| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
2. ஸீலஸுத்தவண்ணனா
2. Sīlasuttavaṇṇanā
12. து³தியே ஸம்பன்னஸீலாதி எத்த² திவித⁴ங் ஸம்பன்னங் பரிபுண்ணஸமங்கி³மது⁴ரவஸேன. தத்த² –
12. Dutiye sampannasīlāti ettha tividhaṃ sampannaṃ paripuṇṇasamaṅgimadhuravasena. Tattha –
‘‘ஸம்பன்னங் ஸாலிகேதா³ரங், ஸுவா பு⁴ஞ்ஜந்தி கோஸிய;
‘‘Sampannaṃ sālikedāraṃ, suvā bhuñjanti kosiya;
படிவேதே³மி தே ப்³ரஹ்மே, ந நே வாரேதுமுஸ்ஸஹே’’தி. (ஜா॰ 1.14.1) –
Paṭivedemi te brahme, na ne vāretumussahe’’ti. (jā. 1.14.1) –
இத³ங் பரிபுண்ணஸம்பன்னங் நாம. ‘‘இமினா பாதிமொக்க²ஸங்வரேன உபேதோ ஹோதி ஸமுபேதோ உபாக³தோ ஸமுபாக³தோ உபபன்னோ ஸம்பன்னோ ஸமன்னாக³தோ’’தி (விப⁴॰ 511) இத³ங் ஸமங்கி³ஸம்பன்னங் நாம. ‘‘இமிஸ்ஸா, ப⁴ந்தே, மஹாபத²வியா ஹெட்டி²மதலங் ஸம்பன்னங், ஸெய்யதா²பி கு²த்³த³மது⁴ங் அனீலகங், ஏவமஸ்ஸாத³’’ந்தி (பாரா॰ 17) இத³ங் மது⁴ரஸம்பன்னங் நாம. இத⁴ பரிபுண்ணஸம்பன்னவஸேன அத்த²ங் த³ஸ்ஸெந்தோ ‘‘ஸம்பன்னஸீலாதி பரிபுண்ணஸீலா’’தி ஆஹ. ஸமங்கி³ஸம்பன்னவஸேனபி அத்தோ² யுஜ்ஜதியேவ, தஸ்மா ஸம்பன்னஸீலாதி பரிபுண்ணஸீலா ஹுத்வாதிபி ஸீலஸமங்கி³னோ ஹுத்வாதிபி ஏவமெத்த² அத்தோ² த³ட்ட²ப்³போ³. தத்த² ஸீலஸ்ஸ அனவஸேஸஸமாதா³னேன அக²ண்டா³தி³பா⁴வப்பத்தியா பரிபுண்ணஸீலா, ஸமாதா³னதோ பட்டா²ய அவிச்சி²ந்த³னதோ ஸீலஸமங்கி³னோ. ஸமாதா³னவதோ ஹி அச்சந்தவிரோதி⁴த⁴ம்மானுப்பத்தியா ஸீலஸமங்கி³தா வேதி³தப்³பா³, சேதனாதீ³னங் பன ஸீலனலக்க²ணானங் த⁴ம்மானங் பவத்திலக்க²ணேன வத்தப்³ப³மேவ நத்தி².
Idaṃ paripuṇṇasampannaṃ nāma. ‘‘Iminā pātimokkhasaṃvarena upeto hoti samupeto upāgato samupāgato upapanno sampanno samannāgato’’ti (vibha. 511) idaṃ samaṅgisampannaṃ nāma. ‘‘Imissā, bhante, mahāpathaviyā heṭṭhimatalaṃ sampannaṃ, seyyathāpi khuddamadhuṃ anīlakaṃ, evamassāda’’nti (pārā. 17) idaṃ madhurasampannaṃ nāma. Idha paripuṇṇasampannavasena atthaṃ dassento ‘‘sampannasīlāti paripuṇṇasīlā’’ti āha. Samaṅgisampannavasenapi attho yujjatiyeva, tasmā sampannasīlāti paripuṇṇasīlā hutvātipi sīlasamaṅgino hutvātipi evamettha attho daṭṭhabbo. Tattha sīlassa anavasesasamādānena akhaṇḍādibhāvappattiyā paripuṇṇasīlā, samādānato paṭṭhāya avicchindanato sīlasamaṅgino. Samādānavato hi accantavirodhidhammānuppattiyā sīlasamaṅgitā veditabbā, cetanādīnaṃ pana sīlanalakkhaṇānaṃ dhammānaṃ pavattilakkhaṇena vattabbameva natthi.
