| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. ஸீலஸுத்தவண்ணனா
3. Sīlasuttavaṇṇanā
184. ததியே ஸீலஸம்பன்னாதி எத்த² கீ²ணாஸவஸ்ஸ லோகியலோகுத்தரஸீலங் கதி²தங், தேன ஸம்பன்னாதி அத்தோ². ஸமாதி⁴பஞ்ஞாஸுபி ஏஸேவ நயோ. விமுத்தி பன ப²லவிமுத்தியேவ. விமுத்திஞாணத³ஸ்ஸனங் பச்சவெக்க²ணஞாணங். ஏவமெத்த² ஸீலாத³யோ தயோ லோகியலோகுத்தரா, விமுத்தி லோகுத்தராவ, விமுத்திஞாணத³ஸ்ஸனங் லோகியமேவ.
184. Tatiye sīlasampannāti ettha khīṇāsavassa lokiyalokuttarasīlaṃ kathitaṃ, tena sampannāti attho. Samādhipaññāsupi eseva nayo. Vimutti pana phalavimuttiyeva. Vimuttiñāṇadassanaṃ paccavekkhaṇañāṇaṃ. Evamettha sīlādayo tayo lokiyalokuttarā, vimutti lokuttarāva, vimuttiñāṇadassanaṃ lokiyameva.
த³ஸ்ஸனம்பாஹந்தி த³ஸ்ஸனம்பி அஹங். தங் பனேதங் த³ஸ்ஸனங் – சக்கு²த³ஸ்ஸனங், ஞாணத³ஸ்ஸனந்தி து³வித⁴ங். தத்த² பஸன்னேஹி சக்கூ²ஹி அரியானங் த³ஸ்ஸனங் ஓலோகனங் சக்கு²த³ஸ்ஸனங் நாம. அரியேஹி பன தி³ட்ட²ஸ்ஸ லக்க²ணஸ்ஸ த³ஸ்ஸனங், படிவித்³த⁴ஸ்ஸ ச படிவிஜ்ஜ²னங் ஜா²னேன வா விபஸ்ஸனாய வா மக்³க³ப²லேஹி வா ஞாணத³ஸ்ஸனங் நாம. இமஸ்மிங் பனெத்த² சக்கு²த³ஸ்ஸனங் அதி⁴ப்பேதங். அரியானஞ்ஹி பஸன்னேஹி சக்கூ²ஹி ஓலோகனம்பி ப³ஹுகாரமேவ. ஸவனந்தி ‘‘அஸுகோ நாம கீ²ணாஸவோ அஸுகஸ்மிங் நாம ரட்டே² வா ஜனபதே³ வா கா³மே வா நிக³மே வா விஹாரே வா லேணே வா வஸதீ’’தி கதெ²ந்தானங் ஸோதேன ஸவனங், ஏதம்பி ப³ஹுகாரமேவ. உபஸங்கமனந்தி ‘‘தா³னங் வா த³ஸ்ஸாமி, பஞ்ஹங் வா புச்சி²ஸ்ஸாமி, த⁴ம்மங் வா ஸொஸ்ஸாமி, ஸக்காரங் வா கரிஸ்ஸாமீ’’தி ஏவரூபேன சித்தேன அரியானங் உபஸங்கமனங். பயிருபாஸனந்தி பஞ்ஹாபயிருபாஸனங். அரியானங் கு³ணே ஸுத்வா தே உபஸங்கமித்வா நிமந்தெத்வா தா³னங் த³த்வா ‘‘கிங், ப⁴ந்தே, குஸல’’ந்திஆதி³னா நயேன பஞ்ஹபுச்ச²னந்தி அத்தோ².
