| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༦. སིལཱཡཱུཔསུཏྟཾ
6. Silāyūpasuttaṃ
༢༦. ཨེཀཾ སམཡཾ ཨཱཡསྨཱ ཙ སཱརིཔུཏྟོ ཨཱཡསྨཱ ཙ ཙནྡིཀཱཔུཏྟོ རཱཛགཧེ ཝིཧརནྟི ཝེལུ༹ཝནེ ཀལནྡཀནིཝཱཔེ། ཏཏྲ ཁོ ཨཱཡསྨཱ ཙནྡིཀཱཔུཏྟོ བྷིཀྑཱུ ཨཱམནྟེསི ( ) 1 – ‘‘དེཝདཏྟོ, ཨཱཝུསོ, བྷིཀྑཱུནཾ ཨེཝཾ དྷམྨཾ དེསེཏི – ‘ཡཏོ ཁོ, ཨཱཝུསོ, བྷིཀྑུནོ ཙེཏསཱ ཙིཏཾ ཧོཏི, ཏསྶེཏཾ བྷིཀྑུནོ ཀལླཾ ཝེཡྻཱཀརཎཱཡ – ‘ཁཱིཎཱ ཛཱཏི, ཝུསིཏཾ བྲཧྨཙརིཡཾ, ཀཏཾ ཀརཎཱིཡཾ, ནཱཔརཾ ཨིཏྠཏྟཱཡཱཏི པཛཱནཱམཱི’’’ཏི།
26. Ekaṃ samayaṃ āyasmā ca sāriputto āyasmā ca candikāputto rājagahe viharanti veḷuvane kalandakanivāpe. Tatra kho āyasmā candikāputto bhikkhū āmantesi ( ) 2 – ‘‘devadatto, āvuso, bhikkhūnaṃ evaṃ dhammaṃ deseti – ‘yato kho, āvuso, bhikkhuno cetasā citaṃ hoti, tassetaṃ bhikkhuno kallaṃ veyyākaraṇāya – ‘khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyāti pajānāmī’’’ti.
ཨེཝཾ ཝུཏྟེ ཨཱཡསྨཱ སཱརིཔུཏྟོ ཨཱཡསྨནྟཾ ཙནྡིཀཱཔུཏྟཾ ཨེཏདཝོཙ – ‘‘ན ཁོ, ཨཱཝུསོ ཙནྡིཀཱཔུཏྟ, དེཝདཏྟོ བྷིཀྑཱུནཾ ཨེཝཾ དྷམྨཾ དེསེཏི – ‘ཡཏོ ཁོ, ཨཱཝུསོ, བྷིཀྑུནོ ཙེཏསཱ ཙིཏཾ ཧོཏི, ཏསྶེཏཾ བྷིཀྑུནོ ཀལླཾ ཝེཡྻཱཀརཎཱཡ – ཁཱིཎཱ ཛཱཏི, ཝུསིཏཾ བྲཧྨཙརིཡཾ, ཀཏཾ ཀརཎཱིཡཾ, ནཱཔརཾ ཨིཏྠཏྟཱཡཱཏི པཛཱནཱམཱི’ཏི། ཨེཝཉྩ ཁོ, ཨཱཝུསོ, ཙནྡིཀཱཔུཏྟ, དེཝདཏྟོ བྷིཀྑཱུནཾ དྷམྨཾ དེསེཏི – ‘ཡཏོ ཁོ, ཨཱཝུསོ, བྷིཀྑུནོ ཙེཏསཱ ཙིཏྟཾ སུཔརིཙིཏཾ ཧོཏི, ཏསྶེཏཾ བྷིཀྑུནོ ཀལླཾ ཝེཡྻཱཀརཎཱཡ – ཁཱིཎཱ ཛཱཏི, ཝུསིཏཾ བྲཧྨཙརིཡཾ, ཀཏཾ ཀརཎཱིཡཾ, ནཱཔརཾ ཨིཏྠཏྟཱཡཱཏི པཛཱནཱམཱི’’’ཏི།
Evaṃ vutte āyasmā sāriputto āyasmantaṃ candikāputtaṃ etadavoca – ‘‘na kho, āvuso candikāputta, devadatto bhikkhūnaṃ evaṃ dhammaṃ deseti – ‘yato kho, āvuso, bhikkhuno cetasā citaṃ hoti, tassetaṃ bhikkhuno kallaṃ veyyākaraṇāya – khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyāti pajānāmī’ti. Evañca kho, āvuso, candikāputta, devadatto bhikkhūnaṃ dhammaṃ deseti – ‘yato kho, āvuso, bhikkhuno cetasā cittaṃ suparicitaṃ hoti, tassetaṃ bhikkhuno kallaṃ veyyākaraṇāya – khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyāti pajānāmī’’’ti.