தத்த² ‘‘பரிபுண்ணஸீலா’’தி இமினா அத்தே²ன கெ²த்ததோ³ஸவிக³மேன கெ²த்தபாரிபூரீ விய ஸீலதோ³ஸவிக³மேன ஸீலபாரிபூரீ வுத்தா ஹோதி. யதா² ஹி கெ²த்தங் பீ³ஜக²ண்ட³ங், வப்பக²ண்ட³ங், உத³கக²ண்ட³ங், ஊஸக²ண்ட³ந்தி சதுதோ³ஸஸமன்னாக³தங் அபரிபூரங் ஹோதி. தத்த² பீ³ஜக²ண்ட³ங் நாம யத்த² அந்தரந்தரா பீ³ஜானி க²ண்டா³னி வா பூதீனி வா ஹொந்தி, தானி யத்த² பதந்தி, தத்த² ஸஸ்ஸங் ந உட்டே²தி, கெ²த்தங் க²ண்ட³ங் ஹோதி, அபரிபூரங் ஹோதீதி அத்தோ². வப்பக²ண்ட³ங் நாம யத்த² அகுஸலோ பீ³ஜானி வபந்தோ அந்தரந்தரா நிபாதேதி. ஏவஞ்ஹி ஸப்³ப³த்த² ஸஸ்ஸங் ந உட்டே²தி, கெ²த்தங் க²ண்ட³ங் ஹோதி. உத³கக²ண்ட³ங் நாம யத்த² கத்த²சி உத³கங் அதிப³ஹுங் வா ஹோதி, ந வா ஹோதி. தத்ராபி ஹி ஸஸ்ஸானி ந உட்டெ²ந்தி, கெ²த்தங் க²ண்ட³ங் ஹோதி. ஊஸக²ண்ட³ங் நாம யத்த² கஸ்ஸகோ கிஸ்மிஞ்சி பதே³ஸே நங்க³லேன பூ⁴மிங் சத்தாரோ பஞ்ச வாரே கஸந்தோ அதிக³ம்பீ⁴ரங் கரோதி, ததோ ஊஸங் உப்பஜ்ஜதி. தத்ராபி ஹி ஸஸ்ஸங் ந உட்டே²தி, கெ²த்தங் க²ண்ட³ங் ஹோதி, தாதி³ஸஞ்ச கெ²த்தங் ந மஹப்ப²லங் ஹோதி ந மஹானிஸங்ஸங். தத்ராபி ப³ஹும்பி வபித்வா அப்பங் லப⁴தி. இமேஸங் பன சதுன்னங் தோ³ஸானங் விக³மா கெ²த்தங் பரிபுண்ணங் ஹோதி, தாதி³ஸஞ்ச கெ²த்தங் மஹப்ப²லங் ஹோதி மஹானிஸங்ஸங். ஏவமேவ க²ண்ட³ங், சி²த்³த³ங், ஸப³லங், கம்மாஸந்தி சதுதோ³ஸஸமன்னாக³தங் ஸீலங் அபரிபூரங் ஹோதி, தாதி³ஸஞ்ச ஸீலங் ந மஹப்ப²லங் ஹோதி ந மஹானிஸங்ஸங். இமேஸங் பன சதுன்னங் தோ³ஸானங் விக³மா ஸீலங் பரிபுண்ணங் ஹோதி, தாதி³ஸஞ்ச ஸீலங் மஹப்ப²லங் ஹோதி மஹானிஸங்ஸங்.
