| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
ஸீமானுஜானநகதா²
Sīmānujānanakathā
138. பட²மங் நிமித்தா கித்தேதப்³பா³தி வினயத⁴ரேன புச்சி²தப்³ப³ங் ‘‘புரத்தி²மாய தி³ஸாய கிங் நிமித்த’’ந்தி? பப்³ப³தோ ப⁴ந்தேதி. புன வினயத⁴ரேன ‘‘ஏஸோ பப்³ப³தோ நிமித்த’’ந்தி ஏவங் நிமித்தங் கித்தேதப்³ப³ங். ‘‘ஏதங் பப்³ப³தங் நிமித்தங் கரோம, கரிஸ்ஸாம, நிமித்தங் கதோ, நிமித்தங் ஹோது, ஹோதி ப⁴விஸ்ஸதீ’’தி ஏவங் பன கித்தேதுங் ந வட்டதி. பாஸாணாதீ³ஸுபி ஏஸேவ நயோ. புரத்தி²மாய அனுதி³ஸாய, த³க்கி²ணாய தி³ஸாய, த³க்கி²ணாய அனுதி³ஸாய, பச்சி²மாய தி³ஸாய, பச்சி²மாய அனுதி³ஸாய, உத்தராய தி³ஸாய, உத்தராய அனுதி³ஸாய, கிங் நிமித்தங்? உத³கங் ப⁴ந்தே. ஏதங் உத³கங் நிமித்தந்தி எத்த² பன அட்ட²த்வா புன புரத்தி²மாய தி³ஸாய கிங் நிமித்தங். பப்³ப³தோ ப⁴ந்தே. ஏஸோ பப்³ப³தோ நிமித்தந்தி ஏவங் பட²மங் கித்திதனிமித்தங் கித்தெத்வாவ ட²பேதப்³ப³ங். ஏவஞ்ஹி நிமித்தேன நிமித்தங் க⁴டிதங் ஹோதி. ஏவங் நிமித்தானி கித்தெத்வா அதா²னந்தரங் வுத்தாய கம்மவாசாய ஸீமா ஸம்மன்னிதப்³பா³. கம்மவாசாபரியோஸானே நிமித்தானங் அந்தோ ஸீமா ஹோதி, நிமித்தானி ஸீமதோ ப³ஹி ஹொந்தி. தத்த² நிமித்தானி ஸகிங் கித்திதானிபி கித்திதானேவ ஹொந்தி. அந்த⁴கட்ட²கதா²யங் பன திக்க²த்துங் ஸீமமண்ட³லங் ஸம்ப³ந்த⁴ந்தேன நிமித்தங் கித்தேதப்³ப³ந்தி வுத்தங். ‘‘பப்³ப³தோ ப⁴ந்தேதி…பே॰… உத³கங் ப⁴ந்தே’’தி ஏவங் பன உபஸம்பன்னோ வா ஆசிக்க²து அனுபஸம்பன்னோ வா வட்டதியேவ.
138.Paṭhamaṃ nimittā kittetabbāti vinayadharena pucchitabbaṃ ‘‘puratthimāya disāya kiṃ nimitta’’nti? Pabbato bhanteti. Puna vinayadharena ‘‘eso pabbato nimitta’’nti evaṃ nimittaṃ kittetabbaṃ. ‘‘Etaṃ pabbataṃ nimittaṃ karoma, karissāma, nimittaṃ kato, nimittaṃ hotu, hoti bhavissatī’’ti evaṃ pana kittetuṃ na vaṭṭati. Pāsāṇādīsupi eseva nayo. Puratthimāya anudisāya, dakkhiṇāya disāya, dakkhiṇāya anudisāya, pacchimāya disāya, pacchimāya anudisāya, uttarāya disāya, uttarāya anudisāya, kiṃ nimittaṃ? Udakaṃ bhante. Etaṃ udakaṃ nimittanti ettha pana aṭṭhatvā puna puratthimāya disāya kiṃ nimittaṃ. Pabbato bhante. Eso pabbato nimittanti evaṃ paṭhamaṃ kittitanimittaṃ kittetvāva ṭhapetabbaṃ. Evañhi nimittena nimittaṃ ghaṭitaṃ hoti. Evaṃ nimittāni kittetvā athānantaraṃ vuttāya kammavācāya sīmā sammannitabbā. Kammavācāpariyosāne nimittānaṃ anto sīmā hoti, nimittāni sīmato bahi honti. Tattha nimittāni sakiṃ kittitānipi kittitāneva honti. Andhakaṭṭhakathāyaṃ pana tikkhattuṃ sīmamaṇḍalaṃ sambandhantena nimittaṃ kittetabbanti vuttaṃ. ‘‘Pabbato bhanteti…pe… udakaṃ bhante’’ti evaṃ pana upasampanno vā ācikkhatu anupasampanno vā vaṭṭatiyeva.
இதா³னி பப்³ப³தனிமித்தாதீ³ஸு ஏவங் வினிச்ச²யோ வேதி³தப்³போ³ – திவிதோ⁴ பப்³ப³தோ, ஸுத்³த⁴பங்ஸுபப்³ப³தோ, ஸுத்³த⁴பாஸாணபப்³ப³தோ, உப⁴யமிஸ்ஸகோதி. ஸோ திவிதோ⁴பி வட்டதி. வாலிகராஸி பன ந வட்டதி. இதரோபி ஹத்தி²ப்பமாணதோ ஓமகதரோ ந வட்டதி. ஹத்தி²ப்பமாணதோ பன பட்டா²ய ஸினேருப்பமாணோபி வட்டதி. ஸசே சதூஸு தி³ஸாஸு சத்தாரோ தீஸு வா தயோ பப்³ப³தா ஹொந்தி, சதூஹி வா தீஹி வா பப்³ப³தனிமித்தேஹி ஏவ ஸம்மன்னிதுங் வட்டதி. த்³வீஹி பன நிமித்தேஹி ஏகேன வா ஸம்மன்னிதுங் ந வட்டதி. இதோ பரேஸு பாஸாணனிமித்தாதீ³ஸுபி ஏஸேவ நயோ. தஸ்மா பப்³ப³தனிமித்தங் கரொந்தேன புச்சி²தப்³ப³ங் ‘‘ஏகாப³த்³தோ⁴ ந ஏகாப³த்³தோ⁴’’தி. ஸசே ஏகாப³த்³தோ⁴ ஹோதி, ந காதப்³போ³. தஞ்ஹி சதூஸு வா அட்ட²ஸு வா தி³ஸாஸு கித்தெந்தேனாபி ஏகமேவ நிமித்தங் கித்திதங் ஹோதி, தஸ்மா யோ ஏவங் சக்கஸண்டா²னேன விஹாரங் பரிக்கி²பித்வா டி²தோ பப்³ப³தோ, தங் ஏகதி³ஸாய கித்தெத்வா அஞ்ஞாஸு தி³ஸாஸு தங் ப³ஹித்³தா⁴ கத்வா அந்தோ அஞ்ஞானி நிமித்தானி கித்தேதப்³பா³னி.
Idāni pabbatanimittādīsu evaṃ vinicchayo veditabbo – tividho pabbato, suddhapaṃsupabbato, suddhapāsāṇapabbato, ubhayamissakoti. So tividhopi vaṭṭati. Vālikarāsi pana na vaṭṭati. Itaropi hatthippamāṇato omakataro na vaṭṭati. Hatthippamāṇato pana paṭṭhāya sineruppamāṇopi vaṭṭati. Sace catūsu disāsu cattāro tīsu vā tayo pabbatā honti, catūhi vā tīhi vā pabbatanimittehi eva sammannituṃ vaṭṭati. Dvīhi pana nimittehi ekena vā sammannituṃ na vaṭṭati. Ito paresu pāsāṇanimittādīsupi eseva nayo. Tasmā pabbatanimittaṃ karontena pucchitabbaṃ ‘‘ekābaddho na ekābaddho’’ti. Sace ekābaddho hoti, na kātabbo. Tañhi catūsu vā aṭṭhasu vā disāsu kittentenāpi ekameva nimittaṃ kittitaṃ hoti, tasmā yo evaṃ cakkasaṇṭhānena vihāraṃ parikkhipitvā ṭhito pabbato, taṃ ekadisāya kittetvā aññāsu disāsu taṃ bahiddhā katvā anto aññāni nimittāni kittetabbāni.
ஸசே பப்³ப³தஸ்ஸ ததியபா⁴க³ங் வா உபட்³ட⁴ங் வா அந்தோஸீமாய கத்துகாமா ஹொந்தி, பப்³ப³தங் அகித்தெத்வா யத்தகங் பதே³ஸங் அந்தோ கத்துகாமா, தஸ்ஸ பரதோ தஸ்மிங்யேவ பப்³ப³தே ஜாதருக்க²வம்மிகாதீ³ஸு அஞ்ஞதரங் நிமித்தங் கித்தேதப்³ப³ங். ஸசே ஏகயோஜனத்³வியோஜனப்பமாணங் ஸப்³ப³ங் பப்³ப³தங் அந்தோ கத்துகாமா ஹொந்தி, பப்³ப³தஸ்ஸ பரதோ பூ⁴மியங் ஜாதருக்க²வம்மிகாதீ³னி நிமித்தானி கித்தேதப்³பா³னி.
Sace pabbatassa tatiyabhāgaṃ vā upaḍḍhaṃ vā antosīmāya kattukāmā honti, pabbataṃ akittetvā yattakaṃ padesaṃ anto kattukāmā, tassa parato tasmiṃyeva pabbate jātarukkhavammikādīsu aññataraṃ nimittaṃ kittetabbaṃ. Sace ekayojanadviyojanappamāṇaṃ sabbaṃ pabbataṃ anto kattukāmā honti, pabbatassa parato bhūmiyaṃ jātarukkhavammikādīni nimittāni kittetabbāni.
பாஸாணனிமித்தே – அயகு³ளோபி பாஸாணஸங்க்²யமேவ க³ச்ச²தி, தஸ்மா யோ கோசி பாஸாணோ வட்டதி. பமாணதோ பன ஹத்தி²ப்பமாணோ பப்³ப³தஸங்க்²யங் க³தோ, தஸ்மா ஸோ ந வட்டதி. மஹாகோ³ணமஹாமஹிங்ஸப்பமாணோ பன வட்டதி. ஹெட்டி²மபரிச்சே²தே³ன த்³வத்திங்ஸபலகு³ளபிண்ட³பரிமாணோ வட்டதி. ததோ கு²த்³த³கதரோ இட்ட²கா வா மஹந்தீபி ந வட்டதி. அனிமித்துபக³பாஸாணராஸிபி ந வட்டதி, பகே³வ பங்ஸுவாலிகராஸி. பூ⁴மிஸமோ க²லமண்ட³லஸதி³ஸோ பிட்டி²பாஸாணோ வா பூ⁴மிதோ கா²ணுகோ விய உட்டி²தபாஸாணோ வா ஹோதி, ஸோபி பமாணுபகோ³ சே வட்டதி. பிட்டி²பாஸாணோ அதிமஹந்தோபி பாஸாணஸங்க்²யமேவ க³ச்ச²தி, தஸ்மா ஸசே மஹதோ பிட்டி²பாஸாணஸ்ஸ ஏகப்பதே³ஸங் அந்தோஸீமாய கத்துகாமா ஹொந்தி, தங் அகித்தெத்வா தஸ்ஸுபரி அஞ்ஞோ பாஸாணோ கித்தேதப்³போ³. ஸசே பிட்டி²பாஸாணுபரி விஹாரங் கரொந்தி, விஹாரமஜ்ஜே²ன வா பிட்டி²பாஸாணோ வினிவிஜ்ஜி²த்வா க³ச்ச²தி, ஏவரூபோ பிட்டி²பாஸாணோ ந வட்டதி. ஸசே ஹி தங் கித்தெந்தி, நிமித்தஸ்ஸ உபரி விஹாரோ ஹோதி, நிமித்தஞ்ச நாம ப³ஹிஸீமாய ஹோதி, விஹாரோபி ப³ஹிஸீமாயங் ஆபஜ்ஜதி. விஹாரங் பரிக்கி²பித்வா டி²தபிட்டி²பாஸாணோ ஏகத்த² கித்தெத்வா அஞ்ஞத்த² ந கித்தேதப்³போ³.
