| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
ஸீமானுஜானநகதா²வண்ணனா
Sīmānujānanakathāvaṇṇanā
138. ஏகாவாஸக³தானங் வஸேன ஸாமக்³கி³ங் படிக்கி²பித்வா ஏகஸீமக³தானங் வஸேன அனுஜானிதுகாமோ ப⁴க³வா ‘‘அனுஜானாமி, பி⁴க்க²வே, ஸீமங் ஸம்மன்னிது’’ந்தி ஆஹ. அத² ஆவாஸபரிச்சே²த³ங் வத்துகாமோ ப⁴வெய்ய. எத்தாவதா ஏகாவாஸோ யாவதா ஏகாஸீமா. ‘‘அனுஜானாமி, பி⁴க்க²வே, ஸீமங் ஸம்மன்னிது’’ந்தி வதெ³ய்ய. தஸ்மா ந இத⁴ அனுஞ்ஞாதப³த்³த⁴ஸீமாவஸேன ஏகாவாஸபரிச்சே²தோ³ ஹோதி, உபசாரஸீமாவஸேனேவ ஹோதீதி வேதி³தப்³ப³ங். கத²ங் ஜானிதப்³ப³ந்தி சே? பாளிதோவ, யதா²ஹ ‘‘தேன கோ² பன ஸமயேன ஆயஸ்மா உபனந்தோ³ ஸக்யபுத்தோ ஏகோ த்³வீஸு ஆவாஸேஸு வஸ்ஸங் வஸி…பே॰… ஏகாதி⁴ப்பாய’’ந்தி (மஹாவ॰ 364). அஞ்ஞதா² வஸ்ஸச்சே²தோ³தி அனிட்ட²ப்பஸங்கோ³வ, கத²ங்? ஏகாவாஸவஸேனேவ சே ஸாமக்³கீ³, ப³ஹுஆவாஸஅனாவாஸேஸு ந ஸம்ப⁴வெய்ய. ததோ ஸோ தங் ஆவாஸங் க³ச்ச²ந்தோ ப³ஹித்³தா⁴ உபோஸத²ங் கரோதி. ‘‘ந, பி⁴க்க²வே, தத³ஹுபோஸதே² ஸபி⁴க்கு²கோ அனாவாஸோ க³ந்தப்³போ³’’திஆதி³ (மஹாவ॰ 181)-பாளிவிரோதோ⁴ ஸதிபி ஸங்கே⁴ அனாவாஸே உபோஸத²ஸ்ஸ அகத்தப்³ப³தோ. அனாவாஸேபி சே ஸாமக்³கீ³ லப்³ப⁴தி, ‘‘எத்தாவதா ஸாமக்³கீ³, யாவதா ஏகாவாஸோ’’தி ந வத்தப்³ப³ங், தஸ்மா ஸப்³ப³தா² புரிமனயோ பச்சி²மேனேவ படிக்கி²த்தோதி கத்வா நானாவாஸவஸேனபி ஸாமக்³கீ³தி வேதி³தப்³ப³ங். ‘‘தங் கம்மங் கரோமாதி வத்வா ந அகங்ஸூ’திஆதீ³ஸு விய அனாக³தம்பி அபெக்க²தி, தஸ்மா ‘கரோமா’தி வுத்தே ந வட்டதீ’’தி வத³ந்தி. ‘‘ஸீமங் அஸோதெ⁴த்வாபி நிமித்தங் கித்தேதுங் வட்டதீ’’தி லிகி²தங். ஹெட்டி²மகோடியா அட்³ட⁴ட்ட²மரதனுப்³பே³தோ⁴ ஹத்தி²ப்பமாணோ. ஸசே ஏகோ ப³த்³தோ⁴ ஹோதி, ந காதப்³போ³தி எத்த² ‘‘சதூஸு தி³ஸாஸு சதுன்னங் பப்³ப³தகூடானங் ஹெட்டா² பிட்டி²பாஸாணஸதி³ஸே பாஸாணே டி²தத்தா ஏகாப³த்³த⁴பா⁴வே ஸதிபி பத²விதோ உத்³த⁴ங் தேஸங் ஸம்ப³ந்தே⁴ அஸதி ஹெட்டா² பத²விக³தஸம்ப³ந்த⁴மத்தே அப்³போ³ஹாரிகங் கத்வா கித்தேதுங் வட்டதி. தேனேவ ‘பிட்டி²பாஸாணோ அதிமஹந்தோபி பாஸாணஸங்க்²யமேவ க³ச்ச²தீ’தி வுத்தங். பத²விதோ ஹெட்டா² தஸ்ஸ மஹந்தபா⁴வே க³ய்ஹமானே பப்³ப³தமேவ ஹோதீ’’தி அனுக³ண்டி²பதே³ வுத்தங். ‘‘சினித்வா கதபங்ஸுபுஞ்ஜே திணகு³ம்ப³ருக்கா² சே ஜாயந்தி, பப்³ப³தோ ஹோதீதி த⁴ம்மஸிரித்தே²ரோ. நேவாதி உபதிஸ்ஸத்தே²ரோ’’தி வுத்தங்.
