| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༣. སཱིལཊྛིཏིཝགྒོ
3. Sīlaṭṭhitivaggo
༡. སཱིལསུཏྟཾ
1. Sīlasuttaṃ
༣༨༧. ཨེཝཾ མེ སུཏཾ – ཨེཀཾ སམཡཾ ཨཱཡསྨཱ ཙ ཨཱནནྡོ ཨཱཡསྨཱ ཙ བྷདྡོ པཱཊལིཔུཏྟེ ཝིཧརནྟི ཀུཀྐུཊཱརཱམེ། ཨཐ ཁོ ཨཱཡསྨཱ བྷདྡོ སཱཡནྷསམཡཾ པཊིསལླཱནཱ ཝུཊྛིཏོ ཡེནཱཡསྨཱ ཨཱནནྡོ ཏེནུཔསངྐམི; ཨུཔསངྐམིཏྭཱ ཨཱཡསྨཏཱ ཨཱནནྡེན སདྡྷིཾ སམྨོདི། སམྨོདནཱིཡཾ ཀཐཾ སཱརཎཱིཡཾ ཝཱིཏིསཱརེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཨཱཡསྨཱ བྷདྡོ ཨཱཡསྨནྟཾ ཨཱནནྡཾ ཨེཏདཝོཙ – ‘‘ཡཱནིམཱནི, ཨཱཝུསོ ཨཱནནྡ, ཀུསལཱནི སཱིལཱནི ཝུཏྟཱནི བྷགཝཏཱ, ཨིམཱནི ཀུསལཱནི སཱིལཱནི ཀིམཏྠིཡཱནི ཝུཏྟཱནི བྷགཝཏཱ’’ཏི?
387. Evaṃ me sutaṃ – ekaṃ samayaṃ āyasmā ca ānando āyasmā ca bhaddo pāṭaliputte viharanti kukkuṭārāme. Atha kho āyasmā bhaddo sāyanhasamayaṃ paṭisallānā vuṭṭhito yenāyasmā ānando tenupasaṅkami; upasaṅkamitvā āyasmatā ānandena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā bhaddo āyasmantaṃ ānandaṃ etadavoca – ‘‘yānimāni, āvuso ānanda, kusalāni sīlāni vuttāni bhagavatā, imāni kusalāni sīlāni kimatthiyāni vuttāni bhagavatā’’ti?
‘‘སཱདྷུ སཱདྷུ, ཨཱཝུསོ བྷདྡ! བྷདྡཀོ ཁོ ཏེ, ཨཱཝུསོ བྷདྡ, ཨུམྨངྒོ 1, བྷདྡཀཾ པཊིབྷཱནཾ, ཀལྱཱཎཱི པརིཔུཙྪཱ། ཨེཝཉྷི ཏྭཾ, ཨཱཝུསོ བྷདྡ, པུཙྪསི – ‘ཡཱནིམཱནི ཨཱཝུསོ ཨཱནནྡ, ཀུསལཱནི སཱིལཱནི ཝུཏྟཱནི བྷགཝཏཱ, ཨིམཱནི ཀུསལཱནི སཱིལཱནི ཀིམཏྠིཡཱནི ཝུཏྟཱནི བྷགཝཏཱ’’’ཏི? ‘‘ཨེཝམཱཝུསོ’’ཏི། ‘‘ཡཱནིམཱནི, ཨཱཝུསོ བྷདྡ, ཀུསལཱནི སཱིལཱནི ཝུཏྟཱནི བྷགཝཏཱ, ཨིམཱནི ཀུསལཱནི སཱིལཱནི ཡཱཝདེཝ ཙཏུནྣཾ སཏིཔཊྛཱནཱནཾ བྷཱཝནཱཡ ཝུཏྟཱནི བྷགཝཏཱ’’།
‘‘Sādhu sādhu, āvuso bhadda! Bhaddako kho te, āvuso bhadda, ummaṅgo 2, bhaddakaṃ paṭibhānaṃ, kalyāṇī paripucchā. Evañhi tvaṃ, āvuso bhadda, pucchasi – ‘yānimāni āvuso ānanda, kusalāni sīlāni vuttāni bhagavatā, imāni kusalāni sīlāni kimatthiyāni vuttāni bhagavatā’’’ti? ‘‘Evamāvuso’’ti. ‘‘Yānimāni, āvuso bhadda, kusalāni sīlāni vuttāni bhagavatā, imāni kusalāni sīlāni yāvadeva catunnaṃ satipaṭṭhānānaṃ bhāvanāya vuttāni bhagavatā’’.
‘‘ཀཏམེསཾ ཙཏུནྣཾ? ཨིདྷཱཝུསོ, བྷིཀྑུ ཀཱཡེ ཀཱཡཱནུཔསྶཱི ཝིཧརཏི ཨཱཏཱཔཱི སམྤཛཱནོ སཏིམཱ, ཝིནེཡྻ ལོཀེ ཨབྷིཛ྄ཛྷཱདོམནསྶཾ ; ཝེདནཱསུ…པེ॰… ཙིཏྟེ…པེ॰… དྷམྨེསུ དྷམྨཱནུཔསྶཱི ཝིཧརཏི ཨཱཏཱཔཱི སམྤཛཱནོ སཏིམཱ, ཝིནེཡྻ ལོཀེ ཨབྷིཛ྄ཛྷཱདོམནསྶཾ། ཡཱནིམཱནི , ཨཱཝུསོ བྷདྡ, ཀུསལཱནི སཱིལཱནི ཝུཏྟཱནི བྷགཝཏཱ, ཨིམཱནི ཀུསལཱནི སཱིལཱནི ཡཱཝདེཝ ཨིམེསཾ ཙཏུནྣཾ སཏིཔཊྛཱནཱནཾ བྷཱཝནཱཡ ཝུཏྟཱནི བྷགཝཏཱ’’ཏི། པཋམཾ།
‘‘Katamesaṃ catunnaṃ? Idhāvuso, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ ; vedanāsu…pe… citte…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Yānimāni , āvuso bhadda, kusalāni sīlāni vuttāni bhagavatā, imāni kusalāni sīlāni yāvadeva imesaṃ catunnaṃ satipaṭṭhānānaṃ bhāvanāya vuttāni bhagavatā’’ti. Paṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡-༢. སཱིལསུཏྟཱདིཝཎྞནཱ • 1-2. Sīlasuttādivaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡-༢. སཱིལསུཏྟཱདིཝཎྞནཱ • 1-2. Sīlasuttādivaṇṇanā
