| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
ஸீமானுஜானநகதா²வண்ணனா
Sīmānujānanakathāvaṇṇanā
138. இதரோபீதி ஸுத்³த⁴பங்ஸுபப்³ப³தாதி³ங் ஸந்தா⁴ய வத³தி. ஹத்தி²ப்பமாணோ நாம பப்³ப³தோ ஹெட்டி²மகோடியா அட்³ட⁴ட்ட²மரதனுப்³பே³தோ⁴. தஸ்மாதி யஸ்மா ஏகேன ந வட்டதி, தஸ்மா. த்³வத்திங்ஸபலகு³ளபிண்ட³ப்பமாணதா தூ²லதாய க³ஹேதப்³பா³, ந துலக³ணனாய. அந்தோஸாரமிஸ்ஸகானந்தி அந்தோஸாரருக்கே²ஹி மிஸ்ஸகானங். ஸூசித³ண்ட³கப்பமாணோதி ஸீஹளதீ³பே லேக²னத³ண்ட³ப்பமாணோதி வத³ந்தி, ஸோ ச கனிட்ட²ங்கு³லிபரிமாணோதி த³ட்ட²ப்³ப³ங். ஏதந்தி நவமூலஸாகா²னிக்³க³மனங். பரபா⁴கே³ கித்தேதுங் வட்டதீதி ப³ஹி நிக்க²மித்வா டி²தேஸு அட்ட²ஸு மக்³கே³ஸு ஏகிஸ்ஸா தி³ஸாய ஏகங், அபராய ஏகந்தி ஏவங் சதூஸு டா²னேஸு கித்தேதுங் வட்டதி.
138.Itaropīti suddhapaṃsupabbatādiṃ sandhāya vadati. Hatthippamāṇo nāma pabbato heṭṭhimakoṭiyā aḍḍhaṭṭhamaratanubbedho. Tasmāti yasmā ekena na vaṭṭati, tasmā. Dvattiṃsapalaguḷapiṇḍappamāṇatā thūlatāya gahetabbā, na tulagaṇanāya. Antosāramissakānanti antosārarukkhehi missakānaṃ. Sūcidaṇḍakappamāṇoti sīhaḷadīpe lekhanadaṇḍappamāṇoti vadanti, so ca kaniṭṭhaṅguliparimāṇoti daṭṭhabbaṃ. Etanti navamūlasākhāniggamanaṃ. Parabhāge kittetuṃ vaṭṭatīti bahi nikkhamitvā ṭhitesu aṭṭhasu maggesu ekissā disāya ekaṃ, aparāya ekanti evaṃ catūsu ṭhānesu kittetuṃ vaṭṭati.
யத்த² கத்த²சி உத்தரந்தியா பி⁴க்கு²னியா அந்தரவாஸகோ தேமியதீதி ஸிக்கா²கரணீயங் ஆக³தலக்க²ணேன திமண்ட³லங் படிச்சா²தெ³த்வா அந்தரவாஸகங் அனுக்கி²பித்வா தித்தே²ன வா அதித்தே²ன வா உத்தரந்தியா பி⁴க்கு²னியா ஏகத்³வங்கு³லமத்தம்பி அந்தரவாஸகோ தேமியதி. பி⁴க்கு²னியா ஏவ க³ஹணஞ்செத்த² பி⁴க்கு²னீவிப⁴ங்கே³ பி⁴க்கு²னியா வஸேன நதீ³லக்க²ணஸ்ஸ பாளியங் ஆக³தத்தா தேனேவ நயேன த³ஸ்ஸனத்த²ங் கதங். ஸீமங் ப³ந்த⁴ந்தானங் நிமித்தங் ஹோதீதி அயங் வுத்தலக்க²ணா நதீ³ ஸமுத்³த³ங் வா பவிஸது தளாகங் வா, பப⁴வதோ பட்டா²ய நிமித்தங் ஹோதி. அஜ்ஜொ²த்த²ரித்வா ஆவரணங் பவத்ததியேவாதி ஆவரணங் அஜ்ஜொ²த்த²ரித்வா ஸந்த³தியேவ. அப்பவத்தமானாதி அஸந்த³மானுத³கா. ஆவரணஞ்ஹி பத்வா நதி³யா யத்தகே பதே³ஸே உத³கங் அஸந்த³மானங் ஸந்திட்ட²தி, தத்த² நதீ³னிமித்தங் காதுங் ந வட்டதி. உபரி ஸந்த³மானட்டா²னேயேவ வட்டதி, அஸந்த³மானட்டா²னே பன உத³கனிமித்தங் காதுங் வட்டதி. டி²தமேவ ஹி உத³கனிமித்தே வட்டதி, ந ஸந்த³மானங். தேனேவாஹ ‘‘பவத்தனட்டா²னே நதீ³னிமித்தங், அப்பவத்தனட்டா²னே உத³கனிமித்தங் காதுங் வட்டதீ’’தி. நதி³ங் பி⁴ந்தி³த்வாதி மாதிகாமுக²த்³வாரேன நதீ³கூலங் பி⁴ந்தி³த்வா. உக்கே²பிமந்தி கூபதோ விய உக்கி²பித்வா க³ஹேதப்³ப³ங்.
