| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
3. සීලසුත්‌තවණ්‌ණනා
3. Sīlasuttavaṇṇanā
213. තතියෙ දුස්‌සීලොති අසීලො නිස්‌සීලො. සීලවිපන්‌නොති විපන්‌නසීලො භින්‌නසංවරො. පමාදාධිකරණන්‌ති පමාදකාරණා. ඉදඤ්‌ච සුත්‌තං ගහට්‌ඨානං වසෙන ආගතං, පබ්‌බජිතානම්‌පි පන ලබ්‌භතෙව . ගහට්‌ඨො හි යෙන යෙන සිප්‌පට්‌ඨානෙන ජීවිකං කප්‌පෙති, යදි කසියා, යදි වණිජ්‌ජාය, පාණාතිපාතාදිවසෙන පමත්‌තො තං තං යථාකාලං සම්‌පාදෙතුං න සක්‌කොති, අථස්‌ස මූලං විනස්‌සති. මාඝාතකාලෙපි පාණාතිපාතං අදින්‌නාදානාදීනි ච කරොන්‌තො දණ්‌ඩවසෙන මහතිං භොගජානිං නිගච්‌ඡති. පබ්‌බජිතො දුස්‌සීලො පමාදකාරණා සීලතො බුද්‌ධවචනතො ඣානතො සත්‌තඅරියධනතො ච ජානිං නිගච්‌ඡති. ගහට්‌ඨස්‌ස ‘‘අසුකො අසුකකුලෙ ජාතො දුස්‌සීලො පාපධම්‌මො පරිච්‌චත්‌තඉධලොකපරලොකො සලාකභත්‌තමත්‌තම්‌පි න දෙතී’’ති චතුපරිසමජ්‌ඣෙ පාපකො කිත්‌තිසද්‌දො අබ්‌භුග්‌ගච්‌ඡති. පබ්‌බජිතස්‌ස ‘‘අසුකො නාසක්‌ඛි සීලං රක්‌ඛිතුං බුද්‌ධවචනං ගහෙතුං, වෙජ්‌ජකම්‌මාදීහි ජීවති, ඡහි අගාරවෙහි සමන්‌නාගතො’’ති එවං අබ්‌භුග්‌ගච්‌ඡති.
213. Tatiye dussīloti asīlo nissīlo. Sīlavipannoti vipannasīlo bhinnasaṃvaro. Pamādādhikaraṇanti pamādakāraṇā. Idañca suttaṃ gahaṭṭhānaṃ vasena āgataṃ, pabbajitānampi pana labbhateva . Gahaṭṭho hi yena yena sippaṭṭhānena jīvikaṃ kappeti, yadi kasiyā, yadi vaṇijjāya, pāṇātipātādivasena pamatto taṃ taṃ yathākālaṃ sampādetuṃ na sakkoti, athassa mūlaṃ vinassati. Māghātakālepi pāṇātipātaṃ adinnādānādīni ca karonto daṇḍavasena mahatiṃ bhogajāniṃ nigacchati. Pabbajito dussīlo pamādakāraṇā sīlato buddhavacanato jhānato sattaariyadhanato ca jāniṃ nigacchati. Gahaṭṭhassa ‘‘asuko asukakule jāto dussīlo pāpadhammo pariccattaidhalokaparaloko salākabhattamattampi na detī’’ti catuparisamajjhe pāpako kittisaddo abbhuggacchati. Pabbajitassa ‘‘asuko nāsakkhi sīlaṃ rakkhituṃ buddhavacanaṃ gahetuṃ, vejjakammādīhi jīvati, chahi agāravehi samannāgato’’ti evaṃ abbhuggacchati.
