| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
10. ஸீலவந்தஸுத்தங்
10. Sīlavantasuttaṃ
122. ஏகங் ஸமயங் ஆயஸ்மா ச ஸாரிபுத்தோ ஆயஸ்மா ச மஹாகொட்டி²கோ 1 பா³ராணஸியங் விஹரந்தி இஸிபதனே மிக³தா³யே. அத² கோ² ஆயஸ்மா மஹாகொட்டி²கோ ஸாயன்ஹஸமயங் படிஸல்லானா வுட்டி²தோ யேனாயஸ்மா ஸாரிபுத்தோ தேனுபஸங்கமி…பே॰… ஏதத³வோச – ‘‘ஸீலவதாவுஸோ, ஸாரிபுத்த, பி⁴க்கு²னா கதமே த⁴ம்மா யோனிஸோ மனஸிகாதப்³பா³’’தி? ‘‘ஸீலவதாவுஸோ, கொட்டி²க, பி⁴க்கு²னா பஞ்சுபாதா³னக்க²ந்தா⁴ அனிச்சதோ து³க்க²தோ ரோக³தோ க³ண்ட³தோ ஸல்லதோ அக⁴தோ ஆபா³த⁴தோ பரதோ பலோகதோ ஸுஞ்ஞதோ அனத்ததோ யோனிஸோ மனஸி காதப்³பா³. கதமே பஞ்ச? ஸெய்யதி²த³ங் – ரூபுபாதா³னக்க²ந்தோ⁴, வேத³னுபாதா³னக்க²ந்தோ⁴, ஸஞ்ஞுபாதா³னக்க²ந்தோ⁴, ஸங்கா²ருபாதா³னக்க²ந்தோ⁴, விஞ்ஞாணுபாதா³னக்க²ந்தோ⁴. ஸீலவதாவுஸோ, கொட்டி²க, பி⁴க்கு²னா இமே பஞ்சுபாதா³னக்க²ந்தா⁴ அனிச்சதோ து³க்க²தோ ரோக³தோ க³ண்ட³தோ ஸல்லதோ அக⁴தோ ஆபா³த⁴தோ பரதோ பலோகதோ ஸுஞ்ஞதோ அனத்ததோ யோனிஸோ மனஸி காதப்³பா³. டா²னங் கோ² பனேதங், ஆவுஸோ, விஜ்ஜதி யங் ஸீலவா பி⁴க்கு² இமே பஞ்சுபாதா³னக்க²ந்தே⁴ அனிச்சதோ…பே॰… அனத்ததோ யோனிஸோ மனஸி கரொந்தோ ஸோதாபத்திப²லங் ஸச்சி²கரெய்யா’’தி.
122. Ekaṃ samayaṃ āyasmā ca sāriputto āyasmā ca mahākoṭṭhiko 2 bārāṇasiyaṃ viharanti isipatane migadāye. Atha kho āyasmā mahākoṭṭhiko sāyanhasamayaṃ paṭisallānā vuṭṭhito yenāyasmā sāriputto tenupasaṅkami…pe… etadavoca – ‘‘sīlavatāvuso, sāriputta, bhikkhunā katame dhammā yoniso manasikātabbā’’ti? ‘‘Sīlavatāvuso, koṭṭhika, bhikkhunā pañcupādānakkhandhā aniccato dukkhato rogato gaṇḍato sallato aghato ābādhato parato palokato suññato anattato yoniso manasi kātabbā. Katame pañca? Seyyathidaṃ – rūpupādānakkhandho, vedanupādānakkhandho, saññupādānakkhandho, saṅkhārupādānakkhandho, viññāṇupādānakkhandho. Sīlavatāvuso, koṭṭhika, bhikkhunā ime pañcupādānakkhandhā aniccato dukkhato rogato gaṇḍato sallato aghato ābādhato parato palokato suññato anattato yoniso manasi kātabbā. Ṭhānaṃ kho panetaṃ, āvuso, vijjati yaṃ sīlavā bhikkhu ime pañcupādānakkhandhe aniccato…pe… anattato yoniso manasi karonto sotāpattiphalaṃ sacchikareyyā’’ti.
‘‘ஸோதாபன்னேன பனாவுஸோ ஸாரிபுத்த, பி⁴க்கு²னா கதமே த⁴ம்மா யோனிஸோ மனஸி காதப்³பா³’’தி? ‘‘ஸோதாபன்னேனபி கோ², ஆவுஸோ கொட்டி²க, பி⁴க்கு²னா இமே பஞ்சுபாதா³னக்க²ந்தா⁴ அனிச்சதோ…பே॰… அனத்ததோ யோனிஸோ மனஸி காதப்³பா³. டா²னங் கோ² பனேதங், ஆவுஸோ, விஜ்ஜதி யங் ஸோதாபன்னோ பி⁴க்கு² இமே பஞ்சுபாதா³னக்க²ந்தே⁴ அனிச்சதோ…பே॰… அனத்ததோ யோனிஸோ மனஸி கரொந்தோ ஸகதா³கா³மிப²லங் ஸச்சி²கரெய்யா’’தி.