Yattha katthaci uttarantiyā bhikkhuniyā antaravāsako temiyatīti sikkhākaraṇīyaṃ āgatalakkhaṇena timaṇḍalaṃ paṭicchādetvā antaravāsakaṃ anukkhipitvā titthena vā atitthena vā uttarantiyā bhikkhuniyā ekadvaṅgulamattampi antaravāsako temiyati. Bhikkhuniyā eva gahaṇañcettha bhikkhunīvibhaṅge bhikkhuniyā vasena nadīlakkhaṇassa pāḷiyaṃ āgatattā teneva nayena dassanatthaṃ kataṃ. Sīmaṃ bandhantānaṃ nimittaṃ hotīti ayaṃ vuttalakkhaṇā nadī samuddaṃ vā pavisatu taḷākaṃ vā, pabhavato paṭṭhāya nimittaṃ hoti. Ajjhottharitvā āvaraṇaṃ pavattatiyevāti āvaraṇaṃ ajjhottharitvā sandatiyeva. Appavattamānāti asandamānudakā. Āvaraṇañhi patvā nadiyā yattake padese udakaṃ asandamānaṃ santiṭṭhati, tattha nadīnimittaṃ kātuṃ na vaṭṭati. Upari sandamānaṭṭhāneyeva vaṭṭati, asandamānaṭṭhāne pana udakanimittaṃ kātuṃ vaṭṭati. Ṭhitameva hi udakanimitte vaṭṭati, na sandamānaṃ. Tenevāha ‘‘pavattanaṭṭhāne nadīnimittaṃ, appavattanaṭṭhāne udakanimittaṃkātuṃ vaṭṭatī’’ti. Nadiṃ bhinditvāti mātikāmukhadvārena nadīkūlaṃ bhinditvā. Ukkhepimanti kūpato viya ukkhipitvā gahetabbaṃ.
ஸிங்கா⁴டகஸண்டா²னாதி திகோணரச்சா²ஸண்டா²னா. முதி³ங்க³ஸண்டா²னாதி முதி³ங்க³பே⁴ரீ விய மஜ்ஜே² வித்த²தா உபோ⁴ஸு கோடீஸு ஸங்கோடிதா ஹோதி. உபசாரங் ட²பெத்வாதி பச்சா² ஸீமங் ப³ந்த⁴ந்தானங் ஸீமாய ஓகாஸங் ட²பெத்வா. அந்தோனிமித்தக³தேஹி பனாதி ஏகஸ்ஸ கா³மஸ்ஸ உபட்³ட⁴ங் அந்தோ கத்துகாமதாய ஸதி ஸப்³பே³ஸங் ஆக³மனே பயோஜனங் நத்தீ²தி கத்வா வுத்தங். ஆக³ந்தப்³ப³ந்தி ச ஸாமீசிவஸேன வுத்தங், நாயங் நியமோ ‘‘ஆக³ந்தப்³ப³மேவா’’தி. தேனேவாஹ ‘‘ஆக³மனம்பி அனாக³மனம்பி வட்டதீ’’தி. அப³த்³தா⁴ய ஹி ஸீமாய நானாகா³மகெ²த்தானங் நானாஸீமஸபா⁴வத்தா தேஸங் அனாக³மனேபி வக்³க³கம்மங் ந ஹோதி, தஸ்மா அனாக³மனம்பி வட்டதி. ப³த்³தா⁴ய பன ஸீமாய ஏகஸீமபா⁴வதோ புன அஞ்ஞஸ்மிங் கம்மே கரியமானே அந்தோ ஸீமக³தேஹி ஆக³ந்தப்³ப³மேவாதி ஆஹ ‘‘அவிப்பவாஸஸீமா…பே॰… ஆக³ந்தப்³ப³’’ந்தி. நிமித்தகித்தனகாலே அஸோதி⁴தாயபி ஸீமாய நேவத்தி² தோ³ஸோ நிமித்தகித்தனஸ்ஸ அபலோகனாதீ³ஸு அஞ்ஞதராபா⁴வதோ.
