka / তিপিটক • Tipiṭaka / ইতিৰুত্তক-অট্ঠকথা • Itivuttaka-aṭṭhakathā |
৫. সীলসম্পন্নসুত্তৰণ্ণনা
5. Sīlasampannasuttavaṇṇanā
১০৪. পঞ্চমে সীলসম্পন্নাতি এত্থ সীলং নাম খীণাসৰানং লোকিযলোকুত্তরসীলং, তেন সম্পন্না সমন্নাগতাতি সীলসম্পন্না। সমাধিপঞ্ঞাসুপি এসেৰ নযো। ৰিমুত্তি পন ফলৰিমুত্তিযেৰ, ৰিমুত্তিঞাণদস্সনং পচ্চৰেক্খণঞাণং। এৰমেত্থ সীলাদযো তযো লোকিযলোকুত্তরা, ৰিমুত্তি লোকুত্তরাৰ, ৰিমুত্তিঞাণদস্সনং লোকিযমেৰ। দিট্ঠধম্মিকসম্পরাযিকপরমত্থেহি যথারহং পরে ওৰদন্তি অনুসাসন্তীতি ওৰাদকা। ৰিঞ্ঞাপকাতি কম্মানি কম্মফলানি চ, ৰিঞ্ঞাপকা, তত্থ চ ‘‘ইমে ধম্মা কুসলা, ইমে ধম্মা অকুসলা। ইমে ধম্মা সাৰজ্জা, ইমে ধম্মা অনৰজ্জা’’তিআদিনা কুসলাদিৰিভাগতো খন্ধাদিৰিভাগতো সলক্খণতো সামঞ্ঞলক্খণতোতি ৰিৰিধেহি নযেহি ধম্মানং ঞাপকা অৰবোধকা । সন্দস্সকাতি তেযেৰ ধম্মে হত্থেন গহেত্ৰা ৰিয পরস্স পচ্চক্খতো দস্সেতারো। সমাদপকাতি যং সীলাদি যেহি অসমাদিন্নং, তস্স সমাদাপেতারো, তত্থ তে পতিট্ঠাপেতারো। সমুত্তেজকাতি এৰং কুসলধম্মেসু পতিট্ঠিতানং উপরি অধিচিত্তানুযোগে নিযোজনৰসেন চিত্তস্স সম্মা উত্তেজকা, যথা ৰিসেসাধিগমো হোতি, এৰং নিসামনৰসেন তেজকা। সম্পহংসকাতি তেসং যথালদ্ধেহি উপরিলদ্ধব্বেহি চ গুণৰিসেসেহি চিত্তস্স সম্মা পহংসকা, লদ্ধস্সাদৰসেন সুট্ঠু তোসকা। অলংসমক্খাতারোতি অলং পরিযত্তং যথাৰুত্তং অপরিহাপেত্ৰা সম্মদেৰ অনুগ্গহাধিপ্পাযেন অক্খাতারো।
104. Pañcame sīlasampannāti ettha sīlaṃ nāma khīṇāsavānaṃ lokiyalokuttarasīlaṃ, tena sampannā samannāgatāti sīlasampannā. Samādhipaññāsupi eseva nayo. Vimutti pana phalavimuttiyeva, vimuttiñāṇadassanaṃ paccavekkhaṇañāṇaṃ. Evamettha sīlādayo tayo lokiyalokuttarā, vimutti lokuttarāva, vimuttiñāṇadassanaṃ lokiyameva. Diṭṭhadhammikasamparāyikaparamatthehi yathārahaṃ pare ovadanti anusāsantīti ovādakā. Viññāpakāti kammāni kammaphalāni ca, viññāpakā, tattha ca ‘‘ime dhammā kusalā, ime dhammā akusalā. Ime dhammā sāvajjā, ime dhammā anavajjā’’tiādinā kusalādivibhāgato khandhādivibhāgato salakkhaṇato sāmaññalakkhaṇatoti vividhehi nayehi dhammānaṃ ñāpakā avabodhakā . Sandassakāti teyeva dhamme hatthena gahetvā viya parassa paccakkhato dassetāro. Samādapakāti yaṃ sīlādi yehi asamādinnaṃ, tassa samādāpetāro, tattha te patiṭṭhāpetāro. Samuttejakāti evaṃ kusaladhammesu patiṭṭhitānaṃ upari adhicittānuyoge niyojanavasena cittassa sammā uttejakā, yathā visesādhigamo hoti, evaṃ nisāmanavasena tejakā. Sampahaṃsakāti tesaṃ yathāladdhehi upariladdhabbehi ca guṇavisesehi cittassa sammā pahaṃsakā, laddhassādavasena suṭṭhu tosakā. Alaṃsamakkhātāroti alaṃ pariyattaṃ yathāvuttaṃ aparihāpetvā sammadeva anuggahādhippāyena akkhātāro.
