| Library / Tipiṭaka / д̇ибидага • Tipiṭaka / ан̇г̇уд̇д̇аранигааяа (адтагат̇аа) • Aṅguttaranikāya (aṭṭhakathā) |
3. сийласуд̇д̇аван̣н̣анаа
3. Sīlasuttavaṇṇanā
213. д̇ад̇ияз д̣̇уссийлод̇и асийло ниссийло. сийлавибаннод̇и вибаннасийло бхиннасам̣варо. бамаад̣̇аад̇хигаран̣анд̇и бамаад̣̇агааран̣аа. ид̣̇ан̃жа суд̇д̇ам̣ г̇ахадтаанам̣ васзна ааг̇ад̇ам̣, баб̣б̣аж̇ид̇аанамби бана лаб̣бхад̇зва . г̇ахадто хи язна язна сиббадтаанзна ж̇ийвигам̣ габбзд̇и, яад̣̇и гасияаа, яад̣̇и ван̣иж̇ж̇ааяа, баан̣аад̇ибаад̇аад̣̇ивасзна бамад̇д̇о д̇ам̣ д̇ам̣ яат̇аагаалам̣ самбаад̣̇зд̇ум̣ на саггод̇и, ат̇асса муулам̣ винассад̇и. маагхаад̇агаалзби баан̣аад̇ибаад̇ам̣ ад̣̇иннаад̣̇аанаад̣̇ийни жа гаронд̇о д̣̇ан̣д̣авасзна махад̇им̣ бхог̇аж̇ааним̣ ниг̇ажчад̇и. баб̣б̣аж̇ид̇о д̣̇уссийло бамаад̣̇агааран̣аа сийлад̇о б̣уд̣̇д̇хаважанад̇о жхаанад̇о сад̇д̇аарияад̇ханад̇о жа ж̇ааним̣ ниг̇ажчад̇и. г̇ахадтасса ‘‘асуго асугагулз ж̇аад̇о д̣̇уссийло баабад̇хаммо барижжад̇д̇аид̇халогабаралого салаагабхад̇д̇амад̇д̇амби на д̣̇зд̇ий’’д̇и жад̇убарисамаж̇жхз баабаго гид̇д̇исад̣̇д̣̇о аб̣бхуг̇г̇ажчад̇и. баб̣б̣аж̇ид̇асса ‘‘асуго наасагки сийлам̣ рагкид̇ум̣ б̣уд̣̇д̇хаважанам̣ г̇ахзд̇ум̣, взж̇ж̇агаммаад̣̇ийхи ж̇ийвад̇и, чахи аг̇ааравзхи саманнааг̇ад̇о’’д̇и звам̣ аб̣бхуг̇г̇ажчад̇и.
213. Tatiye dussīloti asīlo nissīlo. Sīlavipannoti vipannasīlo bhinnasaṃvaro. Pamādādhikaraṇanti pamādakāraṇā. Idañca suttaṃ gahaṭṭhānaṃ vasena āgataṃ, pabbajitānampi pana labbhateva . Gahaṭṭho hi yena yena sippaṭṭhānena jīvikaṃ kappeti, yadi kasiyā, yadi vaṇijjāya, pāṇātipātādivasena pamatto taṃ taṃ yathākālaṃ sampādetuṃ na sakkoti, athassa mūlaṃ vinassati. Māghātakālepi pāṇātipātaṃ adinnādānādīni ca karonto daṇḍavasena mahatiṃ bhogajāniṃ nigacchati. Pabbajito dussīlo pamādakāraṇā sīlato buddhavacanato jhānato sattaariyadhanato ca jāniṃ nigacchati. Gahaṭṭhassa ‘‘asuko asukakule jāto dussīlo pāpadhammo pariccattaidhalokaparaloko salākabhattamattampi na detī’’ti catuparisamajjhe pāpako kittisaddo abbhuggacchati. Pabbajitassa ‘‘asuko nāsakkhi sīlaṃ rakkhituṃ buddhavacanaṃ gahetuṃ, vejjakammādīhi jīvati, chahi agāravehi samannāgato’’ti evaṃ abbhuggacchati.
