| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. ஸீலட்டி²திவக்³கோ³
3. Sīlaṭṭhitivaggo
1. ஸீலஸுத்தங்
1. Sīlasuttaṃ
387. ஏவங் மே ஸுதங் – ஏகங் ஸமயங் ஆயஸ்மா ச ஆனந்தோ³ ஆயஸ்மா ச ப⁴த்³தோ³ பாடலிபுத்தே விஹரந்தி குக்குடாராமே. அத² கோ² ஆயஸ்மா ப⁴த்³தோ³ ஸாயன்ஹஸமயங் படிஸல்லானா வுட்டி²தோ யேனாயஸ்மா ஆனந்தோ³ தேனுபஸங்கமி; உபஸங்கமித்வா ஆயஸ்மதா ஆனந்தே³ன ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ப⁴த்³தோ³ ஆயஸ்மந்தங் ஆனந்த³ங் ஏதத³வோச – ‘‘யானிமானி, ஆவுஸோ ஆனந்த³, குஸலானி ஸீலானி வுத்தானி ப⁴க³வதா, இமானி குஸலானி ஸீலானி கிமத்தி²யானி வுத்தானி ப⁴க³வதா’’தி?
387. Evaṃ me sutaṃ – ekaṃ samayaṃ āyasmā ca ānando āyasmā ca bhaddo pāṭaliputte viharanti kukkuṭārāme. Atha kho āyasmā bhaddo sāyanhasamayaṃ paṭisallānā vuṭṭhito yenāyasmā ānando tenupasaṅkami; upasaṅkamitvā āyasmatā ānandena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā bhaddo āyasmantaṃ ānandaṃ etadavoca – ‘‘yānimāni, āvuso ānanda, kusalāni sīlāni vuttāni bhagavatā, imāni kusalāni sīlāni kimatthiyāni vuttāni bhagavatā’’ti?
‘‘ஸாது⁴ ஸாது⁴, ஆவுஸோ ப⁴த்³த³! ப⁴த்³த³கோ கோ² தே, ஆவுஸோ ப⁴த்³த³, உம்மங்கோ³ 1, ப⁴த்³த³கங் படிபா⁴னங், கல்யாணீ பரிபுச்சா². ஏவஞ்ஹி த்வங், ஆவுஸோ ப⁴த்³த³, புச்ச²ஸி – ‘யானிமானி ஆவுஸோ ஆனந்த³, குஸலானி ஸீலானி வுத்தானி ப⁴க³வதா, இமானி குஸலானி ஸீலானி கிமத்தி²யானி வுத்தானி ப⁴க³வதா’’’தி? ‘‘ஏவமாவுஸோ’’தி. ‘‘யானிமானி, ஆவுஸோ ப⁴த்³த³, குஸலானி ஸீலானி வுத்தானி ப⁴க³வதா, இமானி குஸலானி ஸீலானி யாவதே³வ சதுன்னங் ஸதிபட்டா²னானங் பா⁴வனாய வுத்தானி ப⁴க³வதா’’.
‘‘Sādhu sādhu, āvuso bhadda! Bhaddako kho te, āvuso bhadda, ummaṅgo 2, bhaddakaṃ paṭibhānaṃ, kalyāṇī paripucchā. Evañhi tvaṃ, āvuso bhadda, pucchasi – ‘yānimāni āvuso ānanda, kusalāni sīlāni vuttāni bhagavatā, imāni kusalāni sīlāni kimatthiyāni vuttāni bhagavatā’’’ti? ‘‘Evamāvuso’’ti. ‘‘Yānimāni, āvuso bhadda, kusalāni sīlāni vuttāni bhagavatā, imāni kusalāni sīlāni yāvadeva catunnaṃ satipaṭṭhānānaṃ bhāvanāya vuttāni bhagavatā’’.
‘‘கதமேஸங் சதுன்னங்? இதா⁴வுஸோ, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங் ; வேத³னாஸு…பே॰… சித்தே…பே॰… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங். யானிமானி , ஆவுஸோ ப⁴த்³த³, குஸலானி ஸீலானி வுத்தானி ப⁴க³வதா, இமானி குஸலானி ஸீலானி யாவதே³வ இமேஸங் சதுன்னங் ஸதிபட்டா²னானங் பா⁴வனாய வுத்தானி ப⁴க³வதா’’தி. பட²மங்.
‘‘Katamesaṃ catunnaṃ? Idhāvuso, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ ; vedanāsu…pe… citte…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Yānimāni , āvuso bhadda, kusalāni sīlāni vuttāni bhagavatā, imāni kusalāni sīlāni yāvadeva imesaṃ catunnaṃ satipaṭṭhānānaṃ bhāvanāya vuttāni bhagavatā’’ti. Paṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 1-2. ஸீலஸுத்தாதி³வண்ணனா • 1-2. Sīlasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1-2. ஸீலஸுத்தாதி³வண்ணனா • 1-2. Sīlasuttādivaṇṇanā