অথ ৰা সন্দস্সকাতি ধম্মং দেসেন্তা পৰত্তিনিৰত্তিযো সভাৰসরসলক্খণতো সম্মদেৰ দস্সেতারো। সমাদপকাতি চিত্তে পতিট্ঠাপনৰসেন তস্সেৰ অত্থস্স গাহাপকা। সমুত্তেজকাতি তদত্থগ্গহণে উস্সাহজননেন সম্মদেৰ ৰোদপকা জোতকা ৰা। সম্পহংসকাতি তদত্থপটিপত্তিযং আনিসংসদস্সনেন সম্মদেৰ পহংসকা তোসকা। অলংসমক্খাতারোতি সমত্থা হুত্ৰা ৰুত্তনযেন সমক্খাতারো। সদ্ধম্মস্সাতি পটিৰেধসদ্ধম্মস্স, তিৰিধস্সাপি ৰা সদ্ধম্মস্স দেসেতারো।
Atha vā sandassakāti dhammaṃ desentā pavattinivattiyo sabhāvasarasalakkhaṇato sammadeva dassetāro. Samādapakāti citte patiṭṭhāpanavasena tasseva atthassa gāhāpakā. Samuttejakāti tadatthaggahaṇe ussāhajananena sammadeva vodapakā jotakā vā. Sampahaṃsakāti tadatthapaṭipattiyaṃ ānisaṃsadassanena sammadeva pahaṃsakā tosakā. Alaṃsamakkhātāroti samatthā hutvā vuttanayena samakkhātāro. Saddhammassāti paṭivedhasaddhammassa, tividhassāpi vā saddhammassa desetāro.
দস্সনম্পহন্তি দস্সনম্পি অহং। তং পনেতং চক্খুদস্সনং ঞাণদস্সনন্তি দুৰিধং। তত্থ পসন্নেহি চক্খূহি অরিযানং ওলোকনং চক্খুদস্সনং নাম। অরিযভাৰকরানং পন ধম্মানং অরিযভাৰস্স চ ৰিপস্সনামগ্গফলেহি অধিগমো ঞাণদস্সনং নাম। ইমস্মিং পনত্থে চক্খুদস্সনং অধিপ্পেতং। অরিযানঞ্হি পসন্নেহি চক্খূহি ওলোকনম্পি সত্তানং বহূপকারমেৰ। সৰনন্তি ‘‘অসুকো নাম খীণাসৰো অসুকস্মিং নাম রট্ঠে ৰা জনপদে ৰা গামে ৰা নিগমে ৰা ৰিহারে ৰা লেণে ৰা ৰসতী’’তি কথেন্তানং সোতেন সৰনং, এতম্পি বহূপকারমেৰ। উপসঙ্কমনন্তি ‘‘দানং ৰা দস্সামি, পঞ্হং ৰা পুচ্ছিস্সামি, ধম্মং ৰা সোস্সামি, সক্কারং ৰা করিস্সামী’’তি এৰরূপেন চিত্তেন অরিযানং উপসঙ্কমনং। পযিরুপাসনন্তি পঞ্হপযিরুপাসনং, অরিযানং গুণে সুত্ৰা তে উপসঙ্কমিত্ৰা নিমন্তেত্ৰা দানং ৰা দত্ৰা ৰত্তং ৰা কত্ৰা ‘‘কিং, ভন্তে, কুসল’’ন্তিআদিনা নযেন পঞ্হপুচ্ছনন্তি অত্থো। ৰেয্যাৰচ্চাদিকরণং পযিরুপাসনংযেৰ। অনুস্সরণন্তি রত্তিট্ঠানদিৰাট্ঠানেসু নিসিন্নস্স ‘‘ইদানি অরিযা গুম্বলেণমণ্ডপাদীসু ঝানৰিপস্সনামগ্গফলসুখেহি ৰীতিনামেন্তী’’তি তেসং দিব্বৰিহারাদিগুণৰিসেসারম্মণং অনুস্সরণং। যো ৰা তেসং সন্তিকা ওৰাদো লদ্ধো হোতি, তং আৰজ্জিত্ৰা ‘‘ইমস্মিং ঠানে সীলং কথিতং, ইমস্মিং সমাধি, ইমস্মিং ৰিপস্সনা, ইমস্মিং মগ্গো, ইমস্মিং ফল’’ন্তি এৰং অনুস্সরণং।
