| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. সীলৰন্তসুত্তং
10. Sīlavantasuttaṃ
১২২. একং সমযং আযস্মা চ সারিপুত্তো আযস্মা চ মহাকোট্ঠিকো 1 বারাণসিযং ৰিহরন্তি ইসিপতনে মিগদাযে। অথ খো আযস্মা মহাকোট্ঠিকো সাযন্হসমযং পটিসল্লানা ৰুট্ঠিতো যেনাযস্মা সারিপুত্তো তেনুপসঙ্কমি…পে॰… এতদৰোচ – ‘‘সীলৰতাৰুসো, সারিপুত্ত, ভিক্খুনা কতমে ধম্মা যোনিসো মনসিকাতব্বা’’তি? ‘‘সীলৰতাৰুসো, কোট্ঠিক, ভিক্খুনা পঞ্চুপাদানক্খন্ধা অনিচ্চতো দুক্খতো রোগতো গণ্ডতো সল্লতো অঘতো আবাধতো পরতো পলোকতো সুঞ্ঞতো অনত্ততো যোনিসো মনসি কাতব্বা। কতমে পঞ্চ? সেয্যথিদং – রূপুপাদানক্খন্ধো, ৰেদনুপাদানক্খন্ধো, সঞ্ঞুপাদানক্খন্ধো, সঙ্খারুপাদানক্খন্ধো, ৰিঞ্ঞাণুপাদানক্খন্ধো। সীলৰতাৰুসো, কোট্ঠিক, ভিক্খুনা ইমে পঞ্চুপাদানক্খন্ধা অনিচ্চতো দুক্খতো রোগতো গণ্ডতো সল্লতো অঘতো আবাধতো পরতো পলোকতো সুঞ্ঞতো অনত্ততো যোনিসো মনসি কাতব্বা। ঠানং খো পনেতং, আৰুসো, ৰিজ্জতি যং সীলৰা ভিক্খু ইমে পঞ্চুপাদানক্খন্ধে অনিচ্চতো…পে॰… অনত্ততো যোনিসো মনসি করোন্তো সোতাপত্তিফলং সচ্ছিকরেয্যা’’তি।
122. Ekaṃ samayaṃ āyasmā ca sāriputto āyasmā ca mahākoṭṭhiko 2 bārāṇasiyaṃ viharanti isipatane migadāye. Atha kho āyasmā mahākoṭṭhiko sāyanhasamayaṃ paṭisallānā vuṭṭhito yenāyasmā sāriputto tenupasaṅkami…pe… etadavoca – ‘‘sīlavatāvuso, sāriputta, bhikkhunā katame dhammā yoniso manasikātabbā’’ti? ‘‘Sīlavatāvuso, koṭṭhika, bhikkhunā pañcupādānakkhandhā aniccato dukkhato rogato gaṇḍato sallato aghato ābādhato parato palokato suññato anattato yoniso manasi kātabbā. Katame pañca? Seyyathidaṃ – rūpupādānakkhandho, vedanupādānakkhandho, saññupādānakkhandho, saṅkhārupādānakkhandho, viññāṇupādānakkhandho. Sīlavatāvuso, koṭṭhika, bhikkhunā ime pañcupādānakkhandhā aniccato dukkhato rogato gaṇḍato sallato aghato ābādhato parato palokato suññato anattato yoniso manasi kātabbā. Ṭhānaṃ kho panetaṃ, āvuso, vijjati yaṃ sīlavā bhikkhu ime pañcupādānakkhandhe aniccato…pe… anattato yoniso manasi karonto sotāpattiphalaṃ sacchikareyyā’’ti.
‘‘সোতাপন্নেন পনাৰুসো সারিপুত্ত, ভিক্খুনা কতমে ধম্মা যোনিসো মনসি কাতব্বা’’তি? ‘‘সোতাপন্নেনপি খো, আৰুসো কোট্ঠিক, ভিক্খুনা ইমে পঞ্চুপাদানক্খন্ধা অনিচ্চতো…পে॰… অনত্ততো যোনিসো মনসি কাতব্বা। ঠানং খো পনেতং, আৰুসো, ৰিজ্জতি যং সোতাপন্নো ভিক্খু ইমে পঞ্চুপাদানক্খন্ধে অনিচ্চতো…পে॰… অনত্ততো যোনিসো মনসি করোন্তো সকদাগামিফলং সচ্ছিকরেয্যা’’তি।
‘‘Sotāpannena panāvuso sāriputta, bhikkhunā katame dhammā yoniso manasi kātabbā’’ti? ‘‘Sotāpannenapi kho, āvuso koṭṭhika, bhikkhunā ime pañcupādānakkhandhā aniccato…pe… anattato yoniso manasi kātabbā. Ṭhānaṃ kho panetaṃ, āvuso, vijjati yaṃ sotāpanno bhikkhu ime pañcupādānakkhandhe aniccato…pe… anattato yoniso manasi karonto sakadāgāmiphalaṃ sacchikareyyā’’ti.
