| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. සීලවන්‌තසුත්‌තං
10. Sīlavantasuttaṃ
122. එකං සමයං ආයස්‌මා ච සාරිපුත්‌තො ආයස්‌මා ච මහාකොට්‌ඨිකො 1 බාරාණසියං විහරන්‌ති ඉසිපතනෙ මිගදායෙ. අථ ඛො ආයස්‌මා මහාකොට්‌ඨිකො සායන්‌හසමයං පටිසල්‌ලානා වුට්‌ඨිතො යෙනායස්‌මා සාරිපුත්‌තො තෙනුපසඞ්‌කමි…පෙ.… එතදවොච – ‘‘සීලවතාවුසො, සාරිපුත්‌ත, භික්‌ඛුනා කතමෙ ධම්‌මා යොනිසො මනසිකාතබ්‌බා’’ති? ‘‘සීලවතාවුසො, කොට්‌ඨික, භික්‌ඛුනා පඤ්‌චුපාදානක්‌ඛන්‌ධා අනිච්‌චතො දුක්‌ඛතො රොගතො ගණ්‌ඩතො සල්‌ලතො අඝතො ආබාධතො පරතො පලොකතො සුඤ්‌ඤතො අනත්‌තතො යොනිසො මනසි කාතබ්‌බා. කතමෙ පඤ්‌ච? සෙය්‍යථිදං – රූපුපාදානක්‌ඛන්‌ධො, වෙදනුපාදානක්‌ඛන්‌ධො, සඤ්‌ඤුපාදානක්‌ඛන්‌ධො, සඞ්‌ඛාරුපාදානක්‌ඛන්‌ධො, විඤ්‌ඤාණුපාදානක්‌ඛන්‌ධො. සීලවතාවුසො, කොට්‌ඨික, භික්‌ඛුනා ඉමෙ පඤ්‌චුපාදානක්‌ඛන්‌ධා අනිච්‌චතො දුක්‌ඛතො රොගතො ගණ්‌ඩතො සල්‌ලතො අඝතො ආබාධතො පරතො පලොකතො සුඤ්‌ඤතො අනත්‌තතො යොනිසො මනසි කාතබ්‌බා. ඨානං ඛො පනෙතං, ආවුසො, විජ්‌ජති යං සීලවා භික්‌ඛු ඉමෙ පඤ්‌චුපාදානක්‌ඛන්‌ධෙ අනිච්‌චතො…පෙ.… අනත්‌තතො යොනිසො මනසි කරොන්‌තො සොතාපත්‌තිඵලං සච්‌ඡිකරෙය්‍යා’’ති.
122. Ekaṃ samayaṃ āyasmā ca sāriputto āyasmā ca mahākoṭṭhiko 2 bārāṇasiyaṃ viharanti isipatane migadāye. Atha kho āyasmā mahākoṭṭhiko sāyanhasamayaṃ paṭisallānā vuṭṭhito yenāyasmā sāriputto tenupasaṅkami…pe… etadavoca – ‘‘sīlavatāvuso, sāriputta, bhikkhunā katame dhammā yoniso manasikātabbā’’ti? ‘‘Sīlavatāvuso, koṭṭhika, bhikkhunā pañcupādānakkhandhā aniccato dukkhato rogato gaṇḍato sallato aghato ābādhato parato palokato suññato anattato yoniso manasi kātabbā. Katame pañca? Seyyathidaṃ – rūpupādānakkhandho, vedanupādānakkhandho, saññupādānakkhandho, saṅkhārupādānakkhandho, viññāṇupādānakkhandho. Sīlavatāvuso, koṭṭhika, bhikkhunā ime pañcupādānakkhandhā aniccato dukkhato rogato gaṇḍato sallato aghato ābādhato parato palokato suññato anattato yoniso manasi kātabbā. Ṭhānaṃ kho panetaṃ, āvuso, vijjati yaṃ sīlavā bhikkhu ime pañcupādānakkhandhe aniccato…pe… anattato yoniso manasi karonto sotāpattiphalaṃ sacchikareyyā’’ti.
‘‘සොතාපන්‌නෙන පනාවුසො සාරිපුත්‌ත, භික්‌ඛුනා කතමෙ ධම්‌මා යොනිසො මනසි කාතබ්‌බා’’ති? ‘‘සොතාපන්‌නෙනපි ඛො, ආවුසො කොට්‌ඨික, භික්‌ඛුනා ඉමෙ පඤ්‌චුපාදානක්‌ඛන්‌ධා අනිච්‌චතො…පෙ.… අනත්‌තතො යොනිසො මනසි කාතබ්‌බා. ඨානං ඛො පනෙතං, ආවුසො, විජ්‌ජති යං සොතාපන්‌නො භික්‌ඛු ඉමෙ පඤ්‌චුපාදානක්‌ඛන්‌ධෙ අනිච්‌චතො…පෙ.… අනත්‌තතො යොනිසො මනසි කරොන්‌තො සකදාගාමිඵලං සච්‌ඡිකරෙය්‍යා’’ති.