Tattha ‘‘paripuṇṇasīlā’’ti iminā atthena khettadosavigamena khettapāripūrī viya sīladosavigamena sīlapāripūrī vuttā hoti. Yathā hi khettaṃ bījakhaṇḍaṃ, vappakhaṇḍaṃ, udakakhaṇḍaṃ, ūsakhaṇḍanti catudosasamannāgataṃ aparipūraṃ hoti. Tattha bījakhaṇḍaṃ nāma yattha antarantarā bījāni khaṇḍāni vā pūtīni vā honti, tāni yattha patanti, tattha sassaṃ na uṭṭheti, khettaṃ khaṇḍaṃ hoti, aparipūraṃ hotīti attho. Vappakhaṇḍaṃ nāma yattha akusalo bījāni vapanto antarantarā nipāteti. Evañhi sabbattha sassaṃ na uṭṭheti, khettaṃ khaṇḍaṃ hoti. Udakakhaṇḍaṃ nāma yattha katthaci udakaṃ atibahuṃ vā hoti, na vā hoti. Tatrāpi hi sassāni na uṭṭhenti, khettaṃ khaṇḍaṃ hoti. Ūsakhaṇḍaṃ nāma yattha kassako kismiñci padese naṅgalena bhūmiṃ cattāro pañca vāre kasanto atigambhīraṃ karoti, tato ūsaṃ uppajjati. Tatrāpi hi sassaṃ na uṭṭheti, khettaṃ khaṇḍaṃ hoti, tādisañca khettaṃ na mahapphalaṃ hoti na mahānisaṃsaṃ. Tatrāpi bahumpi vapitvā appaṃ labhati. Imesaṃ pana catunnaṃ dosānaṃ vigamā khettaṃ paripuṇṇaṃ hoti, tādisañca khettaṃ mahapphalaṃ hoti mahānisaṃsaṃ. Evameva khaṇḍaṃ, chiddaṃ, sabalaṃ, kammāsanti catudosasamannāgataṃ sīlaṃ aparipūraṃ hoti, tādisañca sīlaṃ na mahapphalaṃ hoti na mahānisaṃsaṃ. Imesaṃ pana catunnaṃ dosānaṃ vigamā sīlaṃ paripuṇṇaṃ hoti, tādisañca sīlaṃ mahapphalaṃ hoti mahānisaṃsaṃ.
‘‘ஸீலஸமங்கி³னோ’’தி இமினா பனத்தே²ன ஸீலேன ஸமங்கி³பூ⁴தா ஸமோதா⁴னக³தா ஸமன்னாக³தா ஹுத்வா விஹரதா²தி இத³மேவ வுத்தங் ஹோதி. தத்த² த்³வீஹி காரணேஹி ஸம்பன்னஸீலதா ஹோதி ஸீலவிபத்தியா ஆதீ³னவத³ஸ்ஸனேன, ஸீலஸம்பத்தியா ச ஆனிஸங்ஸத³ஸ்ஸனேன. தது³ப⁴யம்பி விஸுத்³தி⁴மக்³கே³ (விஸுத்³தி⁴॰ 1.14) வித்தா²ரிதங் . தத்த² ‘‘ஸம்பன்னஸீலாதி எத்தாவதா ச கிர ப⁴க³வா சதுபாரிஸுத்³தி⁴ஸீலங் உத்³தி³ஸித்வா ‘பாதிமொக்க²ஸங்வரஸங்வுதா’தி இமினா தத்த² ஜெட்ட²கஸீலங் வித்தா²ரெத்வா த³ஸ்ஸேதீ’’தி தி³வாவிஹாரவாஸீ ஸுமத்தே²ரோ ஆஹ. அந்தேவாஸிகோ பனஸ்ஸ தேபிடகசூளனாக³த்தே²ரோ ஆஹ – ‘‘உப⁴யத்தா²பி பாதிமொக்க²ஸங்வரோ ப⁴க³வதா வுத்தோ, பாதிமொக்க²ஸங்வரோயேவ ஹி ஸீலங், இதரானி பன தீணி ஸீலந்தி வுத்தட்டா²னங் நாம அத்தீ²’’தி வத்வா தங் அனநுஜானந்தோ ஆஹ – ‘‘இந்த்³ரியஸங்வரோ நாம ச²த்³வாரரக்கா²மத்தகமேவ, ஆஜீவபாரிஸுத்³தி⁴ த⁴ம்மேன ஸமேன பச்சயுப்பத்திமத்தகங், பச்சயனிஸ்ஸிதங் படிலத்³த⁴பச்சயே இத³மத்த²ந்தி பச்சவெக்கி²த்வா பரிபு⁴ஞ்ஜனமத்தகங். நிப்பரியாயேன பாதிமொக்க²ஸங்வரோவ ஸீலங். யஸ்ஸ ஸோ பி⁴ன்னோ, அயங் சி²ன்னஸீஸோ விய புரிஸோ ஹத்த²பாதே³, ஸேஸானி ரக்கி²ஸ்ஸதீதி ந வத்தப்³போ³. யஸ்ஸ பன ஸோ அரோகோ³, அயங் அச்சி²ன்னஸீஸோ விய புரிஸோ ஜீவிதங், ஸேஸானி புன பாகதிகானி கத்வா ரக்கி²துங் ஸக்கோதி. தஸ்மா ‘ஸம்பன்னஸீலா’தி இமினா பாதிமொக்க²ஸங்வரங் உத்³தி³ஸித்வா ‘ஸம்பன்னபாதிமொக்கா²’தி தஸ்ஸேவ வேவசனங் வத்வா தங் வித்தா²ரெத்வா த³ஸ்ஸெந்தோ ‘பாதிமொக்க²ஸங்வரஸங்வுதா’திஆதி³மாஹா’’தி.