Dassanampahanti dassanampi ahaṃ. Taṃ panetaṃ cakkhudassanaṃ ñāṇadassananti duvidhaṃ. Tattha pasannehi cakkhūhi ariyānaṃ olokanaṃ cakkhudassanaṃ nāma. Ariyabhāvakarānaṃ pana dhammānaṃ ariyabhāvassa ca vipassanāmaggaphalehi adhigamo ñāṇadassanaṃ nāma. Imasmiṃ panatthe cakkhudassanaṃ adhippetaṃ. Ariyānañhi pasannehi cakkhūhi olokanampi sattānaṃ bahūpakārameva. Savananti ‘‘asuko nāma khīṇāsavo asukasmiṃ nāma raṭṭhe vā janapade vā gāme vā nigame vā vihāre vā leṇe vā vasatī’’ti kathentānaṃ sotena savanaṃ, etampi bahūpakārameva. Upasaṅkamananti ‘‘dānaṃ vā dassāmi, pañhaṃ vā pucchissāmi, dhammaṃ vā sossāmi, sakkāraṃ vā karissāmī’’ti evarūpena cittena ariyānaṃ upasaṅkamanaṃ. Payirupāsananti pañhapayirupāsanaṃ, ariyānaṃ guṇe sutvā te upasaṅkamitvā nimantetvā dānaṃ vā datvā vattaṃ vā katvā ‘‘kiṃ, bhante, kusala’’ntiādinā nayena pañhapucchananti attho. Veyyāvaccādikaraṇaṃ payirupāsanaṃyeva. Anussaraṇanti rattiṭṭhānadivāṭṭhānesu nisinnassa ‘‘idāni ariyā gumbaleṇamaṇḍapādīsu jhānavipassanāmaggaphalasukhehi vītināmentī’’ti tesaṃ dibbavihārādiguṇavisesārammaṇaṃ anussaraṇaṃ. Yo vā tesaṃ santikā ovādo laddho hoti, taṃ āvajjitvā ‘‘imasmiṃ ṭhāne sīlaṃ kathitaṃ, imasmiṃ samādhi, imasmiṃ vipassanā, imasmiṃ maggo, imasmiṃ phala’’nti evaṃ anussaraṇaṃ.
অনুপব্বজ্জন্তি অরিযেসু চিত্তং পসাদেত্ৰা ঘরা নিক্খম্ম তেসং সন্তিকে পব্বজ্জং। অরিযেসু হি চিত্তং পসাদেত্ৰা তেসংযেৰ সন্তিকে পব্বজিত্ৰা তেসংযেৰ ওৰাদানুসাসনিং পচ্চাসীসমানস্স চরতোপি পব্বজ্জা অনুপব্বজ্জা নাম, অঞ্ঞেসং সন্তিকে ওৰাদানুসাসনিং পচ্চাসীসমানস্স চরতোপি পব্বজ্জা অনুপব্বজ্জা নাম, অরিযেসু পসাদেন অঞ্ঞত্থ পব্বজিত্ৰা অরিযানং সন্তিকে ওৰাদানুসাসনিং পচ্চাসীসমানস্স চরতোপি পব্বজ্জা অনুপব্বজ্জাৰ। অঞ্ঞেসু পন পসাদেন অঞ্ঞেসংযেৰ সন্তিকে পব্বজিত্ৰা অঞ্ঞেসংযেৰ ওৰাদানুসাসনিং পচ্চাসীসমানস্স চরতো পব্বজ্জা অনুপব্বজ্জা নাম ন হোতি। ৰুত্তনযেন পব্বজিতেসু পন মহাকস্সপত্থেরস্স তাৰ অনুপব্বজ্জং পব্বজিতা সতসহস্সমত্তা অহেসুং, তথা থেরস্সেৰ সদ্ধিৰিহারিকস্স চন্দগুত্তত্থেরস্স, তস্সাপি সদ্ধিৰিহারিকস্স সূরিযগুত্তত্থেরস্স, তস্সাপি সদ্ধিৰিহারিকস্স অস্সগুত্তত্থেরস্স, তস্সাপি সদ্ধিৰিহারিকস্স যোনকধম্মরক্খিতত্থেরস্স। তস্স পন সদ্ধিৰিহারিকো অসোকরঞ্ঞো কনিট্ঠভাতা তিস্সত্থেরো নাম অহোসি। তস্স অনুপব্বজ্জং পব্বজিতা অড্ঢতেয্যকোটিসঙ্খা অহেসুং। দীপপ্পসাদকমহামহিন্দত্থেরস্স পন অনুপব্বজিতানং গণনপরিচ্ছেদো নত্থি। যাৰজ্জদিৰসা লঙ্কাদীপে সত্থরি পসাদেন পব্বজন্তা মহামহিন্দত্থেরস্সেৰ অনুপব্বজ্জন্তি নাম।
