| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
6. සිලායූපසුත්‌තවණ්‌ණනා
6. Silāyūpasuttavaṇṇanā
26. ඡට්‌ඨෙ චන්‌දිකාපුත්‌තොති මාතු නාමවසෙන පඤ්‌ඤාතො චන්‌දිකාපුත්‌තත්‌ථෙරො. චෙතසා චිත්‌තං හොතීති චිත්‌තවාරපරියායෙන චිත්‌තවාරපරියායො චිතො වඩ්‌ඪිතො හොති. චෙතසා චිත්‌තං සුපරිචිතන්‌ති චිත්‌තවාරපරියායෙන චිත්‌තවාරපරියායො උපරූපරි සුචිතො සුවඩ්‌ඪිතො හොති. නෙවස්‌ස චිත්‌තං පරියාදියන්‌තීති තානි ආරම්‌මණානි තස්‌ස ඛීණාසවස්‌ස චිත්‌තුප්‌පාදං ගහෙත්‌වා ඛෙපෙත්‌වා ඨාතුං න සක්‌කොන්‌ති. අමිස්‌සීකතන්‌ති තානි ආරම්‌මණානි අනල්‌ලීනත්‌තා තෙහි අමිස්‌සීකතං. ආනෙඤ්‌ජප්‌පත්‌තන්‌ති අනිඤ්‌ජනභාවං නිප්‌ඵන්‌දනභාවං පත්‌තං.
26. Chaṭṭhe candikāputtoti mātu nāmavasena paññāto candikāputtatthero. Cetasā cittaṃ hotīti cittavārapariyāyena cittavārapariyāyo cito vaḍḍhito hoti. Cetasā cittaṃ suparicitanti cittavārapariyāyena cittavārapariyāyo uparūpari sucito suvaḍḍhito hoti. Nevassa cittaṃ pariyādiyantīti tāni ārammaṇāni tassa khīṇāsavassa cittuppādaṃ gahetvā khepetvā ṭhātuṃ na sakkonti. Amissīkatanti tāni ārammaṇāni anallīnattā tehi amissīkataṃ. Āneñjappattanti aniñjanabhāvaṃ nipphandanabhāvaṃ pattaṃ.
සිලායූපොති සිලාථම්‌භො. සොළසකුක්‌කුකොති දීඝතො සොළසහත්‌ථො. හෙට්‌ඨානෙමඞ්‌ගමාති ආවාටස්‌ස හෙට්‌ඨාගතා. උපරි නෙමස්‌සාති උපරි ආවාටස්‌ස. සුනිඛාතත්‌තාති අයමුසලෙහි කොට්‌ටෙත්‌වා කොට්‌ටෙත්‌වා සුට්‌ඨු නිඛාතත්‌තා. එවමෙව ඛොති එත්‌ථ සිලායූපො විය ඛීණාසවො දට්‌ඨබ්‌බො, මහාවාතා විය ඡසු ද්‌වාරෙසු උප්‌පජ්‌ජනකා කිලෙසා, චතූහි දිසාහි ආගන්‌ත්‌වා වාතානං සිලායූපං චාලෙතුං අසමත්‌ථභාවො විය ඡසු ද්‌වාරෙසු උප්‌පජ්‌ජනකකිලෙසානං ඛීණාසවස්‌ස චිත්‌තං චාලෙතුං අසමත්‌ථභාවො වෙදිතබ්‌බො. ඉමස්‌මිම්‌පි සුත්‌තෙ ඛීණාසවොව කථිතො.
Silāyūpoti silāthambho. Soḷasakukkukoti dīghato soḷasahattho. Heṭṭhānemaṅgamāti āvāṭassa heṭṭhāgatā. Upari nemassāti upari āvāṭassa. Sunikhātattāti ayamusalehi koṭṭetvā koṭṭetvā suṭṭhu nikhātattā. Evameva khoti ettha silāyūpo viya khīṇāsavo daṭṭhabbo, mahāvātā viya chasu dvāresu uppajjanakā kilesā, catūhi disāhi āgantvā vātānaṃ silāyūpaṃ cāletuṃ asamatthabhāvo viya chasu dvāresu uppajjanakakilesānaṃ khīṇāsavassa cittaṃ cāletuṃ asamatthabhāvo veditabbo. Imasmimpi sutte khīṇāsavova kathito.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 6. සිලායූපසුත්‌තං • 6. Silāyūpasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 6. සිලායූපසුත්‌තවණ්‌ණනා • 6. Silāyūpasuttavaṇṇanā