Pāsāṇanimitte – ayaguḷopi pāsāṇasaṅkhyameva gacchati, tasmā yo koci pāsāṇo vaṭṭati. Pamāṇato pana hatthippamāṇo pabbatasaṅkhyaṃ gato, tasmā so na vaṭṭati. Mahāgoṇamahāmahiṃsappamāṇo pana vaṭṭati. Heṭṭhimaparicchedena dvattiṃsapalaguḷapiṇḍaparimāṇo vaṭṭati. Tato khuddakataro iṭṭhakā vā mahantīpi na vaṭṭati. Animittupagapāsāṇarāsipi na vaṭṭati, pageva paṃsuvālikarāsi. Bhūmisamo khalamaṇḍalasadiso piṭṭhipāsāṇo vā bhūmito khāṇuko viya uṭṭhitapāsāṇo vā hoti, sopi pamāṇupago ce vaṭṭati. Piṭṭhipāsāṇo atimahantopi pāsāṇasaṅkhyameva gacchati, tasmā sace mahato piṭṭhipāsāṇassa ekappadesaṃ antosīmāya kattukāmā honti, taṃ akittetvā tassupari añño pāsāṇo kittetabbo. Sace piṭṭhipāsāṇupari vihāraṃ karonti, vihāramajjhena vā piṭṭhipāsāṇo vinivijjhitvā gacchati, evarūpo piṭṭhipāsāṇo na vaṭṭati. Sace hi taṃ kittenti, nimittassa upari vihāro hoti, nimittañca nāma bahisīmāya hoti, vihāropi bahisīmāyaṃ āpajjati. Vihāraṃ parikkhipitvā ṭhitapiṭṭhipāsāṇo ekattha kittetvā aññattha na kittetabbo.
வனநிமித்தே – திணவனங் வா தசஸாரதாலனாளிகேராதி³ருக்க²வனங் வா ந வட்டதி. அந்தோஸாரானங் பன ஸாகஸாலாதீ³னங் அந்தோஸாரமிஸ்ஸகானங் வா ருக்கா²னங் வனங் வட்டதி, தஞ்ச கோ² ஹெட்டி²மபரிச்சே²தே³ன சதுபஞ்சருக்க²மத்தம்பி ததோ ஓரங் ந வட்டதி, பரங் யோஜனஸதிகம்பி வட்டதி. ஸசே பன வனமஜ்ஜே² விஹாரங் கரொந்தி, வனங் ந கித்தேதப்³ப³ங். ஏகதே³ஸங் அந்தோஸீமாய கத்துகாமேஹிபி வனங் அகித்தெத்வா தத்த² ருக்க²பாஸாணாத³யோ கித்தேதப்³பா³. விஹாரங் பரிக்கி²பித்வா டி²தவனங் ஏகத்த² கித்தெத்வா அஞ்ஞத்த² ந கித்தேதப்³ப³ங்.
Vananimitte – tiṇavanaṃ vā tacasāratālanāḷikerādirukkhavanaṃ vā na vaṭṭati. Antosārānaṃ pana sākasālādīnaṃ antosāramissakānaṃ vā rukkhānaṃ vanaṃ vaṭṭati, tañca kho heṭṭhimaparicchedena catupañcarukkhamattampi tato oraṃ na vaṭṭati, paraṃ yojanasatikampi vaṭṭati. Sace pana vanamajjhe vihāraṃ karonti, vanaṃ na kittetabbaṃ. Ekadesaṃ antosīmāya kattukāmehipi vanaṃ akittetvā tattha rukkhapāsāṇādayo kittetabbā. Vihāraṃ parikkhipitvā ṭhitavanaṃ ekattha kittetvā aññattha na kittetabbaṃ.
ருக்க²னிமித்தே – தசஸாரோ தாலனாளிகேராதி³ருக்கோ² ந வட்டதி, அந்தோஸாரோ ஜீவமானகோ அந்தமஸோ உப்³பே³த⁴தோ அட்ட²ங்கு³லோ பரிணாஹதோ ஸூசித³ண்ட³கப்பமாணோபி வட்டதி, ததோ ஓரங் ந வட்டதி, பரங் த்³வாத³ஸயோஜனோ ஸுப்பதிட்டி²தனிக்³ரோதோ⁴பி வட்டதி. வங்ஸனளகஸராவாதீ³ஸு பீ³ஜங் ரோபெத்வா வட்³டா⁴பிதோ பமாணுபகோ³பி ந வட்டதி. ததோ அபனெத்வா பன தங்க²ணம்பி பூ⁴மியங் ரோபெத்வா கொட்ட²கங் கத்வா உத³கங் ஆஸிஞ்சித்வா கித்தேதுங் வட்டதி. நவமூலஸாகா²னிக்³க³மனங் அகாரணங். க²ந்த⁴ங் சி²ந்தி³த்வா ரோபிதே பன ஏதங் யுஜ்ஜதி. கித்தெந்தேன ச ‘‘ருக்கோ²’’திபி வத்துங் வட்டதி, ‘‘ஸாகருக்கோ²திபி ஸாலருக்கோ²’’திபி. ஏகாப³த்³த⁴ங் பன ஸுப்பதிட்டி²தனிக்³ரோத⁴ஸதி³ஸங் ஏகத்த² கித்தெத்வா அஞ்ஞத்த² கித்தேதுங் ந வட்டதி.
Rukkhanimitte – tacasāro tālanāḷikerādirukkho na vaṭṭati, antosāro jīvamānako antamaso ubbedhato aṭṭhaṅgulo pariṇāhato sūcidaṇḍakappamāṇopi vaṭṭati, tato oraṃ na vaṭṭati, paraṃ dvādasayojano suppatiṭṭhitanigrodhopi vaṭṭati. Vaṃsanaḷakasarāvādīsu bījaṃ ropetvā vaḍḍhāpito pamāṇupagopi na vaṭṭati. Tato apanetvā pana taṅkhaṇampi bhūmiyaṃ ropetvā koṭṭhakaṃ katvā udakaṃ āsiñcitvā kittetuṃ vaṭṭati. Navamūlasākhāniggamanaṃ akāraṇaṃ. Khandhaṃ chinditvā ropite pana etaṃ yujjati. Kittentena ca ‘‘rukkho’’tipi vattuṃ vaṭṭati, ‘‘sākarukkhotipi sālarukkho’’tipi. Ekābaddhaṃ pana suppatiṭṭhitanigrodhasadisaṃ ekattha kittetvā aññattha kittetuṃ na vaṭṭati.
மக்³க³னிமித்தே – அரஞ்ஞகெ²த்தனதீ³தளாகமக்³கா³த³யோ ந வட்டந்தி, ஜங்க⁴மக்³கோ³ வா ஸகடமக்³கோ³ வா வட்டதி, யோ நிப்³பி³ஜ்ஜி²த்வா த்³வே தீணி கா³மந்தரானி க³ச்ச²தி. யோ பன ஜங்க⁴மக்³கோ³ ஸகடமக்³க³தோ ஓக்கமித்வா புன ஸகடமக்³க³மேவ ஓதரதி, யே வா ஜங்க⁴மக்³க³ஸகடமக்³கா³ அவளஞ்ஜா, தே ந வட்டந்தி. ஜங்க⁴ஸத்த²ஸகடஸத்தே²ஹி வளஞ்ஜியமானாயேவ வட்டந்தி. ஸசே த்³வே மக்³கா³ நிக்க²மித்வா பச்சா² ஸகடது⁴ரமிவ ஏகீப⁴வந்தி, த்³விதா⁴ பி⁴ன்னட்டா²னே வா ஸம்ப³ந்த⁴ட்டா²னே வா ஸகிங் கித்தெத்வா புன ந கித்தேதப்³பா³, ஏகாப³த்³த⁴னிமித்தஞ்ஹேதங் ஹோதி.
Magganimitte – araññakhettanadītaḷākamaggādayo na vaṭṭanti, jaṅghamaggo vā sakaṭamaggo vā vaṭṭati, yo nibbijjhitvā dve tīṇi gāmantarāni gacchati. Yo pana jaṅghamaggo sakaṭamaggato okkamitvā puna sakaṭamaggameva otarati, ye vā jaṅghamaggasakaṭamaggā avaḷañjā, te na vaṭṭanti. Jaṅghasatthasakaṭasatthehi vaḷañjiyamānāyeva vaṭṭanti. Sace dve maggā nikkhamitvā pacchā sakaṭadhuramiva ekībhavanti, dvidhā bhinnaṭṭhāne vā sambandhaṭṭhāne vā sakiṃ kittetvā puna na kittetabbā, ekābaddhanimittañhetaṃ hoti.
ஸசே விஹாரங் பரிக்கி²பித்வா சத்தாரோ மக்³கா³ சதூஸு தி³ஸாஸு க³ச்ச²ந்தி, மஜ்ஜே² ஏகங் கித்தெத்வா அபரங் கித்தேதுங் ந வட்டதி. ஏகாப³த்³த⁴னிமித்தஞ்ஹேதங் ஹோதி. கோணங் நிப்³பி³ஜ்ஜி²த்வா க³தமக்³க³ங் பன பரபா⁴கே³ கித்தேதுங் வட்டதி. விஹாரமஜ்ஜே²ன நிப்³பி³ஜ்ஜி²த்வா க³தமக்³கோ³ பன ந கித்தேதப்³போ³. கித்திதே நிமித்தஸ்ஸ உபரி விஹாரோ ஹோதி. ஸசே ஸகடமக்³க³ஸ்ஸ அந்திமசக்கமக்³க³ங் நிமித்தங் கரொந்தி, மக்³கோ³ ப³ஹிஸீமாய ஹோதி. ஸசே பா³ஹிரசக்கமக்³க³ங் நிமித்தங் கரொந்தி, பா³ஹிரசக்கமக்³கோ³வ ப³ஹிஸீமாய ஹோதி, ஸேஸங் அந்தோஸீமங் ப⁴ஜதி. மக்³க³ங் கித்தெந்தேன ‘‘மக்³கோ³ பந்தோ² பதோ² பஜ்ஜோ’’தி த³ஸஸு யேன கேனசி நாமேன கித்தேதுங் வட்டதி. பரிகா²ஸண்டா²னேன விஹாரங் பரிக்கி²பித்வா க³தமக்³கோ³ ஏகத்த² கித்தெத்வா அஞ்ஞத்த² கித்தேதுங் ந வட்டதி.
Sace vihāraṃ parikkhipitvā cattāro maggā catūsu disāsu gacchanti, majjhe ekaṃ kittetvā aparaṃ kittetuṃ na vaṭṭati. Ekābaddhanimittañhetaṃ hoti. Koṇaṃ nibbijjhitvā gatamaggaṃ pana parabhāge kittetuṃ vaṭṭati. Vihāramajjhena nibbijjhitvā gatamaggo pana na kittetabbo. Kittite nimittassa upari vihāro hoti. Sace sakaṭamaggassa antimacakkamaggaṃ nimittaṃ karonti, maggo bahisīmāya hoti. Sace bāhiracakkamaggaṃ nimittaṃ karonti, bāhiracakkamaggova bahisīmāya hoti, sesaṃ antosīmaṃ bhajati. Maggaṃ kittentena ‘‘maggo pantho patho pajjo’’ti dasasu yena kenaci nāmena kittetuṃ vaṭṭati. Parikhāsaṇṭhānena vihāraṃ parikkhipitvā gatamaggo ekattha kittetvā aññattha kittetuṃ na vaṭṭati.