Siṅghāṭakasaṇṭhānāti tikoṇaracchāsaṇṭhānā. Mudiṅgasaṇṭhānāti mudiṅgabherī viya majjhe vitthatā ubhosu koṭīsu saṅkoṭitā hoti. Upacāraṃ ṭhapetvāti pacchā sīmaṃ bandhantānaṃ sīmāya okāsaṃ ṭhapetvā. Antonimittagatehi panāti ekassa gāmassa upaḍḍhaṃ anto kattukāmatāya sati sabbesaṃ āgamane payojanaṃ natthīti katvā vuttaṃ. Āgantabbanti ca sāmīcivasena vuttaṃ, nāyaṃ niyamo ‘‘āgantabbamevā’’ti. Tenevāha ‘‘āgamanampi anāgamanampi vaṭṭatī’’ti. Abaddhāya hi sīmāya nānāgāmakhettānaṃ nānāsīmasabhāvattā tesaṃ anāgamanepi vaggakammaṃ na hoti, tasmā anāgamanampi vaṭṭati. Baddhāya pana sīmāya ekasīmabhāvato puna aññasmiṃ kamme kariyamāne anto sīmagatehi āgantabbamevāti āha ‘‘avippavāsasīmā…pe… āgantabba’’nti. Nimittakittanakāle asodhitāyapi sīmāya nevatthi doso nimittakittanassa apalokanādīsu aññatarābhāvato.
ப⁴ண்டு³கம்மாபுச்ச²னங் ஸந்தா⁴ய பப்³ப³ஜ்ஜா-க³ஹணங். ஸுக²கரணத்த²ந்தி ஸப்³பே³ஸங் ஸன்னிபாதனபரிஸ்ஸமங் பஹாய அப்பதரேஹி ஸுக²கரணத்த²ங். ஏகவீஸதி பி⁴க்கூ² க³ண்ஹாதீதி வீஸதிவக்³க³கரணீயபரமத்தா ஸங்க⁴கம்மஸ்ஸ கம்மாரஹேன ஸத்³தி⁴ங் ஏகவீஸதி பி⁴க்கூ² க³ண்ஹாதி. இத³ஞ்ச நிஸின்னானங் வஸேன வுத்தங். ஹெட்டி²மந்ததோ ஹி யத்த² ஏகவீஸதி பி⁴க்கூ² நிஸீதி³துங் ஸக்கொந்தி, தத்தகே பதே³ஸே ஸீமங் ப³ந்தி⁴துங் வட்டதி. ந ஸக்கி²ஸ்ஸந்தீதி அவிப்பவாஸஸீமாய ப³த்³த⁴பா⁴வங் அஸல்லக்கெ²த்வா ‘‘ஸமானஸங்வாஸகமேவ ஸமூஹனிஸ்ஸாமா’’தி வாயமந்தா ந ஸக்கி²ஸ்ஸந்தி. ப³த்³தா⁴ய ஹி அவிப்பவாஸஸீமாய தங் அஸமூஹனித்வா ‘‘ஸமானஸங்வாஸகஸீமங் ஸமூஹனிஸ்ஸாமா’’தி கதாயபி கம்மவாசாய அஸமூஹதாவ ஹோதி ஸீமா. பட²மஞ்ஹி அவிப்பவாஸங் ஸமூஹனித்வா பச்சா² ஸீமா ஸமூஹனிதப்³பா³. ஏகரதனப்பமாணா ஸுவிஞ்ஞெய்யதரா ஹோதீதி கத்வா வுத்தங் ‘‘ஏகரதனப்பமாணா வட்டதீ’’தி. ஏகங்கு³லமத்தாபி ஸீமந்தரிகா வட்டதியேவ. தத்தகேனபி ஹி ஸீமா அஸம்பி⁴ன்னாவ ஹோதி.