དུཏིཡམྤི ཁོ ཨཱཡསྨཱ ཙནྡིཀཱཔུཏྟོ བྷིཀྑཱུ ཨཱམནྟེསི – ‘‘དེཝདཏྟོ, ཨཱཝུསོ, བྷིཀྑཱུནཾ ཨེཝཾ དྷམྨཾ དེསེཏི – ‘ཡཏོ ཁོ, ཨཱཝུསོ, བྷིཀྑུནོ ཙེཏསཱ ཙིཏཾ ཧོཏི, ཏསྶེཏཾ བྷིཀྑུནོ ཀལླཾ ཝེཡྻཱཀརཎཱཡ – ཁཱིཎཱ ཛཱཏི, ཝུསིཏཾ བྲཧྨཙརིཡཾ, ཀཏཾ ཀརཎཱིཡཾ, ནཱཔརཾ ཨིཏྠཏྟཱཡཱཏི པཛཱནཱམཱི’’’ཏི། དུཏིཡམྤི ཁོ ཨཱཡསྨཱ སཱརིཔུཏྟོ ཨཱཡསྨནྟཾ ཙནྡིཀཱཔུཏྟཾ ཨེཏདཝོཙ – ‘‘ན ཁོ, ཨཱཝུསོ ཙནྡིཀཱཔུཏྟ, དེཝདཏྟོ བྷིཀྑཱུནཾ ཨེཝཾ དྷམྨཾ དེསེཏི – ‘ཡཏོ ཁོ, ཨཱཝུསོ, བྷིཀྑུནོ ཙེཏསཱ ཙིཏཾ ཧོཏི, ཏསྶེཏཾ བྷིཀྑུནོ ཀལླཾ ཝེཡྻཱཀརཎཱཡ – ཁཱིཎཱ ཛཱཏི, ཝུསིཏཾ བྲཧྨཙརིཡཾ, ཀཏཾ ཀརཎཱིཡཾ, ནཱཔརཾ ཨིཏྠཏྟཱཡཱཏི པཛཱནཱམཱི’ཏི། ཨེཝཉྩ ཁོ, ཨཱཝུསོ ཙནྡིཀཱཔུཏྟ, དེཝདཏྟོ བྷིཀྑཱུནཾ དྷམྨཾ དེསེཏི – ‘ཡཏོ ཁོ, ཨཱཝུསོ, བྷིཀྑུནོ ཙེཏསཱ ཙིཏྟཾ སུཔརིཙིཏཾ ཧོཏི, ཏསྶེཏཾ བྷིཀྑུནོ ཀལླཾ ཝེཡྻཱཀརཎཱཡ – ཁཱིཎཱ ཛཱཏི, ཝུསིཏཾ བྲཧྨཙརིཡཾ, ཀཏཾ ཀརཎཱིཡཾ, ནཱཔརཾ ཨིཏྠཏྟཱཡཱཏི པཛཱནཱམཱི’’’ཏི།
Dutiyampi kho āyasmā candikāputto bhikkhū āmantesi – ‘‘devadatto, āvuso, bhikkhūnaṃ evaṃ dhammaṃ deseti – ‘yato kho, āvuso, bhikkhuno cetasā citaṃ hoti, tassetaṃ bhikkhuno kallaṃ veyyākaraṇāya – khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyāti pajānāmī’’’ti. Dutiyampi kho āyasmā sāriputto āyasmantaṃ candikāputtaṃ etadavoca – ‘‘na kho, āvuso candikāputta, devadatto bhikkhūnaṃ evaṃ dhammaṃ deseti – ‘yato kho, āvuso, bhikkhuno cetasā citaṃ hoti, tassetaṃ bhikkhuno kallaṃ veyyākaraṇāya – khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyāti pajānāmī’ti. Evañca kho, āvuso candikāputta, devadatto bhikkhūnaṃ dhammaṃ deseti – ‘yato kho, āvuso, bhikkhuno cetasā cittaṃ suparicitaṃ hoti, tassetaṃ bhikkhuno kallaṃ veyyākaraṇāya – khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyāti pajānāmī’’’ti.
