| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༢. སཱིལསུཏྟཝཎྞནཱ
2. Sīlasuttavaṇṇanā
༡༢. དུཏིཡེ སམྤནྣསཱིལཱཏི ཨེཏྠ ཏིཝིདྷཾ སམྤནྣཾ པརིཔུཎྞསམངྒིམདྷུརཝསེན། ཏཏྠ –
12. Dutiye sampannasīlāti ettha tividhaṃ sampannaṃ paripuṇṇasamaṅgimadhuravasena. Tattha –
‘‘སམྤནྣཾ སཱལིཀེདཱརཾ, སུཝཱ བྷུཉྫནྟི ཀོསིཡ།
‘‘Sampannaṃ sālikedāraṃ, suvā bhuñjanti kosiya;
པཊིཝེདེམི ཏེ བྲཧྨེ, ན ནེ ཝཱརེཏུམུསྶཧེ’’ཏི༎ (ཛཱ॰ ༡.༡༤.༡) –
Paṭivedemi te brahme, na ne vāretumussahe’’ti. (jā. 1.14.1) –
ཨིདཾ པརིཔུཎྞསམྤནྣཾ ནཱམ། ‘‘ཨིམིནཱ པཱཏིམོཀྑསཾཝརེན ཨུཔེཏོ ཧོཏི སམུཔེཏོ ཨུཔཱགཏོ སམུཔཱགཏོ ཨུཔཔནྣོ སམྤནྣོ སམནྣཱགཏོ’’ཏི (ཝིབྷ॰ ༥༡༡) ཨིདཾ སམངྒིསམྤནྣཾ ནཱམ། ‘‘ཨིམིསྶཱ, བྷནྟེ, མཧཱཔཐཝིཡཱ ཧེཊྛིམཏལཾ སམྤནྣཾ, སེཡྻཐཱཔི ཁུདྡམདྷུཾ ཨནཱིལཀཾ, ཨེཝམསྶཱད’’ནྟི (པཱརཱ॰ ༡༧) ཨིདཾ མདྷུརསམྤནྣཾ ནཱམ། ཨིདྷ པརིཔུཎྞསམྤནྣཝསེན ཨཏྠཾ དསྶེནྟོ ‘‘སམྤནྣསཱིལཱཏི པརིཔུཎྞསཱིལཱ’’ཏི ཨཱཧ། སམངྒིསམྤནྣཝསེནཔི ཨཏྠོ ཡུཛྫཏིཡེཝ, ཏསྨཱ སམྤནྣསཱིལཱཏི པརིཔུཎྞསཱིལཱ ཧུཏྭཱཏིཔི སཱིལསམངྒིནོ ཧུཏྭཱཏིཔི ཨེཝམེཏྠ ཨཏྠོ དཊྛབྦོ། ཏཏྠ སཱིལསྶ ཨནཝསེསསམཱདཱནེན ཨཁཎྜཱདིབྷཱཝཔྤཏྟིཡཱ པརིཔུཎྞསཱིལཱ, སམཱདཱནཏོ པཊྛཱཡ ཨཝིཙྪིནྡནཏོ སཱིལསམངྒིནོ། སམཱདཱནཝཏོ ཧི ཨཙྩནྟཝིརོདྷིདྷམྨཱནུཔྤཏྟིཡཱ སཱིལསམངྒིཏཱ ཝེདིཏབྦཱ, ཙེཏནཱདཱིནཾ པན སཱིལནལཀྑཎཱནཾ དྷམྨཱནཾ པཝཏྟིལཀྑཎེན ཝཏྟབྦམེཝ ནཏྠི།
Idaṃ paripuṇṇasampannaṃ nāma. ‘‘Iminā pātimokkhasaṃvarena upeto hoti samupeto upāgato samupāgato upapanno sampanno samannāgato’’ti (vibha. 511) idaṃ samaṅgisampannaṃ nāma. ‘‘Imissā, bhante, mahāpathaviyā heṭṭhimatalaṃ sampannaṃ, seyyathāpi khuddamadhuṃ anīlakaṃ, evamassāda’’nti (pārā. 17) idaṃ madhurasampannaṃ nāma. Idha paripuṇṇasampannavasena atthaṃ dassento ‘‘sampannasīlāti paripuṇṇasīlā’’ti āha. Samaṅgisampannavasenapi attho yujjatiyeva, tasmā sampannasīlāti paripuṇṇasīlā hutvātipi sīlasamaṅgino hutvātipi evamettha attho daṭṭhabbo. Tattha sīlassa anavasesasamādānena akhaṇḍādibhāvappattiyā paripuṇṇasīlā, samādānato paṭṭhāya avicchindanato sīlasamaṅgino. Samādānavato hi accantavirodhidhammānuppattiyā sīlasamaṅgitā veditabbā, cetanādīnaṃ pana sīlanalakkhaṇānaṃ dhammānaṃ pavattilakkhaṇena vattabbameva natthi.