138. Ekāvāsagatānaṃ vasena sāmaggiṃ paṭikkhipitvā ekasīmagatānaṃ vasena anujānitukāmo bhagavā ‘‘anujānāmi, bhikkhave, sīmaṃ sammannitu’’nti āha. Atha āvāsaparicchedaṃ vattukāmo bhaveyya. Ettāvatā ekāvāso yāvatā ekāsīmā. ‘‘Anujānāmi, bhikkhave, sīmaṃ sammannitu’’nti vadeyya. Tasmā na idha anuññātabaddhasīmāvasena ekāvāsaparicchedo hoti, upacārasīmāvaseneva hotīti veditabbaṃ. Kathaṃ jānitabbanti ce? Pāḷitova, yathāha ‘‘tena kho pana samayena āyasmā upanando sakyaputto eko dvīsu āvāsesu vassaṃ vasi…pe… ekādhippāya’’nti (mahāva. 364). Aññathā vassacchedoti aniṭṭhappasaṅgova, kathaṃ? Ekāvāsavaseneva ce sāmaggī, bahuāvāsaanāvāsesu na sambhaveyya. Tato so taṃ āvāsaṃ gacchanto bahiddhā uposathaṃ karoti. ‘‘Na, bhikkhave, tadahuposathe sabhikkhuko anāvāso gantabbo’’tiādi (mahāva. 181)-pāḷivirodho satipi saṅghe anāvāse uposathassa akattabbato. Anāvāsepi ce sāmaggī labbhati, ‘‘ettāvatā sāmaggī, yāvatā ekāvāso’’ti na vattabbaṃ, tasmā sabbathā purimanayo pacchimeneva paṭikkhittoti katvā nānāvāsavasenapi sāmaggīti veditabbaṃ. ‘‘Taṃ kammaṃ karomāti vatvā na akaṃsū’tiādīsu viya anāgatampi apekkhati, tasmā ‘karomā’ti vutte na vaṭṭatī’’ti vadanti. ‘‘Sīmaṃ asodhetvāpi nimittaṃ kittetuṃ vaṭṭatī’’ti likhitaṃ. Heṭṭhimakoṭiyā aḍḍhaṭṭhamaratanubbedho hatthippamāṇo. Sace eko baddho hoti, na kātabboti ettha ‘‘catūsu disāsu catunnaṃ pabbatakūṭānaṃ heṭṭhā piṭṭhipāsāṇasadise pāsāṇe ṭhitattā ekābaddhabhāve satipi pathavito uddhaṃ tesaṃ sambandhe asati heṭṭhā pathavigatasambandhamatte abbohārikaṃ katvā kittetuṃ vaṭṭati. Teneva ‘piṭṭhipāsāṇo atimahantopi pāsāṇasaṅkhyameva gacchatī’ti vuttaṃ. Pathavito heṭṭhā tassa mahantabhāve gayhamāne pabbatameva hotī’’ti anugaṇṭhipade vuttaṃ. ‘‘Cinitvā katapaṃsupuñje tiṇagumbarukkhā ce jāyanti, pabbato hotīti dhammasiritthero. Nevāti upatissatthero’’ti vuttaṃ.
பாஸாணோதி ‘‘ஸுதா⁴மயபாஸாணோபி வட்டதீ’’தி வத³ந்தி. வீமங்ஸிதப்³ப³ங் இட்ட²காய படிக்கி²த்தத்தா. த்³வத்திங்ஸபலகு³ளபிண்ட³ப்பமாணோ துலதாய, ந துலக³ணனாய. ஸோபீதி கா²ணுகோ விய உட்டி²தபாஸாணோ.
Pāsāṇoti ‘‘sudhāmayapāsāṇopi vaṭṭatī’’ti vadanti. Vīmaṃsitabbaṃ iṭṭhakāya paṭikkhittattā. Dvattiṃsapalaguḷapiṇḍappamāṇo tulatāya, na tulagaṇanāya. Sopīti khāṇuko viya uṭṭhitapāsāṇo.
சதுபஞ்சருக்க²னிமித்தமத்தம்பீதி ஏகச்சேஸு நிமித்தஸத்³தோ³ நத்தி². எத்த² தயோ சே ஸாரருக்கா² ஹொந்தி, த்³வே அஸாரருக்கா², ஸாரருக்கா²னங் ப³ஹுத்தங் இச்சி²தப்³ப³ங். ‘‘ஸுஸானம்பி இத⁴ ‘வனமேவா’தி ஸங்க்²யங் க³ச்ச²தி ஸயங்ஜாதத்தா’’தி வுத்தங். கேசி பன ‘‘சதூஸு த்³வே அந்தோஸாரா சே, வட்டதி. அந்தோஸாரா அதி⁴கா, ஸமா வா, வட்டதி. தஸ்மா ப³ஹூஸுபி த்³வே சே அந்தோஸாரா அத்தி², வட்டதீ’’தி வத³ந்தி.
Catupañcarukkhanimittamattampīti ekaccesu nimittasaddo natthi. Ettha tayo ce sārarukkhā honti, dve asārarukkhā, sārarukkhānaṃ bahuttaṃ icchitabbaṃ. ‘‘Susānampi idha ‘vanamevā’ti saṅkhyaṃ gacchati sayaṃjātattā’’ti vuttaṃ. Keci pana ‘‘catūsu dve antosārā ce, vaṭṭati. Antosārā adhikā, samā vā, vaṭṭati. Tasmā bahūsupi dve ce antosārā atthi, vaṭṭatī’’ti vadanti.
பரபா⁴கே³தி எத்த² ‘‘ஏதேஹி ப³த்³த⁴ட்டா²னதோ க³தத்தா வட்டதி. ததா² தீ³க⁴மக்³கே³பி க³ஹிதட்டா²னதோ க³தட்டா²னஸ்ஸ அஞ்ஞத்தா’’தி வத³ந்தி.
Parabhāgeti ettha ‘‘etehi baddhaṭṭhānato gatattā vaṭṭati. Tathā dīghamaggepi gahitaṭṭhānato gataṭṭhānassa aññattā’’ti vadanti.
அன்வத்³த⁴மாஸந்தி எத்த² ‘‘அனுப³த்³தோ⁴ அத்³த⁴மாஸோ, அத்³த⁴மாஸஸ்ஸ வா அனூ’’தி லிகி²தங். ‘‘அந்தரவாஸகோ தேமியதீ’’தி வுத்தத்தா தத்தகப்பமாணஉத³கேயேவ காதுங் வட்டதீதி கேசி. தேமியதீதி இமினா ஹெட்டி²மகோடியா நதி³லக்க²ணங் வுத்தங். ஏவரூபாய நதி³யா யஸ்மிங் டா²னே சத்தாரோ மாஸே அப்பங் வா ப³ஹுங் வா உத³கங் அஜ்ஜொ²த்த²ரித்வா பவத்ததி, தஸ்மிங் டா²னே அப்போத³கேபி ட²த்வா காதுங் வட்டதீதி ஏகே. ‘‘பவத்தனட்டா²னே நதி³னிமித்த’ந்தி வுத்தத்தா ஸேதுதோ பரதோ தத்தகங் உத³கங் யதி³ பவத்ததி, நதீ³ ஏவா’’தி வத³ந்தி.
Anvaddhamāsanti ettha ‘‘anubaddho addhamāso, addhamāsassa vā anū’’ti likhitaṃ. ‘‘Antaravāsako temiyatī’’ti vuttattā tattakappamāṇaudakeyeva kātuṃ vaṭṭatīti keci. Temiyatīti iminā heṭṭhimakoṭiyā nadilakkhaṇaṃ vuttaṃ. Evarūpāya nadiyā yasmiṃ ṭhāne cattāro māse appaṃ vā bahuṃ vā udakaṃ ajjhottharitvā pavattati, tasmiṃ ṭhāne appodakepi ṭhatvā kātuṃ vaṭṭatīti eke. ‘‘Pavattanaṭṭhāne nadinimitta’nti vuttattā setuto parato tattakaṃ udakaṃ yadi pavattati, nadī evā’’ti vadanti.
