| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੩. ਸੀਲਸੁਤ੍ਤવਣ੍ਣਨਾ
3. Sīlasuttavaṇṇanā
੧੮੪. ਤਤਿਯੇ ਸੀਲਸਮ੍ਪਨ੍ਨਾਤਿ ਏਤ੍ਥ ਖੀਣਾਸવਸ੍ਸ ਲੋਕਿਯਲੋਕੁਤ੍ਤਰਸੀਲਂ ਕਥਿਤਂ, ਤੇਨ ਸਮ੍ਪਨ੍ਨਾਤਿ ਅਤ੍ਥੋ। ਸਮਾਧਿਪਞ੍ਞਾਸੁਪਿ ਏਸੇવ ਨਯੋ। વਿਮੁਤ੍ਤਿ ਪਨ ਫਲવਿਮੁਤ੍ਤਿਯੇવ। વਿਮੁਤ੍ਤਿਞਾਣਦਸ੍ਸਨਂ ਪਚ੍ਚવੇਕ੍ਖਣਞਾਣਂ। ਏવਮੇਤ੍ਥ ਸੀਲਾਦਯੋ ਤਯੋ ਲੋਕਿਯਲੋਕੁਤ੍ਤਰਾ, વਿਮੁਤ੍ਤਿ ਲੋਕੁਤ੍ਤਰਾવ, વਿਮੁਤ੍ਤਿਞਾਣਦਸ੍ਸਨਂ ਲੋਕਿਯਮੇવ।
184. Tatiye sīlasampannāti ettha khīṇāsavassa lokiyalokuttarasīlaṃ kathitaṃ, tena sampannāti attho. Samādhipaññāsupi eseva nayo. Vimutti pana phalavimuttiyeva. Vimuttiñāṇadassanaṃ paccavekkhaṇañāṇaṃ. Evamettha sīlādayo tayo lokiyalokuttarā, vimutti lokuttarāva, vimuttiñāṇadassanaṃ lokiyameva.
ਦਸ੍ਸਨਮ੍ਪਾਹਨ੍ਤਿ ਦਸ੍ਸਨਮ੍ਪਿ ਅਹਂ। ਤਂ ਪਨੇਤਂ ਦਸ੍ਸਨਂ – ਚਕ੍ਖੁਦਸ੍ਸਨਂ, ਞਾਣਦਸ੍ਸਨਨ੍ਤਿ ਦੁવਿਧਂ। ਤਤ੍ਥ ਪਸਨ੍ਨੇਹਿ ਚਕ੍ਖੂਹਿ ਅਰਿਯਾਨਂ ਦਸ੍ਸਨਂ ਓਲੋਕਨਂ ਚਕ੍ਖੁਦਸ੍ਸਨਂ ਨਾਮ। ਅਰਿਯੇਹਿ ਪਨ ਦਿਟ੍ਠਸ੍ਸ ਲਕ੍ਖਣਸ੍ਸ ਦਸ੍ਸਨਂ, ਪਟਿવਿਦ੍ਧਸ੍ਸ ਚ ਪਟਿવਿਜ੍ਝਨਂ ਝਾਨੇਨ વਾ વਿਪਸ੍ਸਨਾਯ વਾ ਮਗ੍ਗਫਲੇਹਿ વਾ ਞਾਣਦਸ੍ਸਨਂ ਨਾਮ। ਇਮਸ੍ਮਿਂ ਪਨੇਤ੍ਥ ਚਕ੍ਖੁਦਸ੍ਸਨਂ ਅਧਿਪ੍ਪੇਤਂ। ਅਰਿਯਾਨਞ੍ਹਿ ਪਸਨ੍ਨੇਹਿ ਚਕ੍ਖੂਹਿ ਓਲੋਕਨਮ੍ਪਿ ਬਹੁਕਾਰਮੇવ। ਸવਨਨ੍ਤਿ ‘‘ਅਸੁਕੋ ਨਾਮ ਖੀਣਾਸવੋ ਅਸੁਕਸ੍ਮਿਂ ਨਾਮ ਰਟ੍ਠੇ વਾ ਜਨਪਦੇ વਾ ਗਾਮੇ વਾ ਨਿਗਮੇ વਾ વਿਹਾਰੇ વਾ ਲੇਣੇ વਾ વਸਤੀ’’ਤਿ ਕਥੇਨ੍ਤਾਨਂ ਸੋਤੇਨ ਸવਨਂ, ਏਤਮ੍ਪਿ ਬਹੁਕਾਰਮੇવ। ਉਪਸਙ੍ਕਮਨਨ੍ਤਿ ‘‘ਦਾਨਂ વਾ ਦਸ੍ਸਾਮਿ, ਪਞ੍ਹਂ વਾ ਪੁਚ੍ਛਿਸ੍ਸਾਮਿ, ਧਮ੍ਮਂ વਾ ਸੋਸ੍ਸਾਮਿ, ਸਕ੍ਕਾਰਂ વਾ ਕਰਿਸ੍ਸਾਮੀ’’ਤਿ ਏવਰੂਪੇਨ ਚਿਤ੍ਤੇਨ ਅਰਿਯਾਨਂ ਉਪਸਙ੍ਕਮਨਂ। ਪਯਿਰੁਪਾਸਨਨ੍ਤਿ ਪਞ੍ਹਾਪਯਿਰੁਪਾਸਨਂ। ਅਰਿਯਾਨਂ ਗੁਣੇ ਸੁਤ੍વਾ ਤੇ ਉਪਸਙ੍ਕਮਿਤ੍વਾ ਨਿਮਨ੍ਤੇਤ੍વਾ ਦਾਨਂ ਦਤ੍વਾ ‘‘ਕਿਂ, ਭਨ੍ਤੇ, ਕੁਸਲ’’ਨ੍ਤਿਆਦਿਨਾ ਨਯੇਨ ਪਞ੍ਹਪੁਚ੍ਛਨਨ੍ਤਿ ਅਤ੍ਥੋ।
Dassanampāhanti dassanampi ahaṃ. Taṃ panetaṃ dassanaṃ – cakkhudassanaṃ, ñāṇadassananti duvidhaṃ. Tattha pasannehi cakkhūhi ariyānaṃ dassanaṃ olokanaṃ cakkhudassanaṃ nāma. Ariyehi pana diṭṭhassa lakkhaṇassa dassanaṃ, paṭividdhassa ca paṭivijjhanaṃ jhānena vā vipassanāya vā maggaphalehi vā ñāṇadassanaṃ nāma. Imasmiṃ panettha cakkhudassanaṃ adhippetaṃ. Ariyānañhi pasannehi cakkhūhi olokanampi bahukārameva. Savananti ‘‘asuko nāma khīṇāsavo asukasmiṃ nāma raṭṭhe vā janapade vā gāme vā nigame vā vihāre vā leṇe vā vasatī’’ti kathentānaṃ sotena savanaṃ, etampi bahukārameva. Upasaṅkamananti ‘‘dānaṃ vā dassāmi, pañhaṃ vā pucchissāmi, dhammaṃ vā sossāmi, sakkāraṃ vā karissāmī’’ti evarūpena cittena ariyānaṃ upasaṅkamanaṃ. Payirupāsananti pañhāpayirupāsanaṃ. Ariyānaṃ guṇe sutvā te upasaṅkamitvā nimantetvā dānaṃ datvā ‘‘kiṃ, bhante, kusala’’ntiādinā nayena pañhapucchananti attho.