ཏཏྠ ‘‘པརིཔུཎྞསཱིལཱ’’ཏི ཨིམིནཱ ཨཏྠེན ཁེཏྟདོསཝིགམེན ཁེཏྟཔཱརིཔཱུརཱི ཝིཡ སཱིལདོསཝིགམེན སཱིལཔཱརིཔཱུརཱི ཝུཏྟཱ ཧོཏི། ཡཐཱ ཧི ཁེཏྟཾ བཱིཛཁཎྜཾ, ཝཔྤཁཎྜཾ, ཨུདཀཁཎྜཾ, ཨཱུསཁཎྜནྟི ཙཏུདོསསམནྣཱགཏཾ ཨཔརིཔཱུརཾ ཧོཏི། ཏཏྠ བཱིཛཁཎྜཾ ནཱམ ཡཏྠ ཨནྟརནྟརཱ བཱིཛཱནི ཁཎྜཱནི ཝཱ པཱུཏཱིནི ཝཱ ཧོནྟི, ཏཱནི ཡཏྠ པཏནྟི, ཏཏྠ སསྶཾ ན ཨུཊྛེཏི, ཁེཏྟཾ ཁཎྜཾ ཧོཏི, ཨཔརིཔཱུརཾ ཧོཏཱིཏི ཨཏྠོ། ཝཔྤཁཎྜཾ ནཱམ ཡཏྠ ཨཀུསལོ བཱིཛཱནི ཝཔནྟོ ཨནྟརནྟརཱ ནིཔཱཏེཏི། ཨེཝཉྷི སབྦཏྠ སསྶཾ ན ཨུཊྛེཏི, ཁེཏྟཾ ཁཎྜཾ ཧོཏི། ཨུདཀཁཎྜཾ ནཱམ ཡཏྠ ཀཏྠཙི ཨུདཀཾ ཨཏིབཧུཾ ཝཱ ཧོཏི, ན ཝཱ ཧོཏི། ཏཏྲཱཔི ཧི སསྶཱནི ན ཨུཊྛེནྟི, ཁེཏྟཾ ཁཎྜཾ ཧོཏི། ཨཱུསཁཎྜཾ ནཱམ ཡཏྠ ཀསྶཀོ ཀིསྨིཉྩི པདེསེ ནངྒལེན བྷཱུམིཾ ཙཏྟཱརོ པཉྩ ཝཱརེ ཀསནྟོ ཨཏིགམྦྷཱིརཾ ཀརོཏི, ཏཏོ ཨཱུསཾ ཨུཔྤཛྫཏི། ཏཏྲཱཔི ཧི སསྶཾ ན ཨུཊྛེཏི, ཁེཏྟཾ ཁཎྜཾ ཧོཏི, ཏཱདིསཉྩ ཁེཏྟཾ ན མཧཔྥལཾ ཧོཏི ན མཧཱནིསཾསཾ། ཏཏྲཱཔི བཧུམྤི ཝཔིཏྭཱ ཨཔྤཾ ལབྷཏི། ཨིམེསཾ པན ཙཏུནྣཾ དོསཱནཾ ཝིགམཱ ཁེཏྟཾ པརིཔུཎྞཾ ཧོཏི, ཏཱདིསཉྩ ཁེཏྟཾ མཧཔྥལཾ ཧོཏི མཧཱནིསཾསཾ། ཨེཝམེཝ ཁཎྜཾ, ཚིདྡཾ, སབལཾ, ཀམྨཱསནྟི ཙཏུདོསསམནྣཱགཏཾ སཱིལཾ ཨཔརིཔཱུརཾ ཧོཏི, ཏཱདིསཉྩ སཱིལཾ ན མཧཔྥལཾ ཧོཏི ན མཧཱནིསཾསཾ། ཨིམེསཾ པན ཙཏུནྣཾ དོསཱནཾ ཝིགམཱ སཱིལཾ པརིཔུཎྞཾ ཧོཏི, ཏཱདིསཉྩ སཱིལཾ མཧཔྥལཾ ཧོཏི མཧཱནིསཾསཾ།
Tattha ‘‘paripuṇṇasīlā’’ti iminā atthena khettadosavigamena khettapāripūrī viya sīladosavigamena sīlapāripūrī vuttā hoti. Yathā hi khettaṃ bījakhaṇḍaṃ, vappakhaṇḍaṃ, udakakhaṇḍaṃ, ūsakhaṇḍanti catudosasamannāgataṃ aparipūraṃ hoti. Tattha bījakhaṇḍaṃ nāma yattha antarantarā bījāni khaṇḍāni vā pūtīni vā honti, tāni yattha patanti, tattha sassaṃ na uṭṭheti, khettaṃ khaṇḍaṃ hoti, aparipūraṃ hotīti attho. Vappakhaṇḍaṃ nāma yattha akusalo bījāni vapanto antarantarā nipāteti. Evañhi sabbattha sassaṃ na uṭṭheti, khettaṃ khaṇḍaṃ hoti. Udakakhaṇḍaṃ nāma yattha katthaci udakaṃ atibahuṃ vā hoti, na vā hoti. Tatrāpi hi sassāni na uṭṭhenti, khettaṃ khaṇḍaṃ hoti. Ūsakhaṇḍaṃ nāma yattha kassako kismiñci padese naṅgalena bhūmiṃ cattāro pañca vāre kasanto atigambhīraṃ karoti, tato ūsaṃ uppajjati. Tatrāpi hi sassaṃ na uṭṭheti, khettaṃ khaṇḍaṃ hoti, tādisañca khettaṃ na mahapphalaṃ hoti na mahānisaṃsaṃ. Tatrāpi bahumpi vapitvā appaṃ labhati. Imesaṃ pana catunnaṃ dosānaṃ vigamā khettaṃ paripuṇṇaṃ hoti, tādisañca khettaṃ mahapphalaṃ hoti mahānisaṃsaṃ. Evameva khaṇḍaṃ, chiddaṃ, sabalaṃ, kammāsanti catudosasamannāgataṃ sīlaṃ aparipūraṃ hoti, tādisañca sīlaṃ na mahapphalaṃ hoti na mahānisaṃsaṃ. Imesaṃ pana catunnaṃ dosānaṃ vigamā sīlaṃ paripuṇṇaṃ hoti, tādisañca sīlaṃ mahapphalaṃ hoti mahānisaṃsaṃ.
‘‘སཱིལསམངྒིནོ’’ཏི ཨིམིནཱ པནཏྠེན སཱིལེན སམངྒིབྷཱུཏཱ སམོདྷཱནགཏཱ སམནྣཱགཏཱ ཧུཏྭཱ ཝིཧརཐཱཏི ཨིདམེཝ ཝུཏྟཾ ཧོཏི། ཏཏྠ དྭཱིཧི ཀཱརཎེཧི སམྤནྣསཱིལཏཱ ཧོཏི སཱིལཝིཔཏྟིཡཱ ཨཱདཱིནཝདསྶནེན, སཱིལསམྤཏྟིཡཱ ཙ ཨཱནིསཾསདསྶནེན། ཏདུབྷཡམྤི ཝིསུདྡྷིམགྒེ (ཝིསུདྡྷི॰ ༡.༡༤) ཝིཏྠཱརིཏཾ ། ཏཏྠ ‘‘སམྤནྣསཱིལཱཏི ཨེཏྟཱཝཏཱ ཙ ཀིར བྷགཝཱ ཙཏུཔཱརིསུདྡྷིསཱིལཾ ཨུདྡིསིཏྭཱ ‘པཱཏིམོཀྑསཾཝརསཾཝུཏཱ’ཏི ཨིམིནཱ ཏཏྠ ཛེཊྛཀསཱིལཾ ཝིཏྠཱརེཏྭཱ དསྶེཏཱི’’ཏི དིཝཱཝིཧཱརཝཱསཱི སུམཏྠེརོ ཨཱཧ། ཨནྟེཝཱསིཀོ པནསྶ ཏེཔིཊཀཙཱུལ༹ནཱགཏྠེརོ ཨཱཧ – ‘‘ཨུབྷཡཏྠཱཔི པཱཏིམོཀྑསཾཝརོ བྷགཝཏཱ ཝུཏྟོ, པཱཏིམོཀྑསཾཝརོཡེཝ ཧི སཱིལཾ, ཨིཏརཱནི པན ཏཱིཎི སཱིལནྟི ཝུཏྟཊྛཱནཾ ནཱམ ཨཏྠཱི’’ཏི ཝཏྭཱ ཏཾ ཨནནུཛཱནནྟོ ཨཱཧ – ‘‘ཨིནྡྲིཡསཾཝརོ ནཱམ ཚདྭཱརརཀྑཱམཏྟཀམེཝ, ཨཱཛཱིཝཔཱརིསུདྡྷི དྷམྨེན སམེན པཙྩཡུཔྤཏྟིམཏྟཀཾ, པཙྩཡནིསྶིཏཾ པཊིལདྡྷཔཙྩཡེ ཨིདམཏྠནྟི པཙྩཝེཀྑིཏྭཱ པརིབྷུཉྫནམཏྟཀཾ། ནིཔྤརིཡཱཡེན པཱཏིམོཀྑསཾཝརོཝ སཱིལཾ། ཡསྶ སོ བྷིནྣོ, ཨཡཾ ཚིནྣསཱིསོ ཝིཡ པུརིསོ ཧཏྠཔཱདེ, སེསཱནི རཀྑིསྶཏཱིཏི ན ཝཏྟབྦོ། ཡསྶ པན སོ ཨརོགོ, ཨཡཾ ཨཙྪིནྣསཱིསོ ཝིཡ པུརིསོ ཛཱིཝིཏཾ, སེསཱནི པུན པཱཀཏིཀཱནི ཀཏྭཱ རཀྑིཏུཾ སཀྐོཏི། ཏསྨཱ ‘སམྤནྣསཱིལཱ’ཏི ཨིམིནཱ པཱཏིམོཀྑསཾཝརཾ ཨུདྡིསིཏྭཱ ‘སམྤནྣཔཱཏིམོཀྑཱ’ཏི ཏསྶེཝ ཝེཝཙནཾ ཝཏྭཱ ཏཾ ཝིཏྠཱརེཏྭཱ དསྶེནྟོ ‘པཱཏིམོཀྑསཾཝརསཾཝུཏཱ’ཏིཨཱདིམཱཧཱ’’ཏི།
‘‘Sīlasamaṅgino’’ti iminā panatthena sīlena samaṅgibhūtā samodhānagatā samannāgatā hutvā viharathāti idameva vuttaṃ hoti. Tattha dvīhi kāraṇehi sampannasīlatā hoti sīlavipattiyā ādīnavadassanena, sīlasampattiyā ca ānisaṃsadassanena. Tadubhayampi visuddhimagge (visuddhi. 1.14) vitthāritaṃ . Tattha ‘‘sampannasīlāti ettāvatā ca kira bhagavā catupārisuddhisīlaṃ uddisitvā ‘pātimokkhasaṃvarasaṃvutā’ti iminā tattha jeṭṭhakasīlaṃ vitthāretvā dassetī’’ti divāvihāravāsī sumatthero āha. Antevāsiko panassa tepiṭakacūḷanāgatthero āha – ‘‘ubhayatthāpi pātimokkhasaṃvaro bhagavatā vutto, pātimokkhasaṃvaroyeva hi sīlaṃ, itarāni pana tīṇi sīlanti vuttaṭṭhānaṃ nāma atthī’’ti vatvā taṃ ananujānanto āha – ‘‘indriyasaṃvaro nāma chadvārarakkhāmattakameva, ājīvapārisuddhi dhammena samena paccayuppattimattakaṃ, paccayanissitaṃ paṭiladdhapaccaye idamatthanti paccavekkhitvā paribhuñjanamattakaṃ. Nippariyāyena pātimokkhasaṃvarova sīlaṃ. Yassa so bhinno, ayaṃ chinnasīso viya puriso hatthapāde, sesāni rakkhissatīti na vattabbo. Yassa pana so arogo, ayaṃ acchinnasīso viya puriso jīvitaṃ, sesāni puna pākatikāni katvā rakkhituṃ sakkoti. Tasmā ‘sampannasīlā’ti iminā pātimokkhasaṃvaraṃ uddisitvā ‘sampannapātimokkhā’ti tasseva vevacanaṃ vatvā taṃ vitthāretvā dassento ‘pātimokkhasaṃvarasaṃvutā’tiādimāhā’’ti.
པཱཏིམོཀྑསཾཝརསཱིལེན སཾཝུཏཱཏི ཡོ ནཾ པཱཏི རཀྑཏི, ཏཾ མོཀྑེཏི མོཙེཏི ཨཱཔཱཡིཀཱདཱིཧི དུཀྑེཧཱིཏི པཱཏིམོཀྑནྟི ལདྡྷནཱམེན སིཀྑཱཔདསཱིལེན པིཧིཏཀཱཡཝཙཱིདྭཱརཱ། ཨེཝཾབྷཱུཏཱ ཙ ཏེན ཨུཔེཏཱ སམནྣཱགཏཱ ནཱམ ཧོནྟཱིཏི ཨཱཧ ‘‘ཨུཔེཏཱ ཧུཏྭཱ’’ཏི། ཨཱཙཱརེན ཙ གོཙརེན ཙ སམྤནྣཱཏི ཀཱཡིཀཝཱཙསིཀཨཝཱིཏིཀྐམསངྑཱཏེན ཨཱཙཱརེན, ན-ཝེསིཡགོཙརཏཱདིསངྑཱཏེན གོཙརེན ཙ སམྤནྣཱ, སམྤནྣཨཱཙཱརགོཙརཱཏི ཨཏྠོ། ཨཎུཔྤམཱཎེསཱུཏི ཨཏིཔརིཏྟཀེསུ ཨནཱཔཏྟིགམནཱིཡེསུ། དུཀྐཊདུབྦྷཱསིཏམཏྟེསཱུཏི ཨཔརེ། དོསེསཱུཏི གཱརཡ྄ཧེསུ ཨཀུསལདྷམྨེསུ། བྷཡཏོ དསྶནསཱིལཱཏི པརམཱཎུམཏྟམྤི ཝཛྫཾ སིནེརུཔྤམཱཎཾ ཝིཡ ཀཏྭཱ བྷཱཡནསཱིལཱ། སབྦསིཀྑཱཀོཊྛཱསེསཱུཏི མཱུལཔཉྙཏྟིཨནུཔཉྙཏྟིསབྦཏྠཔཉྙཏྟིཔདེསཔཉྙཏྟིཨཱདིབྷེདེསུ། ཏཾ ཏཾ སམཱདཱཏབྦཾ སམཱདཱཡཱཏི ཡཾ ཀིཉྩི སིཀྑཱཀོཊྛཱསེསུ མཱུལཔཉྙཏྟིཨཱདིབྷེདེསུ སིཀྑིཏབྦཾ པཊིཔཛྫིཏབྦཾ པཱུརིཏབྦཾ ཀཱཡིཀཾ ཝཱཙསིཀཾ ཝཱ སཱིལཾ, ཏཾ སབྦཾ སམྨཱ ཨཱདཱཡ, སམྨདེཝ སཀྐཙྩཾ སབྦསོ ཙ ཨཱདིཡིཏྭཱཏི ཨཏྠོ།
Pātimokkhasaṃvarasīlena saṃvutāti yo naṃ pāti rakkhati, taṃ mokkheti moceti āpāyikādīhi dukkhehīti pātimokkhanti laddhanāmena sikkhāpadasīlena pihitakāyavacīdvārā. Evaṃbhūtā ca tena upetā samannāgatā nāma hontīti āha ‘‘upetā hutvā’’ti. Ācārena ca gocarena ca sampannāti kāyikavācasikaavītikkamasaṅkhātena ācārena, na-vesiyagocaratādisaṅkhātena gocarena ca sampannā, sampannaācāragocarāti attho. Aṇuppamāṇesūti atiparittakesu anāpattigamanīyesu. Dukkaṭadubbhāsitamattesūti apare. Dosesūti gārayhesu akusaladhammesu. Bhayato dassanasīlāti paramāṇumattampi vajjaṃ sineruppamāṇaṃ viya katvā bhāyanasīlā. Sabbasikkhākoṭṭhāsesūti mūlapaññattianupaññattisabbatthapaññattipadesapaññattiādibhedesu. Taṃ taṃ samādātabbaṃ samādāyāti yaṃ kiñci sikkhākoṭṭhāsesu mūlapaññattiādibhedesu sikkhitabbaṃ paṭipajjitabbaṃ pūritabbaṃ kāyikaṃ vācasikaṃ vā sīlaṃ, taṃ sabbaṃ sammā ādāya, sammadeva sakkaccaṃ sabbaso ca ādiyitvāti attho.
ཨུདཡཾ པསྶནྟོ པཉྩཝཱིསཏི ལཀྑཎཱནི པསྶཏཱིཏི ‘‘ཨཝིཛྫཱསམུདཡཱ རཱུཔསམུདཡོཏི པཙྩཡསམུདཡཊྛེན རཱུཔཀྑནྡྷསྶ ཨུདཡཾ པསྶཏི། ཏཎྷཱསམུདཡཱ…པེ॰… ཀམྨསམུདཡཱ…པེ॰… ཨཱཧཱརསམུདཡཱ རཱུཔསམུདཡོཏི པཙྩཡསམུདཡཊྛེན རཱུཔཀྑནྡྷསྶ ཨུདཡཾ པསྶཏི། ནིབྦཏྟིལཀྑཎཾ པསྶནྟོཔི རཱུཔཀྑནྡྷསྶ ཨུདཡཾ པསྶཏི། རཱུཔཀྑནྡྷསྶ ཨུདཡཾ པསྶནྟོ ཨིམཱནི པཉྩ ལཀྑཎཱནི པསྶཏི། ཏཐཱ ཨཝིཛྫཱསམུདཡཱ ཝེདནཱསམུདཡོཏི པཙྩཡསམུདཡཊྛེན ཝེདནཱཀྑནྡྷསྶ ཨུདཡཾ པསྶཏི། ཏཎྷཱསམུདཡཱ…པེ॰… ཀམྨསམུདཡཱ…པེ॰… ཕསྶསམུདཡཱ ཝེདནཱསམུདཡོཏི པཙྩཡསམུདཡཊྛེན ཝེདནཱཀྑནྡྷསྶ ཨུདཡཾ པསྶཏི། ནིབྦཏྟིལཀྑཎཾ པསྶནྟོཔི ཝེདནཱཀྑནྡྷསྶ ཨུདཡཾ པསྶཏི། ཝེདནཱཀྑནྡྷསྶ ཨུདཡཾ པསྶནྟོ ཨིམཱནི པཉྩ ལཀྑཎཱནི པསྶཏཱི’’ཏིཨཱདིནཱ ནཡེན ཨེཀེཀསྨིཾ ཁནྡྷེ པཉྩ པཉྩ ཀཏྭཱ ཝུཏྟཱནི པཉྩཝཱིསཏི ཨུདཡལཀྑཎཱནི པསྶཏི།
