| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
៦. សិលាយូបសុត្តវណ្ណនា
6. Silāyūpasuttavaṇṇanā
២៦. ឆដ្ឋេ ចន្ទិកាបុត្តោតិ មាតុ នាមវសេន បញ្ញាតោ ចន្ទិកាបុត្តត្ថេរោ។ ចេតសា ចិត្តំ ហោតីតិ ចិត្តវារបរិយាយេន ចិត្តវារបរិយាយោ ចិតោ វឌ្ឍិតោ ហោតិ។ ចេតសា ចិត្តំ សុបរិចិតន្តិ ចិត្តវារបរិយាយេន ចិត្តវារបរិយាយោ ឧបរូបរិ សុចិតោ សុវឌ្ឍិតោ ហោតិ។ នេវស្ស ចិត្តំ បរិយាទិយន្តីតិ តានិ អារម្មណានិ តស្ស ខីណាសវស្ស ចិត្តុប្បាទំ គហេត្វា ខេបេត្វា ឋាតុំ ន សក្កោន្តិ។ អមិស្សីកតន្តិ តានិ អារម្មណានិ អនល្លីនត្តា តេហិ អមិស្សីកតំ។ អានេញ្ជប្បត្តន្តិ អនិញ្ជនភាវំ និប្ផន្ទនភាវំ បត្តំ។
26. Chaṭṭhe candikāputtoti mātu nāmavasena paññāto candikāputtatthero. Cetasā cittaṃ hotīti cittavārapariyāyena cittavārapariyāyo cito vaḍḍhito hoti. Cetasā cittaṃ suparicitanti cittavārapariyāyena cittavārapariyāyo uparūpari sucito suvaḍḍhito hoti. Nevassa cittaṃ pariyādiyantīti tāni ārammaṇāni tassa khīṇāsavassa cittuppādaṃ gahetvā khepetvā ṭhātuṃ na sakkonti. Amissīkatanti tāni ārammaṇāni anallīnattā tehi amissīkataṃ. Āneñjappattanti aniñjanabhāvaṃ nipphandanabhāvaṃ pattaṃ.
សិលាយូបោតិ សិលាថម្ភោ។ សោឡសកុក្កុកោតិ ទីឃតោ សោឡសហត្ថោ។ ហេដ្ឋានេមង្គមាតិ អាវាដស្ស ហេដ្ឋាគតា។ ឧបរិ នេមស្សាតិ ឧបរិ អាវាដស្ស។ សុនិខាតត្តាតិ អយមុសលេហិ កោដ្ដេត្វា កោដ្ដេត្វា សុដ្ឋុ និខាតត្តា។ ឯវមេវ ខោតិ ឯត្ថ សិលាយូបោ វិយ ខីណាសវោ ទដ្ឋព្ពោ, មហាវាតា វិយ ឆសុ ទ្វារេសុ ឧប្បជ្ជនកា កិលេសា, ចតូហិ ទិសាហិ អាគន្ត្វា វាតានំ សិលាយូបំ ចាលេតុំ អសមត្ថភាវោ វិយ ឆសុ ទ្វារេសុ ឧប្បជ្ជនកកិលេសានំ ខីណាសវស្ស ចិត្តំ ចាលេតុំ អសមត្ថភាវោ វេទិតព្ពោ។ ឥមស្មិម្បិ សុត្តេ ខីណាសវោវ កថិតោ។
Silāyūpoti silāthambho. Soḷasakukkukoti dīghato soḷasahattho. Heṭṭhānemaṅgamāti āvāṭassa heṭṭhāgatā. Upari nemassāti upari āvāṭassa. Sunikhātattāti ayamusalehi koṭṭetvā koṭṭetvā suṭṭhu nikhātattā. Evameva khoti ettha silāyūpo viya khīṇāsavo daṭṭhabbo, mahāvātā viya chasu dvāresu uppajjanakā kilesā, catūhi disāhi āgantvā vātānaṃ silāyūpaṃ cāletuṃ asamatthabhāvo viya chasu dvāresu uppajjanakakilesānaṃ khīṇāsavassa cittaṃ cāletuṃ asamatthabhāvo veditabbo. Imasmimpi sutte khīṇāsavova kathito.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ៦. សិលាយូបសុត្តំ • 6. Silāyūpasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ៦. សិលាយូបសុត្តវណ្ណនា • 6. Silāyūpasuttavaṇṇanā