ਅਨੁਸ੍ਸਤਿਨ੍ਤਿ ਰਤ੍ਤਿਟ੍ਠਾਨਦਿવਾਟ੍ਠਾਨੇਸੁ ਨਿਸਿਨ੍ਨਸ੍ਸ ‘‘ਇਦਾਨਿ ਅਰਿਯਾ ਲੇਣਗੁਹਮਣ੍ਡਪਾਦੀਸੁ ਝਾਨવਿਪਸ੍ਸਨਾਮਗ੍ਗਫਲਸੁਖੇਹਿ વੀਤਿਨਾਮੇਨ੍ਤੀ’’ਤਿ ਅਨੁਸ੍ਸਰਣਂ। ਯੋ વਾ ਤੇਸਂ ਸਨ੍ਤਿਕੇ ਓવਾਦੋ ਲਦ੍ਧੋ ਹੋਤਿ, ਤਂ ਆવਜ੍ਜਿਤ੍વਾ ‘‘ਇਮਸ੍ਮਿਂ ਠਾਨੇ ਸੀਲਂ ਕਥਿਤਂ, ਇਮਸ੍ਮਿਂ ਸਮਾਧਿ, ਇਮਸ੍ਮਿਂ વਿਪਸ੍ਸਨਾ, ਇਮਸ੍ਮਿਂ ਮਗ੍ਗੋ, ਇਮਸ੍ਮਿਂ ਫਲ’’ਨ੍ਤਿ ਏવਂ ਅਨੁਸ੍ਸਰਣਂ। ਅਨੁਪਬ੍ਬਜ੍ਜਨ੍ਤਿ ਅਰਿਯੇਸੁ ਚਿਤ੍ਤਂ ਪਸਾਦੇਤ੍વਾ ਘਰਾ ਨਿਕ੍ਖਮ੍ਮ ਤੇਸਂ ਸਨ੍ਤਿਕੇ ਪਬ੍ਬਜ੍ਜਂ। ਅਰਿਯਾਨਞ੍ਹਿ ਸਨ੍ਤਿਕੇ ਚਿਤ੍ਤਂ ਪਸਾਦੇਤ੍વਾ ਤੇਸਂਯੇવ ਸਨ੍ਤਿਕੇ ਪਬ੍ਬਜਿਤ੍વਾ ਤੇਸਂਯੇવ ਓવਾਦਾਨੁਸਾਸਨਿਂ ਪਚ੍ਚਾਸੀਸਮਾਨਸ੍ਸ ਚਰਤੋਪਿ ਪਬ੍ਬਜ੍ਜਾ ਅਨੁਪਬ੍ਬਜ੍ਜਾ ਨਾਮ। ਅਰਿਯੇਸੁ ਪਸਾਦੇਨ ਅਞ੍ਞਤ੍ਥ ਪਬ੍ਬਜਿਤ੍વਾ ਅਰਿਯਾਨਂ ਸਨ੍ਤਿਕੇ ਓવਾਦਾਨੁਸਾਸਨਿਂ ਪਚ੍ਚਾਸੀਸਮਾਨਸ੍ਸ ਚਰਤੋ ਪਬ੍ਬਜ੍ਜਾਪਿ ਅਨੁਪਬ੍ਬਜ੍ਜਾ ਨਾਮ। ਅਞ੍ਞੇਸੁ ਪਨ ਪਸਾਦੇਨ ਅਞ੍ਞੇਸਂਯੇવ ਸਨ੍ਤਿਕੇ ਪਬ੍ਬਜਿਤ੍વਾ ਅਞ੍ਞੇਸਂਯੇવ ਓવਾਦਾਨੁਸਾਸਨਿਂ ਪਚ੍ਚਾਸੀਸਮਾਨਸ੍ਸ ਚਰਤੋ ਪਬ੍ਬਜ੍ਜਾ ਅਨੁਪਬ੍ਬਜ੍ਜਾ ਨਾਮ ਨ ਹੋਤਿ।
Anussatinti rattiṭṭhānadivāṭṭhānesu nisinnassa ‘‘idāni ariyā leṇaguhamaṇḍapādīsu jhānavipassanāmaggaphalasukhehi vītināmentī’’ti anussaraṇaṃ. Yo vā tesaṃ santike ovādo laddho hoti, taṃ āvajjitvā ‘‘imasmiṃ ṭhāne sīlaṃ kathitaṃ, imasmiṃ samādhi, imasmiṃ vipassanā, imasmiṃ maggo, imasmiṃ phala’’nti evaṃ anussaraṇaṃ. Anupabbajjanti ariyesu cittaṃ pasādetvā gharā nikkhamma tesaṃ santike pabbajjaṃ. Ariyānañhi santike cittaṃ pasādetvā tesaṃyeva santike pabbajitvā tesaṃyeva ovādānusāsaniṃ paccāsīsamānassa caratopi pabbajjā anupabbajjā nāma. Ariyesu pasādena aññattha pabbajitvā ariyānaṃ santike ovādānusāsaniṃ paccāsīsamānassa carato pabbajjāpi anupabbajjā nāma. Aññesu pana pasādena aññesaṃyeva santike pabbajitvā aññesaṃyeva ovādānusāsaniṃ paccāsīsamānassa carato pabbajjā anupabbajjā nāma na hoti.