Udayaṃ passanto pañcavīsati lakkhaṇāni passatīti ‘‘avijjāsamudayā rūpasamudayoti paccayasamudayaṭṭhena rūpakkhandhassa udayaṃ passati. Taṇhāsamudayā…pe… kammasamudayā…pe… āhārasamudayā rūpasamudayoti paccayasamudayaṭṭhena rūpakkhandhassa udayaṃ passati. Nibbattilakkhaṇaṃ passantopi rūpakkhandhassa udayaṃ passati. Rūpakkhandhassa udayaṃ passanto imāni pañca lakkhaṇāni passati. Tathā avijjāsamudayā vedanāsamudayoti paccayasamudayaṭṭhena vedanākkhandhassa udayaṃ passati. Taṇhāsamudayā…pe… kammasamudayā…pe… phassasamudayā vedanāsamudayoti paccayasamudayaṭṭhena vedanākkhandhassa udayaṃ passati. Nibbattilakkhaṇaṃ passantopi vedanākkhandhassa udayaṃ passati. Vedanākkhandhassa udayaṃ passanto imāni pañca lakkhaṇāni passatī’’tiādinā nayena ekekasmiṃ khandhe pañca pañca katvā vuttāni pañcavīsati udayalakkhaṇāni passati.
ཝཡཾ པསྶནྟོ པཉྩཝཱིསཏི ལཀྑཎཱནི པསྶཏཱིཏི ‘‘ཨཝིཛྫཱནིརོདྷཱ རཱུཔནིརོདྷོཏི པཙྩཡནིརོདྷཊྛེན རཱུཔཀྑནྡྷསྶ ཝཡཾ པསྶཏི། ཏཎྷཱནིརོདྷཱ…པེ॰… ཀམྨནིརོདྷཱ…པེ॰… ཨཱཧཱརནིརོདྷཱ རཱུཔནིརོདྷོཏི པཙྩཡནིརོདྷཊྛེན རཱུཔཀྑནྡྷསྶ ཝཡཾ པསྶཏི། ཝིཔརིཎཱམལཀྑཎཾ པསྶནྟོཔི རཱུཔཀྑནྡྷསྶ ཝཡཾ པསྶཏི། རཱུཔཀྑནྡྷསྶ ཝཡཾ པསྶནྟོ ཨིམཱནི པཉྩ ལཀྑཎཱནི པསྶཏི། ཨཝིཛྫཱནིརོདྷཱ…པེ॰… ཏཎྷཱནིརོདྷཱ…པེ॰… ཕསྶནིརོདྷཱ ཝེདནཱནིརོདྷོཏི པཙྩཡནིརོདྷཊྛེན ཝེདནཱཀྑནྡྷསྶ ཝཡཾ པསྶཏི། ཝིཔརིཎཱམལཀྑཎཾ པསྶནྟོཔི ཝེདནཱཀྑནྡྷསྶ ཝཡཾ པསྶཏཱི། ཝེདནཱཀྑནྡྷསྶ ཝཡཾ པསྶནྟོ ཨིམཱནི པཉྩ ལཀྑཎཱནི པསྶཏི’’ཏིཨཱདིནཱ ནཡེན ཨེཀེཀསྨིཾ ཁནྡྷེ པཉྩ པཉྩ ཀཏྭཱ ཝུཏྟཱནི པཉྩཝཱིསཏི ཝཡལཀྑཎཱནི པསྶཏི། པེསིཏཏྟོཏི ནིབྦཱནཾ པཏི པེསིཏཙིཏྟོ། ཀཐཡནྟཱིཏི ཏཐཱཝིདྷཾ བྷིཀྑུཾ བུདྡྷཱདཡོ ཨརིཡཱ ཨཱཙིཀྑནྟི།
Vayaṃ passanto pañcavīsati lakkhaṇāni passatīti ‘‘avijjānirodhā rūpanirodhoti paccayanirodhaṭṭhena rūpakkhandhassa vayaṃ passati. Taṇhānirodhā…pe… kammanirodhā…pe… āhāranirodhā rūpanirodhoti paccayanirodhaṭṭhena rūpakkhandhassa vayaṃ passati. Vipariṇāmalakkhaṇaṃ passantopi rūpakkhandhassa vayaṃ passati. Rūpakkhandhassa vayaṃ passanto imāni pañca lakkhaṇāni passati. Avijjānirodhā…pe… taṇhānirodhā…pe… phassanirodhā vedanānirodhoti paccayanirodhaṭṭhena vedanākkhandhassa vayaṃ passati. Vipariṇāmalakkhaṇaṃ passantopi vedanākkhandhassa vayaṃ passatī. Vedanākkhandhassa vayaṃ passanto imāni pañca lakkhaṇāni passati’’tiādinā nayena ekekasmiṃ khandhe pañca pañca katvā vuttāni pañcavīsati vayalakkhaṇāni passati. Pesitattoti nibbānaṃ pati pesitacitto. Kathayantīti tathāvidhaṃ bhikkhuṃ buddhādayo ariyā ācikkhanti.