ஜாதஸ்ஸராதீ³ஸு டி²தோத³கங் ஜாதஸ்ஸராதி³பதே³ஸேன அனந்தரிகம்பி நிமித்தங் காதுங் வட்டதி நதி³பாரஸீமாய நிமித்தங் விய. ஸசே ஸோ பதே³ஸோ காலந்தரேன கா³மகெ²த்தபா⁴வங் பாபுணாதி, தத்த² அஞ்ஞங் ஸீமங் ஸம்மன்னிதுங் வட்டதி. உக்கே²பிமந்தி உத்³த⁴ரித்வா க³ஹேதப்³ப³கங்.
Jātassarādīsu ṭhitodakaṃ jātassarādipadesena anantarikampi nimittaṃ kātuṃ vaṭṭati nadipārasīmāya nimittaṃ viya. Sace so padeso kālantarena gāmakhettabhāvaṃ pāpuṇāti, tattha aññaṃ sīmaṃ sammannituṃ vaṭṭati. Ukkhepimanti uddharitvā gahetabbakaṃ.
அப³த்³த⁴ஸீமவிஹாரானங் ஸீமாய உபசாரங் ட²பெத்வாதி ‘‘ஆயதிங் ஸம்மன்னிதப்³பா³ய ஓகாஸங் ட²பெத்வா’’தி லிகி²தங். அந்தோனிமித்தக³தேஹி பனாதி ‘‘ஏகஸ்ஸ உபட்³ட⁴ங் அந்தோகத்துகாமதாய ஸதி ஸப்³பே³ஸங் ஆக³மனே பயோஜனங் நத்தீ²தி கத்வா ‘அந்தோனிமித்தக³தேஹீ’தி வுத்தங், தஞ்ச ஸாமீசிவஸேனா’’தி வத³ந்தி. அனாக³மனம்பி வட்டதீதி ‘‘ஸீமாய அப³த்³த⁴த்தா வக்³க³ங் நாம ந ஹோதீ’’தி லிகி²தங். ‘‘அஞ்ஞஸ்மிங் கா³மகெ²த்தே ட²த்வா நிமித்தகித்தனகாலே, ஸமானஸங்வாஸகஸீமாய ஸம்மன்னநகாலே ச ஆக³மனபயோஜனங் நத்தீ²’’தி வுத்தங். பே⁴ரிஸஞ்ஞங் வாதி ‘‘ஸம்மன்னநபரியோஸானங் கரோமாதி வத்வா’’தி லிகி²தங், தேன தாதி³ஸே காலே தங் கப்பதீதி ஸித்³த⁴ங் ஹோதி. கிங் இமினா? ஸுக²கரணத்த²ந்தி மஹாஜனஸன்னிபாதனபரிஸ்ஸமங் அகத்வா அப்பதரேஹி ஸுக²கரணத்த²ங். யதி³ மஹாஸீமாப³ந்த⁴னகாலே அந்தராயோ ஹோதி, தத்தகேனபி ஸுக²விஹாரோதி த³ஸ்ஸனத்த²ங் ‘‘பட²ம’’ந்தி வுத்தந்தி ஏகே. ததோ ஓரங் ந வட்டதீதி கத²ங் பஞ்ஞாயதீதி? வீஸதிவக்³க³கரணீயபரமத்தா ஸங்க⁴கம்மஸ்ஸ. கம்மாரஹேன ஸத்³தி⁴ங் ஏகவீஸதி பி⁴க்கூ² சே க³ண்ஹாதி, வட்டதி. தத்தகப்பமாணங் ஸுக²னிஸஜ்ஜவஸேன வேதி³தப்³ப³ங். தமேவ நிமித்தங் அஞ்ஞேபி கித்தெத்வா ஸசே ப³ந்த⁴ந்தி, வட்டதீதி ஏகே.