අවිසාරදොති ගහට්‌ඨො තාව ‘‘අවස්‌සං බහූනං සන්‌නිපාතට්‌ඨානෙ කොචි මම කම්‌මං ජානිස්‌සති, අථ මං නිග්‌ගණ්‌හිස්‌සන්‌ති වා, රාජකුලස්‌ස වා දස්‌සන්‌තී’’ති සභයො උපසඞ්‌කමති. මඞ්‌කුභූතො ච පතිතක්‌ඛන්‌ධො අධොමුඛො අඞ්‌ගුට්‌ඨකෙන භූමිං කසන්‌තො නිසීදති, විසාරදො හුත්‌වා කථෙතුං න සක්‌කොති. පබ්‌බජිතොපි ‘‘බහූ භික්‌ඛූ සන්‌නිපතිතා, අවස්‌සං කොචි මම කම්‌මං ජානිස්‌සති, අථ මෙ උපොසථම්‌පි පවාරණම්‌පි ඨපෙත්‌වා සාමඤ්‌ඤා චාවෙත්‌වා නික්‌කඩ්‌ඪිස්‌සන්‌තී’’ති සභයො උපසඞ්‌කමති, විසාරදො හුත්‌වා කථෙතුං න සක්‌කොති. එකච්‌චො පන දුස්‌සීලොපි දප්‌පිතො විය චරති, සොපි අජ්‌ඣාසයෙන මඞ්‌කු හොතියෙව.
Avisāradoti gahaṭṭho tāva ‘‘avassaṃ bahūnaṃ sannipātaṭṭhāne koci mama kammaṃ jānissati, atha maṃ niggaṇhissanti vā, rājakulassa vā dassantī’’ti sabhayo upasaṅkamati. Maṅkubhūto ca patitakkhandho adhomukho aṅguṭṭhakena bhūmiṃ kasanto nisīdati, visārado hutvā kathetuṃ na sakkoti. Pabbajitopi ‘‘bahū bhikkhū sannipatitā, avassaṃ koci mama kammaṃ jānissati, atha me uposathampi pavāraṇampi ṭhapetvā sāmaññā cāvetvā nikkaḍḍhissantī’’ti sabhayo upasaṅkamati, visārado hutvā kathetuṃ na sakkoti. Ekacco pana dussīlopi dappito viya carati, sopi ajjhāsayena maṅku hotiyeva.
සම්‌මූළ්‌හො කාලං කරොතීති තස්‌ස හි මරණමඤ්‌චෙ නිපන්‌නස්‌ස දුස්‌සීලකම්‌මං සමාදාය වත්‌තිතට්‌ඨානං ආපාථං ආගච්‌ඡති. සො උම්‌මීලෙත්‌වා ඉධලොකං පස්‌සති, නිම්‌මීලෙත්‌වා පරලොකං. තස්‌ස චත්‌තාරො අපායා උපට්‌ඨහන්‌ති, සත්‌තිසතෙන සීසෙ පහරියමානො විය හොති. සො ‘‘වාරෙථ වාරෙථා’’ති විරවන්‌තො මරති. තෙන වුත්‌තං – ‘‘සම්‌මූළ්‌හො කාලං කරොතී’’ති. පඤ්‌චමපදං උත්‌තානමෙව. ආනිසංසකථා වුත්‌තවිපරියායෙන වෙදිතබ්‌බා.
Sammūḷho kālaṃ karotīti tassa hi maraṇamañce nipannassa dussīlakammaṃ samādāya vattitaṭṭhānaṃ āpāthaṃ āgacchati. So ummīletvā idhalokaṃ passati, nimmīletvā paralokaṃ. Tassa cattāro apāyā upaṭṭhahanti, sattisatena sīse pahariyamāno viya hoti. So ‘‘vāretha vārethā’’ti viravanto marati. Tena vuttaṃ – ‘‘sammūḷho kālaṃ karotī’’ti. Pañcamapadaṃ uttānameva. Ānisaṃsakathā vuttavipariyāyena veditabbā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 3. සීලසුත්‌තං • 3. Sīlasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 3-10. සීලසුත්‌තාදිවණ්‌ණනා • 3-10. Sīlasuttādivaṇṇanā