Bhaṇḍukammāpucchanaṃ sandhāya pabbajjā-gahaṇaṃ. Sukhakaraṇatthanti sabbesaṃ sannipātanaparissamaṃ pahāya appatarehi sukhakaraṇatthaṃ. Ekavīsati bhikkhū gaṇhātīti vīsativaggakaraṇīyaparamattā saṅghakammassa kammārahena saddhiṃ ekavīsati bhikkhū gaṇhāti. Idañca nisinnānaṃ vasena vuttaṃ. Heṭṭhimantato hi yattha ekavīsati bhikkhū nisīdituṃ sakkonti, tattake padese sīmaṃ bandhituṃ vaṭṭati. Na sakkhissantīti avippavāsasīmāya baddhabhāvaṃ asallakkhetvā ‘‘samānasaṃvāsakameva samūhanissāmā’’ti vāyamantā na sakkhissanti. Baddhāya hi avippavāsasīmāya taṃ asamūhanitvā ‘‘samānasaṃvāsakasīmaṃ samūhanissāmā’’ti katāyapi kammavācāya asamūhatāva hoti sīmā. Paṭhamañhi avippavāsaṃ samūhanitvā pacchā sīmā samūhanitabbā. Ekaratanappamāṇā suviññeyyatarā hotīti katvā vuttaṃ ‘‘ekaratanappamāṇā vaṭṭatī’’ti. Ekaṅgulamattāpi sīmantarikā vaṭṭatiyeva. Tattakenapi hi sīmā asambhinnāva hoti.
அவஸேஸனிமித்தானீதி மஹாஸீமாய பா³ஹிரபஸ்ஸே நிமித்தானி. க²ண்ட³ஸீமதோ பட்டா²ய ப³ந்த⁴னங் ஆசிண்ணங், ஆசிண்ணகரணேனேவ ச ஸம்மோஹோ ந ஹோதீதி ஆஹ ‘‘க²ண்ட³ஸீமதோவ பட்டா²ய ப³ந்தி⁴தப்³பா³’’தி. குடிகே³ஹேதி குடிக⁴ரே, பூ⁴மிக⁴ரேதி அத்தோ². உது³க்க²லந்தி கு²த்³த³காவாடங். நிமித்தங் ந காதப்³ப³ந்தி தங் ராஜிங் வா உது³க்க²லங் வா நிமித்தங் ந காதப்³ப³ங்.
Avasesanimittānīti mahāsīmāya bāhirapasse nimittāni. Khaṇḍasīmato paṭṭhāya bandhanaṃ āciṇṇaṃ, āciṇṇakaraṇeneva ca sammoho na hotīti āha ‘‘khaṇḍasīmatova paṭṭhāya bandhitabbā’’ti. Kuṭigeheti kuṭighare, bhūmighareti attho. Udukkhalanti khuddakāvāṭaṃ. Nimittaṃ na kātabbanti taṃ rājiṃ vā udukkhalaṃ vā nimittaṃ na kātabbaṃ.
ஹெட்டா² ந ஓதரதீதி பி⁴த்திதோ ஓரங் நிமித்தானி ட²பெத்வா கித்திதத்தா ஹெட்டா² ஆகாஸப்பதே³ஸங் ந ஓதரதி. ஹெட்டா²பி ஓதரதீதி ஸசே ஹெட்டா² அந்தோபி⁴த்தியங் ஏகவீஸதியா பி⁴க்கூ²னங் ஓகாஸோ ஹோதி, ஓதரதி. ஓதரமானா ச உபரிஸீமப்பமாணேன ந ஓதரதி, ஸமந்தா பி⁴த்திப்பமாணேன ஓதரதி. ஓதரணானோதரணங் வுத்தனயேனேவ வேதி³தப்³ப³ந்தி ஸசே ஹெட்டா² ஏகவீஸதியா பி⁴க்கூ²னங் ஓகாஸோ ஹோதி, ஓதரதி. நோ சே, ந ஓதரதீதி அதி⁴ப்பாயோ. ஸப்³போ³ பாஸாதோ³ ஸீமட்டோ² ஹோதீதி உபரிமதலேன ஸத்³தி⁴ங் ஏகாப³த்³த⁴பி⁴த்திகோ வா ஹோது மா வா, ஸப்³போ³பி பாஸாதோ³ ஸீமட்டோ²வ ஹோதி.
Heṭṭhāna otaratīti bhittito oraṃ nimittāni ṭhapetvā kittitattā heṭṭhā ākāsappadesaṃ na otarati. Heṭṭhāpi otaratīti sace heṭṭhā antobhittiyaṃ ekavīsatiyā bhikkhūnaṃ okāso hoti, otarati. Otaramānā ca uparisīmappamāṇena na otarati, samantā bhittippamāṇena otarati. Otaraṇānotaraṇaṃ vuttanayeneva veditabbanti sace heṭṭhā ekavīsatiyā bhikkhūnaṃ okāso hoti, otarati. No ce, na otaratīti adhippāyo. Sabbo pāsādo sīmaṭṭho hotīti uparimatalena saddhiṃ ekābaddhabhittiko vā hotu mā vā, sabbopi pāsādo sīmaṭṭhova hoti.