வம்மிகனிமித்தே – ஹெட்டி²மபரிச்சே²தே³ன தங் தி³வஸங் ஜாதோ அட்ட²ங்கு³லுப்³பே³தோ⁴ கோ³விஸாணப்பமாணோபி வம்மிகோ வட்டதி, ததோ ஓரங் ந வட்டதி, பரங் ஹிமவந்தபப்³ப³தஸதி³ஸோபி வட்டதி. விஹாரங் பரிக்கி²பித்வா டி²தங் பன ஏகாப³த்³த⁴ங் ஏகத்த² கித்தெத்வா அஞ்ஞத்த² கித்தேதுங் ந வட்டதி.
Vammikanimitte – heṭṭhimaparicchedena taṃ divasaṃ jāto aṭṭhaṅgulubbedho govisāṇappamāṇopi vammiko vaṭṭati, tato oraṃ na vaṭṭati, paraṃ himavantapabbatasadisopi vaṭṭati. Vihāraṃ parikkhipitvā ṭhitaṃ pana ekābaddhaṃ ekattha kittetvā aññattha kittetuṃ na vaṭṭati.
நதீ³னிமித்தே – யஸ்ஸா த⁴ம்மிகானங் ராஜூனங் காலே அன்வத்³த⁴மாஸங் அனுத³ஸாஹங் அனுபஞ்சாஹந்தி ஏவங் அனதிக்கமித்வா தே³வே வஸ்ஸந்தே வலாஹகேஸு விக³தமத்தேஸு ஸோதங் பச்சி²ஜ்ஜதி, அயங் நதீ³ஸங்க்²யங் ந க³ச்ச²தி. யஸ்ஸா பன ஈதி³ஸே ஸுவுட்டி²காலே வஸ்ஸானஸ்ஸ சாதுமாஸே ஸோதங் ந பச்சி²ஜ்ஜதி, திமண்ட³லங் படிச்சா²தெ³த்வா யத்த² கத்த²சி உத்தரந்தியா பி⁴க்கு²னியா அந்தரவாஸகோ தேமியதி, அயங் நதீ³ஸங்க்²யங் க³ச்ச²தி, ஸீமங் ப³ந்த⁴ந்தானங் நிமித்தங் ஹோதி. பி⁴க்கு²னியா நதீ³பாரக³மனேபி உபோஸதா²தி³ஸங்க⁴கம்மகரணேபி நதீ³பாரஸீமஸம்மன்னநேபி அயமேவ நதீ³.
Nadīnimitte – yassā dhammikānaṃ rājūnaṃ kāle anvaddhamāsaṃ anudasāhaṃ anupañcāhanti evaṃ anatikkamitvā deve vassante valāhakesu vigatamattesu sotaṃ pacchijjati, ayaṃ nadīsaṅkhyaṃ na gacchati. Yassā pana īdise suvuṭṭhikāle vassānassa cātumāse sotaṃ na pacchijjati, timaṇḍalaṃ paṭicchādetvā yattha katthaci uttarantiyā bhikkhuniyā antaravāsako temiyati, ayaṃ nadīsaṅkhyaṃ gacchati, sīmaṃ bandhantānaṃ nimittaṃ hoti. Bhikkhuniyā nadīpāragamanepi uposathādisaṅghakammakaraṇepi nadīpārasīmasammannanepi ayameva nadī.
யா பன மக்³கோ³ விய ஸகடது⁴ரஸண்டா²னேன வா பரிகா²ஸண்டா²னேன வா விஹாரங் பரிக்கி²பித்வா க³தா, தங் ஏகத்த² கித்தெத்வா அஞ்ஞத்த² கித்தேதுங் ந வட்டதி. விஹாரஸ்ஸ சதூஸு தி³ஸாஸு அஞ்ஞமஞ்ஞங் வினிப்³பி³ஜ்ஜி²த்வா க³தே நதி³சதுக்கேபி ஏஸேவ நயோ. அஸம்மிஸ்ஸனதி³யோ பன சதஸ்ஸோபி கித்தேதுங் வட்டதி. ஸசே வதிங் கரொந்தோ விய ருக்க²பாதே³ நிக²ணித்வா வல்லிபலாலாதீ³ஹி நதி³ஸோதங் ரும்ப⁴ந்தி, உத³கஞ்ச அஜ்ஜொ²த்த²ரித்வா ஆவரணங் பவத்ததியேவ, நிமித்தங் காதுங் வட்டதி. யதா² பன உத³கங் நப்பவத்ததி, ஏவங் ஸேதும்ஹி கதே அப்பவத்தமானா நதீ³ நிமித்தங் காதுங் ந வட்டதி. பவத்தனட்டா²னே நதி³னிமித்தங், அப்பவத்தனட்டா²னே உத³கனிமித்தங் காதுங் வட்டதி.
Yā pana maggo viya sakaṭadhurasaṇṭhānena vā parikhāsaṇṭhānena vā vihāraṃ parikkhipitvā gatā, taṃ ekattha kittetvā aññattha kittetuṃ na vaṭṭati. Vihārassa catūsu disāsu aññamaññaṃ vinibbijjhitvā gate nadicatukkepi eseva nayo. Asammissanadiyo pana catassopi kittetuṃ vaṭṭati. Sace vatiṃ karonto viya rukkhapāde nikhaṇitvā vallipalālādīhi nadisotaṃ rumbhanti, udakañca ajjhottharitvā āvaraṇaṃ pavattatiyeva, nimittaṃ kātuṃ vaṭṭati. Yathā pana udakaṃ nappavattati, evaṃ setumhi kate appavattamānā nadī nimittaṃ kātuṃ na vaṭṭati. Pavattanaṭṭhāne nadinimittaṃ, appavattanaṭṭhāne udakanimittaṃ kātuṃ vaṭṭati.
யா பன து³ப்³பு³ட்டி²காலே வா கி³ம்ஹே வா நிருத³கபா⁴வேன நப்பவத்ததி, ஸா வட்டதி. மஹானதி³தோ உத³கமாதிகங் நீஹரந்தி, ஸா குன்னதி³ஸதி³ஸா ஹுத்வா தீணி ஸஸ்ஸானி ஸம்பாதெ³ந்தீ நிச்சங் பவத்ததி, கிஞ்சாபி பவத்ததி, நிமித்தங் காதுங் ந வட்டதி. யா பன மூலே மஹானதி³தோ நிக்³க³தாபி காலந்தரேன தேனேவ நிக்³க³தமக்³கே³ன நதி³ங் பி⁴ந்தி³த்வா ஸயஞ்ச க³ச்ச²தி, க³ச்ச²ந்தீ பரதோ ஸுஸுமாராதி³ஸமாகிண்ணா நாவாதீ³ஹி ஸஞ்சரிதப்³பா³ நதீ³ ஹோதி, தங் நிமித்தங் காதுங் வட்டதி.
Yā pana dubbuṭṭhikāle vā gimhe vā nirudakabhāvena nappavattati, sā vaṭṭati. Mahānadito udakamātikaṃ nīharanti, sā kunnadisadisā hutvā tīṇi sassāni sampādentī niccaṃ pavattati, kiñcāpi pavattati, nimittaṃ kātuṃ na vaṭṭati. Yā pana mūle mahānadito niggatāpi kālantarena teneva niggatamaggena nadiṃ bhinditvā sayañca gacchati, gacchantī parato susumārādisamākiṇṇā nāvādīhi sañcaritabbā nadī hoti, taṃ nimittaṃ kātuṃ vaṭṭati.
உத³கனிமித்தே – நிருத³கே டா²னே நாவாய வா சாடிஆதீ³ஸு வா உத³கங் பூரெத்வா உத³கனிமித்தங் கித்தேதுங் ந வட்டதி, பூ⁴மிக³தமேவ வட்டதி . தஞ்ச கோ² அப்பவத்தனஉத³கங் ஆவாடபொக்க²ரணிதளாகஜாதஸ்ஸரலோணிஸமுத்³தா³தீ³ஸு டி²தங், அட்டி²தங் பன ஓக⁴னதி³உத³கவாஹகமாதிகாதீ³ஸு உத³கங் ந வட்டதி. அந்த⁴கட்ட²கதா²யங் பன ‘‘க³ம்பீ⁴ரேஸு ஆவாடாதீ³ஸு உக்கே²பிமங் உத³கங் நிமித்தங் ந காதப்³ப³’’ந்தி வுத்தங், தங் து³வுத்தங் அத்தனோமதிமத்தமேவ. டி²தங் பன அந்தமஸோ ஸூகரக²தாயபி கா³மதா³ரகானங் கீளனவாபியம்பி தங்க²ணஞ்ஞேவ பத²வியங் ஆவாடகங் கத்வா குடேஹி ஆஹரித்வா பூரிதஉத³கம்பி ஸசே யாவ கம்மவாசாபரியோஸானா திட்ட²தி, அப்பங் வா ஹோது ப³ஹு வா, வட்டதி. தஸ்மிங் பன டா²னே நிமித்தஸஞ்ஞாகரணத்த²ங் பாஸாணவாலிகாபங்ஸுஆதி³ராஸி வா பாஸாணத்த²ம்போ⁴ வா தா³ருத்த²ம்போ⁴ வா காதப்³போ³. தங் காதுஞ்ச காரேதுஞ்ச பி⁴க்கு²ஸ்ஸ வட்டதி. லாப⁴ஸீமாயங் பன ந வட்டதி . ஸமானஸங்வாஸகஸீமா கஸ்ஸசி பீளனங் ந கரோதி, கேவலங் பி⁴க்கூ²னங் வினயகம்மமேவ ஸாதே⁴தி, தஸ்மா எத்த² வட்டதி.
Udakanimitte – nirudake ṭhāne nāvāya vā cāṭiādīsu vā udakaṃ pūretvā udakanimittaṃ kittetuṃ na vaṭṭati, bhūmigatameva vaṭṭati . Tañca kho appavattanaudakaṃ āvāṭapokkharaṇitaḷākajātassaraloṇisamuddādīsu ṭhitaṃ, aṭṭhitaṃ pana oghanadiudakavāhakamātikādīsu udakaṃ na vaṭṭati. Andhakaṭṭhakathāyaṃ pana ‘‘gambhīresu āvāṭādīsu ukkhepimaṃ udakaṃ nimittaṃ na kātabba’’nti vuttaṃ, taṃ duvuttaṃ attanomatimattameva. Ṭhitaṃ pana antamaso sūkarakhatāyapi gāmadārakānaṃ kīḷanavāpiyampi taṅkhaṇaññeva pathaviyaṃ āvāṭakaṃ katvā kuṭehi āharitvā pūritaudakampi sace yāva kammavācāpariyosānā tiṭṭhati, appaṃ vā hotu bahu vā, vaṭṭati. Tasmiṃ pana ṭhāne nimittasaññākaraṇatthaṃ pāsāṇavālikāpaṃsuādirāsi vā pāsāṇatthambho vā dārutthambho vā kātabbo. Taṃ kātuñca kāretuñca bhikkhussa vaṭṭati. Lābhasīmāyaṃ pana na vaṭṭati . Samānasaṃvāsakasīmā kassaci pīḷanaṃ na karoti, kevalaṃ bhikkhūnaṃ vinayakammameva sādheti, tasmā ettha vaṭṭati.