Anupabbajjanti ariyesu cittaṃ pasādetvā gharā nikkhamma tesaṃ santike pabbajjaṃ. Ariyesu hi cittaṃ pasādetvā tesaṃyeva santike pabbajitvā tesaṃyeva ovādānusāsaniṃ paccāsīsamānassa caratopi pabbajjā anupabbajjā nāma, aññesaṃ santike ovādānusāsaniṃ paccāsīsamānassa caratopi pabbajjā anupabbajjā nāma, ariyesu pasādena aññattha pabbajitvā ariyānaṃ santike ovādānusāsaniṃ paccāsīsamānassa caratopi pabbajjā anupabbajjāva. Aññesu pana pasādena aññesaṃyeva santike pabbajitvā aññesaṃyeva ovādānusāsaniṃ paccāsīsamānassa carato pabbajjā anupabbajjā nāma na hoti. Vuttanayena pabbajitesu pana mahākassapattherassa tāva anupabbajjaṃ pabbajitā satasahassamattā ahesuṃ, tathā therasseva saddhivihārikassa candaguttattherassa, tassāpi saddhivihārikassa sūriyaguttattherassa, tassāpi saddhivihārikassa assaguttattherassa, tassāpi saddhivihārikassa yonakadhammarakkhitattherassa. Tassa pana saddhivihāriko asokarañño kaniṭṭhabhātā tissatthero nāma ahosi. Tassa anupabbajjaṃ pabbajitā aḍḍhateyyakoṭisaṅkhā ahesuṃ. Dīpappasādakamahāmahindattherassa pana anupabbajitānaṃ gaṇanaparicchedo natthi. Yāvajjadivasā laṅkādīpe satthari pasādena pabbajantā mahāmahindattherasseva anupabbajjanti nāma.
ইদানি যেন কারণেন তেসং অরিযানং দস্সনাদি বহূপকারন্তি ৰুত্তং, তং দস্সেতুং ‘‘তথারূপে’’তিআদিমাহ। তত্থ তথারূপেতি তাদিসে সীলাদিগুণসম্পন্নে অরিযে। যস্মা দস্সনসৰনানুস্সরণানি উপসঙ্কমনপযিরুপাসনট্ঠানানি, তস্মা তানি অনামসিত্ৰা উপসঙ্কমনপযিরুপাসনানিযেৰ দস্সেতুং ‘‘সেৰতো ভজতো পযিরুপাসতো’’তি ৰুত্তং । দস্সনসৰনানুস্সরণতো হি অরিযেসু উপ্পন্নসদ্ধো তে উপসঙ্কমিত্ৰা পযিরুপাসিত্ৰা পঞ্হং পুচ্ছিত্ৰা লদ্ধসৰনানুত্তরিযো অপরিপূরে সীলাদিগুণে পরিপূরেস্সতীতি। তথা হি ৰুত্তং ‘‘সদ্ধাজাতো উপসঙ্কমতি, উপসঙ্কমন্তো পযিরুপাসতী’’তিআদি (ম॰ নি॰ ২.১৮৩)।
Idāni yena kāraṇena tesaṃ ariyānaṃ dassanādi bahūpakāranti vuttaṃ, taṃ dassetuṃ ‘‘tathārūpe’’tiādimāha. Tattha tathārūpeti tādise sīlādiguṇasampanne ariye. Yasmā dassanasavanānussaraṇāni upasaṅkamanapayirupāsanaṭṭhānāni, tasmā tāni anāmasitvā upasaṅkamanapayirupāsanāniyeva dassetuṃ ‘‘sevato bhajato payirupāsato’’ti vuttaṃ . Dassanasavanānussaraṇato hi ariyesu uppannasaddho te upasaṅkamitvā payirupāsitvā pañhaṃ pucchitvā laddhasavanānuttariyo aparipūre sīlādiguṇe paripūressatīti. Tathā hi vuttaṃ ‘‘saddhājāto upasaṅkamati, upasaṅkamanto payirupāsatī’’tiādi (ma. ni. 2.183).