‘‘Sotāpannena panāvuso sāriputta, bhikkhunā katame dhammā yoniso manasi kātabbā’’ti? ‘‘Sotāpannenapi kho, āvuso koṭṭhika, bhikkhunā ime pañcupādānakkhandhā aniccato…pe… anattato yoniso manasi kātabbā. Ṭhānaṃ kho panetaṃ, āvuso, vijjati yaṃ sotāpanno bhikkhu ime pañcupādānakkhandhe aniccato…pe… anattato yoniso manasi karonto sakadāgāmiphalaṃ sacchikareyyā’’ti.
‘‘සකදාගාමිනා පනාවුසො සාරිපුත්‌ත, භික්‌ඛුනා කතමෙ ධම්‌මා යොනිසො මනසි කාතබ්‌බා’’ති? ‘‘සකදාගාමිනාපි ඛො, ආවුසො කොට්‌ඨික, භික්‌ඛුනා ඉමෙ පඤ්‌චුපාදානක්‌ඛන්‌ධා අනිච්‌චතො…පෙ.… අනත්‌තතො යොනිසො මනසි කාතබ්‌බා. ඨානං ඛො පනෙතං, ආවුසො, විජ්‌ජති යං සකදාගාමී භික්‌ඛු ඉමෙ පඤ්‌චුපාදානක්‌ඛන්‌ධෙ අනිච්‌චතො…පෙ.… අනත්‌තතො යොනිසො මනසි කරොන්‌තො අනාගාමිඵලං සච්‌ඡිකරෙය්‍යා’’ති.
‘‘Sakadāgāminā panāvuso sāriputta, bhikkhunā katame dhammā yoniso manasi kātabbā’’ti? ‘‘Sakadāgāmināpi kho, āvuso koṭṭhika, bhikkhunā ime pañcupādānakkhandhā aniccato…pe… anattato yoniso manasi kātabbā. Ṭhānaṃ kho panetaṃ, āvuso, vijjati yaṃ sakadāgāmī bhikkhu ime pañcupādānakkhandhe aniccato…pe… anattato yoniso manasi karonto anāgāmiphalaṃ sacchikareyyā’’ti.
‘‘අනාගාමිනා පනාවුසො සාරිපුත්‌ත, භික්‌ඛුනා කතමෙ ධම්‌මා යොනිසො මනසි කාතබ්‌බා’’ති? ‘‘අනාගාමිනාපි ඛො, ආවුසො කොට්‌ඨික, භික්‌ඛුනා ඉමෙ පඤ්‌චුපාදානක්‌ඛන්‌ධා අනිච්‌චතො…පෙ.… අනත්‌තතො යොනිසො මනසි කාතබ්‌බා. ඨානං ඛො පනෙතං, ආවුසො, විජ්‌ජති යං අනාගාමී භික්‌ඛු ඉමෙ පඤ්‌චුපාදානක්‌ඛන්‌ධෙ අනිච්‌චතො…පෙ.… අනත්‌තතො යොනිසො මනසි කරොන්‌තො අරහත්‌තං සච්‌ඡිකරෙය්‍යා’’ති.
‘‘Anāgāminā panāvuso sāriputta, bhikkhunā katame dhammā yoniso manasi kātabbā’’ti? ‘‘Anāgāmināpi kho, āvuso koṭṭhika, bhikkhunā ime pañcupādānakkhandhā aniccato…pe… anattato yoniso manasi kātabbā. Ṭhānaṃ kho panetaṃ, āvuso, vijjati yaṃ anāgāmī bhikkhu ime pañcupādānakkhandhe aniccato…pe… anattato yoniso manasi karonto arahattaṃ sacchikareyyā’’ti.
‘‘අරහතා පනාවුසො සාරිපුත්‌ත, කතමෙ ධම්‌මා යොනිසො මනසි කාතබ්‌බා’’ති? ‘‘අරහතාපි ඛො, ආවුසො කොට්‌ඨික, ඉමෙ පඤ්‌චුපාදානක්‌ඛන්‌ධෙ අනිච්‌චතො දුක්‌ඛතො රොගතො ගණ්‌ඩතො සල්‌ලතො අඝතො ආබාධතො පරතො පලොකතො සුඤ්‌ඤතො අනත්‌තතො යොනිසො මනසි කාතබ්‌බා. නත්‌ථි, ඛ්‌වාවුසො, අරහතො උත්‌තරි කරණීයං කතස්‌ස වා පතිචයො ; අපි ච ඉමෙ ධම්‌මා භාවිතා බහුලීකතා දිට්‌ඨධම්‌මසුඛවිහාරා චෙව සංවත්‌තන්‌ති සතිසම්‌පජඤ්‌ඤා චා’’ති. දසමං.
‘‘Arahatā panāvuso sāriputta, katame dhammā yoniso manasi kātabbā’’ti? ‘‘Arahatāpi kho, āvuso koṭṭhika, ime pañcupādānakkhandhe aniccato dukkhato rogato gaṇḍato sallato aghato ābādhato parato palokato suññato anattato yoniso manasi kātabbā. Natthi, khvāvuso, arahato uttari karaṇīyaṃ katassa vā paticayo ; api ca ime dhammā bhāvitā bahulīkatā diṭṭhadhammasukhavihārā ceva saṃvattanti satisampajaññā cā’’ti. Dasamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 10. සීලවන්‌තසුත්‌තවණ්‌ණනා • 10. Sīlavantasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 10. සීලවන්‌තසුත්‌තවණ්‌ණනා • 10. Sīlavantasuttavaṇṇanā
