| Library / Tipiṭaka / तिपिटक • Tipiṭaka / अङ्गुत्तरनिकाय (टीका) • Aṅguttaranikāya (ṭīkā) |
३-१०. सीलसुत्तादिवण्णना
3-10. Sīlasuttādivaṇṇanā
२१३-२२०. ततिये (दी॰ नि॰ टी॰ २.१४९) दुस्सीलोति एत्थ दु-सद्दो अभावत्थो ‘‘दुप्पञ्ञो’’तिआदीसु (म॰ नि॰ १.४४९) विय, न गरहणत्थोति आह ‘‘असीलो निस्सीलो’’ति। भिन्नसंवरोति एत्थ समादिन्नसीलो केनचि कारणेन सीलभेदं पत्तो, सो ताव भिन्नसंवरो होतु। यो पन सब्बेन सब्बं असमादिन्नसीलो आचारहीनो, सो कथं भिन्नसंवरो नाम होतीति ? सोपि साधुसमाचारस्स परिहरणीयस्स भेदितत्ता भिन्नसंवरो एव नाम। विनट्ठसंवरो संवररहितोति हि वुत्तं होति। तं तं सिप्पट्ठानं। माघातकालेति ‘‘मा घातेथ पाणीन’’न्ति एवं माघातघोसनं घोसितदिवसे। अब्भुग्गच्छति पापको कित्तिसद्दो। अज्झासयेन मङ्कु होतियेव विप्पटिसारिभावतो।
213-220. Tatiye (dī. ni. ṭī. 2.149) dussīloti ettha du-saddo abhāvattho ‘‘duppañño’’tiādīsu (ma. ni. 1.449) viya, na garahaṇatthoti āha ‘‘asīlo nissīlo’’ti. Bhinnasaṃvaroti ettha samādinnasīlo kenaci kāraṇena sīlabhedaṃ patto, so tāva bhinnasaṃvaro hotu. Yo pana sabbena sabbaṃ asamādinnasīlo ācārahīno, so kathaṃ bhinnasaṃvaro nāma hotīti ? Sopi sādhusamācārassa pariharaṇīyassa bheditattā bhinnasaṃvaro eva nāma. Vinaṭṭhasaṃvaro saṃvararahitoti hi vuttaṃ hoti. Taṃ taṃ sippaṭṭhānaṃ. Māghātakāleti ‘‘mā ghātetha pāṇīna’’nti evaṃ māghātaghosanaṃ ghositadivase. Abbhuggacchati pāpako kittisaddo. Ajjhāsayena maṅku hotiyeva vippaṭisāribhāvato.
तस्साति दुस्सीलस्स। समादाय वत्तितट्ठानन्ति उट्ठाय समुट्ठाय कतकारणं। आपाथं आगच्छतीति तं मनसो उपट्ठाति। उम्मीलेत्वा इधलोकन्ति उम्मीलनकाले अत्तनो पुत्तदारादिवसेन इधलोकं पस्सति। निमीलेत्वा परलोकन्ति निमीलनकाले गतिनिमित्तुपट्ठानवसेन परलोकं पस्सति। तेनाह ‘‘चत्तारो अपाया’’तिआदि। पञ्चमपदन्ति ‘‘कायस्स भेदा’’तिआदिना वुत्तो पञ्चमो आदीनवकोट्ठासो। वुत्तविपरियायेनाति वुत्तत्थाय आदीनवकथाय विपरियायेन ‘‘अप्पमत्तो तं तं कसिवणिज्जादिं यथाकालं सम्पादेतुं सक्कोती’’तिआदिना। पासंसं सीलमस्स अत्थीति सीलवा। सीलसम्पन्नोति सीलेन समन्नागतो सम्पन्नसीलोति एवमादिकं पन अत्थवचनं सुकरन्ति अनामट्ठं। चतुत्थादीनि उत्तानत्थानेव।
Tassāti dussīlassa. Samādāya vattitaṭṭhānanti uṭṭhāya samuṭṭhāya katakāraṇaṃ. Āpāthaṃ āgacchatīti taṃ manaso upaṭṭhāti. Ummīletvā idhalokanti ummīlanakāle attano puttadārādivasena idhalokaṃ passati. Nimīletvā paralokanti nimīlanakāle gatinimittupaṭṭhānavasena paralokaṃ passati. Tenāha ‘‘cattāro apāyā’’tiādi. Pañcamapadanti ‘‘kāyassa bhedā’’tiādinā vutto pañcamo ādīnavakoṭṭhāso. Vuttavipariyāyenāti vuttatthāya ādīnavakathāya vipariyāyena ‘‘appamatto taṃ taṃ kasivaṇijjādiṃ yathākālaṃ sampādetuṃ sakkotī’’tiādinā. Pāsaṃsaṃ sīlamassa atthīti sīlavā. Sīlasampannoti sīlena samannāgato sampannasīloti evamādikaṃ pana atthavacanaṃ sukaranti anāmaṭṭhaṃ. Catutthādīni uttānatthāneva.
सीलसुत्तादिवण्णना निट्ठिता।
Sīlasuttādivaṇṇanā niṭṭhitā.
अक्कोसकवग्गवण्णना निट्ठिता।
Akkosakavaggavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya
३. सीलसुत्तं • 3. Sīlasuttaṃ
४. बहुभाणिसुत्तं • 4. Bahubhāṇisuttaṃ
५. पठमअक्खन्तिसुत्तं • 5. Paṭhamaakkhantisuttaṃ
६. दुतियअक्खन्तिसुत्तं • 6. Dutiyaakkhantisuttaṃ
७. पठमअपासादिकसुत्तं • 7. Paṭhamaapāsādikasuttaṃ
८. दुतियअपासादिकसुत्तं • 8. Dutiyaapāsādikasuttaṃ
९. अग्गिसुत्तं • 9. Aggisuttaṃ
१०. मधुरासुत्तं • 10. Madhurāsuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā)
३. सीलसुत्तवण्णना • 3. Sīlasuttavaṇṇanā
४. बहुभाणिसुत्तवण्णना • 4. Bahubhāṇisuttavaṇṇanā
५. पठमअक्खन्तिसुत्तवण्णना • 5. Paṭhamaakkhantisuttavaṇṇanā
६. दुतियअक्खन्तिसुत्तवण्णना • 6. Dutiyaakkhantisuttavaṇṇanā
७.पठमअपासादिकसुत्तवण्णना • 7.Paṭhamaapāsādikasuttavaṇṇanā
१०. मधुरासुत्तवण्णना • 10. Madhurāsuttavaṇṇanā