Dassanampāhanti dassanampi ahaṃ. Taṃ panetaṃ dassanaṃ – cakkhudassanaṃ, ñāṇadassananti duvidhaṃ. Tattha pasannehi cakkhūhi ariyānaṃ dassanaṃ olokanaṃ cakkhudassanaṃ nāma. Ariyehi pana diṭṭhassa lakkhaṇassa dassanaṃ, paṭividdhassa ca paṭivijjhanaṃ jhānena vā vipassanāya vā maggaphalehi vā ñāṇadassanaṃ nāma. Imasmiṃ panettha cakkhudassanaṃ adhippetaṃ. Ariyānañhi pasannehi cakkhūhi olokanampi bahukārameva. Savananti ‘‘asuko nāma khīṇāsavo asukasmiṃ nāma raṭṭhe vā janapade vā gāme vā nigame vā vihāre vā leṇe vā vasatī’’ti kathentānaṃ sotena savanaṃ, etampi bahukārameva. Upasaṅkamananti ‘‘dānaṃ vā dassāmi, pañhaṃ vā pucchissāmi, dhammaṃ vā sossāmi, sakkāraṃ vā karissāmī’’ti evarūpena cittena ariyānaṃ upasaṅkamanaṃ. Payirupāsananti pañhāpayirupāsanaṃ. Ariyānaṃ guṇe sutvā te upasaṅkamitvā nimantetvā dānaṃ datvā ‘‘kiṃ, bhante, kusala’’ntiādinā nayena pañhapucchananti attho.
அனுஸ்ஸதிந்தி ரத்திட்டா²னதி³வாட்டா²னேஸு நிஸின்னஸ்ஸ ‘‘இதா³னி அரியா லேணகு³ஹமண்ட³பாதீ³ஸு ஜா²னவிபஸ்ஸனாமக்³க³ப²லஸுகே²ஹி வீதினாமெந்தீ’’தி அனுஸ்ஸரணங். யோ வா தேஸங் ஸந்திகே ஓவாதோ³ லத்³தோ⁴ ஹோதி, தங் ஆவஜ்ஜித்வா ‘‘இமஸ்மிங் டா²னே ஸீலங் கதி²தங், இமஸ்மிங் ஸமாதி⁴, இமஸ்மிங் விபஸ்ஸனா, இமஸ்மிங் மக்³கோ³, இமஸ்மிங் ப²ல’’ந்தி ஏவங் அனுஸ்ஸரணங். அனுபப்³ப³ஜ்ஜந்தி அரியேஸு சித்தங் பஸாதெ³த்வா க⁴ரா நிக்க²ம்ம தேஸங் ஸந்திகே பப்³ப³ஜ்ஜங். அரியானஞ்ஹி ஸந்திகே சித்தங் பஸாதெ³த்வா தேஸங்யேவ ஸந்திகே பப்³ப³ஜித்வா தேஸங்யேவ ஓவாதா³னுஸாஸனிங் பச்சாஸீஸமானஸ்ஸ சரதோபி பப்³ப³ஜ்ஜா அனுபப்³ப³ஜ்ஜா நாம. அரியேஸு பஸாதே³ன அஞ்ஞத்த² பப்³ப³ஜித்வா அரியானங் ஸந்திகே ஓவாதா³னுஸாஸனிங் பச்சாஸீஸமானஸ்ஸ சரதோ பப்³ப³ஜ்ஜாபி அனுபப்³ப³ஜ்ஜா நாம. அஞ்ஞேஸு பன பஸாதே³ன அஞ்ஞேஸங்யேவ ஸந்திகே பப்³ப³ஜித்வா அஞ்ஞேஸங்யேவ ஓவாதா³னுஸாஸனிங் பச்சாஸீஸமானஸ்ஸ சரதோ பப்³ப³ஜ்ஜா அனுபப்³ப³ஜ்ஜா நாம ந ஹோதி.
Anussatinti rattiṭṭhānadivāṭṭhānesu nisinnassa ‘‘idāni ariyā leṇaguhamaṇḍapādīsu jhānavipassanāmaggaphalasukhehi vītināmentī’’ti anussaraṇaṃ. Yo vā tesaṃ santike ovādo laddho hoti, taṃ āvajjitvā ‘‘imasmiṃ ṭhāne sīlaṃ kathitaṃ, imasmiṃ samādhi, imasmiṃ vipassanā, imasmiṃ maggo, imasmiṃ phala’’nti evaṃ anussaraṇaṃ. Anupabbajjanti ariyesu cittaṃ pasādetvā gharā nikkhamma tesaṃ santike pabbajjaṃ. Ariyānañhi santike cittaṃ pasādetvā tesaṃyeva santike pabbajitvā tesaṃyeva ovādānusāsaniṃ paccāsīsamānassa caratopi pabbajjā anupabbajjā nāma. Ariyesu pasādena aññattha pabbajitvā ariyānaṃ santike ovādānusāsaniṃ paccāsīsamānassa carato pabbajjāpi anupabbajjā nāma. Aññesu pana pasādena aññesaṃyeva santike pabbajitvā aññesaṃyeva ovādānusāsaniṃ paccāsīsamānassa carato pabbajjā anupabbajjā nāma na hoti.