ཏཏིཡམྤི ཁོ ཨཱཡསྨཱ ཙནྡིཀཱཔུཏྟོ བྷིཀྑཱུ ཨཱམནྟེསི – ‘‘དེཝདཏྟོ, ཨཱཝུསོ, བྷིཀྑཱུནཾ ཨེཝཾ དྷམྨཾ དེསེཏི – ‘ཡཏོ ཁོ, ཨཱཝུསོ, བྷིཀྑུནོ ཙེཏསཱ ཙིཏཾ ཧོཏི, ཏསྶེཏཾ བྷིཀྑུནོ ཀལླཾ ཝེཡྻཱཀརཎཱཡ – ཁཱིཎཱ ཛཱཏི, ཝུསིཏཾ བྲཧྨཙརིཡཾ, ཀཏཾ ཀརཎཱིཡཾ, ནཱཔརཾ ཨིཏྠཏྟཱཡཱཏི པཛཱནཱམཱི’’’ཏི། ཏཏིཡམྤི ཁོ ཨཱཡསྨཱ སཱརིཔུཏྟོ ཨཱཡསྨནྟཾ ཙནྡིཀཱཔུཏྟཾ ཨེཏདཝོཙ – ‘‘ན ཁོ, ཨཱཝུསོ ཙནྡིཀཱཔུཏྟ, དེཝདཏྟོ བྷིཀྑཱུནཾ ཨེཝཾ དྷམྨཾ དེསེཏི – ‘ཡཏོ ཁོ, ཨཱཝུསོ, བྷིཀྑུནོ ཙེཏསཱ ཙིཏཾ ཧོཏི, ཏསྶེཏཾ བྷིཀྑུནོ ཀལླཾ ཝེཡྻཱཀརཎཱཡ – ཁཱིཎཱ ཛཱཏི, ཝུསིཏཾ བྲཧྨཙརིཡཾ, ཀཏཾ ཀརཎཱིཡཾ, ནཱཔརཾ ཨིཏྠཏྟཱཡཱཏི པཛཱནཱམཱི’ཏི། ཨེཝཉྩ ཁོ, ཨཱཝུསོ ཙནྡིཀཱཔུཏྟ, དེཝདཏྟོ བྷིཀྑཱུནཾ དྷམྨཾ དེསེཏི – ‘ཡཏོ ཁོ, ཨཱཝུསོ, བྷིཀྑུནོ ཙེཏསཱ ཙིཏྟཾ སུཔརིཙིཏཾ ཧོཏི, ཏསྶེཏཾ བྷིཀྑུནོ ཀལླཾ ཝེཡྻཱཀརཎཱཡ – ཁཱིཎཱ ཛཱཏི, ཝུསིཏཾ བྲཧྨཙརིཡཾ, ཀཏཾ ཀརཎཱིཡཾ, ནཱཔརཾ ཨིཏྠཏྟཱཡཱཏི པཛཱནཱམཱི’’’ཏི།
Tatiyampi kho āyasmā candikāputto bhikkhū āmantesi – ‘‘devadatto, āvuso, bhikkhūnaṃ evaṃ dhammaṃ deseti – ‘yato kho, āvuso, bhikkhuno cetasā citaṃ hoti, tassetaṃ bhikkhuno kallaṃ veyyākaraṇāya – khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyāti pajānāmī’’’ti. Tatiyampi kho āyasmā sāriputto āyasmantaṃ candikāputtaṃ etadavoca – ‘‘na kho, āvuso candikāputta, devadatto bhikkhūnaṃ evaṃ dhammaṃ deseti – ‘yato kho, āvuso, bhikkhuno cetasā citaṃ hoti, tassetaṃ bhikkhuno kallaṃ veyyākaraṇāya – khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyāti pajānāmī’ti. Evañca kho, āvuso candikāputta, devadatto bhikkhūnaṃ dhammaṃ deseti – ‘yato kho, āvuso, bhikkhuno cetasā cittaṃ suparicitaṃ hoti, tassetaṃ bhikkhuno kallaṃ veyyākaraṇāya – khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyāti pajānāmī’’’ti.
