| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৩. সীলসুত্তৰণ্ণনা
3. Sīlasuttavaṇṇanā
২১৩. ততিযে দুস্সীলোতি অসীলো নিস্সীলো। সীলৰিপন্নোতি ৰিপন্নসীলো ভিন্নসংৰরো। পমাদাধিকরণন্তি পমাদকারণা। ইদঞ্চ সুত্তং গহট্ঠানং ৰসেন আগতং, পব্বজিতানম্পি পন লব্ভতেৰ । গহট্ঠো হি যেন যেন সিপ্পট্ঠানেন জীৰিকং কপ্পেতি, যদি কসিযা, যদি ৰণিজ্জায, পাণাতিপাতাদিৰসেন পমত্তো তং তং যথাকালং সম্পাদেতুং ন সক্কোতি, অথস্স মূলং ৰিনস্সতি। মাঘাতকালেপি পাণাতিপাতং অদিন্নাদানাদীনি চ করোন্তো দণ্ডৰসেন মহতিং ভোগজানিং নিগচ্ছতি। পব্বজিতো দুস্সীলো পমাদকারণা সীলতো বুদ্ধৰচনতো ঝানতো সত্তঅরিযধনতো চ জানিং নিগচ্ছতি। গহট্ঠস্স ‘‘অসুকো অসুককুলে জাতো দুস্সীলো পাপধম্মো পরিচ্চত্তইধলোকপরলোকো সলাকভত্তমত্তম্পি ন দেতী’’তি চতুপরিসমজ্ঝে পাপকো কিত্তিসদ্দো অব্ভুগ্গচ্ছতি। পব্বজিতস্স ‘‘অসুকো নাসক্খি সীলং রক্খিতুং বুদ্ধৰচনং গহেতুং, ৰেজ্জকম্মাদীহি জীৰতি, ছহি অগারৰেহি সমন্নাগতো’’তি এৰং অব্ভুগ্গচ্ছতি।
213. Tatiye dussīloti asīlo nissīlo. Sīlavipannoti vipannasīlo bhinnasaṃvaro. Pamādādhikaraṇanti pamādakāraṇā. Idañca suttaṃ gahaṭṭhānaṃ vasena āgataṃ, pabbajitānampi pana labbhateva . Gahaṭṭho hi yena yena sippaṭṭhānena jīvikaṃ kappeti, yadi kasiyā, yadi vaṇijjāya, pāṇātipātādivasena pamatto taṃ taṃ yathākālaṃ sampādetuṃ na sakkoti, athassa mūlaṃ vinassati. Māghātakālepi pāṇātipātaṃ adinnādānādīni ca karonto daṇḍavasena mahatiṃ bhogajāniṃ nigacchati. Pabbajito dussīlo pamādakāraṇā sīlato buddhavacanato jhānato sattaariyadhanato ca jāniṃ nigacchati. Gahaṭṭhassa ‘‘asuko asukakule jāto dussīlo pāpadhammo pariccattaidhalokaparaloko salākabhattamattampi na detī’’ti catuparisamajjhe pāpako kittisaddo abbhuggacchati. Pabbajitassa ‘‘asuko nāsakkhi sīlaṃ rakkhituṃ buddhavacanaṃ gahetuṃ, vejjakammādīhi jīvati, chahi agāravehi samannāgato’’ti evaṃ abbhuggacchati.
অৰিসারদোতি গহট্ঠো তাৰ ‘‘অৰস্সং বহূনং সন্নিপাতট্ঠানে কোচি মম কম্মং জানিস্সতি, অথ মং নিগ্গণ্হিস্সন্তি ৰা, রাজকুলস্স ৰা দস্সন্তী’’তি সভযো উপসঙ্কমতি। মঙ্কুভূতো চ পতিতক্খন্ধো অধোমুখো অঙ্গুট্ঠকেন ভূমিং কসন্তো নিসীদতি, ৰিসারদো হুত্ৰা কথেতুং ন সক্কোতি। পব্বজিতোপি ‘‘বহূ ভিক্খূ সন্নিপতিতা, অৰস্সং কোচি মম কম্মং জানিস্সতি, অথ মে উপোসথম্পি পৰারণম্পি ঠপেত্ৰা সামঞ্ঞা চাৰেত্ৰা নিক্কড্ঢিস্সন্তী’’তি সভযো উপসঙ্কমতি, ৰিসারদো হুত্ৰা কথেতুং ন সক্কোতি। একচ্চো পন দুস্সীলোপি দপ্পিতো ৰিয চরতি, সোপি অজ্ঝাসযেন মঙ্কু হোতিযেৰ।
Avisāradoti gahaṭṭho tāva ‘‘avassaṃ bahūnaṃ sannipātaṭṭhāne koci mama kammaṃ jānissati, atha maṃ niggaṇhissanti vā, rājakulassa vā dassantī’’ti sabhayo upasaṅkamati. Maṅkubhūto ca patitakkhandho adhomukho aṅguṭṭhakena bhūmiṃ kasanto nisīdati, visārado hutvā kathetuṃ na sakkoti. Pabbajitopi ‘‘bahū bhikkhū sannipatitā, avassaṃ koci mama kammaṃ jānissati, atha me uposathampi pavāraṇampi ṭhapetvā sāmaññā cāvetvā nikkaḍḍhissantī’’ti sabhayo upasaṅkamati, visārado hutvā kathetuṃ na sakkoti. Ekacco pana dussīlopi dappito viya carati, sopi ajjhāsayena maṅku hotiyeva.
সম্মূল়্হো কালং করোতীতি তস্স হি মরণমঞ্চে নিপন্নস্স দুস্সীলকম্মং সমাদায ৰত্তিতট্ঠানং আপাথং আগচ্ছতি। সো উম্মীলেত্ৰা ইধলোকং পস্সতি, নিম্মীলেত্ৰা পরলোকং। তস্স চত্তারো অপাযা উপট্ঠহন্তি, সত্তিসতেন সীসে পহরিযমানো ৰিয হোতি। সো ‘‘ৰারেথ ৰারেথা’’তি ৰিরৰন্তো মরতি। তেন ৰুত্তং – ‘‘সম্মূল়্হো কালং করোতী’’তি। পঞ্চমপদং উত্তানমেৰ। আনিসংসকথা ৰুত্তৰিপরিযাযেন ৰেদিতব্বা।
Sammūḷho kālaṃ karotīti tassa hi maraṇamañce nipannassa dussīlakammaṃ samādāya vattitaṭṭhānaṃ āpāthaṃ āgacchati. So ummīletvā idhalokaṃ passati, nimmīletvā paralokaṃ. Tassa cattāro apāyā upaṭṭhahanti, sattisatena sīse pahariyamāno viya hoti. So ‘‘vāretha vārethā’’ti viravanto marati. Tena vuttaṃ – ‘‘sammūḷho kālaṃ karotī’’ti. Pañcamapadaṃ uttānameva. Ānisaṃsakathā vuttavipariyāyena veditabbā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৩. সীলসুত্তং • 3. Sīlasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ৩-১০. সীলসুত্তাদিৰণ্ণনা • 3-10. Sīlasuttādivaṇṇanā