ஏவங் பப்³ப³ஜிதேஸு பன மஹாகஸ்ஸபத்தே²ரஸ்ஸ தாவ அனுபப்³ப³ஜ்ஜங் பப்³ப³ஜிதா ஸதஸஹஸ்ஸமத்தா அஹேஸுங், ததா² தே²ரஸ்ஸேவ ஸத்³தி⁴விஹாரிகஸ்ஸ ச சந்த³கு³த்தத்தே²ரஸ்ஸ, தஸ்ஸாபி ஸத்³தி⁴விஹாரிகஸ்ஸ ஸூரியகு³த்தத்தே²ரஸ்ஸ, தஸ்ஸாபி ஸத்³தி⁴விஹாரிகஸ்ஸ அஸ்ஸகு³த்தத்தே²ரஸ்ஸ, தஸ்ஸாபி ஸத்³தி⁴விஹாரிகஸ்ஸ யோனகத⁴ம்மரக்கி²தத்தே²ரஸ்ஸ , தஸ்ஸ பன ஸத்³தி⁴விஹாரிகோ அஸோகரஞ்ஞோ கனிட்ட²பா⁴தா திஸ்ஸத்தே²ரோ நாம அஹோஸி, தஸ்ஸ அனுபப்³ப³ஜ்ஜங் பப்³ப³ஜிதா அட்³ட⁴தெய்யகோடிஸங்கா² அஹேஸுங். மஹிந்த³த்தே²ரஸ்ஸ அனுபப்³ப³ஜிதானங் க³ணனபரிச்சே²தோ³ நத்தி². யாவஜ்ஜதி³வஸா லங்காதீ³பே ஸத்த²ரி பஸாதே³ன பப்³ப³ஜந்தா மஹிந்த³த்தே²ரஸ்ஸேவ பப்³ப³ஜ்ஜங் அனுபப்³ப³ஜந்தி நாம.
Evaṃ pabbajitesu pana mahākassapattherassa tāva anupabbajjaṃ pabbajitā satasahassamattā ahesuṃ, tathā therasseva saddhivihārikassa ca candaguttattherassa, tassāpi saddhivihārikassa sūriyaguttattherassa, tassāpi saddhivihārikassa assaguttattherassa, tassāpi saddhivihārikassa yonakadhammarakkhitattherassa , tassa pana saddhivihāriko asokarañño kaniṭṭhabhātā tissatthero nāma ahosi, tassa anupabbajjaṃ pabbajitā aḍḍhateyyakoṭisaṅkhā ahesuṃ. Mahindattherassa anupabbajitānaṃ gaṇanaparicchedo natthi. Yāvajjadivasā laṅkādīpe satthari pasādena pabbajantā mahindattherasseva pabbajjaṃ anupabbajanti nāma.
தங் த⁴ம்மந்தி தங் தேஸங் ஓவாதா³னுஸாஸனீத⁴ம்மங். அனுஸ்ஸரதீதி ஸரதி. அனுவிதக்கேதீதி விதக்காஹதங் கரோதி. ஆரத்³தோ⁴ ஹோதீதி பரிபுண்ணோ ஹோதி. பவிசினதீதிஆதி³ ஸப்³ப³ங் தத்த² ஞாணசாரவஸேனேவ வுத்தங். அத² வா பவிசினதீதி தேஸங் தேஸங் த⁴ம்மானங் லக்க²ணங் விசினதி. பவிசரதீதி தத்த² ஞாணங் சராபேதி. பரிவீமங்ஸமாபஜ்ஜதீதி வீமங்ஸனங் ஓலோகனங் க³வேஸனங் ஆபஜ்ஜதி.
