| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੨. ਸੀਲਸੁਤ੍ਤવਣ੍ਣਨਾ
2. Sīlasuttavaṇṇanā
੧੨. ਦੁਤਿਯੇ ਸਮ੍ਪਨ੍ਨਸੀਲਾਤਿ ਪਰਿਪੁਣ੍ਣਸੀਲਾ। ਸਮ੍ਪਨ੍ਨਪਾਤਿਮੋਕ੍ਖਾਤਿ ਪਰਿਪੁਣ੍ਣਪਾਤਿਮੋਕ੍ਖਾ। ਪਾਤਿਮੋਕ੍ਖਸਂવਰਸਂવੁਤਾਤਿ ਪਾਤਿਮੋਕ੍ਖਸਂવਰਸੀਲੇਨ ਸਂવੁਤਾ ਪਿਹਿਤਾ ਉਪੇਤਾ ਹੁਤ੍વਾ વਿਹਰਥ। ਆਚਾਰਗੋਚਰਸਮ੍ਪਨ੍ਨਾਤਿ ਆਚਾਰੇਨ ਚ ਗੋਚਰੇਨ ਚ ਸਮ੍ਪਨ੍ਨਾ ਸਮੁਪਾਗਤਾ ਭવਥ। ਅਣੁਮਤ੍ਤੇਸੁ વਜ੍ਜੇਸੂਤਿ ਅਣੁਪ੍ਪਮਾਣੇਸੁ ਦੋਸੇਸੁ। ਭਯਦਸ੍ਸਾવਿਨੋਤਿ ਤਾਨਿ ਅਣੁਮਤ੍ਤਾਨਿ વਜ੍ਜਾਨਿ ਭਯਤੋ ਦਸ੍ਸਨਸੀਲਾ। ਸਮਾਦਾਯ ਸਿਕ੍ਖਥ ਸਿਕ੍ਖਾਪਦੇਸੂਤਿ ਸਬ੍ਬਸਿਕ੍ਖਾਕੋਟ੍ਠਾਸੇਸੁ ਸਮਾਦਾਤਬ੍ਬਂ ਸਮਾਦਾਯ ਗਹੇਤ੍વਾ ਸਿਕ੍ਖਥ। ‘‘ਸਮ੍ਪਨ੍ਨਸੀਲਾਨਂ…ਪੇ॰… ਸਿਕ੍ਖਾਪਦੇਸੂ’’ਤਿ ਏਤ੍ਤਕੇਨ ਧਮ੍ਮਕ੍ਖਾਨੇਨ ਸਿਕ੍ਖਤ੍ਤਯੇ ਸਮਾਦਾਪੇਤ੍વਾ ਚੇવ ਪਟਿਲਦ੍ਧਗੁਣੇਸੁ ਚ વਣ੍ਣਂ ਕਥੇਤ੍વਾ ਇਦਾਨਿ ਉਤ੍ਤਰਿ ਕਾਤਬ੍ਬਂ ਦਸ੍ਸੇਨ੍ਤੋ ਕਿਮਸ੍ਸਾਤਿਆਦਿਮਾਹ। ਤਤ੍ਥ ਕਿਮਸ੍ਸਾਤਿ ਕਿਂ ਭવੇਯ੍ਯ।
12. Dutiye sampannasīlāti paripuṇṇasīlā. Sampannapātimokkhāti paripuṇṇapātimokkhā. Pātimokkhasaṃvarasaṃvutāti pātimokkhasaṃvarasīlena saṃvutā pihitā upetā hutvā viharatha. Ācāragocarasampannāti ācārena ca gocarena ca sampannā samupāgatā bhavatha. Aṇumattesu vajjesūti aṇuppamāṇesu dosesu. Bhayadassāvinoti tāni aṇumattāni vajjāni bhayato dassanasīlā. Samādāya sikkhatha sikkhāpadesūti sabbasikkhākoṭṭhāsesu samādātabbaṃ samādāya gahetvā sikkhatha. ‘‘Sampannasīlānaṃ…pe… sikkhāpadesū’’ti ettakena dhammakkhānena sikkhattaye samādāpetvā ceva paṭiladdhaguṇesu ca vaṇṇaṃ kathetvā idāni uttari kātabbaṃ dassento kimassātiādimāha. Tattha kimassāti kiṃ bhaveyya.