Abaddhasīmavihārānaṃ sīmāya upacāraṃ ṭhapetvāti ‘‘āyatiṃ sammannitabbāya okāsaṃ ṭhapetvā’’ti likhitaṃ. Antonimittagatehi panāti ‘‘ekassa upaḍḍhaṃ antokattukāmatāya sati sabbesaṃ āgamane payojanaṃ natthīti katvā ‘antonimittagatehī’ti vuttaṃ, tañca sāmīcivasenā’’ti vadanti. Anāgamanampi vaṭṭatīti ‘‘sīmāya abaddhattā vaggaṃ nāma na hotī’’ti likhitaṃ. ‘‘Aññasmiṃ gāmakhette ṭhatvā nimittakittanakāle, samānasaṃvāsakasīmāya sammannanakāle ca āgamanapayojanaṃ natthī’’ti vuttaṃ. Bherisaññaṃ vāti ‘‘sammannanapariyosānaṃ karomāti vatvā’’ti likhitaṃ, tena tādise kāle taṃ kappatīti siddhaṃ hoti. Kiṃ iminā? Sukhakaraṇatthanti mahājanasannipātanaparissamaṃ akatvā appatarehi sukhakaraṇatthaṃ. Yadi mahāsīmābandhanakāle antarāyo hoti, tattakenapi sukhavihāroti dassanatthaṃ ‘‘paṭhama’’nti vuttanti eke. Tato oraṃ na vaṭṭatīti kathaṃ paññāyatīti? Vīsativaggakaraṇīyaparamattā saṅghakammassa. Kammārahena saddhiṃ ekavīsati bhikkhū ce gaṇhāti, vaṭṭati. Tattakappamāṇaṃ sukhanisajjavasena veditabbaṃ. Tameva nimittaṃ aññepi kittetvā sace bandhanti, vaṭṭatīti eke.
‘‘ஏவங் ப³த்³தா⁴ஸு பன…பே॰… ஸீமந்தரிகா ஹி கா³மகெ²த்தங் ப⁴ஜதீ’’தி ந ஆவாஸவஸேன ஸாமக்³கீ³பரிச்சே²தோ³, கிந்து ஸீமாவஸேனேவாதி த³ஸ்ஸனத்த²ங் வுத்தங். ‘‘நிமித்துபக³பாஸாணே ட²பெத்வா’’தி ஸஞ்சாரிமனிமித்தஸ்ஸ தப்பரதோ வுத்தங். இதோ பட்டா²ய க³ண்டி²பத³க்கமோ ஹோதி – ந ஸக்கி²ஸ்ஸந்தீதி தே அவிப்பவாஸங் அஸல்லக்கெ²த்வா ‘‘ஸமானஸங்வாஸகமேவ ஸமூஹனிஸ்ஸாமா’’தி வாயாமந்தா ஸமூஹனிதுங் ந ஸக்கி²ஸ்ஸந்தி. ‘‘ஏகரதனப்பமாணா’’தி ஸுவிஞ்ஞெய்யந்தரா ஹோதீதி கத்வா வுத்தங். ஏகங்கு³லமத்தம்பி வட்டதேவ. க²ண்ட³ஸீமதோ பட்டா²ய ப³ந்த⁴னங் ஆசிண்ணங். ஆசிண்ணகரணேன விக³தஸம்மோஹோ ஹோதீதி. குடிகே³ஹேதி குடிக⁴ரே பூ⁴மிக⁴ரே. உது³க்க²லங்வாதி பூ⁴மிஉது³க்க²லங் விய கு²த்³த³காவாடங். ‘‘பமுகே²’’தி பூ⁴மிகுடிங் ஸந்தா⁴ய வுத்தந்தி ஏகே. ஹெட்டா² ந ஓதரதீதி பி⁴த்திதோ ஓரங் நிமித்தானி ட²பெத்வா கித்திதத்தா ஹெட்டா² ஆகாஸே ந ஓதரதி, உபரி கதே பாஸாதே³தி அத்தோ². பி⁴த்திலக்³கே³தி பி⁴த்தினிஸ்ஸிதகே. இமே கிர பி⁴த்திலக்³கா³பி ‘‘ஏகாப³த்³தா⁴’’தி ந வுச்சந்தி. ஸப்³போ³ பாஸாதோ³ ஸீமட்டோ² ஹோதீதி ஏகாப³த்³தோ⁴ வா ஹோது, மா வா. தாலமூலகபப்³ப³தோ நாம அனுபுப்³பே³ன தனுகோ. ஆகாஸபப்³பா⁴ரந்தி அபரிக்கே²பபப்³பா⁴ரங். ஸுஸிரபாஸாணோ நாம லேணங் ஹோதி. அந்தோலேணந்தி பப்³ப³தஸ்ஸ அந்தோலேணங். த்³வாரங் பன ஸந்தா⁴ய பரதோ ‘‘ஓரதோ’’தி வுத்தங், ஸப்³ப³தா²பி ஸீமதோ ப³ஹிலேணேன ஓதரதீதி அதி⁴ப்பாயோ.