‘‘ཀཐཉྩ, ཨཱཝུསོ, བྷིཀྑུནོ ཙེཏསཱ ཙིཏྟཾ སུཔརིཙིཏཾ ཧོཏི? ‘ཝཱིཏརཱགཾ མེ ཙིཏྟ’ནྟི ཙེཏསཱ ཙིཏྟཾ སུཔརིཙིཏཾ ཧོཏི; ‘ཝཱིཏདོསཾ མེ ཙིཏྟ’ནྟི ཙེཏསཱ ཙིཏྟཾ སུཔརིཙིཏཾ ཧོཏི; ‘ཝཱིཏམོཧཾ མེ ཙིཏྟ’ནྟི ཙེཏསཱ ཙིཏྟཾ སུཔརིཙིཏཾ ཧོཏི; ‘ཨསརཱགདྷམྨཾ མེ ཙིཏྟ’ནྟི ཙེཏསཱ ཙིཏྟཾ སུཔརིཙིཏཾ ཧོཏི; ‘ཨསདོསདྷམྨཾ མེ ཙིཏྟ’ནྟི ཙེཏསཱ ཙིཏྟཾ སུཔརིཙིཏཾ ཧོཏི; ‘ཨསམོཧདྷམྨཾ མེ ཙིཏྟ’ནྟི ཙེཏསཱ ཙིཏྟཾ སུཔརིཙིཏཾ ཧོཏི; ‘ཨནཱཝཏྟིདྷམྨཾ མེ ཙིཏྟཾ ཀཱམབྷཝཱཡཱ’ཏི ཙེཏསཱ ཙིཏྟཾ སུཔརིཙིཏཾ ཧོཏི; ‘ཨནཱཝཏྟིདྷམྨཾ མེ ཙིཏྟཾ རཱུཔབྷཝཱཡཱ’ཏི ཙེཏསཱ ཙིཏྟཾ སུཔརིཙིཏཾ ཧོཏི; ‘ཨནཱཝཏྟིདྷམྨཾ མེ ཙིཏྟཾ ཨརཱུཔབྷཝཱཡཱ’ཏི ཙེཏསཱ ཙིཏྟཾ སུཔརིཙིཏཾ ཧོཏི། ཨེཝཾ སམྨཱ ཝིམུཏྟཙིཏྟསྶ ཁོ, ཨཱཝུསོ, བྷིཀྑུནོ བྷུསཱ ཙེཔི ཙཀྑུཝིཉྙེཡྻཱ རཱུཔཱ ཙཀྑུསྶ ཨཱཔཱཐཾ ཨཱགཙྪནྟི, ནེཝསྶ ཙིཏྟཾ པརིཡཱདིཡནྟི; ཨམིསྶཱིཀཏམེཝསྶ ཙིཏྟཾ ཧོཏི ཋིཏཾ ཨཱནེཉྫཔྤཏྟཾ, ཝཡཾ ཙསྶཱནུཔསྶཏི།
‘‘Kathañca, āvuso, bhikkhuno cetasā cittaṃ suparicitaṃ hoti? ‘Vītarāgaṃ me citta’nti cetasā cittaṃ suparicitaṃ hoti; ‘vītadosaṃ me citta’nti cetasā cittaṃ suparicitaṃ hoti; ‘vītamohaṃ me citta’nti cetasā cittaṃ suparicitaṃ hoti; ‘asarāgadhammaṃ me citta’nti cetasā cittaṃ suparicitaṃ hoti; ‘asadosadhammaṃ me citta’nti cetasā cittaṃ suparicitaṃ hoti; ‘asamohadhammaṃ me citta’nti cetasā cittaṃ suparicitaṃ hoti; ‘anāvattidhammaṃ me cittaṃ kāmabhavāyā’ti cetasā cittaṃ suparicitaṃ hoti; ‘anāvattidhammaṃ me cittaṃ rūpabhavāyā’ti cetasā cittaṃ suparicitaṃ hoti; ‘anāvattidhammaṃ me cittaṃ arūpabhavāyā’ti cetasā cittaṃ suparicitaṃ hoti. Evaṃ sammā vimuttacittassa kho, āvuso, bhikkhuno bhusā cepi cakkhuviññeyyā rūpā cakkhussa āpāthaṃ āgacchanti, nevassa cittaṃ pariyādiyanti; amissīkatamevassa cittaṃ hoti ṭhitaṃ āneñjappattaṃ, vayaṃ cassānupassati.