ਯਤਂ ਚਰੇਤਿ ਯਥਾ ਚਰਨ੍ਤੋ ਯਤੋ ਹੋਤਿ ਸਂਯਤੋ, ਏવਂ ਚਰੇਯ੍ਯ। ਏਸ ਨਯੋ ਸਬ੍ਬਤ੍ਥ। ਅਚ੍ਛੇਤਿ ਨਿਸੀਦੇਯ੍ਯ। ਯਤਮੇਨਂ ਪਸਾਰਯੇਤਿ ਯਂ ਅਙ੍ਗਪਚ੍ਚਙ੍ਗਂ ਪਸਾਰੇਯ੍ਯ, ਤਂ ਯਤਂ ਸਂਯਤਮੇવ ਕਤ੍વਾ ਪਸਾਰੇਯ੍ਯ। ਉਦ੍ਧਨ੍ਤਿ ਉਪਰਿ। ਤਿਰਿਯਨ੍ਤਿ ਮਜ੍ਝਂ। ਅਪਾਚੀਨਨ੍ਤਿ ਅਧੋ। ਏਤ੍ਤਾવਤਾ ਅਤੀਤਾ ਪਚ੍ਚੁਪ੍ਪਨ੍ਨਾ ਅਨਾਗਤਾ ਚ ਪਞ੍ਚਕ੍ਖਨ੍ਧਾ ਕਥਿਤਾ। ਯਾવਤਾਤਿ ਪਰਿਚ੍ਛੇਦવਚਨਂ। ਜਗਤੋ ਗਤੀਤਿ ਲੋਕਸ੍ਸ ਨਿਪ੍ਫਤ੍ਤਿ। ਸਮવੇਕ੍ਖਿਤਾ ਚ ਧਮ੍ਮਾਨਂ, ਖਨ੍ਧਾਨਂ ਉਦਯਬ੍ਬਯਨ੍ਤਿ ਏਤੇਸਂ ਸਬ੍ਬਲੋਕੇ ਅਤੀਤਾਦਿਭੇਦਾਨਂ ਪਞ੍ਚਕ੍ਖਨ੍ਧਧਮ੍ਮਾਨਂ ਉਦਯਞ੍ਚ વਯਞ੍ਚ ਸਮવੇਕ੍ਖਿਤਾ। ‘‘ਪਞ੍ਚਕ੍ਖਨ੍ਧਾਨਂ ਉਦਯਂ ਪਸ੍ਸਨ੍ਤੋ ਪਞ੍ਚવੀਸਤਿ ਲਕ੍ਖਣਾਨਿ ਪਸ੍ਸਤਿ, વਯਂ ਪਸ੍ਸਨ੍ਤੋ ਪਞ੍ਚવੀਸਤਿ ਲਕ੍ਖਣਾਨਿ ਪਸ੍ਸਤੀ’’ਤਿ વੁਤ੍ਤੇਹਿ ਸਮਪਞ੍ਞਾਸਾਯ ਲਕ੍ਖਣੇਹਿ ਸਮ੍ਮਾ ਅવੇਕ੍ਖਿਤਾ ਹੋਤਿ। ਚੇਤੋਸਮਥਸਾਮੀਚਿਨ੍ਤਿ ਚਿਤ੍ਤਸਮਥਸ੍ਸ ਅਨੁਚ੍ਛવਿਕਂ ਪਟਿਪਦਂ। ਸਿਕ੍ਖਮਾਨਨ੍ਤਿ ਪਟਿਪਜ੍ਜਮਾਨਂ, ਪੂਰਯਮਾਨਨ੍ਤਿ ਅਤ੍ਥੋ। ਪਹਿਤਤ੍ਤੋਤਿ ਪੇਸਿਤਤ੍ਤੋ। ਆਹੂਤਿ ਕਥਯਨ੍ਤਿ। ਸੇਸਮੇਤ੍ਥ ਉਤ੍ਤਾਨਮੇવ। ਇਮਸ੍ਮਿਂ ਪਨ ਸੁਤ੍ਤੇ ਸੀਲਂ ਮਿਸ੍ਸਕਂ ਕਥੇਤ੍વਾ ਗਾਥਾਸੁ ਖੀਣਾਸવੋ ਕਥਿਤੋ।
Yataṃ careti yathā caranto yato hoti saṃyato, evaṃ careyya. Esa nayo sabbattha. Accheti nisīdeyya. Yatamenaṃ pasārayeti yaṃ aṅgapaccaṅgaṃ pasāreyya, taṃ yataṃ saṃyatameva katvā pasāreyya. Uddhanti upari. Tiriyanti majjhaṃ. Apācīnanti adho. Ettāvatā atītā paccuppannā anāgatā ca pañcakkhandhā kathitā. Yāvatāti paricchedavacanaṃ. Jagatogatīti lokassa nipphatti. Samavekkhitā ca dhammānaṃ, khandhānaṃ udayabbayanti etesaṃ sabbaloke atītādibhedānaṃ pañcakkhandhadhammānaṃ udayañca vayañca samavekkhitā. ‘‘Pañcakkhandhānaṃ udayaṃ passanto pañcavīsati lakkhaṇāni passati, vayaṃ passanto pañcavīsati lakkhaṇāni passatī’’ti vuttehi samapaññāsāya lakkhaṇehi sammā avekkhitā hoti. Cetosamathasāmīcinti cittasamathassa anucchavikaṃ paṭipadaṃ. Sikkhamānanti paṭipajjamānaṃ, pūrayamānanti attho. Pahitattoti pesitatto. Āhūti kathayanti. Sesamettha uttānameva. Imasmiṃ pana sutte sīlaṃ missakaṃ kathetvā gāthāsu khīṇāsavo kathito.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੨. ਸੀਲਸੁਤ੍ਤਂ • 2. Sīlasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੨. ਸੀਲਸੁਤ੍ਤવਣ੍ਣਨਾ • 2. Sīlasuttavaṇṇanā