‘‘Evaṃbaddhāsu pana…pe… sīmantarikā hi gāmakhettaṃ bhajatī’’ti na āvāsavasena sāmaggīparicchedo, kintu sīmāvasenevāti dassanatthaṃ vuttaṃ. ‘‘Nimittupagapāsāṇe ṭhapetvā’’ti sañcārimanimittassa tapparato vuttaṃ. Ito paṭṭhāya gaṇṭhipadakkamo hoti – na sakkhissantīti te avippavāsaṃ asallakkhetvā ‘‘samānasaṃvāsakameva samūhanissāmā’’ti vāyāmantā samūhanituṃ na sakkhissanti. ‘‘Ekaratanappamāṇā’’ti suviññeyyantarā hotīti katvā vuttaṃ. Ekaṅgulamattampi vaṭṭateva. Khaṇḍasīmato paṭṭhāya bandhanaṃ āciṇṇaṃ. Āciṇṇakaraṇena vigatasammoho hotīti. Kuṭigeheti kuṭighare bhūmighare. Udukkhalaṃvāti bhūmiudukkhalaṃ viya khuddakāvāṭaṃ. ‘‘Pamukhe’’ti bhūmikuṭiṃ sandhāya vuttanti eke. Heṭṭhā na otaratīti bhittito oraṃ nimittāni ṭhapetvā kittitattā heṭṭhā ākāse na otarati, upari kate pāsādeti attho. Bhittilaggeti bhittinissitake. Ime kira bhittilaggāpi ‘‘ekābaddhā’’ti na vuccanti. Sabbo pāsādo sīmaṭṭho hotīti ekābaddho vā hotu, mā vā. Tālamūlakapabbato nāma anupubbena tanuko. Ākāsapabbhāranti aparikkhepapabbhāraṃ. Susirapāsāṇo nāma leṇaṃ hoti. Antoleṇanti pabbatassa antoleṇaṃ. Dvāraṃ pana sandhāya parato ‘‘orato’’ti vuttaṃ, sabbathāpi sīmato bahileṇena otaratīti adhippāyo.
மஹாஸீமங் ஸோதெ⁴த்வாதி ஸீமட்ட²ங் தூ³ரக³தம்பி ஸீமக³தங் ஸீமஸம்ப³ந்த⁴ங்வ, தஸ்மா தங் அனாமஸித்வா டா²தப்³ப³ந்தி அதி⁴ப்பாயோ. யதி³ ஏவங் ‘‘தன்னிஸ்ஸிதகங் அபனெத்வா கம்மங் காதுங் வட்டதீ’’தி வத்தப்³ப³ங். மஹாஅட்ட²கதா²யம்பி ‘‘ஸீமங் ஸோதெ⁴த்வா காதப்³ப³’’ந்தி எத்தகமேவ வுத்தங். மஹாதே²ராபி ‘‘ஸோதே⁴தப்³ப³’’மிச்சேவ வத³ந்தீதி ஏகே. ‘‘மஹாஸீமங் ஸோதெ⁴த்வா வா கம்மங் காதப்³ப³’’ந்தி ச பாடோ² அத்தி². ‘‘வுத்தனயேனேவா’’தி ச பரதோ வக்க²தி, தஸ்மா ஸாதா⁴ரணபாடோ²வ ஸுந்த³ரோதி ஏகே. புரிமனயேபீதி க²ண்ட³ஸீமாய உட்ட²ஹித்வா மஹாஸீமாய ஓனதேபீதி அத்தோ². உக்கி²பாபெத்வா காதுங் ந வட்டதி. கஸ்மா? அந்தோ டி²தத்தா. ருக்க²ஸ்ஸ ஹெட்டா² பத²விக³தங் மூலங் க²ண்ட³ஸீமாவ ஹோதி, அப்³போ³ஹாரிகங் வாதி அபரே. ‘‘மஜ்ஜே² பன சி²ன்னே மஹாஸீமாய டி²தமூலங் மஹாஸீமமேவ ப⁴ஜதி, க²ண்ட³ஸீமாய டி²தங் க²ண்ட³ஸீமமேவ ப⁴ஜதி ததா³யத்தபத²விரஸாதீ³ஹி அனுக்³க³ஹிதத்தா’’தி வுத்தங். ‘‘ஸீமாய பச்சா² உட்டி²தருக்கே² நிஸீதி³த்வா கம்மங் காதுங் வட்டதி பச்சா²ஸீமாயங் கதகே³ஹே வியா’’தி வத்வா ‘‘ப³ந்த⁴னகாலே டி²தருக்கே² நிஸீதி³த்வா காதுங் ந வட்டதி உபரிஸீமாய அக³மனதோ’’தி காரணங் வத³ந்தி. ஏவங் ஸதி ப³ந்த⁴னகாலே புன ஆரோஹணங் நாம நத்தி², ப³ந்தி⁴தகாலே ஏவ ஆருஹதீதி ஆபஜ்ஜதி. பச்சா² உட்டி²தருக்கோ² பன தப்படிப³த்³த⁴த்தா ஸீமஸங்க்²யமேவ க³தோ, ஏவங் புப்³பே³ உட்டி²தருக்கோ²பீதி க³ஹேதப்³ப³ங். ‘‘யங் கிஞ்சிபீ’’தி வசனதோ திணாதி³பி ஸங்க³ஹிதங். மஹாதே²ராபி திணங் ஸோதெ⁴த்வாவ கரொந்தீதி.
Mahāsīmaṃ sodhetvāti sīmaṭṭhaṃ dūragatampi sīmagataṃ sīmasambandhaṃva, tasmā taṃ anāmasitvā ṭhātabbanti adhippāyo. Yadi evaṃ ‘‘tannissitakaṃ apanetvā kammaṃ kātuṃ vaṭṭatī’’ti vattabbaṃ. Mahāaṭṭhakathāyampi ‘‘sīmaṃ sodhetvā kātabba’’nti ettakameva vuttaṃ. Mahātherāpi ‘‘sodhetabba’’micceva vadantīti eke. ‘‘Mahāsīmaṃ sodhetvā vā kammaṃ kātabba’’nti ca pāṭho atthi. ‘‘Vuttanayenevā’’ti ca parato vakkhati, tasmā sādhāraṇapāṭhova sundaroti eke. Purimanayepīti khaṇḍasīmāya uṭṭhahitvā mahāsīmāya onatepīti attho. Ukkhipāpetvā kātuṃ na vaṭṭati. Kasmā? Anto ṭhitattā. Rukkhassa heṭṭhā pathavigataṃ mūlaṃ khaṇḍasīmāva hoti, abbohārikaṃ vāti apare. ‘‘Majjhe pana chinne mahāsīmāya ṭhitamūlaṃ mahāsīmameva bhajati, khaṇḍasīmāya ṭhitaṃ khaṇḍasīmameva bhajati tadāyattapathavirasādīhi anuggahitattā’’ti vuttaṃ. ‘‘Sīmāya pacchā uṭṭhitarukkhe nisīditvā kammaṃ kātuṃ vaṭṭati pacchāsīmāyaṃ katagehe viyā’’ti vatvā ‘‘bandhanakāle ṭhitarukkhe nisīditvā kātuṃ na vaṭṭati uparisīmāya agamanato’’ti kāraṇaṃ vadanti. Evaṃ sati bandhanakāle puna ārohaṇaṃ nāma natthi, bandhitakāle eva āruhatīti āpajjati. Pacchā uṭṭhitarukkho pana tappaṭibaddhattā sīmasaṅkhyameva gato, evaṃ pubbe uṭṭhitarukkhopīti gahetabbaṃ. ‘‘Yaṃ kiñcipī’’ti vacanato tiṇādipi saṅgahitaṃ. Mahātherāpi tiṇaṃ sodhetvāva karontīti.