Taṃdhammanti taṃ tesaṃ ovādānusāsanīdhammaṃ. Anussaratīti sarati. Anuvitakketīti vitakkāhataṃ karoti. Āraddho hotīti paripuṇṇo hoti. Pavicinatītiādi sabbaṃ tattha ñāṇacāravaseneva vuttaṃ. Atha vā pavicinatīti tesaṃ tesaṃ dhammānaṃ lakkhaṇaṃ vicinati. Pavicaratīti tattha ñāṇaṃ carāpeti. Parivīmaṃsamāpajjatīti vīmaṃsanaṃ olokanaṃ gavesanaṃ āpajjati.
ஸத்த ப²லா ஸத்தானிஸங்ஸாதி உப⁴யம்பேதங் அத்த²தோ ஏகங். தி³ட்டே²வ த⁴ம்மே படிகச்ச அஞ்ஞங் ஆராதே⁴தீதி அரஹத்தங் ஆராதெ⁴ந்தோ இமஸ்மிங்யேவ அத்தபா⁴வே ஆராதே⁴தி, தஞ்ச கோ² படிகச்ச, அஸம்பத்தேயேவ மரணகாலேதி அத்தோ². அத² மரணகாலேதி அத² மரணஸ்ஸ ஆஸன்னகாலே.
Satta phalā sattānisaṃsāti ubhayampetaṃ atthato ekaṃ. Diṭṭheva dhamme paṭikacca aññaṃ ārādhetīti arahattaṃ ārādhento imasmiṃyeva attabhāve ārādheti, tañca kho paṭikacca, asampatteyeva maraṇakāleti attho. Atha maraṇakāleti atha maraṇassa āsannakāle.
அந்தராபரினிப்³பா³யீதி யோ ஆயுவேமஜ்ஜ²ங் அனதிக்கமித்வா பரினிப்³பா³யதி, ஸோ திவிதோ⁴ ஹோதி. கப்பஸஹஸ்ஸாயுகேஸு தாவ அவிஹேஸு நிப்³ப³த்தித்வா ஏகோ நிப்³ப³த்ததி³வஸேயேவ அரஹத்தங் பாபுணாதி. நோ சே நிப்³ப³த்ததி³வஸே பாபுணாதி, பட²மஸ்ஸ பன கப்பஸதஸ்ஸ மத்த²கே பாபுணாதி. அயமேகோ அந்தராபரினிப்³பா³யீ. அபரோ ஏவங் அஸக்கொந்தோ த்³வின்னங் கப்பஸதானங் மத்த²கே பாபுணாதி, அயங் து³தியோ. அபரோ ஏவம்பி அஸக்கொந்தோ சதுன்னங் கப்பஸதானங் மத்த²கே பாபுணாதி, அயங் ததியோ அந்தராபரினிப்³பா³யீ.
Antarāparinibbāyīti yo āyuvemajjhaṃ anatikkamitvā parinibbāyati, so tividho hoti. Kappasahassāyukesu tāva avihesu nibbattitvā eko nibbattadivaseyeva arahattaṃ pāpuṇāti. No ce nibbattadivase pāpuṇāti, paṭhamassa pana kappasatassa matthake pāpuṇāti. Ayameko antarāparinibbāyī. Aparo evaṃ asakkonto dvinnaṃ kappasatānaṃ matthake pāpuṇāti, ayaṃ dutiyo. Aparo evampi asakkonto catunnaṃ kappasatānaṃ matthake pāpuṇāti, ayaṃ tatiyo antarāparinibbāyī.
பஞ்சமங் பன கப்பஸதங் அதிக்கமித்வா அரஹத்தங் பத்தோ உபஹச்சபரினிப்³பா³யீ நாம ஹோதி. அதப்பாதீ³ஸுபி ஏஸேவ நயோ. யத்த² கத்த²சி உப்பன்னோ பன ஸஸங்கா²ரேன ஸப்பயோகே³ன அரஹத்தங் பத்தோ ஸஸங்கா²ரபரினிப்³பா³யீ நாம, அஸங்கா²ரேன அப்பயோகே³ன பத்தோ அஸங்கா²ரபரினிப்³பா³யீ நாம. அவிஹாதீ³ஸுபி நிப்³ப³த்தோ தத்த² யாவதாயுகங் ட²த்வா உபரூபரி நிப்³ப³த்தித்வா அகனிட்ட²ங் பத்தோ உத்³த⁴ங்ஸோதோ அகனிட்ட²கா³மீ நாம.