‘‘Sīlasamaṅgino’’ti iminā panatthena sīlena samaṅgibhūtā samodhānagatā samannāgatā hutvā viharathāti idameva vuttaṃ hoti. Tattha dvīhi kāraṇehi sampannasīlatā hoti sīlavipattiyā ādīnavadassanena, sīlasampattiyā ca ānisaṃsadassanena. Tadubhayampi visuddhimagge (visuddhi. 1.14) vitthāritaṃ . Tattha ‘‘sampannasīlāti ettāvatā ca kira bhagavā catupārisuddhisīlaṃ uddisitvā ‘pātimokkhasaṃvarasaṃvutā’ti iminā tattha jeṭṭhakasīlaṃ vitthāretvā dassetī’’ti divāvihāravāsī sumatthero āha. Antevāsiko panassa tepiṭakacūḷanāgatthero āha – ‘‘ubhayatthāpi pātimokkhasaṃvaro bhagavatā vutto, pātimokkhasaṃvaroyeva hi sīlaṃ, itarāni pana tīṇi sīlanti vuttaṭṭhānaṃ nāma atthī’’ti vatvā taṃ ananujānanto āha – ‘‘indriyasaṃvaro nāma chadvārarakkhāmattakameva, ājīvapārisuddhi dhammena samena paccayuppattimattakaṃ, paccayanissitaṃ paṭiladdhapaccaye idamatthanti paccavekkhitvā paribhuñjanamattakaṃ. Nippariyāyena pātimokkhasaṃvarova sīlaṃ. Yassa so bhinno, ayaṃ chinnasīso viya puriso hatthapāde, sesāni rakkhissatīti na vattabbo. Yassa pana so arogo, ayaṃ acchinnasīso viya puriso jīvitaṃ, sesāni puna pākatikāni katvā rakkhituṃ sakkoti. Tasmā ‘sampannasīlā’ti iminā pātimokkhasaṃvaraṃ uddisitvā ‘sampannapātimokkhā’ti tasseva vevacanaṃ vatvā taṃ vitthāretvā dassento ‘pātimokkhasaṃvarasaṃvutā’tiādimāhā’’ti.
பாதிமொக்க²ஸங்வரஸீலேன ஸங்வுதாதி யோ நங் பாதி ரக்க²தி, தங் மொக்கே²தி மோசேதி ஆபாயிகாதீ³ஹி து³க்கே²ஹீதி பாதிமொக்க²ந்தி லத்³த⁴னாமேன ஸிக்கா²பத³ஸீலேன பிஹிதகாயவசீத்³வாரா. ஏவங்பூ⁴தா ச தேன உபேதா ஸமன்னாக³தா நாம ஹொந்தீதி ஆஹ ‘‘உபேதா ஹுத்வா’’தி. ஆசாரேன ச கோ³சரேன ச ஸம்பன்னாதி காயிகவாசஸிகஅவீதிக்கமஸங்கா²தேன ஆசாரேன, ந-வேஸியகோ³சரதாதி³ஸங்கா²தேன கோ³சரேன ச ஸம்பன்னா, ஸம்பன்னஆசாரகோ³சராதி அத்தோ². அணுப்பமாணேஸூதி அதிபரித்தகேஸு அனாபத்திக³மனீயேஸு. து³க்கடது³ப்³பா⁴ஸிதமத்தேஸூதி அபரே. தோ³ஸேஸூதி கா³ரய்ஹேஸு அகுஸலத⁴ம்மேஸு. ப⁴யதோ த³ஸ்ஸனஸீலாதி பரமாணுமத்தம்பி வஜ்ஜங் ஸினேருப்பமாணங் விய கத்வா பா⁴யனஸீலா. ஸப்³ப³ஸிக்கா²கொட்டா²ஸேஸூதி மூலபஞ்ஞத்திஅனுபஞ்ஞத்திஸப்³ப³த்த²பஞ்ஞத்திபதே³ஸபஞ்ஞத்திஆதி³பே⁴தே³ஸு. தங் தங் ஸமாதா³தப்³ப³ங் ஸமாதா³யாதி யங் கிஞ்சி ஸிக்கா²கொட்டா²ஸேஸு மூலபஞ்ஞத்திஆதி³பே⁴தே³ஸு ஸிக்கி²தப்³ப³ங் படிபஜ்ஜிதப்³ப³ங் பூரிதப்³ப³ங் காயிகங் வாசஸிகங் வா ஸீலங், தங் ஸப்³ப³ங் ஸம்மா ஆதா³ய, ஸம்மதே³வ ஸக்கச்சங் ஸப்³ப³ஸோ ச ஆதி³யித்வாதி அத்தோ².
