| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੩. ਸੀਲਸੁਤ੍ਤવਣ੍ਣਨਾ
3. Sīlasuttavaṇṇanā
੨੧੩. ਤਤਿਯੇ ਦੁਸ੍ਸੀਲੋਤਿ ਅਸੀਲੋ ਨਿਸ੍ਸੀਲੋ। ਸੀਲવਿਪਨ੍ਨੋਤਿ વਿਪਨ੍ਨਸੀਲੋ ਭਿਨ੍ਨਸਂવਰੋ। ਪਮਾਦਾਧਿਕਰਣਨ੍ਤਿ ਪਮਾਦਕਾਰਣਾ। ਇਦਞ੍ਚ ਸੁਤ੍ਤਂ ਗਹਟ੍ਠਾਨਂ વਸੇਨ ਆਗਤਂ, ਪਬ੍ਬਜਿਤਾਨਮ੍ਪਿ ਪਨ ਲਬ੍ਭਤੇવ । ਗਹਟ੍ਠੋ ਹਿ ਯੇਨ ਯੇਨ ਸਿਪ੍ਪਟ੍ਠਾਨੇਨ ਜੀવਿਕਂ ਕਪ੍ਪੇਤਿ, ਯਦਿ ਕਸਿਯਾ, ਯਦਿ વਣਿਜ੍ਜਾਯ, ਪਾਣਾਤਿਪਾਤਾਦਿવਸੇਨ ਪਮਤ੍ਤੋ ਤਂ ਤਂ ਯਥਾਕਾਲਂ ਸਮ੍ਪਾਦੇਤੁਂ ਨ ਸਕ੍ਕੋਤਿ, ਅਥਸ੍ਸ ਮੂਲਂ વਿਨਸ੍ਸਤਿ। ਮਾਘਾਤਕਾਲੇਪਿ ਪਾਣਾਤਿਪਾਤਂ ਅਦਿਨ੍ਨਾਦਾਨਾਦੀਨਿ ਚ ਕਰੋਨ੍ਤੋ ਦਣ੍ਡવਸੇਨ ਮਹਤਿਂ ਭੋਗਜਾਨਿਂ ਨਿਗਚ੍ਛਤਿ। ਪਬ੍ਬਜਿਤੋ ਦੁਸ੍ਸੀਲੋ ਪਮਾਦਕਾਰਣਾ ਸੀਲਤੋ ਬੁਦ੍ਧવਚਨਤੋ ਝਾਨਤੋ ਸਤ੍ਤਅਰਿਯਧਨਤੋ ਚ ਜਾਨਿਂ ਨਿਗਚ੍ਛਤਿ। ਗਹਟ੍ਠਸ੍ਸ ‘‘ਅਸੁਕੋ ਅਸੁਕਕੁਲੇ ਜਾਤੋ ਦੁਸ੍ਸੀਲੋ ਪਾਪਧਮ੍ਮੋ ਪਰਿਚ੍ਚਤ੍ਤਇਧਲੋਕਪਰਲੋਕੋ ਸਲਾਕਭਤ੍ਤਮਤ੍ਤਮ੍ਪਿ ਨ ਦੇਤੀ’’ਤਿ ਚਤੁਪਰਿਸਮਜ੍ਝੇ ਪਾਪਕੋ ਕਿਤ੍ਤਿਸਦ੍ਦੋ ਅਬ੍ਭੁਗ੍ਗਚ੍ਛਤਿ। ਪਬ੍ਬਜਿਤਸ੍ਸ ‘‘ਅਸੁਕੋ ਨਾਸਕ੍ਖਿ ਸੀਲਂ ਰਕ੍ਖਿਤੁਂ ਬੁਦ੍ਧવਚਨਂ ਗਹੇਤੁਂ, વੇਜ੍ਜਕਮ੍ਮਾਦੀਹਿ ਜੀવਤਿ, ਛਹਿ ਅਗਾਰવੇਹਿ ਸਮਨ੍ਨਾਗਤੋ’’ਤਿ ਏવਂ ਅਬ੍ਭੁਗ੍ਗਚ੍ਛਤਿ।
213. Tatiye dussīloti asīlo nissīlo. Sīlavipannoti vipannasīlo bhinnasaṃvaro. Pamādādhikaraṇanti pamādakāraṇā. Idañca suttaṃ gahaṭṭhānaṃ vasena āgataṃ, pabbajitānampi pana labbhateva . Gahaṭṭho hi yena yena sippaṭṭhānena jīvikaṃ kappeti, yadi kasiyā, yadi vaṇijjāya, pāṇātipātādivasena pamatto taṃ taṃ yathākālaṃ sampādetuṃ na sakkoti, athassa mūlaṃ vinassati. Māghātakālepi pāṇātipātaṃ adinnādānādīni ca karonto daṇḍavasena mahatiṃ bhogajāniṃ nigacchati. Pabbajito dussīlo pamādakāraṇā sīlato buddhavacanato jhānato sattaariyadhanato ca jāniṃ nigacchati. Gahaṭṭhassa ‘‘asuko asukakule jāto dussīlo pāpadhammo pariccattaidhalokaparaloko salākabhattamattampi na detī’’ti catuparisamajjhe pāpako kittisaddo abbhuggacchati. Pabbajitassa ‘‘asuko nāsakkhi sīlaṃ rakkhituṃ buddhavacanaṃ gahetuṃ, vejjakammādīhi jīvati, chahi agāravehi samannāgato’’ti evaṃ abbhuggacchati.
ਅવਿਸਾਰਦੋਤਿ ਗਹਟ੍ਠੋ ਤਾવ ‘‘ਅવਸ੍ਸਂ ਬਹੂਨਂ ਸਨ੍ਨਿਪਾਤਟ੍ਠਾਨੇ ਕੋਚਿ ਮਮ ਕਮ੍ਮਂ ਜਾਨਿਸ੍ਸਤਿ, ਅਥ ਮਂ ਨਿਗ੍ਗਣ੍ਹਿਸ੍ਸਨ੍ਤਿ વਾ, ਰਾਜਕੁਲਸ੍ਸ વਾ ਦਸ੍ਸਨ੍ਤੀ’’ਤਿ ਸਭਯੋ ਉਪਸਙ੍ਕਮਤਿ। ਮਙ੍ਕੁਭੂਤੋ ਚ ਪਤਿਤਕ੍ਖਨ੍ਧੋ ਅਧੋਮੁਖੋ ਅਙ੍ਗੁਟ੍ਠਕੇਨ ਭੂਮਿਂ ਕਸਨ੍ਤੋ ਨਿਸੀਦਤਿ, વਿਸਾਰਦੋ ਹੁਤ੍વਾ ਕਥੇਤੁਂ ਨ ਸਕ੍ਕੋਤਿ। ਪਬ੍ਬਜਿਤੋਪਿ ‘‘ਬਹੂ ਭਿਕ੍ਖੂ ਸਨ੍ਨਿਪਤਿਤਾ, ਅવਸ੍ਸਂ ਕੋਚਿ ਮਮ ਕਮ੍ਮਂ ਜਾਨਿਸ੍ਸਤਿ, ਅਥ ਮੇ ਉਪੋਸਥਮ੍ਪਿ ਪવਾਰਣਮ੍ਪਿ ਠਪੇਤ੍વਾ ਸਾਮਞ੍ਞਾ ਚਾવੇਤ੍વਾ ਨਿਕ੍ਕਡ੍ਢਿਸ੍ਸਨ੍ਤੀ’’ਤਿ ਸਭਯੋ ਉਪਸਙ੍ਕਮਤਿ, વਿਸਾਰਦੋ ਹੁਤ੍વਾ ਕਥੇਤੁਂ ਨ ਸਕ੍ਕੋਤਿ। ਏਕਚ੍ਚੋ ਪਨ ਦੁਸ੍ਸੀਲੋਪਿ ਦਪ੍ਪਿਤੋ વਿਯ ਚਰਤਿ, ਸੋਪਿ ਅਜ੍ਝਾਸਯੇਨ ਮਙ੍ਕੁ ਹੋਤਿਯੇવ।
Avisāradoti gahaṭṭho tāva ‘‘avassaṃ bahūnaṃ sannipātaṭṭhāne koci mama kammaṃ jānissati, atha maṃ niggaṇhissanti vā, rājakulassa vā dassantī’’ti sabhayo upasaṅkamati. Maṅkubhūto ca patitakkhandho adhomukho aṅguṭṭhakena bhūmiṃ kasanto nisīdati, visārado hutvā