ཡཏཾ ཙརེཏི ཝཱཡམམཱནོ ཙརེཡྻ, ཙངྐམནཱདིཝསེན གམནཾ ཀཔྤེནྟོཔི ‘‘ཨནུཔྤནྣཱནཾ པཱཔཀཱནཾ ཨཀུསལཱནཾ དྷམྨཱནཾ ཨནུཔྤཱདཱཡ ཚནྡཾ ཛནེཏི ཝཱཡམཏཱི’’ཏིཨཱདིནཱ (ཝིབྷ॰ ༤༣༢) ནཡེན ཝུཏྟཔྤདྷཱནཝཱིརིཡཾ ཀརོནྟོ གྷཊེནྟོ ཝཱཡམནྟོ ཡཐཱ ཨཀུསལདྷམྨཱ པཧཱིཡནྟི, ཀུསལདྷམྨཱ བྷཱཝནཱཔཱརིཔཱུརིཾ གཙྪནྟི, ཨེཝཾ གམནཾ ཀཔྤེཡྻཱཏི ཨཏྠོ། ཨེས ནཡོ སེསེསུཔི། ཡཏམེནཾ པསཱརཡེཏི ཨེཏཾ པསཱརེཏབྦཾ ཧཏྠཔཱདཱདིཾ ཡཏཾ ཡཏམཱནོ ཡཐཱཝུཏྟཝཱིརིཡསམངྒཱི ཧུཏྭཱ པསཱརེཡྻ, སབྦཏྠ པདྷཱནཾ ན ཛཧེཡྻཱཏི ཨདྷིཔྤཱཡོ།
Yataṃcareti vāyamamāno careyya, caṅkamanādivasena gamanaṃ kappentopi ‘‘anuppannānaṃ pāpakānaṃ akusalānaṃ dhammānaṃ anuppādāya chandaṃ janeti vāyamatī’’tiādinā (vibha. 432) nayena vuttappadhānavīriyaṃ karonto ghaṭento vāyamanto yathā akusaladhammā pahīyanti, kusaladhammā bhāvanāpāripūriṃ gacchanti, evaṃ gamanaṃ kappeyyāti attho. Esa nayo sesesupi. Yatamenaṃ pasārayeti etaṃ pasāretabbaṃ hatthapādādiṃ yataṃ yatamāno yathāvuttavīriyasamaṅgī hutvā pasāreyya, sabbattha padhānaṃ na jaheyyāti adhippāyo.