Pātimokkhasaṃvarasīlena saṃvutāti yo naṃ pāti rakkhati, taṃ mokkheti moceti āpāyikādīhi dukkhehīti pātimokkhanti laddhanāmena sikkhāpadasīlena pihitakāyavacīdvārā. Evaṃbhūtā ca tena upetā samannāgatā nāma hontīti āha ‘‘upetā hutvā’’ti. Ācārena ca gocarena ca sampannāti kāyikavācasikaavītikkamasaṅkhātena ācārena, na-vesiyagocaratādisaṅkhātena gocarena ca sampannā, sampannaācāragocarāti attho. Aṇuppamāṇesūti atiparittakesu anāpattigamanīyesu. Dukkaṭadubbhāsitamattesūti apare. Dosesūti gārayhesu akusaladhammesu. Bhayato dassanasīlāti paramāṇumattampi vajjaṃ sineruppamāṇaṃ viya katvā bhāyanasīlā. Sabbasikkhākoṭṭhāsesūti mūlapaññattianupaññattisabbatthapaññattipadesapaññattiādibhedesu. Taṃ taṃ samādātabbaṃ samādāyāti yaṃ kiñci sikkhākoṭṭhāsesu mūlapaññattiādibhedesu sikkhitabbaṃ paṭipajjitabbaṃ pūritabbaṃ kāyikaṃ vācasikaṃ vā sīlaṃ, taṃ sabbaṃ sammā ādāya, sammadeva sakkaccaṃ sabbaso ca ādiyitvāti attho.
உத³யங் பஸ்ஸந்தோ பஞ்சவீஸதி லக்க²ணானி பஸ்ஸதீதி ‘‘அவிஜ்ஜாஸமுத³யா ரூபஸமுத³யோதி பச்சயஸமுத³யட்டே²ன ரூபக்க²ந்த⁴ஸ்ஸ உத³யங் பஸ்ஸதி. தண்ஹாஸமுத³யா…பே॰… கம்மஸமுத³யா…பே॰… ஆஹாரஸமுத³யா ரூபஸமுத³யோதி பச்சயஸமுத³யட்டே²ன ரூபக்க²ந்த⁴ஸ்ஸ உத³யங் பஸ்ஸதி. நிப்³ப³த்திலக்க²ணங் பஸ்ஸந்தோபி ரூபக்க²ந்த⁴ஸ்ஸ உத³யங் பஸ்ஸதி. ரூபக்க²ந்த⁴ஸ்ஸ உத³யங் பஸ்ஸந்தோ இமானி பஞ்ச லக்க²ணானி பஸ்ஸதி. ததா² அவிஜ்ஜாஸமுத³யா வேத³னாஸமுத³யோதி பச்சயஸமுத³யட்டே²ன வேத³னாக்க²ந்த⁴ஸ்ஸ உத³யங் பஸ்ஸதி. தண்ஹாஸமுத³யா…பே॰… கம்மஸமுத³யா…பே॰… ப²ஸ்ஸஸமுத³யா வேத³னாஸமுத³யோதி பச்சயஸமுத³யட்டே²ன வேத³னாக்க²ந்த⁴ஸ்ஸ உத³யங் பஸ்ஸதி. நிப்³ப³த்திலக்க²ணங் பஸ்ஸந்தோபி வேத³னாக்க²ந்த⁴ஸ்ஸ உத³யங் பஸ்ஸதி. வேத³னாக்க²ந்த⁴ஸ்ஸ உத³யங் பஸ்ஸந்தோ இமானி பஞ்ச லக்க²ணானி பஸ்ஸதீ’’திஆதி³னா நயேன ஏகேகஸ்மிங் க²ந்தே⁴ பஞ்ச பஞ்ச கத்வா வுத்தானி பஞ்சவீஸதி உத³யலக்க²ணானி பஸ்ஸதி.