தாலமூலகபப்³ப³தேதி தாலமூலஸதி³ஸே பப்³ப³தே. ஸோ ச ஹெட்டா² மஹந்தோ ஹுத்வா அனுபுப்³பே³ன தனுகோ ஹோதீதி த³ட்ட²ப்³ப³ங். பணவஸண்டா²னோ மஜ்ஜே² தனுகோ ஹோதி மூலே அக்³கே³ ச வித்த²தோ. ஹெட்டா² வா மஜ்ஜே² வாதி முதி³ங்க³ஸண்டா²னஸ்ஸ ஹெட்டா² பணவஸண்டா²னஸ்ஸ மஜ்ஜே². ஆகாஸபப்³பா⁴ரந்தி பி⁴த்தியா அபரிக்கி²த்தபப்³பா⁴ரங். அந்தோலேணங் ஹோதீதி பப்³ப³தஸ்ஸ அந்தோ லேணங் ஹோதி. ஸீமாமாளகேதி க²ண்ட³ஸீமாமாளகே. மஹாஸீமங் ஸோதெ⁴த்வா வா கம்மங் காதப்³ப³ந்தி மஹாஸீமக³தா பி⁴க்கூ² ஹத்த²பாஸங் வா ஆனேதப்³பா³, ஸீமதோ வா ப³ஹி காதப்³பா³தி அதி⁴ப்பாயோ. க³ண்டி²பதே³ஸு பன ‘‘மஹாஸீமக³தேஹி பி⁴க்கூ²ஹி தங் ஸாக²ங் வா பாரோஹங் வா அனாமஸித்வா டா²தப்³ப³ந்தி அதி⁴ப்பாயோ’’தி வுத்தங், தங் ந க³ஹேதப்³ப³ங். புரிமனயேபீதி க²ண்ட³ஸீமாய உட்ட²ஹித்வா மஹாஸீமாய ஓணதருக்கே²பி. உக்கி²பாபெத்வா காதுங் ந வட்டதீதி க²ண்ட³ஸீமாய அந்தோ டி²தத்தா ருக்க²ஸ்ஸ தத்த² டி²தோ ஹத்த²பாஸங்யேவ ஆனேதப்³போ³தி உக்கி²பாபெத்வா காதுங் ந வட்டதி.
Tālamūlakapabbateti tālamūlasadise pabbate. So ca heṭṭhā mahanto hutvā anupubbena tanuko hotīti daṭṭhabbaṃ. Paṇavasaṇṭhāno majjhe tanuko hoti mūle agge ca vitthato. Heṭṭhā vā majjhe vāti mudiṅgasaṇṭhānassa heṭṭhā paṇavasaṇṭhānassa majjhe. Ākāsapabbhāranti bhittiyā aparikkhittapabbhāraṃ. Antoleṇaṃ hotīti pabbatassa anto leṇaṃ hoti. Sīmāmāḷaketi khaṇḍasīmāmāḷake. Mahāsīmaṃ sodhetvā vā kammaṃ kātabbanti mahāsīmagatā bhikkhū hatthapāsaṃ vā ānetabbā, sīmato vā bahi kātabbāti adhippāyo. Gaṇṭhipadesu pana ‘‘mahāsīmagatehi bhikkhūhi taṃ sākhaṃ vā pārohaṃ vā anāmasitvā ṭhātabbanti adhippāyo’’ti vuttaṃ, taṃ na gahetabbaṃ. Purimanayepīti khaṇḍasīmāya uṭṭhahitvā mahāsīmāya oṇatarukkhepi. Ukkhipāpetvā kātuṃ na vaṭṭatīti khaṇḍasīmāya anto ṭhitattā rukkhassa tattha ṭhito hatthapāsaṃyeva ānetabboti ukkhipāpetvā kātuṃ na vaṭṭati.