kathetuṃ na sakkoti. Pabbajitopi ‘‘bahū bhikkhū sannipatitā, avassaṃ koci mama kammaṃ jānissati, atha me uposathampi pavāraṇampi ṭhapetvā sāmaññā cāvetvā nikkaḍḍhissantī’’ti sabhayo upasaṅkamati, visārado hutvā kathetuṃ na sakkoti. Ekacco pana dussīlopi dappito viya carati, sopi ajjhāsayena maṅku hotiyeva.
ਸਮ੍ਮੂਲ਼੍ਹੋ ਕਾਲਂ ਕਰੋਤੀਤਿ ਤਸ੍ਸ ਹਿ ਮਰਣਮਞ੍ਚੇ ਨਿਪਨ੍ਨਸ੍ਸ ਦੁਸ੍ਸੀਲਕਮ੍ਮਂ ਸਮਾਦਾਯ વਤ੍ਤਿਤਟ੍ਠਾਨਂ ਆਪਾਥਂ ਆਗਚ੍ਛਤਿ। ਸੋ ਉਮ੍ਮੀਲੇਤ੍વਾ ਇਧਲੋਕਂ ਪਸ੍ਸਤਿ, ਨਿਮ੍ਮੀਲੇਤ੍વਾ ਪਰਲੋਕਂ। ਤਸ੍ਸ ਚਤ੍ਤਾਰੋ ਅਪਾਯਾ ਉਪਟ੍ਠਹਨ੍ਤਿ, ਸਤ੍ਤਿਸਤੇਨ ਸੀਸੇ ਪਹਰਿਯਮਾਨੋ વਿਯ ਹੋਤਿ। ਸੋ ‘‘વਾਰੇਥ વਾਰੇਥਾ’’ਤਿ વਿਰવਨ੍ਤੋ ਮਰਤਿ। ਤੇਨ વੁਤ੍ਤਂ – ‘‘ਸਮ੍ਮੂਲ਼੍ਹੋ ਕਾਲਂ ਕਰੋਤੀ’’ਤਿ। ਪਞ੍ਚਮਪਦਂ ਉਤ੍ਤਾਨਮੇવ। ਆਨਿਸਂਸਕਥਾ વੁਤ੍ਤવਿਪਰਿਯਾਯੇਨ વੇਦਿਤਬ੍ਬਾ।
Sammūḷho kālaṃ karotīti tassa hi maraṇamañce nipannassa dussīlakammaṃ samādāya vattitaṭṭhānaṃ āpāthaṃ āgacchati. So ummīletvā idhalokaṃ passati, nimmīletvā paralokaṃ. Tassa cattāro apāyā upaṭṭhahanti, sattisatena sīse pahariyamāno viya hoti. So ‘‘vāretha vārethā’’ti viravanto marati. Tena vuttaṃ – ‘‘sammūḷho kālaṃ karotī’’ti. Pañcamapadaṃ uttānameva. Ānisaṃsakathā vuttavipariyāyena veditabbā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੩. ਸੀਲਸੁਤ੍ਤਂ • 3. Sīlasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੩-੧੦. ਸੀਲਸੁਤ੍ਤਾਦਿવਣ੍ਣਨਾ • 3-10. Sīlasuttādivaṇṇanā