Udayaṃ passanto pañcavīsati lakkhaṇāni passatīti ‘‘avijjāsamudayā rūpasamudayoti paccayasamudayaṭṭhena rūpakkhandhassa udayaṃ passati. Taṇhāsamudayā…pe… kammasamudayā…pe… āhārasamudayā rūpasamudayoti paccayasamudayaṭṭhena rūpakkhandhassa udayaṃ passati. Nibbattilakkhaṇaṃ passantopi rūpakkhandhassa udayaṃ passati. Rūpakkhandhassa udayaṃ passanto imāni pañca lakkhaṇāni passati. Tathā avijjāsamudayā vedanāsamudayoti paccayasamudayaṭṭhena vedanākkhandhassa udayaṃ passati. Taṇhāsamudayā…pe… kammasamudayā…pe… phassasamudayā vedanāsamudayoti paccayasamudayaṭṭhena vedanākkhandhassa udayaṃ passati. Nibbattilakkhaṇaṃ passantopi vedanākkhandhassa udayaṃ passati. Vedanākkhandhassa udayaṃ passanto imāni pañca lakkhaṇāni passatī’’tiādinā nayena ekekasmiṃ khandhe pañca pañca katvā vuttāni pañcavīsati udayalakkhaṇāni passati.
வயங் பஸ்ஸந்தோ பஞ்சவீஸதி லக்க²ணானி பஸ்ஸதீதி ‘‘அவிஜ்ஜானிரோதா⁴ ரூபனிரோதோ⁴தி பச்சயனிரோத⁴ட்டே²ன ரூபக்க²ந்த⁴ஸ்ஸ வயங் பஸ்ஸதி. தண்ஹானிரோதா⁴…பே॰… கம்மனிரோதா⁴…பே॰… ஆஹாரனிரோதா⁴ ரூபனிரோதோ⁴தி பச்சயனிரோத⁴ட்டே²ன ரூபக்க²ந்த⁴ஸ்ஸ வயங் பஸ்ஸதி. விபரிணாமலக்க²ணங் பஸ்ஸந்தோபி ரூபக்க²ந்த⁴ஸ்ஸ வயங் பஸ்ஸதி. ரூபக்க²ந்த⁴ஸ்ஸ வயங் பஸ்ஸந்தோ இமானி பஞ்ச லக்க²ணானி பஸ்ஸதி. அவிஜ்ஜானிரோதா⁴…பே॰… தண்ஹானிரோதா⁴…பே॰… ப²ஸ்ஸனிரோதா⁴ வேத³னானிரோதோ⁴தி பச்சயனிரோத⁴ட்டே²ன வேத³னாக்க²ந்த⁴ஸ்ஸ வயங் பஸ்ஸதி. விபரிணாமலக்க²ணங் பஸ்ஸந்தோபி வேத³னாக்க²ந்த⁴ஸ்ஸ வயங் பஸ்ஸதீ. வேத³னாக்க²ந்த⁴ஸ்ஸ வயங் பஸ்ஸந்தோ இமானி பஞ்ச லக்க²ணானி பஸ்ஸதி’’திஆதி³னா நயேன ஏகேகஸ்மிங் க²ந்தே⁴ பஞ்ச பஞ்ச கத்வா வுத்தானி பஞ்சவீஸதி வயலக்க²ணானி பஸ்ஸதி. பேஸிதத்தோதி நிப்³பா³னங் பதி பேஸிதசித்தோ. கத²யந்தீதி ததா²வித⁴ங் பி⁴க்கு²ங் பு³த்³தா⁴த³யோ அரியா ஆசிக்க²ந்தி.