ਏવਂ ਪਬ੍ਬਜਿਤੇਸੁ ਪਨ ਮਹਾਕਸ੍ਸਪਤ੍ਥੇਰਸ੍ਸ ਤਾવ ਅਨੁਪਬ੍ਬਜ੍ਜਂ ਪਬ੍ਬਜਿਤਾ ਸਤਸਹਸ੍ਸਮਤ੍ਤਾ ਅਹੇਸੁਂ, ਤਥਾ ਥੇਰਸ੍ਸੇવ ਸਦ੍ਧਿવਿਹਾਰਿਕਸ੍ਸ ਚ ਚਨ੍ਦਗੁਤ੍ਤਤ੍ਥੇਰਸ੍ਸ, ਤਸ੍ਸਾਪਿ ਸਦ੍ਧਿવਿਹਾਰਿਕਸ੍ਸ ਸੂਰਿਯਗੁਤ੍ਤਤ੍ਥੇਰਸ੍ਸ, ਤਸ੍ਸਾਪਿ ਸਦ੍ਧਿવਿਹਾਰਿਕਸ੍ਸ ਅਸ੍ਸਗੁਤ੍ਤਤ੍ਥੇਰਸ੍ਸ, ਤਸ੍ਸਾਪਿ ਸਦ੍ਧਿવਿਹਾਰਿਕਸ੍ਸ ਯੋਨਕਧਮ੍ਮਰਕ੍ਖਿਤਤ੍ਥੇਰਸ੍ਸ , ਤਸ੍ਸ ਪਨ ਸਦ੍ਧਿવਿਹਾਰਿਕੋ ਅਸੋਕਰਞ੍ਞੋ ਕਨਿਟ੍ਠਭਾਤਾ ਤਿਸ੍ਸਤ੍ਥੇਰੋ ਨਾਮ ਅਹੋਸਿ, ਤਸ੍ਸ ਅਨੁਪਬ੍ਬਜ੍ਜਂ ਪਬ੍ਬਜਿਤਾ ਅਡ੍ਢਤੇਯ੍ਯਕੋਟਿਸਙ੍ਖਾ ਅਹੇਸੁਂ। ਮਹਿਨ੍ਦਤ੍ਥੇਰਸ੍ਸ ਅਨੁਪਬ੍ਬਜਿਤਾਨਂ ਗਣਨਪਰਿਚ੍ਛੇਦੋ ਨਤ੍ਥਿ। ਯਾવਜ੍ਜਦਿવਸਾ ਲਙ੍ਕਾਦੀਪੇ ਸਤ੍ਥਰਿ ਪਸਾਦੇਨ ਪਬ੍ਬਜਨ੍ਤਾ ਮਹਿਨ੍ਦਤ੍ਥੇਰਸ੍ਸੇવ ਪਬ੍ਬਜ੍ਜਂ ਅਨੁਪਬ੍ਬਜਨ੍ਤਿ ਨਾਮ।
Evaṃ pabbajitesu pana mahākassapattherassa tāva anupabbajjaṃ pabbajitā satasahassamattā ahesuṃ, tathā therasseva saddhivihārikassa ca candaguttattherassa, tassāpi saddhivihārikassa sūriyaguttattherassa, tassāpi saddhivihārikassa assaguttattherassa, tassāpi saddhivihārikassa yonakadhammarakkhitattherassa , tassa pana saddhivihāriko asokarañño kaniṭṭhabhātā tissatthero nāma ahosi, tassa anupabbajjaṃ pabbajitā aḍḍhateyyakoṭisaṅkhā ahesuṃ. Mahindattherassa anupabbajitānaṃ gaṇanaparicchedo natthi. Yāvajjadivasā laṅkādīpe satthari pasādena pabbajantā mahindattherasseva pabbajjaṃ anupabbajanti nāma.