তত্থ সেৰতোতি ৰত্তপটিৰত্তকরণৰসেন কালেন কালং উপসঙ্কমতো। ভজতোতি সম্পিযাযনভত্তিৰসেন ভজতো। পযিরুপাসতোতি পঞ্হপুচ্ছনেন পটিপত্তিঅনুকরণেন চ পযিরুপাসতোতি তিণ্ণং পদানং অত্থৰিভাগো দীপেতব্বো। ৰিমুত্তিঞাণদস্সনস্স পারিপূরি একূনৰীসতিমস্স পচ্চৰেক্খণঞাণস্স উপ্পত্তিযা ৰেদিতব্বা।
Tattha sevatoti vattapaṭivattakaraṇavasena kālena kālaṃ upasaṅkamato. Bhajatoti sampiyāyanabhattivasena bhajato. Payirupāsatoti pañhapucchanena paṭipattianukaraṇena ca payirupāsatoti tiṇṇaṃ padānaṃ atthavibhāgo dīpetabbo. Vimuttiñāṇadassanassa pāripūri ekūnavīsatimassa paccavekkhaṇañāṇassa uppattiyā veditabbā.
এৰরূপা চ তে, ভিক্খৰে, ভিক্খূতিআদীসু যে যথাৰুত্তগুণসমন্নাগমেন এৰরূপা এদিসা ভিন্নসব্বকিলেসা ভিক্খূ, তে দিট্ঠধম্মিকাদিহিতেসু সত্তানং নিযোজনৰসেন অনুসাসনতো সত্থারোতিপি ৰুচ্চন্তি। জাতিকন্তারাদিনিত্থরণতো সত্থৰাহাতিপি, রাগাদিরণানং জহনতো জহাপনতো চ রণঞ্জহাতিপি, অৰিজ্জাতমস্স ৰিনোদনতো ৰিনোদাপনতো চ তমোনুদাতিপি, সপরসন্তানেসু পঞ্ঞাআলোকপঞ্ঞাওভাসপঞ্ঞাপজ্জোতানং করণেন নিব্বত্তনেন আলোকাদিকরাতিপি, তথা ঞাণুক্কাঞাণপ্পভাধম্মুক্কাধম্মপ্পভানং ধারণেন করণেন চ উক্কাধারাতিপি, পভঙ্করাতিপি, আরকত্তা কিলেসেহি, অনযে ন ইরিযনতো, অযে চ ইরিযনতো পরেসং তথাভাৰহেতুভাৰতো, সদেৰকেন লোকেন অরণীযতো অরিযাতিপি, পঞ্ঞাচক্খুধম্মচক্খূনং সাতিসযপটিলাভেন চক্খুমন্তোতিপি ৰুচ্চন্তি।
Evarūpāca te, bhikkhave, bhikkhūtiādīsu ye yathāvuttaguṇasamannāgamena evarūpā edisā bhinnasabbakilesā bhikkhū, te diṭṭhadhammikādihitesu sattānaṃ niyojanavasena anusāsanato satthārotipi vuccanti. Jātikantārādinittharaṇato satthavāhātipi, rāgādiraṇānaṃ jahanato jahāpanato ca raṇañjahātipi, avijjātamassa vinodanato vinodāpanato ca tamonudātipi, saparasantānesu paññāālokapaññāobhāsapaññāpajjotānaṃ karaṇena nibbattanena ālokādikarātipi, tathā ñāṇukkāñāṇappabhādhammukkādhammappabhānaṃ dhāraṇena karaṇena ca ukkādhārātipi, pabhaṅkarātipi, ārakattā kilesehi, anaye na iriyanato, aye ca iriyanato paresaṃ tathābhāvahetubhāvato, sadevakena lokena araṇīyato ariyātipi, paññācakkhudhammacakkhūnaṃ sātisayapaṭilābhena cakkhumantotipi vuccanti.