‘‘སེཡྻཐཱཔི, ཨཱཝུསོ, སིལཱཡཱུཔོ སོལ༹སཀུཀྐུཀོ། ཏསྶསྶུ ཨཊྛ ཀུཀྐཱུ ཧེཊྛཱ ནེམངྒམཱ, ཨཊྛ ཀུཀྐཱུ ཨུཔརི ནེམསྶ། ཨཐ པུརཏྠིམཱཡ ཙེཔི དིསཱཡ ཨཱགཙྪེཡྻ བྷུསཱ ཝཱཏཝུཊྛི, ནེཝ ནཾ སངྐམྤེཡྻ ན སམྤཝེདྷེཡྻ; ཨཐ པཙྪིམཱཡ… ཨཐ ཨུཏྟརཱཡ… ཨཐ དཀྑིཎཱཡ ཙེཔི དིསཱཡ ཨཱགཙྪེཡྻ བྷུསཱ ཝཱཏཝུཊྛི, ནེཝ ནཾ སངྐམྤེཡྻ ན སམྤཝེདྷེཡྻ། ཏཾ ཀིསྶ ཧེཏུ? གམྦྷཱིརཏྟཱ, ཨཱཝུསོ, ནེམསྶ, སུནིཁཱཏཏྟཱ སིལཱཡཱུཔསྶ། ཨེཝམེཝཾ ཁོ, ཨཱཝུསོ, སམྨཱ ཝིམུཏྟཙིཏྟསྶ བྷིཀྑུནོ བྷུསཱ ཙེཔི ཙཀྑུཝིཉྙེཡྻཱ རཱུཔཱ ཙཀྑུསྶ ཨཱཔཱཐཾ ཨཱགཙྪནྟི, ནེཝསྶ ཙིཏྟཾ པརིཡཱདིཡནྟི; ཨམིསྶཱིཀཏམེཝསྶ ཙིཏྟཾ ཧོཏི ཋིཏཾ ཨཱནེཉྫཔྤཏྟཾ, ཝཡཾ ཙསྶཱནུཔསྶཏི།
‘‘Seyyathāpi, āvuso, silāyūpo soḷasakukkuko. Tassassu aṭṭha kukkū heṭṭhā nemaṅgamā, aṭṭha kukkū upari nemassa. Atha puratthimāya cepi disāya āgaccheyya bhusā vātavuṭṭhi, neva naṃ saṅkampeyya na sampavedheyya; atha pacchimāya… atha uttarāya… atha dakkhiṇāya cepi disāya āgaccheyya bhusā vātavuṭṭhi, neva naṃ saṅkampeyya na sampavedheyya. Taṃ kissa hetu? Gambhīrattā, āvuso, nemassa, sunikhātattā silāyūpassa. Evamevaṃ kho, āvuso, sammā vimuttacittassa bhikkhuno bhusā cepi cakkhuviññeyyā rūpā cakkhussa āpāthaṃ āgacchanti, nevassa cittaṃ pariyādiyanti; amissīkatamevassa cittaṃ hoti ṭhitaṃ āneñjappattaṃ, vayaṃ cassānupassati.
‘‘བྷུསཱ ཙེཔི སོཏཝིཉྙེཡྻཱ སདྡཱ… གྷཱནཝིཉྙེཡྻཱ གནྡྷཱ… ཛིཝ྄ཧཱཝིཉྙེཡྻཱ རསཱ… ཀཱཡཝིཉྙེཡྻཱ ཕོཊྛབྦཱ… མནོཝིཉྙེཡྻཱ དྷམྨཱ མནསྶ ཨཱཔཱཐཾ ཨཱགཙྪནྟི, ནེཝསྶ ཙིཏྟཾ པརིཡཱདིཡནྟི; ཨམིསྶཱིཀཏམེཝསྶ ཙིཏྟཾ ཧོཏི ཋིཏཾ ཨཱནེཉྫཔྤཏྟཾ, ཝཡཾ ཙསྶཱནུཔསྶཏཱི’’ཏི། ཚཊྛཾ།
‘‘Bhusā cepi sotaviññeyyā saddā… ghānaviññeyyā gandhā… jivhāviññeyyā rasā… kāyaviññeyyā phoṭṭhabbā… manoviññeyyā dhammā manassa āpāthaṃ āgacchanti, nevassa cittaṃ pariyādiyanti; amissīkatamevassa cittaṃ hoti ṭhitaṃ āneñjappattaṃ, vayaṃ cassānupassatī’’ti. Chaṭṭhaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༦. སིལཱཡཱུཔསུཏྟཝཎྞནཱ • 6. Silāyūpasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༦. སིལཱཡཱུཔསུཏྟཝཎྞནཱ • 6. Silāyūpasuttavaṇṇanā