ਤਂ ਧਮ੍ਮਨ੍ਤਿ ਤਂ ਤੇਸਂ ਓવਾਦਾਨੁਸਾਸਨੀਧਮ੍ਮਂ। ਅਨੁਸ੍ਸਰਤੀਤਿ ਸਰਤਿ। ਅਨੁવਿਤਕ੍ਕੇਤੀਤਿ વਿਤਕ੍ਕਾਹਤਂ ਕਰੋਤਿ। ਆਰਦ੍ਧੋ ਹੋਤੀਤਿ ਪਰਿਪੁਣ੍ਣੋ ਹੋਤਿ। ਪવਿਚਿਨਤੀਤਿਆਦਿ ਸਬ੍ਬਂ ਤਤ੍ਥ ਞਾਣਚਾਰવਸੇਨੇવ વੁਤ੍ਤਂ। ਅਥ વਾ ਪવਿਚਿਨਤੀਤਿ ਤੇਸਂ ਤੇਸਂ ਧਮ੍ਮਾਨਂ ਲਕ੍ਖਣਂ વਿਚਿਨਤਿ। ਪવਿਚਰਤੀਤਿ ਤਤ੍ਥ ਞਾਣਂ ਚਰਾਪੇਤਿ। ਪਰਿવੀਮਂਸਮਾਪਜ੍ਜਤੀਤਿ વੀਮਂਸਨਂ ਓਲੋਕਨਂ ਗવੇਸਨਂ ਆਪਜ੍ਜਤਿ।
Taṃdhammanti taṃ tesaṃ ovādānusāsanīdhammaṃ. Anussaratīti sarati. Anuvitakketīti vitakkāhataṃ karoti. Āraddho hotīti paripuṇṇo hoti. Pavicinatītiādi sabbaṃ tattha ñāṇacāravaseneva vuttaṃ. Atha vā pavicinatīti tesaṃ tesaṃ dhammānaṃ lakkhaṇaṃ vicinati. Pavicaratīti tattha ñāṇaṃ carāpeti. Parivīmaṃsamāpajjatīti vīmaṃsanaṃ olokanaṃ gavesanaṃ āpajjati.
ਸਤ੍ਤ ਫਲਾ ਸਤ੍ਤਾਨਿਸਂਸਾਤਿ ਉਭਯਮ੍ਪੇਤਂ ਅਤ੍ਥਤੋ ਏਕਂ। ਦਿਟ੍ਠੇવ ਧਮ੍ਮੇ ਪਟਿਕਚ੍ਚ ਅਞ੍ਞਂ ਆਰਾਧੇਤੀਤਿ ਅਰਹਤ੍ਤਂ ਆਰਾਧੇਨ੍ਤੋ ਇਮਸ੍ਮਿਂਯੇવ ਅਤ੍ਤਭਾવੇ ਆਰਾਧੇਤਿ, ਤਞ੍ਚ ਖੋ ਪਟਿਕਚ੍ਚ, ਅਸਮ੍ਪਤ੍ਤੇਯੇવ ਮਰਣਕਾਲੇਤਿ ਅਤ੍ਥੋ। ਅਥ ਮਰਣਕਾਲੇਤਿ ਅਥ ਮਰਣਸ੍ਸ ਆਸਨ੍ਨਕਾਲੇ।
Satta phalā sattānisaṃsāti ubhayampetaṃ atthato ekaṃ. Diṭṭheva dhamme paṭikacca aññaṃ ārādhetīti arahattaṃ ārādhento imasmiṃyeva attabhāve ārādheti, tañca kho paṭikacca, asampatteyeva maraṇakāleti attho. Atha maraṇakāleti atha maraṇassa āsannakāle.
ਅਨ੍ਤਰਾਪਰਿਨਿਬ੍ਬਾਯੀਤਿ ਯੋ ਆਯੁવੇਮਜ੍ਝਂ ਅਨਤਿਕ੍ਕਮਿਤ੍વਾ ਪਰਿਨਿਬ੍ਬਾਯਤਿ, ਸੋ ਤਿવਿਧੋ ਹੋਤਿ। ਕਪ੍ਪਸਹਸ੍ਸਾਯੁਕੇਸੁ ਤਾવ ਅવਿਹੇਸੁ ਨਿਬ੍ਬਤ੍ਤਿਤ੍વਾ ਏਕੋ ਨਿਬ੍ਬਤ੍ਤਦਿવਸੇਯੇવ ਅਰਹਤ੍ਤਂ ਪਾਪੁਣਾਤਿ। ਨੋ ਚੇ ਨਿਬ੍ਬਤ੍ਤਦਿવਸੇ ਪਾਪੁਣਾਤਿ, ਪਠਮਸ੍ਸ ਪਨ ਕਪ੍ਪਸਤਸ੍ਸ ਮਤ੍ਥਕੇ ਪਾਪੁਣਾਤਿ। ਅਯਮੇਕੋ ਅਨ੍ਤਰਾਪਰਿਨਿਬ੍ਬਾਯੀ। ਅਪਰੋ ਏવਂ ਅਸਕ੍ਕੋਨ੍ਤੋ ਦ੍વਿਨ੍ਨਂ ਕਪ੍ਪਸਤਾਨਂ ਮਤ੍ਥਕੇ ਪਾਪੁਣਾਤਿ, ਅਯਂ ਦੁਤਿਯੋ। ਅਪਰੋ ਏવਮ੍ਪਿ ਅਸਕ੍ਕੋਨ੍ਤੋ ਚਤੁਨ੍ਨਂ ਕਪ੍ਪਸਤਾਨਂ ਮਤ੍ਥਕੇ ਪਾਪੁਣਾਤਿ, ਅਯਂ ਤਤਿਯੋ ਅਨ੍ਤਰਾਪਰਿਨਿਬ੍ਬਾਯੀ।