இமேஹி ச அட்ட²ஹி நிமித்தேஹி அஸம்மிஸ்ஸேஹிபி அஞ்ஞமஞ்ஞங் ஸம்மிஸ்ஸேஹிபி ஸீமங் ஸம்மன்னிதுங் வட்டதியேவ. ஸா ஏவங் ஸம்மன்னித்வா ப³ஜ்ஜ²மானா ஏகேன த்³வீஹி வா நிமித்தேஹி அப³த்³தா⁴ ஹோதி, தீணி பன ஆதி³ங் கத்வா வுத்தப்பகாரானங் நிமித்தானங் ஸதேனாபி ப³த்³தா⁴ ஹோதி. ஸா தீஹி ஸிங்கா⁴டகஸண்டா²னா ஹோதி, சதூஹி சதுரஸ்ஸா வா ஸிங்கா⁴டகஅட்³ட⁴சந்த³முதி³ங்கா³தி³ஸண்டா²னா வா, ததோ அதி⁴கேஹி நானாஸண்டா²னா. தங் ப³ந்தி⁴துகாமேஹி ஸாமந்தவிஹாரேஸு பி⁴க்கூ² தஸ்ஸ தஸ்ஸ விஹாரஸ்ஸ ஸீமாபரிச்சே²த³ங் புச்சி²த்வா, ப³த்³த⁴ஸீமவிஹாரானங் ஸீமாய ஸீமந்தரிகங், அப³த்³த⁴ஸீமவிஹாரானங் ஸீமாய உபசாரங் ட²பெத்வா தி³ஸாசாரிகபி⁴க்கூ²னங் நிஸ்ஸஞ்சாரஸமயே ஸசே ஏகஸ்மிங் கா³மகெ²த்தே ஸீமங் ப³ந்தி⁴துகாமா, யே தத்த² ப³த்³த⁴ஸீமவிஹாரா, தேஸு பி⁴க்கூ²னங் ‘‘மயங் அஜ்ஜ ஸீமங் ப³ந்தி⁴ஸ்ஸாம, தும்ஹே ஸகஸீமாபரிச்சே²த³தோ மா நிக்க²மித்தா²’’தி பேஸேதப்³ப³ங். யே அப³த்³த⁴ஸீமவிஹாரா, தேஸு பி⁴க்கூ² ஏகஜ்ஜ²ங் ஸன்னிபாதேதப்³பா³, ச²ந்தா³ரஹானங் ச²ந்தோ³ ஆஹராபேதப்³போ³ . ஸசே அஞ்ஞானிபி கா³மக்கெ²த்தானி அந்தோகாதுகாமா , தேஸு கா³மேஸு யே பி⁴க்கூ² வஸந்தி, தேஹிபி ஆக³ந்தப்³ப³ங். அனாக³ச்ச²ந்தானங் ச²ந்தோ³ ஆஹரிதப்³போ³தி மஹாஸுமத்தே²ரோ ஆஹ. மஹாபது³மத்தே²ரோ பன ‘‘நானாகா³மகெ²த்தானி நாம பாடேக்கங் ப³த்³த⁴ஸீமாஸதி³ஸானி, ந ததோ ச²ந்த³பாரிஸுத்³தி⁴ ஆக³ச்ச²தி. அந்தோனிமித்தக³தேஹி பன பி⁴க்கூ²ஹி ஆக³ந்தப்³ப³’’ந்தி வத்வா புன ஆஹ – ‘‘ஸமானஸங்வாஸகஸீமாஸம்மன்னநகாலே ஆக³மனம்பி அனாக³மனம்பி வட்டதி. அவிப்பவாஸஸீமாஸம்மன்னநகாலே பன அந்தோனிமித்தக³தேஹி ஆக³ந்தப்³ப³ங், அனாக³ச்ச²ந்தானங் ச²ந்தோ³ ஆஹரிதப்³போ³’’தி.
Imehi ca aṭṭhahi nimittehi asammissehipi aññamaññaṃ sammissehipi sīmaṃ sammannituṃ vaṭṭatiyeva. Sā evaṃ sammannitvā bajjhamānā ekena dvīhi vā nimittehi abaddhā hoti, tīṇi pana ādiṃ katvā vuttappakārānaṃ nimittānaṃ satenāpi baddhā hoti. Sā tīhi siṅghāṭakasaṇṭhānā hoti, catūhi caturassā vā siṅghāṭakaaḍḍhacandamudiṅgādisaṇṭhānā vā, tato adhikehi nānāsaṇṭhānā. Taṃ bandhitukāmehi sāmantavihāresu bhikkhū tassa tassa vihārassa sīmāparicchedaṃ pucchitvā, baddhasīmavihārānaṃ sīmāya sīmantarikaṃ, abaddhasīmavihārānaṃ sīmāya upacāraṃ ṭhapetvā disācārikabhikkhūnaṃ nissañcārasamaye sace ekasmiṃ gāmakhette sīmaṃ bandhitukāmā, ye tattha baddhasīmavihārā, tesu bhikkhūnaṃ ‘‘mayaṃ ajja sīmaṃ bandhissāma, tumhe sakasīmāparicchedato mā nikkhamitthā’’ti pesetabbaṃ. Ye abaddhasīmavihārā, tesu bhikkhū ekajjhaṃ sannipātetabbā, chandārahānaṃ chando āharāpetabbo . Sace aññānipi gāmakkhettāni antokātukāmā , tesu gāmesu ye bhikkhū vasanti, tehipi āgantabbaṃ. Anāgacchantānaṃ chando āharitabboti mahāsumatthero āha. Mahāpadumatthero pana ‘‘nānāgāmakhettāni nāma pāṭekkaṃ baddhasīmāsadisāni, na tato chandapārisuddhi āgacchati. Antonimittagatehi pana bhikkhūhi āgantabba’’nti vatvā puna āha – ‘‘samānasaṃvāsakasīmāsammannanakāle āgamanampi anāgamanampi vaṭṭati. Avippavāsasīmāsammannanakāle pana antonimittagatehi āgantabbaṃ, anāgacchantānaṃ chando āharitabbo’’ti.
ஏவங் ஸன்னிபதிதேஸு பன பி⁴க்கூ²ஸு ச²ந்தா³ரஹானங் ச²ந்தே³ ஆஹடே தேஸு தேஸு மக்³கே³ஸு நதீ³தித்த²கா³மத்³வாராதீ³ஸு ச ஆக³ந்துகபி⁴க்கூ²னங் ஸீக⁴ங் ஸீக⁴ங் ஹத்த²பாஸானயனத்த²ஞ்ச ப³ஹிஸீமாகரணத்த²ஞ்ச ஆராமிகே சேவ ஸமணுத்³தே³ஸே ச ட²பெத்வா பே⁴ரிஸஞ்ஞங் வா ஸங்க²ஸஞ்ஞங் வா கத்வா நிமித்தகித்தனானந்தரங் வுத்தாய ‘‘ஸுணாது மே ப⁴ந்தே ஸங்கோ⁴’’திஆதி³காய கம்மவாசாய ஸீமா ப³ந்தி⁴தப்³பா³. கம்மவாசாபரியோஸானேயேவ நிமித்தானி ப³ஹி கத்வா ஹெட்டா² பத²விஸந்தா⁴ரகங் உத³கங் பரியந்தங் கத்வா ஸீமா க³தா ஹோதி.
Evaṃ sannipatitesu pana bhikkhūsu chandārahānaṃ chande āhaṭe tesu tesu maggesu nadītitthagāmadvārādīsu ca āgantukabhikkhūnaṃ sīghaṃ sīghaṃ hatthapāsānayanatthañca bahisīmākaraṇatthañca ārāmike ceva samaṇuddese ca ṭhapetvā bherisaññaṃ vā saṅkhasaññaṃ vā katvā nimittakittanānantaraṃ vuttāya ‘‘suṇātu me bhante saṅgho’’tiādikāya kammavācāya sīmā bandhitabbā. Kammavācāpariyosāneyeva nimittāni bahi katvā heṭṭhā pathavisandhārakaṃ udakaṃ pariyantaṃ katvā sīmā gatā hoti.
இமங் பன ஸமானஸங்வாஸகஸீமங் ஸம்மன்னந்தேஹி பப்³ப³ஜ்ஜுபஸம்பதா³தீ³னங் ஸங்க⁴கம்மானங் ஸுக²கரணத்த²ங் பட²மங் க²ண்ட³ஸீமா ப³ந்தி⁴தப்³பா³. தங் பன ப³ந்த⁴ந்தேஹி வத்தங் ஜானிதப்³ப³ங். ஸசே ஹி போ³தி⁴சேதியப⁴த்தஸாலாதீ³னி ஸப்³ப³வத்தூ²னி பதிட்டா²பெத்வா கதவிஹாரே ப³ந்த⁴ந்தி, விஹாரமஜ்ஜே² ப³ஹூனங் ஸமோஸரணட்டா²னே அப³ந்தி⁴த்வா விஹாரபச்சந்தே விவித்தோகாஸே ப³ந்தி⁴தப்³பா³. அகதவிஹாரே ப³ந்த⁴ந்தேஹி போ³தி⁴சேதியாதீ³னங் ஸப்³ப³வத்தூ²னங் டா²னங் ஸல்லக்கெ²த்வா யதா² பதிட்டி²தேஸு வத்தூ²ஸு விஹாரபச்சந்தே விவித்தோகாஸே ஹோதி, ஏவங் ப³ந்தி⁴தப்³பா³. ஸா ஹெட்டி²மபரிச்சே²தே³ன ஸசே ஏகவீஸதி பி⁴க்கூ² க³ண்ஹாதி, வட்டதி. ததோ ஓரங் ந வட்டதி, பரங் பி⁴க்கு²ஸஹஸ்ஸங் க³ண்ஹந்தீபி வட்டதி. தங் ப³ந்த⁴ந்தேஹி ஸீமாமாளகஸ்ஸ ஸமந்தா நிமித்துபகா³ பாஸாணா ட²பேதப்³பா³, ந க²ண்ட³ஸீமாய டி²தேஹி மஹாஸீமா ப³ந்தி⁴தப்³பா³, ந மஹாஸீமாய டி²தேஹி க²ண்ட³ஸீமா, க²ண்ட³ஸீமாயமேவ பன ட²த்வா க²ண்ட³ஸீமா ப³ந்தி⁴தப்³பா³, மஹாஸீமாயமேவ ட²த்வா மஹாஸீமா.
Imaṃ pana samānasaṃvāsakasīmaṃ sammannantehi pabbajjupasampadādīnaṃ saṅghakammānaṃ sukhakaraṇatthaṃ paṭhamaṃ khaṇḍasīmā bandhitabbā. Taṃ pana bandhantehi vattaṃ jānitabbaṃ. Sace hi bodhicetiyabhattasālādīni sabbavatthūni patiṭṭhāpetvā katavihāre bandhanti, vihāramajjhe bahūnaṃ samosaraṇaṭṭhāne abandhitvā vihārapaccante vivittokāse bandhitabbā. Akatavihāre bandhantehi bodhicetiyādīnaṃ sabbavatthūnaṃ ṭhānaṃ sallakkhetvā yathā patiṭṭhitesu vatthūsu vihārapaccante vivittokāse hoti, evaṃ bandhitabbā. Sā heṭṭhimaparicchedena sace ekavīsati bhikkhū gaṇhāti, vaṭṭati. Tato oraṃ na vaṭṭati, paraṃ bhikkhusahassaṃ gaṇhantīpi vaṭṭati. Taṃ bandhantehi sīmāmāḷakassa samantā nimittupagā pāsāṇā ṭhapetabbā, na khaṇḍasīmāya ṭhitehi mahāsīmā bandhitabbā, na mahāsīmāya ṭhitehi khaṇḍasīmā, khaṇḍasīmāyameva pana ṭhatvā khaṇḍasīmā bandhitabbā, mahāsīmāyameva ṭhatvā mahāsīmā.
தத்ராயங் ப³ந்த⁴னவிதி⁴ – ஸமந்தா ‘‘ஏஸோ பாஸாணோ நிமித்த’’ந்தி ஏவங் நிமித்தானி கித்தெத்வா கம்மவாசாய ஸீமா ஸம்மன்னிதப்³பா³. அத² தஸ்ஸா ஏவ த³ள்ஹீகம்மத்த²ங் அவிப்பவாஸகம்மவாசா காதப்³பா³. ஏவஞ்ஹி ஸீமங் ஸமூஹனிஸ்ஸாமாதி ஆக³தா ஸமூஹனிதுங் ந ஸக்கி²ஸ்ஸந்தி. ஸீமங் ஸம்மன்னித்வா ப³ஹிஸீமந்தரிகபாஸாணா ட²பேதப்³பா³. ஸீமந்தரிகா பச்சி²மகோடியா ஏகரதனப்பமாணா வட்டதி. வித³த்தி²ப்பமாணாபி வட்டதீதி குருந்தி³யங், சதுரங்கு³லப்பமாணாபி வட்டதீதி மஹாபச்சரியங் வுத்தங். ஸசே பன விஹாரோ மஹா ஹோதி, த்³வேபி திஸ்ஸோபி ததுத்தரிபி க²ண்ட³ஸீமாயோ ப³ந்தி⁴தப்³பா³.