140. யஸ்மா மஜ்ஜ²தோ கோணங் ஹோதி, தஸ்மா ‘‘கோணதோ கோண’’ந்தி வுத்தங். ‘‘ஆபத்திஞ்ச ஆபஜ்ஜதி அசித்தகத்தா’’தி வத³ந்தி. பாரயதீதி அஜ்ஜொ²த்த²ரதி. கா ஸா? ஸீமா. ‘‘யா ஸப்³ப³ந்திமேன…பே॰… வஹதீ’’தி ததோ ஹெட்டி²மா நாவாஸங்க்²யங் ந க³ச்ச²தீதி கத்வா வுத்தந்தி ஏகே, தங் ந யுத்தங் து³தியபாராஜிகே நாவட்ட²ப⁴ண்டா³தி⁴காரே தஸ்ஸாபி அதி⁴ப்பேதத்தா. மஜ்ஜி²மபுரிஸஸ்ஸ பா⁴ரப்பமாணேன வுத்தந்தி ஏகே. பி⁴க்கு²னீனம்பி நதீ³பாரஸீமாஸம்ப⁴வதோ தாஸங் ‘‘ஏகா வா நதீ³பாரங் க³ச்செ²ய்யா’’தி வுத்ததோ³ஸபரிஹரணத்த²ந்தி ஆசரியஸ்ஸ தக்கோ. உப⁴யத்தா²பி து⁴வ-ஸத்³தோ³ க³ஹிதோ. தேன உபோஸத²ந்தராய பரிஹரணத்த²ங் உபோஸத²தி³வஸோ நியமதோவ வுத்தோ. எத்த² ச நாவா நாம பமாணயுத்தா ஸப்³ப³ஸாதா⁴ரணா த²ம்ப⁴னாவா அதி⁴ப்பேதா, ந குல்லனாவாதி நோ தக்கோதி ஆசரியோ. ருக்க²ங் சி²ந்தி³த்வா கதோதி அத்தோ². ஸசே ஏகங் கா³மகெ²த்தங், ஸப்³ப³னிமித்தானங் அந்தோ டி²தே பி⁴க்கூ² ஹத்த²பாஸக³தே கத்வா ஸம்மன்னிதப்³பா³. நானாகா³மகெ²த்தங் சே, அனாக³மனம்பி வட்டதி. உப⁴யதீரே நிமித்தகித்தனமத்தேன தீ³பகோ ஸங்க³ஹிதோ ந ஹோதி, தஸ்மா தீ³பகே நிமித்தானி கித்தேதப்³பா³னேவ. ‘‘நதி³யா ஹெட்டா² நிஸின்னபி⁴க்கு² கம்மங் கோபேதி. உபரியேவ ஹி நதீ³ ஹோதீ’’தி வத³ந்தி.
140. Yasmā majjhato koṇaṃ hoti, tasmā ‘‘koṇato koṇa’’nti vuttaṃ. ‘‘Āpattiñca āpajjati acittakattā’’ti vadanti. Pārayatīti ajjhottharati. Kā sā? Sīmā. ‘‘Yā sabbantimena…pe… vahatī’’ti tato heṭṭhimā nāvāsaṅkhyaṃ na gacchatīti katvā vuttanti eke, taṃ na yuttaṃ dutiyapārājike nāvaṭṭhabhaṇḍādhikāre tassāpi adhippetattā. Majjhimapurisassa bhārappamāṇena vuttanti eke. Bhikkhunīnampi nadīpārasīmāsambhavato tāsaṃ ‘‘ekā vā nadīpāraṃ gaccheyyā’’ti vuttadosapariharaṇatthanti ācariyassa takko. Ubhayatthāpi dhuva-saddo gahito. Tena uposathantarāya pariharaṇatthaṃ uposathadivaso niyamatova vutto. Ettha ca nāvā nāma pamāṇayuttā sabbasādhāraṇā thambhanāvā adhippetā, na kullanāvāti no takkoti ācariyo. Rukkhaṃ chinditvā katoti attho. Sace ekaṃ gāmakhettaṃ, sabbanimittānaṃ anto ṭhite bhikkhū hatthapāsagate katvā sammannitabbā. Nānāgāmakhettaṃ ce, anāgamanampi vaṭṭati. Ubhayatīre nimittakittanamattena dīpako saṅgahito na hoti, tasmā dīpake nimittāni kittetabbāneva. ‘‘Nadiyā heṭṭhā nisinnabhikkhu kammaṃ kopeti. Upariyeva hi nadī hotī’’ti vadanti.
ஸீமானுஜானநகதா²வண்ணனா நிட்டி²தா.
Sīmānujānanakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 71. ஸீமானுஜானநா • 71. Sīmānujānanā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ஸீமானுஜானநகதா² • Sīmānujānanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ஸீமானுஜானநகதா²வண்ணனா • Sīmānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ஸீமானுஜானநகதா²வண்ணனா • Sīmānujānanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 71. ஸீமானுஜானநகதா² • 71. Sīmānujānanakathā