Antarāparinibbāyīti yo āyuvemajjhaṃ anatikkamitvā parinibbāyati, so tividho hoti. Kappasahassāyukesu tāva avihesu nibbattitvā eko nibbattadivaseyeva arahattaṃ pāpuṇāti. No ce nibbattadivase pāpuṇāti, paṭhamassa pana kappasatassa matthake pāpuṇāti. Ayameko antarāparinibbāyī. Aparo evaṃ asakkonto dvinnaṃ kappasatānaṃ matthake pāpuṇāti, ayaṃ dutiyo. Aparo evampi asakkonto catunnaṃ kappasatānaṃ matthake pāpuṇāti, ayaṃ tatiyo antarāparinibbāyī.
ਪਞ੍ਚਮਂ ਪਨ ਕਪ੍ਪਸਤਂ ਅਤਿਕ੍ਕਮਿਤ੍વਾ ਅਰਹਤ੍ਤਂ ਪਤ੍ਤੋ ਉਪਹਚ੍ਚਪਰਿਨਿਬ੍ਬਾਯੀ ਨਾਮ ਹੋਤਿ। ਅਤਪ੍ਪਾਦੀਸੁਪਿ ਏਸੇવ ਨਯੋ। ਯਤ੍ਥ ਕਤ੍ਥਚਿ ਉਪ੍ਪਨ੍ਨੋ ਪਨ ਸਸਙ੍ਖਾਰੇਨ ਸਪ੍ਪਯੋਗੇਨ ਅਰਹਤ੍ਤਂ ਪਤ੍ਤੋ ਸਸਙ੍ਖਾਰਪਰਿਨਿਬ੍ਬਾਯੀ ਨਾਮ, ਅਸਙ੍ਖਾਰੇਨ ਅਪ੍ਪਯੋਗੇਨ ਪਤ੍ਤੋ ਅਸਙ੍ਖਾਰਪਰਿਨਿਬ੍ਬਾਯੀ ਨਾਮ। ਅવਿਹਾਦੀਸੁਪਿ ਨਿਬ੍ਬਤ੍ਤੋ ਤਤ੍ਥ ਯਾવਤਾਯੁਕਂ ਠਤ੍વਾ ਉਪਰੂਪਰਿ ਨਿਬ੍ਬਤ੍ਤਿਤ੍વਾ ਅਕਨਿਟ੍ਠਂ ਪਤ੍ਤੋ ਉਦ੍ਧਂਸੋਤੋ ਅਕਨਿਟ੍ਠਗਾਮੀ ਨਾਮ।
Pañcamaṃ pana kappasataṃ atikkamitvā arahattaṃ patto upahaccaparinibbāyī nāma hoti. Atappādīsupi eseva nayo. Yattha katthaci uppanno pana sasaṅkhārena sappayogena arahattaṃ patto sasaṅkhāraparinibbāyī nāma, asaṅkhārena appayogena patto asaṅkhāraparinibbāyī nāma. Avihādīsupi nibbatto tattha yāvatāyukaṃ ṭhatvā uparūpari nibbattitvā akaniṭṭhaṃ patto uddhaṃsoto akaniṭṭhagāmī nāma.