ависаарад̣̇од̇и г̇ахадто д̇аава ‘‘авассам̣ б̣ахуунам̣ саннибаад̇адтаанз гожи мама гаммам̣ ж̇ааниссад̇и, ат̇а мам̣ ниг̇г̇ан̣хиссанд̇и ваа, рааж̇агуласса ваа д̣̇ассанд̇ий’’д̇и сабхаяо убасан̇гамад̇и. ман̇губхууд̇о жа бад̇ид̇агканд̇хо ад̇хомуко ан̇г̇удтагзна бхуумим̣ гасанд̇о нисийд̣̇ад̇и, висаарад̣̇о худ̇ваа гат̇зд̇ум̣ на саггод̇и. баб̣б̣аж̇ид̇оби ‘‘б̣ахуу бхигкуу саннибад̇ид̇аа, авассам̣ гожи мама гаммам̣ ж̇ааниссад̇и, ат̇а мз убосат̇амби бавааран̣амби табзд̇ваа сааман̃н̃аа жаавзд̇ваа ниггад̣дхиссанд̇ий’’д̇и сабхаяо убасан̇гамад̇и, висаарад̣̇о худ̇ваа гат̇зд̇ум̣ на саггод̇и. згажжо бана д̣̇уссийлоби д̣̇аббид̇о вияа жарад̇и, соби аж̇жхаасаязна ман̇гу ход̇иязва.
Avisāradoti gahaṭṭho tāva ‘‘avassaṃ bahūnaṃ sannipātaṭṭhāne koci mama kammaṃ jānissati, atha maṃ niggaṇhissanti vā, rājakulassa vā dassantī’’ti sabhayo upasaṅkamati. Maṅkubhūto ca patitakkhandho adhomukho aṅguṭṭhakena bhūmiṃ kasanto nisīdati, visārado hutvā kathetuṃ na sakkoti. Pabbajitopi ‘‘bahū bhikkhū sannipatitā, avassaṃ koci mama kammaṃ jānissati, atha me uposathampi pavāraṇampi ṭhapetvā sāmaññā cāvetvā nikkaḍḍhissantī’’ti sabhayo upasaṅkamati, visārado hutvā kathetuṃ na sakkoti. Ekacco pana dussīlopi dappito viya carati, sopi ajjhāsayena maṅku hotiyeva.
саммуул̣хо гаалам̣ гарод̇ийд̇и д̇асса хи маран̣аман̃жз нибаннасса д̣̇уссийлагаммам̣ самаад̣̇ааяа вад̇д̇ид̇адтаанам̣ аабаат̇ам̣ ааг̇ажчад̇и. со уммийлзд̇ваа ид̇халогам̣ бассад̇и, ниммийлзд̇ваа баралогам̣. д̇асса жад̇д̇ааро абааяаа убадтаханд̇и, сад̇д̇исад̇зна сийсз бахарияамаано вияа ход̇и. со ‘‘ваарзт̇а ваарзт̇аа’’д̇и вираванд̇о марад̇и. д̇зна вуд̇д̇ам̣ – ‘‘саммуул̣хо гаалам̣ гарод̇ий’’д̇и. бан̃жамабад̣̇ам̣ уд̇д̇аанамзва. аанисам̣сагат̇аа вуд̇д̇авибарияааязна взд̣̇ид̇аб̣б̣аа.
Sammūḷho kālaṃ karotīti tassa hi maraṇamañce nipannassa dussīlakammaṃ samādāya vattitaṭṭhānaṃ āpāthaṃ āgacchati. So ummīletvā idhalokaṃ passati, nimmīletvā paralokaṃ. Tassa cattāro apāyā upaṭṭhahanti, sattisatena sīse pahariyamāno viya hoti. So ‘‘vāretha vārethā’’ti viravanto marati. Tena vuttaṃ – ‘‘sammūḷho kālaṃ karotī’’ti. Pañcamapadaṃ uttānameva. Ānisaṃsakathā vuttavipariyāyena veditabbā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 3. сийласуд̇д̇ам̣ • 3. Sīlasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 3-10. сийласуд̇д̇аад̣̇иван̣н̣анаа • 3-10. Sīlasuttādivaṇṇanā