Pañcamaṃ pana kappasataṃ atikkamitvā arahattaṃ patto upahaccaparinibbāyī nāma hoti. Atappādīsupi eseva nayo. Yattha katthaci uppanno pana sasaṅkhārena sappayogena arahattaṃ patto sasaṅkhāraparinibbāyī nāma, asaṅkhārena appayogena patto asaṅkhāraparinibbāyī nāma. Avihādīsupi nibbatto tattha yāvatāyukaṃ ṭhatvā uparūpari nibbattitvā akaniṭṭhaṃ patto uddhaṃsoto akaniṭṭhagāmī nāma.
இமஸ்மிங் பன டா²னே அட்ட²சத்தாரீஸ அனாகா³மினோ கதே²தப்³பா³. அவிஹேஸு ஹி தயோ அந்தராபரினிப்³பா³யீ, ஏகோ உபஹச்சபரினிப்³பா³யீ, ஏகோ உத்³த⁴ங்ஸோதோ அகனிட்ட²கா³மீதி பஞ்ச ஹொந்தி. தே அஸங்கா²ரபரினிப்³பா³யினோ பஞ்ச, ஸஸங்கா²ரபரினிப்³பா³யினோ பஞ்சாதி த³ஸ ஹொந்தி, ததா² அதப்பாதீ³ஸு. அகனிட்டே²ஸு பன உத்³த⁴ங்ஸோதோ நத்தி², தஸ்மா தத்த² சத்தாரோ ஸஸங்கா²ரபரினிப்³பா³யீ, சத்தாரோ அஸங்கா²ரபரினிப்³பா³யீதி அட்டா²தி ஏவங் அட்ட²சத்தாலீஸ ஹொந்தி. தேஸங் உத்³த⁴ங்ஸோதோ அகனிட்ட²கா³மீ ஸப்³ப³ஜெட்டோ² சேவ ஹோதி ஸப்³ப³கனிட்டோ² ச. கத²ங்? ஸோ ஹி ஸோளஸகப்பஸஹஸ்ஸாயுகத்தா ஆயுனா ஸப்³பே³ஸங் ஜெட்டோ², ஸப்³ப³பச்சா² அரஹத்தங் பாபுணீதி ஸப்³பே³ஸங் கனிட்டோ². இமஸ்மிங் ஸுத்தே அபுப்³ப³ங் அசரிமங் ஏகசித்தக்க²ணிகா நானாலக்க²ணா அரஹத்தமக்³க³ஸ்ஸ புப்³ப³பா⁴க³விபஸ்ஸனா பொ³ஜ்ஜ²ங்கா³ கதி²தா.
Imasmiṃ pana ṭhāne aṭṭhacattārīsa anāgāmino kathetabbā. Avihesu hi tayo antarāparinibbāyī, eko upahaccaparinibbāyī, eko uddhaṃsoto akaniṭṭhagāmīti pañca honti. Te asaṅkhāraparinibbāyino pañca, sasaṅkhāraparinibbāyino pañcāti dasa honti, tathā atappādīsu. Akaniṭṭhesu pana uddhaṃsoto natthi, tasmā tattha cattāro sasaṅkhāraparinibbāyī, cattāro asaṅkhāraparinibbāyīti aṭṭhāti evaṃ aṭṭhacattālīsa honti. Tesaṃ uddhaṃsoto akaniṭṭhagāmī sabbajeṭṭho ceva hoti sabbakaniṭṭho ca. Kathaṃ? So hi soḷasakappasahassāyukattā āyunā sabbesaṃ jeṭṭho, sabbapacchā arahattaṃ pāpuṇīti sabbesaṃ kaniṭṭho. Imasmiṃ sutte apubbaṃ acarimaṃ ekacittakkhaṇikā nānālakkhaṇā arahattamaggassa pubbabhāgavipassanā bojjhaṅgā kathitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. ஸீலஸுத்தங் • 3. Sīlasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. ஸீலஸுத்தவண்ணனா • 3. Sīlasuttavaṇṇanā
