| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
3. සීලට්‌ඨිතිවග්‌ගො
3. Sīlaṭṭhitivaggo
1. සීලසුත්‌තං
1. Sīlasuttaṃ
387. එවං මෙ සුතං – එකං සමයං ආයස්‌මා ච ආනන්‌දො ආයස්‌මා ච භද්‌දො පාටලිපුත්‌තෙ විහරන්‌ති කුක්‌කුටාරාමෙ. අථ ඛො ආයස්‌මා භද්‌දො සායන්‌හසමයං පටිසල්‌ලානා වුට්‌ඨිතො යෙනායස්‌මා ආනන්‌දො තෙනුපසඞ්‌කමි; උපසඞ්‌කමිත්‌වා ආයස්‌මතා ආනන්‌දෙන සද්‌ධිං සම්‌මොදි. සම්‌මොදනීයං කථං සාරණීයං වීතිසාරෙත්‌වා එකමන්‌තං නිසීදි. එකමන්‌තං නිසින්‌නො ඛො ආයස්‌මා භද්‌දො ආයස්‌මන්‌තං ආනන්‌දං එතදවොච – ‘‘යානිමානි, ආවුසො ආනන්‌ද, කුසලානි සීලානි වුත්‌තානි භගවතා, ඉමානි කුසලානි සීලානි කිමත්‌ථියානි වුත්‌තානි භගවතා’’ති?
387. Evaṃ me sutaṃ – ekaṃ samayaṃ āyasmā ca ānando āyasmā ca bhaddo pāṭaliputte viharanti kukkuṭārāme. Atha kho āyasmā bhaddo sāyanhasamayaṃ paṭisallānā vuṭṭhito yenāyasmā ānando tenupasaṅkami; upasaṅkamitvā āyasmatā ānandena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā bhaddo āyasmantaṃ ānandaṃ etadavoca – ‘‘yānimāni, āvuso ānanda, kusalāni sīlāni vuttāni bhagavatā, imāni kusalāni sīlāni kimatthiyāni vuttāni bhagavatā’’ti?
‘‘සාධු සාධු, ආවුසො භද්‌ද! භද්‌දකො ඛො තෙ, ආවුසො භද්‌ද, උම්‌මඞ්‌ගො 1, භද්‌දකං පටිභානං, කල්‍යාණී පරිපුච්‌ඡා. එවඤ්‌හි ත්‌වං, ආවුසො භද්‌ද, පුච්‌ඡසි – ‘යානිමානි ආවුසො ආනන්‌ද, කුසලානි සීලානි වුත්‌තානි භගවතා, ඉමානි කුසලානි සීලානි කිමත්‌ථියානි වුත්‌තානි භගවතා’’’ති? ‘‘එවමාවුසො’’ති. ‘‘යානිමානි, ආවුසො භද්‌ද, කුසලානි සීලානි වුත්‌තානි භගවතා, ඉමානි කුසලානි සීලානි යාවදෙව චතුන්‌නං සතිපට්‌ඨානානං භාවනාය වුත්‌තානි භගවතා’’.
‘‘Sādhu sādhu, āvuso bhadda! Bhaddako kho te, āvuso bhadda, ummaṅgo 2, bhaddakaṃ paṭibhānaṃ, kalyāṇī paripucchā. Evañhi tvaṃ, āvuso bhadda, pucchasi – ‘yānimāni āvuso ānanda, kusalāni sīlāni vuttāni bhagavatā, imāni kusalāni sīlāni kimatthiyāni vuttāni bhagavatā’’’ti? ‘‘Evamāvuso’’ti. ‘‘Yānimāni, āvuso bhadda, kusalāni sīlāni vuttāni bhagavatā, imāni kusalāni sīlāni yāvadeva catunnaṃ satipaṭṭhānānaṃ bhāvanāya vuttāni bhagavatā’’.
‘‘කතමෙසං චතුන්‌නං? ඉධාවුසො, භික්‌ඛු කායෙ කායානුපස්‌සී විහරති ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං ; වෙදනාසු…පෙ.… චිත්‌තෙ…පෙ.… ධම්‌මෙසු ධම්‌මානුපස්‌සී විහරති ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං. යානිමානි , ආවුසො භද්‌ද, කුසලානි සීලානි වුත්‌තානි භගවතා, ඉමානි කුසලානි සීලානි යාවදෙව ඉමෙසං චතුන්‌නං සතිපට්‌ඨානානං භාවනාය වුත්‌තානි භගවතා’’ති. පඨමං.
‘‘Katamesaṃ catunnaṃ? Idhāvuso, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ ; vedanāsu…pe… citte…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Yānimāni , āvuso bhadda, kusalāni sīlāni vuttāni bhagavatā, imāni kusalāni sīlāni yāvadeva imesaṃ catunnaṃ satipaṭṭhānānaṃ bhāvanāya vuttāni bhagavatā’’ti. Paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1-2. සීලසුත්‌තාදිවණ්‌ණනා • 1-2. Sīlasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1-2. සීලසුත්‌තාදිවණ්‌ණනා • 1-2. Sīlasuttādivaṇṇanā