গাথাসু পামোজ্জকরণং ঠানন্তি নিরামিসস্স পমোদস্স নিব্বত্তকং ঠানং কারণং। এতন্তি ইদানি ৰত্তব্বনিদস্সনং সন্ধায ৰদতি। ৰিজানতন্তি সংকিলেসৰোদানে যাথাৰতো জানন্তানং। ভাৰিতত্তানন্তি ভাৰিতসভাৰানং, কাযভাৰনাদীহি ভাৰিতসন্তানানন্তি অত্থো। ধম্মজীৰিনন্তি মিচ্ছাজীৰং পহায ধম্মেন ঞাযেন জীৰিককপ্পনতো, ধম্মেন ৰা ঞাযেন অত্তভাৰস্স পৰত্তনতো, সমাপত্তিবহুলতায ৰা অগ্গফলধম্মেন জীৰনতো ধম্মজীৰিনং। অযঞ্হেত্থ সঙ্খেপত্থো – যদিদং ভাৰিতত্তানং পরিনিট্ঠিতসমাধিপঞ্ঞাভাৰনানং ততো এৰ ধম্মজীৰিনং অরিযানং দস্সনং । এতং অৰিপ্পটিসারনিমিত্তানং সীলাদীনং পারিপূরিহেতুভাৰতো ৰিজানতং সপ্পঞ্ঞজাতিকানং একন্তেনেৰ পীতিপামোজ্জকারণন্তি।
Gāthāsu pāmojjakaraṇaṃ ṭhānanti nirāmisassa pamodassa nibbattakaṃ ṭhānaṃ kāraṇaṃ. Etanti idāni vattabbanidassanaṃ sandhāya vadati. Vijānatanti saṃkilesavodāne yāthāvato jānantānaṃ. Bhāvitattānanti bhāvitasabhāvānaṃ, kāyabhāvanādīhi bhāvitasantānānanti attho. Dhammajīvinanti micchājīvaṃ pahāya dhammena ñāyena jīvikakappanato, dhammena vā ñāyena attabhāvassa pavattanato, samāpattibahulatāya vā aggaphaladhammena jīvanato dhammajīvinaṃ. Ayañhettha saṅkhepattho – yadidaṃ bhāvitattānaṃ pariniṭṭhitasamādhipaññābhāvanānaṃ tato eva dhammajīvinaṃ ariyānaṃ dassanaṃ . Etaṃ avippaṭisāranimittānaṃ sīlādīnaṃ pāripūrihetubhāvato vijānataṃ sappaññajātikānaṃ ekanteneva pītipāmojjakāraṇanti.
ইদানি তং তস্স কারণভাৰং দস্সেতুং ‘‘তে জোতযন্তী’’তি ওসানগাথাদ্ৰযমাহ। তত্থ তেতি তে ভাৰিতত্তা ধম্মজীৰিনো অরিযা। জোতযন্তীতি পকাসযন্তি। ভাসযন্তীতি সদ্ধম্মোভাসেন লোকং পভাসযন্তি, ধম্মং দেসেন্তীতি অত্থো। যেসন্তি যেসং অরিযানং। সাসনন্তি ওৰাদং। সম্মদঞ্ঞাযাতি পুব্বভাগঞাণেহি সম্মদেৰ জানিত্ৰা। সেসং ৰুত্তনযমেৰ।
Idāni taṃ tassa kāraṇabhāvaṃ dassetuṃ ‘‘te jotayantī’’ti osānagāthādvayamāha. Tattha teti te bhāvitattā dhammajīvino ariyā. Jotayantīti pakāsayanti. Bhāsayantīti saddhammobhāsena lokaṃ pabhāsayanti, dhammaṃ desentīti attho. Yesanti yesaṃ ariyānaṃ. Sāsananti ovādaṃ. Sammadaññāyāti pubbabhāgañāṇehi sammadeva jānitvā. Sesaṃ vuttanayameva.
পঞ্চমসুত্তৰণ্ণনা নিট্ঠিতা।
Pañcamasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ইতিৰুত্তকপাল়ি • Itivuttakapāḷi / ৫. সীলসম্পন্নসুত্তং • 5. Sīlasampannasuttaṃ