Tatrāyaṃ bandhanavidhi – samantā ‘‘eso pāsāṇo nimitta’’nti evaṃ nimittāni kittetvā kammavācāya sīmā sammannitabbā. Atha tassā eva daḷhīkammatthaṃ avippavāsakammavācā kātabbā. Evañhi sīmaṃ samūhanissāmāti āgatā samūhanituṃ na sakkhissanti. Sīmaṃ sammannitvā bahisīmantarikapāsāṇā ṭhapetabbā. Sīmantarikā pacchimakoṭiyā ekaratanappamāṇā vaṭṭati. Vidatthippamāṇāpi vaṭṭatīti kurundiyaṃ, caturaṅgulappamāṇāpi vaṭṭatīti mahāpaccariyaṃ vuttaṃ. Sace pana vihāro mahā hoti, dvepi tissopi tatuttaripi khaṇḍasīmāyo bandhitabbā.
ஏவங் க²ண்ட³ஸீமங் ஸம்மன்னித்வா மஹாஸீமாஸம்முதிகாலே க²ண்ட³ஸீமதோ நிக்க²மித்வா மஹாஸீமாய ட²த்வா ஸமந்தா அனுபரியாயந்தேஹி ஸீமந்தரிகபாஸாணா கித்தேதப்³பா³. ததோ அவஸேஸனிமித்தானி கித்தெத்வா ஹத்த²பாஸங் அவிஜஹந்தேஹி கம்மவாசாய ஸமானஸங்வாஸகஸீமங் ஸம்மன்னித்வா தஸ்ஸா த³ள்ஹீகம்மத்த²ங் அவிப்பவாஸகம்மவாசாபி காதப்³பா³. ஏவஞ்ஹி ‘‘ஸீமங் ஸமூஹனிஸ்ஸாமா’’தி ஆக³தா ஸமூஹனிதுங் ந ஸக்கி²ஸ்ஸந்தி. ஸசே பன க²ண்ட³ஸீமாய நிமித்தானி கித்தெத்வா ததோ ஸீமந்தரிகாய நிமித்தானி கித்தெத்வா மஹாஸீமாய நிமித்தானி கித்தெந்தி, ஏவங் தீஸு டா²னேஸு நிமித்தானி கித்தெத்வா யங் ஸீமங் இச்ச²ந்தி, தங் பட²மங் ப³ந்தி⁴துங் வட்டதி. ஏவங் ஸந்தேபி யதா²வுத்தேனயேன க²ண்ட³ஸீமதோவ பட்டா²ய ப³ந்தி⁴தப்³பா³. ஏவங் ப³த்³தா⁴ஸு பன ஸீமாஸு க²ண்ட³ஸீமாய டி²தா பி⁴க்கூ² மஹாஸீமாய கம்மங் கரொந்தானங் ந கோபெந்தி, மஹாஸீமாய வா டி²தா க²ண்ட³ஸீமாய கம்மங் கரொந்தானங் ஸீமந்தரிகாய பன டி²தா உபி⁴ன்னம்பி ந கோபெந்தி. கா³மகெ²த்தே ட²த்வா கம்மங் கரொந்தானங் பன ஸீமந்தரிகாய டி²தா கோபெந்தி. ஸீமந்தரிகா ஹி கா³மகெ²த்தங் ப⁴ஜதி.
Evaṃ khaṇḍasīmaṃ sammannitvā mahāsīmāsammutikāle khaṇḍasīmato nikkhamitvā mahāsīmāya ṭhatvā samantā anupariyāyantehi sīmantarikapāsāṇā kittetabbā. Tato avasesanimittāni kittetvā hatthapāsaṃ avijahantehi kammavācāya samānasaṃvāsakasīmaṃ sammannitvā tassā daḷhīkammatthaṃ avippavāsakammavācāpi kātabbā. Evañhi ‘‘sīmaṃ samūhanissāmā’’ti āgatā samūhanituṃ na sakkhissanti. Sace pana khaṇḍasīmāya nimittāni kittetvā tato sīmantarikāya nimittāni kittetvā mahāsīmāya nimittāni kittenti, evaṃ tīsu ṭhānesu nimittāni kittetvā yaṃ sīmaṃ icchanti, taṃ paṭhamaṃ bandhituṃ vaṭṭati. Evaṃ santepi yathāvuttenayena khaṇḍasīmatova paṭṭhāya bandhitabbā. Evaṃ baddhāsu pana sīmāsu khaṇḍasīmāya ṭhitā bhikkhū mahāsīmāya kammaṃ karontānaṃ na kopenti, mahāsīmāya vā ṭhitā khaṇḍasīmāya kammaṃ karontānaṃ sīmantarikāya pana ṭhitā ubhinnampi na kopenti. Gāmakhette ṭhatvā kammaṃ karontānaṃ pana sīmantarikāya ṭhitā kopenti. Sīmantarikā hi gāmakhettaṃ bhajati.
ஸீமா ச நாமேஸா ந கேவலங் பத²விதலேயேவ ப³த்³தா⁴ ப³த்³தா⁴ நாம ஹோதி. அத² கோ² பிட்டி²பாஸாணேபி குடிகே³ஹேபி லேணேபி பாஸாதே³பி பப்³ப³தமத்த²கேபி ப³த்³தா⁴ ப³த்³தா⁴யேவ ஹோதி. தத்த² பிட்டி²பாஸாணே ப³ந்த⁴ந்தேஹி பாஸாணபிட்டி²யங் ராஜிங் வா கொட்டெத்வா உது³க்க²லங் வா க²ணித்வா நிமித்தங் ந காதப்³ப³ங் , நிமித்துபக³பாஸாணே ட²பெத்வா நிமித்தானி கித்தேதப்³பா³னி. கம்மவாசாபரியோஸானே ஸீமா பத²விஸந்தா⁴ரகங் உத³கங் பரியந்தங் கத்வா ஓதரதி. நிமித்தபாஸாணா யதா²டா²னே ந திட்ட²ந்தி, தஸ்மா ஸமந்ததோ ராஜி வா உட்டா²பேதப்³பா³, சதூஸு வா கோணேஸு பாஸாணா விஜ்ஜி²தப்³பா³, ‘‘அயங் ஸீமாபரிச்சே²தோ³’’தி வத்வா அக்க²ரானி வா சி²ந்தி³தப்³பா³னி. கேசி உஸூயகா ஸீமங் ஜா²பெஸ்ஸாமாதி அக்³கி³ங் தெ³ந்தி, பாஸாணாவ ஜா²யந்தி, ந ஸீமா.
Sīmā ca nāmesā na kevalaṃ pathavitaleyeva baddhā baddhā nāma hoti. Atha kho piṭṭhipāsāṇepi kuṭigehepi leṇepi pāsādepi pabbatamatthakepi baddhā baddhāyeva hoti. Tattha piṭṭhipāsāṇe bandhantehi pāsāṇapiṭṭhiyaṃ rājiṃ vā koṭṭetvā udukkhalaṃ vā khaṇitvā nimittaṃ na kātabbaṃ , nimittupagapāsāṇe ṭhapetvā nimittāni kittetabbāni. Kammavācāpariyosāne sīmā pathavisandhārakaṃ udakaṃ pariyantaṃ katvā otarati. Nimittapāsāṇā yathāṭhāne na tiṭṭhanti, tasmā samantato rāji vā uṭṭhāpetabbā, catūsu vā koṇesu pāsāṇā vijjhitabbā, ‘‘ayaṃ sīmāparicchedo’’ti vatvā akkharāni vā chinditabbāni. Keci usūyakā sīmaṃ jhāpessāmāti aggiṃ denti, pāsāṇāva jhāyanti, na sīmā.
குடிகே³ஹேபி ப³ந்த⁴ந்தேஹி பி⁴த்திங் அகித்தெத்வா ஏகவீஸதியா பி⁴க்கூ²னங் ஓகாஸட்டா²னங் அந்தோ கரித்வா பாஸாணனிமித்தானி ட²பெத்வா ஸீமா ஸம்மன்னிதப்³பா³, அந்தோகுட்டமேவ ஸீமா ஹோதி. ஸசே அந்தோகுட்டே ஏகவீஸதியா பி⁴க்கூ²னங் ஓகாஸோ நத்தி², பமுகே² நிமித்தபாஸாணே ட²பெத்வா ஸம்மன்னிதப்³பா³. ஸசே ஏவம்பி நப்பஹோதி, ப³ஹினிப்³போ³த³கபதனட்டா²னேபி நிமித்தானி ட²பெத்வா ஸம்மன்னிதப்³பா³. ஏவங் ஸம்மதாய பன ஸப்³ப³ங் குடிகே³ஹங் ஸீமட்ட²மேவ ஹோதி.
Kuṭigehepi bandhantehi bhittiṃ akittetvā ekavīsatiyā bhikkhūnaṃ okāsaṭṭhānaṃ anto karitvā pāsāṇanimittāni ṭhapetvā sīmā sammannitabbā, antokuṭṭameva sīmā hoti. Sace antokuṭṭe ekavīsatiyā bhikkhūnaṃ okāso natthi, pamukhe nimittapāsāṇe ṭhapetvā sammannitabbā. Sace evampi nappahoti, bahinibbodakapatanaṭṭhānepi nimittāni ṭhapetvā sammannitabbā. Evaṃ sammatāya pana sabbaṃ kuṭigehaṃ sīmaṭṭhameva hoti.
சதுபி⁴த்தியலேணேபி ப³ந்த⁴ந்தேஹி குட்டங் அகித்தெத்வா பாஸாணாவ கித்தேதப்³பா³. ஸசே அந்தோ ஓகாஸோ நத்தி², பமுகே²பி நிமித்தானி ட²பேதப்³பா³னி. ஸசே நப்பஹோதி, ப³ஹி நிப்³போ³த³கபதனட்டா²னேபி நிமித்தபாஸாணே ட²பெத்வா நிமித்தானி கித்தெத்வா ஸீமா ஸம்மன்னிதப்³பா³. ஏவங் லேணஸ்ஸ அந்தோ ச ப³ஹி ச ஸீமா ஹோதி.
Catubhittiyaleṇepi bandhantehi kuṭṭaṃ akittetvā pāsāṇāva kittetabbā. Sace anto okāso natthi, pamukhepi nimittāni ṭhapetabbāni. Sace nappahoti, bahi nibbodakapatanaṭṭhānepi nimittapāsāṇe ṭhapetvā nimittāni kittetvā sīmā sammannitabbā. Evaṃ leṇassa anto ca bahi ca sīmā hoti.