ਇਮਸ੍ਮਿਂ ਪਨ ਠਾਨੇ ਅਟ੍ਠਚਤ੍ਤਾਰੀਸ ਅਨਾਗਾਮਿਨੋ ਕਥੇਤਬ੍ਬਾ। ਅવਿਹੇਸੁ ਹਿ ਤਯੋ ਅਨ੍ਤਰਾਪਰਿਨਿਬ੍ਬਾਯੀ, ਏਕੋ ਉਪਹਚ੍ਚਪਰਿਨਿਬ੍ਬਾਯੀ, ਏਕੋ ਉਦ੍ਧਂਸੋਤੋ ਅਕਨਿਟ੍ਠਗਾਮੀਤਿ ਪਞ੍ਚ ਹੋਨ੍ਤਿ। ਤੇ ਅਸਙ੍ਖਾਰਪਰਿਨਿਬ੍ਬਾਯਿਨੋ ਪਞ੍ਚ, ਸਸਙ੍ਖਾਰਪਰਿਨਿਬ੍ਬਾਯਿਨੋ ਪਞ੍ਚਾਤਿ ਦਸ ਹੋਨ੍ਤਿ, ਤਥਾ ਅਤਪ੍ਪਾਦੀਸੁ। ਅਕਨਿਟ੍ਠੇਸੁ ਪਨ ਉਦ੍ਧਂਸੋਤੋ ਨਤ੍ਥਿ, ਤਸ੍ਮਾ ਤਤ੍ਥ ਚਤ੍ਤਾਰੋ ਸਸਙ੍ਖਾਰਪਰਿਨਿਬ੍ਬਾਯੀ, ਚਤ੍ਤਾਰੋ ਅਸਙ੍ਖਾਰਪਰਿਨਿਬ੍ਬਾਯੀਤਿ ਅਟ੍ਠਾਤਿ ਏવਂ ਅਟ੍ਠਚਤ੍ਤਾਲੀਸ ਹੋਨ੍ਤਿ। ਤੇਸਂ ਉਦ੍ਧਂਸੋਤੋ ਅਕਨਿਟ੍ਠਗਾਮੀ ਸਬ੍ਬਜੇਟ੍ਠੋ ਚੇવ ਹੋਤਿ ਸਬ੍ਬਕਨਿਟ੍ਠੋ ਚ। ਕਥਂ? ਸੋ ਹਿ ਸੋਲ਼ਸਕਪ੍ਪਸਹਸ੍ਸਾਯੁਕਤ੍ਤਾ ਆਯੁਨਾ ਸਬ੍ਬੇਸਂ ਜੇਟ੍ਠੋ, ਸਬ੍ਬਪਚ੍ਛਾ ਅਰਹਤ੍ਤਂ ਪਾਪੁਣੀਤਿ ਸਬ੍ਬੇਸਂ ਕਨਿਟ੍ਠੋ। ਇਮਸ੍ਮਿਂ ਸੁਤ੍ਤੇ ਅਪੁਬ੍ਬਂ ਅਚਰਿਮਂ ਏਕਚਿਤ੍ਤਕ੍ਖਣਿਕਾ ਨਾਨਾਲਕ੍ਖਣਾ ਅਰਹਤ੍ਤਮਗ੍ਗਸ੍ਸ ਪੁਬ੍ਬਭਾਗવਿਪਸ੍ਸਨਾ ਬੋਜ੍ਝਙ੍ਗਾ ਕਥਿਤਾ।
Imasmiṃ pana ṭhāne aṭṭhacattārīsa anāgāmino kathetabbā. Avihesu hi tayo antarāparinibbāyī, eko upahaccaparinibbāyī, eko uddhaṃsoto akaniṭṭhagāmīti pañca honti. Te asaṅkhāraparinibbāyino pañca, sasaṅkhāraparinibbāyino pañcāti dasa honti, tathā atappādīsu. Akaniṭṭhesu pana uddhaṃsoto natthi, tasmā tattha cattāro sasaṅkhāraparinibbāyī, cattāro asaṅkhāraparinibbāyīti aṭṭhāti evaṃ aṭṭhacattālīsa honti. Tesaṃ uddhaṃsoto akaniṭṭhagāmī sabbajeṭṭho ceva hoti sabbakaniṭṭho ca. Kathaṃ? So hi soḷasakappasahassāyukattā āyunā sabbesaṃ jeṭṭho, sabbapacchā arahattaṃ pāpuṇīti sabbesaṃ kaniṭṭho. Imasmiṃ sutte apubbaṃ acarimaṃ ekacittakkhaṇikā nānālakkhaṇā arahattamaggassa pubbabhāgavipassanā bojjhaṅgā kathitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੩. ਸੀਲਸੁਤ੍ਤਂ • 3. Sīlasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੩. ਸੀਲਸੁਤ੍ਤવਣ੍ਣਨਾ • 3. Sīlasuttavaṇṇanā
