| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. ஸிலாயூபஸுத்தவண்ணனா
6. Silāyūpasuttavaṇṇanā
26. ச²ட்டே² சந்தி³காபுத்தோதி மாது நாமவஸேன பஞ்ஞாதோ சந்தி³காபுத்தத்தே²ரோ. சேதஸா சித்தங் ஹோதீதி சித்தவாரபரியாயேன சித்தவாரபரியாயோ சிதோ வட்³டி⁴தோ ஹோதி. சேதஸா சித்தங் ஸுபரிசிதந்தி சித்தவாரபரியாயேன சித்தவாரபரியாயோ உபரூபரி ஸுசிதோ ஸுவட்³டி⁴தோ ஹோதி. நேவஸ்ஸ சித்தங் பரியாதி³யந்தீதி தானி ஆரம்மணானி தஸ்ஸ கீ²ணாஸவஸ்ஸ சித்துப்பாத³ங் க³ஹெத்வா கே²பெத்வா டா²துங் ந ஸக்கொந்தி. அமிஸ்ஸீகதந்தி தானி ஆரம்மணானி அனல்லீனத்தா தேஹி அமிஸ்ஸீகதங். ஆனேஞ்ஜப்பத்தந்தி அனிஞ்ஜனபா⁴வங் நிப்ப²ந்த³னபா⁴வங் பத்தங்.
26. Chaṭṭhe candikāputtoti mātu nāmavasena paññāto candikāputtatthero. Cetasā cittaṃ hotīti cittavārapariyāyena cittavārapariyāyo cito vaḍḍhito hoti. Cetasā cittaṃ suparicitanti cittavārapariyāyena cittavārapariyāyo uparūpari sucito suvaḍḍhito hoti. Nevassa cittaṃ pariyādiyantīti tāni ārammaṇāni tassa khīṇāsavassa cittuppādaṃ gahetvā khepetvā ṭhātuṃ na sakkonti. Amissīkatanti tāni ārammaṇāni anallīnattā tehi amissīkataṃ. Āneñjappattanti aniñjanabhāvaṃ nipphandanabhāvaṃ pattaṃ.
ஸிலாயூபோதி ஸிலாத²ம்போ⁴. ஸோளஸகுக்குகோதி தீ³க⁴தோ ஸோளஸஹத்தோ². ஹெட்டா²னேமங்க³மாதி ஆவாடஸ்ஸ ஹெட்டா²க³தா. உபரி நேமஸ்ஸாதி உபரி ஆவாடஸ்ஸ. ஸுனிகா²தத்தாதி அயமுஸலேஹி கொட்டெத்வா கொட்டெத்வா ஸுட்டு² நிகா²தத்தா. ஏவமேவ கோ²தி எத்த² ஸிலாயூபோ விய கீ²ணாஸவோ த³ட்ட²ப்³போ³, மஹாவாதா விய ச²ஸு த்³வாரேஸு உப்பஜ்ஜனகா கிலேஸா, சதூஹி தி³ஸாஹி ஆக³ந்த்வா வாதானங் ஸிலாயூபங் சாலேதுங் அஸமத்த²பா⁴வோ விய ச²ஸு த்³வாரேஸு உப்பஜ்ஜனககிலேஸானங் கீ²ணாஸவஸ்ஸ சித்தங் சாலேதுங் அஸமத்த²பா⁴வோ வேதி³தப்³போ³. இமஸ்மிம்பி ஸுத்தே கீ²ணாஸவோவ கதி²தோ.
Silāyūpoti silāthambho. Soḷasakukkukoti dīghato soḷasahattho. Heṭṭhānemaṅgamāti āvāṭassa heṭṭhāgatā. Upari nemassāti upari āvāṭassa. Sunikhātattāti ayamusalehi koṭṭetvā koṭṭetvā suṭṭhu nikhātattā. Evameva khoti ettha silāyūpo viya khīṇāsavo daṭṭhabbo, mahāvātā viya chasu dvāresu uppajjanakā kilesā, catūhi disāhi āgantvā vātānaṃ silāyūpaṃ cāletuṃ asamatthabhāvo viya chasu dvāresu uppajjanakakilesānaṃ khīṇāsavassa cittaṃ cāletuṃ asamatthabhāvo veditabbo. Imasmimpi sutte khīṇāsavova kathito.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. ஸிலாயூபஸுத்தங் • 6. Silāyūpasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. ஸிலாயூபஸுத்தவண்ணனா • 6. Silāyūpasuttavaṇṇanā
