| Library / Tipiṭaka / திபிடக • Tipiṭaka / மஹாவக்³க³பாளி • Mahāvaggapāḷi |
71. ஸீமானுஜானநா
71. Sīmānujānanā
138. அத² கோ² பி⁴க்கூ²னங் ஏதத³ஹோஸி – ‘‘ப⁴க³வதா பஞ்ஞத்தங் ‘எத்தாவதா ஸாமக்³கீ³ யாவதா ஏகாவாஸோ’தி, கித்தாவதா நு கோ² ஏகாவாஸோ ஹோதீ’’தி? ப⁴க³வதோ ஏதமத்த²ங் ஆரோசேஸுங். அனுஜானாமி, பி⁴க்க²வே, ஸீமங் ஸம்மன்னிதுங். ஏவஞ்ச பன, பி⁴க்க²வே, ஸம்மன்னிதப்³பா³ – பட²மங் நிமித்தா கித்தேதப்³பா³ – பப்³ப³தனிமித்தங், பாஸாணனிமித்தங், வனநிமித்தங், ருக்க²னிமித்தங், மக்³க³னிமித்தங், வம்மிகனிமித்தங், நதீ³னிமித்தங், உத³கனிமித்தங். நிமித்தே கித்தெத்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
138. Atha kho bhikkhūnaṃ etadahosi – ‘‘bhagavatā paññattaṃ ‘ettāvatā sāmaggī yāvatā ekāvāso’ti, kittāvatā nu kho ekāvāso hotī’’ti? Bhagavato etamatthaṃ ārocesuṃ. Anujānāmi, bhikkhave, sīmaṃ sammannituṃ. Evañca pana, bhikkhave, sammannitabbā – paṭhamaṃ nimittā kittetabbā – pabbatanimittaṃ, pāsāṇanimittaṃ, vananimittaṃ, rukkhanimittaṃ, magganimittaṃ, vammikanimittaṃ, nadīnimittaṃ, udakanimittaṃ. Nimitte kittetvā byattena bhikkhunā paṭibalena saṅgho ñāpetabbo –
139. ‘‘ஸுணாது மே, ப⁴ந்தே, ஸங்கோ⁴ . யாவதா ஸமந்தா நிமித்தா கித்திதா. யதி³ ஸங்க⁴ஸ்ஸ பத்தகல்லங், ஸங்கோ⁴ ஏதேஹி நிமித்தேஹி ஸீமங் ஸம்மன்னெய்ய ஸமானஸங்வாஸங் ஏகுபோஸத²ங் 1. ஏஸா ஞத்தி.
139. ‘‘Suṇātu me, bhante, saṅgho . Yāvatā samantā nimittā kittitā. Yadi saṅghassa pattakallaṃ, saṅgho etehi nimittehi sīmaṃ sammanneyya samānasaṃvāsaṃ ekuposathaṃ 2. Esā ñatti.
‘‘ஸுணாது மே, ப⁴ந்தே, ஸங்கோ⁴. யாவதா ஸமந்தா நிமித்தா கித்திதா. ஸங்கோ⁴ ஏதேஹி நிமித்தேஹி ஸீமங் ஸம்மன்னதி ஸமானஸங்வாஸங் ஏகுபோஸத²ங். யஸ்ஸாயஸ்மதோ க²மதி ஏதேஹி நிமித்தேஹி ஸீமாய ஸம்முதி 3 ஸமானஸங்வாஸாய ஏகுபோஸதா²ய, ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய. ஸம்மதா ஸீமா ஸங்கே⁴ன ஏதேஹி நிமித்தேஹி ஸமானஸங்வாஸா ஏகுபோஸதா². க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Suṇātu me, bhante, saṅgho. Yāvatā samantā nimittā kittitā. Saṅgho etehi nimittehi sīmaṃ sammannati samānasaṃvāsaṃ ekuposathaṃ. Yassāyasmato khamati etehi nimittehi sīmāya sammuti 4 samānasaṃvāsāya ekuposathāya, so tuṇhassa; yassa nakkhamati, so bhāseyya. Sammatā sīmā saṅghena etehi nimittehi samānasaṃvāsā ekuposathā. Khamati saṅghassa, tasmā tuṇhī, evametaṃ dhārayāmī’’ti.