Vayaṃ passanto pañcavīsati lakkhaṇāni passatīti ‘‘avijjānirodhā rūpanirodhoti paccayanirodhaṭṭhena rūpakkhandhassa vayaṃ passati. Taṇhānirodhā…pe… kammanirodhā…pe… āhāranirodhā rūpanirodhoti paccayanirodhaṭṭhena rūpakkhandhassa vayaṃ passati. Vipariṇāmalakkhaṇaṃ passantopi rūpakkhandhassa vayaṃ passati. Rūpakkhandhassa vayaṃ passanto imāni pañca lakkhaṇāni passati. Avijjānirodhā…pe… taṇhānirodhā…pe… phassanirodhā vedanānirodhoti paccayanirodhaṭṭhena vedanākkhandhassa vayaṃ passati. Vipariṇāmalakkhaṇaṃ passantopi vedanākkhandhassa vayaṃ passatī. Vedanākkhandhassa vayaṃ passanto imāni pañca lakkhaṇāni passati’’tiādinā nayena ekekasmiṃ khandhe pañca pañca katvā vuttāni pañcavīsati vayalakkhaṇāni passati. Pesitattoti nibbānaṃ pati pesitacitto. Kathayantīti tathāvidhaṃ bhikkhuṃ buddhādayo ariyā ācikkhanti.
யதங் சரேதி வாயமமானோ சரெய்ய, சங்கமனாதி³வஸேன க³மனங் கப்பெந்தோபி ‘‘அனுப்பன்னானங் பாபகானங் அகுஸலானங் த⁴ம்மானங் அனுப்பாதா³ய ச²ந்த³ங் ஜனேதி வாயமதீ’’திஆதி³னா (விப⁴॰ 432) நயேன வுத்தப்பதா⁴னவீரியங் கரொந்தோ க⁴டெந்தோ வாயமந்தோ யதா² அகுஸலத⁴ம்மா பஹீயந்தி, குஸலத⁴ம்மா பா⁴வனாபாரிபூரிங் க³ச்ச²ந்தி, ஏவங் க³மனங் கப்பெய்யாதி அத்தோ². ஏஸ நயோ ஸேஸேஸுபி. யதமேனங் பஸாரயேதி ஏதங் பஸாரேதப்³ப³ங் ஹத்த²பாதா³தி³ங் யதங் யதமானோ யதா²வுத்தவீரியஸமங்கீ³ ஹுத்வா பஸாரெய்ய, ஸப்³ப³த்த² பதா⁴னங் ந ஜஹெய்யாதி அதி⁴ப்பாயோ.
Yataṃcareti vāyamamāno careyya, caṅkamanādivasena gamanaṃ kappentopi ‘‘anuppannānaṃ pāpakānaṃ akusalānaṃ dhammānaṃ anuppādāya chandaṃ janeti vāyamatī’’tiādinā (vibha. 432) nayena vuttappadhānavīriyaṃ karonto ghaṭento vāyamanto yathā akusaladhammā pahīyanti, kusaladhammā bhāvanāpāripūriṃ gacchanti, evaṃ gamanaṃ kappeyyāti attho. Esa nayo sesesupi. Yatamenaṃ pasārayeti etaṃ pasāretabbaṃ hatthapādādiṃ yataṃ yatamāno yathāvuttavīriyasamaṅgī hutvā pasāreyya, sabbattha padhānaṃ na jaheyyāti adhippāyo.
இதா³னி யதா² படிபஜ்ஜந்தோ யதங் யதந்தோ நாம ஹோதி, தங் படிபத³ங் த³ஸ்ஸேதுங் ‘‘உத்³த⁴’’ந்திஆதி³ வுத்தங். தத்த² உத்³த⁴ந்தி உபரி. திரியந்தி பரிதோ, புரத்தி²மதி³ஸாதி³வஸேன ஸமந்ததோ தி³ஸாபா⁴கே³ஸூதி அத்தோ². அபாசீனந்தி ஹெட்டா². யாவதா ஜக³தோ க³தீதி யத்தகா ஸத்தஸங்கா²ரபே⁴த³ஸ்ஸ லோகஸ்ஸ பவத்தி, தத்த² ஸப்³ப³த்தா²தி அத்தோ². எத்தாவதா அனவஸேஸதா ஸம்மஸனஞாணஸ்ஸ விஸயங் ஸங்க³ஹெத்வா த³ஸ்ஸேதி. ஸமவெக்கி²தாதி ஸமா ஹேதுனா ஞாயேன அவெக்கி²தா, அனிச்சாதி³வஸேன விபஸ்ஸிதாதி வுத்தங் ஹோதி. த⁴ம்மானந்தி ஸத்தஸுஞ்ஞானங். க²ந்தா⁴னந்தி ரூபாதீ³னங் பஞ்சன்னங் க²ந்தா⁴னங். உத³யப்³ப³யந்தி உத³யஞ்ச வயஞ்ச. இத³ங் வுத்தங் ஹோதி – உபரி திரியங் அதோ⁴தி திதா⁴ ஸங்க³ஹிதே ஸப்³ப³ஸ்மிங் லோகே அதீதாதி³பே⁴த³பி⁴ன்னானங் பஞ்சுபாதா³னக்க²ந்த⁴ஸங்கா²தானங் ஸப்³பே³ஸங் ரூபாரூபத⁴ம்மானங் அனிச்சாதி³ஸம்மஸனாதி⁴க³தேன உத³யப்³ப³யஞாணேன பஞ்சவீஸதியா ஆகாரேஹி உத³யங், பஞ்சவீஸதியா ஆகாரேஹி வயங் ஸமவெக்கி²தா ஸமனுபஸ்ஸிதா ப⁴வெய்யாதி.