ཨིདཱནི ཡཐཱ པཊིཔཛྫནྟོ ཡཏཾ ཡཏནྟོ ནཱམ ཧོཏི, ཏཾ པཊིཔདཾ དསྶེཏུཾ ‘‘ཨུདྡྷ’’ནྟིཨཱདི ཝུཏྟཾ། ཏཏྠ ཨུདྡྷནྟི ཨུཔརི། ཏིརིཡནྟི པརིཏོ, པུརཏྠིམདིསཱདིཝསེན སམནྟཏོ དིསཱབྷཱགེསཱུཏི ཨཏྠོ། ཨཔཱཙཱིནནྟི ཧེཊྛཱ། ཡཱཝཏཱ ཛགཏོ གཏཱིཏི ཡཏྟཀཱ སཏྟསངྑཱརབྷེདསྶ ལོཀསྶ པཝཏྟི, ཏཏྠ སབྦཏྠཱཏི ཨཏྠོ། ཨེཏྟཱཝཏཱ ཨནཝསེསཏཱ སམྨསནཉཱཎསྶ ཝིསཡཾ སངྒཧེཏྭཱ དསྶེཏི། སམཝེཀྑིཏཱཏི སམཱ ཧེཏུནཱ ཉཱཡེན ཨཝེཀྑིཏཱ, ཨནིཙྩཱདིཝསེན ཝིཔསྶིཏཱཏི ཝུཏྟཾ ཧོཏི། དྷམྨཱནནྟི སཏྟསུཉྙཱནཾ། ཁནྡྷཱནནྟི རཱུཔཱདཱིནཾ པཉྩནྣཾ ཁནྡྷཱནཾ། ཨུདཡབྦཡནྟི ཨུདཡཉྩ ཝཡཉྩ། ཨིདཾ ཝུཏྟཾ ཧོཏི – ཨུཔརི ཏིརིཡཾ ཨདྷོཏི ཏིདྷཱ སངྒཧིཏེ སབྦསྨིཾ ལོཀེ ཨཏཱིཏཱདིབྷེདབྷིནྣཱནཾ པཉྩུཔཱདཱནཀྑནྡྷསངྑཱཏཱནཾ སབྦེསཾ རཱུཔཱརཱུཔདྷམྨཱནཾ ཨནིཙྩཱདིསམྨསནཱདྷིགཏེན ཨུདཡབྦཡཉཱཎེན པཉྩཝཱིསཏིཡཱ ཨཱཀཱརེཧི ཨུདཡཾ, པཉྩཝཱིསཏིཡཱ ཨཱཀཱརེཧི ཝཡཾ སམཝེཀྑིཏཱ སམནུཔསྶིཏཱ བྷཝེཡྻཱཏི།
Idāni yathā paṭipajjanto yataṃ yatanto nāma hoti, taṃ paṭipadaṃ dassetuṃ ‘‘uddha’’ntiādi vuttaṃ. Tattha uddhanti upari. Tiriyanti parito, puratthimadisādivasena samantato disābhāgesūti attho. Apācīnanti heṭṭhā. Yāvatā jagato gatīti yattakā sattasaṅkhārabhedassa lokassa pavatti, tattha sabbatthāti attho. Ettāvatā anavasesatā sammasanañāṇassa visayaṃ saṅgahetvā dasseti. Samavekkhitāti samā hetunā ñāyena avekkhitā, aniccādivasena vipassitāti vuttaṃ hoti. Dhammānanti sattasuññānaṃ. Khandhānanti rūpādīnaṃ pañcannaṃ khandhānaṃ. Udayabbayanti udayañca vayañca. Idaṃ vuttaṃ hoti – upari tiriyaṃ adhoti tidhā saṅgahite sabbasmiṃ loke atītādibhedabhinnānaṃ pañcupādānakkhandhasaṅkhātānaṃ sabbesaṃ rūpārūpadhammānaṃ aniccādisammasanādhigatena udayabbayañāṇena pañcavīsatiyā ākārehi udayaṃ, pañcavīsatiyā ākārehi vayaṃ samavekkhitā samanupassitā bhaveyyāti.
ཙེཏོསམཐསཱམཱིཙིནྟི ཙིཏྟསཾཀིལེསཱནཾ ཨཙྩནྟཝཱུཔསམནཏོ ཙེཏོསམཐསངྑཱཏསྶ ཨརིཡམགྒསྶ ཨནུཙྪཝིཀཾ པཊིཔདཱཉཱཎདསྶནཝིསུདྡྷིཾ། སིཀྑམཱནནྟི པཊིཔཛྫམཱནཾ བྷཱཝེནྟཾ ཉཱཎཔརམྤརཱ ནིབྦཏྟེནྟཾ། སདཱཏི སབྦཀཱལཾ རཏྟིཉྩེཝ དིཝཱ ཙ། སཏནྟི ཙཏུསམྤཛཉྙསམནྣཱགཏཱཡ སཏིཡཱ སཏོཀཱརཱི། ཨེཝམྤེཏྠ གཱཐཱཝཎྞནཱ དཊྛབྦཱ། སེསམེཏྠ སུཝིཉྙེཡྻམེཝ།
Cetosamathasāmīcinti cittasaṃkilesānaṃ accantavūpasamanato cetosamathasaṅkhātassa ariyamaggassa anucchavikaṃ paṭipadāñāṇadassanavisuddhiṃ. Sikkhamānanti paṭipajjamānaṃ bhāventaṃ ñāṇaparamparā nibbattentaṃ. Sadāti sabbakālaṃ rattiñceva divā ca. Satanti catusampajaññasamannāgatāya satiyā satokārī. Evampettha gāthāvaṇṇanā daṭṭhabbā. Sesamettha suviññeyyameva.
སཱིལསུཏྟཝཎྞནཱ ནིཊྛིཏཱ།
Sīlasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༢. སཱིལསུཏྟཾ • 2. Sīlasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༢. སཱིལསུཏྟཝཎྞནཱ • 2. Sīlasuttavaṇṇanā