‘‘সকদাগামিনা পনাৰুসো সারিপুত্ত, ভিক্খুনা কতমে ধম্মা যোনিসো মনসি কাতব্বা’’তি? ‘‘সকদাগামিনাপি খো, আৰুসো কোট্ঠিক, ভিক্খুনা ইমে পঞ্চুপাদানক্খন্ধা অনিচ্চতো…পে॰… অনত্ততো যোনিসো মনসি কাতব্বা। ঠানং খো পনেতং, আৰুসো, ৰিজ্জতি যং সকদাগামী ভিক্খু ইমে পঞ্চুপাদানক্খন্ধে অনিচ্চতো…পে॰… অনত্ততো যোনিসো মনসি করোন্তো অনাগামিফলং সচ্ছিকরেয্যা’’তি।
‘‘Sakadāgāminā panāvuso sāriputta, bhikkhunā katame dhammā yoniso manasi kātabbā’’ti? ‘‘Sakadāgāmināpi kho, āvuso koṭṭhika, bhikkhunā ime pañcupādānakkhandhā aniccato…pe… anattato yoniso manasi kātabbā. Ṭhānaṃ kho panetaṃ, āvuso, vijjati yaṃ sakadāgāmī bhikkhu ime pañcupādānakkhandhe aniccato…pe… anattato yoniso manasi karonto anāgāmiphalaṃ sacchikareyyā’’ti.
‘‘অনাগামিনা পনাৰুসো সারিপুত্ত, ভিক্খুনা কতমে ধম্মা যোনিসো মনসি কাতব্বা’’তি? ‘‘অনাগামিনাপি খো, আৰুসো কোট্ঠিক, ভিক্খুনা ইমে পঞ্চুপাদানক্খন্ধা অনিচ্চতো…পে॰… অনত্ততো যোনিসো মনসি কাতব্বা। ঠানং খো পনেতং, আৰুসো, ৰিজ্জতি যং অনাগামী ভিক্খু ইমে পঞ্চুপাদানক্খন্ধে অনিচ্চতো…পে॰… অনত্ততো যোনিসো মনসি করোন্তো অরহত্তং সচ্ছিকরেয্যা’’তি।
‘‘Anāgāminā panāvuso sāriputta, bhikkhunā katame dhammā yoniso manasi kātabbā’’ti? ‘‘Anāgāmināpi kho, āvuso koṭṭhika, bhikkhunā ime pañcupādānakkhandhā aniccato…pe… anattato yoniso manasi kātabbā. Ṭhānaṃ kho panetaṃ, āvuso, vijjati yaṃ anāgāmī bhikkhu ime pañcupādānakkhandhe aniccato…pe… anattato yoniso manasi karonto arahattaṃ sacchikareyyā’’ti.
‘‘অরহতা পনাৰুসো সারিপুত্ত, কতমে ধম্মা যোনিসো মনসি কাতব্বা’’তি? ‘‘অরহতাপি খো, আৰুসো কোট্ঠিক, ইমে পঞ্চুপাদানক্খন্ধে অনিচ্চতো দুক্খতো রোগতো গণ্ডতো সল্লতো অঘতো আবাধতো পরতো পলোকতো সুঞ্ঞতো অনত্ততো যোনিসো মনসি কাতব্বা। নত্থি, খ্ৰাৰুসো, অরহতো উত্তরি করণীযং কতস্স ৰা পতিচযো ; অপি চ ইমে ধম্মা ভাৰিতা বহুলীকতা দিট্ঠধম্মসুখৰিহারা চেৰ সংৰত্তন্তি সতিসম্পজঞ্ঞা চা’’তি। দসমং।
‘‘Arahatā panāvuso sāriputta, katame dhammā yoniso manasi kātabbā’’ti? ‘‘Arahatāpi kho, āvuso koṭṭhika, ime pañcupādānakkhandhe aniccato dukkhato rogato gaṇḍato sallato aghato ābādhato parato palokato suññato anattato yoniso manasi kātabbā. Natthi, khvāvuso, arahato uttari karaṇīyaṃ katassa vā paticayo ; api ca ime dhammā bhāvitā bahulīkatā diṭṭhadhammasukhavihārā ceva saṃvattanti satisampajaññā cā’’ti. Dasamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. সীলৰন্তসুত্তৰণ্ণনা • 10. Sīlavantasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১০. সীলৰন্তসুত্তৰণ্ণনা • 10. Sīlavantasuttavaṇṇanā