Idāni yathā paṭipajjanto yataṃ yatanto nāma hoti, taṃ paṭipadaṃ dassetuṃ ‘‘uddha’’ntiādi vuttaṃ. Tattha uddhanti upari. Tiriyanti parito, puratthimadisādivasena samantato disābhāgesūti attho. Apācīnanti heṭṭhā. Yāvatā jagato gatīti yattakā sattasaṅkhārabhedassa lokassa pavatti, tattha sabbatthāti attho. Ettāvatā anavasesatā sammasanañāṇassa visayaṃ saṅgahetvā dasseti. Samavekkhitāti samā hetunā ñāyena avekkhitā, aniccādivasena vipassitāti vuttaṃ hoti. Dhammānanti sattasuññānaṃ. Khandhānanti rūpādīnaṃ pañcannaṃ khandhānaṃ. Udayabbayanti udayañca vayañca. Idaṃ vuttaṃ hoti – upari tiriyaṃ adhoti tidhā saṅgahite sabbasmiṃ loke atītādibhedabhinnānaṃ pañcupādānakkhandhasaṅkhātānaṃ sabbesaṃ rūpārūpadhammānaṃ aniccādisammasanādhigatena udayabbayañāṇena pañcavīsatiyā ākārehi udayaṃ, pañcavīsatiyā ākārehi vayaṃ samavekkhitā samanupassitā bhaveyyāti.
சேதோஸமத²ஸாமீசிந்தி சித்தஸங்கிலேஸானங் அச்சந்தவூபஸமனதோ சேதோஸமத²ஸங்கா²தஸ்ஸ அரியமக்³க³ஸ்ஸ அனுச்ச²விகங் படிபதா³ஞாணத³ஸ்ஸனவிஸுத்³தி⁴ங். ஸிக்க²மானந்தி படிபஜ்ஜமானங் பா⁴வெந்தங் ஞாணபரம்பரா நிப்³ப³த்தெந்தங். ஸதா³தி ஸப்³ப³காலங் ரத்திஞ்சேவ தி³வா ச. ஸதந்தி சதுஸம்பஜஞ்ஞஸமன்னாக³தாய ஸதியா ஸதோகாரீ. ஏவம்பெத்த² கா³தா²வண்ணனா த³ட்ட²ப்³பா³. ஸேஸமெத்த² ஸுவிஞ்ஞெய்யமேவ.
Cetosamathasāmīcinti cittasaṃkilesānaṃ accantavūpasamanato cetosamathasaṅkhātassa ariyamaggassa anucchavikaṃ paṭipadāñāṇadassanavisuddhiṃ. Sikkhamānanti paṭipajjamānaṃ bhāventaṃ ñāṇaparamparā nibbattentaṃ. Sadāti sabbakālaṃ rattiñceva divā ca. Satanti catusampajaññasamannāgatāya satiyā satokārī. Evampettha gāthāvaṇṇanā daṭṭhabbā. Sesamettha suviññeyyameva.
ஸீலஸுத்தவண்ணனா நிட்டி²தா.
Sīlasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. ஸீலஸுத்தங் • 2. Sīlasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. ஸீலஸுத்தவண்ணனா • 2. Sīlasuttavaṇṇanā