‘‘Sotāpannena panāvuso sāriputta, bhikkhunā katame dhammā yoniso manasi kātabbā’’ti? ‘‘Sotāpannenapi kho, āvuso koṭṭhika, bhikkhunā ime pañcupādānakkhandhā aniccato…pe… anattato yoniso manasi kātabbā. Ṭhānaṃ kho panetaṃ, āvuso, vijjati yaṃ sotāpanno bhikkhu ime pañcupādānakkhandhe aniccato…pe… anattato yoniso manasi karonto sakadāgāmiphalaṃ sacchikareyyā’’ti.
‘‘ஸகதா³கா³மினா பனாவுஸோ ஸாரிபுத்த, பி⁴க்கு²னா கதமே த⁴ம்மா யோனிஸோ மனஸி காதப்³பா³’’தி? ‘‘ஸகதா³கா³மினாபி கோ², ஆவுஸோ கொட்டி²க, பி⁴க்கு²னா இமே பஞ்சுபாதா³னக்க²ந்தா⁴ அனிச்சதோ…பே॰… அனத்ததோ யோனிஸோ மனஸி காதப்³பா³. டா²னங் கோ² பனேதங், ஆவுஸோ, விஜ்ஜதி யங் ஸகதா³கா³மீ பி⁴க்கு² இமே பஞ்சுபாதா³னக்க²ந்தே⁴ அனிச்சதோ…பே॰… அனத்ததோ யோனிஸோ மனஸி கரொந்தோ அனாகா³மிப²லங் ஸச்சி²கரெய்யா’’தி.
‘‘Sakadāgāminā panāvuso sāriputta, bhikkhunā katame dhammā yoniso manasi kātabbā’’ti? ‘‘Sakadāgāmināpi kho, āvuso koṭṭhika, bhikkhunā ime pañcupādānakkhandhā aniccato…pe… anattato yoniso manasi kātabbā. Ṭhānaṃ kho panetaṃ, āvuso, vijjati yaṃ sakadāgāmī bhikkhu ime pañcupādānakkhandhe aniccato…pe… anattato yoniso manasi karonto anāgāmiphalaṃ sacchikareyyā’’ti.
‘‘அனாகா³மினா பனாவுஸோ ஸாரிபுத்த, பி⁴க்கு²னா கதமே த⁴ம்மா யோனிஸோ மனஸி காதப்³பா³’’தி? ‘‘அனாகா³மினாபி கோ², ஆவுஸோ கொட்டி²க, பி⁴க்கு²னா இமே பஞ்சுபாதா³னக்க²ந்தா⁴ அனிச்சதோ…பே॰… அனத்ததோ யோனிஸோ மனஸி காதப்³பா³. டா²னங் கோ² பனேதங், ஆவுஸோ, விஜ்ஜதி யங் அனாகா³மீ பி⁴க்கு² இமே பஞ்சுபாதா³னக்க²ந்தே⁴ அனிச்சதோ…பே॰… அனத்ததோ யோனிஸோ மனஸி கரொந்தோ அரஹத்தங் ஸச்சி²கரெய்யா’’தி.
‘‘Anāgāminā panāvuso sāriputta, bhikkhunā katame dhammā yoniso manasi kātabbā’’ti? ‘‘Anāgāmināpi kho, āvuso koṭṭhika, bhikkhunā ime pañcupādānakkhandhā aniccato…pe… anattato yoniso manasi kātabbā. Ṭhānaṃ kho panetaṃ, āvuso, vijjati yaṃ anāgāmī bhikkhu ime pañcupādānakkhandhe aniccato…pe… anattato yoniso manasi karonto arahattaṃ sacchikareyyā’’ti.
‘‘அரஹதா பனாவுஸோ ஸாரிபுத்த, கதமே த⁴ம்மா யோனிஸோ மனஸி காதப்³பா³’’தி? ‘‘அரஹதாபி கோ², ஆவுஸோ கொட்டி²க, இமே பஞ்சுபாதா³னக்க²ந்தே⁴ அனிச்சதோ து³க்க²தோ ரோக³தோ க³ண்ட³தோ ஸல்லதோ அக⁴தோ ஆபா³த⁴தோ பரதோ பலோகதோ ஸுஞ்ஞதோ அனத்ததோ யோனிஸோ மனஸி காதப்³பா³. நத்தி², க்²வாவுஸோ, அரஹதோ உத்தரி கரணீயங் கதஸ்ஸ வா பதிசயோ ; அபி ச இமே த⁴ம்மா பா⁴விதா ப³ஹுலீகதா தி³ட்ட²த⁴ம்மஸுக²விஹாரா சேவ ஸங்வத்தந்தி ஸதிஸம்பஜஞ்ஞா சா’’தி. த³ஸமங்.
‘‘Arahatā panāvuso sāriputta, katame dhammā yoniso manasi kātabbā’’ti? ‘‘Arahatāpi kho, āvuso koṭṭhika, ime pañcupādānakkhandhe aniccato dukkhato rogato gaṇḍato sallato aghato ābādhato parato palokato suññato anattato yoniso manasi kātabbā. Natthi, khvāvuso, arahato uttari karaṇīyaṃ katassa vā paticayo ; api ca ime dhammā bhāvitā bahulīkatā diṭṭhadhammasukhavihārā ceva saṃvattanti satisampajaññā cā’’ti. Dasamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 10. ஸீலவந்தஸுத்தவண்ணனா • 10. Sīlavantasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. ஸீலவந்தஸுத்தவண்ணனா • 10. Sīlavantasuttavaṇṇanā