உபரிபாஸாதே³பி பி⁴த்திங் அகித்தெத்வா அந்தோ பாஸாணே ட²பெத்வா ஸீமா ஸம்மன்னிதப்³பா³. ஸசே நப்பஹோதி, பமுகே²பி பாஸாணே ட²பெத்வா ஸம்மன்னிதப்³பா³. ஏவங் ஸம்மதா உபரிபாஸாதே³யேவ ஹோதி, ஹெட்டா² ந ஓதரதி. ஸசே பன ப³ஹூஸு த²ம்பே⁴ஸு துலானங் உபரி கதபாஸாத³ஸ்ஸ ஹெட்டி²மதலே குட்டோ யதா² நிமித்தானங் அந்தோ ஹோதி, ஏவங் உட்ட²ஹித்வா துலாருக்கே²ஹி ஏகஸம்ப³த்³தோ⁴ டி²தோ, ஹெட்டா²பி ஓதரதி. ஏகத²ம்ப⁴பாஸாத³ஸ்ஸ பன உபரிமதலே ப³த்³தா⁴ ஸீமா ஸசே த²ம்ப⁴மத்த²கே ஏகவீஸதியா பி⁴க்கூ²னங் ஓகாஸோ ஹோதி, ஹெட்டா² ஓதரதி. ஸசே பாஸாத³பி⁴த்திதோ நிக்³க³தேஸு நிய்யூஹகாதீ³ஸு பாஸாணே ட²பெத்வா ஸீமங் ப³ந்த⁴ந்தி, பாஸாத³பி⁴த்தி அந்தோஸீமாயங் ஹோதி. ஹெட்டா² பனஸ்ஸா ஓதரணானோதரணங் வுத்தனயேனேவ வேதி³தப்³ப³ங். ஹெட்டா²பாஸாதே³ கித்தெந்தேஹிபி பி⁴த்தி ச ருக்க²த்த²ம்பா⁴ ச ந கித்தேதப்³பா³. பி⁴த்திலக்³கே³ பன பாஸாணத்த²ம்பே⁴ கித்தேதுங் வட்டதி. ஏவங் கித்திதா ஸீமா ஹெட்டா² பாஸாத³ஸ்ஸ பரியந்தத²ம்பா⁴னங் அந்தோயேவ ஹோதி. ஸசே பன ஹெட்டா²பாஸாத³ஸ்ஸ குட்³டோ³ உபரிமதலேன ஸம்ப³த்³தோ⁴ ஹோதி, உபரிபாஸாத³ம்பி அபி⁴ருஹதி. ஸசே பாஸாத³ஸ்ஸ ப³ஹி நிப்³போ³த³கபதனட்டா²னே நிமித்தானி கரொந்தி, ஸப்³போ³ பாஸாதோ³ ஸீமட்டோ² ஹோதி.
Uparipāsādepi bhittiṃ akittetvā anto pāsāṇe ṭhapetvā sīmā sammannitabbā. Sace nappahoti, pamukhepi pāsāṇe ṭhapetvā sammannitabbā. Evaṃ sammatā uparipāsādeyeva hoti, heṭṭhā na otarati. Sace pana bahūsu thambhesu tulānaṃ upari katapāsādassa heṭṭhimatale kuṭṭo yathā nimittānaṃ anto hoti, evaṃ uṭṭhahitvā tulārukkhehi ekasambaddho ṭhito, heṭṭhāpi otarati. Ekathambhapāsādassa pana uparimatale baddhā sīmā sace thambhamatthake ekavīsatiyā bhikkhūnaṃ okāso hoti, heṭṭhā otarati. Sace pāsādabhittito niggatesu niyyūhakādīsu pāsāṇe ṭhapetvā sīmaṃ bandhanti, pāsādabhitti antosīmāyaṃ hoti. Heṭṭhā panassā otaraṇānotaraṇaṃ vuttanayeneva veditabbaṃ. Heṭṭhāpāsāde kittentehipi bhitti ca rukkhatthambhā ca na kittetabbā. Bhittilagge pana pāsāṇatthambhe kittetuṃ vaṭṭati. Evaṃ kittitā sīmā heṭṭhā pāsādassa pariyantathambhānaṃ antoyeva hoti. Sace pana heṭṭhāpāsādassa kuḍḍo uparimatalena sambaddho hoti, uparipāsādampi abhiruhati. Sace pāsādassa bahi nibbodakapatanaṭṭhāne nimittāni karonti, sabbo pāsādo sīmaṭṭho hoti.
பப்³ப³தமத்த²கே தலங் ஹோதி ஏகவீஸதியா பி⁴க்கூ²னங் ஓகாஸாரஹங், தத்த² பிட்டி²பாஸாணே விய ஸீமங் ப³ந்த⁴ந்தி. ஹெட்டா²பப்³ப³தேபி தேனேவ பரிச்சே²தே³ன ஸீமா ஓதரதி. தாலமூலகபப்³ப³தேபி உபரி ஸீமா ப³த்³தா⁴ ஹெட்டா² ஓதரதேவ. யோ பன விதானஸண்டா²னோ ஹோதி, உபரி ஏகவீஸதியா பி⁴க்கூ²னங் ஓகாஸோ அத்தி², ஹெட்டா² நத்தி², தஸ்ஸ உபரி ப³த்³தா⁴ ஸீமா ஹெட்டா² ந ஓதரதி. ஏவங் முதி³ங்க³ஸண்டா²னோ வா ஹோது பணவஸண்டா²னோ வா, யஸ்ஸ ஹெட்டா² வா மஜ்ஜே² வா ஸீமப்பமாணங் நத்தி², தஸ்ஸுபரி ப³த்³தா⁴ ஸீமா ஹெட்டா² நேவ ஓதரதி. யஸ்ஸ பன த்³வே கூடானி ஆஸன்னே டி²தானி, ஏகஸ்ஸபி உபரி ஸீமப்பமாணங் நப்பஹோதி, தஸ்ஸ கூடந்தரங் சினித்வா வா பூரெத்வா வா ஏகாப³த்³த⁴ங் கத்வா உபரி ஸீமா ஸம்மன்னிதப்³பா³.
Pabbatamatthake talaṃ hoti ekavīsatiyā bhikkhūnaṃ okāsārahaṃ, tattha piṭṭhipāsāṇe viya sīmaṃ bandhanti. Heṭṭhāpabbatepi teneva paricchedena sīmā otarati. Tālamūlakapabbatepi upari sīmā baddhā heṭṭhā otarateva. Yo pana vitānasaṇṭhāno hoti, upari ekavīsatiyā bhikkhūnaṃ okāso atthi, heṭṭhā natthi, tassa upari baddhā sīmā heṭṭhā na otarati. Evaṃ mudiṅgasaṇṭhāno vā hotu paṇavasaṇṭhāno vā, yassa heṭṭhā vā majjhe vā sīmappamāṇaṃ natthi, tassupari baddhā sīmā heṭṭhā neva otarati. Yassa pana dve kūṭāni āsanne ṭhitāni, ekassapi upari sīmappamāṇaṃ nappahoti, tassa kūṭantaraṃ cinitvā vā pūretvā vā ekābaddhaṃ katvā upari sīmā sammannitabbā.
ஏகோ ஸப்பப²ணஸதி³ஸோ பப்³ப³தோ, தஸ்ஸுபரி ஸீமப்பமாணஸ்ஸ அத்தி²தாய ஸீமங் ப³ந்த⁴ந்தி, தஸ்ஸ சே ஹெட்டா² ஆகாஸபப்³பா⁴ரங் ஹோதி, ஸீமா ந ஓதரதி. ஸசே பனஸ்ஸ வேமஜ்ஜே² ஸீமப்பமாணோ ஸுஸிரபாஸாணோ ஹோதி, ஓதரதி. ஸோ ச பாஸாணோ ஸீமட்டோ²யேவ ஹோதி. அதா²பிஸ்ஸ ஹெட்டா² லேணஸ்ஸ குட்டோ அக்³க³கோடிங் ஆஹச்ச திட்ட²தி , ஓதரதி, ஹெட்டா² ச உபரி ச ஸீமாயேவ ஹோதி. ஸசே பன ஹெட்டா² உபரிமஸ்ஸ ஸீமாபரிச்சே²த³ஸ்ஸ பாரதோ அந்தோ-லேணங் ஹோதி, ப³ஹி ஸீமா ந ஓதரதி. அதா²பி உபரிமஸ்ஸ ஸீமாபரிச்சே²த³ஸ்ஸ ஓரதோ ப³ஹிலேணங் ஹோதி, அந்தோ ஸீமா ந ஓதரதி. அதா²பி உபரி ஸீமாய பரிச்சே²தோ³ கு²த்³த³கோ, ஹெட்டா² லேணங் மஹந்தங் ஸீமாபரிச்சே²த³மதிக்கமித்வா டி²தங், ஸீமா உபரியேவ ஹோதி, ஹெட்டா² ந ஓதரதி. யதி³ பன லேணங் கு²த்³த³கங் ஸப்³ப³பச்சி²மஸீமாபரிமாணங், உபரி ஸீமா மஹதீ தங் அஜ்ஜொ²த்த²ரித்வா டி²தா, ஸீமா ஓதரதி. அத² லேணங் அதிகு²த்³த³கங் ஸீமப்பமாணங் ந ஹோதி, ஸீமா உபரியேவ ஹோதி, ஹெட்டா² ந ஓதரதி. ஸசே ததோ உபட்³ட⁴ங் பி⁴ஜ்ஜித்வா பததி, ஸீமப்பமாணங் சேபி ஹோதி, ப³ஹி பதிதங் அஸீமா. அபதிதங் பன யதி³ ஸீமப்பமாணங், ஸீமா ஹோதியேவ.
Eko sappaphaṇasadiso pabbato, tassupari sīmappamāṇassa atthitāya sīmaṃ bandhanti, tassa ce heṭṭhā ākāsapabbhāraṃ hoti, sīmā na otarati. Sace panassa vemajjhe sīmappamāṇo susirapāsāṇo hoti, otarati. So ca pāsāṇo sīmaṭṭhoyeva hoti. Athāpissa heṭṭhā leṇassa kuṭṭo aggakoṭiṃ āhacca tiṭṭhati , otarati, heṭṭhā ca upari ca sīmāyeva hoti. Sace pana heṭṭhā uparimassa sīmāparicchedassa pārato anto-leṇaṃ hoti, bahi sīmā na otarati. Athāpi uparimassa sīmāparicchedassa orato bahileṇaṃ hoti, anto sīmā na otarati. Athāpi upari sīmāya paricchedo khuddako, heṭṭhā leṇaṃ mahantaṃ sīmāparicchedamatikkamitvā ṭhitaṃ, sīmā upariyeva hoti, heṭṭhā na otarati. Yadi pana leṇaṃ khuddakaṃ sabbapacchimasīmāparimāṇaṃ, upari sīmā mahatī taṃ ajjhottharitvā ṭhitā, sīmā otarati. Atha leṇaṃ atikhuddakaṃ sīmappamāṇaṃ na hoti, sīmā upariyeva hoti, heṭṭhā na otarati. Sace tato upaḍḍhaṃ bhijjitvā patati, sīmappamāṇaṃ cepi hoti, bahi patitaṃ asīmā. Apatitaṃ pana yadi sīmappamāṇaṃ, sīmā hotiyeva.
க²ண்ட³ஸீமா நீசவத்து²கா ஹோதி, தங் பூரெத்வா உச்சவத்து²கங் கரொந்தி, ஸீமாயேவ. ஸீமாய கே³ஹங் கரொந்தி, ஸீமட்ட²கமேவ ஹோதி. ஸீமாய பொக்க²ரணிங் க²ணந்தி, ஸீமாயேவ. ஓகோ⁴ ஸீமாமண்ட³லங் ஒத்த²ரித்வா க³ச்ச²தி, ஸீமாமாளகே அட்டங் ப³ந்தி⁴த்வா கம்மங் காதுங் வட்டதி. ஸீமாய ஹெட்டா² உமங்க³னதீ³ ஹோதி, இத்³தி⁴மா பி⁴க்கு² தத்த² நிஸீத³தி, ஸசே ஸா நதீ³ பட²மங் க³தா, ஸீமா பச்சா² ப³த்³தா⁴ , கம்மங் ந கோபேதி. அத² பட²மங் ஸீமா ப³த்³தா⁴, பச்சா² நதீ³ க³தா, கம்மங் கோபேதி. ஹெட்டா²பத²விதலே டி²தோ பன கோபேதியேவ.
Khaṇḍasīmā nīcavatthukā hoti, taṃ pūretvā uccavatthukaṃ karonti, sīmāyeva. Sīmāya gehaṃ karonti, sīmaṭṭhakameva hoti. Sīmāya pokkharaṇiṃ khaṇanti, sīmāyeva. Ogho sīmāmaṇḍalaṃ ottharitvā gacchati, sīmāmāḷake aṭṭaṃ bandhitvā kammaṃ kātuṃ vaṭṭati. Sīmāya heṭṭhā umaṅganadī hoti, iddhimā bhikkhu tattha nisīdati, sace sā nadī paṭhamaṃ gatā, sīmā pacchā baddhā , kammaṃ na kopeti. Atha paṭhamaṃ sīmā baddhā, pacchā nadī gatā, kammaṃ kopeti. Heṭṭhāpathavitale ṭhito pana kopetiyeva.