140. பாரயதீதி அஜ்ஜொ²த்த²ரதி. பாராதி ஸீமாபெக்கோ² இத்தி²லிங்க³னித்³தே³ஸோ. அஸ்ஸாதி ப⁴வெய்ய. இதா⁴தி⁴ப்பேதனாவாய பமாணங் த³ஸ்ஸெந்தோ ஆஹ ‘‘யா ஸப்³ப³ந்திமேன பரிச்சே²தே³ன…பே॰… தயோ ஜனே வஹதீ’’தி. இமினா ச வுத்தப்பமாணதோ கு²த்³த³கா நாவா விஜ்ஜமானாபி இத⁴ அஸந்தபக்க²ங் ப⁴ஜதீதி தீ³பேதி. அவஸ்ஸங் லப்³ப⁴னெய்யா து⁴வனாவாவ ஹோதீதி ஸம்ப³ந்தோ⁴. ருக்க²ங் சி²ந்தி³த்வா கதோதி பாட²ஸேஸோ. பரதீரே ஸம்முக²ட்டா²னேதி ஓரிமதீரே ஸப்³ப³பரியந்தனிமித்தஸ்ஸ ஸம்முக²ட்டா²னே. ஸப்³ப³னிமித்தானங் அந்தோ டி²தே பி⁴க்கூ² ஹத்த²பாஸக³தே கத்வாதி எத்த² ஸசே ஏகங் கா³மகெ²த்தங் ஹோதி, உபோ⁴ஸு தீரேஸு ஸப்³ப³னிமித்தானங் அந்தோ டி²தே பி⁴க்கூ² ஹத்த²பாஸக³தே கத்வா ஸம்மன்னிதப்³பா³. நானாகா³மக்கெ²த்தங் சே, ஸமானஸங்வாஸகஸீமாப³ந்த⁴னகாலே அனாக³ந்தும்பி வட்டதி. அவிப்பவாஸஸீமாஸம்முதியங் பன ஆக³ந்தப்³ப³மேவ. யஸ்மா உபோ⁴ஸு தீரேஸு நிமித்தகித்தனமத்தேன தீ³பகோ ஸங்க³ஹிதோ நாம ந ஹோதி, தஸ்மா தீ³பகேபி நிமித்தானி விஸுங் கித்தேதப்³பா³னேவாதி ஆஹ ‘‘தீ³பகஸ்ஸ ஓரிமந்தே ச பாரிமந்தே ச நிமித்தங் கித்தேதப்³ப³’’ந்தி. தீ³பகஸிக²ரந்தி தீ³பகமத்த²கங். பப்³ப³தஸண்டா²னாதி தீ³பகஸ்ஸ ஏகதோ அதி⁴கதரத்தா வுத்தங்.
140.Pārayatīti ajjhottharati. Pārāti sīmāpekkho itthiliṅganiddeso. Assāti bhaveyya. Idhādhippetanāvāya pamāṇaṃ dassento āha ‘‘yā sabbantimena paricchedena…pe… tayo jane vahatī’’ti. Iminā ca vuttappamāṇato khuddakā nāvā vijjamānāpi idha asantapakkhaṃ bhajatīti dīpeti. Avassaṃ labbhaneyyā dhuvanāvāva hotīti sambandho. Rukkhaṃ chinditvā katoti pāṭhaseso. Paratīre sammukhaṭṭhāneti orimatīre sabbapariyantanimittassa sammukhaṭṭhāne. Sabbanimittānaṃ anto ṭhite bhikkhū hatthapāsagate katvāti ettha sace ekaṃ gāmakhettaṃ hoti, ubhosu tīresu sabbanimittānaṃ anto ṭhite bhikkhū hatthapāsagate katvā sammannitabbā. Nānāgāmakkhettaṃ ce, samānasaṃvāsakasīmābandhanakāle anāgantumpi vaṭṭati. Avippavāsasīmāsammutiyaṃ pana āgantabbameva. Yasmā ubhosu tīresu nimittakittanamattena dīpako saṅgahito nāma na hoti, tasmā dīpakepi nimittāni visuṃ kittetabbānevāti āha ‘‘dīpakassaorimante ca pārimante ca nimittaṃ kittetabba’’nti. Dīpakasikharanti dīpakamatthakaṃ. Pabbatasaṇṭhānāti dīpakassa ekato adhikatarattā vuttaṃ.
ஸீமானுஜானநகதா²வண்ணனா நிட்டி²தா.
Sīmānujānanakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 71. ஸீமானுஜானநா • 71. Sīmānujānanā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ஸீமானுஜானநகதா² • Sīmānujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ஸீமானுஜானநகதா²வண்ணனா • Sīmānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸீமானுஜானநகதா²வண்ணனா • Sīmānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 71. ஸீமானுஜானநகதா² • 71. Sīmānujānanakathā
