| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၆. သိလာယူပသုတ္တဝဏ္ဏနာ
6. Silāyūpasuttavaṇṇanā
၂၆. ဆဋ္ဌေ စန္ဒိကာပုတ္တောတိ မာတု နာမဝသေန ပညာတော စန္ဒိကာပုတ္တတ္ထေရော။ စေတသာ စိတ္တံ ဟောတီတိ စိတ္တဝာရပရိယာယေန စိတ္တဝာရပရိယာယော စိတော ဝဍ္ဎိတော ဟောတိ။ စေတသာ စိတ္တံ သုပရိစိတန္တိ စိတ္တဝာရပရိယာယေန စိတ္တဝာရပရိယာယော ဥပရူပရိ သုစိတော သုဝဍ္ဎိတော ဟောတိ။ နေဝသ္သ စိတ္တံ ပရိယာဒိယန္တီတိ တာနိ အာရမ္မဏာနိ တသ္သ ခီဏာသဝသ္သ စိတ္တုပ္ပာဒံ ဂဟေတ္ဝာ ခေပေတ္ဝာ ဌာတုံ န သက္ကောန္တိ။ အမိသ္သီကတန္တိ တာနိ အာရမ္မဏာနိ အနလ္လီနတ္တာ တေဟိ အမိသ္သီကတံ။ အာနေဉ္ဇပ္ပတ္တန္တိ အနိဉ္ဇနဘာဝံ နိပ္ဖန္ဒနဘာဝံ ပတ္တံ။
26. Chaṭṭhe candikāputtoti mātu nāmavasena paññāto candikāputtatthero. Cetasā cittaṃ hotīti cittavārapariyāyena cittavārapariyāyo cito vaḍḍhito hoti. Cetasā cittaṃ suparicitanti cittavārapariyāyena cittavārapariyāyo uparūpari sucito suvaḍḍhito hoti. Nevassa cittaṃ pariyādiyantīti tāni ārammaṇāni tassa khīṇāsavassa cittuppādaṃ gahetvā khepetvā ṭhātuṃ na sakkonti. Amissīkatanti tāni ārammaṇāni anallīnattā tehi amissīkataṃ. Āneñjappattanti aniñjanabhāvaṃ nipphandanabhāvaṃ pattaṃ.
သိလာယူပောတိ သိလာထမ္ဘော။ သောဠသကုက္ကုကောတိ ဒီဃတော သောဠသဟတ္ထော။ ဟေဋ္ဌာနေမင္ဂမာတိ အာဝာဋသ္သ ဟေဋ္ဌာဂတာ။ ဥပရိ နေမသ္သာတိ ဥပရိ အာဝာဋသ္သ။ သုနိခာတတ္တာတိ အယမုသလေဟိ ကောဋ္ဋေတ္ဝာ ကောဋ္ဋေတ္ဝာ သုဋ္ဌု နိခာတတ္တာ။ ဧဝမေဝ ခောတိ ဧတ္ထ သိလာယူပော ဝိယ ခီဏာသဝော ဒဋ္ဌဗ္ဗော, မဟာဝာတာ ဝိယ ဆသု ဒ္ဝာရေသု ဥပ္ပဇ္ဇနကာ ကိလေသာ, စတူဟိ ဒိသာဟိ အာဂန္တ္ဝာ ဝာတာနံ သိလာယူပံ စာလေတုံ အသမတ္ထဘာဝော ဝိယ ဆသု ဒ္ဝာရေသု ဥပ္ပဇ္ဇနကကိလေသာနံ ခီဏာသဝသ္သ စိတ္တံ စာလေတုံ အသမတ္ထဘာဝော ဝေဒိတဗ္ဗော။ ဣမသ္မိမ္ပိ သုတ္တေ ခီဏာသဝောဝ ကထိတော။
Silāyūpoti silāthambho. Soḷasakukkukoti dīghato soḷasahattho. Heṭṭhānemaṅgamāti āvāṭassa heṭṭhāgatā. Upari nemassāti upari āvāṭassa. Sunikhātattāti ayamusalehi koṭṭetvā koṭṭetvā suṭṭhu nikhātattā. Evameva khoti ettha silāyūpo viya khīṇāsavo daṭṭhabbo, mahāvātā viya chasu dvāresu uppajjanakā kilesā, catūhi disāhi āgantvā vātānaṃ silāyūpaṃ cāletuṃ asamatthabhāvo viya chasu dvāresu uppajjanakakilesānaṃ khīṇāsavassa cittaṃ cāletuṃ asamatthabhāvo veditabbo. Imasmimpi sutte khīṇāsavova kathito.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၆. သိလာယူပသုတ္တံ • 6. Silāyūpasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၆. သိလာယူပသုတ္တဝဏ္ဏနာ • 6. Silāyūpasuttavaṇṇanā