ஸீமாமாளகே வடருக்கோ² ஹோதி, தஸ்ஸ ஸாகா² வா ததோ நிக்³க³தபாரோஹோ வா மஹாஸீமாய பத²விதலங் வா தத்த²ஜாதருக்கா²தீ³னி வா ஆஹச்ச திட்ட²தி, மஹாஸீமங் ஸோதெ⁴த்வா வா கம்மங் காதப்³ப³ங், தே வா ஸாகா²பாரோஹா சி²ந்தி³த்வா ப³ஹிட்ட²கா காதப்³பா³. அனாஹச்ச டி²தஸாகா²தீ³ஸு ஆருள்ஹபி⁴க்கு² ஹத்த²பாஸங் ஆனேதப்³போ³. ஏவங் மஹாஸீமாய ஜாதருக்க²ஸ்ஸ ஸாகா² வா பாரோஹோ வா வுத்தனயேனேவ ஸீமாமாளகே பதிட்டா²தி, வுத்தனயேனேவ ஸீமங் ஸோதெ⁴த்வா வா கம்மங் காதப்³ப³ங், தே வா ஸாகா²பாரோஹா சி²ந்தி³த்வா ப³ஹிட்ட²கா காதப்³பா³.
Sīmāmāḷake vaṭarukkho hoti, tassa sākhā vā tato niggatapāroho vā mahāsīmāya pathavitalaṃ vā tatthajātarukkhādīni vā āhacca tiṭṭhati, mahāsīmaṃ sodhetvā vā kammaṃ kātabbaṃ, te vā sākhāpārohā chinditvā bahiṭṭhakā kātabbā. Anāhacca ṭhitasākhādīsu āruḷhabhikkhu hatthapāsaṃ ānetabbo. Evaṃ mahāsīmāya jātarukkhassa sākhā vā pāroho vā vuttanayeneva sīmāmāḷake patiṭṭhāti, vuttanayeneva sīmaṃ sodhetvā vā kammaṃ kātabbaṃ, te vā sākhāpārohā chinditvā bahiṭṭhakā kātabbā.
ஸசே ஸீமாமாளகே கம்மே கரியமானே கோசி பி⁴க்கு² ஸீமாமாளகஸ்ஸ அந்தோ பவிஸித்வா வேஹாஸட்டி²தஸாகா²ய நிஸீத³தி , பாதா³ வாஸ்ஸ பூ⁴மிக³தா ஹொந்தி, நிவாஸனபாருபனங் வா பூ⁴மிங் பு²ஸதி, கம்மங் காதுங் ந வட்டதி. பாதே³ பன நிவாஸனபாருபனஞ்ச உக்கி²பாபெத்வா காதுங் வட்டதி. இத³ஞ்ச லக்க²ணங் புரிமனயேபி வேதி³தப்³ப³ங். அயங் பன விஸேஸோ – தத்ர உக்கி²பாபெத்வா காதுங் ந வட்டதி, ஹத்த²பாஸமேவ ஆனேதப்³போ³. ஸசே அந்தோஸீமதோ பப்³ப³தோ அப்³பு⁴க³ச்ச²தி, தத்ரட்டோ² பி⁴க்கு² ஹத்த²பாஸங் ஆனேதப்³போ³. இத்³தி⁴யா அந்தோபப்³ப³தங் பவிட்டே²பி ஏஸேவ நயோ. ப³ஜ்ஜ²மானா ஏவ ஹி ஸீமா பமாணரஹிதங் பதே³ஸங் ந ஓதரதி. ப³த்³த⁴ஸீமாய ஜாதங் யங்கிஞ்சி யத்த² கத்த²சி ஏகஸம்ப³த்³தே⁴ன க³தங் ஸீமாஸங்க்²யமேவ க³ச்ச²தீதி.
Sace sīmāmāḷake kamme kariyamāne koci bhikkhu sīmāmāḷakassa anto pavisitvā vehāsaṭṭhitasākhāya nisīdati , pādā vāssa bhūmigatā honti, nivāsanapārupanaṃ vā bhūmiṃ phusati, kammaṃ kātuṃ na vaṭṭati. Pāde pana nivāsanapārupanañca ukkhipāpetvā kātuṃ vaṭṭati. Idañca lakkhaṇaṃ purimanayepi veditabbaṃ. Ayaṃ pana viseso – tatra ukkhipāpetvā kātuṃ na vaṭṭati, hatthapāsameva ānetabbo. Sace antosīmato pabbato abbhugacchati, tatraṭṭho bhikkhu hatthapāsaṃ ānetabbo. Iddhiyā antopabbataṃ paviṭṭhepi eseva nayo. Bajjhamānā eva hi sīmā pamāṇarahitaṃ padesaṃ na otarati. Baddhasīmāya jātaṃ yaṃkiñci yattha katthaci ekasambaddhena gataṃ sīmāsaṅkhyameva gacchatīti.
140. தியோஜனபரமந்தி எத்த² தியோஜனங் பரமங் பமாணமேதிஸ்ஸாதி தியோஜனபரமா; தங் தியோஜனபரமங். ஸம்மன்னந்தேன பன மஜ்ஜே² ட²த்வா யதா² சதூஸுபி தி³ஸாஸு தி³யட்³ட⁴தி³யட்³ட⁴யோஜனங் ஹோதி, ஏவங் ஸம்மன்னிதப்³பா³. ஸசே பன மஜ்ஜே² ட²த்வா ஏகேகதி³ஸதோ தியோஜனங் கரொந்தி, ச²யோஜனங் ஹோதீதி ந வட்டதி. சதுரஸ்ஸங் வா திகோணங் வா ஸம்மன்னந்தேன யதா² கோணதோ கோணங் தியோஜனங் ஹோதி, ஏவங் ஸம்மன்னிதப்³பா³. ஸசே ஹி யேன கேனசி பரியந்தேன கேஸக்³க³மத்தம்பி தியோஜனங் அதிக்காமேதி, ஆபத்திஞ்ச ஆபஜ்ஜதி ஸீமா ச அஸீமா ஹோதி.
140.Tiyojanaparamanti ettha tiyojanaṃ paramaṃ pamāṇametissāti tiyojanaparamā; taṃ tiyojanaparamaṃ. Sammannantena pana majjhe ṭhatvā yathā catūsupi disāsu diyaḍḍhadiyaḍḍhayojanaṃ hoti, evaṃ sammannitabbā. Sace pana majjhe ṭhatvā ekekadisato tiyojanaṃ karonti, chayojanaṃ hotīti na vaṭṭati. Caturassaṃ vā tikoṇaṃ vā sammannantena yathā koṇato koṇaṃ tiyojanaṃ hoti, evaṃ sammannitabbā. Sace hi yena kenaci pariyantena kesaggamattampi tiyojanaṃ atikkāmeti, āpattiñca āpajjati sīmā ca asīmā hoti.
நதீ³பாரந்தி எத்த² பாரயதீதி பாரா. கிங் பாரயதி? நதி³ங். நதி³யா பாரா நதீ³பாரா, தங் நதீ³பாரங்; நதி³ங் அஜ்ஜொ²த்த²ரமானந்தி அத்தோ². எத்த² ச நதி³யா லக்க²ணங் நதீ³னிமித்தே வுத்தனயமேவ. யத்த²ஸ்ஸ து⁴வனாவா வாதி யத்த² நதி³யா ஸீமாப³ந்த⁴னட்டா²னக³தேஸு தித்தே²ஸு நிச்சஸஞ்சரணனாவா அஸ்ஸ, யா ஸப்³ப³ந்திமேன பரிச்சே²தே³ன பாஜனபுரிஸேன ஸத்³தி⁴ங் தயோ ஜனே வஹதி. ஸசே பன ஸா நாவா உத்³த⁴ங் வா அதோ⁴ வா கேனசிதே³வ கரணீயேன புன ஆக³மனத்தா²ய நீதா, சோரேஹி வா ஹடா, அவஸ்ஸங் லப்³ப⁴னெய்யா, யா பன வாதேன வா சி²ன்னப³ந்த⁴னா வீசீஹி நதி³மஜ்ஜ²ங் நீதா அவஸ்ஸங் ஆஹரிதப்³பா³, புன து⁴வனாவாவ ஹோதி. உத³கே ஓக³தே த²லங் உஸ்ஸாரிதாபி ஸுதா⁴கஸடாதீ³ஹி பூரெத்வா ட²பிதாபி து⁴வனாவாவ. ஸசே பி⁴ன்னா வா விஸங்க²தபத³ரா வா ந வட்டதி. மஹாபது³மத்தே²ரோ பனாஹ – ‘‘ஸசேபி தாவகாலிகங் நாவங் ஆனெத்வா ஸீமாப³ந்த⁴னட்டா²னே ட²பெத்வா நிமித்தானி கித்தெந்தி, து⁴வனாவாவ ஹோதீ’’தி. தத்ர மஹாஸுமத்தே²ரோ ஆஹ – ‘‘நிமித்தங் வா ஸீமா வா கம்மவாசாய க³ச்ச²தி ந நாவாய. ப⁴க³வதா ச து⁴வனாவா அனுஞ்ஞாதா, தஸ்மா நிப³த்³த⁴னாவாயேவ வட்டதீ’’தி.
Nadīpāranti ettha pārayatīti pārā. Kiṃ pārayati? Nadiṃ. Nadiyā pārā nadīpārā, taṃ nadīpāraṃ; nadiṃ ajjhottharamānanti attho. Ettha ca nadiyā lakkhaṇaṃ nadīnimitte vuttanayameva. Yatthassa dhuvanāvā vāti yattha nadiyā sīmābandhanaṭṭhānagatesu titthesu niccasañcaraṇanāvā assa, yā sabbantimena paricchedena pājanapurisena saddhiṃ tayo jane vahati. Sace pana sā nāvā uddhaṃ vā adho vā kenacideva karaṇīyena puna āgamanatthāya nītā, corehi vā haṭā, avassaṃ labbhaneyyā, yā pana vātena vā chinnabandhanā vīcīhi nadimajjhaṃ nītā avassaṃ āharitabbā, puna dhuvanāvāva hoti. Udake ogate thalaṃ ussāritāpi sudhākasaṭādīhi pūretvā ṭhapitāpi dhuvanāvāva. Sace bhinnā vā visaṅkhatapadarā vā na vaṭṭati. Mahāpadumatthero panāha – ‘‘sacepi tāvakālikaṃ nāvaṃ ānetvā sīmābandhanaṭṭhāne ṭhapetvā nimittāni kittenti, dhuvanāvāva hotī’’ti. Tatra mahāsumatthero āha – ‘‘nimittaṃ vā sīmā vā kammavācāya gacchati na nāvāya. Bhagavatā ca dhuvanāvā anuññātā, tasmā nibaddhanāvāyeva vaṭṭatī’’ti.
து⁴வஸேது வாதி யத்த² ருக்க²ஸங்கா⁴டமயோ வா பத³ரப³த்³தோ⁴ வா ஜங்க⁴ஸத்த²ஸேது வா ஹத்தி²ஸ்ஸாதீ³னங் ஸஞ்சரணயொக்³கோ³ மஹாஸேது வா அத்தி²; அந்தமஸோ தங்க²ணஞ்ஞேவ ருக்க²ங் சி²ந்தி³த்வா மனுஸ்ஸானங் ஸஞ்சரணயொக்³கோ³ ஏகபதி³கஸேதுபி து⁴வஸேதுத்வேவ ஸங்க்²யங் க³ச்ச²தி. ஸசே பன உபரி ப³த்³தா⁴னி வெத்தலதாதீ³னி ஹத்தே²ன க³ஹெத்வாபி ந ஸக்கா ஹோதி தேன ஸஞ்சரிதுங், ந வட்டதி.