140. தேன கோ² பன ஸமயேன ச²ப்³ப³க்³கி³யா பி⁴க்கூ² – ப⁴க³வதா ஸீமாஸம்முதி அனுஞ்ஞாதாதி – அதிமஹதியோ ஸீமாயோ ஸம்மன்னந்தி, சதுயோஜனிகாபி பஞ்சயோஜனிகாபி ச²யோஜனிகாபி. பி⁴க்கூ² உபோஸத²ங் ஆக³ச்ச²ந்தா உத்³தி³ஸ்ஸமானேபி பாதிமொக்கே² ஆக³ச்ச²ந்தி, உத்³தி³ட்ட²மத்தேபி ஆக³ச்ச²ந்தி, அந்தராபி பரிவஸந்தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, அதிமஹதீ ஸீமா ஸம்மன்னிதப்³பா³, சதுயோஜனிகா வா பஞ்சயோஜனிகா வா ச²யோஜனிகா வா. யோ ஸம்மன்னெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, தியோஜனபரமங் ஸீமங் ஸம்மன்னிதுந்தி.
140. Tena kho pana samayena chabbaggiyā bhikkhū – bhagavatā sīmāsammuti anuññātāti – atimahatiyo sīmāyo sammannanti, catuyojanikāpi pañcayojanikāpi chayojanikāpi. Bhikkhū uposathaṃ āgacchantā uddissamānepi pātimokkhe āgacchanti, uddiṭṭhamattepi āgacchanti, antarāpi parivasanti. Bhagavato etamatthaṃ ārocesuṃ. Na, bhikkhave, atimahatī sīmā sammannitabbā, catuyojanikā vā pañcayojanikā vā chayojanikā vā. Yo sammanneyya, āpatti dukkaṭassa. Anujānāmi, bhikkhave, tiyojanaparamaṃ sīmaṃ sammannitunti.
தேன கோ² பன ஸமயேன ச²ப்³ப³க்³கி³யா பி⁴க்கூ² நதீ³பாரஸீமங் 5 ஸம்மன்னந்தி. உபோஸத²ங் ஆக³ச்ச²ந்தா பி⁴க்கூ²பி வுய்ஹந்தி, பத்தாபி வுய்ஹந்தி , சீவரானிபி வுய்ஹந்தி. ப⁴க³வதோ ஏதமத்த²ங் ஆரோசேஸுங். ந, பி⁴க்க²வே, நதீ³பாரஸீமா ஸம்மன்னிதப்³பா³. யோ ஸம்மன்னெய்ய, ஆபத்தி து³க்கடஸ்ஸ. அனுஜானாமி, பி⁴க்க²வே, யத்த²ஸ்ஸ து⁴வனாவா வா து⁴வஸேது வா, ஏவரூபங் நதீ³பாரஸீமங் ஸம்மன்னிதுந்தி.
Tena kho pana samayena chabbaggiyā bhikkhū nadīpārasīmaṃ 6 sammannanti. Uposathaṃ āgacchantā bhikkhūpi vuyhanti, pattāpi vuyhanti , cīvarānipi vuyhanti. Bhagavato etamatthaṃ ārocesuṃ. Na, bhikkhave, nadīpārasīmā sammannitabbā. Yo sammanneyya, āpatti dukkaṭassa. Anujānāmi, bhikkhave, yatthassa dhuvanāvā vā dhuvasetu vā, evarūpaṃ nadīpārasīmaṃ sammannitunti.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ஸீமானுஜானநகதா² • Sīmānujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸீமானுஜானநகதா²வண்ணனா • Sīmānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸீமானுஜானநகதா²வண்ணனா • Sīmānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸீமானுஜானநகதா²வண்ணனா • Sīmānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 71. ஸீமானுஜானநகதா² • 71. Sīmānujānanakathā