Dhuvasetu vāti yattha rukkhasaṅghāṭamayo vā padarabaddho vā jaṅghasatthasetu vā hatthissādīnaṃ sañcaraṇayoggo mahāsetu vā atthi; antamaso taṅkhaṇaññeva rukkhaṃ chinditvā manussānaṃ sañcaraṇayoggo ekapadikasetupi dhuvasetutveva saṅkhyaṃ gacchati. Sace pana upari baddhāni vettalatādīni hatthena gahetvāpi na sakkā hoti tena sañcarituṃ, na vaṭṭati.
ஏவரூபங் நதீ³பாரஸீமங் ஸம்மன்னிதுந்தி யத்தா²யங் வுத்தப்பகாரா து⁴வனாவா வா து⁴வஸேது வா அபி⁴முக²தித்தே²யேவ அத்தி², ஏவரூபங் நதீ³பாரஸீமங் ஸம்மன்னிதுங் அனுஜானாமீதி அத்தோ². ஸசே து⁴வனாவா வா து⁴வஸேது வா அபி⁴முக²தித்தே² நத்தி², ஈஸகங் உத்³த⁴ங் அபி⁴ருஹித்வா அதோ⁴ வா ஓரோஹித்வா அத்தி², ஏவம்பி வட்டதி. கரவீகதிஸ்ஸத்தே²ரோ பன ‘‘கா³வுதமத்தப்³ப⁴ந்தரேபி வட்டதீ’’தி ஆஹ.
Evarūpaṃ nadīpārasīmaṃ sammannitunti yatthāyaṃ vuttappakārā dhuvanāvā vā dhuvasetu vā abhimukhatittheyeva atthi, evarūpaṃ nadīpārasīmaṃ sammannituṃ anujānāmīti attho. Sace dhuvanāvā vā dhuvasetu vā abhimukhatitthe natthi, īsakaṃ uddhaṃ abhiruhitvā adho vā orohitvā atthi, evampi vaṭṭati. Karavīkatissatthero pana ‘‘gāvutamattabbhantarepi vaṭṭatī’’ti āha.
இமஞ்ச பன நதீ³பாரஸீமங் ஸம்மன்னந்தேன ஏகஸ்மிங் தீரே ட²த்வா உபரிஸோதே நதீ³தீரே நிமித்தங் கித்தெத்வா ததோ பட்டா²ய அத்தானங் பரிக்கி²பந்தேன யத்தகங் பரிச்சே²த³ங் இச்ச²தி, தஸ்ஸ பரியோஸானே அதோ⁴ஸோதேபி நதீ³தீரே நிமித்தங் கித்தெத்வா பரதீரே ஸம்முக²ட்டா²னே நதீ³தீரே நிமித்தங் கித்தேதப்³ப³ங். ததோ பட்டா²ய யத்தகங் பரிச்சே²த³ங் இச்ச²தி, தஸ்ஸ வஸேன யாவ உபரிஸோதே பட²மகித்திதனிமித்தஸ்ஸ ஸம்முகா² நதீ³தீரே நிமித்தங், தாவ கித்தெத்வா பச்சாஹரித்வா பட²மகித்திதனிமித்தேன ஸத்³தி⁴ங் க⁴டேதப்³ப³ங். அத² ஸப்³ப³னிமித்தானங் அந்தோ டி²தே பி⁴க்கூ² ஹத்த²பாஸக³தே கத்வா கம்மவாசாய ஸீமா ஸம்மன்னிதப்³பா³. நதி³யங் டி²தா அனாக³தாபி கம்மங் ந கோபெந்தி. ஸம்முதிபரியோஸானே ட²பெத்வா நதி³ங் நிமித்தானங் அந்தோ பாரதீரே ச ஓரிமதீரே ச ஏகஸீமா ஹோதி. நதீ³ பன ப³த்³த⁴ஸீமாஸங்க்²யங் ந க³ச்ச²தி, விஸுங் நதி³ஸீமா ஏவ ஹி ஸா.
Imañca pana nadīpārasīmaṃ sammannantena ekasmiṃ tīre ṭhatvā uparisote nadītīre nimittaṃ kittetvā tato paṭṭhāya attānaṃ parikkhipantena yattakaṃ paricchedaṃ icchati, tassa pariyosāne adhosotepi nadītīre nimittaṃ kittetvā paratīre sammukhaṭṭhāne nadītīre nimittaṃ kittetabbaṃ. Tato paṭṭhāya yattakaṃ paricchedaṃ icchati, tassa vasena yāva uparisote paṭhamakittitanimittassa sammukhā nadītīre nimittaṃ, tāva kittetvā paccāharitvā paṭhamakittitanimittena saddhiṃ ghaṭetabbaṃ. Atha sabbanimittānaṃ anto ṭhite bhikkhū hatthapāsagate katvā kammavācāya sīmā sammannitabbā. Nadiyaṃ ṭhitā anāgatāpi kammaṃ na kopenti. Sammutipariyosāne ṭhapetvā nadiṃ nimittānaṃ anto pāratīre ca orimatīre ca ekasīmā hoti. Nadī pana baddhasīmāsaṅkhyaṃ na gacchati, visuṃ nadisīmā eva hi sā.
ஸசே அந்தோனதி³யங் தீ³பகோ ஹோதி, தங் அந்தோஸீமாய காதுகாமேன புரிமனயேனேவ அத்தனா டி²ததீரே நிமித்தானி கித்தெத்வா தீ³பகஸ்ஸ ஓரிமந்தே ச பாரிமந்தே ச நிமித்தங் கித்தேதப்³ப³ங். அத² பரதீரே நதி³யா ஓரிமதீரே நிமித்தஸ்ஸ ஸம்முக²ட்டா²னே நிமித்தங் கித்தெத்வா ததோ பட்டா²ய புரிமனயேனேவ யாவ உபரிஸோதே பட²மகித்திதனிமித்தஸ்ஸ ஸம்முகா² நிமித்தங், தாவ கித்தேதப்³ப³ங். அத² தீ³பகஸ்ஸ பாரிமந்தே ச ஓரிமந்தே ச நிமித்தங் கித்தெத்வா பச்சாஹரித்வா பட²மகித்திதனிமித்தேன ஸத்³தி⁴ங் க⁴டேதப்³ப³ங். அத² த்³வீஸு தீரேஸு தீ³பகே ச பி⁴க்கூ² ஸப்³பே³வ ஹத்த²பாஸக³தே கத்வா கம்மவாசாய ஸீமா ஸம்மன்னிதப்³பா³. நதி³யங் டி²தா அனாக³ச்ச²ந்தாபி கம்மங் ந கோபெந்தி. ஸம்முதிபரியோஸானே ட²பெத்வா நதி³ங் நிமித்தானங் அந்தோ தீரத்³வயஞ்ச தீ³பகோ ச ஏகஸீமா ஹோதி, நதீ³ பன நதி³ஸீமாயேவ.
Sace antonadiyaṃ dīpako hoti, taṃ antosīmāya kātukāmena purimanayeneva attanā ṭhitatīre nimittāni kittetvā dīpakassa orimante ca pārimante ca nimittaṃ kittetabbaṃ. Atha paratīre nadiyā orimatīre nimittassa sammukhaṭṭhāne nimittaṃ kittetvā tato paṭṭhāya purimanayeneva yāva uparisote paṭhamakittitanimittassa sammukhā nimittaṃ, tāva kittetabbaṃ. Atha dīpakassa pārimante ca orimante ca nimittaṃ kittetvā paccāharitvā paṭhamakittitanimittena saddhiṃ ghaṭetabbaṃ. Atha dvīsu tīresu dīpake ca bhikkhū sabbeva hatthapāsagate katvā kammavācāya sīmā sammannitabbā. Nadiyaṃ ṭhitā anāgacchantāpi kammaṃ na kopenti. Sammutipariyosāne ṭhapetvā nadiṃ nimittānaṃ anto tīradvayañca dīpako ca ekasīmā hoti, nadī pana nadisīmāyeva.
ஸசே பன தீ³பகோ விஹாரஸீமாபரிச்சே²த³தோ உத்³த⁴ங் வா அதோ⁴ வா அதி⁴கதரோ ஹோதி, அத² விஹாரஸீமாபரிச்சே²த³னிமித்தஸ்ஸ உஜுகமேவ ஸம்முகி²பூ⁴தே தீ³பகஸ்ஸ ஸோரிமந்தே நிமித்தங் கித்தெத்வா ததோ பட்டா²ய தீ³பகஸிக²ரங் பரிக்கி²பந்தோன புன தீ³பகஸ்ஸ ஸோரிமந்தே நிமித்தஸம்முகே² பாரிமந்தே நிமித்தங் கித்தேதப்³ப³ங். ததோ பரங் புரிமனயேனேவ பாரதீரே ஸம்முக²னிமீத்தமாதி³ங்கத்வா பாரதீரனிமித்தானி ச தீ³பகஸ்ஸ பாரிமந்தஸோரிமந்தனிமித்தானி ச கித்தெத்வா பட²மகித்திதனிமித்தேன ஸத்³தி⁴ங் க⁴டனா காதப்³பா³. ஏவங் கித்தெத்வா ஸம்மதா ஸீமா பப்³ப³தஸண்டா³னா ஹோதி.
Sace pana dīpako vihārasīmāparicchedato uddhaṃ vā adho vā adhikataro hoti, atha vihārasīmāparicchedanimittassa ujukameva sammukhibhūte dīpakassa sorimante nimittaṃ kittetvā tato paṭṭhāya dīpakasikharaṃ parikkhipantona puna dīpakassa sorimante nimittasammukhe pārimante nimittaṃ kittetabbaṃ. Tato paraṃ purimanayeneva pāratīre sammukhanimīttamādiṃkatvā pāratīranimittāni ca dīpakassa pārimantasorimantanimittāni ca kittetvā paṭhamakittitanimittena saddhiṃ ghaṭanā kātabbā. Evaṃ kittetvā sammatā sīmā pabbatasaṇḍānā hoti.
ஸசே பன தீ³பகோ விஹாரஸீமாபரிச்சே²த³தோ உத்³த⁴ம்பி அதோ⁴பி அதி⁴கதரோ ஹோதி. புரிமனயேனேவ தீ³பகஸ்ஸ உபோ⁴பி ஸீக²ரானி பரிக்கி²பித்வா நிமித்தானி கித்தெந்தேன நிமித்தக⁴டனா காதப்³பா³. ஏவங் கித்தெத்வா ஸம்மதா ஸீமா முதி³ங்க³ஸண்டா²னா ஹோதி.
Sace pana dīpako vihārasīmāparicchedato uddhampi adhopi adhikataro hoti. Purimanayeneva dīpakassa ubhopi sīkharāni parikkhipitvā nimittāni kittentena nimittaghaṭanā kātabbā. Evaṃ kittetvā sammatā sīmā mudiṅgasaṇṭhānā hoti.
ஸசே தீ³பகோ விஹாரஸீமாபரிச்சே²த³ஸ்ஸ அந்தோ கு²த்³த³கோ ஹோதி, ஸப்³ப³பட²மனயேன தீ³பகே நிமித்தானி கித்தேதப்³பா³னி. ஏவங் கித்தெத்வா ஸம்மதா ஸீமா பணவஸண்டா²னா ஹோதி.
Sace dīpako vihārasīmāparicchedassa anto khuddako hoti, sabbapaṭhamanayena dīpake nimittāni kittetabbāni. Evaṃ kittetvā sammatā sīmā paṇavasaṇṭhānā hoti.
ஸீமானுஜானநகதா² நிட்டி²தா.
Sīmānujānanakathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 71. ஸீமானுஜானநா • 71. Sīmānujānanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸீமானுஜானநகதா²வண்ணனா • Sīmānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸீமானுஜானநகதா²வண்ணனா • Sīmānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸீமானுஜானநகதா²வண்ணனா • Sīmānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 71. ஸீமானுஜானநகதா² • 71. Sīmānujānanakathā
